!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Трамп е најлошо рангиран претседател на САД во последните 70 години


Вашингтон, 16 јули, 2017 - 19:26 (META) 

Граѓаните на САД за американскиот претседател Доналд Трамп сметаат дека во последните 70 години е најлошиот претседател на државата во првите половина година од мандатот, јави „Еј-би-си њуз“, повикувајќи се на анкетата што ја спроведе заедно со весникот „Вашингтон пост“.

Во анкетата се најдоа прашања за компетентноста на Трамп на светската сцена, неговата ефективност, републиканскиот план за здравствена заштита и за улогата на Русија во американските претседателски избори во 2016 година.

Триесет и шест отсто од анкетираните се изјасниле дека ја поддржуваат работата на Трамп, што е за десет отсто помалку од процентите што ги доби во првите 100 дена во Белата куќа.

Најблизок на Трамп по слабиот рејтинг по половина година на власт беше претседателот Џералд Форд со 39 отсто поддршка во февруари 1975 година.


„Брима Галуп“: СДСМ и Заев со поголем рејтинг од ВМРО-ДПМНЕ и од Груевски


Скопје, 23 јуни, 2017 - 11:39 (META) 

Рејтингот на СДСМ е за 2,6 отсто повисок од тој на ВМРО-ДПМНЕ, покажува најновата анкета на „Брима Галуп“ спроведена непосредно по изборот на новата Влада од 2 до 12 јуни 2017 година.

Рејтингот на СДСМ е 22,4 отсто, на ВМРО-ДПМНЕ – 19,8 отсто, ДУИ има 7,3 отсто, Беса и Движењето за реформи на ДПА имаат по 4,3 проценти, а ДПА е со најнизок рејтинг од 1,8 отсто.

ВМРО-ДПМНЕ, во сегментот на етничките Македонци, има предност од 0,9 отсто, но СДСМ го поддржуваат 6,3 отсто од етничките Албанци, а исто така партијата е во предност пред ВМРО-ДПМНЕ и кај гласачите од другите етнички заедници.

Резултатите покажуваат дека дошло и до промени во рејтингот на политичарите, па сега највисок рејтинг има Зоран Заев за кого се одлучиле 17,7 отсто од испитаниците и е пред Никола Груевски, чиј рејтинг е помал од тој на Заев за 4,7 проценти и изнесува вкупно 13 отсто.

Али Ахмети кај албанскиот електорат има предност пред Зијадин Села и пред Билал Касами. За Ахмети како политичар, во кого имаат најмногу доверба, се определиле 23,8 отсто етнички Албанци, за Села се определиле 15,9 отсто, а за Касами – 13,9 отсто.

Најголем дел, односно 29,8 проценти од вкупниот број испитаници се изјасниле дека немаат доверба во ниту еден политичар.


Анкета на ИПИС: 5,3 отсто предност на ВМРО-ДПМНЕ пред СДСМ


Скопје, 16 март, 2017 - 13:08 (META) 

Доколку следната недела се одржат нови парламентарни избори, за ВМРО-ДПМНЕ би гласале 27,1 отсто од граѓаните, а за СДСМ – 21,8 отсто, покажува најновата анкета спроведена од Институтот за политички истражувања од Скопје (ИПИС).

Истражувањето покажува дека за ДУИ би гласале 4,9 отсто од анкетираните, за Беса – 2,1 отсто, за Алијанса за Албанците – 1,1 отсто, а за ДПА – 0,9 отсто. За одговорот „ниту една партија“ се одлучиле 18,7 отсто од анкетираните, „не знам“ бил одговор на 23,3 отсто, а „не сакам да кажам“ рекле 8,2 отсто.

Според анкетата, за ВМРО-ДПМНЕ својот глас би го дале 34,3 проценти од испитаниците етнички Македонци, а за СДСМ – 24,3 отсто.

Истражувањето покажува дека етничките Албанци најголема доверба имаат во ДУИ, односно 21,4 отсто поддршка, додека 13 проценти од етничките Албанци својот глас би го дале за СДСМ. Под 10 проценти доверба имаат ДПА, Беса и Алијанса за Албанците.

