Заев: Една од опциите е прифатливa за двете страни


Софија, 17 мај, 2018 - 14:04 (META) 

Заедно со грчкиот премиер Алексис Ципрас разгледавме можни опции за креативни решенија кои македонската страна ги презентираше од последната фаза од преговорите. Следуваат консултации во двете земји со релевантните политички фактори.

Ова денеска го изјави премиерот Зоран Заев по средбата со Ципрас во Софија која траеше околу час и половина

. На новинарско прашање во однос на предложените креативните решенија, Заев дополни дека „една од опциите е прифатливa за двете страни“.

– Важно беше да ги потврдиме сите успеси кои министрите ги постигнаа, а се големи и значајни. Кога ќе го поминеме до крај целиот процес ќе видиме сите колку се значајни. Ние разговаравме и суштествено разгледувавме неколку опции. Една од опциите е прифатливa за двете страни. Продолжуваме дома со констултаци со институциите, и ако е возможно тоа, веројатно ќе имаме решение. После сето тоа што беше постигнато, потврдивме дека стоиме како премиери.  За тоа што беше останато разгледавме неколку опции и утврдивме една опција. Но мора да внимаваме како тоа ќе биде спроведено. Ќе разговараме со претседателите на државите и другите лидери, и со опозицијата – изјави Заев.

Заев рече дека денес пријателството помеѓу Македонија ни Грција е посилно.

– На денешниот состанок со премиерот на Грција, пријателот на Македонија, Алексис Ципрас, заеднички го констатиравме досегашниот напредок кој е постигнат во процесот на изнаоѓање на решение за спшорот околу името на нашата држава. Решаваме спор за да го засилиме достоинството и идентитето на граѓаните во двете земји. На овие теми разговарав и со претседателот на Франција, Емануел Макрон и со канцеларката Ангела Меркел – додаде тој.

Тој рече дека после сето она што било постигнато помеѓу двете држави, го констатирале и потврдиле и како премиери.

– Тоа што беше останато, го отворивме како прашање преку неколку опции и утвдивме една опција која може да биде прифатлива за двете страни. Мора да внимаваме како тоа институционално ќе биде спроведено. Мора да разговараме со претседателите на двете држави со другите лидери, со шефовите на опозициите. Остануваме во делот на идните детали околу оваа работа – дополни Заев.

На новинарско прашање за можно одложување на решението, тој рече дека ако нема решение ќе биде одложено.

– Јас реков дека ние изградивме пријателство кое е неповратно и тоа пријателство ќе расте. Би било убаво тоа решение, кое би сакале од двете страни да биде прифатливо, да биде уште сега. Затоа што знаете дека крајот на јуни имаме Европски совет и решението би било дополнително охрабрување за советот. Во јули има НАТО самит,  и убаво е тоа и таму да се констатира.  Ако не е возможно, ќе продолжиме во барањето на решение се додека не се договориме. Вредно е да продолжиме затоа што многу е решено и на крајот имаме и опција која би можела да биде прифатена од двете страни, имајќи ги предвид аспирациите на двете страни. Ако тоа во земјите внатрешно биде соодветно потврдено и прифатено, би било и официјализирано – додаде Заев.


Јункер: Прашањето за името мора итно да се реши, препораката не значи датум за преговори


Скопје, 26 април, 2018 - 15:26 (META) 

Претседателот на Европската комисија, Жан Клод Јункер, денеска во своето обраќање во грчкиот Парламент ја нагласи итноста од решавањето на прашањето за името меѓу Македонија и Грција.

– Господине претседателе, пред вашиот Парламент ќе кажам нешто што го кажав кога неодамна бев во Скопје, каде што беше поставено прашањето за името на оваа земја. Јас не сум надлежен да ви дадам некоја насока, ниту идеи ниту пак правци во однос на прашањето што треба во секој случај да го решите меѓу вас. Но, дозволете ми да ја нагласам итноста што го карактеризира решавањето на проблемот, со оглед на комплицираниот регион. Ги имам на ум зборовите на Черчил: овде историјата што се произведува не може да се консумира, толку е голема – рече Јункер.

