!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Никој не ги консултира ИКТ-компаниите кога се носат закони од оваа област


Скопје, 26 септември, 2017 - 15:19 (META) 

Проектот на УСАИД „Партнерство за подобра бизнис-регулатива“ организираше форум, на кој тема беше регулативата на работни односи во ИКТ-секторот.

Шефот на проектот, Љубомир Димовски, изјави дека анкетата што била спроведена во рамките на проектот, покажала дека 76 проценти од анкетираните фирми сметаат дека не биле консултирани во процесот на носење на законската регулатива.

– Ова несомнено укажува на потребата за подобрување на процесот на јавно-приватен дијалог, што е и една од клучните цели на проектот – рече Димовски.

Целта на конференцијата е да одговори на тековните предизвици поврзани со регулирањето на работните односи кои се специфични за ИКТ-секторот, односно презентација и анализа на проблемите и на предизвиците со кои се соочуваат ИКТ-компаниите во однос на Законот за работни односи, плати и надоместоци од вработување, успешни приказни и искуства од регионот.

– ИКТ-индустријата е еден од економските сектори со најголем подем во Македонија. Има огромен потенцијал за вработување и за извоз и обезбедува можности за вработување со плати што се двојно повеќе од просекот во Македонија. ИКТ е исто така важен извор на вработување на високо образовани млади – изјави директорот на мисијата на УСАИД Македонија, Дејвид Атбери.


Македонците пушат по 18-19 цигари дневно, четврти сме во светот


Скопје, 19 април, 2017 - 13:33 (META) 

Македонија е при врвот на листата од 184 земји според потрошувачката на цигари и се наоѓа на високото четврто место. Според табелата на „Википедија“, пред нас се само Црна Гора, Белорусија и Либан.

Според слободна проценка на директорот на пазар за Македонија, Косово и за Албанија на „Империал тобако“, Кирил Величковски, пак, Македонците пушат по 18-19 цигари дневно.

Но, иако нашата држава е високо на листата на држави каде што најмногу се пуши, потрошувачката на цигари во Македонија од 2013 година бележи пад од два до четири отсто годишно.

Според Величковски, тоа се должи на промената на законската регулатива, ценовните политики, здравствениот аспект и на економската моќ на луѓето.

Овој пад е во рамките на европскиот просек, бидејќи во Европа постои пад на консумацијата на тутун во последните 15 години и тоа помеѓу два и шест отсто.

Врз намалување на пушењето, според Величковски, влијание имала и кампањата со фотографии на пакувањата на цигари, кои укажуваат на штетноста од пушењето.

„Имеприал тобако“ во Македонија постои 15 години, има инвестирано околу 33 милиони евра во осовременување на технолошкиот процес и во иновации. Компанијата е најголем производител на пазарот, при што извезува 42,6 проценти од производството и тоа во Русија и на пет пазари во регионот. За оваа година планирано е само извозот на рускиот пазар да достигне 30 отсто од производството.

Во компанијата се произведуваат шест брендови цигари за домашниот пазар со 60-процентен пазарен удел.


Коморите се здружуваат за да се донесат подобри закони за компаниите


Скопје, 19 декември, 2016 - 12:36 (META) 

Повеќе стопански комори ќе соработуваат следните четири години за да се донесе подобра бизнис-регулатива, бидејќи законите последниве години наместо да ја олеснат и да ја поедностават работата на компаниите, дополнително ја комплицираат. Тие често се менуваат, не се разбирливи и поради тоа, тешко може да се следат.

Ова денеска беше кажано на прес-конференцијата во Стопанска комора на Македонија, на која беше претставен проектот на УСАИД, „Партнерство за подобра бизнис-регулатива“.

– Во 2015 година, Собранието донесе 541 закон од кои 57 отсто преку ноќ, без јавни консултации. Иако тоа беше во насока на подобрување на регулативата, сепак, се покажа како голем предизвик за бизнисите, за нивните напори да се прилагодат кон направените промени – изјави директорот на Мисијата на УСАИД во Македонија, Џејмс Стаин.

Тој додаде дека законите се добри на хартија, но дека во практиката создаваат проблеми.

Во проектот ќе учествуваат Стопанската комора на Македонија, Стопанската комора на Северозападна Македонија (СКСЗМ) и Стопанската комора за информатички и комуникациски технологии (МАСИТ).

Проектот „Партнерство за подобра бизнис-регулатива“ тежи 1,9 милиони долари и ќе се фокусира на земјоделство, текстил, ИТ и на градежништво.


Kвалитетната градба e услов за стабилни објекти при силен земјотрес


Скопје, 16 ноември, 2016 - 14:07 (META) 

Во Македонија постои традиција и техничка регулатива за проектирање, изведба и за контрола на градби отпорни на силни земјотреси. Но, регулативата треба да се почитува во целост за да може објектите што се проектираат и се градат да се сметаат за сеизмички отпорни.

Ова е еден од заклучоците на домашните експерти кои учествуваа во дискусијата на стручниот форум посветен на сеизмичката отпорност на градбите во организација на Градежниот факултет од Скопје, Заводот за испитување на материјали и развој на нови технологии (ЗИМ), Институтот за земјотресно инженерство и инженерска сеизмологија (ИЗИИС) и Цементарница УСЈЕ.

Според професорите од Градежниот факултет во Скопје, неопходно е да се посвети внимание на делот од регулативата што го третира испитувањето на сеизмичката повредливост на постојните објекти, бидејќи за нив е неопходна специфична експертиза.

Дополнително, еден од основните услови за успешно асеизмичко проектирање на конструкциите, исто така, е и познавањето на геолошките карактеристики на почвата каде се гради.