За изборите во декември минатата година, рејтингот на ВМРО-ДПМНЕ, според ИПИС, бил 25,5 отсто, а на СДСМ – 24,4 проценти.

Анкетата е спроведена во периодот помеѓу 10 и 13 март 2017 година, на 1.100 полнолетни испитаници на ниво на Република Македонија.


Рејтингот на Трамп на најниско ниво


Вашингтон, 27 февруари, 2017 - 11:27 (META) 

Помалку од половина од Американците сметаат дека новиот американски претседател Доналд Трамп добро ја врши својата работа, покажува најновата анкета на телевизиската мрежа „Ен-би-си“ и на дневникот „Вол стрит џурнал“.

Според истражувањето кое е спроведено во период од 18 до 22 февруари годинава, а објавено вчера, 44 отсто од испитаниците го одобруваат начинот на кој Трамп раководи со земјата, 48 отсто не го одобруваат, додека 8 проценти се неодлучни.

Исто така, 32 отсто од испитаниците навеле дека првиот месец од преземањето на функцијата покажува дека претседателот не е дораснат за функцијата што ја извршува.

Трамп е единствен претседател во современата историја на САД кој го почнал мандатот со негативен рејтинг од минус 4 отсто. За споредба, неговиот претходник, Барак Обама, во февруари 2009 година имал за 34 отсто поголем рејтинг.


„Фич“ го намали кредитниот рејтинг на Турција поради политичките случувања и нападите


Њујорк, 28 јануари, 2017 - 11:19 (META) 

Меѓународната агенција за оценка на кредитниот рејтинг „Фич“ го намали кредитниот рејтинг на Турција на ниво „отпад“, поради политичките случувања.

Тие, како што се вели во оценката, ги поткопуваат економските показатели и институционалната независност, јавуваат медиумите.

Суверениот долг на Турција беше намален до „ББ плус“ со стабилна перспектива.

Агенцијата исто така наведува дека масовните чистки во јавниот сектор, по обидот за пуч, ги обесхрабруваат економските оператори.

Терористичките напади ја нарушиле довербата на потрошувачите и предизвикале штети во туристичкиот сектор.


Според анкетата на „Димитрија Чуповски“, ВМРО-ДПМНЕ со речиси двојна предност пред СДСМ


Скопје, 6 декември, 2016 - 13:37 (META) 

Новата анкета на Институтот „Димитрија Чуповски“ покажува дека за ВМРО-ДПМНЕ би гласале 28,1 отсто од испитаниците, за СДСМ – 15 отсто, за ДУИ – 5,7 отсто, а за ДПА – 2,2 отсто.

Истражувањето покажува дека за Беса би гласале 3,9 отсто од анкетираните, за Алијансата за Албанците – 1,8 отсто, а за Левица и за коалицијата ВМРО за Македонија – по 1,5 отсто.

За одговорот „не знам“ односно „немам одговор“ се одлучиле 10,3 отсто од прашаните, а дека нема да гласаат за ниту една партија рекле 30 отсто од испитаниците.

Анкетата била спроведена телефонски од 1 до 3 декември на 1.150 испитаници на ниво на целата територија на Република Македонија, во сите изборни единици со можност за статистичка грешка од 2 проценти.


Анкета „Фактор плус“: 4,5 отсто предност за ВМРО-ДПМНЕ пред СДСМ


Скопје, 5 декември, 2016 - 14:06 (META) 

За Коалицијата за подобра Македонија предводена од ВМРО-ДПМНЕ би гласале 27,6 отсто од гласачите, за СДСМ и за Коалицијата за живот во Македонија – 23,1 отсто, за ДУИ – 6,2 отсто, за Коалицијата за промени и правда – 6,1 отсто, за ДПА – 4,4 отсто, за Коалицијата ВМРО за Македонија – 1,3 отсто и за Движењето Беса 1 отсто, покажува анкетата што ја спровела агенцијата „Фактор плус“.

Од агенцијата наведуваат дека анкетата била спроведена телефонски, во периодот од 28 ноември до 2 декември оваа година, на 1.200 испитаници во сите изборни единици.

Истражувањето покажува дека 8,6 отсто рекле дека нема да гласаат, 9,3 не знаат за кого би гласале, 7,4 отсто одбиле да кажат за кого ќе гласаат, а 5 отсто избрале друга опција.

