!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ердоган не го прифаќа извинувањето од НАТО


Анкара, 18 ноември, 2017 - 17:06 (META) 

Турскиот претседател, Реџеп Таип Ердоган, го отфрли извинувањето од НАТО откако неговото име се појави на листата на непријатели за време на воена вежба во Норвешка.

– Вчера видовте однесување полно со непочитување, за време на воената вежба на НАТО. Постојат грешки кои не ги прават будали, туку луѓе со низок морал. Тоа не може лесно да се заборави – изјави Ердоган во говор кој беше емитуван во живо на националната телевизија.

Турскиот претседател истакна дека тоа не може да се поправи со обично извинување.

Ердоган вчера рече дека Турција ги повлекува своите 40 војници од воената вежба на НАТО во Норвешка откако неговото име и името на Кемал Ататурк се појавиле на листата на непријатели на постер за време на вежбата.

НАТО и Осло им се извинија на Турција и на нејзиниот претседател за инцидентот откако турскиот лидер ги повлече своите војници од воената вежба.


НАТО му се извини на Ердоган што го постави на листата на непријатели


Брисел, 18 ноември, 2017 - 11:25 (META) 

Генералниот секретар на НАТО, Јенс Столтенберг, му се извини на претседателот на Турција, Реџеп Таип Ердоган, затоа што неговото име се најде на листата на непријатели за време на воена вежба.

Ердоган повлече 40 војници од вежбата затоа што неговото име, но и името на Кемал Ататурк, се најдоа помеѓу непријателите и рече дека тоа „не е единство и не е алијанса“.

Столтенберг истакна дека инцидентот не претставува став на НАТО и дека е во прашање „потег на поединец“, како и дека листата на непријатели, наводно, ја составувало лице што не е вработено во НАТО.

Столтенберг објасни дека тоа лице било под договор со норвешките власти, кои го тргнале од воената вежба и спроведуваат истрага за инцидентот.

– Турија е многу ценет сојузник на НАТО и тие придонесуваат за заедничката безбедност – изјави Столтенберг.


Заев и Кара разговарале за организирање на посета на Ердоган на Македонија


Скопје, 9 ноември, 2017 - 17:18 (META) 

Премиерот Зоран Заев денеска имал средба со амбасадорката на Турција, Еркал Кара, на која, меѓу другото, било разговарано и за „интензивирање на постапката за организирање на официјална посета на делегација на Владата на Македонија на Турција, како и за посета на турскиот претседател, Реџеп Таип Ердоган, на нашата земја“.

Заев и Кара, според соопштението од владината прес-служба, „посебно внимание посветиле на соработката на планот на безбедносните политики, како и на поддршката за претстојните активности на Македонија во однос на евроатлантските аспирации“.

„На средбата заеднички е поздравено длабокото пријателството меѓу Македонија и Турција и е изразена определеност за унапредување на соработката на економски план, како и во сите други области од интерес на граѓаните на двете држави“, стои во соопштението.


Ердоган тужи член на опозицијата бидејќи го нарекол „фашистички диктатор“


Анкара, 31 октомври, 2017 - 11:03 (META) 

Турскиот претседател Реџеп Таип Ердоган поднел тужба против Булент Тезџан, член на опозицијата, бидејќи го нарекол турскиот лидер „фашистички диктатор“, пренесува балканскиот сервис на „Радио Слободна Европа“.

Тезџан, кој е портпарол на главната турска опозициска Републиканска народна партија, изјавил дека намерата му била да ја прекине атмосферата на страв во Турција.

Адвокатот на Ердоган, Хусеин Ајдин, изјавил дека е поднесена тужба против Тезџан поради навреда на претседателот на државата.

Ибрахим Калин, портпарол на Ердоган, ја осудил изјавата на опозиционерот, додавајќи дека неговиот говор на омраза претставува срамно однесување на опозицијата.

Во Турција навреда на претседателот е кривично дело за кое е предвидена казна до четири години затвор.


Ердоган нема да го прими американскиот амбасадор


Анкара, 10 октомври, 2017 - 18:52 (META) 

Турскиот претседател Реџеп Таип Ердоган изјави дека нема да го прими американскиот амбасадор во заминување во Анкара на проштална средба и ги обвини САД дека направиле проблем поврзан со обостраното суспендирање на издавањето визи.

