Во Собранието денеска почнува комисиска расправа за предлог-буџетот за 2019


Скопје, 28 ноември, 2018 - 11:43 (META) 

Расправата по предлог-буџетот за 2019 година, почна денеска во матичната Комисија за финансирање и буџет во Собранието.

Предлог-буџетот за 2019 година тежи 3,7 милијарди евра, вкупните приходи се проектирани на 210,8 милијарди денари, (3,4 милијарди евра), а порастот на економијата 3,2 проценти на домашниот бруто-производ (БДП).

Со буџетот за 2019 година се предвидува намалување на буџетскиот дефицит, кој за следната година е проектиран на 2,5 проценти од домашниот бруто-производ (БДП).Во предлoг-буџетот за 2019 година предвидена е реформа во Фондот за пензиско осигурување, односно намалување на вкупниот трансфер.

Нови 10 проценти повисоки плати се предвидени за лекарите специјалисти од јануари 2019 година, а нови пет проценти повисоки плати од септември 2019 година за сите вработени во јавното здравство. Пораст на платите од пет проценти се предвидени и за просветните работници, вработените во градинките и за јавната администрација.

За капиталните инвестици, кои секоја година се кратат со ребаланс, предвидени се 25,7 милијарди денари.

Согласно фискалната стратегија, јавниот долг за 2019 година ќе изнесува 54,2 проценти и ќе се финансира од домашниот и странскиот пазар на хартии од вредност, но не е планирано издавање на нова еврообврзница.

Се очекува, стапката на инфлација да е ниска и стабилна, а стапката на невработеност да се намали на околу 20 проценти.


Собранието го усвои ребалансот на буџетот за 2018 година


Скопје, 12 ноември, 2018 - 9:33 (META) 

Собранието го усвои ребалансот на буџетот за 2018 година, а целта, како што истакна министерот за финансии Драган Тевдовски, е да се направат корекции на расходната страна за да се обезбеди финансиска поддршка за општините со цел отплата на дел од долговите.

– Се обезбедува финансиска поддршка на општините во висина од 3,020 милијарди денари, со цел намалување на доспеаните а неплатени обврски на општините и единките корисници основани од единиците на локалната самоуправа од областа на образованието, културата, детската и социјалната заштита – рече Тевдовски.

Владата усвои предлог-законско решение со кое овие средства ќе бидат сразмерно распределени на општините, во износ од 51 проценти од пријавените доспеани, а неисплатени обврски. Со законското решение ќе се постави и механизам за спречување на можноста за трупање неплатени обврски во општините.

Со ребалансот приходната страна на буџетот е незначително коригирана, за 0,5 проценти надолу. Ова е резултат на намалувањето на приходите што ги остваруваат буџетските корисници на сопствените сметки и благ пораст на социјалните придонеси.

Расходната страна на буџетот е корeгирана надолу за 1,2 милијарди денари, односно за 0,5 проценти. Нивото на буџетски дефицит е задржано на 2,7 проценти од домашниот бруто-производ (БДП). Со ова се задржува определбата за постепена фискална консолидација.

Со предлог-ребалансот ревидирана е проекцијата за раст на БДП на 2,8 проценти. Како што беше посочено, тоа се прави пред сѐ заради блокадата за влез во НАТО и ЕУ од страна на опозицијата. Интеграцијата на земјава носи безбедност и сигурност, кои се најважни при носењето одлуки од страна на инвеститорите. Неизвесноста може да влијае негативно на економијата.


Владата прифати осум амандмани од комисиската расправа за буџетот


Скопје, 6 ноември, 2018 - 10:29 (META) 

На предлог на Министерството за финансии, на 100. седница Владата ги разгледа и усвои амандманите на ребалансот на буџетот за 2018 година предложени на комисиската расправа во Собранието.

„Осумте амандмани на седницата на Владата се прифатени како дополнување на предлогот за изменување и дополнување на буџетот за 2018 година, и новиот, интегрален текст на предлогот за ребаланс на Буџетот ќе биде проследен на усвојување на пленарна седница во Собранието“, информираа од Влада.

Пратениците на опозицијата поднесоа 180 амандмани и ја критикуваат власта за слабиот економски пораст и нереализирање на капиталните инвестиции.

Со предложениот ребаланс на буџетот од страна на Владата, најголема алокација на средства има за општините за кои се обезбедува финансиска поддршка во висина од 3,020 милијарди денари, со цел намалување на доспеаните, а неплатени обврски.


