Коѕиас: Без Договорот од Преспа не постои решение


Луксембург, 16 октомври, 2018 - 9:24 (META) 

Без прифаќање на Договорот од Преспа не постои никакво решение, порача шефот на грчката дипломатија Никос Коѕиас по состанокот на Советот за надворешни прашања на ЕУ во Луксембург и додаде дека дури и со едноставна математика од основно училиште не е можно да се постигне подобар договор за секоја страна, „како што тврдат опозициите во двете земји“.

Како што јави дописничката на МИА од Атина, Коѕиас рече дека вчерашниот состанок започнал со прашањата поврзани со Македонија.

– Објаснив дека треба да биде сфатено во Скопје дека не постои никакво решение без прифаќање на Договорот од Преспа и дека не е можно да се случи она што го велат двете опозиции во Грција и во ПЈРМ, дека можат да обезбедат еден подобар договор, за секоја страна, бидејќи ова не е изводливо дури и со едноставна аритметика од основно училиште – рече шефот на грчката дипломатија.


Владата со контрамерки ако Косово не ги намали царините на земјоделските производи


Скопје, 20 јули, 2018 - 12:12 (META) 

Во насока на решавање на проблемот со воведените зголемени царини од страна на Косово, министерот за земјоделство, шумарство и водостопанство, Љупчо Николовски, е во постојана комуникација со ресорните министри од регионот, информираат од МЗШВ.

Следната недела е планирана заедничка средба на сите ресорни министри од регионот, на која што ќе присуства и министерот Николовски, а со цел да се заеднички модел за надминување на проблемот.

„Истовремено, Владите на Македонија и на Косово од вчера се во постојана комуникација, за изнаоѓање на соодветно решение. За таа цел, министерот Николовски заедно со министерот за економија Крешник Бектеши, следната недела ќе имаат средба со косовските ресорни министри. Денеска министерот за надворешни работи, Никола Димитров ќе се сретне со државниот врв на Косово. На средбите, меѓудругото, ќе се разговара и за одлуката на Косово за зголемување на царините за увозните земјоделски производи“, се додава во соопштението.

Во текот на вчерашниот ден Министерството за земјоделство,шумарство и водостопанство и Министерството за економија, испратија допис до ЦЕФТА, Европската унија и до Владата на Косово, во кое се бара повлекување на одлуката на Косово за зголемување на царините за увозното овошје и зеленчук. Доколку Косово не ја повлече одлуката, Владата на Република Македонија ќе преземе мерки за заштита на домашното производство.


Заев: Решението е тешко, Грција доби ерга омнес име, ние добивме ерга омнес идентитет


Скопје, 4 јули, 2018 - 12:14 (META) 

Решението кое што го постигнавме со Грција е тешко, тешко е за мене, тешко е за мојот народ, но европската аспирација и нашата должност кон идните генерации се премногу големи, вели премиерот Зоран Заев во интервју за „Еуроактив“.

На прашањето дали опозицијата ќе го отежни имплементирањето на Договорот, Заев вели дека таа е контрадикторна односно истовремено е против измена на Уставот но е за членство во НАТО и ЕУ.

-Ако сме за НАТО и ЕУ, треба да бидеме подготвени за компромис. Во почетокот и јас посакував да нема потреба да се менува Уставот. Но со моќта на аргументите за време на разговорите, стана јасно дека таквата позиција ќе создаде нови проблеми.Ние сакаме еднаш засекогаш да завршиме со проблемите. За да можеме да градиме пријателски односи и да склучуваме договори во корист на нашите две земји и на нашите два народи, и затоа беше направен компромисот. Грција доби ерга омнес за името, ние добивме ерга омнес за идентитетот. Истовремено, се гарантира идентитетот на Македонците што живеат во Грција, ова е јасно поставено. И во овој поглед, јас сум задоволен што имаме праведна и правно здрава одлука – вели Заев.

Тој во интервјуто ја споредува македонската опозиција со грчката опозиција и вели дека тие се многу слични, прават врева, организираат протести, користат навреди односно имаат исти тактики, но сепак убеден е дека кај опозицијата ќе преовладаат здравиот разум, љубовта кон татковината и перспективата на државата.


