!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Директорот на ФБИ ги отфрли нападите на Трамп


Вашингтон, 7 декември, 2017 - 21:00 (META) 

Директорот на американското Федерално истражно биро (ФБИ), Кристофер Реј, ги отфрли нападите на претседателот на САД, Доналд Трамп, наведувајќи дека „нема пофина институција од ФБИ“, јавуваат светските агенции.

Реј денеска сведочеше пред правосудниот совет на Претставничкиот дом на САД, додека демократите и републиканците се расправаа околу важноста на нападите на Трамп упатени кон федералната полиција.

Пред неколку дена американскиот претседател преку серија објави на „Твитер“ го нападна ФБИ, тврдејќи дека тоа е пристрасна институција чија репутација е „најлоша во историјата“ и го повика Реј да ја „исчисти куќата“.

– Можам да ви кажам дека ФБИ, онака како што јас го гледам, се десетици илјади агенти, аналитичари и работници кои се убиваат од работа за да бидат Американците безбедни – рече Реј, кој е на чело на ФБИ четири месеци.


Трамп го нападна лидерот на републиканците во Сенатот поради „Обамакер“


Вашингтон, 10 август, 2017 - 21:25 (META) 

Претседателот на САД, Доналд Трамп, денеска остро го критикуваше лидерот на републиканците во Сенатот, Мич Меконел, поради неуспехот во укинувањето на законот за здравствена заштита (Обамакер) и донесувањето нов закон, јавуваат американските медиуми.

Трамп го обвини Меконел дека е виновен за неуспехот на републиканците, кои имаат мнозинство во Сенатот, да го укинат законот за здравствена заштита што го воведе претходниот американски претседател, Барак Обама.

„Можете ли да верувате дека Мич Меконел, кој седум години грмeше ‘да се укине и да се замени’, не успеа да го направи тоа. ‘Обамакер’ мора да биде укинат и заменет“, напиша Трамп на „Твитер“.

Американскиот претседател оваа недела реагираше бурно, откако Меконел јавно изјави дека Трамп „досега не се занимавал со ваква работа“ и дека имал „преголеми очекувања за брзината со која се одвиваат работите во демократскиот процес“.

Кон крајот на минатиот месец пропадна и третиот обид на републиканците во Сенатот да го отповикаат законот на Обама од 2010 година, откако републиканците Џон Мекејн, Сузан Колинс и Лиса Мурковски гласаа против отфрлањето на законот за здравствена заштита. Предлогот беше отфрлен со 51 спрема 49 гласа.


Уште еден неуспешен обид на републиканците да го повлечат „Обамакер“


Вашингтон, 28 јули, 2017 - 9:54 (META) 

Американскиот Сенат, во кој републиканците се мнозинство, повторно го отфрли предлогот за повлекување на законот на поранешниот претседател Барак Обама, „Обамакер“.

Републиканеците Џон Мекејн, Сузан Колинс и Лиса Мурковски гласаа против отфрлањето на законот за здравствена заштита што го воведе претходниот американски претседател. Предлогот е отфрлен со 51 спрема 49 гласа.

Ова е трет неуспешен обид неделава на републиканците да го отповикаат законот на Обама од 2010 година.

Конзервативните сенатори беа подготвени да го повлечат законот иако не е подготвена негова замена, но умерените претставници беа загрижени дека тоа ќе ги револтира гласачите имајќи предвид дека Конгресот нема да биде во состојба за изгласа нов закон за здравствена заштита.

Според проценките на канцеларијата за буџет на Конгресот, со повлекување на „Обамакер“, без притоа да се воведе негова замена, околу 30 милиони Американци би останале без здравствено осигурување, што беше причина за некои од републиканците да гласаат против повлекување на законот.


Нова шлаканица за Трамп – републиканците го спасија „Обамакер“


Вашингтон, 27 јули, 2017 - 10:07 (META) 

Американскиот Сенат, во кој републиканците имаат мнозинство, го отфрлија предлогот на претседателот Доналд Трамп да се повлече Законот за здравствена заштита (познат како Обамакер) на поранешниот претседател Барак Обама.

Седум републиканци синоќа им се приклучија на демократите во Сенатот и предлогот е отфрлен со 55 гласа на спрема 45 гласови „за“. Ова е вторпат неделава републиканците да не успеат да го протуркаат укинувањето на законот од 2010 година.

Сенаторите беа подготвени да го повлечат законот иако сè уште не е подготвена неговата замена, но умерените претставници биле загрижени дека тоа ќе ги разлути гласачите кои би сметале дека Конгресот нема да биде во состојба да изгласа нов закон за здравствена заштита.

Мал дел од републиканците им се придружија на демократите во блокирањето на предлогот на шефот на републиканското мнозинство во Сенатот, Мич Меконел, да се укине законот на Обама.

Законот би требало да биде заменет со ублажени обврски за здравствено осигурување, со помали сојузни здравствени субвенции и други измени.

Канцеларијата за буџет на Конгресот процени дека повлекувањето на „Обамакер“ без воведување замена би значело дека 30 милиони Американци ќе останат без здравствено осигурување. Тоа бил клучен фактор што некои од републиканските сенатори не го прифатија предлогот на шефот на републиканското мнозинство во Горниот дом на американскиот Конгрес.