„Особено внимание треба да се посвети на сигурноста на градбите за кои постојат недоречености во важечките прописи, како што се: доградбите, надградбите, објектите кои се реконструираат и другите специфични комплексни објекти“, истакна директорот на Институт за земјотресно инженерство и инженерска сеизмологија, Михаил Гаревски.


Царината почна со делење брошури за патниците


Скопје, 11 јули, 2016 - 14:46 (META) 

Во пресрет на летните одмори и на зголемената фрекфенција на патници на граничните премини, Царинската управа деновиве почна со делење брошури за информирање на патниците што влегуваат, излегуваат или транзитираат низ земјава, за нивните права и обврски, а за да се овозможи брза, безбедна и лесна царинска контрола, соопштуваат од Царината.

Како што информираат оттаму, информативните брошури се на македонски и на англиски јазик и содржат корисни податоци за важечката царинска регулатива за патнички промет, односно за дозволените количества за внесување или изнесување на тутунски и на алкохолни производи, парфеми, предмети за лична употреба, лекови, миленичиња, оружје и муниција, предмети од историска и од културна вредност и слично.

„На патниците им се презентираат и брошури со информации за царинска регулатива поврзана со пријавување пари, изработени на македонски, англиски, албански и на турски јазик. Патниците на аеродромите во Скопје и во Охрид за законската регулатива имаат можност да се информираат преку информативен видеозапис, кој во соработка со ТАВ е поставен на екраните на аеродромите“, стои во соопштението од Царинската управа.

Како што информираат од Царината, лимитот за внесување пари изнесува 10.000 евра, додека ефективни странски пари повеќе од 10.000 евра задолжително се пријавуваат на царинските органи.

„Што се однесува до изнесувањето пари од Македонија, резидентите мора да го пријават секој износ што надминува 2.000 евра и 120.000 денари по лице, при што се приложува потврда од овластена банка или менувачница. Изнесување на ефективни странски пари во износ поголем од 10.000 евра и 120.000 денари е забрането. Нерезидентите можат слободно да изнесат ефективни странски пари во износ до 10.000 евра и до 120.000 денари по лице. Доколку изнесуваат ефективни странски пари повеќе од 10.000 евра, задолжително се приложува на увид писмената потврда во која е евидентиран износот при влез од страна на царинскиот орган“, велат од Царината.

Во Македонија, додаваат од Царината, покрај личниот багаж и лекови за лична употреба, слободно може да се внесат до 200 цигари (или 100 цигариљоси или 50 пури или 250 грама тутун за пушење), еден парфем од 50 милилитри или една тоалетна вода од 250 милилитри, еден литар алкохолен пијалак или две литри вино.

За животни, суровини од животниско потекло, домашни миленичиња и за растенија се потребни посебни дозволи, а забрана постои за оружје и за муниција, недозволени супстанци, отрови и штетни материи, како и за фалсификувана и пиратска стока.

„Домашните патници се ослободени од увозни давачки за увоз на стока од некомерцијална природа во вредност до 350 евра. Во овие 350 евра не влегуваат алкохолни пијалаци, преработка од тутун, парфеми и тоалетна вода“, информираат од Царината.


Николети: Време е за измена на Даблинската регулатива


Стразбур, 30 септември, 2015 - 20:57 (META) 

Претседателот на италијанската парламентарна делегација во Советот на Европа, Микеле Николети, изјави дека европските влади признаваат дека регулативата од Даблин е „целосно нефункционална“ и оти дошло време за ревизија.

Николети истакнал дека резолуцијата на парламентарното собрание на Советот на Европа за ревизија на Даблинската регулатива е еден од најпрогресивните документи што неодамна се усвоени во европските институции за решавање на бегалската криза.

Според Даблинската регулатива, бегалците мораат да побараат азил во првата членка на ЕУ во која ќе стигнат. Регулативата предизвика контроверзии годинава затоа што повеќе стотини илјади бегалци од Сирија пристигнаа во Италија, Грција и во Унгарија.

За решавање на кризата, Парламентарното собрание на Советот на Европа усвои резолуција во која се бара ревизија на Даблинската регулатива.

Николети, кој ја подготвил резолуцијата, го повика колегите од Европскиот парламент да извршат притисок врз националните парламенти и влади.


Незири: Новиот закон за градежни производи ќе придонесе за развој на градежната индустрија


Скопје, 29 септември, 2015 - 12:26 (META) 

Ефикасен и силен механизам за контрола на квалитетот на градежните материјали кои се нудат на пазарот е еден од најзначајните услови што треба да обезбедат дополнителни гаранции за сигурноста на градбите и одржлив пораст на домашната градежна индустрија.

Ова е една од клучните заложби на учесниците на конференцијата „Влијанието на градежните материјали врз квалитетот на градбата“, организирана од „Цементарница Усје“, во функција на одбележување на 60-годишнината од почетокот со работа.

–  Градежната индустрија е значаен двигател на економскиот развој на земјата. Во насока на континуирано креирање на поволен амбиент за понатамошен развој на оваа гранка, Министерството за економија подготви нов закон за градежните производи, кој е усогласен со новите регулативи во законодавството на ЕУ. Тој ќе придонесе за поедноставување на административните постапки, скратување на времето потребно за добивање на именување на телата и е во функција на зголемена ефикасност за контрола и за сузбивање на сите технички и трговски бариери во оваа област. Сите овие аспекти, верувам дека ќе придонесат за понатамошен пораст и развој на градежната индустрија – изјави министерот за економија, Беким Незири.