Бан Ки-мун: Се надевам дека набргу конечно ќе се затвори спорот меѓу двете земји


Сеул, 27 јуни, 2018 - 13:34 (META) 

Охрабрувачки е фактот што се постигна решение, но загрижувачки е фактот што постои незадоволство кај граѓаните, вели поранешниот генерален секретар на ОН, Бан Ки-мун, во изјава за грчката новинска агенција АНА-МПА.

Тој изразува надеж дека што е можно поскоро ќе има дефинитивно затворање на долгогодишниот спор меѓу двете земји.

– Сметам дека е многу охрабрувачки фактот што и двете страни се согласија да го решат долгогодишното прашање за името. Во исто време, исто така, сум загрижен за фактот што постои некакво незадоволство кај граѓаните. Искрено се надевам дека прашањето за името можно е поскоро, дефинитивно ќе се реши – вели поранешниот секретар на ОН.

Бан Ки-мун додава дека прашањето за името било пречка за продлабочување на соработката на двете земји, но и ги „спречувало да ги прошират односите на соработка, не само со Европејците, туку и со другите земји, а се разбира и со Обединетите нации”.

– Навистина се надевам дека ќе го направат последниот чекор – додава Бан Ки-Мун во изјавата за АНА-МПА.


Собранието го ратификуваше Договорот со Грција, за Заев ова е крај на трауматичен спор


Скопје, 20 јуни, 2018 - 13:30 (META) 

Собранието со 69 гласа „за“, без гласови „против“ и воздржани, го ратификуваше Договорот со Грција за решавање на спорот за името. Пратениците на опозициската ВМРО-ДПМНЕ ја бојкотираа седницата и не присуствуваа на гласањето.

На почетокот на расправата, премиерот Зоран Заев рече дека Договорот потпишан во Преспа е решение за спор кој три децении бил трауматичен за Македонија и дека ова е почеток на крајот на неизвесноста која се заканувала дека ќе биде недогледна.

-Постигнавме достоинствено и прифатливо решение за двете страни. Имаме договор со јасни обележја на нашето, на нашиот македонски јазик. Јазикот и идентитетот се македонски. Потписите во Преспа го заштитија нашиот идентитет за век и векова. Никому ништо не сме му подариле, ниту некој ни одзема нешто. Овој храбар чин е решение, кој е во интерес на граѓаните на двете земји. Се издигнавме над стравот. Повикувам да ги отфрлиме ѕидовите на изолација и ксенофобија и да му дадеме шанса на решението, а граѓаните ќе го имаат крајниот збор – рече Заев.

Според премиерот со гласањето на Договорот во Собранието, извесно е дека Македонија ќе добие датум за преговори со ЕУ, а дека НАТО ќе стане реалност.

-Наместо со горчина и гнев од денеска натаму заедно да ги испишуваме овие страници на нашата иднина, со љубов, со надеж, заедништво, солидарност, взаемна радост. Ајде заедно да ги поведеме нашите граѓани заедно кон безбедна и економски стабилна земја. Ова е историски чин и со гласање во парламентот нашите граѓани ќе имаат шанса да донесат одлука за каква иднина се залагаат. Вие, пратениците, сте првата алка која што ќе им овозможи на граѓаните да го остварат демократското право на изјаснување – додаде Заев.

Пратеникот Артан Груби од ДУИ рече дека денешната одлука во Собрание, ја бетонира државноста на Македонија и ја овозможува иднината. Тој вели дека денешниот ден е раскрсница и дека секој од нас а и граѓаните треба да одлучат во која насока ќе се движиме.

-Оваа раскрсница е невообичаена, првата насока е самотија, изолација, втората насока е дестабилизација и несигурност, третата е исток а четвртата е запад. Јас и сите ние заедно овој пат сме на правилната страна на историјата. Херојство е да обезбедиш сигурна иднина за твоите деца, нивните деца и децата по нив. Секој од нас треба да се запраша што правел на пресудниот ден, дали преземал одговорност или со наведната глава и заминал во партиско седиште. Денеска е прекрасен ден, најубав ден, денеска навистина се раѓа новото сонце, вистинското сонце на слободата, правичното сонце – вели Груби.

