!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Медарски: Пресудата за навреда на Ердоган е спротивна на практиката на судот во Стразбур


Скопје, 25 август, 2017 - 14:22 (META) 

Членот од Кривичниот законик и пресудата на скопскиот кривичен суд со која лицето Е.А. е осудено за навреда на турскиот претседател Реџеп Таип Ердоган на „Фејсбук“ се спротиви на праксата на Европскиот суд за кочвекови права во Стразбур, смета адвокатот Филип Медарски.

– Самиот член, а посебно пресудата се спротивни на практиката на Стразбург – напиша Медарски на „Твитер“, посочувајќи ја како пример пресудата на ЕСЧП во врска со жалба на Французин кој во 2008 година бил осуден од домашниот суд на парична казна од 30 евра поради навреда на тогашниот претседател Никола Саркози.

Околу основаноста и потребата од посетоење на вакво кривично дело во македонското законодавство, односно во Кривичниот законик, Медарски за „Мета“ вели дека можеби треба да постои, но во видоизменета форма, а не како што стои сега.

– Во принцип се работи за навреда на симболи (знаме, грб и химна) и на институции на други држави, како институцијата претседател. Но, овде не е се работи за навреда на претседателот како институција, туку за навреда на личноста што во моментот ја врши функцијата, во случајов -Ердоган. Ова е забелешката на ЕСЧП и во пресудата што ја наведувам – вели Медарски.

Скопскиот суд го осуди Е.А., кој има македонско и турско државјанство, на парична казна од 24.600 денари (400 евра), во процесот што беше отворен по кривична пријава од амбасадорката на Турција во земјава, Тулин Еркал Кара, кон крајот на минатата година.

Во одлуката на судот било наведено дека обвинетиот во номеври 2016 година, преку својот фејсбук-профил „објавил иронични изјави и упатил навреди кон лидерот на една странска земја“.

Доколу не ја плати паричната казна, Е.А. ќе мора да одлежи затворска казна.

Инаку, според членот 181 од Кривичниот законик на Македонија, предвидена е парична казна за „тој што со намера за исмејување јавно ќе изложи на подбив странска држава, нејзино знаме, грб или химна или шеф на држава или дипломатски претставник“.


Турција нема да влезе во ЕУ се додека Ердоган е на власт, вели Габриел


Берлин, 25 август, 2017 - 14:12 (META) 

Турција никогаш нема да стане членка на Европската Унија се додека со неа владее Реџеп Таип Ердоган, изјави германскиот министер за надворешни работи Зигмар Габриел, обвинувајќи го турскиот претседател дека не ги сфаќа сериозно пристапните преговори со ЕУ.

– Јасно е дека во оваа состојба Турција никога нема да стане членка на ЕУ. Не затоа што не ги сакаме, туку затоа што турската влада и Ердоган брзо се оддалечуваат од сето тоа за кое се залага за Европа – вели Габриел во интервју за германскиот весник „Билд“.

На прашање дали би им препорачал на германските државјани да патуваат во Турција, Габриел рече дека тоа не може да го направи со мирна совест.


Нов бран на откази во Турција – со декрет отпуштени стотици службеници


Анкара, 25 август, 2017 - 11:12 (META) 

Во Турција се отпуштени повеќе стотини државни службеници и зголемена е надлежноста на претседателот Реџеп Таип Ердоган над националната разузнавачка агенција МИТ, покажуваат двата декрети кои денеска се објавени во рамки на вонредната состојба која е воведена во земјата по неуспешниот минатогодишен воен удар.

Турција отпушти или суспендира повеќе од 150.000 функционери за време на чистките кои се спроведени во земјата после неуспешниот пуч, додека во затвор се испратени околу 50.000 лица, меѓу кои војници, полицајци и државни службеници.

Како што се прецизира во најновите декрети, кои ги објави турскиот„Службен весник“, отпуштени се повеќе од 900 државни службеници од различни министерства, јавни институции и војската.

Според еден од декретите, ќе биде потребна дозвола од претседателот за да се спроведе истрага над шефот на националната разузнавачка агенција МИТ или за да може тој да сведочи.

Правните промени ќе отворат пат за истрага за пратениците за наводни злосторства извршени пред или откако биле избрани на таа функција.


Скопскиот суд пресуди 400 евра казна за навреда на Ердоган на „Фејсбук“


Скопје, 25 август, 2017 - 10:07 (META) 

Кривичниот суд во Скопје го прогласил за виновен Е.А. поради навреда на претседателот на Турција, Реџеп Таип Ердоган на „Фејсбук“, јавува турската новинска агенција „Анадолу“.

