!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Брексит“ влезе во речникот „Оксфорд“


Лондон, 15 декември, 2016 - 12:34 (META) 

Зборот „брексит“ е еден од 1.500 нови термини што неделава ќе бидат додадени во англискиот речник „Оксфорд“, соопшти денеска издавачката компанија „Оксфорд јуниверсити прес“.

„Брексит“ е дефиниран како „(предложено) повлекување на Обединетото Кралство од Европската Унија и политичкиот процес поврзан со тоа“.

„Понекогаш се користи посебно во врска со референдумот одржан во Обединетото Кралство на 23 јуни 2016 година, на кој повеќето гласачи биле за повлекување од ЕУ“, е дел од дефиницијата за „брексит“.

Уредничката на речникот „Оксфорд“, Фиона Макферсон, изјави дека „брексит“ е еден од термините што најбргу го минал патот од настанување до дефиниција и било многу невообичаено некој збор така брзо да влезе во употреба.
– Од нов збор пред неколку години, се најде на насловните страници на весниците на странски јазик, што покажува дека сега тоа е светски збор – рече Макферсон.

Речникот доби уште еден сличен поим – „грексит“, кој го дефинира хипотетичкото излегување на Грција од еврозоната.
Меѓу другите нови зборови во речникот „Оксфорд“ се „јутубер“, чест корисник на веб-страницата за споделување видеоснимки „Јутјуб“, особено некој кој произведува и се појавува на снимките на веб-страницата, „глам-ма“ со значење „гламурозна баба“ и „бама“ што означува лице од селското подрачје од југот на САД.

Англискиот речник „Оксфорд“ содржи значења на повеќе од 829.000 зборови, нивен изговор и историја.


На Светскиот ден на емотиконите, првиот речник на емотикони за македонски јазик


Скопје, 17 јули, 2016 - 18:11 (META) 

По повод прославувањето на 17 јули, Светскиот ден на емотиконите, се одбележа официјалното пуштање во употреба на првиот речник за емотикони на македонски јазик.

Емотикони се мали сликички што се испраќаат во кратки пораки директно од тастатурата на телефон. Сè досега, не постоеше лесен начин за тие кои говорат македонски јазик да ги најдат потребните емотикони.

„EmojiWorldBot“ е бесплатна алатка која е изградена за популарната платформа „телеграм“ за размена на инстант пораки, за корисниците да можат да најдат емотикони кои се поврзани со поими на повеќе од 70 јазици. Ако напишете „мајмун“ на македонски, ќе ви се појави сликичка на мајмун која може да ја искористите во вашите пораки и разговори.

Франческа Чиусароли, професор по лингвистика на Универзитетот „Мачерта“ во Италија и еден од основачите на алатката, вели дека луѓето користат слики за да раскажат некоја приказна уште од времето на пештерските цртежи.

„Пишувањето се разви од слики, па хиероглифи и идеограми на писма и писма. Сега светот им се враќа на сликите за некои основни комуникации, со користење на емотикони да ги поврзе луѓето преку границите и без оглед на различните јазици“, вели Чиусароли.

Сметка која е бесплатна и без реклами е сè што ви треба за да ја користите алатката. Апликацијата „телеграм“ може да биде инсталирана на кој било уред или да се користи на веб.