– Турција има долга традиција и сигурно нема да дозволиме нешто такво да се случи. Амбасадорот ја завршува својата мисија и сигурно ниту јас, ниту министерството ќе го прими на проштална средба – рече Ердоган при посетата во Белград.

Тој рече дека се поставува прашањето дали одлуката за суспендирање на визите била одлука на амбасадорот Џон Бес.
– Доколку мој амбасадор направеше нешто такво, немаше ни еден час повеќе да остане на функцијата – рече Ердоган.

САД во неделата соопштија дека го стопираат издавањето неимигрантски визи во своите дипломатски претставништва во Турција откако турските власти уапсија еден конзуларен службеник, под обвинение за шпионажа. Набргу и Турција го сопре издавањето визи во САД.
Ова е уште еден чекор на оддалечување на официјална Анкара од Западот, откако Турција, која е членка на НАТО, ги залади односите со ЕУ, особено со Германија.


Ердоган вели дека соработката меѓу Анкара и Белград е клучна за Балканот


Белград, 10 октомври, 2017 - 11:11 (META) 

Турција и Србија се двете клучи земји за Балканот и нивната соработка е од суштинско значење за одржување на мирот, стабилноста и на просперитетот на полуостровот и во Европа, наведува турскиот претседател Реџеп Таип Ердоган, во авторскиот текст за весникот „Политика“ објавен по повод неговата денешна посета на Белград.

„Врските меѓу Турција и Србија се силни и со длабоки корени. Во долгата историја на тие територии, Турците и Србите живееја заедно. И денес можат да се забележат траги од нашата заедничка историја во јазикот, архитектурата, кујната, културата и во многу други области“,  пишува Ердоган.

Според турскиот претседател, иако немаат заедничка граница, Турција и Србија „се сметаат за соседи, а тајната е скриена токму во тие блиски врски“.

– Несомнено, соработката е неизбежна и поради геополитичката позиција на две земји. Заедничката историја носи и одредена чувствутелност и некои различни разбирања кои се однесуваат и за Турција и за Србија – пишува турскиот претседател.

Тој пристигна вчеравечер во Белград, а беше пречекан од српскиот колега Александар Вучиќ, премиерката Ана Брнабиќ и дел од српската влада.

Во делегацијата на Ердоган има 185 бизнисмени и осум турски министри. Официјалните разговори на турскиот претседател почнуваат денеска, на тет-а-тет средба со Вучиќ, по што ќе одржат заедничка прес-конференција.


Ердоган им се закани на ирачките Курди дека ќе гладуваат поради референдумот


Анкара, 26 септември, 2017 - 15:53 (META) 

Турскиот претседател, Реџеп Таип Ердоган, им се закани на ирачките Курди дека може да соочат со глад како резултат на мерките што ги разгледува Анкара по вчерашниот референдум за независност на ирачки Курдистан, пренесува „Би-би-си“.

Ердоган го обвини лидерот на курдската регионална влада, Масуд Барзани, за предавство, поради инсистирањето референдумот да се одржи и покрај противењето на меѓународната заедница.

„Сега на маса се сите воени и економски опции“, рекол Ердоган.

Тој претходно се закани дека ќе го пресече нафтоводот од Курдистан и ќе забрани курдски камиони да ја поминуваат турската граница.

Турција се плаши дека формирањето на независна курдска држава на нејзината граница би можело да ги поттикне сепаратистичките чувства кај нејзиното курдско малцинство.

Инаку, резултатите од вчерашниот референдум за независност на ирачки Курдистан сè уште не се објавеи, но се очекува тој да е успешен, односно мнозинството да гласало за независност од Ирак.

Курдските лидери претходно истакнаа дека референдумот не е обврзувачки, туку дека неговата цел е да ѝ даде мандат на регионалната влада за почеток на преговори за сецесија со централната влада во Багдади со соседните земји.

Ирачкиот премиер Хаидер ал-Абади отфрли каква било можност за вакви разговори.

„Ние не сме подготвени за разговори или за дијалог околу резултатите на реферндумот бидејќи тој е противуставен“, изјави вчера ирачкиот премиер.


