Канцерогениот линдан од ОХИС 50 години метастазира, секоја власт го игнорира (видео)


Скопје, 13 јануари, 2019 - 10:03 (META) 

Над 50.000 тони канцероген отров повеќе од половина век го уништува здравјето на скопјани и ја загадува почвата, водата и воздухот. Македонската стручна јавност веќе одамна знае за проблемот со линданот закопан во кругот на поранешниот хемиски гигант ОХИС (Органско хемиска индустрија – Скопје). Познати се и последиците кои овој отров ги предизвикува врз здравјето на луѓето и животната средина. Но, сите власти од осамостојувањето до сега го игнорираат најголемиот еколошки проблем во државата.

Оваа токсична бомба веќе половина век е закопана на неколку потврдени и непотврдени локации во Скопје. Двете потврдени депонии со линдан се наоѓаат на територијата на поранешната фабрика ОХИС чија внатрешност сега личи како место погодно за снимање на хорор филм. ohis-napustena-zgrada-for-webВо ОХИС затекнавме напуштени руирнирани згради, искршени прозорци, расфрлани хемикалии, рѓосани буриња полни со разни токсични супстанци и две депонии со линдан кои на прв поглед со ништо не асоцираат дека во нив се крие канцерогена бомба.

Не се знае колку точно тони линдан во 70те и 80те години на минатиот век биле закопани на малата и големата депонија во ОХИС кои потоа биле покриени со земја, но се проценува дека има помеѓу 40 и 50 илјади тони контаминирана почва.

Надлежните убедуваат дека оваа година ќе започне чистењето на линданот во ОХИС, но за целосно да се деконтаминира почвата од двете депонии потребни се помеѓу 40 и 200 милиони евра и тоа би траело од 3 до 5 години.

Чистењето треба да почне годинава

Од Канцеларијата за ПОПс (Persistent organic pollutants) – отпорни органски загадувачи при Министерството за животна средина во разговор за „Мета“ велат дека малата депонија со 10.000 тони почва ќе започне да се чисти до средината на оваа година, за што се обезбедени средства преку Глобалниот еколошки фонд. Во меѓувреме Владата потпиша Меморандум со норвешкото МНР за мобилизирање дополнителни средства за чистење и на големата депонија. Наскоро, со помош на Организацијата  за индустриски развој на Обединетите нации (УНИДО) треба да биде објавен меѓународен повик за избор на технологија за чистење на линданот.

Планот е малата депонија да се чисти во затворени услови, во затворен балон со соодветен притисок за да се спречат дополнителни емисии при ископување. Еден од начините на деконтаминација на почвата е индиреткна термална десорпција. Сузана Андонова од Канцеларијата за ПОПс објаснува дека тоа е всушност процес на загревање на почвата, со уред кој ги собира како кондензат испарените контаминанти.

– Тој кондензат може да биде согорен автоматски, односно на самото место да се уништи или, пак, може да се спакува безбедно и да се однесе во странство на согорување, меѓутоа целата процедура на пакување и транспорт е долга и комплицирана – објаснува Андонова.

Таа додава оти не е рационално целата почва од 50.000 тони да се спакува и да се носи на согорување.

Во најдобро сценарио, проценува Андонова, ако се објави повикот во март, веќе во мај-јуни технологијата треба да почне да работи.

– Кога ќе се донесе технологијата за третирање на лице место, веќе сме завршиле 90 отсто од работата. Кога ќе почнеме со малата депонија, тој што ќе ја обезбеди технологијата, ќе биде обврзан да ја покрие големата депонија со геотекстилна мембрана за да нема понатамошни емисии – вели Андонова.

Технологијата за термална десорпција како најдобра опција ја предлага и поранешниот министер за привлекување странски инвестиции, Аднан Ќахил кој е хемичар и поранешен главен инженер во ОХИС. Според него опремата за термална десорпција може да се користи и за други еколошки жаришта во земјава.

