!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Најмалку 14 лица се убиени, а осум се ранети во напад во Мексико


Мексико Сити, 27 септември, 2017 - 11:09 (META) 

Најмалку 14 лица се убиени, а осум се ранети во напад на вооружена група на центар за рехабилитација на северот на Мексико, соопшти полицијата.

Вооружената група синоќа упаднала во центарот за лекување наркозависници „Обединети семејства“ и почнала да пука на луѓето, каде што во тој момент биле 25 лица.

Во последната деценија, најмалку шест напади се извршени врз рехабилитациски центри, а за најголем дел од нив се одговорни членовите на банди кои сакаат да се пресметаат со нивните ривали што се кријат во тие центри.


МЗШВ плати 207.000 евра долг за системот за наводнување на Јужно-вардарска Долина


Скопје, 1 септември, 2017 - 15:39 (META) 

Министерството за земјоделство, шумарство и водостопанство денеска плати 207.000 евра заостанат долг, за консултантски услуги за втората фаза од проектот „Програма за наводнување Јужно-вардарска Долина“.

На овој начин, како што информираат од министерството, се откочува реализацијата на проектот, која беше блокирана поради тоа што претходната влада не плаќала редовно за консултантски услуги во изминатите две години.

„Со подмирувањето на долгот овозможивме меѓународниот консултант на проектот да продолжи со работа, а со тоа и да се продолжат активностите за изградба на системите за наводнување во Валандовскиот Регион. Ова е една од повеќето активности преземени за подобрување и за унапредување на соработката со германската кредитна банка за обнова КФВ“, информираат од МЗШВ.

Со овој проект се предвидени реконструкција, рехабилитација и изградба на систем за наводнување од околу 2.000 хектари во регионот на Удово, Јосифово и на Пирава. За реализација на втората фаза од овој проект, предвидени и обезбедени се околу 16 милиони евра, преку кредит од германската банка и од буџетот на МЗШВ.

Проектот Јужно-вардарска Долина е од витално значење за земјоделството во Јужниот Регион и со неговата реализација долгорочно ќе се реши проблемот со обезбедување вода за наводнување во овој регион.


Во Србија рехабилитиран четничкиот командант Никола Калабиќ


Ваљево, 26 мај, 2017 - 13:56 (META) 

Вишиот суд во српскиот град Ваљево донесе одлука за прифаќање на барањето за рехабилитација на некогашниот четнички командант Никола Калабиќ. Со решението за рехабилитација, судот практично ги поништи сите претходни одлуки на државниот комисии и судот и нивните правни последици, па Никола Калабиќ сега како рехабилитиран се прогласува и за неосудуван.

Калабиќ во текот на Втората светска војна беше еден од најистакнатите четнички команданти и се смета за одговорен за повеќе масакри извршени од припадниците на Корпусот на горската гарда во космајскиот, смедеревскиот и аранѓеловачкиот регион во текот на втората половина на 1943 и првата половина на 1944 година.

Според сега прифатената верзија, Калабиќ по Втората светска војна бил заробен од ОЗНА и прифатил да соработува во операцијата за четничкиот водач Драгољуб Дража Михајловиќ.

Постапката пред Вишиот суд во Ваљево траеше пет години, а барањето за рехабилитација го поднесе внуката на Калабиќ.

Решението за рехабилитација е првостепено, а Вишиот обвинител најави тужба, со што ќе треба да се чека на одлуката на повисоката судска инстанца, која може да ја потврди или да ја поништи рехабилитацијата.


Железничката станица ќе биде завршена за три-четири месеци


Скопје, 20 јули, 2015 - 16:02 (META) 

Реконструкцијата на Железничката станица во Скопје е во завршна фаза. Се очекува за три-четири месеци комплетно да биде реконструирана и да добие нов модерен изглед. Ова денеска на увидот во градежните работи го изјавија министерот за транспорт и врски, Владо Мисајловски, и директорот на „МЖ – Инфраструктура“, Ирфан Асани.

– Два перона се целосно направени, се работи на третиот перон, лифтовите и санитарните јазли се речиси завршени, а се работи и на електричните и на климатизациските инсталации, кои се завршени околу 80 отсто – истакна Асани.

Министерот Мисајловски рече дека најголем дел од парите за реконструкцијата се обезбедени од ИПА-фондови, а останатиот дел од државниот буџет.


Дачиќ: Рехабилитацијата на Дража Михајловиќ ја продлабочува поделбата


Белград, 14 мај, 2015 - 19:15 (META) 

Шефот на српската дипломатија, Ивица Дачиќ, соопшти дека одлуката за рехабилитација на Дража Михајловиќ не претставува чекор кон помирување со вистината, туку само ја продлабочува поделбата.

– Вишиот суд во Белград, кога ја донел срамната одлука, требало да се потсети дека на истиот ден пред 70 години, на 14 мај 1945 година, англиските војници во Италија и во Австрија заробија околу 30.000 усташи и четници и им ги предале на југословенските партизани. Тој податок јасно говори за тоа кои биле сојузниците, а кои непријателите во мај 1945 година – се наведува во соопштението на српското МНР.


Србија го рехабилитираше четникот Дража Михајловиќ


Белград, 14 мај, 2015 - 15:31 (META) 

Вишиот суд во Белград денеска го рехабилитираше Драгољуб Дража Михајловиќ, лидер на четничкото движење, и му ги врати граѓанските права кои му биле одземени во 1946 година кога му било судено за соработка со нацистите и со окупаторите.

Судијата Александар Трешњев рече дека судот го усвоил барањето за рехабилитација и ја поништи пресудата со која Михајловиќ на 15 јули 1946 година беше осуден на смрт, а стрелан е два дена подоцна.

Одлуката, според Законот за рехабилитација, е конечна затоа што не постои право на жалба.

Поранешниот хрватски претседател Стипе Месиќ ја оцени одлуката за рехабилитација на Михајловиќ како политички скандал.

– Рехабилитацијата на Дража Михајловиќ и говорењето дека неговите убиства и за него како за жртва на комунизмот претставува грубо исмејување на фактите. Секое рехабилитирање на четниците, исто како и секое релативизирање и рехабилитирање на усташите, може да заврши само со катастрофа – предупреди Месиќ, додавајќи дека очекува Европската унија да се изјасни за овој случај, бидејќи земјите кои рехабилитираат ноторни воени злосторници од Втората светска војна, веројатно не се подготвени за членство во ЕУ, која се темели на антифашизмот.