!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Поповски и Прибе разговарале за владиниот план за реформи во медиумската сфера


Скопје, 20 јули, 2017 - 17:43 (META) 

Министерот без ресор задолжен за комуникација, отчетност и транспарентност, Роберт Поповски денеска имал средба со експертската група на Европската Унија предводена од Рајнхарт Прибе на која било разговарано за мерките и планот на Владата за реформите во медиумската сфера.

Поповски, како што соопштија од Владата, во елаборацијата на чекорите и мерките што се преземени од периодот од кога започна работата на новата влада, нагласил дека и понатаму е „задржан принципот на отвореност за сите добри идеи, како и за вклучување на сите релевантни организации и медиуми, за да се постигне најдобро можно решение за медиумските реформи“.

Тој ги информирал членовите на работната група на Прибе, дека со ребалансот на буџетот се обезбедени услови за укинување на радиодифузната такса, како прва мерка за поефикасно финансирање на Македонската радиотелевизија.

„Додека е во процес усвојувањето на ребалансот на буџетот во Собранието на Република Македонија, во тек е анализата за најдобро решение за утврдување на висината на стапката од буџетот со која ќе се обезбеди функционално работење на МРТ, како и независноста на јавното радиодифузно претпријатие“, рекол Поповски на средбата со Прибе и неговиот тим.


Претседателите на стопанските комори од регионот се сретнаа со Тајани


Подгорица, 19 јули, 2017 - 20:36 (META) 

Претседателите на стопанските комори на земјите од Западен Балкан, денеска во Подгорица се сретнаа со претседателот на Европскиот парламент, Антонио Тајани.

Состанокот, на кој присуствуваа и претседателот на Стопанската комора на Македонија, Бранко Азески, и претседавачот на собранието на комората, Антони Пешев, се одржал во просториите на Стопанската комора на Црна Гора.

„Констатирано е дека со донесувањето на повеќегодишниот акционен план за Регионалната економска област, Европската Унија ги насочува земјите од Западен Балкан да се фокусираат на меѓусебната соработка, а понатамошниот развој ќе се реализира преку структурите на ЦЕФТА“, информираат од Стопанска комора.

Тајани порачал дека земјите од Западен Балкан треба да ги подобрат економските реформи и владеење на правото.


Граѓанските организации бараат консултативен совет за реформите


Скопје, 19 јули, 2017 - 12:23 (META) 

Надградена верзија на предлогот на граѓанските организации за итни демократски реформи за следните 6, 9 и 12 месеци, денеска беше презентирана на прес-конференција во име на 73 граѓански организации и експерти. Предлозите за реформи се изработени од страна на 146 учесници на Форумот на граѓански организации на 4 и 5 јули годинава, а се надоврзуваат на основниот документ изработен во 2016 година.

„Овој план има цел да даде поттик, насоки и детални активности неопходни за враќање на демократските стандарди и вредности, како и за постигнување напредок во јавните политики и за враќање на довербата на граѓаните во клучните државни институции. Промената на власта сама по себе беше чекор напред поради тоа што со одржувањето на веродостојни избори се стави крај на длабоката повеќегодишна политичка криза, но тие не се гаранција за системски реформи кои се неопходни за да се надмине состојбата на заробена држава“, се вели во образложението.

Граѓанските организации предлагаат формирање консултативен совет за имплементација на клучните реформски приоритети на владино ниво, со кој ќе претседава претседателот на Владата и кој ќе се состои од претставници на надлежните министерства и на граѓанското општество.

Се бара и назначување на лица за контакт во министерствата и во независните, надзорните и во регулаторните тела кои ќе бидат одговорни за клучните реформски приоритети и кои, исто така, ќе бидат задолжени за соработка со тематските групи на граѓанското општество. Претставниците на иницијативата истакнаа дека во текот на целиот процес Владата треба да ги почитува принципите на транспарентност, одговорност, вклучување и ефективност, а неопходно е и политичките партии во Собранието да покажат вистинска посветеност за спроведување на клучните реформски приоритети. Ваква посветеност, иницијаторите очекуваат и од вонпарламентарните партии, како и од граѓанското општество во целина.

Исто така, посочено е на неопходноста преземените мерки да бидат насочени кон подобрување на социјалната кохезија на граѓаните и на сите етнички заедници. Во оваа насока, според иницијаторите, потребно е да се разгледаат препораките од прегледот на Охридскиот рамковен договор за социјалната кохезија од 2015 година.