По прочистувањето на почвата планирано е да се изврши биоремедијација, односно чистење со микроорганизми или со растенија, кои ќе го до-чистат остатокот од почвата со пониски концентрации на линдан.

Како настанале депониите со линдан

Фабриката ОХИС освен познатиот прашок за перење „Билјана“ и други детергенти, во седумдесеттите години на минатиот век во одделот за базни хемикалии произведувала и хексахлорциклохексан (ХЦХ) кој има пет изомери. Гама изомерот на овa органскo соединение е всушност линданот кој тогаш бил конкурентен за производство затоа што на големо се користел како инсектицид. Во 2009 година како пестицид влегува во Стокхолмската конвенција која Македонија ја има потпишано во 2005 година и е забранет за употреба во повеќе од 50 земји.

Ќахил, како екс главен инженер во ОХИС, вели дека линданот престанал да се произведува кога се дошло до сознание дека покрај тоа што уништува инсекти, уништува и луѓе и е многу канцерогена супстанца. Објаснува дека линданот се произведувал во големи количества бидејќи ОХИС го опслужувала и југословенскиот пазар, но и пошироко.mala i golema deponija OHIS

– Одеднаш се стави ембарго, забрана на извоз на вакви производи – вели Ќахил објаснувајќи дека потоа е донесена одлуката да се ископаат дупки во кругот на фабриката, тука да се складира линданот и да се прекрие со земја. Така настанале двете депонии.

Според Ќахил, линданот е складиран во прашкаста форма во буриња.

– Велам буриња, но не сум бил присутен и не можам да тврдам со сигурност. Можело да биде во вреќи, но може било фрлано и само со лопати. Но и да било во буриња, толку години се поминати што без разлика и од што да биле направени бурињата, тој веќе е кородиран бидејќи линданот е агресивна супстанца – вели Ќахил.

Освен двете депонии во ОХИС, постојат уште две други

Во кругот на фабриката ОХИС постои и трета депонија во која, според информациите на надлежните, исто така е складиран линдан, но без дополнителни хемиски испитувања на почвата не може да се знае што точно и колку е складирано.

– Имаме информации дека постои депонија на крајот на ОХИС и дека таму наводно има линдан, но додека не направиме прецизни испитувања на почвата, подземните води, околината, не можеме да кажеме дали е тоа вистина. Не се знае колку количина е таму фрлена затоа што и тоа е измешано со почва. Во дупката може има пет тони, а може има и 50 бидејќи не знаеме колку е длабока – вели Ќахил.

Основци на екскурзија веднаш до линданот

Властите, исто така, треба прецизно да ги испитаат и тврдењата на дел од вработените во ОХИС дека во месноста Пеленица, во Драчево, постои уште една дива депонија со линдан. Наводно, уште пред да се направат малата и големата депонија во фабриката таму се складирани 8.000 тони линдан.

Местото кое што е можна локација на дивата депонија, е необележано, неоградено и не постои знак кој информира дека на тоа место е можно да се наоѓа токсичен канцероген отпад. Во непосредна близина на депонијата се наоѓа манастирот Преполовение Руса Среда каде ученици од основните училишта со години се носеа на еднодневни екскурзии.

По пишувањата на „Мета“ за оваа депонија, Министерството за образование им забрани на училиштата таму да организираат екскурзии, а Министерството за животна средина и просторно планирање (МЖСПП) вети дека локацијата ќе биде оградена до крајот на минатата година.

Оградувањето, сепак, не се случи до крајот на 2018 година, а новите најави од Министерството се дека тоа ќе се случи до крајот на јануари. Државната секретарка во МЖСПП Ана Петровска вели дека тоа ќе биде првата јавна набавка на МЖСПП.

Огромни последици врз здравјето

Меѓународната асоцијација за истражување на канцер го класифицира линданот во група 1 канцерогени супстанци со доволно докази дека предизвикува не-Хочкин лимфом. Долготрајната изложеност на линдан со вдишување кај луѓето се поврзува со заболувања на црниот дроб, крвта како и нарушувања на нервниот, кардиоваскуларниот, имунолошкиот и репродуктивниот систем.

lindan slikaАндонова вели дека линданот и сите хемикалии од ПОПс листата од Стокхолмската конвенција имаат слични особини и функционираат на принцип на мимикрија.