Претседателот на ЕК, во обраќањето пред пратениците, во присуство на грчкиот претседател, меѓу другото, говореше и за земјите од регионот и нивната европска иднина. Рече дека Грција е столб на стабилноста во регионот, а на Западен Балкан му е потребна европската перспектива, за да не се повторат, како што рече, драмите што ги доживеавме во деведесетите години.

Претседателот на ЕК истакна дека препораката за почеток на пристапни преговори со ЕУ, не значи и доделување датум.

– Сите оние проблеми, посебно конфликти на границите што би можеле да создадат и билатерални судири, ќе треба во секој случај да се решат пред било какво пристапување. За да бидам целосно јасен, сакам да кажам дека, кога Европската комисија предложи, а тоа беше пред една седмица, почеток на преговорите за пристап за Албанија, но и за ПЈРМ, ова не значи дека сме дале датум за да почнат овие преговори за проширување и интеграција. Воопшто не е даден таков датум за интеграција. Не треба да се потпираме на нереални најави, не е можно да се случува тоа – рече Јункер, додавајќи дека сите земји кандидати ќе се оценат објективно, врз база на нивните вредности и критериуми.


Заев очекува исчекор од денешните преговори за спорот за името во Виена


Скопје, 25 април, 2018 - 11:16 (META) 

Во Виена очекувам можност за исчекор во процесот на преговорите за спорот за името, одговори на новинарско прашање премиерот Зоран Заев, на денешната прес-конференција во владата на која се презентираа мерките од оперативниот план за вработување.

Тој додаде дека креативноста на министрите за надворешни работи Никола Димитров и Никос Коѕиас има поддршка од него, од грчкиот премиер Алексис Ципрас како и работните тимови кои што стојат зад нив.

Во однос на изјавата на Хан дека решението за спорот за името ќе биде за две недели, Заев ја толкува како знак на пријателство бидејќи и Хан сака овој проблем да се реши час поскоро.

– Решавањето на спорот со името е важно за регионот и Европа затоа што се испраќа добра порака за иднината бидејќи вака горливи прашања кои што траат повеќе од 20 години можат да бидат решени низ дијалог – изјави Заев.


Хан: Можно е за две недели да има решение на спорот за името


Брисел, 24 април, 2018 - 15:02 (META) 

Европскиот комесар за соседска политика и проширување, Јоханес Хан, изрази оптимизам дека грчкиот спор во врска со името на Македонија би можел да се реши во следните 15 дена.

– Јас сум оптимист дека во следните две недели ќе имаме решение. Барем решение кое ќе го отвори патот за почеток на разговорите за пристап со ПЈРМ. Мислам дека сите се согласуваат дека ова ќе биде корисно за земјата, за општеството и целиот регион на Западен Балкан – изјави тој пред Комитетот за надворешни работи на Европскиот парламент.

Хан рече дека Македонија ја надминала длабоката политичка криза и дека постигнала напредок во спроведувањето на реформите и во одржувањето на добрососедските односи, но предупреди дека „нема време за самозадоволство”.

Коментирајќи за Турција, Хан рече дека земјата се движи подалеку од Европската Унија, особено во однос на човековите права и владеењето на правото и се осврна на неодамнешниот извештај на Комисијата за земјата.


Шекеринска: Можно е годинава да добиеме покана од НАТО, очекувам поддршка од САД


Скопје, 20 април, 2018 - 16:12 (META) 

Фокусирани сме до крајот на јуни да најдеме решение за спорот за името, со цел во јули да се случи пресврт и Македонија да добие покана за членство во НАТО. За нашиот прием во НАТО очекувам безрезервна поддршка од САД, рече вицепремиерката и министерка за одбрана, Радмила Шекеринска, на денешната средба со новинарите, по повод нејзината официјална посета на САД, од 26 април до 2 мај, на покана на секретарот за одбрана, Џејмс Матис.

