Започнува реконструкцијата на „Долни Сарај“, една од најрепрезентативните сцени во Охрид


Охрид, 28 септември, 2018 - 11:55 (META) 

„Долни Сарај“, една од најубавите и најрепрезентативни сцени во Охрид ќе добие нов, функционален и модерен изглед со реконструкцијата што следува во текот на наредниот период.

„„Долни Сарај“ која е една од најубавите сцени во градот ќе го добие заслужениот лик и ќе претставува најсоодветното место за настапите на уметниците од целиот свет кои учествуваат на најреномираниот музичко-сценски фестивал во Македонија, „Охридско лето“. Од друга страна, таа ќе биде и удобно катче за публиката. Планирано е, градежните активности да завршат во декември“, изјави директорката на Националната установа „Охридско лето“, Наташа Поповиќ.

Според Поповиќ, сцената ќе претпрпи комплетна и темелна санација со нивелирање и зголемување на површината за 10 проценти, како и вградување полиуретански под за подобрување на перформансот и заради заштита од атмосферски влијанија.

Што се однесува до гледалиштата на „Долни Сарај“, ќе биде извршена комплетна санација на постоечките, а ќе се постават и ново западно и ново централно гледалиште, со што, капацитетот наменет за публиката ќе се зголеми за околу 40 отсто. Исто така, проектот предвидува и проширување на пристапниот влез за товарни возила до самата сцена.

Комплетно санирана ќе биде и терасата на „Долни Сарај“ која лежи над самото Охридско Езеро. Таму ќе се реновира подот, како и постоечката бетонска ограда. Проектната документација предвидува и комплетно реновирање и проширување на пристапните скали кон терасата.

Предвидено е и некоклукратно зголемување на капицитетот на електричната моќност, а целиот простор ќе добие и ново хортикултурно уредување.

Целокупниот проект за реконструкција и санација на сцената „Долни Сарај“ вреди 2,3 милиони денари, од кои 1,4 милиони денари ги обезбеди Министерството за култура преку програмата за култура за 2018 година, а останатите средства, фестивалот ги обезбеди претходно со цел сцената да добие модерен изглед според сите светски стандарди.


Реконструкцијата на градскиот стадион во Прилеп ќе почне одново


Прилеп, 13 септември, 2018 - 15:09 (META) 

Иако претходната локална власт одвоила 28 милиони денари (455.000 евра) пред две години и дури потпишала договор со Фудбалската федерација на Македонија (ФФМ) за реконструкцијата на Градскиот стадион „Гоце Делчев“ во Прилеп, стадионот е запуштен, за покривната конструкција не е изработена статика, а најголемиот дел од работите се многу далеку од конечна реализација, иако роковите се истечени. Се прави нов проект, а ќе се распише и нов тендер.

Веќе е формирана нова општинска комисија која што треба да ги доутврди пропустите во проектот, а одговорност ќе мора да се понесе, рече прилепскиот градоначалник Илија Јованоски презентирајќи ги денеска на прес-конференција проблемите во реконструкцијата.

– Прво, градежната фирма „Нискоградба“ којашто требаше изградбата стоотстотно да ја заврши во февруари, и со пролонгираниот рок, не ги финишира градежните работи ниту 7-8 отсто. Челичната покривна конструкција на северната трибина нема статика, така што постои опасност да падне покривот и целата трибина, што би можело да предизвика катастрофални последици. За изградба на рефлекторите за стадионот со височина од 40 метри и тежина од преку 10 тони, било издадено решение за канделабри, наместо дозвола за градба согласно со закон. А, агрегатот за рефлекторите со стариот проект бил сместен во една соблекувална. Со една реченица, проектот за градски стадион што го изработила претходната власт е противзаконски и штетен – истакна Јованоски на денешната прес конференција.

Фудбалскиот клуб „Победа“ и граѓаните на Прилеп воопшто, се без градски стадион повеќе од две години. Стадионот е запуштен, трибините не се градат, нема никакви услови за да се одржи каков било натпревар.