Костадинов Костадин рече дека пратениците на ВМРО-ДПМНЕ најмалку што можеле да направат е да дојдат и да гласаат против спогодбата, но и дека имаат одговорност за нивните одлуки.

– Решаваме нешто што не беше лесно да се реши, најлесно ќе беше да го оставиме настрана, да продолжиме да живееме во минатото. А иднината ќе беше се подалеку. Граѓаните ни ја дадоа довербата да ги решаваме проблемите, одговорно и државнички решивме да му погледнеме на проблемот во очи – рече Костадинов.

Фросина Ременски од СДСМ смета дека Собранието уште еднаш е исправено пред историска одлука која треба да го трасира европскиот пат на државата. Шпреса Хадри од ДУИ потенцираше дека на партијата од секогаш главна цел и било интеграција во ЕУ и НАТО покрај охридскиот договор.

Амди Бајрам им се заблагодари на премиерот и министерот за надворешни работи за ова решение и ги повика сите Роми да излезат на референдумот и да дадат поддршка.

-Оптимист сум дека 72 до 75 отсто дека референдумот ќе биде успешен – рече Бајрам.

На крајот на седницата во своите завршни зборови Заев му се заблагодари на Димитров и неговиот тим на вицепремиерите Османи Шекеринска, на останатите министри, на сите етнички заедници, на коалиционите партнери, на опозицијата и претседателот, но и на грчката страна која покажала храброст, визија и желба да гради пријателство. Како следен чекор Заев го најави референдум кој рече дека ќе се одржи крајот на септември или почетокот на октомври.


Се надевам дека договорот има широка народна поддршка, рече Лавров


Москва, 13 јуни, 2018 - 14:15 (META) 

Шефот на руската дипломатија Сергеј Лавров изрази надеж дека договорот за новото име на Македонија ќе биде во интерес на Атина и на Скопје и дека ќе го подржат граѓаните и на двете држави.

– Секогаш нагласувавме дека се залагаме за пронаоѓање договор за тој проблем, без мешање однадвор, без поставување на одредени вештачки услови. Говоревме дека ќе го поддржиме решението кое ќе биде во интерес на Грција и на Македонија и кое ќе има широка народна поддршка. Се надевам дека договорот кој вчера беше објавен е токму таков – изјави Лавров на прес-конференцијата во Москва со грчкиот министер за надворешни работи Никос Коѕиас.

Од своја страна, Коѕиас истакна дека надворешната политика на Грција е активна, демократска и повеќепланска. Според него, под овие услови, грчката влада го реши овој проблем со цел да се стави крај на долгогодишниот спор околу името.


Спомениците ќе имаат натписи со појаснувања, химната останува иста, велат од Владата


Скопје, 13 јуни, 2018 - 13:06 (META) 

Државните институции, оние кои се финансираат од државата, ќе мора да се прилагодат и да го следат духот на договорот со Грција, одговори портпаролот на Владата Миле Бошњаковски на прашањето за евентуална промена на имињата на АРМ, МАНУ, МРТ, МНТ.

Тој информираше дека средбата на двајцата премиери Зоран Заев и Алексис Ципрас ќе се одржи викендов. За информациите за некои нови имиња или преселби на спомениците од проектот „Скопје 2014“, Бошњаковски рече дека спомениците остануваат таму каде што се и ќе претставуваат симбол на пријателството.

-На спомениците ќе се стават натписи со појаснување. На пример Воинот на коњ ќе се вика споменик на Александар Македонски со објаснување дека е симбол на хеленскиот антички период и останува како симбол на пријателството меѓу Македонија и Грција. Истото ќе важи и за споменикот на Филип 2 и Олимпија. Сите споменици ќе бидат обележани во насока на зајакнување на пријателството. Не се срамиме да ги нарекуваме спомениците такви како што се – вели Бошњаковски.

Тој рече дека основата на договорот е како Грција го толкува и поимува терминот Македонија.

