Струјата поевтинува за 0,1 проценти


Скопје, 29 јуни, 2018 - 14:36 (META) 

Цената на електричната енергија за потрошувачите во Македонија се намалува за 0,1 проценти, a ќе важи од 1 јули. Одлуката ја донесе денеска Регулаторната комисија за енергетика (РКЕ).

Како што соопшти новиот претседател на РКЕ, Марко Бислимоски, цената по која што струјата ќе ја продава државниот производител ЕЛЕМ се намалува за 3,39 проценти, цената на АД МЕПСО за дистрибуција се намалува за 5,34 проценти, додека цената на ЕВН Македонија за дистрибуција се зголемува за 2,59 проценти.

Цената за домаќинствата ќе изнесува 4,44 денари за киловат-час за еднотарифните броила, додека кај двотарифните броила, скапата тарифа изнесува 5,54 денари за киловат-час, додека евтината тарифа е 2,78 денари за киловат-час.

Евтината тарифа е на важност во неделите и од 14 до 16 часот во другите денови.

Како што информираа вчера од РКЕ, компанијата ЕВН побарала зголемување на цената за девет проценти, ЕЛЕМ намалување за 1,5 проценти, а МЕПСО не побарале ниту зголемување, ниту намалување.


Владата предложи нови членови на Регулаторна комисија за енергетика


Скопје, 20 јуни, 2018 - 9:56 (META) 

На 75. седница Владата го состави списокот на нови членови на Регулаторната комисија за енергетика (РКЕ). Владата на Собранието му предлага да ги избере Марко Бислимоски,  за претседател, а за членови Наташа Вељановска, Атанаско Тунески и Куштрим Рамадани, кој е актуелен член на Комисијата.

Владата на 75. седница ја усвоила предлог – завршната сметка на буџетот за 2017 година, со конечен извештај на овластен државен ревизор. Во завршната сметка е констатирано дека минатата година капиталните инвестиции изнесувале 19,8 милијарди денари, вкупните приходи биле 179,70 милиони денари, додека вкупните расходи 196,56 милион денари.

На седницата исто така било одлучено за доделување на државна помош на друштво за производство и трговија „Теламон Европа Македонија“. Станува збор за нова инвестиција во Македонија, која изнесува 4 милиони евра и ќе оствари 300 вработувања во првите пет години. Компанијата Теламон произведува машини за спојување, автоматски машини за сечење кабли, ленти, машини за пресекување и затворање. Инаку, компанијата е една од најголемите во САД.

Исто така е донесена одлука да се усвои договорот со „Аим проперту“ за закуп на земјиште во Технолошко индустриската развојна зона Скопје 2.

На предлог од Mинистерството за труд и социјална политика, министрите го прифатиле предлог – законот за спречување и заштита од дискриминација.

Како една од точките, Александар Дамески е именуван за директор на прилепскиот затвор.


Државата останува на ставот за зголемена акциза на дизелот


Скопје, 29 мај, 2018 - 16:56 (META) 

Државата нема да преземе мерки во однос на континуираниот пораст на цената на нафтата и нафтените деривати и останува на ставот дека мора да остане акцизата за дизелот која од оваа година е зголемена за 3,5 денари, одговори на новинарско прашање вицепремиерот за економски прашања, Кочо Анѓушев, во врска со поскапувањето на горивата.

Тој вети мерки кои се однесуваат на транспортерите кои работат со странство.

Методологијата за пресметка на цените нема да се менува, се додека не одлучи Регулаторната комисија за енергетика. Не може да се укине ниту ставката за производство, која подразбира во цената на нафтата да се вкалкулираат и 27 долари по тон за нафта произведена во државата, иако не се произведува гориво веќе шест години.

Такво нешто, според најавите, може да се очекува дури догодина кога истекува важноста на договорот потпишан меѓу владата и „Хеленик петролеум“ во 1999 година.

„Државата мора да ги почитува обврските од меѓународните договори, кога ќе истече овој, ќе се ослободиме од таквите клаузули“, додаде Анѓушев.


Горивата од ноќеска на полноќ поскапуваат до два денари


Скопје, 14 мај, 2018 - 13:34 (META) 

Цената на горивата од ноќеска на полноќ се зголемува од еден до два денари, одлучи денеска Регулаторна комисија на енергетика.