Прилепскиот градоначалник најави нов проект за реконструкцијата на стадионот и нов тендер.
– Институтот за земјотресно инженерство ИЗИИС, треба да изработи нова статика за покривната челична конструкција на северната трибина, а Општината ќе распише нов тендер за изградба, откако ќе заврши изработката на новиот проект согласно со законските регулативи и прописи. Но, виновниците за сето ова треба да понесат одговорност – рече Јованоски.

Иако во минатото во неделите реки народ се слеваа кон градскиот стадион и дури се вршеше и пренасочување на сообраќајот, веќе една деценија улицата на која се наоѓа градскиот стадион во недела е речиси пуста, а стадионот со години се распаѓа.


Без вода утре и задутре голем дел од општините Кисела Вода и Аеродром


Скопје, 9 август, 2018 - 12:54 (META) 

Поради реконструкција на водоводна линија што ќе се изведува кај новиот кружен тек меѓу булевар Србија и улицата Христо Татарчев кај последна 24-ка, од утре во 20 часот до сабота претпладне или напладне, без вода ќе биде голем дел од источното подрачје на Скопје, соопшти Центарот за управување со кризи – Скопје.

Без вода ќе бидат Аеродром и Ново Лисиче (високата зона, односно становите над 5-ти кат), Припор, Сопиште, Ракотинци и Добри Дол, како и дел од населбата Кисела Вода на улицата Христо Татарчев крак 1-11, крак 2, Сервисна Зона Југ, дел од булеварот Борис Трајковски и дел од булеварот „Србија“ (од новиот кружен тек до булеварот Борис Трајковски).

Според предвидувањата на ЈП „Водовод и канализација – Скопје, зафатот би бил готов за 12 до 18 часа, што значи дека нормално водоснабдување ќе се воспостави во периодот од 8 до 14 часот в сабота.

ЈП „Водовод и канализација – Скопје“ за жителите од наведените населби места ќе обезбеди цистерни со питка вода. Исто така, дека уличните чешми во населбите Аеродром и Ново Лисиче непречено ќе функционираат.


Адеми најави реконструкции на училишта и домови и изградба на нови објекти


Скопје, 31 јули, 2018 - 15:13 (META) 

Министерот за образование и наука, Арбер Адеми, денеска најави реконструкции на училишта и ученички домови, како и завршување на започнатите реконструкции на студентскиот дом „Гоце Делчев“ во Скопје, но и изградба на нови училишни објекти.

Ќе се вршат реконструкции на училишта или изградба на нови училишни објекти во општините Боговиње, Студеничани, Демир Капија, Чаир и Струга.

Предвидена е и комплетна реконструкција на Ученичкиот дом кој е во склоп на средното земјоделско училиште „Кочо Рацин“ во Свети Николе, како и на зградата на училиштето. Ќе се менуваат и прозорците и вратите на средното училиште „Ѓошо Викентиев“ во Кочани, а во средното училиште „Гостивар“ во Гостивар ќе се врши реконструкција на системот за греење и реконструкција на покривот на спортската сала.

Како што објасни министерот за образование и наука, до септември годинава се очекува да завршат градежните и реконструктивните зафати на блоковите В и Г на студентскиот Дом „Гоце Делчев“ во Скопје, кои се почнати во мај минатата година.

На почетокот на следниот месец ќе почне и постапката за набавка на нов мебел и душеци за потребите на 18 ученички домови.

Министерот Адеми очекува со почетокот на новата учебна година да бидат  готови спортските сали во четири основни или средни училишта во Бедиње, Кавадарци, Гостивар и Камењане.


Од утре до недела затворена улицата 23 Октомври


Скопје, 19 јули, 2018 - 11:18 (META) 

Град Скопје соопштува дека од утре до недела ќе биде затворен за сообраќај кракот од улицата 23 Октомври (поранешна Владимир Комаров) до крстосницата со улицата Ѓуро Ѓоновиќ, односно на потегот кој минува под Транспортен центар.

На таа локација ќе се вршат работи за изведба на нова фекална канализација и реконструкција на водоводната мрежа.


