СДСМ: Eкономијата е стабилизирана и се движи во добар правец


Скопје, 2 ноември, 2018 - 16:18 (META) 

Економска катастрофа беше 11-годишното криминално и расипничко владеење на ВМРО-ДПМНЕ предводено од носителот на криминалот Никола Груевски, кога економијата се уништуваше, а граѓаните се осиромашуваа за да се оствaрат криминалните апетити на Груевски и неговите соработници, се вели во реакцијата на СДСМ на прес-конференцијата на портпаролот на ВМРО-ДПМНЕ, Димче Арсовски.

„За разлика од таквиот пристап на ВМРО-ДПМНЕ предводено од Груевски, Владата предводена од СДСМ работи домаќински и одговорно управува со парите на граѓаните. Последен доказ за тоа е усвојувањето на анекс-договорот со компанијата „Синохидро“ преку кој се решаваат проблемите со автопатот Кичево-Охрид и се заштедуваат 95 милиони евра од буџетот“, се вели во соопштението на СДСМ.

Во него се додава дека „извештајот на Народната банка нотира дека последните проекции укажуваат на здрави и солидни основи на домашната економија, со потенцијал за солиден раст, поддржан и од кредитната активност на банките, како и интензивирање на економскиот раст во следните три години.“

„Преку одговорно управување со финансиите, Владата предводена од СДСМ, успеа да го стави јавниот под контрола, фреквенцијата на задолжувања е намалена, а каматните стапки за задолжувања се далеку пониски од каматните стапки од задолжувањата за време на криминалното владеење на ВМРО-ДПМНЕ. Истовремено, бројни економски параметри како растот на платите, порастот на извозот, потрошувачката и индустриското производство, рекордниот број на странски инвестиции, јасно покажуваат дека економијата е стабилизирана и се движи во добар правец“, се додава во соопштението.


„Еуромакс рисорсис“: Работиме согласно домашната регулатива


Скопје, 9 октомври, 2018 - 12:53 (META) 

Сите обвинувања изнесени кон проектот се паушални и не се поткрепени со факти бидејќи проектот за бакар „Иловица-Штука“ е целосно безбеден и се развива според највисоките стандарди за животна средина и во согласност со домашната регулатива, реагираат од „Еуромакс рисорсес“ на барањата на активистите кои се спротиставуваат на отворањето на рудникот на бакар и злато Иловица во струмичката котлина и упатија ултиматум на Владата да и ја одземе концесијата на компанијата „Еуромакс рисорсис“ најдоцна до вторник, 16 октомври, кога е предвидена да се одржи седница на Владата.

„Ги применуваме најдобрите практики од светот, како и светските и ЕУ стандарди. Севкупното наше работење е усогласено со постојната домашна регулатива и сме во комуникација со надлежните институции во насока на следни чекори во процесот за добивање дозволи. Еуромакс е посветена на одговорно работење со целосна транспарентност и сите заинтересирани страни можат да извршат увид во целокупната документација на проектот, која е јавно достапна. И тоа во нашите канцеларии во Скопје, Струмица и во Иловица, како и на Интернет страницата https://www.euromaxresources.mk/. Проектот Иловица-Штука ќе биде модерен рудник кој ќе отвори многу можности за вработување, поддршка на земјоделството и развој на локалната и националната економија“, се вели во реакцијата на компанијата.


ВМРО-ДПМНЕ: Заев бега од дебата бидејќи не може да го оправда губењето на идентитетот


Скопје, 12 септември, 2018 - 13:40 (META) 

Зоран Заев мора да го надмине стравот и да престане да бега од дебата, која е основно демократско средство во политиката и на која што ќе се разговара за суштински прашања кои задираат во идентитетот на државата, велат од ВМРО-ДПМНЕ како реакција на ставот на премиерот Заев да не прифати ТВ-дуел со опозицискиот лидер Мицкоски доколку тој јавно не каже дека е против бојкот на референдумот.

„Заев знае дека е многу потешко кога ќе се соочи со вистината за неговата капитулација и кога ќе му бидат предочени сите аргументи за злото што и го нанесува на државата. Затоа Зоран Заев се плаши од дебата. Тој е свесен за економскиот пустош и антидржавните политики кои ги спроведе. Заев бега од одговори бидејќи не може да го оправда губењето на идентитетот, историјата, културата и традицијата на Република Македонија“, велат од партијата.

