!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шесто продолжение на комисиската расправа за ребалансот на буџетот


Скопје, 24 јули, 2017 - 10:24 (META) 

Комисијата за финансирање и за буџет денеска ќе ја продолжи расправата за ребалансот на буџетот за 2017 година, на шестото продолжение на седницата кое треба да почне во 11 часот.

Досега не се поминати ниту десет од 840 предложени амандмани со колку што почна расправата за ребалансот.

И пред почетокот на оваа седница, од ВМРО-ДПМНЕ остануваат на ставот дека со ребалансот власта предвидува задолжување за 150 милиони евра повеќе од планираното.

Во однос на задолжувањето, од СДСМ, пак, сметаат дека долгот што власта на ВМРО-ДПМНЕ им го оставила на граѓаните е намален за 55 милиони евра.


Продолжува расправата во собраниската комисија за ребалансот на буџетот


Скопје, 21 јули, 2017 - 9:41 (META) 

Комисијата за финансирање и за буџет денеска во 11 часот ќе го одржи четвртото продолжение на седницата на која се води расправа за предлогот на Владата за ребаланс на буџетот за 2017 година. Основата цел на ребалансот, како што образложи министерот за финансии, Драган Тевдовски, е да се намалат непродуктивните трошоци и да се обезбеди простор за реализација на политиките на новата влада.

Од ВМРО-ДПМНЕ, пак, во соопштение до медиуми утрово велат дека со предложениот ребаланс на буџетот СДСМ планира дополнително зголемување на задолжувањето од цели 150 милиони евра до крајот на годинава.

„Конфузниот Тевдовски самиот себе се демантира и додека говори за презадолженост на државата, издава нови обврзници и дополнително ја задолжува. Од негова рака е потпишан долг од речиси 4,5 милијарди денари, кој преку аукции на државни хартии од вредност ги направи во последните четириесетина дена“, велат од ВМРО-ДПМНЕ.


За СДСМ актуелниот буџет е нереален, за ВМРО-ДПМНЕ со ребалансот ќе биде партиски


Скопје, 19 јули, 2017 - 19:04 (META) 

На денешната комисиска расправа за ребалансот на буџетот во Собранието, пратениците на ВМРО-ДПМНЕ истакнаа дека тие сметаат дека тој е направен по желбата на СДСМ за да се партизираат институциите, а од СДСМ, пак, посочија дека сметаат дека буџетот за 2017 година е предимензиониран и затоа е потребен ребаланс.

Лилјана Затуроска од ВМРО-ДПМНЕ рече дека со ребалансот, буџетот ќе биде неразвоен, бидејќи се кратат 78 милиони евра за капитални инвестиции.

„Не можете да кажете дека инфраструктурните проекти, кои се капитални, кои носат бенефит за економијата, за развојот на инфраструктурата, за подобрување на животниот стандард, биле закочени поради одредени грешки во проектната документација. Тоа е целосно незнаење како еден инфраструктурен проект од капитално значење треба да ја помине фазата. Вие немате капацитет тие инфраструктурни проекти да ги завршите“, рече Затуроска.

Невенка Стаменковска од ВМРО-ДПМНЕ, исто така, обвини дека не слушнала за ниту еден конкретен проект кој со ребалансот на буџетот треба да се реализира до крајот на годината.

Панче Иванов од СДСМ, пак, истакна дека буџетот за 2017 година бил предимензиониран.

„Се добива впечаток дека кога буџетот се носел бил предимензиониран, без реални очекувања и проценка. Предвидувањата биле максимални, дека сè што е планирано ќе се реализира“, рече Иванов.

На денешното второ продолжение на расправата за ребалансот на буџетот на Комисијата за финансирање и буџет, тема беа и партиските вработувања.


