!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Јанева очекува продолжување на рокот и најави истраги за разговори на „разни јазици“


Охрид, 23 јуни, 2017 - 11:17 (META) 

Специјалната јавна обвинителка Катица Јанева очекува за кратко време да се најде решение за продолжување на рокот за поднесување обвиненија и најави дека во периодот што следи СЈО ќе продолжи со отворање истраги за други прислушувани разговори од кои произлегуваат кривични дела.

Ова Јанева го изјави од Охрид, каде учествува на првото издание на Охридската школа на природното право, на тема „Демократија и владеење на правото“, која се одржува оваа недела во научниот и уметнички центар „Уранија“ во Охрид, а е во организација на МАНУ и на Амбасадата на САД во Македонија.

– Мандатот на СЈО е пет години, односно четири години со право за продолжување за уште една година. Ние имаме мандат да работиме и ќе продолжиме да работиме на нашата мисија, односно да ги обработиме сите разговори. Што се однесува до рокот за поднесување обвиненија, тоа е дискутабилно, се разговара на таа тема и се надевам дека ќе се најде решение во најкус можен рок, а очекувајте дека и во периодот што следи исто така ќе отвораме истраги за други прислушувани разговори од кои произлегуваат кривични дела – рече Јанева.

Таа рече дека следната недела СЈО ќе донесе јавнообвинителски одлуки за повеќето од истрагите што досега ги отвори и дека за некои предмети ќе биде запрена истрагата, а за некои ќе бидат поднесени обвиненија.

– Повеќето од истрагите што се веќе спроведени од СЈО очекувам да завршат со обвиненија, за кои лица тоа е мошне важно прашање. За некои ќе има запирање на истрагата и отфрлање на обвиненијата, за некои ќе се поднесе обинителен акт. Но, во секој случај наредната седмица ќе бидат донесени јавнообвинителски одлуки – рече Јанева.

Прашана колку од прислушуваните материјали се обработени досега, специјалната обвинителка рече дека за работа остануваат повеќе од половина материјали, односно 55 отсто, а меѓу нив има многу разговори на новинари и на „разни јазици“.

– Процентулано, 12 отсто се само напишани, 45 отсто се во обработка, вклучително и тие 12 проценти, а 55 отсто се необработени. Но, тука мора да разберете дека има многу новинари, има прислушувани разговори на разни јазици. Тоа е еден дел кој сè уште не сме го почнале, а тоа ќе биде по 15 септември – изјави Јанева.

Инаку, за неколку дена, односно на 30 јуни, истекува рокот од 18 месеци во кој СЈО треба да поднесе обвиненија за случаите што ги отвори, а кои произлегуваат од прислушуваните разговори, кои СДСМ му ги предаде на СЈО на 30 декември 2015 година.

Координаторот на пратеничката група на СДСМ, Томислав Тунтев, вчера информираше дека парламентарното мнозинство следната недела ќе ги поднесе предлог-измените на Законот за заштитени сведоци и на Законот за СЈО, за продолжување на рокот за обвиненија.


СЈО бара од Врховниот суд да пресече за замрзнувањето на имотот на ВМРО-ДПМНЕ


Скопје, 16 јуни, 2017 - 12:32 (META) 

Специјалното јавно обвинителство преку барање за заштита на законитоста испратено до Врховниот суд, ја оспори одлуката на Кривичниот суд, кој одби да замрзне дел од имотот на ВМРО-ДПМНЕ, за кој, според СЈО, постојат сомневања дека е стекнат на криминален начин.

Неофицијално, станува збор за зградата на седиштето на ВМРО-ДПМНЕ, која е дел од имотот што СЈО бара да биде привермено одземен во рамките на случајот „Талир“, во кој високи функционери на партијата, меѓу кои и лидерот Никола Груевски, се товарат за незаконско финансирање на партијата и за перење пари.

Од СЈО денеска соопштија дека со барањето за заштита на законитоста се бара Врховниот суд да утврди „дека е незаконито решението на Кривичниот совет на Основниот суд Скопје 1, со кое е одбиено нивното барање за обезбедување на дел од имотот на една политичка партија“.

Инаку, СЈО на 22 мај оваа година поднесе барање на партијата привремено да ѝ биде одземен имот, односно судот да донесе мерка за забрана за отуѓување на недвижен имот со ставање хипотека поради основано сомневање дека потекнува од кривично дело – злоупотреба на службена положба и овластување.

Но, и судијата на претходна постапка и Кривичниот совет на Основниот суд Скопје 1 го одбија барањето.

