Или брзо обединување или дополнителна агонија и разнебитување, велат ВМРО-Демократска фракција


Скопје, 4 октомври, 2018 - 11:58 (META) 

Поради немање единствен став по однос на одржаниот референдум сегашното раководство на ДПМНЕ го доподели членството, велат од ВМРО-ДПМНЕ Демократска фракција,

Од таму велат дека во интерес на партијата и на иднината на државата е дојдено време да си подадат рака и дека е време за надградба на домашниот и меѓународен кредибилитет на државата и партијата.

„Секое тактизирање околу брзата реконструкција и обединување на прогресивните и чесни патриотски сили ќе значи дополнителна агонија и разнебитување на партијата. Во пресрет на се поизвесните избори следи период на конкретизирање на одговорноста во ВМРО-ДПМНЕ, период на брза кадровска промена и демократска трансформација. Во оваа насока, Демократската фракција на ВМРО ДПМНЕ ги повикува сите демократски внатрепартиски сили на обединување на принципиелна основа со цел заеднички и сплотени да ја одредиме иднината на државата“, велат од фракцијата.

Тие го повикаа партиското раководство на отворен разговор за новите стратешки, програмски и кадровски постулати кои ќе го возобноват компромитираното и руинирано партиско ткиво.

„Лажни промени и привидно единство не смеат да се дозволат бидејќи потребна ни е победа на изборите. Потпирање на политичарите кои имаат „сопствен став на дневна основа” поттикнат од надворешни фактори не можат да донесат промени, нова визија и спас на државата, туку само ново залажување и порази. Потребна е реална и коренита промена. Секој обид за игнорирање на овие начелни ставови како и обид за заштита на криминалците во нашите редови ќе биде повторно влегување во „чизмите” на поранешниот претседател на партијата“, сметаат од Демократската фракција.

Ги повикаа пратениците на ВМРО-ДПМНЕ да не подлегнуваат на уцени, закани и обиди за подмитување.


Реформаторите на ВМРО-ДПМНЕ ќе ги поддржат измените на Статутот на партијата


Скопје, 28 декември, 2017 - 16:11 (META) 

Реформаторите во ВМРО-ДПМНЕ го поддржуваат процесот на изменување и дополнување на Статутот на партијата во насока на негова демократизација, информираат од таму.

Од внатрепартиската иницијатива за демократизација и модернизација на ВМРО-ДПМНЕ, сметаат дека овој процес ќе даде дополнителна вредност на партијата.

„Формирана е работна група во состав Петар Богојески, Илија Илијовски, Драган Лазаров и Александар Стојчевски, кои ќе ги презентираат нашите аргументи и предлози во таа насока. Во процесот ќе се направи детална анализа на статути и други слични акти на сестрински партии, членки на Европската народна партија, за што поголемо приближување до европските стандарди“, се вели во соопштението на реформаторите.


Реформаторите ниту ќе предложат, ниту ќе поддржат кандидат за нов лидер


Скопје, 17 декември, 2017 - 18:21 (META) 

Централниот штаб на внатрепартиската иницијатива за демократизација и модернизација на ВМРО-ДПМНЕ во присуство на активисти од републичкиот штаб, 19 окружни и сите општински штабови денеска одлучи да не предложи, ниту пак да поддржи некој од кандидатите на вонредниот конгрес н ВМРО-ДПМНЕ за избор на нов лидер на партијата.

„Во поглед на закажаниот вонреден Конгрес на ВМРО-ДПМНЕ во Валандово, Централниот штаб ги реафирмира принципите и вредностите наведени во Декларацијата за демократизација и модернизација на ВМРО-ДПМНЕ и Декларацијата “Европско ВМРО-ДПМНЕ за европска Македонија” пред личностите и борбата за преземање на обврската да се управува партијата. Од тие причини, нема да предложиме кандидат за претседател на овој Конгрес. Начинот на кој се повика и брзината со кој се организира овој вонреден Конгрес, за жал може да биде причина за негово повторување во блиска иднина“, стои во соопштението.

Реформаторите им се заблагодарија на 208-те делегати кои дале поддршка на идејата за учество на внатрепартиската иницијатива на овој Конгрес и ги повикаа доколку учествуваат на Конгресот и одлучат да поддржат некој од кандидатите за нив претседател на ВМРО-ДПМНЕ, тоа да го направат согласно сопствената волја, но притоа да ги имаат предвид принципите и заложбите на внатрепартиската иницијатива и барањето за демократизација на Статутот на партијата.


Реформаторите на ВМРО-ДПМНЕ даваат правна помош на сопартијци под притисок од власта


Скопје, 9 декември, 2017 - 11:47 (META) 

Внатрепартиската иницијатива за реформи во ВМРО-ДПМНЕ формираше тим од правни советници, чија цел е, како што велат иницијаторите, да обезбеди „првични правни насоки и консултации за сите членови и симпатизери на ВМРО-ДПМНЕ кои поради своите политички убедувања или дејствувања се наоѓаат или ќе се најдат под притисок (мобинг, отпуштање од работа и сл.) од новите локални власти низ општините во Република Македонија“.

