Ахмети – Пломп: Сите кои сакаат интеграција во ЕУ и НАТО ќе го поддржат референдумот


Тетово, 17 август, 2018 - 15:29 (META) 

Сите оние кои сакаат интегрирана Македонија во НАТО и Европската Унија ќе го поддржат референдумот на 30 септември, вклучувајќи ја и опозицијата, бидејќи евроатланската интеграција на земјата е исто така нивна програмска определба, истакнал лидерот на Демократската унија за интеграции Али Ахмети на средбата со амбасадорот на Холандија во Македонија, Ваутер Пломп.

Во соопштението од ДУИ се наведува дека Ахмети и Пломп разговарале за евроатланската интеграција, референдумот на 30 септември, владеењето на правото и борбата против корупцијата, како и регионалните случувања.

Ахмети го информирал холандскиот амбасадор за подготовките на ДУИ за успешно заокружување на евроатлантскиот пат преку спроведувањето на референдумот и уставните измени.

Во врска со реформите, владеењето на правото, борбата против корупцијата и организираниот криминал, како што се посочува во соопштението, ДУИ воспостави уникатна практика во земјава, повикувајќи ги и поддржувајќи ги органите да ги истражат сите наводи за корупција и истовремено ги охрабрува другите партии да го сторат истото.

„Ахмети заклучи дека единствен начин за регионот е помирување и целосна евроатланска интеграција со европските стандарди“ се наведува во соопштението од ДУИ.


Заев на средба со ДИК: Сите институции се должни да соработуваат за референдумот


Скопје, 17 август, 2018 - 14:18 (META) 

Референдумот е обврска од важен државен карактер. Сите институции се должни да соработуваат со Државната изборна комисија (ДИК). И Владата стои на располагање, на принципиелно ниво, согласно законските овластувања, да обезбеди реализација на законските потреби на ДИК и тоа ќе го направиме, рече денеска премиерот Зоран Заев на средбата со претседателот на ДИК Оливер Дерковски и членовите на Државната изборна комисија.

Заев порача дека сите имаат одговорност професионално да одговорат на своите должности.

– Верувам дека секој ја знае својата професионална и човечка одговорност за овој важен процес. Должни сме сите професионално да си ја завршиме работата – изјави Заев.

Дерковски и членовите на ДИК посочија дека работат професионално, штедливо и домаќински, како и дека ќе продолжат во таа насока, за достоинствено да одговорат на законските обврски пред граѓаните.

Како што информира владината прес-служба, на средбата е заеднички нагласена важноста од професионално и транспарентно работење на Државната изборна комисија пред и на денот на престојниот референдум, со цел доверба на сите граѓани и политички субјекти во процесот.

На средбата се разговарало и за медиумската кампања поврзана со референдумот, за потребата од почитување на законските одредби поврзани со кампањата, како и за финансиските средства што му се потребни на Собранието за нејзино спроведување.


Димитров: Македонија се зацврствува со Договорот, никој нема да не дели и распарчува


Скопје, 17 август, 2018 - 9:39 (META) 

Со Договорот со Грција, Македонија се зацврстува на светската мапа како држава. Никој нема да не дели и распарчува, напротив земјава станува полноправна членка на НАТО и почнува преговори со ЕУ, изјави шефот на македонската дипломатија, Никола Димитров во интервју за „Телевизија 24“.

Тој од идниот четврток еднаш неделно на „Прашајте го министерот“, ќе одговара на директни прашања од граѓаните во врска со Договорот со Грција и претстојниот референдум за името на државата. Преку жива снимка на социјалните медиуми неколку дена ќе собираат прашања и потоа еднаш неделно, во четврток, ќе одговара на нив.

Димитров рече дека се уште не знае колку ќе чини организирањето на референдумот, но поважно од тоа, според него, е на граѓаните да им се објаснат основните елементи и придобивките од потпишаниот Договор со Грција. Ги повика граѓаните да го прочитаат Договорот достапен на веб-страницата на Владата.

Објаснувањето го смета за своја должност зашто тој е потписник на Договорот, а неговото поддржување го смета за национална и генерациска обврска во зацврстување на државата и идентитетот.