СДСМ: Владата ги намали долговите за 55 милиони евра


Скопје, 18 јули, 2017 - 13:55 (META) 

Владата предводена од СДСМ, за 55 милиони евра ги намали долговите што ВМРО-ДПМНЕ ги правеше за луксузирање и за криминално богатење, се вели во реакцијата на СДСМ на соопштението на ВМРО-ДПМНЕ за ребалансот на буџетот.

Во реакцијата на владејачката партија се додава дека ВМРО-ДПМНЕ, 11 години тајно и нетранспарентно ги задолжувала граѓаните, а парите од задолжувањата ги трошела за лускузирање и за криминално богатење на поединци.

„За разлика од расипничкото владеење на ВМРО-ДПМНЕ и на Никола Груевски, новата влада предводена од СДСМ преку ребалансот ги крати непродуктивните трошења и парите ги враќа кај граѓаните“, велат од СДСМ.


Тевдовски: Целта на ребалансот на буџетот е да се намалат непотребните трошоци


Скопје, 17 јули, 2017 - 13:20 (META) 

Министерот за финансии, Драган Тевдовски, на денешната расправа за ребалансот на буџетот на Комисијата за финансирање и буџет, истакна дека основнa цел на ребалансот e да ги намали непродуктивните трошоци и да обезбеди простор за реализација на политиките на новата влада.

– Ребалансот не е нов буџет, туку прилагодување на тековниот буџет. Поради тоа, за реализацијата на неговата основна цел, постојат и неколку ограничувања. Прво ограничување се преземените, а неплатени обврски од минатото. Второ ограничување се веќе склучените договори за тековни или идни проекти, за кои, ако се раскинат, државата ќе треба да плаќа пенали – изјави Тевдовски.

Тој додаде дека кратењето на непродуктивните трошења на власта обезбеди можност за буџетирање на нови мерки кои значат поддршка за граѓаните или домашните фирми. Тие мерки се минимална плата, решение за стечајците, поддршка за малите и средните претпријатија и земјоделците, укинување на радиодифузната такса и слично.

Вкупните приходи на буџетот се ревидирани за 1,5 процент надолу, односно за 2,87 милијарди денари.

– Ова ревидирање на проекциите кај приходната страна на буџетот е резултат на намалување на приходите на основниот буџет во согласност со реализацијата во изминатите шест месеци и со очекувањата до крајот на годината. На расходната страна на буџетот, сериозно намалување е направено на расходите наменети за стоки и за услуги, кои се скратени за 2 милијарди денари во однос на иницијалната проекција со буџетот. Од оваа ставка се направени кратења на сите непродуктивни трошоци на владата и на институциите наменети за патувања, репрезентации, економски промоции и рекламирања – појасни Тевдовски.

Буџетскиот дефицит е проектиран на 18,57 милијарди денари. Отплатата на долгот изнесува 18,35 милијарди денари во 2017 година. Во согласност со тоа, потребата за финансирање изнесува 36,92 милијарди денари.

Тевдовски рече дека финансирањето на буџетскиот дефицит и отплатата на долгот ќе се обезбедат преку задолжување на домашниот пазар на државни хартии од вредност, кредитни линии наменети за финансирање на одделни проекти, како и од депозитот пренесен од минатата година.

Инаку, денеска на Комисијата за финансирање и буџет почна расправата за ребалансот на буџетот. До Комисијата пристигнале 840 амандмани, од кои најмногу, 706, поднела ВМРО-ДПМНЕ, а другите 134 амандмани се од партии од албанскиот политички блок.


Расправата за ребалансот на буџетот ќе почне со 840 поднесени амандмани


Скопје, 17 јули, 2017 - 6:56 (META) 

Дури 840 амандмани стигнале до собраниската Комисија за финансирање и буџет, во која денеска ќе почне расправата за ребалансот на буџетот. Најмногу амандмани, 706, поднела ВМРО-ДПМНЕ, а другите 134 амандмани се од партии од албанскиот политички блок.

