Еди Рама присуствуваше на промотивниот лет на „Ер Албанија“


Тирана, 17 септември, 2018 - 15:51 (META) 

Албанскиот премиер Еди Рама на 15 септември присуствуваше на првиот лет на „Ер Албанија“. Иако албанскиот премиер вели дека „Ер Албанија“ е албанска компанија, официјалните документи откриваат дека сопствеништвото на компанијата е помеѓу три страни, „Туркиш Ерлјанс“ со 49 отсто, државната агенција „Алб Контрл“ со 10 проценти и компанијата основана во Валона МДН Ивестмент со 41 отсто.

Рама им се заблагодари на „Туркиш Ерлајнс“ и на турскиот претседател Ердоган за нивната поддршка во формирањето на компанијата.

На летот од Тирана до Истанбул како патници беа студенти кои постигнале одлични резултати.

Албанската опозиција реагираше дека овој лет е само додатен лет на „Туркиш Елјанс“. Тие го обвинија Рама за ширење пропаганда бидејќи компанијата се уште не е лиценцирана под албански код.

На ова обвинување, преку „Фејсбук“ одговори Крислен Кери, извршниот директор на Цивилната авијација кој не ги демантираше официјалните документи кои го спомнуваат сопствеништвото на „Ер Албанија“, туку ја прецизираше динамиката на овој аранжман. Според него „Ер Албанија“ ќе има корист од компанијата за одржување на компанијата „Туркиш Текник“, лидер во оваа област со седиште во Истанбул. Тој додаде дека „Ер Албанија“ ќе има пристап во Авијациската академија на „Туркиш Ерлајнс“ и дека албанскиот персонал и пилотите ќе бидат обучени таму.


Иванов присуствуваше на инаугурацијата на Ердоган


Анкара, 10 јули, 2018 - 10:03 (META) 

Македонскиот претседател Ѓорге Иванов заедно со сопругата Маја Иванова присуствуваше на инаугурацијата на претседателот на Турција, Реџеп Таип Ердоган.

Од Кабинетот на Иванов соопштуваат дека тој му ја честитал на Ердоган победата и постигнатиот успех на предвремените претседателски и парламентарни избори и му посакал успешно извршување на претседателската функција.

Иванов му се заблагодарил на Ердоган за досегашната поддршка од Турција и изразил уверување дека и во наредниот период ќе продолжи пријателството и соработката меѓу двете земји.

На церемонијата што се одржа во претседателската палата во Анкара, претседателот Ердоган имаше обраќање, откако претходно положи заклетва во турскиот Парламент. На свеченоста присуствуваа 22 претседатели на држави и 28 премиери, претседатели на парламенти и министри.


Иванов телефонски му ја честитал победата на Ердоган


Скопје, 25 јуни, 2018 - 10:37 (META) 

Претседателот на Република Македонија Ѓорге Иванов, телефонски му ја честитал победата на неговиот турски колега Реџеп Таип Ердоган на предвремените претседателски и парламентарни избори во Турција и му посакал успешно извршување на претседателската функција, информираат од кабинетот на Иванов.

Во телефонскиот разговор биле разменети мислења за актуелните политички случувања во двете земји, при што претседателот Иванов се заблагодарил за сета досегашна поддршка од Република Турција, и изразил уверување дека и во наредниот период ќе продолжи силното пријателство и соработката меѓу двете земји.


Ердоган на средбата со Џафери го потврдил ставот за употребата на уставното име


Анкара, 20 април, 2018 - 10:07 (META) 

Претседателот на Собранието, Талат Џафери, во рамките на официјалната посета на Турција, се сретнал со претседателот Реџеп Таип Ердоган во Анкара.

Ердоган ја нагласил поддршката на Турција за интеграција на Македонија во НАТО, како и принципиелниот став во однос на употребата на уставното име на Република Македонија.

„Тој подвлече дека Турција беше една од првите држави што ја призна нашата земја под нејзиното уставно име, таа прва отвори амбасада и назначи амбасадор во земјата. Истовремено, турскиот претседател се осврна на потребата за интензивирање на економската соработка, реафирмирајќи ја заложбата годишната трговска размена меѓу Турција и Македонија да се искачи на една милијарда долари“, информираат од кабинетот на Џафери.

На средбата, меѓудругото, станало збор и за потребата од интензивирање на соработката во борбата против тероризмот, при што било нагласено дека Македонија го осудила обидот за државен удар во Турција и ги поддржува демократски избраните институции.

„На крајот од средбата, заеднички беше нагласено значењето на меѓупарламентарната соработка и парламентарната дипломатија за билатералните и мултилатералните односи, во однос на унапредувањето на политичкиот дијалог и зголемувањето на динамиката на севкупната соработка меѓу земјите“, се додава во соопштението.


Иванов во официјална посета на Турција, ќе се сретне и со Ердоган


Анкара, 19 февруари, 2018 - 9:44 (META) 

Претседателот на Република Македонија, Ѓорге Иванов и неговата сопруга Маја Иванова, од денеска престојуваат во официјална посета на Република Турција.

