Дескоска: Не можеме да го менуваме цензусот за референдум


Охрид, 2 јули, 2018 - 14:48 (META) 

Не можеме да го менуваме цензусот за референдум, истакна министерката за правда, Рената Дескоска, која денеска се обрати на третата сесија на Охридската школа на природното право на тема „Добро управување и правни реформи“, организирана од Центарот за стратегиски истражувања при Македонската академија на науката и уметностите.

-Битен елемент што го сочинува мозаикот на владеење на правото е супрематијата на Уставот. Видовме дека Уставот досега беше лист хартија кошта се газеше и не се почитуваше – заложбата на новата Влада е Уставот да биде свето писмо кое треба да го имплементираме во секојдневното живеење. Како правник и како министер сега, слушам различни прашања деновиве за тоа дали можеме со Законот за референдум да го менуваме цензусот за референдумот? Не може, затоа што цензусот е уставна категорија. Ако се залагаме за владеење на право и почитување на Уставот не можеме да менуваме нешто што е изрично уставно загарантирано – потенцираше Дескоска, која додаде дека Уставот е донесен со поширок консензус и како таков тој треба да ѝ ги врзе рацете на секоја власт којашто во момент ќе посака да излезе од неговите рамки.

Дескоска потоа се осврна на нарушувањето на поделбата на власта.

-Сега во овој момент имаме нарушување на системот поделбата на власта од страна на претседателот на државата. Кога тој со своите активности агресивно се меша во законодавната власт не почитувајќи го Уставот кога ќе биде отфрлено ветото, тогаш има нарушување на принципот – рече Дескоска, додавајќи дека никој не смее да биде над Уставот.

Уставниот суд, според Дескоска, е многу важен орган во остварувањето на супрематијата на Уставот, но според министерката за правда, истиот е ставен на маргините затоа што граѓаните не наоѓаат поддршка во неговото секојдневно работење како институција која ги штити човековите права.


Се уште нема конечна одлука дали ќе се менува Законот за референдум, вели Дескоска


Скопје, 27 јуни, 2018 - 13:39 (META) 

Министерката за правда Рената Дескоска денеска изјави дека се уште нема конечен став дали ќе има измени на законската регулатива за организирање и спроведување на референдумот, во контекст на договорот со Грција за решавање на спорот со името.

– Во моментов немаме донесен конечен став околу тоа дали ќе се оди со измена на Законот за референдум или не. Имаме предвид дека станува збор за закон кој е стар и не е усогласен со Изборниот законик – изјави Дескоска.

Според неа, кога би се правеле измени тие би биле чисто технички. Суштински измени, според Дескоска, не се планирани.

– На пример во текстот на Законот за референдум стои дека повикување на законот за Избирачки список, што не постои и е заменет со Изборен законик, понатаму стои повикување на закон за избор на пратеници кој исто така не постои, сега е заменет со Изборен законик. Исто така, делот што се однесува на заштитата на правото на гласање се разликува од заштитата на Избирачкото право. Законот за референдум оперира со постапка со заштита пред Врховниот суд додека пак Изборниот законик реферира на постапка пред Управните судови – рече министерката за правда.

Референдумското прашање ќе го дефинира Собранието, вели Дескоска, зависно кога би се одредил датум за референдумот, а од Министерството за правда, вели таа, досега не се побарани активности во однос на референдумот.

– Од распишување на референдумот до гласање може да поминат најмногу 90, а најмалку 60 дена. Тие се законските рокови, рече Дескоска.


Заев: Македонија мора да биде земја со нула толеранција за корупција


Скопје, 5 јуни, 2018 - 12:49 (META) 

Република Македонија мора да биде средина со нула толеранција за корупција. Законскиот пакет од оваа област мора да биде сеопфатен и ефикасен: За да се алармираат коруптивните активности, конфликтите на интереси, злоупотребата во финансирањето на политички партии и изборните кампањи. Мора да обезбедиме поголеми ингеренции за максимална ефикасност на Државната комисија за спречување на корупцијата, порача премиерот Зоран Заев на завршната конференција на Мрежа 23, насловена, „Поглавје 23: Пандорина кутија или клуч за добро владеење“, во организација на Институтот за европски политики и Хелсиншкиот комитет за човекови права.

Покрај него, на конференцијата учествуваа и вицепремиерот Бујар Османи и министерката за правда, Рената Дескоска.