Продолжува комисиската расправа за ребалансот на буџетот


Скопје, 1 ноември, 2018 - 9:36 (META) 

Собраниската Комисија за финансирање и буџет денеска ја продолжува расправата за предлог-измените и дополнувањата на буџетот.

Пратениците на опозицијата поднесоа 180 амандмани и ја критикуваат власта за слабиот економски пораст и нереализирање на капиталните инвестиции.

Со предложениот ребаланс на буџетот од страна на Владата, најголема алокација на средства има за општините за кои се обезбедува финансиска поддршка во висина од 3,020 милијарди денари, со цел намалување на доспеаните, а неплатени обврски.

Денеска е трет ден од расправата во матичната комисија, а законски најмногу се предвидени до 10 дена.


Општините во исчекување на повеќе пари со ребалансот на буџетот


Штип, 30 октомври, 2018 - 15:48 (META) 

Во време кога се подготвува државниот буџет за 2019 година, општините се во исчекување на владиното ветување за поголем прилив на пари во општинските каси.  Едно од ветувањата на актуелната владина колација е поголема грижа за општините преку засилена децентрализација.

Заменикот-министер за локална самоуправа Дејан Павлевски, кој денеска беше во Штип, рече дека не може да се каже како ќе се крои државиот буџет, но извесно е дека се планирани повеќе пари за општините. Тој додаде дека изминатиот период потрошиле време и енергија на утврдување на долговите и на насобраните камати од претходните општински власти.

– Утврдивме огромни долгови на општините, но дел од нив се вратени од новите градоначалници. Меѓутоа, определба на владата е да им даде шанса на сите општини подеднакво и токму поради тоа се определи да им помогне на општините да ги затворат долговите и со тоа да им излезат во пресрет на граѓаните – изјави Павлевски.

На општините и актуелните градоначалници им тежат обврските за ученичкиот превоз, потоа капиталните проекти, кои делумно можат да ги реализираат. Поради тоа очекуваат и остварување на владините ветувања за поголем прилив од средствата што се уплаќаат на име ДДВ. Павлевски вели дека решавањето на долговите и напластените обврски не им оставило многу простор за ветеното од програмата.

-За жал, во изминатиот период се напластија многу проблеми во општините и во изминатиот период работевме на нивно решавање. Не е можно со волшебно стапче да се решат одеднаш. Можам да најавам дека во четврток ќе организираме траклезна маса, на која ќе се разговара за пренесување на функциите од централната на локална власт -додаде Павлевски кој денеска во Штип беше на поставувањето на камен-темелник на новата детска градинка во наслебата „Сењак“.


Ребалансот на буџетот опозицијата го оценува за нереален, расправата продолжува и денеска


Скопје, 30 октомври, 2018 - 9:21 (META) 

Расправата по ребалансот на буџетот продолжува и денеска во собраниската Комисија за финансирање и буџет. Опозицијата, која поднесе 180 амандмани, ја критикува власта за економските политики и ребалансот го оцени како нереален.

Во расправата пратениците истакнаа дека нема да се оствари ниту намалената стапка на пораст на економијата од 2,8 проценти, а ги потенцираа и намалените капитални инвестиции за 100 милиони евра. Оттука, тие побараа оставка од министерот за финансии Драган Тевдовски кој го образложи ребалансот.

Пратениците од власта пак, за позитивно го оценија тоа што најголем дел од средствата ќе се реалоцираат кај општините, поради долговите кои, како што рекоа се наследени од претходната власт.

Со ребалансот на буџетот се предвидува ревидирање на проекцијата за раст на домашниот бруто-производ (БДП) на 2,8 проценти, задржување на буџетскиот дефицит на 2,7 отсто и намалување на приходната и расходната страна за 0,5 отсто.

Дополнителни средства се обезбедени и за Фондот за пензиско и инвалидско осигурување, Фондот за здравствено осигурување и Агенцијата за вработување. Најголема алокација во ребалансот, има за општините за кои се обезбедува финансиска поддршка во висина од 3,020 милијарди денари, со цел намалување на доспеаните, а неплатени обврски.

Расправата во Комисијата треба да трае најмногу 10 работни дена.


Денеска почнува расправата за ребалансот на буџетот во матичната собраниска комисија


Скопје, 29 октомври, 2018 - 9:51 (META) 

Денеска во собраниската Комисија за финансирање и буџет почнува расправата за предлогот на Владата за ребаланс на буџетот за 2018 година. Пратениците на ВМРО-ДПМНЕ ќе поднесат околу 180, а партиите на Албанците над десетина амандмани.

