Москва: Уставните измени не се по волја на народот, Советот за безбедност на ОН да расправа за името


Москва, 14 јануари, 2019 - 17:19 (META) 

Одделот за информирање и печат на руското Министерство за надворешни работи (МНР) изгласувањето на новите амандмани на македонскиот Устав за промена на името на земјава го нарече „вештачка промена на името на државата со цел форсирано внесување на Скопје во НАТО“ и порача дека проблемот со преименувањето на земјава да се разгледува од Советот за безбедност на Обединетите нации во согласност со членот 3 од Резолуцијата 845 на Советот.

„Станува збор за продолжување на процесот на вештачко менување на името на државата под странски притисок со цел насилно внесување на Скопје во НАТО. Тоа е прекршување на македонските закони. Ставот на шефот на државата и ставот на мнозинството од населението кои го отфрлаат Преспанскиот договор се игнорираат. Постојаните протести во Скопје и другите македонски градови покажуваат длабока поларизација на општеството. Очигледно е дека ваков начин на решавање на прашањата од национално значење за иднината на земјата не е одраз на волјата на нејзиното население и не може да служи како алатка за долготрајно решение за проблемот со имемто на земјата“, се вели во соопштението.

Од руското МНР велат дека и развојот на настаните во Грција, односно оставката на Панос Каменос, досегашниот министер за одбрана и претседател на Независни Грци, коалицискиот владин партнер на СИРИЗА, зборува за „експлозивноста на ситуацијата“. Дополнително, се обвинува и дека во Грција се спроведува истата формула како во Македонија – притисок за усвојување на Преспанскиот договор преку газење на волјата на грчкиот народ.

„Ставот на Руската федерација за проблемот со името на македонската држава останува неизменет: мора да се најде одржливо решение без надворешни притисоци, наметнати решенија и услови од надвор, кое ќе се заснова на широка јавна поддршка – и во Република Македонија и во Грција – и единствено во рамките на правото. Сметаме дека ова прашање мора да се разгледува од од Советот за безбедност на Обединетите нации во согласност со членот 3 од Резолуцијата 845 на Советот за безбедност.


Лавров ги обвини ЕУ и САД за грубо мешање во внатрешните работи на Македонија


Москва, 7 декември, 2018 - 10:24 (META) 

Се случува грубо систематско мешање на САД и ЕУ во внатрешните работи на Македонија. Секојдневно нејзините граѓани беа убедувани да гласаат потврдно на референдумот за Преспанскиот договор на 30 септември годинава. Референдумот, како што е познато, не успеа. Во таква ситуација во Собранието на 19 октомври се протурка одлука за уставни измени со уцени и поткуп на пратениците од опозицијата. Во тоа непосредно учествуваа странски дипломати, а вклучувајќи го амбасадорот на САД, обвинува Сергеј Лавров, министерот за надворешни работи на Русија во интервју за грчкиот весник „Ефимерида тон синдактон“.

Во интервјуто објавено на денот кога грчкиот премиер Алексис Ципрас е во во официјална посета на Москва, Лавров го користи зборот Македонија, што грчкиот весник го означува со ѕвездичка и долу во фуснота објаснува дека Грција таа земја ја признава како Поранешна Југословенска Република Македонија.

Шефот на руската дипломатија посочува и дека притисоците во Македонија продолжуваат и сега, со обид да се истурка процесот на уставните измени во почетокот на 2019 година.

– Интересно е што таквото брзање е во функција единствено на задачата поставен од Вашингтон за форсирано внесување на Скопје во НАТО. Шпекулациите за неопходноста за одобрување на Преспанскиот договор поради забрзано придружување во ЕУ не можат да одговорат на критиките. Преговорите со Брисел за тоа би можеле, според искуството да се развлечат и на пар децении – вели Лавров.


Судбината на рудникот Иловица ќе се решава во договор со сите заинтересирани страни


Скопје, 15 ноември, 2018 - 15:06 (META) 

Владата нема да донесе одлука која е на штета на интересите на граѓаните на Македонија. Тоа значи дека нема да се донесе одлука за судбината на рудникот Иловица се додека не се усогласат ставовите на сите засегнати страни.