Заев, според ВМРО-ДПМНЕ, бега од дебата „бидејќи не може да ја оправда штетата што и ја причинил на државата“. Од таму додаваат дека тој трајно ја нарушил преговарачката позиција на Република Македонија, кои биле градени од страна на сите влади од независноста до сега.


Хотелиерите реагираат за лошата состојба на туристичкиот центар Попова Шапка


Тетово, 5 септември, 2018 - 16:18 (META) 

Хотелиерите на Попова Шапка реагираат што двоседот „Св.Илија“ не работи од февруари лани и велат дека без негово функционирање, не може да се одвива никаков туризам. Загрижени се што толку долго време никој не презема ништо и нема никакви вложувања во овој познат туристички центар.

Освен тоа, стагнира и изградбата на шестоседот. Хотелиерите велат дека досега немало толку слаба организација на Попова Шапка. Делот од планината каде што е започната изградбата на шестоседот е во хаотична состојба, без никакви најави за продолжување на градежните работи и завршување на проектот.

Тие особено се жалат и на проблемот со отпадоците. Голем дел од туристичкиот центар е затрупан со смет, а од надлежните нема никаква реакција. Уште на самиот влез од Попова Шапка се забележува голема количина на отпадоци и непријатна миризба.

Заради ваквата состојба на Попова Шапка, хотелиерите стравуваат за престојната туристичка сезона. Велат, во ваква ситуација, тешко можат да привлечат туристи. Апелираат до надлежните за што поскоро справување со овие проблеми.


Заев: Нема ништо недемократски ако државата се подготвува да си ги наплати даноците


Скопје, 13 август, 2018 - 15:07 (META) 

Државата нема аспирации да навлегува во детали на трошењето на парите на граѓаните, но во делот на приходите, многу демократски земји имаат увид во приходот кој што го остваруваат даночните обврзници.

Ова денеска го одговори, премиерот Зоран Заев на новинарско прашање во врска со можноста УЈП да има увид во банкарските сметки на граѓаните.

„Даночната евазија во Македонија е голема и тоа најчесто е присутна каде што има најмногу приходи, кај побогатиот слој на населението. Конечно создадовме систем, преку поврзувањето со банкарскиот сектор УЈП да има увид во приходите кои што се цел на оданочување од страна на државата. Апсолутно тука нема ништо недемократски, а и до сега државата преку одредени институции можела да направи увид во некои сметки. Апелирам до граѓаните да нема никаква стравови, се работи за подготовка на државата во извршување на државата да ги наплаќа даноците“, вели Заев.

На прашањето дали ќе се оданочуваат приливите кои стигнуваат од иселениците, Заев рече дека мора да биде кристално јасно дека ќе се оданочува само оној приход кој е заработка.

– Она што е помош на семејствата од своите од надвор, тоа не е цел на оданочување согласно законите на Македонија. Ако некој има приход од странство затоа што работел и заработил во странство или направил некоја интелектуална услуга во странство, тоа е приход кој што се оданочува. Дотациите и донациите кои што нашинците ги испраќаат на нашите сограѓани нема да се оданочуваат – вели Заев.

Во врска со измената на предлогот на Законот за изменување и дополнување на Законот за банките, пред неколку месеци реагираа и од Македонската банкарска асоцијација дека предложените измени и дополнувања се несоодветни и претставуваат директно навлегување  во приватноста на граѓаните и заштита на нивните лични податоци.

„Со проширување на листата на корисници на податоците кои се банкарска тајна особено на податоци кои не се специфицирани и неопределени, директно се влијае на суштината на банкарската такна која е една од основните фактори на довербата на граѓаните во банкарскиот систем. Имено, увид во трансакциски сметки на клиент претставува директна повреда на неговата приватност, навики, начин на живеење, со што може да се направи непоправлива штета доколку податоците бидат доставени до трети неовластени лица или бидат објавени во јавност. Ова може негативно да влијае на довербата на граѓаните во банките и штедењето која макотрпно се гради последните 20 години“, се вели во дописот на МБА.

Од таму бараа предлог-законот да биде ставен на поширока и подолготрајна јавна расправа со цел целосно разгледување на сите аспекти и ефекти од неговата примена.

За Лилјана Пецова Илиеска, експерт со долгогодишно искуство во заштита на личните податоци, со предложените измени на Законот за банки се постигнува и друга цел, освен онаа која се доставува во текстот поставен на ЕНЕР, бидејќи вклучува и овозможува пристап и до друг орган освен УЈП. Иако тоа е ограничено во рамки на надлежноста на Царинската управа, сепак останува како перцепција дека се проширува опсегот на органи кои ќе имаат малку посеопфатен пристап до банкарските информации.

