!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шилегов: Училиштата ќе добијат енергетски ефикасни фасади


Скопје, 12 јануари, 2018 - 12:28 (META) 

Градоначалникот Петре Шилегов денеска на прес-конференција информираше дека Градот Скопје, во соработка со средните училишта ќе се врши реконструкција на фасадите и на инфраструктурата во објектите која што ќе чини 70 милиони денари.

-Училиштата ќе добијат енергетски ефикасни фасади, во согласност со современите стандарди за рационализација и за заштеда на електричната и на топлинската енергија. Покрај реконструкција на фасадите предвидена е реконструкција на покривите и на надворешната столарија, таму каде што е потребно. Висината на средствата за оваа намена, предвидени во буџетот на Град Скопје изнесува 70 милиони денари. Овие средства ги обезбедивме со пренамена на средствата што беа предвидени за Скопје 2014 – вели Шилегов.

Тој информираше дека буџетот на Град Скопје за образование за оваа година е двојно зголемен во споредба со лани и изнесува 163,2 милиони денари.

– Во рамките на овие реконструктивните активности се зема предвид и адаптацијата на просторот за пристапност на учениците со физичка попреченост. Тоа значи дека ќе се изградат надворешни и внатрешни рампи во училиштата каде што тие недостигаат, а исто така ќе се адаптираат и тоалетите во сите средни училишта на Градот Скопје – рече Шилегов.


Сугарески: Во предлог-буџетот има повеќе пари за инфраструктурата и за гасификацијата


Скопје, 4 декември, 2017 - 14:12 (META) 

Министерот за транспорт и врски, Горан Сугарески, рече дека предлог-буџетот за 2018 година на Министерството за транспорт и врски изнесува 92,3 милиони евра, пари кои се предвидени за капитални проекти.

При презентацијата на предлог-буџетот, Сугарески додаде дека овие пари ќе бидат наменети за инвестиции во делот на гасификацијата, железничката и за комуналната инфраструктура. За гасификација се предвидени 36 милиони евра.

– Во патната инфраструктура продолжува изградбата на автопатиштата. Планирано е во март следната година да биде пуштен автопатот Демир Капија – Смоквица, до крајот на септември да биде изграден автопатот Миладиновци – Штип и дополнително да се направи анекс на договор за изградба на автопатот Кичево- Охрид, за што преговорите се во завршна фаза – рече Сугарески.

На крајот на следната година или на почетокот на 2019 година, треба да почне изградбата на автопатот Скопје-Блаце. Изградбата на патот Дебар – Тирана ќе биде и една од темите на најавената заедничка седница на владите на Македонија и на Албанија, покрај железничката линија Кичево – Лин, за која е завршена проектната документација.

Во текот на 2018 година ќе почне и реконструкција на 26 патишта во земјата.


Новиот министер за здравство може ќе биде од кај Села, а може и не


Скопје, 15 ноември, 2017 - 16:30 (META) 

Разговорите за изборот на новиот министер за здравство се во тек со коалициските партнери од владејачката коалиција, а реконструкција на Влада ќе има доколку биде избран кандидат кој не доаѓа од Алијансата за Албанците, изјави денеска премиерот Зоран Заев.

Тој се надева дека до крајот на неделата ќе биде донесена одлука и посочи дека многу важно е персоналното решение, односно за какви луѓе се разговара.

– Здравството е високо во очекувањата на граѓаните. Ако дојде од Алијансата за Албанците, тогаш нема да има реконструкција на Владата. Ако дојде пак од друга политичка партија логично е дека Алијансата останува во владината коалиција и треба да има министерско место. Затоа се отворени сите овие можности за дебата. Пресудни ќе бидат имињата кои ни стојат на располагање и кој ќе ја преземе оваа одговорна функција – рече Заев.

Според премиерот, во одлучувањето треба да се гледа прво името на кандидатот за да може граѓаните, пациентите, лекарите и медицинската фела да му веруваат.


Сугарески најави реконструкција на 26 патни делници, вредна 86 милиони евра


Скопје, 31 октомври, 2017 - 17:10 (META) 

Министерот за транспорт и врски, Горан Сугарески, и директорот на Јавното претпријатие за државни патишта, Зоран Китанов, денеска ги презентираа предвидените реконструкции на 26 патни правци, од кои дел се автопатски, а поголем дел делници на магистрални или регионални патишта, со вкупна должина од преку 420 километри. За тоа се предвидуваат 86 милиони евра, во што учествуваат и кредити земени од меѓународни институции.

Меѓу другото, ќе се врши проширување и реконструкција на двата коловози на патниот правец Катланово – Петровец, во должина од должина 6,5 километри, за што, според проценките, би се потрошиле 5 милиони евра. Предвидена е и реконструкција на автопатската делница Миладиновци – Хиподром, во должина од 10 километри, за 4 милиони евра.