– Моја должност е да направам се што можам да го објаснам и да им објаснам на граѓаните, зашто пред нас е една историска раскрсница, а одлуката е наша. Зашто влогот е огромен, пред нас е многу одговорна одлука – каде сакаме да ни биде Македонија во следниот период – истакна Димитров, нагласувајќи дека е тешко државата да опстои и да се развива напред ако не е во сојузите ЕУ и НАТО.

Повтори дека со прифаќањето на Договорот, името на државата ќе биде Република Северна Македонија, за што ќе треба да се отвори Уставот, државјанството ќе гласи: македонско/граѓанин на Северна Македонија, химната останува непроменета, јазикот останува македонски.

– Етнички, како народ – македонски народ, Македонци што зборуваат македонски јазик. Стравот кај нас од географска одредница кон името Македонија бил – дали тоа нас ќе не смени. Тоа што ние успеавме експлицитно другата страна да го прифати – нашето право за самоопределување – ќе значи дека ќе може и во ЕУ македонскиот јазик да биде македонски јазик, да бидеме Македонци. Ставаме една точка на дилемите и предизвиците дали сме прифатени и оспорувани. Мислам дека има многу заблуди и магла и треба многу објаснувања за да се расчистат – рече Димитров.

Во врска со разликите што за ова прашање ги има ВМРО-ДПМНЕ, Димитров рече дека не се работи за прашање на ниедна партија, ниту е прашање на Владата, туку е прашање за иднината на државата, нејзиното зачленување во НАТО, почеток на преговори со ЕУ ми останување на младите во државата.

– Луѓе што преку антиквизација додадоа еден куп аргументи на негативните политички сили во Атина, коишто не се заинтересирани ова прашање да се реши, и го искомплицираа многу проблемот, меѓу другото изгубивме симпатии и пријатели со таа политика. Луѓе кои толку не пикнаа во дупка, што ние немавме стартно рамна позиција во јуни 2017 година – рече шефот на македонска дипломатија, нагласувајќи дека најважно е по многуте пропуштени шанси, да се симне тегот што државата ја влече надолу и да се тргне напред заедно со другите земји.

Во врска со противењето на Договорот од страна на лидерот на ВМРО-ДПМНЕ Христијан Мицкоски, Димитров посочи дека легитимно е да се има став и да се аргументира но, рече, не може да кажете: јас сум за ЕУ и за НАТО, а да сте против Договорот и да не нудите друг пат.

– Процени ги овие работи – дали сакаш да одиме напред или да се вратиме во чекалната. Излези и гласај. Негласањето е бегање од личната и општествената одговорност. Граѓаните суверено да одлучат за ова прашање. Да се бојкотира својата иднина, својата држава, својата Македонија, е кукавичлук. Мора со визија и патриотизам да пристапиме кон ова прашање – рече Димитров.


До ДИК доставени 990 пријави од иселеници за референдумот


Скопје, 16 август, 2018 - 16:58 (META) 

Денеска до 13 часот, преку веб-апликацијата www.dijaspora.sec.mk до Државната изборна комисија доставени биле вкупно 990 пријави од граѓани за гласање во дипломатско-конзуларните претставништва на Република Македонија во странство.

ДИК информира дека од нив, 965 пријави биле прифатени, 23 се одбиени, а останатите се во обработка.

Најголем број пријави се доставени за гласање во Берн – 83, во Лондон – 77, во Торонто – 60, Љубљана – 62 и Канбера – 42.

„Во однос на податоците од јавниот увид во избирачкиот список, ве информираме дека заклучно со вчерашниот ден вкупно 2.179 граѓани извршиле јавен увид во подрачните одделенија и канцеларии на ДИК. Од нив, најголем број граѓани увид извршиле во Битола – 337, Струмица – 200, во Радовиш – 140 и во Прилеп – 129“, соопштуваат од ДИК.


Пломп најави експертска помош од Холандија за Македонија


Скопје, 16 август, 2018 - 14:37 (META) 

Премиерот Зоран Заев денеска имаше средба со амбасадорот на Кралството Холандија Ваутер Пломп на која била изразена поддршка на политиките што водат кон евро-атлантски интеграции на Република Македонија.