„Од клучна важност е граѓанскиот сектор да биде вклучен во процесот на проценка на сегашната ситуација, како и во надзорот и во евалуацијата на напредокот во спроведувањето на клучните реформски приоритети. Потребно е да се обезбеди граѓанско учество и на ниво на извршната, како и на законодавната власт, вклучувајќи ја и соработката со судството и независните, контролните и регулаторните тела“, велат иницијаторите.


Судиите од Кривичен се сретнаа со Прибе, бараат да бидат вклучени во реформите


Скопје, 17 јули, 2017 - 17:48 (META) 

Судиите од Основниот суд Скопје 1 денеска имале средба со Рајнхард Прибе и со неговиот тим на експерти, на која било истакнато дека извештајот и препораките на работната група на Прибе од 2015 година „се основа за реформите во судството“.

Судиите на средбата истакнале дека е „потребно нивно поактивно вклучување во процесот на подготвување решенија за прашањата поврзани со финансирање на судството, условите за избор и напредување во кариерата, следењето на работата и оценувањето на судиите, разрешување на судии и други прашања“.

„Воедно судиите истакнаа и дека ги подржуваат процесите кои водат кон зајакнување на нивната независност и враќање на довербата на граѓаните во судството. Присутните на средбата се согласија дека само независно судство може да биде гарант на слободата и на правата на граѓаните“, стои во соопштението на Основниот суд Скопје.

Прибе и неговиот експертски тим, кој од денеска до 21 јули престојува во земјава, денеска имаше средба и со со претседателот на Врховниот суд, Јово Вангеловски. На средбата Вангеловски им ги презентирал неговите предлог-мерки за спроведување на реформите во судството.

Експертот на ЕУ и неговиот тим се ангажирани од Европската комисија да ѝ помогнат и да ја советуваат Владата во спроведувањето на системските реформи за владеење на правото во земјава.


Реформаторите на ВМРО-ДПМНЕ тврдат дека имаат поддршка и од пратеници


Скопје, 17 јули, 2017 - 15:08 (META) 

Борбата за демократија во ВМРО-ДПМНЕ е, всушност, борба за демократија во Република Македонија, за што имаме голема поддршка, вклучително и од многу од пратениците на партијатa, соопштија денеска членовите на Републичкиот штаб за реформи и за демократизација на ВМРО-ДПМНЕ.

– Демократска држава е можна само ако постојат и демократски политички партии – рекоа првите луѓе на Штабот за реформи, зборувајќи на јавна трибина што ја спроведе невладината организација „Цивил“.

Тие додадоа дека суштината на промените во ВМРО-ДПМНЕ е нејзината децентрализација кога станува збор за носењето одлуки.

– Срцето на проблемот не е персонален, туку е во статутот на партијата и во другите акти по кои се избира лидерот и му се даваат овластувањата – изјави Петар Богојески, еден од водачите на движењето за реформа во ВМРО-ДПМНЕ.

Тој додаде дека таквиот начин на централизирано водење на партијата доведе до огромна недоверба кон другите во партијата.

– Таа недоверба е основната причина зошто во ВМРО-ДПМНЕ беше „лиценциран“ и сè уште постои таканаречениот систем на меници – рече Богојески.

Илија Илијоски, член на штабот, рече дека декларацијата за демократизација и за реформи е доставена до централата на партијата уште на 29 јуни годинава, адресирана е до централниот комитет на ВМРО-ДПМНЕ и дека очекуваат да бидат повикани на разговор. На прашањето што доколку тоа не се случи, беше кажано дека имаат варијанти за секоја ситуација.

– Ние сепак веруваме дека нашето движење ќе стане толку масовно што едноставно ќе мора да се разговара за ова прашање – оцени Алексадар Михајловски, еден од водачите на штабот.

Тој додаде дека ја гледа Македонија како држава во која владее правото и во која постојат лостови на контрола на власта, вклучувајќи ги и независните институции и независните медиуми.

– Ние се залагаме за постоење на силно специјално обвинителство и за специјален суд за борба против корупцијата, како трајни инстиитуции. Не смее никогаш повеќе да се дозволи прашањето на криминалот и на корупцијата да зависат само од личната самоконтрола на политичарите – додаде Михајловски.