Заев рече дека вистински реформи во правосудството и борбата против корупција се нешто што го бара и ЕУ, но и на Македонија не и одговара неквалитетна законска рамка.

– Нам, како земја која влезе во овие реформи, и како земја која доби чиста препорака и очекува датум за старт на преговорите, ни е сосема јасно дека ниту Европската Комисија ниту земјите-членки на ЕУ нема да прифатат половично реализирани реформи. Крајно, и најбитно, ни нам не ни се потребни половично реализирани реформи. Напротив, зборуваме за коренити промени – рече Заев.

Посочувајќи дека корупцијата и кршењето на човековите права се причината што ги изнела луѓето на протести и доведе до смена на власта, премиерот повика на беспоштедна борба и во иднина против тие зла.

– Владата на Република Македонија, судиите и судската администрација, борците против корупцијата во независните контролни агенции и невладини организации, борците и активистите за човекови права, граѓаните на нашата земја – сите ние, треба докрај да ја отвориме кутијата на правосудството, без разлика дали е Пандорина, и храбро и отворено да продолжиме со реформите. Само така можеме да градиме држава по европски правила, без разлика колкав е отпорот кон новите демократски промени – порача Заев.

Министерката за правда, Рената Дескоска, која ја презеде функцијата вчера, рече дека борбата против корупцијата е прашање на кое секоја земја ја покажува способноста за ефикасно спроведување на донесените закони.

– Секој чекор во имплементацијата на Поглавјето 23 во Република Македонија е чекор напред во јакнење на правната сигурност и довербата на граѓаните во судскиот систем и во правната држава – рече Дескоска.


Дескоска: Работиме за да изградиме достоинствена професија наставник


Скопје, 16 мај, 2018 - 10:01 (META) 

Неопходни се дополнителни образовни реформи со кои би се подобриле професионалните компетенции на наставниците, но тие нема да дадат соодветен ефект доколку државата не ги вклучи и наставниците во процесот на планирање и подготвување на тие реформи.

Ова е дел од заклучоците кои беа истакнати на конференцијата „Образовни реформи: предизвици и перспективи во образованието на наставниците“ што вчера  ја организираше Фондацијата Отворено општество – Македонија (ФООМ) во рамките на програмата за одбележување на 25-годишнината од формирањето на Фондацијата.

Домашни и странски професори и претставници на граѓански организации кои работат на проекти од областа на образованието, на конференцијата ги отворија прашањата за квалификуваноста на наставниците во основното образование во Македонија, како еден од условите за квалитетен образовен процес, а дискутираа и за глобалните трендови на ова поле.

На оваа конференција беше презентирано истражувањето „Образованието на наставниците во основното образование во Македонија: Состојби и предизвици“ чии автори се пет универзитетски професори, а го издаде Фондацијата Отворено општество – Македонија.

Министерката за образование и наука Рената Дескоска нагласи дека ФООМ е долгогодишен партнер на образовните процеси во Македонија која континуирано дава експертска поддршка и помош.

– Презедовме мерки со кои првична цел ни беше да ги мотивираме наставниците кои работат. Но, истовремено да ги стимулираме средношколците кои завршуваат со најдобар успех да се запишуваат на факултетите кои продуцираат наставници. Но, за да се привлечат најдобрите ученици да станат наставници прво треба да изградите професија наставник како достоинствена професија и ние работиме на тоа. Мерките кои што се предлагаат во спроведеното истражување кое се презентира денеска и проблемите кои се нотирани се драгоцен придонес во процесот на реформирањето. Ве уверувам дека ќе бидат земени предвид во натамошните мерки на Министерството за образование – рече Дескоска на конференцијата.


Часови од 55 минути и укинување на домашна работа за првачињата, планира МОН


Скопје, 17 јануари, 2018 - 14:11 (META) 

Децата во прво одделение да влегуваат на возраст од најмалку пет и пол години, а наставните часови за нив да траат 55 минути, во кои ќе има и задолжителен одмор од 15 минути, кој наставникот по свое согледување ќе реши кога да го даде, рече министерката за образование и наука Рената Дескоска, објавувајќи ги реформираните наставни планови и програми за прво одделение, кои Министерството за образование и наука ги става на јавна расправа од денеска.

Се предвидува учениците од прво одделение да имаат не повеќе од четири часови дневно, со што ќе се намали времето што учениците ќе го поминат во настава, на сметка на зголемување на времето за одмор и игра. Ќе се исфрли домашната работа, а наместо неа ќе се вршат вежби на час под контрола на наставникот. Исто така, ќе се намалат тестирањата, а акцентот ќе се стави на комплексното проверување на резултатите од учењето, објасни Дескоска.

