!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Нема реална слика колку администрација имаме, регистарот не работи


Скопје, 13 август, 2017 - 14:41 (META) 

Министерството за информатичко општество и администрација (МИОА) нема официјална и веродостојна бројка на вработени во јавната администрација бидејќи регистарот за вработените не функционира, односно во него нема податоци од сите државни институции, а и оние што ги има, постојат сомневања дека голем број од нив не се уредно пополнети.

Ова денеска на прес-конференција го соопшти министерот за информатичко општество и администрација, Дамјан Манчевски, кој истакна дека дополнителен проблем е и тоа што Министерството, согласно Изборниот законик, мора да достави податок до Државната изборна комисија за бројот на вработени во јавната администрација.

Како што изјави министерот, во Македонија има 1.302 институции, од кои 197 не побарале согласност за систематизација со МИОА и за нив нема никакви податоци.

Според Манчевски, 150 институции имале одобрена систематизација, но таа не била активна, односно овие инстутиции никогаш не внеле податоци.

Поради овие недостатоци, потенцираше министерот, министерството до Државната изборна комисија вчера доставило податоци добиени со вкрстување на базите на податоци од повеќе различни институции и се однесуваат на 115.729 вработени во јавниот сектор.

– Оваа бројка не е официјална и не ја претставува реалната слика. Согласно тоа, МИОА не може да гарантира за целосна веродостојност на податоците, но сметаме дека доставените податоци ќе одговорат на потребите на Државната изборна комисија за распишување на локалните избори – рече Манчевски.

 


Тевдовски: 2017 ќе биде година на пресврт во економијата и за граѓаните


Скопје, 4 јануари, 2017 - 14:37 (META) 

Силно ќе ги поддржиме домашните претпријатија за тие да може да се развиваат, да отвораат пристојни работни места и да даваат повисоки плати, истакна претседателот на комисијата за економија и член на извршниот одбор на СДСМ, Драган Тевдовски.

– Испланиравме 140 милиони евра директна државна поддршка на домашните мали и средни претпријатија (МСП). Ќе им овозможиме поголем пристап до финансии, на пример, преку гаранции за кредити или преку инвестициски фонд за вложување во МСП. Ќе го олесниме пристапот на фирмите до јавните тендери, на пример, преку поделба на големите тендери на лотови или преку преферирање домашни производи и услуги – истакна Тевдовски.

Тој додаде дека ќе поддржат отворање на работни места во домашните фирми со издвојување 22 милиона евра, со што ќе се овозможи директно вработување на 16.000 лица на годишно ниво.

– Она што е клучно за фирмите, ќе ги ослободиме од досегашните притисоци и ќе го олесниме нивното функционирање. Нема да има непотребни инспекциски контроли и нарачани казни од илјадници евра. Ќе воведеме јавен регистар на инспекциските контроли, за да се спречат ваквите злоупотреби – додаде Тевдовски.

Тој, исто така, истакнa дека ќе ги вратат долговите на државата кон домашните фирми, а во првите 100 дена јавно ќе објават план со јасни рокови за нивно плаќање така што државата нема да доцни и да ја нарушува ликвидноста на фирмите.

 


Кривична пријава за полициска службеничка оти не внела во евиденција изгубен телефон


Битола, 22 јуни, 2015 - 13:45 (META) 

Секторот за внатрешни работи Битола поднел кривична пријава против полициски службеничка во локалната полициска станица, која е осомничена за несовесно работење во службата.

Според полицијата, осомничената во април годинава не пријавила и не внела во регистарот на пронајдени и на изгубени предмети мобилен телефон, што во станицата го донел граѓанин на Битола.


Ќе се купи софтвер вреден 270.000 евра за регистер на градежно земјиште


Штип, 11 март, 2015 - 19:01 (META) 

Македонија ќе биде третата европска држава, по Словенија и Швајцарија, што ќе добие регистер на градежно земјиште. Во тек е меѓународен тендер за набавка на софтвер во вредноост од 270.000 евра. Проектот денеска во Штип го промовира директорот на Агенцијата за катастар, Славчо Трпевски, кој рече дека една од предностите на регистерот е што граѓаните по електронски пат ќе може да дојдат до извод од урбанистички планови.

– Со регистерот се скратуваат роковите за донесување урбанистички планови, се дава максимална техничка поддршка за изработка на плановите и нивна усогласеност, а веднаш ќе може да се  издаваат изводите од плановите – рече Трпески. Додека директорот Трпески ги кажуваше предностите на идниот регистер на градежно земјиште, во ходникот трпеливо чекаше штипјанец, кој заедно со своите соседи веќе десет години се обидува да си ја врати уличката што ја узурпирал локален моќник.

– Уличката што постоеше 70 години е одземена и приклучена на еден што гравитира таму. Ние граѓаните бараме да ни се одлободи уличката што е вцртана во урбанистичкиот план. Веќе десет години одиме по катастар, по секторот за урбанизам и немаме одговор. Сите си молчат, а десет куќи се без приод – регираше граѓанинот.

Во Штип се одржа отворен ден на катастарот. Граѓаните брзо ги завршуваа своите потреби на шалтерите, но некои од нив се пожалија на препраќање од служба до служба за да завршат одредена работа. Во одредени случаи тоа бара месеци, па и години. Како што рече еден од присутните граѓани, кој е на работа во Италија, Македонија треба да го следи примерот од развиените земји, каде по електронски пат или на еден шалтер се завршуваат имотн0-правните работи.

В.К.

 


ЕУ ја засилува борбата против перењето пари


Брисел, 18 декември, 2014 - 20:05 (META) 

Европската Унија постигнала договор за новите правила чија цел е искоренување на даночната евазија и спречување на перење пари и финансирање тероризам преку фиктивни фирми, пренесуваат медиумите.

ЕУ со новите правила сака да го спречи искористувањето на фиктивните фирми за финансирање на тероризам, перење пари заработени со криминал и за даночната евазија.

Директивата, четврта по ред, првпат предвидува задолжително воспоставување национални регистри за вистинските сопственици на фирми, трустови и други правни лица, со нивните имиња, месецот и година на раѓање, националност и со државјанство.

Банките, сметководителите, адвокати, трговци со недвижности и казина исто така ќе мораат да внимаваат на трансакциите на своите клиенти.

Слободен пристап до регистрите ќе имаат надлежните национални власти од сите земји-членки на Унијата, додека делумен пристап е предвиден за банките, за да можат да проверуверуваат кои им се клиенти, како и сите други заинтересирани страни, вклучувајќи ги и новинарите, ако ја докажат легитимноста на барањето за увид во регистарот.

Новите мерки треба да стапат на сила во 2017 година, а договорот, кој наредната година треба да добие и формална потврда, оди чекор подалеку од начелата за вистинските сопственици на фирми кои беа прифатени од земјите на Г20.

„Транспаренси интернешенел“ го оценил одговорт на ЕУ како пресвртница, но од организацијата предупредиле дека тоа нема да овозможи целосна транспаретност бидејќи на новинарите и на јавноста им се дозволува само делумен пристап до регистрите.

Деталите за трустовите воопшто нема да бидат јавни, истакнале од „Транспаренси“, и покрај тоа што ќе бидат достапни на националните власти, како што се агенциите за борба против криминалот. Оттаму сметаат дека сите земји-членки на Унијата треба да го следат примерот на Велика Британија, Франција, Данска и на Холандија кои планираат на јавноста да и овозможат целосен пристап до податоците за вистинските сопственици на фирми.

Во светот секоја година се перат пари во вредност од 2 до 5 отсто од светскиот БДП.