На прашањето „Дали ќе гласате на претстојните вонредни парламентарни избори“, 63 отсто од испитаниците одговориле потврдно, 13 отсто рекле дека нема да гласаат, 14 отсто биле неодлучни, а 10 отсто одбиле да одговорат.


Предизборни анкети смеат да се објавуваат до 6 декември


Скопје, 4 декември, 2016 - 9:44 (META) 

Анкетите што покажуваат во која насока се движи јавното мислење во предизборниот период и колкав е рејтингот на политичките партии, според Изборниот законик, смеат да се објавуваат најдоцна пет дена пред денот на изборите, односно до 6 декември.

Резултатите од испитувањата на јавното мислење спроведени на самиот ден на изборите, пак, не смеат да се објавуваат пред 19 часот, односно пред затворањето на избирачките места.

При објавување на резултатите, медиумите се должни да наведат податоци за името на нарачателот што го побарал и го платил испитувањето, институцијата што го извршила испитувањето, применетата методологија, големината и структурата на испитаниот примерок и периодот во кој е спроведено испитувањето.

Последната анкета,  објавена пред два дена, која ја спроведе агенцијата „Рејтинг“, по нарачка на „24 Вести“ покажа до сега најмала разлика помеѓу двете најголеми политички партии од македонскиот блок, ВМРО-ДПМНЕ и СДСМ односно само 1,4 отсто предност за владејачката партија. Според истражувањето, за ВМРО-ДПМНЕ би гласале 29,9 отсто од испитаниците, за СДСМ 28,5 отсто, за ДУИ 6,8 отсто, а за ДПА 2,8 проценти.

Пред анекатата на „Рејтинг“, на 25 ноември, со свои истражувања на јавното мислење излегоа и „Брима Галуп“, по нарачка на неделникот „Република“, а потоа и Институтот за демократија „Социетас цивилис“ и МЦМС во соработка со телевизија „Телма“.

Иако објавени во ист ден, овие анкети имаа далеку поразлични резултати. Според анкетата на „Брима Галуп“, разликата помеѓу ВМРО-ДПМНЕ и СДСМ е 9,1 отсто, а според анкетата на Институт за демократија „Социетас цивилис“ разликата е 4,8 отсто.

Истражувањето на „Брима Галуп“ покажа дека доколку следната недела се одржат избори, 25,8 отсто од граѓаните би гласале за ВМРО-ДПМНЕ, за СДСМ би се изјасниле 16,7 отсто, за ДУИ би гласале 6,5 отсто, за ДПА – 3 отсто, за Беса – 3,2 отсто, неодлучни би биле 14 отсто, а без одговор би биле 11,5 отсто од испитаниците.

Резултатите на анкетата на Институт за демократија „Социетас цивилис“, од друга страна, покажуваа дека за ВМРО-ДПМНЕ би гласале 23,7 отсто од гласачите, за СДСМ – 18,9 отсто, за ДУИ – 6,2 отсто, за ДПА – 3,3 отсто, за Беса – 1,2 отсто, додека за други партии би гласале 4,9 отсто.

Разликата во рејтинзите меѓу двете најголеми македонски партии, ВМРО-ДПМНЕ и СДСМ, е 4,2 отсто во прилог на владејачката партија, покажаа резултатите од последната анкета на агенцијата „Фактор плус Адриа“, објавена на 27 октомври.

На 15 октомври, анкета спроведе и институтот „Димитрија Чуповски“, чии резултати покажаа дека за ВМРО-ДПМНЕ би гласале 27,6 отсто од граѓаните, за СДСМ 16,1 отсто, за ДУИ 6,3 отсто, а за ДПА 2,9 отсто од граѓаните. За одговорот „ниту една партија“ се одлучиле 22 отсто од испитаниците, а „не знам“ одговориле 17,4 отсто.

Меѓународниот републикански институт (ИРИ), кој прави неколку истражувања на јавното мислење во текот на годината на повеќе теми, најави дека нема да прави предизборна анкета за рејтингот на политичките партии во Македонија.

Анкетите на ИРИ важат за едни од најточните и најрелевантните кога станува збор за рејтингот на политичките партии и за рејтингот што го имаат нивните лидери.