Град Скопје ќе го намали буџетот за 440.000 евра


Скопје, 14 јуни, 2018 - 13:18 (META) 

Со ребалансот на буџетот на Град Скопје за 2018, кој ќе се најде на седницата на градскиот Совет на 20 јуни, се предвидува да се потрошат 27 милиони денари (440.000 евра) помалку од претходно испланираните. Исто така, со ребалансот ќе се наменат пари за проекти што не биле планирани да се изведат годинава, известија од Град Скопје.

Така, наместо четири милијарди и 254 милиони денари (69,17 милиони евра), колку што изнесува буџетот сега, со ребалансот тој ќе се намали на четири милијарди и 227 милиони денари (68,73 милиони евра).

„Овој ребаланс е подготвен во согласност со усвоениот прв квартален извештај за извршување на Буџетот на Град Скопје за 2018 година. Во првиот квартал остварувањето на приходите се одвива согласно со планираното, а плаќањата на расходите се одвиваат редовно и навремено“, велат од Град Скопје.

Вкупните приходи за овој период од годината се 1,1 милијарди денари (17,88 милиони евра) што е 17 отсто од вкупно испланираните приходи за цела 2018 година. Притоа, има раст од 2 отсто во приходите во однос на истиот период минатата година.

Најголемите промени кои ќе ги донесе ребалансот се зголемување на ставката за комунални работи, каде сега ќе се додадат уште 67,15 милиони денари (близу милион и 10.000 евра), додека во секторот за сообраќај е предвидено намалување за 104,85 милиони денари (малку повеќе од 1,7 милиони евра). Притоа, најголемиот дел од новите пари за комунални дејности за наменети за реконструкција и подигнување на јавно зеленило, како и за расчистување диви депонии.

Новите проекти за кои ќе се наменат пари со ребалансот се изградба на улица Ленинова, реконструкција на бул. Никола Карев, изградба на ул. Боца Иванова, како и за изградб, одржување и реконструкција на улиците Брадфордска, Македонско – Косовска бригада, Андон Димитров (Жарко Зрењанин), Живко Фирфов, како и изградба, реконструкција и одржување на мали плоштади.

Ребалансот вклучува и 15,5 милиони денари за основачки влог за новото акционерско друштво кое ќе го формира Град Скопје и ќе обезбеди нови приклучоци на парно греење, но и треба да го спроведува процесот за гасификација на Скопје.


Чакаровски именуван за Национален координатор за здравство


Скопје, 6 јуни, 2018 - 12:11 (META) 

Владата на својата редовна седница го именуваше гинекологот Гоце Чакаровски за Национален координатор за здравство – со ова Чакаровски доби нова функција откако претходно беше тргнат од позицијата заменик министер за здравство во рамки на владината реконструкција.

Чакаровски доаѓа од Битола, каде претходно работел како шеф на родилната сала во Клиничката болница „Д-р Трифун Пановски“.

Во својата кариера тој бил и претседател на Лекарската комора на клиничката болница „Д-р Трифун Пановски“, како и заменик претседател на Лекарското здружение на медицински центар – Битола.

За национален координатор за култура претходно беше назначен и екс министерот за култура Роберт Алаѓозовски.


Сугарески: За изградба и реконструкција на Коридор 8, инвестираме 500 милиони евра


Тетово, 5 јуни, 2018 - 13:49 (META) 

Aвтопатот Скопје – Тетово во должина од 17 километри се рехабилитира и инвестицијата е во вредност од 1,1 милиони евра, средства обезбедени од буџетот на Јавното претпријатие за државни патишта (ЈПДП), информираат од Министерство за транспорт и врски.

Министерот за транспорт и врески, Горан Сугарески истакна дека во западниот дел на државата се инвестираат преку половина милијарда евра за изградба и реконструкција на патната мрежа на Коридор 8.

Покрај реконструкцијата на автопатот од Скопје до Тетово, во втората половина на годината преку ЈПДП ќе се распише тендер за проектирање за реконструкција на патот од Тетово до Гостивар на ниво на стандарден автопат.

„Во меѓувреме се работи на реконструкција на државниот пат од Гостивар до Кичево, со вкупна вредност на инвестицијата од преку 6 милиони евра. Во тек е и проектирање за изградба на нов автопат од Гостивар до Кичево и секако продолжуваме со изградба на автопатот од Кичево до Охрид“, изјави Сугарески.

