Трамп го разреши Тилерсон, нов државен секретар е шефот на ЦИА, Мајк Помпео


Вашингтон, 13 март, 2018 - 15:24 (META) 

Актуелниот директор на aмериканската разузнавачка служба ЦИА, Мајк Помпео, ќе биде нов државен секретар на САД и ќе го замени Рекс Тилерсон.

Ова го објави американскиот претседател Доналд Трамп на социјалната мрежа „Твитер“ и додаде дека Помпео извонредно ќе ја врши работата. Тој истовремено му се заблагодари на Тилерсон.

Американскиот претседател за нова директорка на ЦИА ја назначи досегашната заменичка на Помпео, Џина Хаспел.

Двете назначувања мора да добијат и потврда во Сенатот на САД.


Тилерсон: Рускиот гасовод „Северен тек 2“ е закана за енергетската безбедност на Европа


Варшава, 27 јануари, 2018 - 12:43 (META) 

Американскиот државен секретар, Рекс Тилерсон денеска, по разговорите со полскиот премиер и со шефот на полската дипломатија во Варшава, изјави дека САД се против новиот руски гасовод „Северен тек 2“ на дното на Балтичкото море, бидејќи ја загрозува енергетската безбедност на Европа и преставува уште едно политичко оружје на Русија, јавуваат светските агенции.

– Ја делиме (со Полска) оваа оценка бидејќи знаеме оти мораме да ги диверзификуваме изворите на енергија. Тоа е прашање на долгорочна енергетска безбедност на Европа – изјавил Тилерсон на заедничката прес-конференција со шефот на полската дипломатија, Јацек Чапутович.

Тилерсон рекол дека САД сакаат да помогнат во изградбата на што повеќе интерконектори и гасоводи и во рамките на хрватско-полската иницијатива „Три мориња“, во регионот на Балтикот, преку Јадранското до Црното море, а, исто така, и да ја помогнат енергетската безбедност преку продажба на американски течен гас.

Тилерсон синоќа со полискиот претседател Анджеј Дуда и денеска со премиерот Матеуш Моравјецки разговарал и за воената соработка меѓу двете земји, изразувајќи подготвеност за нејзино зајакнување.

Американскиот државен секретар денеска зад затворени врати треба да се сретне со лидерот на владејачката полска партија на Правото и правдата, Јарослав Качински, кој, според медиумите, иако формално е обичен пратеник реално ја има улогата на натпремиер и натпретседател во Полска, без чиј благослов не може да биде донесена ниту една одлука.


Ердоган: Нема прекин на акцијата против Курдите во Сирија


Анкара, 22 јануари, 2018 - 18:20 (META) 

Турскиот претседател, Реџеп Таип Ердоган изјави дека нема да ја прекине операцијата против Курдите во Африн на северот на Сирија, што предизвика загриженост помеѓу сојузниците на Анкара. Toj рече дека, операцијата позната како „маслиново гранче“ ќе биде завршена кога ќе биде постигната посакуваната цел.

Турција ја обвинува курдската полиција за поврзаност со Курдистанската работничка партија која се смета за терористичка група, како во Турција така и во ЕУ и САД.

Претходно и трускиот премиер, Бинали Јилдрим изјави дека во операцијата се вклучени копнени и воздушни сили и дека целта е формирање на сигурносна зона од 30 километри длабоко во сириската територија.

При посетата на Лондон, американскиот државен секретар, Рекс Тилерсон изјави дека, САД се загрижени поради акцијата на Турција и ги повика двете страни на воздржаност.

НАТО соопшти дека Анкара има право на самоодбрана, но дека тоа мора да го прави на „соодветен начин“.

И Советот за безбедност на ОН денеска ќе расправа за ситуацијата во Сирија.


Димитров – Тилерсон: Огромна е нашата посветеност да станеме дел од НАТО


Вашингтон, 30 ноември, 2017 - 10:03 (META) 

Шефот на македонската дипломатија, Никола Димитров, вчера во Стејт департментот се сретнал со државниот секретар на САД, Рекс Тилерсон, со кој разговарал за актуелните политички состојби во Република Македонија и во регионот и го запознал со актуелностите во процесот на надминување на разликите околу спорот за името со Грција, информираат од кабинетот на министерот.