За реконструкција на патот Штип – Радовиш, во должина од 20 километри, се предвидува дека ќе се потрошат 3 милиони евра.

Другите предвидени реконструкции се наведени на веб-страницата на Министерството за транспорт и врски.


Кандидатите за градоначалници ветуваат препород за Сарај


Скопје, 5 октомври, 2017 - 10:34 (META) 

Со буџет на Општина Сарај од 20 милиони евра, кога би застанале на челото на општината, четворицата кандидати за градоналник на оваа општина, ветуваат дека ќе направат многу. Така кажаа на вчерашната дебата од дебатниот карван „Живот во Македонија“ (#Debatpernime), кој го организираат „Порталб“, „Калѕо“, „Вистиномер“ и телевизијата „Арт“.

Башким Бакиу од Беса, Блерим Беџети од ДУИ, Екрем Алија од Алијанса за Албанците и Сефедин Алиу од ДПА ветија дека 30 отсто од буџетот би се трошеле за реконструкција на постојните и за изградба на нови улици и патишта, како и за изградба на училиште во Чајлане, превоз за учениците од селата, изградба на поликлиника во Сарај, подобро управување со отпадот и за инвестиции во туристичките капацитети Матка, езерото Треска и рекреативниот центар Сарај.

Исто така, беше ветено ново училиште во Свиларе и ординации и други медицински установи од јавното здравство, а ако недостига медицински кадар, би се ангажирале и Косовци, пренесува „Порталб“.

Дебатата ја водеше новинарката Јета Џара. Дебатниот карван „Живот во Македонија“ продолжува денеска во Гостивар.


Сугарески најави изградба на водоводни и канализациски мрежи во 20 општини


Скопје, 25 септември, 2017 - 12:44 (META) 

Инвестиции од 20 милиони евра за нови водоводни и канализациски мрежи во 20 општини најави денеска министерот за транспорт и врски, Горан Сугарески. Рече дека акцентот ќе се стави на руралните општини, а целта е од сегашните 18 отсто, покриеноста со такви мрежи да се искачи на 40 отсто.

– Со оваа нова инвестиција на Министерството за транспорт и врски, онака како што ветивме, почнуваме со реализација на проектот за унапредување на водоводната и на канализациската мрежа. Особен акцент ставаме на руралните општини каде процентот на покриеност со водоводна и со канализациска мрежа е 18 отсто. Наша цел е за 4 години овој процент да се зголеми на 40 отсто, што е во функција на обезбедување рамномерен регионален развој и баланс меѓу урбаните центри и руралните средини – рече Сугарески.

Тој напомена дека проектите од овој нов инвестициски циклус на Министерството за транспорт и врски ќе се реализираат во соработка со Европската инвестициска банка, КФВ банката и со Секретаријатот за економски прашања од Швајцарија.

Првите проекти што ќе почнат наскоро, се 18  на број, а за нив се планирани вкупно 7,4 милиони евра. Ќе се гради цевковод за подобрување на водоснабдувањето во Гостивар, ќе се инсталираат нови водомери со далечинско отчитување во општина Куманово, а во прилепско Големо Коњари ќе се гради дел од канализациска мрежа. Планирана е и изградба на секундарна мрежа на фекална канализација за населените места Короишта, Ливада и Ложани во општина Струга, во вредност од 456.000 евра. Исто така, ќе се реконструира водоводна мрежа на населба Превалец до село Оризари во оштина Велес, во Липково ќе се гради пречистителна станица за вода за пиење, а во Крива Паланка ќе се реконструира дел од водоводната мрежа. Во Долнени предвидено е да се гради дел од фекална канализација со пречистителна станица за село Ропотово, а предвидени се и проекти во Неготино, Битола, Виница, Ресен, Студеничани, Старо Нагоричане и во Желино.

Со 8 милиони евра, од кои 5 милиони се грант, односно неповратни средства, ќе се подобрува водоснабдувањето во општините Кавадарци, Радовиш и Гевгелија, а со неповратни 4 милиони евра од Секретаријатот за економски прашања од Швајцарија ќе се подобрува водоснабдувањето во општина Гостивар.


МЗШВ плати 207.000 евра долг за системот за наводнување на Јужно-вардарска Долина


Скопје, 1 септември, 2017 - 15:39 (META) 

Министерството за земјоделство, шумарство и водостопанство денеска плати 207.000 евра заостанат долг, за консултантски услуги за втората фаза од проектот „Програма за наводнување Јужно-вардарска Долина“.

На овој начин, како што информираат од министерството, се откочува реализацијата на проектот, која беше блокирана поради тоа што претходната влада не плаќала редовно за консултантски услуги во изминатите две години.

„Со подмирувањето на долгот овозможивме меѓународниот консултант на проектот да продолжи со работа, а со тоа и да се продолжат активностите за изградба на системите за наводнување во Валандовскиот Регион. Ова е една од повеќето активности преземени за подобрување и за унапредување на соработката со германската кредитна банка за обнова КФВ“, информираат од МЗШВ.