Медарски: Пресудата за навреда на Ердоган е спротивна на практиката на судот во Стразбур


Скопје, 25 август, 2017 - 14:22 (META) 

Членот од Кривичниот законик и пресудата на скопскиот кривичен суд со која лицето Е.А. е осудено за навреда на турскиот претседател Реџеп Таип Ердоган на „Фејсбук“ се спротиви на праксата на Европскиот суд за кочвекови права во Стразбур, смета адвокатот Филип Медарски.

– Самиот член, а посебно пресудата се спротивни на практиката на Стразбург – напиша Медарски на „Твитер“, посочувајќи ја како пример пресудата на ЕСЧП во врска со жалба на Французин кој во 2008 година бил осуден од домашниот суд на парична казна од 30 евра поради навреда на тогашниот претседател Никола Саркози.

Околу основаноста и потребата од посетоење на вакво кривично дело во македонското законодавство, односно во Кривичниот законик, Медарски за „Мета“ вели дека можеби треба да постои, но во видоизменета форма, а не како што стои сега.

– Во принцип се работи за навреда на симболи (знаме, грб и химна) и на институции на други држави, како институцијата претседател. Но, овде не е се работи за навреда на претседателот како институција, туку за навреда на личноста што во моментот ја врши функцијата, во случајов -Ердоган. Ова е забелешката на ЕСЧП и во пресудата што ја наведувам – вели Медарски.

Скопскиот суд го осуди Е.А., кој има македонско и турско државјанство, на парична казна од 24.600 денари (400 евра), во процесот што беше отворен по кривична пријава од амбасадорката на Турција во земјава, Тулин Еркал Кара, кон крајот на минатата година.

Во одлуката на судот било наведено дека обвинетиот во номеври 2016 година, преку својот фејсбук-профил „објавил иронични изјави и упатил навреди кон лидерот на една странска земја“.

Доколу не ја плати паричната казна, Е.А. ќе мора да одлежи затворска казна.

Инаку, според членот 181 од Кривичниот законик на Македонија, предвидена е парична казна за „тој што со намера за исмејување јавно ќе изложи на подбив странска држава, нејзино знаме, грб или химна или шеф на држава или дипломатски претставник“.


Турција нема да влезе во ЕУ се додека Ердоган е на власт, вели Габриел


Берлин, 25 август, 2017 - 14:12 (META) 

Турција никогаш нема да стане членка на Европската Унија се додека со неа владее Реџеп Таип Ердоган, изјави германскиот министер за надворешни работи Зигмар Габриел, обвинувајќи го турскиот претседател дека не ги сфаќа сериозно пристапните преговори со ЕУ.

– Јасно е дека во оваа состојба Турција никога нема да стане членка на ЕУ. Не затоа што не ги сакаме, туку затоа што турската влада и Ердоган брзо се оддалечуваат од сето тоа за кое се залага за Европа – вели Габриел во интервју за германскиот весник „Билд“.

На прашање дали би им препорачал на германските државјани да патуваат во Турција, Габриел рече дека тоа не може да го направи со мирна совест.


Нов бран на откази во Турција – со декрет отпуштени стотици службеници


Анкара, 25 август, 2017 - 11:12 (META) 

Во Турција се отпуштени повеќе стотини државни службеници и зголемена е надлежноста на претседателот Реџеп Таип Ердоган над националната разузнавачка агенција МИТ, покажуваат двата декрети кои денеска се објавени во рамки на вонредната состојба која е воведена во земјата по неуспешниот минатогодишен воен удар.

Турција отпушти или суспендира повеќе од 150.000 функционери за време на чистките кои се спроведени во земјата после неуспешниот пуч, додека во затвор се испратени околу 50.000 лица, меѓу кои војници, полицајци и државни службеници.

Како што се прецизира во најновите декрети, кои ги објави турскиот„Службен весник“, отпуштени се повеќе од 900 државни службеници од различни министерства, јавни институции и војската.

Според еден од декретите, ќе биде потребна дозвола од претседателот за да се спроведе истрага над шефот на националната разузнавачка агенција МИТ или за да може тој да сведочи.

Правните промени ќе отворат пат за истрага за пратениците за наводни злосторства извршени пред или откако биле избрани на таа функција.