– Се прави јасна дистинкција што е прифатливо за нас и што е прифатливо за нив. Ние сме Македонци. Официјалното ново име ќе биде преведено на сите јазици. Македонскиот јазик е утврден во ОН и тој останува таков, нема да постои фуснота во ОН. Во договорот постои член во кој велиме дека македонскиот јазик е дел од јужнословенските јазици. Останува македонскиот јазик – рече Бошњаковски.

Тој вели дека нема потреба од грижа, бидејќи граѓаните нема да мора да ги менуваат патните исправи веднаш туку по истекот на нивниот рок.

– Самиот договор е етапен договор, и тој треба да се имплементира во наредните 5 год. Трошоци за граѓаните нема да има, бидејќи нема да се менуваат сите патни исправи одеднаш, туку како им истекува рокот, ќе се менува патната исправа. Тоа се редовни трошоци, не се работи за вонредни трошоци. Оние патни исправи кои постојат, важат се до истекот – изјави Бошњаковски.

Портпаролот на Владата појасни дека државните симболи не беа дел од преговарачкиот процес и дека химната, знамето, грбот и другите симболи не се менуваат и додаде дека договорот ќе биде објавен откако ќе се разгледа и усвои на владина седница.


Договорот и го отвора патот на Македонија кон НАТО и ЕУ, вели британскиот амбасадор


Скопје, 13 јуни, 2018 - 12:52 (META) 

Британскиот амбасадор во Република Македонија, Чарлс Гарет денеска го поздрави постигнатиот договор меѓу премиерите Зоран Заев и Алексис Ципрас за спорот за името посочувајќи дека тоа ќе го отвори патот Македонија да оди напред во евроатлантските интеграции, кон ЕУ и НАТО.

– Тоа не е добро само за Македонија, туку и за регионот – рече Гарет по потпишувањето на Меморандум за соработка со Владата на Република Македонија .

Тој изрази надеж дека Македонија ќе добие датум за почеток на пристапните преговори на состанокот на Советот на ЕУ, а подоцна и покана за членство во НАТО.

Британскиот министер за надворешни работи Борис Џонсон вчера го поздрави постигнатиот договор меѓу премиерите на Македонија и на Грција Зоран Заев и Алексис Ципрас за спорот за името.

„Фантастична вест е дека премиерите Зоран Заев и Алексис Ципрас постигнаа договор за прашањето за името. За ова е потребно лидерство и политичка храброст. Ги охрабрувам сите политички лидери во двете земји да ги препознаат бенефитите што ќе ги донесе решавањето на ова долгогодишно прашање“, напиша британскиот министер за надворешни работи на „Твитер“.


Договорот помеѓу Македонија и Грција топ тема во грчките и светските медиуми


Скопје, 13 јуни, 2018 - 12:35 (META) 

Светските медиуми на своите веб-страници известуваат за постигнатиот договор на премиерите на Грција и Македонија, Алексис Ципрас и Зоран Заев, притоа пласирајќи ја веста најчесто меѓу првите три главни вести.

„Си-ен-ен“ во статија под наслов „Македонија постигна договор за промена на името со Грција“ пласирана во рубриката „Патувања“ пишува дека луѓето што сакаат да ја посетат Македонија ќе треба пред да тргнат да проверат како се вика земјата, оти во следниот период ќе се одржи референдум за официјална промена на името во „Северна Република Македонија“ (Northern Republic of Macedonia).

Објаснувајќи го спорот за името и пренесувајќи реакции од премиерите на двете земји и на ОН, ЕУ и НАТО, „Си-ен-ен“ потсетува и дека Македонија нема да биде првата земја што си го сменила името, потсетувајќи на примерот на Бурма, која во 1989 година се преименува во Мјанмар, потоа Заир, кој во 1997 година стана Демократска република Конго, како и на Чешка, која во 2016 година објави дека на англиски наместо Czech Republic ќе го користи името Czechia.

Во најновиот број на четвртата страница, „Њујорк Тајмс“ во текст со наслов „Македонија се согласи да го смени името за да го реши спорот со Грција“ пишува за изјавите на двајцата премиери и за реакциите од политичките фактори во двете земји, но и на истакнатите меѓународни фигури и ЕУ и НАТО, весникот го изнесува и расположението на населението во двете земји, посочувајќи дека Александар Велики бил древен грчки цар и воин.