„Причините за поднесување на барањето за заштита на законитоста се во фактот што во конкретниот случај се исполнети сите законски претпоставки за обезбедување на имотот што потекнува од кривичното дело, а воедно на првостепениот суд му беше приложен и обемен доказен материјал, проследен со финансиски анализи, кои го поткрeпуваат барањето за обезбедување на имотот. Со барањето за заштита на законитоста, укажано е на неопходноста од толкување на Законот за финансирање на политичките партии во согласност со меѓународните стандарди, врз основа на кои овој закон е донесен, и на околноста дека рестриктивното толкување на првостепениот суд на споменатиот закон е во спротивност и со заложбите за спречување на корупцијата како неопходен услов за градење демократско општество и почитување на принципот на владеењето на правото“, стои во соопштението на СЈО.


Димитров ја укина тајноста на податоците за службените патувања на дипломатите


Скопје, 15 јуни, 2017 - 20:46 (META) 

Министерот за надворешни работи, Никола Димитров, донел решение со кое се укинува тајноста на сите документи што се однесуваат на службените патувања на шефот на дипломатијата и на сите вработени во МНР, соопшти денеска МНР.

Ова значи дека документите поврзани со службени патувања на вработените во Министерството за надворешни работи повторно стануваат информации од јавен карактер, односно медиумите и јавноста ќе имаат пристап до нив.

„Министерството за надворешни работи на Република Македонија ги информира медиумите и пошироката македонска јавност дека во духот на транспарентноста и на отчетноста пред сите граѓани, со решение на министерот за надворешни работи донесено на 12 јуни 2017 година, се укинува претходното решение на заменик-министерот за надворешни работи од 14 февруари 2017 година за класификација на сите документи што се однесуваат на службени патувања на министерот и на сите вработени во Министерството, како и на сите службени патувања на лица кои се во делегација или во придружба на истата“, стои во соопштението.

Од МНР велат дека решението на Димитров е „производ на посветената заложба на Министерството за целосна транспарентност пред граѓаните и пошироката македонска јавност и за отчетност во работата на Министерството и начинот на трошење на парите на даночните обврзници, без притоа да ја загрози сензитивноста или безбедноста на својата работа“.


Министерството за локална самоуправа бара од Собранието итно решение за општините


Скопје, 10 мај, 2017 - 16:17 (META) 

Министерството за локална самоуправа денеска испратило писмо до новоизбраниот претседател на Собранието на Република Македонија, Талат Џафери, со кое бара парламентот во најкус можен рок да направи измени на Изборниот законик за да може општините да продолжат да функционираат и по 15 мај, кога им истекува мандатот на градоначалниците и на советниците.

„Со оглед на настаната состојба поради нераспишувањето на локалните избори и истекот на мандатите на членовите на советите на општините и на градоначалниците на 15 мај, како и по одлуката на Уставниот суд да не поведе постапка по иницијативата на Министерството за локална самоуправа, Министерството за локална самоуправа денеска испрати писмено барање до претседателот на Собранието на Република Македонија, Талат Џафери, за во најкус можен рок да бидат преземени потребните дејства и мерки со кои би се обезбедило уставно и законско функционирање на органите на единиците на локалната самоуправа“, велат од Министерството за локална самоуправа.

Оттаму додаваат дека барањето е испратено до претседателот на Собранието бидејќи датумот на одржување на локалните избори, како и начинот, условите и постапката за избор на членовите на советите и на градоначалниците се уредени со Изборниот законик, а според членот 12 став, став 1 од законот, актот за распишување на изборите го донесува претседателот на Собранието и со него се определува денот кога почнуваат да течат роковите за извршување на изборните дејства и денот на одржувањето на изборите.


Захариев: Владини повереници се можно решение ако дојде до блокада на општините


Штип, 9 мај, 2017 - 16:56 (META) 

Градоначалникот на општина Штип, Илчо Захариев, во пресрет на утрешната седница на Уставниот суд на која треба да се одлучува по иницијативите за продолжување на мандатот на градоначалниците, денеска изјави дека доколу уставните судии ја отфрлат иницијативата, решение на проблемот со функционирањето на општините по 15 мај, може да биде назначување на владини повереници, што, според него, би било во рамките на законот.

– Ние, како градоналници, не смееме да ја напуштиме општината по 15 мај, затоа што мораме да му ја оставиме општината на некој што ќе ја раководи. Битно е деновиве да се донесе одлука. Две решенија се можни: Владата да назначи повереници на кои ќе им ја предадеме општината до наредните избори и, втората варијанта, Собранието на Република Македонија да донесе законски измени за продолжување на актуелната локална власт до распишување на локалните избори – изјави Захариев.