Цената на „еуросупер БС – 98“ се зголемува за два денара за литар, на „еуросупер БС-95“ за еден ипол денар, а на „еуродизелот“ се зголемува за еден денар.

Просечната цена на суровата нафта во изминатите 14 дена изнесуваше 75,134 долари за барел, а курсот на денарот во однос на доларот 51,30 денари.


Анѓушев: Во моментов, Регулаторната комисија за енергетика е зависна од опозицијата


Скопје, 3 април, 2018 - 14:14 (META) 

Со стапување во сила на новиот закон за енергетика, кој беше усвоен на владина седница минатата недела и кој треба да биде изгласан во Собранието, ќе престане мандатот на претседателот на Регулаторната комисија за енерегетика (РКЕ), Димитар Петров. Потоа, Владата ќе има рок од 30 дена да достави до Собранието предлог за нов претседател и двајца членови на РКЕ.

На денешното детално претставување на предлог-законот, вицепремиерот за економски прашања Кочо Анѓушев рече дека, согласно европските директиви, треба да се обезбеди ротација на комесарите во регулаторните тела и затоа се менуваат дел од тие комесари.

Прашан дали на овој начин Владата не се меша директно во регулаторно тело кое треба да биде независно, Анѓушев рече дека и до сега Владата го предложувала претседателот на РКЕ до Собранието, но важно е кој човек ќе се предложи.

– Пред целокупната јавност ќе го отворам прашањето, дали ние имаме независна Регулаторна комисија за енергетика, дали таа комисија, која ја води човек кој претходно бил јасен член на политичка партија, дава независност. Не. Во моментов Регулаторната комисија за енергетика е зависна од опозицијата. Сакаме независна Регулаторна комисија, и затоа во неа треба да седнат професионалци кои си ја знаат работата во делот на енергетиката – одговори Анѓушев.

Вицепремиерот не одговори кој ќе го наследи  Петров, туку објасни дека ќе има конкурс на кој, како што кажа, се надева дека ќе се јават професионалци и луѓе кои долги години се вклучени во таа проблематика.


РКЕ новите цени за водата ги донела по локалните избори, наместо во 2016 година


Скопје, 21 февруари, 2018 - 9:46 (META) 

Владата на вчерашната 55. седница ја разгледала информацијата за обврските и роковите кои произлегуваат од Законот за утврдување на цени на водните услуги.

„Врз основа на оваа информација, од анализата произлегува дека Регулаторната комисија за енергетика не ги почитувала роковите утврдени согласно Законот за утврдување на цени на водните услуги. Наместо да бидат донесени во 2016, Регулаторната комисија за енергетика новите цени за водата ги донела по завршувањето на локалните избори во 2017 година“, се вели во соопштението на Влада.

Од таму додаваат дека „оваа постапка сериозно ја доведува во прашање независноста на Регулаторната комисија за енергетика која очигледно ги синхронизирала одлуките за поскапување на водата со резултатите од локалните избори.“

„Согласно ова сознание, Владата им препорача на водостопанските претпријатија, дека можат да поднесат барање за измена на решенијата за тарифите за водна услуга согласно ставот 2 од членот 17 од Законот за утврдување на цените за водите“, се додава во соопштението.

На вчерашната седница Владата го разгледала и утврдила предлог-законот за бесплатна правна помош, со одлука да биде доставен до Собранието на усвојување.

„Со овој закон се уредуваат општите правила за обезбедување на бесплатната правна помош, а негова цел е да се овозможи и унапреди правото на физичките лица на пристап до правдата и правичната судска заштита преку обезбедување финансиска поддршка од страна на државата“, информираат од Владата.


Водата ќе поскапе поради воведување на тарифа за прочистување на отпадни води


Скопје, 26 јануари, 2018 - 14:49 (META) 

Град Скопје не побара поскапување на водата, туку имаме законска обврска да ја спроведеме одлуката на Регулаторна комисија за енергетика (РКЕ) која побара од ЈП „Водовод и канализација“, при пресметката на цената на водата, да воведе и тарифа за прочистување на отпадни води, брифираше денеска градоначалникот на Град Скопје, Петре Шилегов.