Учениците од прво до трето одделение севкупно ќе имаат шест предмети, мајчин јазик, математика, англиски јазик, светот околу нас (нов предмет кој во едно ги обединува сегашните природни науки и општество). Ист е случајот и со предметот уметност, кој се создава со спојување на предметите музичка и ликовна уметност. На часовите по физичко и здравствено образование се воведува стручен наставник кој ќе работи во тандем со одделенскиот наставник.

Се предвидува и да се укине програмата Кембриџ во прво одделение.


Дескоска: Новата влада е посветена на создавање отворени образовни ресурси


Љубљана, 20 септември, 2017 - 17:31 (META) 

Македонија треба да вложи големи напори за создавање отворени образовни ресурси (ООР), а тоа е една од заложбите на новата влада, вели за „Мета“ министерката за образование и наука, Рената Дескоска, која учествува на Вториот светски конгрес на отворени образовни ресурси што овие два дена се одржува во Љубљана во организација на УНЕСКО и на Владата на Република Словенија.

Идејата на ООР, вели Дескоска, е да се зголеми трансферот на знаењата, односно да се овозможи проширување на пристапот до учебници и до други форми на едукативни содржини за да се катализира иновативата употреба на содржината и да се поттикне креативноста и создавањето на нови образовни содржини.

– На годинешниот конгрес се истражуваа можностите и решенијата на предизвиците кои се поврзани со популаризирањето на ООР, односно овозможување на што поголема достапност на едукативните содржини. Во таа насока, беа опфатени повеќе теми, како можноста на корисниците да пристапат, да ги употребат и да ги споделат отворените образовни ресурси, прашања поврзани со јазичните и со културните бариери, овозможување пристап до квалитетна содржина, комерцијалните интереси, како и појаснувањето на тоа што сè може да се смета за отворени образовни ресурси – вели Дескоска.

Во Македонија, посочува Дескоска, дел од учебниците чии авторски права ги поседува Министерството за образование и наука се објавени на интернет-страницата на е-учебници и тие се достапни за слободно користење, додека оние учебници чии издавачки права ги поседуваат издавачите, сè уште не се достапни за пошироката публика.

– Од страна на Бирото за развој на образованието се подготвени и јавно достапни недоволен број на материјали кои можат да бидат применувани во наставата – вели Дескоска.


Дескоска на Светски конгрес на отворени образовни ресурси во Љубљана


Љубљана, 19 септември, 2017 - 17:10 (META) 

Министерката за образование и наука, Рената Дескоска, учествува на Вториот светски конгрес на отворени образовни ресурси (ООР), кој се одржува од 18 до 20 септември во Љубљана во организација на УНЕСКО и на Владата на Република Словенија.

Годинешната тема на конгресот е „ООР за инклузивно образование и образование со еднаков квалитет: Од посветеност до акција“, а ќе бидат одбележани 15-годишнината од промовирањето на концептот на отворени образовни ресурси од УНЕСКО, како и петгодишнината на Париската декларација за ООР.

„Концептот на отворени образовни ресурси (ООР) се однесува на сите образовни ресурси кои се отворени и достапни за слободна употреба за едукативни и за истражувачки цели. На тој начин им овозможува на сите можност за подобрување на квалитетот и проширување на пристапот до учебници и други форми на едукативни содржини за да се катализира иновативната употреба на содржината и да се поттикне создавањето на ново знаење“, велат од Министерството.

Целта на конгресот е да се истражат можностите за создавање на уште поголема достапност на ресурсите во образованието, да се промовираат најдобрите светски практики и да се дадат препораки за унапредување на достапноста на едукативните содржини.


Снабдувачот со едукативни програми „Кембриџ“ не е исто со Универзитетот „Кембриџ“


Скопје, 12 септември, 2017 - 10:55 (META) 

„Кембриџ интернешнл“ (Cambridge International Examinations) е најголем светски снабдувач на интернационални едукативни програми за ученици на возраст од 5 до 19 години. Нивните програми се присутни во повеќе од 10.000 училишта, во 160 држави, но таа компанија не треба да се поистоветува со светски познатиот универзитетски центар.