И другите општини се во исчекување на решение со кое ќе се избегне блокадата на локалните власти. Загрижена е и општинската администрација, која последните години неколкукратно се зголеми. Илјадници административци стравуваат за своите плати, за чија исплата, доколку нешто не се промени, ќе нема кој да потпише.

Извесно е дека ќе нема и кој да ги потпишува документите што им се потребни на граѓаните.


Тилерсон и Лавров утре во Вашингтон ќе разговараат за состојбите во Украина и во Сирија


Вашингтон, 9 мај, 2017 - 13:06 (META) 

Државниот секретар на САД, Рекс Тилерсон, утре во Вашингтон ќе се сретне со министерот за надворешни работи на Русија, Сергеј Лавров. Како што соопшти денеска американскиот Стејт департмент, двајцата ќе разговараат за ситуацијата во Украина и во Сирија, како и за билатерални прашања помеѓу САД и Русија.

Во врска со ситуацијата во Украина, Тилерсон и Лавров, стои во соопштението, ќе разговараат за потребата од запирање на насилствата на истокот на земјата и за решавање на конфликтот преку целосна импелентација на Договорот од Минск.

Во врска со Сирија, пак, како што велат од Стејт Департментот, Тилерсон има намера да разговара за напорите за намалување на насилствата, овозможување на хуманитарна помош за населението во Сирија и за подготовка на терен за политичко решавање на конфликтот.


„Протагон“: Нестабилноста може да доведе до притисоци врз Грција за прием на Македонија во НАТО


Атина, 2 мај, 2017 - 13:04 (META) 

Дополнителна нестабилност и граѓански конфликт во Македонија не ѝ оди во прилог на Грција, пишуваат грчките медиуми, кои деновиве будно ги следат случувањата во државата и на Балканот. Грчкиот информативен портал „Протагон“ коментира дека на Атина ѝ е потребна стабилна Македонија за да може во одреден момент да се најде соодветно решение за името, но и за да се запазат економските интереси и соработка кои Грција ги има со македонските бизнис-партнери.

Според „Протагон“, дестабилизацијата на Македонија може да доведе до нови притисоци врз Грција за прием на Македонија во НАТО.

„Јасно е дека Атина сака БЈРМ да биде стабилна. Тоа е единствениот начин во некој момент да се реши спорот за името, кое претставува најважниот отворен спор за Грција на Балканот. Нестабилноста може да ги донесе во прв план барањата и притисоците за прием на БЈРМ во НАТО, како начин да се осигура мирот, а тоа ќе предизвика главоболка во Атина со нерешен спор за името“, се вели во анализата.

Според „Протагон“, Грција е загрижена за ситуацијата и поради економските интереси и соработка, како и за спроведувањето на мерките за градење доверба. Во анализата се посочува дека грчката влада треба многу добро да ги пресмета последиците од можен граѓански конфликт во Македонија и како тоа би влијаело на засилување на албанскиот фактор во регионот, уште една тема за која постои загриженост од грчка страна во овој период.

Грција уште вечерта по крвавите инциденти во македонското собрание испрати апел за смирување на ситуацијата и се понуди, доколку биде побарано од неа, да помогне за намалување на тензијата.

Грчкиот неделник „Реал“ пишува дека премиерот Алексис Ципрас за случувањата во Македонија и на Балканот викендов разговарал со германската канцеларка Ангела Меркел, за време на Самитот на Европската Унија посветен на излегувањето на Велика Британија од Унијата. Според неделникот, двајцата соговорници, наводно, се согласиле Грција да преземе иницијативи за стабилизација на регионот.

Од кабинетот на премиерот Ципрас соопштија дека тој за време на состаноците на самитот изразил голема загриженост за ситуацијата во Македонија и посочил дека Грција останува главен столб на стабилност во регионот.


Груевски: Нови избори се решение – ако СДСМ победи, нека направи влада


Скопје, 25 април, 2017 - 15:22 (META) 

Најдобар излез од оваа ситуација е да се оди веднаш на брзи предвремени избори, заедно со редовните планирани локални избори, кои, патем, заради чекорите на СДСМ се одложија, изјави денеска лидерот на ВМРО-ДПМНЕ, Никола Груевски, одговарајќи на новинарско прашање за време на неговата посета на Општината Ѓорче Петров.