Вака ја образложи позицијата на македонската Влада портпаролот Миле Бошњаковски, одговарајќи на новинарско прашање во врска со нерешениот статус на концесијата на компанијата „Еуромакс Рисорсис“ за експлоатација на бакар и злато во близина на селата Иловица и Штука и отпорот на месното население кон отворањето на рудникот во близина на нивните живеалишта.

Бошњаковски негираше дека Владата го игнорира незадоволството на жителите на струмичките села засегнати од отворањето на рудникот Иловица, кои минатата сабота организираа предупредувачка блокада на приодните патишта кон и од Струмица, сакајќи да го потсетат премиерот Зоран Заев на неговото ветување, дадено пред локалните избори во 2017 година, дека рудници во тој крај нема да има.

Минатата недела, Уставниот суд донесе одлука за поведување на постапка за поништување на одлуката на Советот на Општина Гевгелија за распишување на референдум за рудниците на Кожуф. Притоа, беше најавено дека е сосема извесно дека локалниот референдум на кој мнозинството гевгеличани се изјаснија против отворањето рудници на Кожуф, ќе „падне“ пред Уставниот суд како што се случи и со референдумот на Општина Валандово против рудникот Казандол.

Образложението е дека одлуките за референдум се неуставни и незаконити, „бидејќи прашањето на концесии не е од локално значење за да може локалната самоуправа да распишува референдум“. Одлуките на Уставниот суд да ги собори локалните референдуми против рудниците во Југоисточна Македонија, ги подгрејаа стравувањата на жителите од тој крај дека сепак ќе бидат отворени, како што ги нарекуваат тие, „рудниците на смртта“.


Уставниот суд најави поништување и на гевгелискиот референдум против рудниците


Скопје, 9 ноември, 2018 - 16:06 (META) 

Уставниот суд на седницата одржана на 31 октомври донесе одлука за поведување на постапка за поништување на одлуката на Советот на општина Гевгелија за распишување на референдум за рудниците на Кожуф, информираат за „Мета“ од Уставниот суд, појаснувајќи дека одлуката допрва треба да биде објавена на официјалната веб-страница на Судот.

Оттаму напоменуваат дека во најскоро време ќе се одлучува по овој предмет и, судејќи според искуството со претходни предмети кои се однесуваат на одлуки на локалната самоуправа за отворање на рудници на нивна територија, и оваа одлука ќе биде поништена.

„Постапката е поведена на барање на подносителот ДПТС „Резервоар минералс Македонија“ ДООЕЛ Скопје кој доставил иницијатива за поведување постапка за оценување на уставноста и законитоста на Одлуката за распишување на референдум на локално ниво, донесена од Советот на општина Гевгелија“, вели портпаролката на Уставниот суд, Оливера Филиповска.

Образложението на иницијативата на „Резервоар минералс“ меѓу другото е дека, „минералните суровини како природно богатство претставуваат добра од општ интерес на републиката, без оглед на сопственоста на земјиштето, за нив одлучуваат органите на државната власт, а не органите на локалната самоуправа“.

На референдумот во Гевгелија, кој беше одржан на 23 април 2017 година мнозинството граѓани на Гевгелија се изјаснија против отворање на рудници на територија на општината, по што Советот на општина Гевгелија даде негативно мислење на барањето на „Резервоар минералс“  за продолжување на коцесионерскиот договор за истражување на металични минерални суровини на Кожуф.

„Резервоар минералс“, имаше концесија за детални геолошки истражувања на локалитетот Конско, но по референдумот тогашната Влада не им го продолжи концесискиот договор.

Уставниот суд, со истото образложение на 2 мај ја поништи и одлуката за распишување на референдум на Општина Валандово против рудникот Казандол.

Тогаш од Уставниот суд образложија дека одлуките за референдум се неуставни и незаконити, бидејќи прашањето на концесии не е од локално значење за да може локалната самоуправа да распишува референдум.

Министерот за економија, Крешник Бектеши во август годинава писмено ги информираше градоначалниците од општините во Југоисточна Македонија, каде се планира отворање на десетина нови рудници на метали дека „во законот за минерални суровини како и во законот за концесии и јавно приватно партнерство нема основ за едностран раскин на договорот за концесија од страна на концедентот односно Владата поради реализиран референдум или пак граѓанска иницијатива против започнувањето со експлоатација на веќе доделени концесии за експлоатација на минерални суровини“.

