!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Два послаби земјотреси регистрирани попладнево во Скопје


Скопје, 26 јануари, 2017 - 20:15 (META) 

Земјотрес со магнитуда од 2,1 степен според Рихтеровата скала, со епицентар во скопското епицентрално подрачје, е регистриран вечерва во 18.04 часот.

Сеизмолошката опсерваторија при Природно-математичкиот факултет соопшти дека земјотресот е почуствуван во Скопје и во околината со интензитет од 3 степени според Европската макросеизмичка скала.

Земјотрес со локална магнитуда од 1,9 степени според Рихтеровата скала бил регистриран и попладнево во 16.28 часот, исто така во скопското епицентрално подрачје.

Земјотресите се регистрирани од телеметриската сеизмолошка мрежа на Република Македонија со станици во Скопје, Штип, Валандово, Битола, Охрид и во Крушево.


За половина намален бројот на заболени од грип


Скопје, 26 јануари, 2017 - 16:14 (META) 

Во текот на третата недела од јануари, пријавени се 2.417 новозаболени лица од грип, што претставува намалување од 55,8 проценти во споредба со втората недела (од 9 до 15 јануари), кога беа пријавени 5.472 случаи, информира Институтот за јавно здравје за состојбата со грипот до 22 јануари.

Во истиот период, бројот на регистрирани случаи кај децата до 14 години е намален за три пати.

Најголем број заболени (71,8 проценти) се пријавени во најголемата возрасна група, од 15 до 64 години, а најмал број на заболени има кај децата до 4 години.

Во сезоната 2016/2017, вкупниот број на заболени од грип изнесува 31.732 лица, а има два смртни случаи поради грип.


МВР: Четири лица со име Ахмад Алмохамед поминале низ Македонија!


Скопје, 18 ноември, 2015 - 16:05 (META) 

Македонската полиција регистрирала четворица мигранти со сириско потекло кои транзитирале низ земјава под името Ахмад Алмохамед, за кое се претпоставува дека е идентитетот на еден од извршителите на терористичките напади во Париз, во петокот минатата недела, информираат за „Мета“ од Министерството за внатрешни работи (МВР).

mvr odgovor 1Оттаму велат дека во сите четири случаи, лицата имале различни генералии и дека поседувале грчки документи, но не и пасоши.

„Досега се регистрирани четири лица под истото име и презиме, сите со потекло од Сирија, сите со различни година на раѓање и со различни датуми и часови на влез во Република Македонија. Исто така, од извршените проверки, констатирано е дека сите четири лица што се јавуваат под ова име и презиме поседувале грчки документ, а не патна исправа“, стои во одговорот на МВР на нашите прашања.

Во врска со информацијата што ја пренесе грчкиот весник „Прототема“, според која, заедно со Ахмад Алмохамед, патувало уште едно лице, со име Мохамед Алмухамед, од МВР велат дека нема податоци за лице кое под тој идентитет влегло во Македонија.

„Во согласност со извршените проверки во нашите евиденции, констатирано е дека лицето Мохамед Алмухамед досега не е регистрирано и не постојат податоци дека остварило влез во Република Македонија“, стои во дописот од МВР.