Претседателот Иванов, во Анкара, ќе оствари билатерална средба со претседателот на Република Турција, Реџеп Таип Ердоган и со претставници на турскиот државен врв. Во рамките на посетата, Иванов ќе положи венец во Мавзолејот на Кемал Ататурк во Анкара.

Иванов ќе одржи предавање на тема „Предизвици на високото образование во третиот милениум“, пред членовите на Советот за високо образование на Република Турција и ректорите од сите државни и приватни универзитети на земјата.

На македонскиот претседател ќе му биде доделена наградата за „Светско лидерство“, по повод прогласувањето на „Школата за млади лидери“, како најдобар социјално одговорен проект во Европа за 2017 година.


Ердоган ги предупреди Грција и Кипар за барањето на гас во Средоземно Море


Анкара, 13 февруари, 2018 - 12:38 (META) 

Претседателот на Турција, Реџеп Таип Ердоган ги предупреди Грција, Кипар и меѓународните организации кои се во потрага по природен гас во Средоземното Море да не „ја преминат линијата“ и да не ги загрозат правата на Турција.

Неговото предупредување е во период кога турски воени бродови продолжуваат со блокирање на достава на опрема за дупчење на Кипар кое го изведува италијанска компанија.

Турција се противи на барањето на нафта и тврди дека таквите постапки ги кршат правата на Турците кои живеат на Кипар.

Ненаселените острови Имиа кои во Турција се позната под името Кардак, долго време претставуваат проблем во односите помеѓу Турција и Грција имајќи предвид дека и двете земји имаат право над нив.


Ердоган – Заев: Поддршка за добрососедските политики и за решавање на спорот со Грција


Анкара, 12 февруари, 2018 - 18:23 (META) 

Премиерот Зоран Заев и претседателот на Турција, Реџеп Таип Ердоган, на денешната средба во Анкара констатирале дека двете земји имаат потенцијал за унапредување на економската соработка преку зголемување на турските инвестиции како и преку нови иницијативи од страна на Македонија.

Ердоган ја поддржал иницијативата на Заев за зголемување на квотите за извоз на телешко и јагнешко месо во Турција и најавил дека овој став ќе го пренесе на Владата на Република Турција.

Од владата информираат дека Ердоган изразил поддршка и охрабрување на турските бизнисмени за инвестирање во Македонија.

„Претседателот на Турција Ердоган даде поддршка на добрососедските политики што ги води Македонија, го поддржа процесот за решавање на спорот со Грција и оцени дека е тоа добро за Балканот и за евро-атлантските перспективи на Република Македонија“, стои во владиното соопштение.

Претходно, Заев имаше средба со претседателот на турскиот парламент Исмаил Кахраман, со кој се согласил дека парламентарната соработка меѓу двете држави е важна и дека ќе придонесе кон определбата за зголемување на трговската размена меѓу Македонија и Турција на една милијарда евра.


Заев: Парите од концесионерот „ТАВ“ ќе бидат вложени во значајни проекти


Анкара, 12 февруари, 2018 - 9:48 (META) 

Премиерот Зоран Заев, во рамките на неговата дводневна посета на Турција, утрово се сретна со претставници на групацијата „ТАВ“, при шти биле утврдени приоритетите за инвестицијата од 45 милиони евра од концесионерот на аеродромот во Скопје.

Парите, соопштуваат од Владата, ќе бидат вложени во значајни проекти за граѓаните.

– Станува збор за инвестиции во градинки, училишта, одводни и канализациски мрежи и локални и регионални патишта, она што им е реално потребно на нашите граѓани – рече Заев.

Премиерот денеска ќе се сретне со државниот врв на Турција, со премиерот Бинали Јилдирим и претседателот Реџеп Таип Ердоган.


Папата и Ердоган сметаат дека не треба да се менува статусот на Ерусалим


Ватикан, 5 февруари, 2018 - 19:28 (META) 

Тероризмот не може да се доведува во врска со религиите, а борбата против ксенофобијата и исламофобијата треба да продолжи со заеднички сили, оцениле папата Франциск и турскиот претседател Реџеп Таип Ердоган на нивната денешна средба во Ватикан, јави турската новинска агенција „Анадолија“.

Неименуван извор од канцеларијата на Ердоган за агенцијата изјавил дека папата и турскиот претседател разговарале за повеќе важни прашања, вклучувајќи ја и ситуацијата околу Ерусалим.

Папата Франциск и Ердоган ја нагласиле важноста од задржување на статусот на Ерусалим во согласност со резолуцијата на Обединетите нации и почитувањето на меѓународното право.

Ердоган е првиот турски претседател кој по 59 години е во посета на Ватикан.


Заев на 12 февруари во официјална посета на Турција, средби со Ердоган и Јилдерим


Анкара, 5 февруари, 2018 - 13:48 (META) 

Владина делегација предводена од премиерот Зоран Заев на 12 февруари ќе престојува во официјална посета на Република Турција, информира владината прес-служба.

За време на посетата премиерот Заев ќе има средби со претседателот на Република Турција, Реџеп Таип Ердоган, со турскиот премиер Бинали Јилдерим, како и со претседателот на турското Собранието, Исмаил Кахраман.

По средбата со премиерот Јилдерим, двајцата премиери ќе имаат заедничка прес-конференција.