„Уставниот суд се стави на страна на оние кои планираат од Македонија да направат пустелија, да направат геноцид на над 500.000 граѓани“, обвинува активистот на „Спас за Гевгелија“, Ангел Наков.

За утре од 11.30 до 13 часот е планирана прва од најавените блокади на приодните патишта кон и од Струмица, во организација на еколошките здруженија од струмичкиот крај, кои се борат против отворање на рудникот за бакар и злато Иловица.


Ѓорчев до Заев: Ништо не преземавте за полнењето кутии за референдумот


Скопје, 31 октомври, 2018 - 15:36 (META) 

За време на референдумот на некои избирачки места за пола час „гласале“ 500 луѓе, а не се ни потпишале на избирачкиот список, а кутиите беа наполнети со 50.000 ливчиња, рече денеска пратеникот од ВМРО-ДПМНЕ, Влатко Ѓорчев за време на собраниската седница за пратенички прашања.

– Ниту поддржувам ниту сакам во мојата земја од било кој човек да се случуваат вакви можни засега инсинуации кои што ги кажувате. Секогаш сум ги осудувал и ќе ги осудувам. Сè што до сега е пријавено е процесирано. Апелирам до сите институции кои не се под моја надлежност да си постапат по слово на закон. Тој што полни кутии ги полни да добие резултати. Референдумот беше консултативен, не сме имале никаква мотивација да полниме кутии. Сакавме секој кој сака да учествува, да излезе и да го даде мислење за правецот на државата – рече Заев.

Ѓорчев го праша Заев што направила оваа влада за албанските граѓани за кои потенцираше дека вршат масовен егзодус и преселба од државата. Заев потенцираше дека не ги дели граѓаните по етничка линија и работи на унапредување на условите на живот на сите граѓани и додаде дека сите подеднакво ќе ги чувствуваат придобивките.

Илија Димовски, од ВМРО-ДПМНЕ, ја искритикува владата зошто не го прифатила неговиот предлог за дебата во Собранието за локацијата на која треба да се гради Клиничкиот центар и уште еднаш го предложи Петровец како поадекватно место за овој проект.

– Министерот тврдеше дека локацијата Бардовци е перфектна, но јас имам спротивно мислење. Сакав институционално да разговараме за овој проблем но бев изигнориран. Предложив новиот клинички центар да се гради во општина Петровец затоа што е апсолутен центар во Македонија и преставува и инфраструктурен центар, а има и аеродром – смета Димовски.

Заев вети дека ќе се отвори поширока дебата со сите засегнати страни, откако ќе се види кои параметри ги исполнуваат трите предложени локации – Ѓорче Петров, Бардовци и Петровец.

– Вашето внимателно укажување го зедовме во предвид и до сега ги разгледуваме неколку можни локации. Не треба по секоја цена да носиме одлука за да има капитален развој. Формирана е комисија која ќе ги оценува локациите Бардовци, Ѓорче Петров и Петровец. Спремен сум кога ќе ги имаме сите параметри, да дојдеме овде во Собрание да дебатираме и да ја одредиме локацијата. Мене лично ми е попримамлива локацијата во Ѓорче Петров, за Петровец имаме податок дека земјиштето е мочурливо, но одлуката ќе ја донесеме врз основа на аргументи – рече Заев.


И српски „Спутњик“ во кампања: „Европски аплауз за Заев како крешчендо на лицемерието“


Белград, 24 октомври, 2018 - 15:10 (META) 

Руската владина новинска агенција „Спутњик њуз“ на својата верзија на српски јазик денеска објави текст  во кој го нападна македонскиот премиер Зоран Заев дека поткупувал и уценувал пратеници „за да го протурка политичкиот проект за измени на македонскиот устав“.

„Македонскиот премиер Зоран Заев, сврте цел круг, од човек што стана лидер на Македонија на бранот на немирите поради корупцијата, до човек што поткупува и уценува пратеници во Собранието, за да го протурка политичкиот проект за измени на македонскиот Устав“, пишува „Спутњик“ еднострано, без да ги наведе демантите што дојдоа од македонските пратеници, како и од некои од партиите.