-Значи влегува хемикалијата во организмот како прикриена, како замаскирана, а организмот ја препознава како свој хормон, естроген, тестостерон, прогестерон итн и кога ќе ја препознае како таква, дава одговор и ги зајакнува симптомите на хормонски дисбаланс, а тоа го пореметува репродуктивниот систем – вели Андонова и додава дека линданот се таложи во мозокот и предизвикува генетски малформации и ендокрини пореметувања во хипофизата.

Татјана Чакулев од еколошкото здружение „Иницијатива О2“ ги потврдува информациите дека изомерите на ХЦХ се канцерогени, имунотоксични и неуротоксични.

– Предизвикуваат оштетувања на црниот дроб и бубрезите, делуваат на кардиоваскуларниот систем, предизвикуваат репродуктивни пореметувања и развојни дефекти кај децата. Линданот и другите ХЦХ изомери, исто како и диоксините, се таложат во мастите на организмот, се акумулираат и се пренесуваат преку мајчиното млеко на доенчињата. Ја преминуваат плацентата и предизвикуваат пореметувања кај плодот во развој – потенцира Чакулев.

ОХИС крие и други отрови

Освен илјадници тони канцероген линдан, на територијата на ОХИС складирани се и други отровни хемикалии, но никој со сигурност не знае што се се крие таму и во колкава количина.

-Во ОХИС има многу отровни супстанци, има жива, има монохлороцетна киселина, има пестициди, хербициди, фунгициди, полиакрил, естери, ПВЦ во прав и многу други супстанци, постои цела листа на хемикалии кои ги има ОХИС – вели Ќахил и додава дека не знае со сигурнсот дали овие материи се соодветно складирани.buring OHIS

Снимките од дворот на фабриката покажуваат дека најверојатно дел од овие супстанци не се соодветно чувани, а дел од нив се расфрлени по подот на напуштените згради на хемискиот гигант. Во дворот забележавме и кородирани буриња кои служеле за чување на хемикалии кои со тек на времето скапале, па сега хемикалиите се растечени насекаде и впиени во почвата.

Дека во фабриката е складирана жива, која е неуро токсична, потврдува и Андонова.

– Има жива во делот каде што бил погонот за електролиза. И живата исто така ќе биде предмет на идно чистење, а би било добро ако може да се искористи технологијата што ќе се одбере за чистење на лиданот. Нема точни истражувања колкава е количината на жива што ја има таму, но има слики каде што се гледаат цели локви од жива што значи на отворено таа испарува цело време – вели Андонова.

Еколошки приоритет број еден

Меѓу експертите од областа на животната средина воопшто не е новина фактот дека ваков хорор се крие закопан и заборавен во хемиската фабрика ОХИС во Скопје. Отров во огромни колечества на кого властите му оставиле половина век да метастазира и да допре до сите елементи на животната средина: водата, почвата и воздухот. А, преку нив да се прошири и предизвика трајни последици врз здравјето на граѓаните на главниот град.

Автор: Симона Атанасова


Гасоводот на Водно и натаму се гради надвор од прописите


Скопје, 3 декември, 2018 - 16:32 (META) 

Досега не е пристигнато барање од Јавното претпријатие „Македонски eнергетски ресурси“ (МЕР) до Министерството за транспорт и врски за измена во тек на градба за делот од гасоводот преку парк-шумата Водно, изјави за „Мета“ Кире Коцевски, портпаролот на ова министерство во одговор на прашањето дали МЕР, како инвеститор, има добиено дозвола за работа на изменетата траса на гасоводот, на делницата ЛОТ5.

Спред тоа, во моментов багерите кои деновиве работат во густо пошумениот дел на Водно, поблиску до Милениумскиот крст,  извршуваат градежни активности без правосилно решение за измени на дел од трасата.