– Македонија е пријател и партнер на САД. Убедени сме дека со вашата помош и лидерство и со поддршката на европските сојузници, набргу ќе станеме дел од семејството на НАТО. Нашата посветеност и решителност се огромни, а целта е да ја искористиле можноста што ни се укажува – изјавил Димитров.

Информирајќи за реформите во Македонија, Димитров нагласил дека Владата сака да изгради силни и демократски институции и да го зацврсти владеењето на правото, за да Македонија да стане полноправна членка на евро-атлантската заедница.

Димитров ја реафирмирал цврстата определба на Владата на Република Македонија постепено да го зголемува буџетот во сферата на одбраната во согласност со барањата на Алијансата, за зачувување на меѓународната безбедност и за борбата против тероризмот.

Во контекст на односите со соседите и на состојбите во регионот, Димитров истакнал дека „нерешавањето на проблемите повлекува политичка одговорност“.

„Државниот секретар на САД, Рекс Тилерсон, истакна дека Македонија е на добар пат да биде успех и пример за регионот. Тој нагласи дека САД ќе продолжат да имаат позитивна улога за стабилноста и за напредокот на регионот и да бараат начини да помогнат. Тилерсон даде поддршка на реформската агенда, повикувајќи ја Владата да истрае во нејзиното спроведување“, соопштија од МНР.


Тилерсон се залага за затоплување на односите меѓу Вашингтон и Москва


Вашингтон, 13 септември, 2017 - 11:02 (META) 

Американскиот државен секретар, Рекс Тилерсон смета дека не треба да се продлабочува дипломатскиот јаз меѓу САД и Русија и дека земјите треба да почнат да работат на подобрувањето на односите.

– Мислам дека секретарот (Тилерсон) смета дека понатамошна ескалација не е неопходна во овој момент и оти се надеваме на напредок во иднина – изјави Хедер Нојерт, портпаролка на Стејт департментот.

Нојерт рече дека амбасадорот и специјален претставник на САД во разговорите со руските претставници за Северна Кореја, Џозеф Јун, ја посетил Москва за да се разгледаат начините како да се осуети нуклеарната и ракетната програма на Пјонгјанг.


Тилерсон: Работиме 26 години заедно во поддршка на аспирациите на Македонија


Вашингтон, 8 септември, 2017 - 17:24 (META) 

Државниот секретар на САД,  Рекс Тилерсон, ја честиташе 26-годишнината од независноста на Република Македонија. Tој во име на Владата на САД изрази најдобри желби за луѓето во Македонија.

„Работиме заедно 26 години во поддршка на аспирациите на Македонија за влез во Европската Унија и во НАТО. Ја поздравуваме акцијата што ја презеде новата Влада да ја демонстрира посветеноста кон демократските принципи, почитувањето на владеењето на правото и регионалната соработка. САД ќе продолжат да ги поддржуваат напорите на Македонија во спроведувањето на потребните реформи за да го обезбедат своето место во евроатлантското семејство и нации. Со нетрпение очекуваме да ја продолжиме соработката во наредните години“, се вели во соопштението на Стејт департментот на САД.


Тилерсон: Нема непосредна опасност од Северна Кореја


Вашингтон, 9 август, 2017 - 15:24 (META) 

Американскиот државен секретар, Рекс Тилерсон, непосредно пред слетувањето во Гуам, изјави дека не верува дека постои непосредна закана од Северна Кореја и дека Американците не треба да бидат загрижени.

– Претседателот испрати силна порака и тоа на јазикот што Ким Јонг-ун единствено го разбира – рече Тилерсон.

Претходно Пјонгјанг предупреди дека може да испука ракети во насока кон американскиот остров Гуам во Тихиот Океан, а претседателот на САД, Доналд Трамп, вети дека севернокорејскиот режим ќе се соочи со „оган и бес“.


Стејт департмент: Тилерсон нема намера да поднесе оставка


Вашингтон, 26 јули, 2017 - 10:43 (META) 

Американскиот Стејт департмент синоќа ги демантираше наводите на „Си-ен-ен“ дека државниот секретар Рекс Тилерсон планира да поднесе оставка поради несогласување со Белата куќа.