Тимот ќе функционира секоја недела во периодот од 12 часот до 15 часот во просториите на Клубот на новинари во Скопје.

Како што велат од правниот тим на внатрепартиската иницијатива за реформи во ВМРО-ДПМНЕ, доколку има основаност во наводите, членовите на партијата ќе добијат соодветна првична правна помош, насока или консултација, без надомест.


Реформаторите во ВМРО-ДПМНЕ ќе го соопштат ставот за партискиот конгрес на 17 декември


Скопје, 8 декември, 2017 - 15:24 (META) 

Внатрепартиската иницијатива за демократизација и модернизација на ВМРО-ДПМНЕ почна консултации со сите активисти во ВМРО-ДПМНЕ, за изградба на обединувачки став за претстојниот конгрес кој ќе се одржи на 23 декември, информираат од таму.

„Во таа насока извршени се консултации со сите заинтересирани кандидати за претседател на ВМРО-ДПМНЕ. Во рамки на овие активности, почнати се консултации и со ФРОДЕМ, Форумот на слободоумни патриоти, Судени за Македонија и Унијата на ветерани. Конечниот став за партискиот конгрес ќе биде утврден и јавно објавен на 17 декември како заклучок на централниот штаб на внатрепартиската иницијатива. Најзначајно за нас е тоа што во сите досегашни консултации, сите учесници ги прифатија принципите што произлегуваат од декларацијата за демократизација и модернизација и од декларацијата за европска ВМРО-ДПМНЕ и за европска Македонија“, се вели во соопштението на оваа иницијатива.

Од ФРОДЕМ бараат демократски избор на кандидати за членови на конгресот, кои на демократски начин ќе бидат избрани од месните и од општинските комитети.

– Само на тој начин членовите ќе ја изразат својата волја, за да не се повтори приказната од претходниот конгрес, што беше еден вид приватна забава на Никола Груевски – изјави Љупчо Алексовски од ФРОДЕМ.

Тој ги повика и другите членови кои не се задоволни од актуелното раководство и од водењето на партијата во погрешен правец, да се приклучат и, како што вели, „со заеднички сили да ја извадат партијата од оваа несакана ситуација“.


Реформаторите во ВМРО-ДПМНЕ одржале работни состаноци во Брисел


Брисел, 18 октомври, 2017 - 17:56 (META) 

Претставниците на внатрепартиската иницијатива за реформи во ВМРО-ДПМНЕ, Александар Михајлоски, Петар Богојески, Костадин Богданов и Драган Лазаров, одржале работни состаноци во Европскиот парламент и во Европската комисија во Брисел.

Оттаму информираат дека посетата на членовите на иницијативата овие два дена е продолжување на редовната комуникација со Брисел и континуитет на средбите кои биле остварени во септември.

Реформаторите се сретнале со европратеничката тројка за Македонија, Иво Вајгл, Кнут Флекенштајн и Едвард Кукан.

„На средбите беа истакнати заложбите за реформи и за демократизација на ВМРО-ДПМНЕ, како неопходен и незапирлив процес, особено по резултатите што ги оствари партијата на првиот круг од локалните избори. Истакната е обострана загриженост за падот на рејтингот на ВМРО-ДПМНЕ и за стабилноста на опозицијата во Македонија. Заеднички заклучок е дека ВМРО-ДПМНЕ мора што поскоро да се реформира за да биде силна и конструктивна опозиција, која ќе биде коректор на власта, а воедно и ќе придонесува за политички консензус за напредок на Македонија по евроатлантскиот пат“, се вели во соопштението на внатрепартиската иницијатива за реформи во ВМРО-ДПМНЕ.

Во него се додава дека било нагласено дека реформите во ВМРО-ДПМНЕ треба да бидат суштински за да се воспостави вистинска внатрепартиска демократија и во таа насока, не треба да се импровизира со организирање на т.н. „приватен партиски конгрес“ по завршување на изборите, кој може да се одрази штетно, не само на партијата, туку и на демократијата во Македонија.


Реформаторите го повикаа Груевски да ги објасни резултатите од изборите


Скопје, 15 октомври, 2017 - 23:09 (META) 

Републичкиот штаб за реформи во ВМРО-ДПМНЕ вечерва ќе одржи прес-конференција во Клуб на новинари, на која го повикаа лидерот ВМРО-ДПМНЕ, Никола Груевски, за лично да ги соопшти неговите аргументи за изборните резултатите од денешните локални избори.

Темата на прес-конференцијата ќе бидат идни активности на Републичкиот штаб за реформи на ВМРО-ДПМНЕ во постизборниот период.


Реформаторите во ВМРО-ДПМНЕ сметаат дека Груевски им ја краде визијата


Скопје, 23 септември, 2017 - 14:10 (META) 

Од внатрепартиска иницијативата за реформи во ВМРО-ДПМНЕ, сметаат дека лидерот на партијата, Никола Груевски, им ја краде визијата за тоа како треба да се движи партијата.