Новопроектираната траса, која во преговорите со активистите на „Го сакам Водно“, ја ветија МЕР и Градот Скопје, со цел намалување на штетите што ќе ги претрпи шумата на Водно од градењето на гасоводот, се уште ги нема потребните одобренија за да стане легална.

„Се работи на диво, без дозвола, без надзор, без обележаност, целосно нестручно, за што како резултат имаме и неколку бутнати борови кои не се ниту блиску до трасата“, реагираат од „Го сакам Водно“ на нивната фејсбук – страница.

Тие прашуваат каде е „строгиот надзор“ кој беше ветен од градоначалникот на Скопје, Петре Шилегов и од МЕР како предуслов изградбата на гасоводот да продолжи.

Тие прашуваат и каде се инспекциите да излезат на терен за да утврдат дали гасоводот на Водно се гради според важечките законски прописи или тие отворено се забошотуваат.

„До кога граѓаните треба да бидат единствен коректор на самоволието?“, прашуваат екологистите.


Коѕиас: Без Договорот од Преспа не постои решение


Луксембург, 16 октомври, 2018 - 9:24 (META) 

Без прифаќање на Договорот од Преспа не постои никакво решение, порача шефот на грчката дипломатија Никос Коѕиас по состанокот на Советот за надворешни прашања на ЕУ во Луксембург и додаде дека дури и со едноставна математика од основно училиште не е можно да се постигне подобар договор за секоја страна, „како што тврдат опозициите во двете земји“.

Како што јави дописничката на МИА од Атина, Коѕиас рече дека вчерашниот состанок започнал со прашањата поврзани со Македонија.

– Објаснив дека треба да биде сфатено во Скопје дека не постои никакво решение без прифаќање на Договорот од Преспа и дека не е можно да се случи она што го велат двете опозиции во Грција и во ПЈРМ, дека можат да обезбедат еден подобар договор, за секоја страна, бидејќи ова не е изводливо дури и со едноставна аритметика од основно училиште – рече шефот на грчката дипломатија.


Владата со контрамерки ако Косово не ги намали царините на земјоделските производи


Скопје, 20 јули, 2018 - 12:12 (META) 

Во насока на решавање на проблемот со воведените зголемени царини од страна на Косово, министерот за земјоделство, шумарство и водостопанство, Љупчо Николовски, е во постојана комуникација со ресорните министри од регионот, информираат од МЗШВ.

Следната недела е планирана заедничка средба на сите ресорни министри од регионот, на која што ќе присуства и министерот Николовски, а со цел да се заеднички модел за надминување на проблемот.

„Истовремено, Владите на Македонија и на Косово од вчера се во постојана комуникација, за изнаоѓање на соодветно решение. За таа цел, министерот Николовски заедно со министерот за економија Крешник Бектеши, следната недела ќе имаат средба со косовските ресорни министри. Денеска министерот за надворешни работи, Никола Димитров ќе се сретне со државниот врв на Косово. На средбите, меѓудругото, ќе се разговара и за одлуката на Косово за зголемување на царините за увозните земјоделски производи“, се додава во соопштението.

Во текот на вчерашниот ден Министерството за земјоделство,шумарство и водостопанство и Министерството за економија, испратија допис до ЦЕФТА, Европската унија и до Владата на Косово, во кое се бара повлекување на одлуката на Косово за зголемување на царините за увозното овошје и зеленчук. Доколку Косово не ја повлече одлуката, Владата на Република Македонија ќе преземе мерки за заштита на домашното производство.


Заев: Решението е тешко, Грција доби ерга омнес име, ние добивме ерга омнес идентитет


Скопје, 4 јули, 2018 - 12:14 (META) 

Решението кое што го постигнавме со Грција е тешко, тешко е за мене, тешко е за мојот народ, но европската аспирација и нашата должност кон идните генерации се премногу големи, вели премиерот Зоран Заев во интервју за „Еуроактив“.