Тој го повика СДСМ да прифати нови избори и, како што рече, „ако го добије мнозинството, да направи влада“.

– Нека излезат тие со она што го нудат, со она што го прифатиле, со тиранската палтформа, со сè што сакаат. Ако граѓаните тоа им го одобрат, ако добијат мнозинство гласови, нека направат влада и нека го исполнат тоа што го наумиле и тоа што некаде го ветиле – рече Груевски.

Тој истакна дека и граѓаните кои секој ден протестираат на улиците ги преформулирале своите барања и сега бараат одржување на нови предвремени парламентарни избори.

– Како што видовме пред некој ден, граѓаните веќе ги преформулираа своите барања. Тие сфаќаат дека Заев не може да се откаже од тиранската платформа, дека ја има преземено, дека има дадено цврсти ветувања, практично дека можеби е уценет или на некој начин нема излез. И затоа, претпоставувам, се преформулира нивното барање во барање за предвремени избори… Меѓу 100.000 и 200.000 граѓани секој ден маршираат низ улиците во околу 30 градови во Македонија. Тоа е нешто за што опозицијата, односно СДСМ и партиите со неа треба да се замислат и треба да излезат во пресрет на народот, во пресрет на граѓаните, бидејќи, на крајот на краиштата, тие се тие што не само во декември, туку и во иднина треба да гласаат во Македонија и да даваат поддршка на една или на друга партија – изјави Груевски.


Ахмети – Тимоние: ВМРО-ДПМНЕ и СДСМ без одложување да најдат решение за кризата


Тетово, 20 април, 2017 - 15:57 (META) 

Лидерот на ДУИ, Али Ахмети, денеска во Тетово имал средба со амбасадорот на Франција во земјава, Кристијан Тимоние, на која, како што соопштуваат од партијата, било разговарано за политичката ситуација во Македонија, геополитичкитe околности и за можности за решавање на политичката и институционална криза.

Ахмети на средбата ги образложил „сите конструктивни чекори што ДУИ ги презела за излез од кризата, а во согланост со очекувањата на граѓаните и на меѓународната заедница“.

– ДУИ, како победничка партија на Албанците, даде поддршка на реформското парламентарно мнозинство за да се формира нова влада, која ќе ја спроведува агендата и однапред утврдената програма од страна на меѓународната заедница преку строго спроведување на реформите во судството, заокружување на Охридскиот рамковен договор и на евроатлантските интеграции – рекол Ахмети на средбата.

Тој го информирал Тимоние дека ДУИ продолжила со дополнителни напори за решавање на кризата и дека ги поканил двете македонски политички партии да се вклучат без одложување во наоѓањето решение заради остварување мир, стабилност и безбедност на граѓаните.

– Секое доцнење претставува можност за противниците на нашиот пат кон интеграцијата во НАТО и во Европската Унија да го прошират своето влијание и да го продлабочат јазот помеѓу граѓаните на нашата земја – нагласил Ахмети на средбата со Тимоние.


Адеми – Бејли: Комплексноста на ситуацијата бара брзо решение за излез од кризата


Скопје, 13 април, 2017 - 12:56 (META) 

Комплексноста на ситуацијата во Македонија, во регионот и пошироко, во Европската Унија, налага земјава што побргу да најде излез од политичката криза, „користејќи ги расположливите политички и институционални капацитети, за враќање кон реформскиот курс“. Ова го истакнал вицепремиерот за европски прашања, Арбер Адеми, на денешната средба со амбасадорот на САД во земјава, Џес Бејли.

Околу актуелната политичка состојба во земјава, Адеми нагласил дека Македонија останува на стратешката определба за членство во НАТО и во ЕУ.

„Нема и не размислуваме за друга алтернатива… Улогата на актуелното и на секое идно политичко лидерство е да работи на остварување на тие стратешки приоритети и да ја следи волјата на мнозинството граѓани“, рекол Адеми, стои во соопштението од неговиот кабинет за средбата со Бејли.

Вицепремиерот за европски прашања ја истакнал и важноста на САД како стратешки партнер на Република Македонија, нагласувајќи ја нивната поддршка од осамостојувањето до денеска, како еден од главните промотори за членството на земјава во евро-атлантските структури.

„Тој, исто така, се заблагодари за помошта што континуирано повеќе од 25 години ја добиваме преку УСАИД, за спроведување на клучните реформи во однос на демократизацијата на општеството, економскиот пораст и на подобрување на квалитетот на образованието“, се вели во соопштението.