– Цената на водата до сега се утврдуваше врз основа на две ставки, врз основа на кои досегашната цена за кубен метар чинеше 29,32 денари. Но, согласно европската регулатива законска обврска имаме при пресметката на цената да воведеме тарифа за прочистување на отпадни води. Оваа тарифа изнесува 2,04 денари по кубен метар. РКЕ понуди три цени на водата, ние ја одбравме најниската, така што просечната сметка за вода од 500 денари, ќе се зголеми на 522 денари. Со ова минимално зголемување на цената на водата, прифативме обврска да земеме под управување две прочистителни станици на реката Лепенец кај Волково и пуштањето на употреба на прочистителната станица на реката Треска – појасни Шилегов.

Тој појасни дека, годишното одржување на овие две прочистителни станици чини 100 милиони денари.

– ЈП „Водовод и канализација“, со зголемувањето на цената на водата ќе има дополнителен прилив од 74 милиони денари. Другите 26 милиони денари ќе се обезбедат со рационализација на работењето – додаде Шилегов.

Новата цена на водата за физички лица ќе чини 30,71 денари по кубик и 60,66 денари за правни лица. Поскапувањето на водата ќе се најде како точка на дневен ред на Советот на Град Скопје в среда, а повисоки сметки граѓаните ќе добиваат од март.

Законската обврска за воведување на тарифа за прочистителни отпадни води важи од 2016 година, а Регулаторна комисија за енергетика, за првпат оваа година му наложува на ЈП „Водовод и канализација“ за спроведување на оваа регулатива.


Скопјани ќе пијат поевтина вода, ама може поскапо да ја плаќаaт


Скопје, 25 јануари, 2018 - 15:57 (META) 

Новите цени на водата што Јавното претпријатие Водовод и канализација – Скопје сака да им ги наплаќа на скопјани се повисоки од сегашната.

Имено, со одлука на Регулаторната комисија за енергетика, која од почетокот на годинава е надлежна и за утврдување на максималните цени на водата, и со одлука на Управниот одбор на Јавното претпријатие Водовод и канализација – Скопје, водоснабдувачот наместо досегашните 29,39 денари за кубен метар вода ќе треба тоа количество во иднина на потрошувачите да им го продава за 28,67 денари.

Но, на таа цена ќе се додадат и 2,04 денари за секој кубен метар вода, на име на одржување на двете пречистителни станици за отпадни води на реките Лепенец и Треска, па цената што скопјани би ја плаќале ќе изнесува 30,71 денари за кубен метар, односно речиси 1,3 денари поскапо од сегашната цена од 29,39 денари.

Од „Водовод и канализација“ објаснуваат дека трошоците за пречистителните станици годишно ќе изнесуваат 100 милиони денари (1,62 милиони евра.

– Новата цена ќе биде со дополнително 2,04 денари на цената за кубен метар поради трошоците што ги имаме за работата на двете станици – изјавија од „Водовод и канализација – Скопје“ за „Мета“.

Новата цена на водата би стартувала откако ќе биде изгласана од Советот на Град Скопје, како основач на јавното претпријатие.


Дејан Бошковски разрешен од Регулаторна комисија за енергетика


Скопје, 25 декември, 2017 - 16:39 (META) 

Собранието, со 62 гласа „за“, го разреши поранешниот генерален директор на АД ЕЛЕМ, Дејан Бошковски, од Регулаторната комисија за енергетика.

Според Владата, при именувањето, Бошковски не го исполнил условот најмалку една година пред назначувањето за член на регулаторното тело да не бил член на надзорен или на управен одбор или на одбор на директори во друштво кое врши регулирана енергетска дејност.

Бошковски беше поставен за член во октомври минатата година.

Собранието го именуваше Панче Орцев за член на Комисијата на местото на Елена Маркова – Велинова, на која и заврши мандатот.


Горивата од ноќеска на полноќ поскапуваат за половина денар


Скопје, 25 декември, 2017 - 12:42 (META) 

Цените на бензините и на дизелот од ноќеска на полноќ се зголемуваат за половина денар, одлучи Регулаторна комисија за енергетика (РКЕ).

Новата цена на „еуросупер БС-95“ ќе изнесува 66,50 денари, „еуросупер БС-98“ ќе чини 68 денари за литар, а „еуродизелот“, 55 денари.

Малопродажните цени на нафтените деривати, согласно методологијата за формирање на цените на РКЕ, се зголемуваат во просек за 1,10 проценти.