На прашањето дали опозицијата ќе го отежни имплементирањето на Договорот, Заев вели дека таа е контрадикторна односно истовремено е против измена на Уставот но е за членство во НАТО и ЕУ.

-Ако сме за НАТО и ЕУ, треба да бидеме подготвени за компромис. Во почетокот и јас посакував да нема потреба да се менува Уставот. Но со моќта на аргументите за време на разговорите, стана јасно дека таквата позиција ќе создаде нови проблеми.Ние сакаме еднаш засекогаш да завршиме со проблемите. За да можеме да градиме пријателски односи и да склучуваме договори во корист на нашите две земји и на нашите два народи, и затоа беше направен компромисот. Грција доби ерга омнес за името, ние добивме ерга омнес за идентитетот. Истовремено, се гарантира идентитетот на Македонците што живеат во Грција, ова е јасно поставено. И во овој поглед, јас сум задоволен што имаме праведна и правно здрава одлука – вели Заев.

Тој во интервјуто ја споредува македонската опозиција со грчката опозиција и вели дека тие се многу слични, прават врева, организираат протести, користат навреди односно имаат исти тактики, но сепак убеден е дека кај опозицијата ќе преовладаат здравиот разум, љубовта кон татковината и перспективата на државата.


Бан Ки-мун: Се надевам дека набргу конечно ќе се затвори спорот меѓу двете земји


Сеул, 27 јуни, 2018 - 13:34 (META) 

Охрабрувачки е фактот што се постигна решение, но загрижувачки е фактот што постои незадоволство кај граѓаните, вели поранешниот генерален секретар на ОН, Бан Ки-мун, во изјава за грчката новинска агенција АНА-МПА.

Тој изразува надеж дека што е можно поскоро ќе има дефинитивно затворање на долгогодишниот спор меѓу двете земји.

– Сметам дека е многу охрабрувачки фактот што и двете страни се согласија да го решат долгогодишното прашање за името. Во исто време, исто така, сум загрижен за фактот што постои некакво незадоволство кај граѓаните. Искрено се надевам дека прашањето за името можно е поскоро, дефинитивно ќе се реши – вели поранешниот секретар на ОН.

Бан Ки-мун додава дека прашањето за името било пречка за продлабочување на соработката на двете земји, но и ги „спречувало да ги прошират односите на соработка, не само со Европејците, туку и со другите земји, а се разбира и со Обединетите нации”.

– Навистина се надевам дека ќе го направат последниот чекор – додава Бан Ки-Мун во изјавата за АНА-МПА.


Собранието го ратификуваше Договорот со Грција, за Заев ова е крај на трауматичен спор


Скопје, 20 јуни, 2018 - 13:30 (META) 

Собранието со 69 гласа „за“, без гласови „против“ и воздржани, го ратификуваше Договорот со Грција за решавање на спорот за името. Пратениците на опозициската ВМРО-ДПМНЕ ја бојкотираа седницата и не присуствуваа на гласањето.

На почетокот на расправата, премиерот Зоран Заев рече дека Договорот потпишан во Преспа е решение за спор кој три децении бил трауматичен за Македонија и дека ова е почеток на крајот на неизвесноста која се заканувала дека ќе биде недогледна.

-Постигнавме достоинствено и прифатливо решение за двете страни. Имаме договор со јасни обележја на нашето, на нашиот македонски јазик. Јазикот и идентитетот се македонски. Потписите во Преспа го заштитија нашиот идентитет за век и векова. Никому ништо не сме му подариле, ниту некој ни одзема нешто. Овој храбар чин е решение, кој е во интерес на граѓаните на двете земји. Се издигнавме над стравот. Повикувам да ги отфрлиме ѕидовите на изолација и ксенофобија и да му дадеме шанса на решението, а граѓаните ќе го имаат крајниот збор – рече Заев.

Според премиерот со гласањето на Договорот во Собранието, извесно е дека Македонија ќе добие датум за преговори со ЕУ, а дека НАТО ќе стане реалност.