Пратениците на ВМРО-ДПМНЕ што гласаа за, во изјави или соопштенија за јавност негираа дека добиле закани или пак уцени и понуди за мито.

Во коментарот од наслов „Европски аплауз за лидерот на Македонија како крешчендо на лицемерието“, се вели дека Заев постигнал двотретинско мнозинство за измени на уставот против волјата на граѓаните на неговата земја и дека тоа го постигнал „купувајќи осум пратеници од опозициската ВМРО-ДПМНЕ“.

Наспроти погоре споменатите деманти од пратениците, во коментарот не се споменува ниту дека од гласовите на референдумот повеќе од 92 отсто биле „за“.

„Заев од Брисел и Вашингтон добива аплаузи за она што во која било земја на ЕУ или во САД би се нарекло изигрување на демократијата. Но аплаузот што сега го доби е посебен, бидејќи му се честита за организирање на изигрување на народната волја“, пишува во коментарот, кој исто така не наведува дека во речиси сите анкети во Македонија во последните 10-12 години, поддршката за зачленување на земјата во ЕУ е над 68% отсто.


ВМРО-ДПМНE: Договорот од Преспа е правно-политички мртов


Скопје, 18 октомври, 2018 - 15:10 (META) 

Иако над еден милион и 200 илјади граѓани рекоа не за промена на името, Заев не се откажува, и со тоа директно ја крши волјата на граѓаните, се вели во реакцијата на ВМРО-ДПМНЕ, на изјавата на премиерот Зоран Заев.

„Во оваа фаза, договорот е чисто правно прашање, а како такво треба да се гледа низ призма на правото, законите и Уставот. Согласно правото Договорот од Преспа е правно – политички мртов, тоа го кажа ДИК, но тоа го кажува и Уставот. Одењето спротивно е злоупотреба на власта. Зоран Заев наместо насилно да турка спроведување на договор кој е одбиен од граѓаните, треба да си даде оставка како што вети, и не само заради штетниот договор кој го склучи, туку и за руинираната економија, урнисаното здравство и омаловаженото образование“, се вели во реакцијата на ВМРО-ДПМНЕ.


Плевнелиев: Бојкотот е голема грешка на ВМРО-ДПМНЕ


Софија, 18 октомври, 2018 - 15:01 (META) 

Бојкотот на референдумот беше повеќе од очигледен. Тој е голема историска грешка на политичката партија ВМРО-ДПМНЕ, која застана зад него. Зошто е грешка? Затоа што кога имаме момент од историска важност, не се криеш зад отсуството на опозиција. Ако се против, требаше да ја кажат позицијата. Но тоа што водечката опозициска партија се скри зад бојкот на инает, без никакви аргументи, тоа не помага на државата и на демократијата.

Со таква порака се огласи поранешниот претседател на Бугарија и член на Охридската група за поддршка на Македонија за членство во НАТО, Росен Плевнелиев во интервју за „Блумбергтв.бг“.

Тој вели дека одлуката на ВМРО-ДПМНЕ ги испровоцирала проевропските граѓани во државата да излезат на референдумот и дури 92 проценти од нив да гласаат „за“.

– Затоа, овој референдум за мене е успех. Многу жалам што народните претставници нема да бидат на висината на очекувањата – вели поранешниот бугарски претседател.

Тој во бојкотот од ВМРО-ДПМНЕ ја гледа продолжената рака на Кремљ и ја обвини Русија дека директно го финансира национализмот на Балканот за да предизвика поделби и остварување на руско влијание.

– Речиси сите националисти и популисти во регионот, вклучително и во Бугарија се директно финансирани од Русија и застапуваат геополитички интереси на Кремљ – оценува Плевнелиев.

Според Плевнелиев, сега Бугарија, како поразвиена земја подава рака на Македонија, иако претходно улогите биле обратни.

– Во многу аспекти, Западен Балкан заостана во многу работи. Се сеќавам на времето кога бев ученик, од Благоевград одевме во Штип на таканаречените „собори“. Тоа за мене беше вонземска држава. Убава, богата, имаше сè. А денеска гледате како благодарение на членството во НАТО и Европската унија, Бугарија доби шанса се разви многу подобро и ја престигна Македонија. И ако пред 30 години, Македонија била 10 години пред нас, сега е 10 години зад нас. Ние Бугарите ја осознавме својата важност и сме фактор на пријателство и стабилност во регионот. Бугарија, заедно со ЕУ и НАТО подава рака и предлага помош на Македонија, Босна и Херцеговина, Србија и Косово. Така и со Македонија – има подадена рака, судбината чука на врата и зависи од нашите браќа во Македонија да го донесат вистинското решение – вели Плевнелиев.