Таа истакна дека Македонија не може да стане членка сега, но дека можно е да годинава да добие покана од НАТО.

– Важно е преговарачкиот процес со Грција да успее. Сакам да нагласам дека во таков случај, во јули Македонија нема да стане членка на НАТО, туку само ќе добие покана за членство, по што ќе следи процесот на ратификации. Тоа значи дека нашиот јужен сосед ќе има уште една шанса да го блокира нашиот прием, доколку не постигнеме решение за спорот. Секое одлагање на решението е на наша штета, бидејќи важен е и тајмингот. Идната година во Македонија се претседателските избори, во Грција се европските избори и затоа мислам дека треба да вложиме напори да дојдеме до решение – изјави Шекеринска.

Владата, вели вицепремиерката, е фокусирана да најде решение за името до самитот на НАТО затоа што секое одложување може да ја смени ситуацијата на теренот.

– Ни претстои непредвидлив период затоа што само еден дел од работите зависат од Македонија. Последните изјави на грчките функционери не се изненадувачки затоа што уште минатата година велеа дека членството во ЕУ не е проблем, туку проблем е членството во НАТО – рече Шекеринска.


Димитров за „Ла Кроa“: Во идеално сценарио, решение на спорот за 3 месеци


Скопје, 18 април, 2018 - 13:06 (META) 

Во идеално сценарио, решение за спорот со името може да се постигне во наредните два до три месеци, а итноста за решение е диктирана од европскиот воз, вели шефот на македонската дипломатија Никола Димитров во интервју за францускиот весник „Ла Кроа“.

Во тој контекст Димитров ги спомена Самитот за Балканот што ќе се одржи во мај во Софија, петнаесет години по Самитот во Солун, но и датумите за избори, во 2019 година ќе се одржат претседателски избори во Македонија и парламентарни избори во Грција.

– Се обидуваме да излеземе од ровот во кој се имаме закопано повеќе од дваесет години. Две европски земји кои споделуваат еден географски регион, треба да можат да најдат достоинствен начин кој ќе овозможи да се прави разлика меѓу нашата држава и регионот Македонија кој се наоѓа во Грција, без да се повреди идентитетот и достоинството на македонскиот народ – вели Димитров во интервјуто насловено „Македонија излегува од сенка“.

Посочи оти е потребно да бидеме многу внимателни кон јавното мислење во Македонија и во Грција.

– Иако нашите две земји имаат различни позиции, понекогаш се случува да се најдеме на иста страна со политичките сили кои сакаат компромис, а тоа се силите кои гледаат во иднината, а кои се спротивставуваат со силите од минатото и со национализмот – додава Димитров.

На прашањето што ќе направи македонската страна со многубројните националистички споменици во Скопје, Димитров истакна дека опсесивното свртување кон античките времиња не е здраво.

– Прибегнувајќи кон митовите, ги губиме младите генерации. Министерството за култура треба да одлучи што ќе прави со „Скопје 2014″ – Голем архитектонски проект на антиквизација кое го спроведе претходното националистичко мнозинство. Лично, би сугерирал да се организира голем светски уметнички натпревар кој би му дал смисла на сиот тој хаос во градот – вели шефот на дипломатијата.

Во однос на перспективите за интеграција на Македонија во ЕУ вели дека бугарското претседателство претставува одлична можност Унијата да се сврти кон Балканот.

– Патот до целосна интеграција ќе биде долг. Ако не успееме да ја донесеме Европа во Македонија, да воспоставиме правила, правда, ред, тогаш помладите генерации ќе продолжат да ја напуштаат земјата како и балканскиот регион поради недостиг на надеж. За среќа, некои и се враќаат – додава тој.

Во врска со солидарноста од страна на земјите кои беа дел од поранешна Југославија, Димитров нагласи дека сега е време за надминување на расправиите.