-Наместо со горчина и гнев од денеска натаму заедно да ги испишуваме овие страници на нашата иднина, со љубов, со надеж, заедништво, солидарност, взаемна радост. Ајде заедно да ги поведеме нашите граѓани заедно кон безбедна и економски стабилна земја. Ова е историски чин и со гласање во парламентот нашите граѓани ќе имаат шанса да донесат одлука за каква иднина се залагаат. Вие, пратениците, сте првата алка која што ќе им овозможи на граѓаните да го остварат демократското право на изјаснување – додаде Заев.

Пратеникот Артан Груби од ДУИ рече дека денешната одлука во Собрание, ја бетонира државноста на Македонија и ја овозможува иднината. Тој вели дека денешниот ден е раскрсница и дека секој од нас а и граѓаните треба да одлучат во која насока ќе се движиме.

-Оваа раскрсница е невообичаена, првата насока е самотија, изолација, втората насока е дестабилизација и несигурност, третата е исток а четвртата е запад. Јас и сите ние заедно овој пат сме на правилната страна на историјата. Херојство е да обезбедиш сигурна иднина за твоите деца, нивните деца и децата по нив. Секој од нас треба да се запраша што правел на пресудниот ден, дали преземал одговорност или со наведната глава и заминал во партиско седиште. Денеска е прекрасен ден, најубав ден, денеска навистина се раѓа новото сонце, вистинското сонце на слободата, правичното сонце – вели Груби.

Костадинов Костадин рече дека пратениците на ВМРО-ДПМНЕ најмалку што можеле да направат е да дојдат и да гласаат против спогодбата, но и дека имаат одговорност за нивните одлуки.

– Решаваме нешто што не беше лесно да се реши, најлесно ќе беше да го оставиме настрана, да продолжиме да живееме во минатото. А иднината ќе беше се подалеку. Граѓаните ни ја дадоа довербата да ги решаваме проблемите, одговорно и државнички решивме да му погледнеме на проблемот во очи – рече Костадинов.

Фросина Ременски од СДСМ смета дека Собранието уште еднаш е исправено пред историска одлука која треба да го трасира европскиот пат на државата. Шпреса Хадри од ДУИ потенцираше дека на партијата од секогаш главна цел и било интеграција во ЕУ и НАТО покрај охридскиот договор.

Амди Бајрам им се заблагодари на премиерот и министерот за надворешни работи за ова решение и ги повика сите Роми да излезат на референдумот и да дадат поддршка.

-Оптимист сум дека 72 до 75 отсто дека референдумот ќе биде успешен – рече Бајрам.

На крајот на седницата во своите завршни зборови Заев му се заблагодари на Димитров и неговиот тим на вицепремиерите Османи Шекеринска, на останатите министри, на сите етнички заедници, на коалиционите партнери, на опозицијата и претседателот, но и на грчката страна која покажала храброст, визија и желба да гради пријателство. Како следен чекор Заев го најави референдум кој рече дека ќе се одржи крајот на септември или почетокот на октомври.


Се надевам дека договорот има широка народна поддршка, рече Лавров


Москва, 13 јуни, 2018 - 14:15 (META) 

Шефот на руската дипломатија Сергеј Лавров изрази надеж дека договорот за новото име на Македонија ќе биде во интерес на Атина и на Скопје и дека ќе го подржат граѓаните и на двете држави.

– Секогаш нагласувавме дека се залагаме за пронаоѓање договор за тој проблем, без мешање однадвор, без поставување на одредени вештачки услови. Говоревме дека ќе го поддржиме решението кое ќе биде во интерес на Грција и на Македонија и кое ќе има широка народна поддршка. Се надевам дека договорот кој вчера беше објавен е токму таков – изјави Лавров на прес-конференцијата во Москва со грчкиот министер за надворешни работи Никос Коѕиас.

Од своја страна, Коѕиас истакна дека надворешната политика на Грција е активна, демократска и повеќепланска. Според него, под овие услови, грчката влада го реши овој проблем со цел да се стави крај на долгогодишниот спор околу името.