Директорот на ЈПДП, Зоран Китанов истакна дека од вкупната должина до сега се асфалтирани 9 километри и се очекува до крајот на јуни реконструкцијата на делницата на потегот од Скопје кон Тетово да е комплетно завршена.

„Во текот на овој месец ќе започнат и градежните работи за реконструкција на делницата на потегот од Групчин кон Сарај“, изјави Китанов.


Која е „ќе“, а која била „не“ влада, се расправа на собраниската седница


Скопје, 1 јуни, 2018 - 13:11 (META) 

Ве уверувам дека кандидатите за министри и заменици-министри посветено и совесно ќе ги вршат своите обврски во согласност со законите и во интерес на граѓаните, рече премиерот Зоран Заев на почетокот на собраниската седница за реконструкција на Владата.

– Зад нас е една година од формирањето на оваа влада, и успеавме да ја оставиме зад нас политичката криза. Среќен сум кога ќе се сетам каде бевме, а каде сме сега. Можеме и имаме намера да постигнеме многу повеќе, се движиме во вистинска насока. Во Собранието наскоро ќе бидат ставени одлуки кои ќе донесат добросотојба на граѓаните – рече Заев и накратко ги претстави кандидатите за министри.

На ова му реплицираше пратеникот од ВМРО-ДПМНЕ, Илија Димовски кој реконструкцијата ја нарече „пазарџиска“.

– Она што денеска не го правите е реконструкција на Владата во секторите кои потфрлија и кои што има низа скандали. Во овој состав има министри кои што не се снаоѓаат, не работат и нема реални резултати во ниту еден сектор – рече Димовски

Според пратеничката Лилјана Затуроска, денеска требало да се разговара за реконструкција која ќе ги вклучува оставките на премиерот и министерката за одбрана Радмила Шеќеринска затоа што според неа, не се спроведени реформи, има нарачани пресуди и се тргува со државните и националните интереси.

Координаторот на пратеничката група на ВМРО-ДПМНЕ, Драган Данев кабинетот на Зев го нарече „ќе“ – влада.

– Оваа Влада ќе остане во меморијата на граѓаните како „ќе“ – влада, бидејќи употребува „ќе“ за сето она што нема капацитет, енергија, знаење и можности да го направи – рече Данев.

На ова му реплицираше координаторот на пратеничката група на СДСМ, Томислав Тунтев кој рече дека ако оваа влада е „ќе“ влада, тогаш претходната била „не“ – влада односно „анти“ – влада.

Она што почна како дебата за реконструкција на Владата, продолжи во меѓусебни партиски препукувања и објаснувања што направила, а што не направила претходната влада, како и дебата за рејтингот на партиите и лидерите.


Започна седницата на која ќе се гласаат новите министри


Скопје, 1 јуни, 2018 - 11:25 (META) 

Tочно една година и помалку од еден ден откако Владата на премиерот Зоран Заев доби мандат од пратениците, во Собранието започна седницата за владината реконструкција. Новите министри треба да бидат изгласани најдоцна до полноќ, а замениците министри најдоцна до утре, но не е исклучено и двете точки да се изгласаат денеска.

Нови министри се Асаф Адеми од Беса за култура, кој доаѓа на местото на Роберт Алаѓозовски, Бардуљ Даути од ДПА, министер без ресор кој доаѓа на местото на Рамиз Мерки, Рената Дескоска ќе го замени Билен Салији во Министерството за правда, а неа во Министерството за образование ќе ја замени досегашниот заменик Арбр Адеми.

За заменици министри се предложени Андреј Жерновски за заменик министер за надворешни работи, Асим Муса за заменик министер за здравство, Ѓонул Бајрактар за заменик министер за труд и социјална политика и Садик Беќири за заменик министер за транспорт и врски.

Првата точка на дневниот ред беше распишување оглас за претседател, заменик-претседател и членови на Државната изборна комисија. Одлуката беше изгласана без расправа, со 88 гласови „за“.