Реформаторите на ВМРО-ДПМНЕ јавно се извинија за шовинистичките пароли искажани на почетокот на протестите организирани од неформалното здружение „За заедничка Македонија“, го осудија влегувањето и насилствата во Собранието на 27 април, со оценка дека многу од граѓаните биле заведени и дезинформирани и најавија целосно свртување во однос на пројави на национализам и на шовинизам.

– Ние сметаме дека е доста од вложување во национални партии, туку треба вложување во граѓаните што живеат на овие простори. Нашиот однос кон граѓаните кои не се со македонски етничко потекло е целосно космополитиски и таква ја гледаме ВМРО-ДПМНЕ во иднина – изјави Алексадар Коневски-Цезар, исто така дел од штабот за реформи.

Од штабот за реформи потврдија дека се соочуваат со бројни и недолични физички закани и закани кон нивните семејства, но она што навистина ги загрижува се заканите кон членството на ВМРО-ДПМНЕ, кое е соочено со такви притисоци, што не смее да покаже дека сака реформи во партијата ни на социјалните мрежи.


Вангеловски на Прибе и на тимот им го презентирал својот план за реформи во судството


Скопје, 17 јули, 2017 - 14:56 (META) 

Рајнхард Прибе и неговиот тим експерти од денеска се во посета на земјава, во рамките на нивниот ангажман од страна Европската комисија да ѝ помогнат и да ја советуваат Владата во спроведувањето на системските реформи за владеење на правото.

Експертот на Европската Унија и неговиот тим денеска имале средба со претседателот на Врховниот суд, Јово Вангеловски. На средбата Вангеловски им ги презентирал неговите предлог-мерки за спорведување на реформите во судството.

„На средбата се разговараше за актуелната состојба во судството и за предлог-мерките за спроведување реформи во судството, подготвени од претседателот на Врховниот суд на Република Македонија, за остварување на концептот за независно и непристрасно судство, како гарант на демократијата и на владеењето на правото, во функција на заштита на човековите слободи и права“, стои во соопштението од Врховниот суд.

Прибе претходно ја посети земјава на 27 јуни, кога, исто така, имаше средба со претседателот на Врховниот суд, како и со министри во Владата.

Тој заедно со целиот негов тим, како што најави и еврокомесарот за проширување и добрососедска политика, Јоханес Хан, во земјава ќе престојува до 21 јули.

Прибе со експертскиот тим во 2015 година го подготви извештајот со препораките поврзани со прислушуваните комуникации, а нивната работа придонесе за реформските приоритети што ги состави Европската комисија и кои беа вметнати во Договорот од Пржино.


Тимоние: Франција ги поддржува изградбата на правната држава и унитарноста на Македонија


Скопје, 15 јули, 2017 - 14:45 (META) 

Четвртина век како Франција е на страната на Македонците за да се зајакне државата и нејзината унитарност и ги придружува во изградбата на правната држава, што е услов кој важи за сите идни интеграции кон кои земјата легитимно се стреми, порача амбасадорот на Франција во Македонија, Кристијан Тимоние, на вчерашниот говор на свечениот прием на Националниот ден на Франција.

На приемот во Македонско село, Тимоние ги нагласи заложбите на Франција за спроведување на неопходните реформи во Македонија и за Европа, која ќе стане целосна кога ќе се приклучат земјите од Западен Балкан.

– Оваа година, францускиот празник е во знакот на споделената надеж која уште повеќе ќе нè обедини, надежта за европска иднина за која се изјаснија нашите два народa, со која им се дава нов патоказ, оној за спроведување на неопходните реформи, за изградба на простор за мир и за просперитет, колективна амбиција за она што треба да биде Европа. Европа, која нема да биде целосна, како што напиша нашиот претседател Макрон во писмото до претседателот Иванов, сè додека не се приклучат земјите од Западен Балкан. Тоа е огромната задача која ни престои на сите и поради која сè уште сме и ќе бидеме секогаш на ваша страна. Тоа не е само Европа на автопатишта и на тендери, на помош и на субвенции, туку Европа на заеднички вредности кои посакуваме да ги имаме сите, а кои ние Французите ги славиме денес заедно со Вас. Вредностите на нашата девиза: слобода, еднаквост, братство – рече, меѓу другото, францускиот амбасадор.

На приемот беа и премиерот Зоран Заев и претседателот на Собранието, Талат Џафери, како и министри, странски амбасадори, градоначалници и верски великодостојници.