Спомениците ќе имаат натписи со појаснувања, химната останува иста, велат од Владата


Скопје, 13 јуни, 2018 - 13:06 (META) 

Државните институции, оние кои се финансираат од државата, ќе мора да се прилагодат и да го следат духот на договорот со Грција, одговори портпаролот на Владата Миле Бошњаковски на прашањето за евентуална промена на имињата на АРМ, МАНУ, МРТ, МНТ.

Тој информираше дека средбата на двајцата премиери Зоран Заев и Алексис Ципрас ќе се одржи викендов. За информациите за некои нови имиња или преселби на спомениците од проектот „Скопје 2014“, Бошњаковски рече дека спомениците остануваат таму каде што се и ќе претставуваат симбол на пријателството.

-На спомениците ќе се стават натписи со појаснување. На пример Воинот на коњ ќе се вика споменик на Александар Македонски со објаснување дека е симбол на хеленскиот антички период и останува како симбол на пријателството меѓу Македонија и Грција. Истото ќе важи и за споменикот на Филип 2 и Олимпија. Сите споменици ќе бидат обележани во насока на зајакнување на пријателството. Не се срамиме да ги нарекуваме спомениците такви како што се – вели Бошњаковски.

Тој рече дека основата на договорот е како Грција го толкува и поимува терминот Македонија.

– Се прави јасна дистинкција што е прифатливо за нас и што е прифатливо за нив. Ние сме Македонци. Официјалното ново име ќе биде преведено на сите јазици. Македонскиот јазик е утврден во ОН и тој останува таков, нема да постои фуснота во ОН. Во договорот постои член во кој велиме дека македонскиот јазик е дел од јужнословенските јазици. Останува македонскиот јазик – рече Бошњаковски.

Тој вели дека нема потреба од грижа, бидејќи граѓаните нема да мора да ги менуваат патните исправи веднаш туку по истекот на нивниот рок.

– Самиот договор е етапен договор, и тој треба да се имплементира во наредните 5 год. Трошоци за граѓаните нема да има, бидејќи нема да се менуваат сите патни исправи одеднаш, туку како им истекува рокот, ќе се менува патната исправа. Тоа се редовни трошоци, не се работи за вонредни трошоци. Оние патни исправи кои постојат, важат се до истекот – изјави Бошњаковски.

Портпаролот на Владата појасни дека државните симболи не беа дел од преговарачкиот процес и дека химната, знамето, грбот и другите симболи не се менуваат и додаде дека договорот ќе биде објавен откако ќе се разгледа и усвои на владина седница.


Договорот и го отвора патот на Македонија кон НАТО и ЕУ, вели британскиот амбасадор


Скопје, 13 јуни, 2018 - 12:52 (META) 

Британскиот амбасадор во Република Македонија, Чарлс Гарет денеска го поздрави постигнатиот договор меѓу премиерите Зоран Заев и Алексис Ципрас за спорот за името посочувајќи дека тоа ќе го отвори патот Македонија да оди напред во евроатлантските интеграции, кон ЕУ и НАТО.

– Тоа не е добро само за Македонија, туку и за регионот – рече Гарет по потпишувањето на Меморандум за соработка со Владата на Република Македонија .

Тој изрази надеж дека Македонија ќе добие датум за почеток на пристапните преговори на состанокот на Советот на ЕУ, а подоцна и покана за членство во НАТО.

Британскиот министер за надворешни работи Борис Џонсон вчера го поздрави постигнатиот договор меѓу премиерите на Македонија и на Грција Зоран Заев и Алексис Ципрас за спорот за името.

„Фантастична вест е дека премиерите Зоран Заев и Алексис Ципрас постигнаа договор за прашањето за името. За ова е потребно лидерство и политичка храброст. Ги охрабрувам сите политички лидери во двете земји да ги препознаат бенефитите што ќе ги донесе решавањето на ова долгогодишно прашање“, напиша британскиот министер за надворешни работи на „Твитер“.