Според Деловникот, целата процедура за донесување на ребалансот на буџетот треба да заврши за околу 20 дена, или околу 15 ноември. Министерот за финансии, Драган Тевдовски рече дека актуелните случувања во Собранието поврзани со уставните измени нема да го пролониграат донесувањето на ребалансот на буџетот и тој ќе биде усвоен во законскиот рок.

Со ребалансот на буџетот се предвидува ревидирање на проекцијата за раст на домашниот бруто-производ (БДП) на 2,8 проценти, задржување на буџетскиот дефицит на 2,7 отсто и намалување на приходната и расходната страна за 0,5 отсто.

Дополнителни средства се обезбедени и за Фондот за пензиско и инвалидско осигурување, Фондот за здравствено осигурување и Агенцијата за вработување. Најголема алокација во ребалансот, има за општините за кои се обезбедува финансиска поддршка во висина од 3,020 милијарди денари, со цел намалување на доспеаните, а неплатени обврски.

Тевдовски додаде дека буџетот за следната година се подготвува и е во последна фаза, нагласувајќи дека сите детали ќе бидат објавени кога, како што рече, ќе дојде време.


Се стеснуваат роковите за ребалансот за 2018 и за буџетот за 2019 година


Скопје, 26 октомври, 2018 - 10:20 (META) 

Ќе предизвика ли процесот на уставни измени согласно договорот од Преспа временски теснец за усвојување на ребалансот на буџетот за 2018 година и на буџетот за 2019 година е прашање што заслужува внимание со оглед на тоа што се уште не е започната постапката во Собранието за разгледување на владиниот предлог за изменување и дополнување на буџетот за годинава.

Собраниската Комисија за финансирање и буџет на седницата закажана во понеделник, 29 октомври ќе почне да го разгледува предлогот за ребеланс на буџетот, но се уште не е закажана седница на која пратениците ќе ја продолжат постапката.

Како што веќе најави министерот за финансии Драган Тевдовски, усвојувањето на ребаланост односно дали овој документ воопшто ќе стапи на сила ќе зависи и од постапката за уставни измени.

„Доколку дојде до неприфаќање на постапката за почеток на уставни промени и се распишат предвремени парламентарни избори, таквата можност ќе се изгуби бидејќи ребалансот нема да биде на сила“, рече Тевдовски.

Сега, останува да се види дали Владата ќе успее докрај да ја истера постапката за уставни измени со оглед на тоа што две партии од албанскиот блок најавија свои барања односно нови амандмани на Уставот, а има уште два фази за усвојување на уставните измени, а во една од нив на Владата повторно ќе и биде потребно дво-третинско мнозинство гласови во Собранието.

Процедура:

Според деловникот на Собранието по предлогот на буџетот се води претрес како по предлог на закон во второ читање, со тоа што е задолжителен општ претрес. Претресот (општиот претрес и претресот по амандманите) по предлогот на буџетот на седницата на матичното работно тело и на Законодавно-правната комисија може да трае најмногу вкупно десет работни дена. Член на работното тело и пратеник во текот на општиот претрес може да говорат повеќе пати во траење од вкупно 20 минути, а координатор на пратеничка група вкупно 30 минути. Претставникот на Владата во општиот претрес може да говори повеќе пати но не повеќе од 30 минути вкупно. Пратеникот во текот на претресот по амандманите може да говори само еднаш во траење од десет минути. Координатор на пратеничката група или еден пратеник определен од пратеничката група или од координаторот на пратеничката група во претрес по амандман може да говори само еднаш во траење од 15 минути. Претставникот на Владата во однос на прифатливоста на амандман може да говори само еднаш во траење од 5 минути. Само подносителот на амандманот може да даде образложение и да говори по амандманот во времетраење од вкупно десет минути, а доколку подносители на амандман се двајца или повеќе пратеници само еден од подносителите може да даде образложение и да говори по амандманот во времетраење од вкупно 10 минути.

Тоа значи дека опозицијата може со поднесување амандмани да ја пролонгира расправата и усвојувањето на ребелансот на буџетот и да ја блокира новата распределба на парите од буџетот.