Според последната анкета на ИРИ, која беше објавена на 9 јуни, 27 отсто од испитаниците се изјаснале дека би гласале за ВМРО-ДПМНЕ, 18 отсто за СДСМ, 23 биле без одговор, за ДУИ се одлучиле 6 отсто, за ДПА – 3 отсто, а ливчето би го поништиле 9 отсто од анкетираните.


ММФ: Потребни се реформи на пензискиот систем и фискална консолидација


Вашингтон, 22 ноември, 2016 - 15:48 (META) 

Пензискиот систем во Македонија е базиран на солидарност и се соочува со значителна финансиска нерамнотежа поради стареењето на популацијата и намалувањето на придонесите, се вели во најновиот извештај на Меѓународниот монетарен фонд.

Пензискиот дефицит, кој изнесува 4,5 отсто од домашниот бруто-производ, се предвидува да се зголеми двојно до 2030 година доколку не се спроведат сериозни реформи, предупредуваат од ММФ.

Оттаму апелираат дека осигурувањето одржливост на пензискиот систем е важна среднорочна цел, која државата треба да си ја постави.

ММФ во најновиот извештај, исто така, предупредува дека е потребна фискална консолидација без одложување поради сè поголемиот јавен долг на земјата и зголемувањето на ризиците.

„Зголемувањето на трошоците на новите задолжувања, виоските фискални потреби и неодамнешното намалување на кредитниот рејтинг од „Фич“ ги зголемија краткорочните фискални ризици. Јавните финансии, исто така, се соочуваат со долгорочни предизвици поради стареењето на популацијата. Фискалната консолидација треба да почне без одложување. За да се намалат ризиците и за да се обезбеди фискален простор, консолидацијата треба да почне веднаш за да се стабилизира јавниот долг на ниво од 50 отсто од БДП“, соопшти ММФ.


Анкета на „Фактор плус Адриа“: ВМРО-ДПМНЕ има 4,2 отсто предност пред СДСМ


Скопје, 27 октомври, 2016 - 19:44 (META) 

Разликата во рејтинзите меѓу двете најголеми македонски партии, ВМРО-ДПМНЕ и СДСМ, е 4,2 отсто во прилог на владејачката партија, покажале резултатите од последната анкета на агенцијата „Фактор плус Адриа“, објавени денеска.

Анкетата била спроведена во периодот од 19 до 26 октомври, на репрезентативен примерок од 1.082 испитаници.

Според истражувањето, ВМРО-ДПМНЕ ја има поддршката на 28,1 отсто од гласачите, додека за СДСМ се определиле 23,9 отсто од граѓаните.

На третото место, според анкетата, е Коалицијата за промени и правда (Демократски сојуз, ФРОДЕМ, ДЕМОС и МОРО – Работничка партија) со 9,1 отсто поддршка, а по нив следуваат ДУИ, за која се определиле 6,7 отсто од испитаниците, и ДПА за која би гласале 4,7 отсто.

Како неопределени во анкетата на „Фактор плус Адриа“ се изјасниле 22,1 отсто од испитаниците.

На прашањето дали ќе гласаат на изборите на 11 декември, позитивно се изјасниле 64 отсто од анкетираните, 12 отсто рекле дека нема да излезат на гласање, 15 отсто сè уште не одлучиле, а 9 отсто не сакале да одговорат.

Според анкетата, 54 отсто од испитаниците одговориле оти сметаат дека во последните три години е зголемена корупцијата во Македонија.

Во однос на целокупната состојба во општеството, 71 отсто од анкетираните се изјасниле дека чувствуваат загриженост и страв, а 77 отсто рекле дека излезот од ваквата состојба го гледаат во зачленувањето на земјава во Европската Унија.

Според претходната анкета на оваа агенција, која беше објавена кон крајот на февруари оваа година, предноста на ВМРО-ДПМНЕ пред СДСМ беше 4,3 отсто. За ВМРО-ДПМНЕ тогаш се изјасниле 28,9 отсто од гласачите, за СДСМ – 24,6 отсто, за ДУИ – 10 отсто од граѓаните, за ДПА – 4,4 отсто, а неопределени биле 26,9 отсто од испитаниците.