Со овој проект се предвидени реконструкција, рехабилитација и изградба на систем за наводнување од околу 2.000 хектари во регионот на Удово, Јосифово и на Пирава. За реализација на втората фаза од овој проект, предвидени и обезбедени се околу 16 милиони евра, преку кредит од германската банка и од буџетот на МЗШВ.

Проектот Јужно-вардарска Долина е од витално значење за земјоделството во Јужниот Регион и со неговата реализација долгорочно ќе се реши проблемот со обезбедување вода за наводнување во овој регион.


Костов: Болницата „8 Септември“ има долг од пет милиони евра


Скопје, 19 август, 2017 - 16:10 (META) 

Градската општа болница „8 Септември“ има долг од 5 милиони евра или околу 243 милиони денари, информираше денеска на прес-конференција директорот Христијан Костов.

Тој додаде дека оваа состојба ја затекнал откако стапил на функција, а долгот бил кон различни фирми, имало неплатени сметки, режиски трошоци како и неплатени казнени камати поради тужби.

– Во некои простории не е направено ништо уште од самото пуштање на болницата во употреба, од 1971 година. Од круцијално значење е интервенцијата кај операционите сали кои со ова темпо на работа на болницата, во догледно време нема да бидат функционални. На годишно ниво се изведуват околу седум илјади оперативни интервенции. Треба да се обноват и амбулантските простории. Тука се опслужуваат околу 250 илјади пациенти годишно – рече Костов.

Како што најави, приоритет во неговата работа ќе биде реконструкција на оперативниот блок и единицата за реанимација, бидејќи таму операциите се одвивале, во како што кажа, субстандардни услови.


Реконструкција на турската влада и итен состанок на Ердоган и на Јилдрим


Анкара, 19 јули, 2017 - 16:54 (META) 

Турскиот премиер Бинали Јилдрим објави реконструкција на владата во која остануваат 15 досегашни министри, на кои ќе им се приклучат уште пет нови.

Клучните министерства, за економија, финансии, за надворешни и за внатрешни работи, како и за европски работи, остануваат непроменети.

По состанокот со претседателот Реџеп Таип Ердоган, Јилдрим рече дека шест од досегашните министри преминуваат на нови функции.

Вицепремиери ќе бидат Мехме Шимшек, Бекир Боздаг, Фикри Исик, Реџео Акдаг и Хакан Чавушоглу.

Шимшек останува задолжен за економија, ресорот финансии и понатаму ќе го води Начи Агбал, а на иста функција останува и министерот за стопанство, Нихат Зејбекчи.

Нов министер за правда ќе биде Абдулхамит Ѓул, а за одбрана – Нуретин Чаникли.

За внатрешни работи остаува Мевлут Чавушоглу, додека Берат Албајрак останува министер за енергетика.

Заменик-премиерот и портпарол на владата, Нуман Кургулмус, сега станува министер за туризам.

Реконструкцијата се очекуваше уште од мај, кога Ердоган го презеде раководството на владејачката Партија на правдата и развој, а по референдумот за уставот со кој се проширија неговите овластувања.


СДСМ: Заради криминални тендери, ВМРО-ДПМНЕ сакаше да го уништи Скупи


Скопје, 16 јули, 2017 - 19:32 (META) 

„Додека ВМРО-ДПМНЕ ги подметнуваше новокомпонираните барокни градби како културно наследство, вистинското културно и историско наследство скапуваше и се распаѓаше. Додека ВМРО-ДПМЕ ги трошеше парите на граѓаните на стиропор и на лажен барок, најзначајните културно-историски објекти, како античкиот локалитет Хераклеја, скопскиот Аквадукт, археолошките остатоци на Плаошник, фреската „Ангелот од Курбиново“ во црквата „Свети Ѓорѓија“ и други, свесно и намерно беа загрозувани и запуштени“, одговори СДСМ на денешната прес-конференција на Владимир Атанасов во седиштето на ВМРО-ДПМНЕ.

„Локалитетот Скупи, за кој денес ВМРО-ДПМНЕ лицемерно прикажува загриженост, беше во опасност од уништување само заради остварување на криминални интереси на ВМРО-ДПМНЕ. СДСМ долго време предупредуваше дека ВМРО-ДПМНЕ преку таканеречена обнова и преку криминален тендер со набилдани цени сакаше противправно да гради сала со 9000 седишта и со тоа да го уништи археолошкиот локалитет Скупи. За разлика од криминалното владење на ВМРО-ДПМНЕ, СДСМ навистина ќе се грижи и ќе го заштити културното и историско наследство. За конкретниот случај со Скупи, одобрени се средства за да се доврши конзервацијата и таа е завршена. Нема да се дозволи остварување на криминални интереси и продолжување во следни фази на таканаречена обнова, бидејќи таков термин не постои во Законот“, се вели во реакцијата.