„На вчера одржаната конвенција на ВМРО-ДПМНЕ, за претставување на кандидатите за локалните избори, Никола Груевски презентираше некоја негова визија за тоа како треба да се движи партијата. При тоа, Никола Груевски буквално ги украде јавно презентираните заложби на Иницијативата за реформи на ВМРО-ДПМНЕ и нејзините декларации, а особено декларацијата за европска ВМРО-ДПМНЕ за европска Република Македонија“, се вели во соопштението на иницијативата за реформи.

Од таму велат дека добро е што конечно Никола Груевски прифатил дека се потребни значителни реформи во ВМРО-ДПМНЕ и ја препознал јасната визија на реформаторите.

„Сепак потенцираме дека тој нема кредибилитет ниту во партијата, ниту во јавноста да ги реализира овие реформи. Нова визија во партијата и во Македонија ќе има, ама без Никола Груевски. Крадењето на една напредна визија за иднината на паријата и државата, само по себе покажува дека Никола Груевски повеќе нема капацитет за лидерство, кое е потребно во овие моменти. Реформите во партијата ќе произлезат од волјата на членството и ќе бидат континуитет на идеалите на историското ВМРО на кое ВМРО-ДПМНЕ е наследник. Новата сила на ВМРО-ДПМНЕ доаѓа, а во неа нема место за луѓе без идеи и капацитет“, се додава во соопштението.


Реформаторите во Брисел ја презентираа декларацијата за eвропскa ВМРО-ДПМНЕ


Брисел, 31 август, 2017 - 11:50 (META) 

Членовите на иницијативата за внатрепартиски реформи во ВМРО-ДПМНЕ во Брисел се сретнале со членови на Европскиот парламент од Европската народна партија (ЕПП), на кои им ја презентирале декларација „Европска ВМРО-ДПМНЕ за европска Република Македонија“ и декларацијата за демократизација и за модернизација на ВМРО ДПМНЕ.

– Средбите што ги имавме во Брисел ја покажаа поддршката која ја имаме, не само меѓу членството во ВМРО-ДПМНЕ, туку и кај политичарите од сестринските партии во Европа. Оваа поддршка недвосмислено кажува дека партијата треба да се реформира како услов за деизолција и за враќање на угледот на ВМРО ДПМНЕ, кој во изминатите години беше нарушен со погрешни политики – вели Александар Михајлоски од иницијативата.

Тој соопшти дека имале голема поддршка за унапредување и за модернизирање на ВМРО-ДПМНЕ низ реформските процеси што ќе придонесат Европската народна партија повторно да има силен партнер во  Македонија.

– Во наредниот период таа поддршка и јавно, преку пораки и настапи, ќе биде дадена на внатрепартиската инцијатива за реформи, за Македонија забрзано да се придвижи кон членство во ЕУ и во НАТО, бидејќи на Македонија ѝ треба силна, проевропска и конструктивна ВМРО-ДПМНЕ – додава Михајловски.


Реформаторите објавија декларација за демократизација на ВМРО-ДПМНЕ


Скопје, 29 август, 2017 - 15:52 (META) 

Претставниците на иницијативата за демократизација и за модернизација на ВМРО-ДПМНЕ објавија декларација „Европско ВМРО-ДПМНЕ за европска Македонија“, која предвидува осум столбови: одговорно управување, слободен човек и општество, култура на законите, политички дијалог, интеграција во ЕУ и во НАТО, економски развој и претприемништво, развој на образованието и на културата и здрава нација.

– Оваа декларација ги поставува темелите на новата реформирана и подобра ВМРО-ДПМНЕ. Сите понатамошни дејства, програми и конкретни проекти ќе се темелат на принципите содржани во оваа декларација – рече на денешната прес-конференција Александар Михајловски од иницијативата за реформи во ВМРО-ДПМНЕ.

Декларацијата преставува визија на реформаторите за тоа каква ќе биде реформираната ВМРО-ДПМНЕ која, според нив, ќе работи исклучиво во интерес на граѓаните. Оваа декларација, според Михајловски, покажува колкави се разликите во политиките на актуелното раководство на партијата и политиките што ќе ги спроведува реформираната ВМРО-ДПМНЕ.

– Нивната досегашна политика е политика на изолација, на барање внатрешни и надворешни непријатели, на ширење пропаганда против ЕУ и НАТО, лажен патриотизам и лажни вести во кои се шири параноја и страв кај граѓаните. Ние треба да расчистиме со тие политики бидејќи доколку ВМРО-ДМНЕ не се реформира, никогаш нема да се врати на власт. Ние имаме лидер со одземен пасош, изолиран од меѓународната заедница и човек за кого се водат судски постапки. Со кој капацитет тој ќе ја води ВМРО-ДПМНЕ во иднина, како ќе настапи на локални избори со таков багаж? – додаде Михајловски.