– Не сакам да звучам надмено, меѓутоа се јавува една нова енергија во регионот и таа нова динамика е делумно поттикната од Македонија – нагласи Димитров во интервју за „Ла Кроа“.


Димитров очекува во Виена да дојде до поместување во преговорите за името


Скопје, 27 март, 2018 - 13:11 (META) 

Духот и традицијата на Виена можеби ќе ни помогне да го поместиме проблемот напред и да има нешто конкретно и видливо во насока на надминување на прашањето за името. Овој проблем е најважен за нас, и за другата страна, меѓутоа има важни регионални импликации и влијае врз политиката на ЕУ кон Балканот.

Ова денеска го изјави шефот на дипломатијата, Никола Димитров на прес-конференција со австриската колешка, Карин Кнајсл, во пресрет на средбата во петок во Виена со грчкиот министер за надворешни работи Никос Коѕијас, и медијаторот на ОН, Метју Нимиц.

– Разменивме предлог-спогодби, една добивме од грчката страна, една добија тие од нас, во процесот мора да се земат предвид позициите и аргументите на двете страни и мислам дека ќе биде многу корисно ако размислуваме и тоа мислам го спомнавме заедно со грчкиот колега на прес-конференција, што е тоа што е најважно за Македонија, што е тоа што е најважно за Грција, и тоа е патот што ќе не донесе кон решение – рече Димитров.

Според него, ако се размислува само што е најважно за нас или што е најважно за нив тоа нема да води кон решение, бидејќи „на крајот на тој пат мора да има задоволство и покривање на главните грижи на двете страни“.

– Ние сме соседи и ако еден од соседите се чувствува многу повреден или онеправдан, тогаш не сме направиле ништо од оваа операција, бидејќи целта на процесот е да станеме блиски, да решиме еден долгогодишен, децениски, проблем и да научиме да си веруваме едни со други и да бидеме сојузници, бидејќи меѓудругото, решението ќе не води кон сојузници и во ЕУ и во НАТО -рече Димитров.

Австриската министерка, Кнајсл изрази задоволство што Австрија ќе може да пружи поддршка на двете страни.

– Се радуваме што можеме да бидеме место за дијалог и да кажеме дека и тоа е форма на дипломатија – значи да дадеме услуги. Ние не сме медијатори, туку сме место за разговори – рече Кнајсл додавајќи оти се што може „Австрија ќе придонесе овие разговори да се случат во дискретна и инспирирачка рамка“.


Ѕанакопулос: Се надевам дека набргу ќе стигнеме до заемно прифатливо решение


Атина, 26 март, 2018 - 12:32 (META) 

Портпаролот на грчката влада и министер без ресор, Димитрис Ѕанакопулос, изрази надеж дека што е можно побргу ќе се најде заемно прифатливо решение за прашањето за името.

Говорејќи за радиото „Сто Кокино“, објасни дека ова решение треба да биде во рамката што ја опишува Атина.

Ѕанакопулос вели дека разговорите во Скопје поминале во многу добра клима, но дека сепак, сѐ уште има долг пат кој треба да се помине и дека е потребно доста работа за постигнување договор. Тој смета дека постојат политички предуслови за решение, но останува да се најдат и техничките предуслови.

– Политичката волја е декларирана и од двете страни. Сепак, уште постојат технички прашања, правни прашања и прашања на реална спротивставеност на ставовите за низа прашања. Знаете дека власта на поранешната југословенска Република Македонија поставува некои прашања во однос на уставната ревизија, ние од наша страна инсистираме на ревизија на Уставот во однос на името на соседот, бидејќи тоа е потребно за да важи условот ерга омнес. Во оваа рамка продолжуваат разговорите и се надевам што е можно поскоро ќе стигнеме до заемно прифатливо решение во рамката што многу пати беше опишана од грчката влада – вели Ѕанакопулос.

Портпаролот на грчката влада објаснува дека она што во овој момент е важно, не е сложеното име, туку да се најде решение за сите останати политички и технички прашања за двете страни да стигнат до договор.