Поради ребалансот на буџетот, беше прекината шестата собраниска седница во моментот додека се расправаше за предлогот на Владата за разрешување на јавниот обвинител на Република Македонија, Марко Зврлевски, поради приоритетниот третман на прашањето за буџетот.

ВМРО-ДПМНЕ бара во преправениот буџет да се обезбедат пари за гасоводот Скопје – Тетово – Гостивар, како и за продолжување на гасоводот од Битола преку Ресен и Охрид до Струга и за гасификација на Скопје. Со амандманите се бара и обештетување на охриѓани кои имале материјални штети од земјотресите, како и пари за нови 50 електрични автобуси за Скопје и нова гимназија во Аеродром. Опозициската партија бара и пари за проектот „Купи куќа – купи стан“, како и за два кружни тека на булеварот Св. Кирил и Методиј – едниот кај поранешна „Нова Македонија“, а другиот на почетокот на булеварот, пред подвозникот кон Пржино.

Со ребалансот ќе има четириесет и седум милиони евра помалку за трошење. Од СДСМ велат дека се скратени непотребните трошоци, а парите се враќаат назад кон граѓаните.

Од сите министерства со ребалансот, најголемо е кратењето  кај Министерството за образование и наука за цели 21 милион евра. И полицијата до крајот на годината ќе има 6,7 милиони евра помалку за трошење.


ВМРО-ДПМНЕ: Алаѓозовски и СДСМ го блокираат античкиот театар во Скупи


Скопје, 16 јули, 2017 - 17:34 (META) 

Со ребалансот на буџетот се спречува изградбата на античкиот театар во Скупи, а овој проект важен за граѓаните го блокираат министерот за култура Роберт Алаѓозовски и СДСМ, обвини Владимир Атанасов на прес-конференција во седиштето на ВМРО-ДПМНЕ. Тој рече дека со ребалансот се укинати над 80 отсто од парите предвидени за овој проект.

– За жал на граѓаните, а за волја на вистината, ова ќе биде најнеуспешната влада која неинвестирала во културата.Овој антички театар од римско време е еден од најголемите и најзначајните објекти на балканот и пошироко, кој со конзервација и реставрација ќе се возобнови и повторно ќе може да прими од 8 до 10 000 гледачи. СДС очигледно нема елементарни познавања за важноста на овој проект. Тие по секоја цена продолжуваат со деструктивноста, блокирањето и укинувањето на проектите кои се од огромно значење за граѓаните – обвини Атанасов.


Бочварски: Ребалансот на буџетот ги крати непотребните трошења


Скопје, 16 јули, 2017 - 14:47 (META) 

Ребалансот на буџетот ги крати непотребните трошоци, а парите се враќаат назад кон граѓаните и со него, ќе се обезбедат пари за трајно решавање на проблемот на стечајните работници, околу 70.000 граѓани веќе од септември ќе добијат повиска минимална плата од 12.000 денари, ќе се зголемат средствата за подигнување на ученичкиот стандард и повисоки стипендии и школарини, порача потпретседателот на СДСМ, Благој Бочварски на прес-конференција денеска. Тој вети и дека почнува и проектот „Младинска гаранција“ која на младите ќе им понуди можност за дополнителна едукација, вработување или платена пракса.

Потпретседателот на СДСМ порача дека за разлика од нив, претходната власт на ВМРО-ДПМНЕ се однесувала расипнички.

– Додека мнозинството граѓани живееше под прагот на сиромаштија, во долгови и со блокирани сметки, функционерите од ВМРО-ДПМНЕ нивните пари ги трошеле на ручеци со егзотична и ексклузивна храна, на скапи хотели, костуми, чевли и бањски третмани, целосно игнорирајќи ги потребите на граѓаните. Последен доказ за расипничкото владеење на ВМРО-ДПМНЕ е набавката на два ЛЕД-монитори со вкупна цена од еден милион евра кои се поставени на скапите барокни фасади во центарот на Скопје.СДСМ, преку новата Влада што ја предводи, става крај на ваквиот безобразен однос кон парите на граѓаните – рече Бочварски.