Вучиќ: Потребно е засилено присуство на ЕУ за да го зачуваме мирот на Западен Балкан


Белград, 18 октомври, 2018 - 12:26 (META) 

Претседателот на Србија, Александар Вучиќ, денеска изјави дека после неуспешниот референдум во Македонија и изборите во БиХ неопходно е посилно присуство на Европската Унија, за да се зачува мирот и стабилноста на Западен Балкан.

На панелот Белградски безбедносен форум на кој учествува заедно со претседателот на Австрија, Александар ван дел Белен, Вучиќ рече дека засилено присуство на ЕУ е неопходно „за да ЕУ остане тој сон, тоа светло на демократијата и слободата кон кое сме тежнееле“.

Вучиќ рече дека ЕУ треба на земјите од Западен Балкан да им понуди нешто големо и „опипливо“ и оцени дека е очигледно дека на народот во Македонија не му се допаднало тоа што му било понудено, а дека ЕУ не сметала на тоа.

– Потребно е да направиме нешто големо на Западен Балкан, мораме да понудиме нешто големо за иднината на Западен Балкан, затоа што ако ја потцениме волјата на луѓето и разочарувањето на народот на кое не сме сметале, се плашам дека ќе не доведе во ситуација кога нема да можеме да одржиме мир и стабилност – оцени Вучиќ.


РТС известува дека пратеници на ВМРО-ДПМНЕ се под притисок, а Заев има мнозинство


Белград, 10 октомври, 2018 - 17:04 (META) 

Во прилог под наслов „Македонија, пратениците на ВМРО-ДПМНЕ под притисок“, Радиотелевизија на Србија (РТС) денеска извести дека пред почетокот на денешната расправа во уставната комисија во македонското Собрание, 11 пратеници на ВМРО-ДПМНЕ се согласиле да ги поддржат уставните измени и така да обезбедат двотретинско мнозинство.

Повикувајќи се на информации на телевизијата „Алсат-М“, РТС потенцираше дека владата на Зоран Заев успеала да обезбеди двотретинска поддршка за уставните измени и да избегне вонредни избори.

Сепак, јавниот радиодифузен сервис на Србија ги пренесе и тврдењата на високите функционери на ВМРО-ДПМНЕ дека тие шпекулации се неточни и дека е „малку веројатно некој од пратениците да гласа спротивно на волјата на граѓаните на Македонија искажана на референдумот“.

Наспроти ваквите тврдења од врвот на најголемата опозициска партија, фактите зборуваат дека на референдумот излегоа 666.344 граѓани, од кои 609.427 граѓани, односно огромно мнозинство од излезените, се определија за прифаќање на на Договорот со Грција, поддржувајќи ја владата. Со други зборови, огромно мнозинство од граѓаните ги поддржаа евроатлантските интеграции. За тоа пишуваше и „Вистиномер“, соочувајќи ги изјавите на претседателот Ѓорге Иванов со реалните бројки.

Повикувајќи се на македонски медиуми, РТС наведува и дека одреден број поранешни функционери на ВМРО-ДПМНЕ се вклучиле во убедување на пратениците на оваа партија да ги поддржат уставните измени.

Претходно, белградска „Политика“, пишуваше дека „новиот претседател на ВМРО-ДПМНЕ, Христијан Мицкоски, во кампањата се однесувал како пантомимичар, за разлика од претседателот Ѓорге Иванов, којшто, „кога остана осамен, не се скри во својата резиденција, туку од говорницата на Генералното Собрание на ОН ги критикуваше САД, ЕУ и НАТО, повикувајќи ги граѓаните да го бојкотираат референдумот“.

Ова е само делумно точно бидејќи Иванов ниту остана осамен, ниту пак, се јави само од говорницата  на ОН. Тој, во неколку наврати се изјаснуваше против референдумот и дека тој нема да излезе да гласа.