Судот го осудил Е.А., кој има македонско и турско државјанство, на парична казна од 24.600 денари (400 евра), во процесот што беше отворен по кривична пријава од амбасадорката на Турција во земјава, Тулин Еркал Кара, кон крајот на минатата година.

Во одлуката на судот било наведено дека обвинетиот во номеври 2016 година, преку својот фејсбук-профил „објавил иронични изјави и упатил навреди кон лидерот на една странска земја“.

Доколу не ја плати паричната казна, Е.А. ќе мора да одлежи затворска казна.

Инаку, според членот 181 од Кривичниот законик на Македонија, предвидена е парична казна за „тој што со намера за исмејување јавно ќе изложи на подбив странска држава, нејзино знаме, грб или химна или шеф на држава или дипломатски претставник“.

Законот за навреда на странски државници потекнува од времето на монархиите во Европа и е поврзан со францускиот термин „lèse-majesté“, односно „повредено височество“. Неговата оригинална употреба била за заштита на монарсите и за санкционирање на сите кои ќе го повредат нивното достоинство или кралството со кое владеат.

Секторот за компјутерски криминал и дигитална форензика на МВР во февруари, оваа година поднесе кривична пријава против 34-годишниот скопјанец Т.Т., бидејќи преку коментари на „Фејсбук“ индиректно им се заканувал на амбасадорот на САД во земјава, Џес Бејли, и на неговото семејство.

Скопјанецот беше осомничен за кривичното дело повреда на углед на странска држава.


Хан бара промена на политиката на ЕУ кон Турција


Брисел, 22 август, 2017 - 13:22 (META) 

Еврокомесарот за проширување и добрососедска политика, Јоханес Хан смета дека Европската Унија треба да го промени односот на Унијата кон Труција, која е земја-кандидат за членство во ЕУ, откако турскиот претседател Реџеп Таип Ердоган неодамна ги повика Турците кои живеат во Германија да не гласаат за двете владејачки партии на претстојните парламентарни избори.

Ердоган минатата недела изјави дека германските граѓани со турско потекло на изборите не треба да гласаат за Христијанско-демократската унија (ЦДУ) на канцеларката Ангела Меркел, за Социјалдемократската партија (СПД) на Мартин Шулц или за Зелените, бидејќи овие партии покажале анти-турски став.

„Верувам дека дојде време членките да ги разгледаат стратешките импликации од ваквото однесување. Кревањето на раменици не е долгорочна политичка стратегија“, изјавил Хан за германскиот дневен весник „Зидојче цајтунг“.

Хан својот став го оправдува со мешањето на Ердоган во кампањата за парламентарните избори во Германија, како и со барањето на Анкара за екстрадиција на германско-турскиот писател Доган Аканли.


Ердоган: Германија им помага на терористите


Анкара, 7 август, 2017 - 20:53 (META) 

Турскиот претседател Реџеп Таип Ердоган денеска ја обвини Германија за помагање на терористите, затоа што, како што рече, Берлин не дава одговор на илјадниците молби за предавање осомничени лица, барани од турските власти.

Неговите зборови веројатно ќе доведат до нова ескалација на тензиите меѓу двете земји, посочуваат светските медиуми.

– Ние ѝ дадовме на германската канцеларка Ангела Меркел 4.500 досиеја, но не добивме одговор на ниту едно – изјави Ердоган пред членовите на неговата Партија на правдата и развојот (АКП).

Турскиот претседател вели дека Германија сака да ѝ бидат предавани терористите, но не сака да ги предава терористите кои се барани од Турција.


Ердоган: Никому не му е во интерес продолжувањето на катарската криза


Истанбул, 23 јули, 2017 - 12:50 (META) 

Турскиот претседател, Реџеп Таип Ердоган, во Истанбул изјави дека „никому не му е во интерес“ да продолжи кризата во Персискиот Залив.

Говорејќи пред почетокот на неговата дводневна поста на Катар и на Саудиска Арабија по повод дипломатската криза во регионот, Ердоган истакна дека веќе никој нема каков било интерес за пролонгирање на кризата.

Претседателот на Турција ги обвини „непријателите“ дека се обидуваат да ги „зајакнат тензиите помеѓу браќата“.

Саудиска Арабија, Обединетите Арапски Емирати, Бахреин и Египет на 5 јуни ги прекинаа дипломатските односи со Катар обвинувајќи ја земјата дека поддржува тероризам и дека е поврзана со Иран кој е регионален ривал на Саудиска Арабија.

Катар ги отфрли обвинувањата.

Ердоган денеска и утре ќе ги посети Катар и Саудиска Арабија, а медиумите пренесуваат дека тој ќе го посети и Кувајт, кој е главен посредник во решавањето на дипломатската криза во тој регион.