Министерката за образование и наука Рената Дескоска вчера информираше дека „Кембриџ интернешнл“ уште лани изразиле загриженост за брзањето со воведување на оваа програма во средните училишта и со начинот на избор на учебниците.

– „Кембриџ интернешнл“ предупреди дека за реформи во средното образование треба повеќе време и укажуваат дека е многу веројатно дека Кембриџ-програмата нема да може да почне од септември 2017 година. Дури и тие предлагале одложување на програмата за деветто одделение за една година. Во второто писмо, „Кембриџ интернешнл“ укажува дека е потребно време од 18 месеци до 2 години и за адаптација на учебниците, а со оглед на тесните рокови во кои тоа се прави во Македонија, процесот содржи многу слабости. За жал, во тој процес воден од претходната влада, процес во кој биле игнорирани предупредувањата од самиот „Кембриџ“, штета им била нанесена и на учениците и на наставниците, но и на угледот на „Кембриџ“ – изјави Дескоска при отчетот за 100 дена од работата на МОН.


Дескоска: И „Кембриџ“ предупредувал дека се брза со програмата за средно образование


Скопје, 11 септември, 2017 - 16:46 (META) 

Веднаш по одлуката за одложувањето на Кембриџ-програмата во средното образование, од „Кембриџ интернешнл“ бев информирана дека и тие со свои дописи уште во 2016 година изразиле загриженост за брзањето при воведување на оваа програма во средните училишта и со начинот на избор на учебниците, информираше министерката за образование и наука, Рената Дескоска.

Образложувајќи го постигнатото во изминатите 100 дена, таа ги посочи и другите крупни мерки преземени во образованието, а во врска со оваа реформа, ја пренесе загриженоста на издавачката куќа за брзањето со реформите кое го правела претходната влада, односно не препорачувале Кембриџ-програмата да се воведе во средното образование во септември годинава.

– Во тие дописи, „Кембриџ“ предупредува дека за реформи во средното образование треба повеќе време и укажуваат дека е многу веројатно дека Кембриџ-програмата нема да може да почне од септември 2017 година. Дури и тие предлагале одложување на Кембриџ-програмата за деветто одделение за една година. Во второто писмо, „Кембриџ интернешнл“ укажува дека е потребно време од 18 месеци до две години и за адаптација на учебниците, а со оглед на тесните рокови во кои тоа се прави во Македонија, процесот содржи многу слабости. За жал, во тој процес воден од претходната влада, процес во кој биле игнорирани предупредувањата од самиот „Кембриџ“, штета им била нанесена и на учениците и на наставниците, но и на угледот на „Кембриџ“ – рече министерката за образование и наука.

Дескоска го нагласи екстерното тестирање, кое по нејзиното стапување на функцијата е укинато, како „механизам кој се злоупотребуваше за притисок врз наставниците, без да биде никаков показател или мерило за квалитетот на образованието“.

Таа посочи на реформите што допрва треба да се водат.

– Отворивме консултативен процес во рамки на сите реформи кои ги почнавме, при што ги вклучивме сите засегнати страни кои сега имаат можност да влијаат на политиките и да го кажат својот глас за работите кои ги засегаат. Во процесот на измени на законите за основно и за средно образование кои ќе предвидат намалување на бројот на часовите и административните обврски на наставниците се консултирани и ќе се консултираат наставничкиот пленум, синдикатите, невладиниот сектор, учениците – рече Дескоска.

Министерката посочи дека во моментов се подготвува нов закон за високо образование, преку работни групи во кои се вклучени сите засегнати страни, како и дека се одобрени нови вработувања на универзитетите.


МОН ќе го повлече спорниот учебник „Општество“


Скопје, 12 јули, 2017 - 12:29 (META) 

Министерството за образование ќе го повлече учебникот за четврто одделение по предметот општество, откако Народниот правобранител утврдил дека во него постои дискриминација врз основа на брачен и семеен статус, како и врз религиска основа.

Министерката за образование, Рената Дескоска, во изјава за „Сакам да кажам“, вели дека комисијата донела предлог за повлекување на спорниот учебник и оти таа денеска ќе го потпише решението.

Авторката на учебникот, Билјана Живковиќ, во нагледното средство бара децата да донесат фотографии од свадбата на своите родители и да одговорат дали тие се венчани во црква, матично или друго.

Четириесетина мајки, кои живеат во еднородителски семејства, вонбрачни заедници и во брачни заедници, поддржани од осум организации поднесоа претставката до Омбудсманот.