– Не се работи само за тоа кој сè ќе има пристап до податоците на граѓаните. Прашањата што треба да се постават се всушност прашања и одговори како низа на процеси и процедури кои ќе треба УЈП да ги изготви за да бидат сигурни граѓаните дека нивните лични податоци се сигурни.
При собирање на податоците, односно достава до УЈП, кој е безбедносниот канал за проток на банкарските информации? Kако е обезбедена заштитата на личните податоци и нивна обработка заради спречување на потенцијален директен маркетинг, или пак продажба на трети лица на податоци добиени при анализа? Како ќе се избегне можноста за вкрстување на бази на податоци при ваков опсежен формат и обем на личните податоци – прашува Пецова Илиеска.

Според неа, малку е непрофесионална изјавата на директорката на УЈП дека ако досега немало злоупотреба од страна на државните службеници дека нема потреба од загриженост.

– Тие одговори сепак треба да ги даде судската пракса во државата и секако Дирекцијата за заштита на личните податоци со оценка за степенот на усогласеност на системот за заштита на личните податоци на УЈП, односно Царинска управа со постоечките законски одредби. Исто така, треба да се имаат предвид и обврските кои произлегуваат од Законот за заштитана личните податоци и апелирам да се усвојат и измените на законот за ЗЛП за што поблиско усогласување со ЕУ регулативата – вели Пецова Илиеска.

Директорката на УЈП, Сања Лукаревска уверуваше дека податоците на граѓаните се заштитени.

– Личните податоци на граѓаните се сигурни, загарантирани и заштитени. Користењето на податоците низ една ваква законска и сигурна процедура е императив за да може Управата за јавни приходи да издава однапред пополнети годишни даночни пријави кои граѓаните само ќе ги потврдуваат. Издавањето на пополнетите годишни даночни пријави е дел од реформата за поедноставување на постапките за плаќање на персоналниот данок на доход, која Управата за јавни приходи ја спроведе со користење на средства од ЕУ, ИПА – фондовите – рече Лукаревска.


Фракција на ВМРО-ДПМНЕ: Неславно заврши епизодната улога на Мицкоски


Скопје, 24 јули, 2018 - 9:28 (META) 

Демократската фракција на ВМРО-ДПМНЕ денеска порача дека вчерашната лидерска средба била дебакл на ВМРО-ДПМНЕ, поради однесувањето на преговарачите од партијата, во кои е и партискиот лидер Христијан Мицкоски.

Порачуваат дека партијата мора да престане да биде заштитник на Никола Груевски.

„По вчерашниот дебакл на лидерската средба по која го видовме вистинското лице и улога на преговарачите на ДПМНЕ сега е вистински и последен момент наметнатиот лидер Мицкоски да поднесе оставка, а партијата да свика вонреден партиски Конгрес. Итно е потребно Конгресот на ВМРО ДПМНЕ, како највисок партиски орган, да донесе Когресна одлука со која ќе се определи дали ВМРО ДПМНЕ и понатаму ќе функционира како злосторничко криминално здружение исклучиво за потребите и интересите на соборениот диктатор Груевски и неговата криминална „фамилија“ или во иднина ќе дејствува како современа демократска и патриотска политичка партија. Последиците од едното или другото ги знаат сите искрени и чесни членови, симпатизери и приврзаници на партијата“, се вели во реакцијата.

Партијата бара што побргу да се одржи конгрес на кој ќе се избере ново раководство.

„Што побрзо Мицкоски поднесе оставка и се одржи вонреден Конгрес последиците по државата и партијата ќе бидат помали. Членството на партијата, мора сторого да ја почитува партиската доктрина која јасно и децидно истакнува дека: „Значењето на татковината е огромно. ВМРО-ДПМНЕ е против општество во кое „владее егоизмот на интереси“. Без нација и национална свест нема еманципација од последиците на егоизмот“, се вели во реакцијата.


СДСМ: Граѓаните достојно го прославија историскиот успех


Скопје, 16 јули, 2018 - 11:22 (META) 

На ВМРО-ДПМНЕ не и се битни ниту интересите на граѓаните, ниту иднината на државата, нивната единствена цел е одбрана на криминалот сторен од врвот на партијата, велат од СДСМ како реакција на соопштението на ВМРО-ДПМНЕ.