Пропадна обидот на републиканците да го заменат „Обамакер“


Вашингтон, 26 јули, 2017 - 10:05 (META) 

Републиканците во Сенатот на САД не успеаја да ги соберат неопходните 60 гласови за целосна или делумна замена на Законот за здравствена заштита (Обамакер). Сенатот го отфрли предлог-законот со 43 гласа „за“ и 57 „против“, од кои девет гласа беа од редовите на републиканците.

Сенаторите гласаа за отворање дебата за новиот републикански закон за здравствена заштита, што се смета за голем чекор кон обидот на претседателот Доналд Трамп да го поништи законот што го донесе неговиот претходник.

Неколку републиканци кои претходно се противеа на планот за нов закон за здравствена заштита го сменија своето мислење и гласаа за новиот предлог-закон. Сепак, тоа не беше доволно за тој да биде изгласан.

И претходните обиди да се замини „Обамакер“ пропаднаа поради поделеноста во Републиканската партија.
Поништувањето на „Обамакер“ беше една од главните точки на изборната кампања на претседателот Трамп.


Републиканците и демократите постигнаа договор за санкции кон Русија


Вашингтон, 23 јули, 2017 - 12:20 (META) 

Претставници на Републиканската и на Демократската партија во американскиот Конгрес објавија дека постигнале договор за широк пакет санкции кон Русија.

Како што се наведува, целта на тој пакет санкции е Москва да биде казнета за наводното мешање во минатогодишните претседателски избори во САД и заради руската воена агресија во Украина и во Сирија.

Конгресменот на Демократската партија во Претставничкиот дом, Стен Хоер, од Мериленд изјави дека се усогласени сите прашања во врска со санкциите кои освен кон Русија, предвидуваат и економски казни за Иран и за Северна Кореја.

– Осигурано дека е мнозинството (републиканци) и малцинството (демократи) ќе бидат во состојба да надгледуваат како администрацијата на претседателот Доналд Трамп ќе ги применува санкциите – изјави Хоер.

Претставничкиот дом ќе гласа за законот во вторник на 25 јули.


РТЛ: Макрон и Жипе постигнаа договор за формирање влада


Париз, 13 мај, 2017 - 10:02 (META) 

Новоизбраниот француски претседател Емануел Макрон и еден од лидерите на конзервативната партија на републиканците (ЛР), Ален Жипе, вчера постигнале договор за формирање нова влада на Франција, јави радиото РТЛ.

Владата, која би била формирана в понеделник, ќе биде предводена од актуелниот градоначалник на Авр, републиканецот Едуар Филип. Таа би ја водела земјата до предвремените парламентарни избори закажани за 11 и 18 јуни.


Трамп и републиканците не успеаја да ја воведат замената за „Обамакер“


Вашингтон, 25 март, 2017 - 17:56 (META) 

Републиканските лидери во Претставничкиот дом на американскиот Конгрес ненадејно го повлекоа нацрт-законот за реформи во здравствениот систем поради недоволен број гласови.

Претседателот на Претставничкиот дом, Пол Рајан, го повлекол предлог-законот од дневниот ред, откако Трамп побарал од него да ја запре расправата и гласањето за спорниот предлог-закон.

За новиот закон беа потребни 216 гласови од 430 пратеници во Долниот дом, кој има 237 републиканци и 193 демократи.

Трамп претходно ги повика републиканците да го поддржат неговиот план за здравствени реформи и да го отфрлат постоечкиот закон, познат како „Обамакер“.

Поништувањето на „Обамакер“, здравствената политика на поранешниот претседател Барак Обама што ги обележа неговите два мандата, беше едно до најгласните предизборни ветувања на Трамп.


Уништено локално седиште на републиканците во САД


Хилсбороу, 17 октомври, 2016 - 10:22 (META) 

Локалното седиште на Републиканската партија во Јужна Каролина е уништено во текот на ноќта откако бил фрлен молотов коктел, соопштија властите во градот Хилсбороу и додадоа дека немало жртви.

Молотовиот коктел е фрлен низ прозорецот, додека напаѓачите на соседната зграда испишале графит „Републиканците се нацисти. Напуштете го градот“.

Локалниот републикански претставник, Далас Вудхаус, изјави дека „за среќа нема жртви“ и притоа го овалификува нападот како „политички тероризам“.

Полицијата во Јужна Каролина отвори истрага.

Републиканскиот кандидат за Белата куќа, Доналд Трамп, на „Твитер“ ги обвини „животните што ја претставуваат неговата ривалка Хилари Клинтон“ за нападот.

Клинтон го осуди „застрашувачкиот напад“ и додаде дека е добро што нема жртви.


Апсења во Кливленд поради обид за палење на американско знаме


Полицијата во Кливленд уапси 18 лица по кошкањето со демонстрантите, кои синоќа се обидоа да запалат американско знаме во близина на влезот на арената каде се одржуваше конвенцијата на републиканците, соопштија властите.

Инцидентот се случил синоќа, а двајца уапсени се обвинети за напад на полицаец кој се обидел да им го одземе знамето, соопшти шефот на полицијата во Кливленд, Калвин Вилијамс, додавајќи дека двајца полицајци се полесно повредени.

Според Вилијамс, при обидот да се запали знамето, се запалиле и панталоните на некои од демонстрантите.

Против 15 уапсени се поведени прекршочни постапки за поттикнување насилство.

За време на конвенцијата на републиканците, која завршува денеска, се уапсени вкупно 23 лица.