Собранието треба да усвои декларација за забрзување на реформите од планот „3-6-9“


Скопје, 14 јули, 2017 - 13:15 (META) 

Комисијата за европски прашања на Собранието на денешната седница, на чиј дневен ред е реформскиот план на Владата „3-6-9“, треба да усвои декларација за забрзување на реформските и на интегративните процеси за зачленување на Македонија во Европската Унија и во НАТО.

Целта на декларацијата, како што е наведено во образложението од Комисијата, е да ја „потврди консензуалната и надпартиска сплотеност и посветеност околу заедничките напори за реализација на стратешката определба на државата за членството во ЕУ и во НАТО, за која постои согласност од страна на сите политички чинители застапени во Собранието на Република Македонија од осамостојувањето на државата до постигнувањето на крајната цел“.

На седницата на Комисијата, премиерот Зоран Заев и вицепремиерот за европски прашања, Бујар Османи, треба да го претстават планот „3-6-9“ , а покрај нив свои обраќања ќе имаат претседателот на Собранието, Талат Џафери, и претседателот на собраниската Комисија за европски прашања, Артан Груби.

Свои излагања ќе имаат координаторот на пратеничката група на СДСМ, Томислав Тунтев, координаторот на една до десетте пратенички групи на ВМРО-ДПМНЕ, Илија Димовски, Зекирија Ибраими од Беса и претставник на невладиниот сектор.

Инаку, почетокот на седницата на Комисијата за европски прашања, кој беше закажан за 12.30 часот, е одложен бидејќи спикерот Џафери и пратениците членови на Комисијата во моментов се на пленарна седница.

Претседателот на Комисијата, Артан Груби, им се извини на амбасадорите присутни во салата „Борис Трајковски“, поради доцнењето на почетокот на седницата.


ДС: Без демократизација на партиите нема демократизација на државата


Скопје, 13 јули, 2017 - 12:34 (META) 

Покрај системските промени во правосудството, медиумите и во тајните служби, неопходни се реформи и во поставеноста и во дејствувањето на политичките партии, стои во соопштението на Демократскиот сојуз и се додава дека без демократизација на партиите, нема демократизација на државата.

„Гломазните партии и црпењето кадри од членовите (лепачи на плакати и сл.) на партијата на власт во изминатите 11 години и повеќе години се покажаа како основа за етаблирање на авторитарен систем, каде „вождот“ на партијата одлучува за сè. Централизамот во повеќето партии, ја задушува иницијативноста и сите очекуваат став од „врвот“, што се покажа кобно за развој на демократијата, зајакнување на самостојноста на институциите и за владеење на правото“, стои во соопштението.

Од партијата наведуваат дека треба да се создадат законски основи за демократизација на партиите, почнувајќи од избор на раководните тела, па сè до финансирањето.

„ДС предлага при реформите на политичкиот систем, приоритет да имаат и реформите во политичките партии“, се вели во соопштението на Демократскиот сојуз.


Заев со Светска банка: Приоритет на владата се економскиот развој и стабилноста


Трст, 13 јули, 2017 - 11:01 (META) 

Врвен приоритет на Владата е да обезбеди стабилност на економијата и развој, порачал македонскиот премиер Зоран Заев на вчерашната средба со Цирил Милер, потпретседател на Светска банка, придружуван од регионалната директорка за Западен Балкан, Линда ван Гелдер, и директорот на Светска банка за Македонија, Марко Мантованели. Во македонскиот тим биле и вицепремиерот за економски прашања, Кочо Анѓушев, и министерот за транспорт и врски, Горан Сугарески.

„Претставниците на Светска банка изразија поддршка на новата влада на Македонија. Оценето е дека завршувањето на политичката криза и реформските политики на Владата отвораат нови можости и перспективи за Македонија. Поради ова, Светска банка изрази подготвеност да помогне на Владата во заложбите за нови работни места, добра бизнис-клима, инвестиции. Се разговараше за поддршка на Светска банка преку системот за менаџирање на јавни финансии и компетитивност на економијата“, стои во соопштението од Владата.

– Владата е силно посветена сите граѓани да почувствуваат добробит од економскиот развој. Целта ни е добар животен стандард за сите. Затоа Владата ќе ја зголеми поддршката за домашните претпријатија, а создаваме услови и за реални странски инвестиции – истакнал премиерот Заев.

Тој најавил зголемување на минималната плата од септември и фер даночен систем, како и реформи за да се обезбедат независно судство и продесионални институции.