– Очекувам мнозинството граѓани да гласаат за евро-атлантска иднина на Република Македонија на претстојниот референдум – рекол премиерот Заев, соопшти владината прес-служба.

На средбата, како што се наведува во соопштението, е констатирано дека е од голема важност секој граѓанин и политички субјект да ја има предвид и личната одговорност за историскиот момент што отвора економски и безбедносни перспективи за нашата држава и за граѓаните на Република Македонија.

„Во разговорот е изразено очекување дека Македонија ќе продолжи со реформските процеси, посебно во делот на правосудството, што ќе придонесе во евроинтеграцискиот процес. Холандскиот амбасадор во оваа насока најави експертска помош од Холандија за Македонија. Исто така изразено е и очекување дека Македонија во скоро време ќе стане 30-та земја членка на НАТО“, се посочува во соопштението.

Заев, како што стои во соопштението, на средбата му се заблагодарил на амбасадорот Пломп „за принципиелната поддршка од Кралството Холандија на демократските процеси во Република Македонија, вклучувајќи ја и поддршката на принципиелно ниво на актуелниот политички процес значаен за членство на Македонија во ЕУ и НАТО“.


МОСТ: Граѓаните да ги проверат податоците во Избирачкиот список


Скопје, 16 август, 2018 - 14:08 (META) 

Граѓанската асоцијација МОСТ денеска ги повика граѓаните да ги проверат своите податоци во Избирачкиот список во подрачните канцеларии на Државната изборна комисија, како и на интернет-страницата http://izbirackispisok.gov.mk. Увидот во Избирачкиот список за претстојниот референдум трае до 23 август.

Од МОСТ информираат дека како и на сите изборни процеси, на бесплатната телефонска линија 080 080 080 граѓаните ќе можат да пријавуваат евентуални нерегуларности поврзани со референдумот.

Граѓанската асоцијација МОСТ во досегашното свое постоење, покрај сите национални и локални избори во Македонија почнувајќи од 2002 година, го има набљудувано и референдумот на државно ниво во 2004 година, како и трите референдуми на локално ниво – во општина Чешиново – Облешево во 2004 година, во општина Радовиш во 2007 година и во општина Центар во 2015 година.

Оваа активност, како што наведуваат од асоцијацијата, претставува надоврзување на досегашните активности, со што МОСТ се надева дека ќе даде придонес кон обезбедување на повисоко ниво на транспарентност на целокупниот референдумски процес.


До ДИК доставени 862 пријави од иселеници за референдумот


Скопје, 15 август, 2018 - 14:20 (META) 

Дденеска до 13 часот, преку веб-апликацијата www.dijaspora.sec.mk до Државната изборна комисија доставени биле вкупно 862 пријави од граѓани за гласање во дипломатско-конзуларните претставништва на Република Македонија во странство.

ДИК информира дека од нив, 836 пријави биле прифатени, 19 се одбиени, а останатите се во обработка.

Најголем број пријави се доставени за гласање во Берн – 72, во Лондон – 69, во Торонто – 57, Љубљана – 48 и Канбера – 36.

„Во однос на податоците од јавниот увид во избирачкиот список, ве информираме дека заклучно со вчерашниот ден вкупно 1.967 граѓани извршиле јавен увид во подрачните одделенија и канцеларии на ДИК. Од нив, најголем број граѓани увид извршиле во Битола – 295, Струмица – 148, во Радовиш – 128 и во Прилеп – 104“, соопштуваат од ДИК.


Заев до дијаспората: Ако си ја сакате државата, излезете на референдумот


Скопје, 15 август, 2018 - 14:09 (META) 

Премиерот Зоран Заев денеска се сретна со претставници на дијаспората од Македонија во Италија, Швајцарија, Луксембург, Германија, Словенија, Хрватска, САД, кои изразиле поддршка на владините политики за членство на Македонија во НАТО и во Европската Унија, соопшти владината прес-служба.

На состанокот се разговарало за повеќе актуелни прашања, меѓу кои и за важноста на претстојниот референдум и за потребата од проактивна улога на сите граѓани, вклучително и на дијаспората за успешен референдум.