Ребалансот на буџетот би требало да влезе во собраниска процедура утре претпладне.


Собранието заседаваше до 3.30 часот, продолжува денеска


Скопје, 15 јули, 2017 - 10:00 (META) 

Маратонската осма седница на Собранието на Република Македонија која траеше до 3.30 часот утрово, ќе продолжи денеска во 13 часот, откако претседателот на Собранието, Талат Џафери, синоќа прогласи постојано заседание на парламентот. Попладнето и вечерта минаа без пратениците од владејачкото мнозинство, пратениците од ВМРО-ДПМНЕ и коалицијата си реплицираа едни на други, што, според Џафери е „некоректно и ја забавува работата“. Пратениците ја продолжија истата практика и ноќта, откако седницата продолжи во 1 часот, по два и полчасовна пауза.

На дневен ред е спроведувањето на буџетот за 2016 година. Опозициската ВМРО-ДПМНЕ вели дека се работело домаќински, иако Македонија била во голема политичка криза. За пратениците на СДСМ завршната сметка на буџетот покажува многу нерационални трошења.

Министерот за финансии, Драган Тевдовски, во образложението наведе дека економскиот пораст на Македонија во 2016 г. изнесувал 2,4 проценти, забележувајќи оти тоа е најниска стапка на економски пораст во регионот.

Собранието на краткото продолжение на деветтата седница вчера попладнето одлучи ребалансот на буџетот, односно предлог-законот за дополнување на Законот за извршување на буџетот за 2017 година да се донесе по скратена постапка. Таа седница продолжува в понеделник.


ЗНМ бара повеќе пари за финансирање на МРТ, ССНМ – подобри услови за новинарите


Скопје, 14 јули, 2017 - 19:00 (META) 

На јавната консултација со новинарските и со медиумските организации посветена на реформите во медиумите, која ја организираше Министерството за информатичко општество и администрација, претседателот на Здружението на новинарите на Македонија (ЗНМ), Насер Селмани, ја критикуваше одлуката на Владата во ребалансот на буџетот да обезбеди само 3,2 милиони евра за финансирање на „Македонската радио-телевизија“ во последните три месеци од 2017 година, соопшти ЗНМ.

Селмани смета дека Владата е неконзистентна во врска со реформата во МРТ затоа што лани пратениците на СДСМ го поддржале предлогот на новинарските организации еден процент од државниот буџет да се одвои за финансирање на МРТ, додека сега, како власт, со ребалансот на буџетот се предвидени многу помалку средства од тоа што куќата има како приходи.

– Ветувате зајакнување на капацитетите на МРТ, а од друга страна предвидувате помалку пари за финансирање на куќата и се заканувате дека ќе го смените директорот на јавниот сервис. Јас сум прв што се залагам за смена на директорот, но има други начини како се прави тоа, а не со закани. Така не се обезбедува независноста на МРТ – рекол Селмани.

Тој ги одбил како неосновани објаснувањата на Владата дека нема пари во буџетот за повеќе средства за МРТ и ја повикал Владата да ги зголеми средствата за МРТ со ребалансот, напоменувајќи дека во спротивно ЗНМ ќе ги искористи сите можности да ја алармира домашната и меѓународната јавност. Првиот човек на ЗНМ како позитивна ја оценил одлуката за укинување на владините реклами, како и подготвувањето извештај од полицијата за насилството против новинари и зголемувањето на транспарентноста на Владата.

Претседателката на Самостојниот синдикат на новинари и медиумиски работници, Тамара Чаусидис, искажала загриженост што во приоритетните реформи во медиумите не е опфатен и Законот за работни односи, со кој може да се обезбеди подобра положба на медиумските работници.

– Самоцензурата е проткаена во редакциите. За да се променат работите, треба да се промени и пристапот и менталитетот. Не смее да се дозволи спроведување пропаганда – порачала Чаусидис.