На веб-страницата на „Би-би-си“ утрово 10-та на списокот 10 најчитани статии е вчера објавената „Македонија и Грција: Договор по 27-годишен спор за името“, со која британскиот јавен сервис известува дека Грција постигнала „договор за името на северниот сосед, кој себеси се нарекуваше Македонија од распаѓањето на поранешна Југославија“. Во статијата се вели дека двете земји постигнале договор за името Republic of North Macedonia, односно Северна Македонија на македонски, а јазикот на англиски ќе биде Macedonian додека жителите на земјата на англиски ќе се нарекуваат Macedonians (citizens of the Republic of North Macedonia).

Изнесувајќи го историјатот и на територијата на сегашна Република Македонија и на грчкиот регион Македонија, како и историјатот на спорот, „Би-би-си“ ги изнесува и честитката од Столтенберг, но и реакцијата на грчката опозиција и посочува дека се очекува во Преспа в сабота да биде потпишан договорот.

Намерата е потоа парламентот на Македонија да го поддржи договорот пред самитот на ЕУ на 28 јуни, по што Грција ќе испрати писмо до ЕУ со кое ги повлекува своите забелешки за преговори за приклучување на Македонија, а исто писмо ќе биде испратено и во НАТО, а потоа во септември или октомври ќе се одржи референдум, и ако македонските граѓани го поддржат договореното, ќе мора да се смени македонскиот устав, што е едно од клучните барања на Грција, за на крајот договорот да биде ратификуван во грчкиот парламент.

Грчка „Прототема“  пишува за „Severna Makedonija“ нагласувајќи дека со признавањето од страна на Грција на Северна Македонија и нејзините граѓани како „Македонци“, во суштина била прифатена националната идеологија на Скопје, со иредентизмот.

„Зоран Заев има причина да триумфира. Тој на крајот можел да прифати ерга омнес, но со право може да се гордее што обезбедил признавање на „македонскиот“ идентитет“, пишува весникот.

Весникот „Катимерини“ како главен текст ја пласира веста за постигнувањето на согласноста и завршување на текстот за договорот, посочувајќи дека грчкиот премиер Ципрас во телевизиското обраќање договорот го нарекол дипломатски успех што ги покрива сите предуслови што ги поставила грчката страна, односно новото име ќе се користи ерга омнес, односно за севкупна употреба, а дека Скопје ќе го смени уставот.

Весникот нагласува и дека Ципрас нагласил дека откако парламентот на Скопје ќе го ратификува договорот и ќе го смени уставот отстранувајќи се што може да се сфати како иредентистичко, дури тогаш Атина ќе ги повлече своите забелешки за приклучување на ФИРОМ кон ЕУ и НАТО.


Гутереш ги повика граѓаните на двете земји заедно да го придвижат процесот напред


Њујорк, 13 јуни, 2018 - 10:30 (META) 

Генералниот секретар на Обединетите нации, Антонио Гутереш во писмена изјава го поздрави договорот кој што го постигнаа Македонија и Грција за решение на спорот за името. Тој ги поздрави сите засегнати страни за нивната решеност да му стават крај на долготрајниот спор и за покажаното лидерство.

Гутереш им честиташе на сите кои што конструктивно учествуваа во напорите што доведоа до договор. Тој му оддаде почит на својот личен пратеник, медијаторот, Метју Нимиц, за кој вели дека ги отелотворил вредностите на упорност, трпеливост и мирна дипломатија во олеснувањето на овој историски договор во текот на многу години.

Генералниот секретар ги повика сите граѓани во двете земји заедно да го придвижат процесот напред. Тој ја потврди посветеноста на Обединетите нации да ја обезбедат сета потребна поддршка, како преку неговиот личен пратеник, така и преку релевантни агенции, фондови и програми на ОН.

Гутереш е убеден дека решавањето на овој долготраен спор ќе има позитивни реперкусии во Европа и пошироко и се надева дека засегнатите страни на други долготрајни конфликти може да бидат инспирирани од овој развој и да работат без натамошно одложување кон преговарачките процеси.