„Државниот секретар Рекс Тилерсон нема намера да поднесе оставка. Тоа не е точно. Разговаравме со државниот секретар и тој беше јасен – има намера да остане овде. Имаме уште многу работа“, соопшти портпаролката Хедер Науер, додавајќи дека скратениот распоред на Тилерсон претставува „мал одмор“ по бројните состаноци во Европа и во Персискиот Залив.

Американската телевизија „Си-ен-ен“, повикувајќи се на неименуван извор близок до државниот секретар, објави дека Тилерсон во разговорите со своите пријатели надвор од Вашингтон велел дека е „фрустриран од мешањето на Белата куќа во процесот на именување негови соработници“.


Тилерсон размислува да поднесе оставка, јавува „Си-ен-ен“


Вашингтон, 25 јули, 2017 - 17:23 (META) 

Американскиот државен секретар, Рекс Тилерсон, сè повеќе е незадоволен од начинот на кој функционира Белата куќа, поради што би можел да поднесе оставка, јавува „Си-ен-ен“, повикувајќи се на неименувани извори.

Два извора, кои се добро запознаени со разговорите на Тилерсон и на неговите пријатели надвор од Вашингтон, наведуваат дека кај него се зголемува незадоволството и оти се сомневаат дека наскоро ќе се намалат затегнатите односи во Белата куќа.

Една од причините за незадоволството на Тилерсон е одлуката за ангажирање на Антони Скарамули за директор за комуникации по оставката на портпаролот Шон Спајсер.

За Тилерсон, како што наведуваат изворите, уште поголем удар била изјавата на претседателот Доналд Трамп дека жали што го избрал Џеф Сешенс за државен обвинител.

Сепак, според изворите, пред да замине, Тилерсон планира да го реорганизира Стејт департментот.


ОМД: Писмено барање од 32 конгресмени за Тилерсон да ја посети Македонија


Вашингтон, 24 јули, 2017 - 10:44 (META) 

Обединетата македонска дијаспора (ОМД), глобална организација на Mакедонците во дијаспората, изрази благодарност кон Конгресната група на пријатели на Македонија и на македонската дијаспора во САД за испратеното писмо до државниот секретар на САД, Рекс Тилерсон, да ја посети Македонија, што би го зајакнало стратешкото партнерство помеѓу САД и Македонија.

Посетата на државниот секретар Тилерсон би била прва негова посета на Македонија и прва посета од страна на државен секретар на САД од 2001 година, кога земјава ја посети тогашниот државен секретар Колин Пауел, појаснува ОМД.
Писмото до државниот секретар Тилерсон собра 32 потписи од членови на Конгресот од 16 различни сојузни држави во САД, односно од четири члена на Комисијата за воени услуги и од девет члена на Комисијата за надворешни работи при Претставничкиот дом. Потписници се и претседавачот и членови на поткомисијата за Европа, односно вкупно 14 републиканци и 18 демократи.

„Ваквиот двопартиски карактер на писмото ја потврди униформната важност да се одржи врската помеѓу САД и Македонија. Ова писмо претставува кулминација на речиси двомесечната кампања која почна за време на четвртата македонско-американска конференција за лидерство организирана од ОМД, кога учесниците на конференцијата ја истакнаа важноста од евентуална посета на Тилерсон пред некои од горенаведените конгресмени. Заедно со претставници на подмладокот на ОМД, беа одржани повеќе од 250 едукативни средби во американскиот Конгрес“, појаснува ОМД и изразува оптимизам дека ова е вистински момент да се реафирмира силата и одржливоста на односите помеѓу САД и Република Македонија.

„Во рамките на развивањето на политиката на вашата администрација кон Европа, се надеваме дека ќе го сфатите унапредувањето на односите на САД со Македонија како потег што е во целосен склад со интересите на САД, знаејќи дека обете земји се стремат кон побезбеден и послободен свет. Воедно, остануваме подготвени да ви помогнеме во вашите напори за активно промовирање на билатералните односи“, се вели, меѓу другото, во писмото од 32-та конгресмени.