Во однос на тоа дали владата би имала мнозинство за евентуалниот договор да биде изгласан во парламентот, Ѕанакопулос вели дека доколку се постигне решение за сложено име што ќе важи за сите и за севкупна употреба, тогаш ќе се обезбеди поширок парламентарен консензус.


Заев: Решение за името е добро и за Македонија, и за Грција и за ЕУ


Софија, 1 март, 2018 - 17:02 (META) 

Македонскиот премиер Зоран Заев денеска во Софија изјави дека очекува спорот за името со Грција наскоро да биде решен и оти тоа би било добро и за Скопје и за Атина и за ЕУ.

Заев смета дека сега се најголеми шансите овој долгогодишен проблем конечно да биде затворен, што и би го отворило патот на Македонија кон ЕУ. Сепак, истакна дека тој проблем трае повеќе од 25 години и ако бил лесен за решавање, некој досега би го решил.

– Убеден сум дека проблемот може да биде решен за доброто на Грција, на Македонија, и на ЕУ. Целта ни е до јуни да добиеме датум за преговори со ЕУ. Тоа не значи дека не можеме да го решиме и во март. Колку побрзо толку подобро – оцени Заев, кој во Софија учествуваше на состанокот на лидерите од Западен Балкан со претседателот на Европската комисија, Жан Клод Јункер .

На новинарско прашање за протестите во Скопје против преговорите за името со Грција и Договорот за добрососедство со Бугарија, Заев рече дека „Македонија е демократска земја, секој има право да протестира, но оти Владата мора да се грижи за добрите перспективи на сите граѓани“.

Во врска со европерспективата на Македонија и другите земји од регионот, македонскиот премиер рече дека земјите членки на ЕУ не треба да се плашат од Балканот, напротив можат да имаат корист од проширувањето на Унијата.

– Државите од Балканот имаат европски вредности и можат да бидат добар партнер на земјите членки на ЕУ – рече Заев и изрази задоволство од засилениот ангажман на Брисел во регионот и од средствата што ги издвојува за земјите од Западен Балкан.


Заев: Промената на Уставот не е неопходна оти не би значела конечна гаранција


Лондон, 28 февруари, 2018 - 11:21 (META) 

Премиерот Зоран Заев во интервју за „Фајненшл тајмс“ оценува дека Македонија и Грција се приближуваат кон решение за спорот за името и дека ова прашање би можело да биде затворено пред самитот на НАТО во Брисел во јули годинава.

– Јас сум оптимист. Многу е тешко, и свесни сме за тоа. Но, би било добро за двете страни да најдеме решение што е можно побрзо – вели Заев.

Македонскиот премиер го повторува ставот дека не е неопходна промена на Уставот на земјава, на што изминатиов период инсистира Грција, бидејќи, како што додава, неговата промена, не би значела конечна гаранција.

– Сега новото барање од Грција е дека треба да направиме промена на нашиот Устав. Но, Уставот е само книга со домашни правила и нема никакви импликации надвор од земјата. Во секој случај промената на Уставот не би значела конечна гаранција, бидејќи некоја следна влада во иднина би можела повторно да го промени Уставот – вели Заев.

Во врска со имињата што се споменуваат во јавноста како предлози на медијаторот Метју Нимиц – Република Македонија (Скопје), Северна Македонија, Горна Македонија, Вардарска Македонија и Нова Македонија – Заев истакнува дека Нова Македонија е неприфатливо име, бидејќи нема географска одредница, но оти може да се преговара за другите четири имиња.

Премиерот во интервјуто оценува дека Македонија треба да се интегрира во НАТО без разлика на руското противење за ширењето на Алијансата.

– Русија нема ништо против нашата интеграција во ЕУ, но не гледа толку позитивно на нашата интеграција во НАТО. Имаме добри односи со Русија. Тие треба да бидат свесни дека нема друга алтернатива за нашата земја освен интеграција во ЕУ и НАТО – изјави Заев.