Турците вчера пред да телефонираат мораа да го слушаат Ердоган


Анкара, 16 јули, 2017 - 13:55 (META) 

Обидот да се повика мобилен број во Турција вчера доведуваше до неочекуван соговорник – гласот на турскиот претседател Реџеп Таип Ердоган. По вртењето на бројот, пред да почне воспоставувањето на врската, повикувачот првин ја слушаше снимената аудиопорака од претседателот, а дури по нејзиниот крај почнуваше вртењето на бројот, јавуваат турските медиуми.

Во пораката, Ердоган им го честитал на повикувачите „националниот празник на демократијата и на единството“, со кој се одбележа првата годишнина од неуспешниот пуч.

„Како претседател, испраќам честитки за 15 јули – Денот на демократијата и националното единство и посакувам милост за мачениците, а на хероите (кои се бореа против пучистите) здравје и благосостојба“, гласи пораката која траеше 16 секунди.

Дека нарачката за оваа „услуга“ ја направила државата, на својот твитер-профил потврди Омер Фатих Сајан, директор на Комисијата за информации и комуникациски технологии (БТК).

Овој потег предизвика гнев кај многумина корисници, а многумина критикуваа и објавија видеоснимки на кои се гледа како мора да почекаат да заврши пораката пред да може да разговараат.


Повеќе од милион луѓе во Истанбул на годишнината од обидот за пуч


Истанбул, 16 јули, 2017 - 13:18 (META) 

Повеќе од еден милион Турци во Истанбул синоќа беа на гигантскиот собир наречен „Епопеја на победата за демократија“, со кој беше одбележана првата годишнина од обидот за државен удар, што се случи на 15 јули лани.

Мостот над Босфор, наречен Мост на мачениците на 15 јули, кој е долг 1,5 километар, беше исполнет со луѓе, а според некои проценки, имало повеќе од еден еден милион лица. Пред една година мостот беше заземен со тенкови. Притоа  беа убиени повеќе луѓе, но тенковите беа запрени и не им беше дозволено да минат на другиот брег, што беше одлучувачки момент за неуспехот на пучот.

Точно на тоа место беше отворен меморијалот на мачениците од пучот на 15 јули, во кој загинаа 249 лица, а 2.100 беа ранети.

Синоќешниот собир почна со огромна поворка, на чие чело беа претседателот Реџеп Таип Ердоган и неговата сопруга Емине. Фатени за рака, тие минаа пеш од домот до мостот, заедно со голема група луѓе, меѓу кои семејствата и блиските на жртвите на превратот.

– Овој мост пред една година беше сведок на најкрвавиот злосторнички преврат во нашата историја. Но истата таа ноќ, тој стана и сведок на победата. Како и денеска луѓето во рацете имаа единствено знамиња. Но тие имаа посилно оружје. Својата вера – рече Ердоган.

Ердоган од Истанбул замина за Анкара, каде по полноќ учествуваше на седницата на парламентот во спомен на жртвите, која почна во 2.32 минути по локално време, кога парламентот беше подложен на напад од турски „Ф-16“ за време на пучот. Опозициските пратеници го бојкотираа настанот.

Во говорот во Анкара, Ердоган изјави дека ќе го потпише законот за враќање на смртната казна доколку му биде доставен.


Во Турција се одбележува годишнина од неуспешниот пуч


Анкара, 15 јули, 2017 - 11:29 (META) 

Во Турција денеска се одбележува првата годишнина од неуспешниот обид за државен преврат. Според турските власти, организацијата ФЕТО на муслиманскиот проповедник Фетулах Ѓулен, прогласена од безбедносните структури за терористичка, е одговорна за пучот извршен ноќта на 15 спроти 16 јули минатата година.

Претседателот Реџеп Таип Ердоган објави вчера дека во државата ќе почне „национално демократско бдеење“ и ќе трае до полноќ на 16 јули. Закажана е седница на парламентот со специјална програма. Попладне во Истанбул ќе почне поход на национално единство на Ердоган, ветерани од превратот и роднини на загинатите. Претседателот ќе има говор и ќе биде прикажан документарен филм за 15 јули. Ќе биде отворен и споменик на жртвите од неуспешниот пуч.

Турските власти, инаку, вчера отпуштија повеќе од 7.000 полицајци, војници и јавни службеници. Декретот за отпуштање претставува дел од мерките по обидот за пуч. Турција досега суспендира повеќе од 150.000 официјални лица и уапси околу 50.000 припадници на армијата, полицијата, вработени во судството, академици и луѓе од други сектори. Во најновиот декрет меѓу отпуштените од работа се 2.303 полицајци, како и 302 вработени на универзитети во државата.