Заев на средбата рекол дека НАТО и ЕУ за Република Македонија значат економија, стабилност и безбедност и изрази очекување за успешен референдум.

– Убеден сум дека на референдумот ќе биде потврдена одлуката за евро-атлантска иднина на Македонија, што ќе донесе и европски живот во Македонија и стабилност и безбедност. Ве повикувам, како што си ја сакате државата, да излезете на престојниот референдум и со тоа и вие како дијаспора, да дадете значаен придонес во овој историски момент за напредок на – рече Заев.

Премиерот и претставниците на дијаспората зборувале и за придобивките од реформските процеси во државата, од воспоставувањето добри односи со соседите и од евро-атлантските интеграции.

– Вистински патриот е оној кој ќе ја обезбеди иднината на државата. Тоа е придобивка за нашите деца, за сегашните генерации и остварување на вековниот стремеж на нашите претци за потврда на идентитетот на граѓаните Македонци, на македонскиот јазик и поставување на Македонија како држава, еднаш засекогаш, во светското семејство на држави – рече премерот Заев и им се заблагодари на претставниците на дијаспората за желбата да го помогнат остварувањето на стратешките цели на државата, членство во НАТО и ЕУ, а со тоа и за економски просперитет на Македонија.


Владата допрва ќе решава колку ќе потроши за кампањата за референдумот


Скопје, 15 август, 2018 - 13:59 (META) 

За три дена од денеска, министерствата и другите органи од државната управа ќе мора да му рапортираат на Министерството за финансии колку средства имаат на располагање за владината кампања за референдумот, но Владата ќе ја води кампањата транспарентно, рече владиниот портпарол Муамет Хоџа на прес-конференција. Тој вели дека за тоа ќе се користат и средства заштедени од репрезентација на министрите, а Владата ќе биде целосно транспарентна за потрошените пари.

– Не се разговараше за средства, бидејќи треба да се донесе програма и план за спроведување на кампањата за референдумот и потоа ќе се знае колку средства ќе се потрошат. Тоа се средства од другите ставки, тие не се предвидени за референдумот при подготовката на буџетите. На пример, средства заштедени од репрезентација на министрите. Владата ќе биде транспарентна и отчетна за сите средства што ќе бидат потрошени за кампањата  – рече Хоџа.

За информирање на граѓаните преку Фејсбук-страниците на Владата, односно за промовирање на постовите за придобивките од Договорот со Грција, досега се потрошени 100 евра, објасни владиниот портпарол.

На новинарско прашање за усогласеноста на оваа одлука за кампања според Венецискиот кодекс за подобри референдумски постапки од 2007 година, со која се вели дека употреба на јавни фондови од Влада во кампања мора да биде забрането, Хоџа рече дека ќе се земат предвид сите прописи, а потоа ги наведе одредбите на Законот за референдум.

Владиниот портпарол рече дека кампањата е важна оти референдумското прашање е важно за иднината на земјава.

– Со неа ќе ги информираме сите граѓани за договорот и за придобивките од Договорот. Оценуваме дека референдумското прашање е многу важно за иднината на Македонија и дека на овој начин отвораме пат за европска Македонија – рече Хоџа.


Димитров: „Шарената револуција“ е жед за одговорност, „бојкотирам“ е повик за неодговорност


Скопје, 15 август, 2018 - 12:06 (META) 

Шефот на македонската дипломатија, Никола Димитров, на својот „Фејсбук“ профил порача дека не може да се повлекува паралела меѓу „Шарената револуција“ и движењето „бојкотирам“, бидејќи, како што вели тој, бојкотирањето на референдумот е повик за бегање од одговорноста.

„Шарената револуција е жед за одговорност во ситуација на јавно разоткриен криминал. Кога потфрлија институциите, граѓаните преземаа одговорност, барајќи правда. Бојкотирам е повик за неодговорност, за бегање од одговорност, за немање глас за сопствената и иднината на Македонија, исправена пред историска раскрсница“, пишува Димитров.

Да се размислува за некакви паралели меѓу нив, додава Димитров, е исто како да се става равенство меѓу храброста и стравот, меѓу активниот граѓанин кој се осмелил да прогледа во темница и пасивниот поданик кој се плаши да отвори очи во светлина.