„ВМРО-ДПМНЕ во очај полни автобуси со граѓани и ги принудува да го бранат криминалот. Залудни се обидите на ВМРО-ДПМНЕ преку условување за амнестија да ја закочи македонската иднина. Македонија оди напред. Граѓаните се цврсто определени за влез во ЕУ и НАТО и затоа достојно го прославија историскиот успех – покана за влез во НАТО и датумот за преговори за членство во ЕУ. Граѓаните велат не за амнестија на криминалот на ВМРО-ДПМНЕ, граѓаните велат да за членство во ЕУ и НАТО, граѓаните велат да за македонската иднина“, се вели во партиското соопштение.


СДСМ: Струмица беше заборавена од ВМРО-ДПМНЕ 11 години, Мицкоски да се извини


Скопје, 3 јули, 2018 - 15:00 (META) 

Мицкоски да им се извини на граѓаните за тоа што Струмица 11 години беше заборавена од ВМРО-ДПМНЕ, се вели во реакцијата на СДСМ на повикот на лидерот на ВМРО-ДПМНЕ, на протестен марш в недела во Струмица.

Од СДСМ додаваат дека „во отсуство на конкретни ставови, политики,  решенија, идеи, Христијан Мицкоски се обидува да ги направи граѓаните нервозни“.

„Македонија добива покана за членство во НАТО, и тоа за неколку денови, на следниот Самит на Алијансата.Обезбеден е датум за почеток на преговори за полноправно членство во ЕУ. Македонија е слободна и демократска во која се враќа правдата а граѓаните и нивните потреби се во центарот на вниманието.Платите растат, инвестициите се зголемуваат, повеќе пари завршуваат кај граѓаните, економијата се движи во вистински правец на раст и развој“, се вели во соопштението на СДСМ и се додава дека токму Струмица е пример за европски град и општина која не сака да се врати назад.


СДСМ: Се враќаат долговите од криминалното владеење на ВМРО-ДПМНЕ


Скопје, 21 јуни, 2018 - 12:55 (META) 

Се враќаат долговите од криминалното владеење на ВМРО-ДПМНЕ, а Владата предводена од СДСМ одговорно управува со јавните финансии, ја намалува фреквенцијата на задолжување и редовно ги сервисира наталожените долгови, одговараат од СДСМ на денешното обвинување од ВМРО-ДПМНЕ дека власта се повеќе ја задолжува земјата и не дава отчет за тоа.

„Со дел од средствата од вчерашните аукции се враќаат стари долгови направени од ВМРО-ДПМНЕ. Овие средства се обезбедени со пониски камати во однос на аукциите во минатото кога се движеле и до 4,60%. Само во месец јуни по основ на претходни долгови, односно за претходно издадени државни хартии од вредност за исплата доспеваат речиси 30 милиони евра“, се вели во реакцијата.


„ТЕ-ТО“: Сите активности на компанијата се одвиваат согласно законите


Скопје, 20 јуни, 2018 - 15:47 (META) 

Компанијата „ТЕ-ТО“ АД Скопје ја поздравува одлуката на надлежниот Суд за одобрување на планот за реорганизација со цел финасиска консолидација на компанијата и овозможување истата да продолжи редовно да работи што е во интерес на државата, вработените, акционерите и корисниците на нејзините услуги, се вели во реакцијата на компанијата на обвинувањата од страна на директорот на „Топлификација“ АД, Димитар Хаџи-Мишев, дека „ТЕ-ТО“ отворил лажна стечајна постапка за да не го исплати долгот кон „Топлификација“ од 30 милиони евра.

Од таму додаваат дека „ваквата одлука на Судот, која е донесена согласно законските одредби, следува откако доверителите со над 85 отсто од побарувањата дадоа согласност за реализација на понудениот план за реорганизација.“

„Меѓу овие доверители е и реномирана Германска банка чиј глас беше клучен за изгласувањето на Планот. Планот за реорганизација е изготвен според објективни критериуми, согласно сите законски процедури и предвидува рамноправен третман на сите доверители кои припаѓаат на соодветна класа на доверители, како што е предвидено со закон.  Уште еднаш напоменуваме дека сите активности на „ТЕ-ТО“ АД Скопје се одвиваат согласно законите на Република Македонија. Наводите што ги изнесува во јавноста одредена заинтересирана страна во постапката се невистинити и целосно ги отфрламе. Тие наводи претставуваат обид за манипулација со пошироката јавност со крајна цел вршење притисок врз независните судски органи“, велат од „ТЕ-ТО“.