Со ребалансот се намалуваат буџетските средства за интеграција во НАТО


Скопје, 19 октомври, 2018 - 10:56 (META) 

Владата со ребалансот на буџетот за 2018 година планира намалување на паричните расходи во Министерството за одбрана планирани за интеграција во НАТО. Со буџетот за 2018 година во расходниот дел кај Министерството за одбрана за ставката унапредување на безбедноста и одбраната односно интеграција во НАТО беа предвидени 935.000.000 денари, а со ребалансот оваа ставка се намалува на 855.000.000 денари.

Забележително е што намалувањето на парите предвидени за интеграција во НАТО доаѓа во период кога заменичката претседателка на Владата и министерка за одбрана Радмила Шекеринска, министерот за надворешни работи Никола Димитров, и Националниот координатор за НАТО Стево Пендаровски како членови на Комитетот за интеграција во НАТО престојуваат во седиштето на алијансата во Брисел каде што вчера почна завршната фаза од пристапните разговори на нашата земја со НАТО, кои ќе траат до 19 октомври.

Од Министерството за одбрана потврдуваат дека со предложениот ребаланс планираните средства на потпрограма ВА – интеграција во НАТО, ќе се намалат за 80 милиони денари.

„Намалувањето нема да се одрази на процесот на интеграција во НАТО, бидејќи се врши од причина што планираните активности и набавки се веќе реализирани или ќе се реализираат со заштеда, односно со помалку средства од планираните. Доказ за тоа е и вчерашниот почеток на пристапните разговори со НАТО, процес кој го очекувавме и посакувавме веќе 2 децении“, велат од министерството.

Според најавите, доколку поминат уставните измени за прифаќање на Договорот со Грција  целиот процес треба да заврши до крајот на декември оваа година. Потоа, во јануари 2019 година, Република Македонија треба да го потпише Протоколот за пристапување со право на учество во сите тела на НАТО, но, без можност да гласа, а приемот на нашата земја во полноправно членство би требало да се случи откако земјите членки ќе го ратификуваат Протоколот за пристапување и тоа, секоја одделно во своите национални парламенти.


Со ребалансот на буџетот се предвидени и пари за функционирање на ОТА


Скопје, 15 октомври, 2018 - 9:48 (META) 

Владата го разгледа и усвои предлогот за изменување и дополнување на буџетот за 2018 година со кој се предвидува ревидирање на проекцијата за раст на домашниот бруто-производ (БДП) на 2,8 проценти, задржување на буџетскиот дефицит на 2,7 отсто и намалување на приходната и расходната страна за 0,5 отсто.

Дополнителни средства се обезбедени и за Фондот за пензиско и инвалидско осигурување, Фондот за здравствено осигурување и Агенцијата за вработување.

– Целта на предлог-ребалансот на буџетот за годинава е да се направат корекции на расходната страна со цел обезбедување на финансиска поддршка за општините и зајакнување на фондовите за здравствено осигурување (ФЗОМ), Пензиско и инвалидско осигурување (ПИОМ) и Агенцијата за вработување (АВРМ) – рече министерот за финансии Драган Тевдовски.

Според него, ревидираната проекцијата за раст на БДП на 2,8 отсто се должи на блокадата за влез во НАТО и ЕУ од страна на опозицијата, а неизвесноста негативно може да влијае на економијата.

Реалокација на средства има и помеѓу буџетските корисници при што се обезбедуваат дополнителни 198 милиони денари за политички партии и истражувачки центри согласно промената на закон, како и средства за функционирање на ОТА до крајот на годината. Најголема алокација во ребалансот, има за општините.

– За општините се обезбедува финансиска поддршка во висина од 3,020 милијарди денари, со цел намалување на доспеаните, а неплатени обврски на општините. Исто така, со закон ќе се постави механизам за спречување на можноста за трупање на неплатени обврски во општините – потенцира Тевдовски.

Тој прецизираште дека законите се во финална фаза на изработка и оти ќе бидат доставени до Собранието доколку на пленарната седница биде изгласан почетокот на постапката на уставните промени.

– Во спротивно, ќе се распишат предвремени парламентарни избори и овој ребаланс на буџетот нема да може да биде усвоен од страна на Собранието. Во моментов постои можност да им се помогне на општините, а доколку дојде до неприфаќање на почеток на постапката за уставни промени и се распишат предвремени парламентарни избори, таквата можност ќе се изгуби бидејќи во предлог-буџетот за 2019 година, кој е во фаза на изработка, не постои фискален простор за финансиска поддршка на општините – посочи Тевдовски.