Објектот на Архивот во Тетово се осовременува со лим, граѓаните реагираат


Тетово, 8 октомври, 2018 - 16:28 (META) 

Одлуката на Архив на Македонија зградата од првата половина на 20. век во кој е сместена неговата Регионална единица во Тетово да добие нова фасада од лим, предизвика бројни реакции од граѓани и од политичка партија. По негодувањето дека со ваквата постапка се деградира архитектонската вредност на овој стар објект, инспекторите на Општина Тетово го посетија Архивот со цел да вршат увид во документацијата, но немаат надлежност да ги прекинат работните активности, бидејќи за тоа надлежност има единствено Државниот градежен инспекторат, пишува Порталб.мк.

„Груевизмот пристигна и во Тетово“, напиша на својот Фејсбук-профил екоактивистот Арианит Џафери, споделувајќи го написот на сограѓанинот Нгадњим Мемети, кој што порачува: „Зградата на објектот на градскиот архив, некаде од почетокот на 20. век, денес ќе биде завиткан со алкубонд-лим. Обезличување на градот. Скандалозно“. Реагираше и Алијанса за Албанците, која што порача дека наместо да се конзервира и зачува автентичноста на објектот, еден од симболите на Тетово, тој се претвора во една обична зграда.

„Во Тетово се осакатуваат и оние малку преостанати архитектонски вредности коишто го карактеризираа Тетово како древен град. Тоа се случува со Архивот, кој се „изолира“ со алуминиумска фасада, бришејќи ги трагите на одредени историски периоди. Каде остана заштитата на културното наследство, за што Владата доделува приближно 1 милион евра на годишно ниво за заштита, конзервирање и реставрирање на старите објекти под заштита? Наместо да се конзервира и да се зачува нејзината автентичност, овој објект се претвора во обична зграда. Министерството за култура и Општина Тетово треба да преземат одговорност!“, се вели на реакцијата на Алијанса за Албанците.

„Порталб“ ја посети зградата и разговараше со раководителот на Регионалната единица на Архивот во Тетово, Мален Матовски, кој вели дека поседуваат документи од кои се гледа дека зградата не се води како објект на културното наследство, туку е државен објект.

– Имаме имаме документи дека овој објект не е објект од културното наследство, туку е државна сопственост и се води под Државниот архив на Македонија, кој донел решение и доделил свои средства за фасадата. Ништо повеќе не можам да кажам – изјави Матовски.

Додека екипата на „Порталб“ се наоѓаше во просториите на Архивот, таму беа и претставници на Инспекторатот на Општина Тетово, кои вршеа увид во документацијата. Од Општината велат дека отишле за да ја проверат документацијата, но немаат надлежност да ги прекинат работните активности, бидејќи такви ингеренции има само Државниот градежен инспекторат.

„Инспекторатот на Општината, во рамки на спроведување на законот, има право да врши инспекција во објекти од втора категорија. Предметниот објект се води како објект од прва категорија (национална институција). Владата има усвоено програма за целосна реконструкција на таквите објекти. Ние како инспекторат, имајќи ги предвид барањата на граѓаните, излеговме во терен, но што се однесува до прекинување на работните активности, таква надлежност има единствено Државниот градежен Инспекторат. Имајќи го предвид овој факт, се обративме до сите надлежни институции да го разгледаат нашето барање како институција. Не сме против реконструкцијата, меѓутоа стоиме на ставот дека треба да се зачуваат архитектонските вредности како културно наследство“, порачаа од Општина Тетово.

 


Вучиќ: Не се мешам во внатрешните работи на Македонија, го почитувам Договорот со Грција


Белград, 2 октомври, 2018 - 9:59 (META) 

Претседателот на Србија, Александар Вучиќ по повод референдумот во Македонија, рече дека Србија има јасен став, а тоа е дека го почитува секој Договор помеѓу Грција и Македонија, но дека не може да се запостави што мисли народот и не може да се наметне ништо на сила, јавува дописничката на „Мета“ од Белград.

Тој додал дека очекувал повеќе разбирање од светот за резултатот од референдумот во Македонија и ги замолил ЕУ и НАТО да покажат повеќе почит кон „малите народи“ бидејќи како што истакнал „демократијата, Уставот и законот се тука за да се почитуваат„ и „тогаш кога одлуката на народот не им се допаѓа.“

Прашан да ги искоментира оценките од ЕУ и НАТО за референдумот за новото име на земјата, Вучиќ додал дека не е негово да оценува ниту да се меша, но дека очекувал поразлични реакации.

„Се плашам и ми се чини дека некои луѓе од светот, нас малите балкански народи не потценуваат и мислат дека баш се може да помине“, изјави Вучиќ додавајќи дека се однесуваат така, како што може да биде само како што тие мислат.


Белград: Резултатите од референдумот контрадикторни, се зависи од ВМРО-ДПМНЕ


Белград, 1 октомври, 2018 - 13:01 (META) 

Официјалната реакција на власта во Србија на исходот од референдумот во Македонија се уште нема, но аналитичарите и медиумите оценуваат дека резултатите се контрадикторни затоа што излезноста била мала, додека големо мнозинство од оние кои излегле гласале „за“ и затоа сега се е во рацете на опозициската ВМРО-ДПМНЕ, јавува дописничката на „Мета“ од Белград.

Во анализите исто така се наведува дека е отворена можноста за вонредни парламентарни избори.
Од политичарите до сега се огласи само претседателот на Лигата на социјалдемократи на Војводина, Ненад Чанак, кој им честита на граѓаните на Македонија и на премиерот Зоран Заев за „храброста во донесувањето одлуки“ и додаде дека резултатите од референдумот се сигнал дека граѓаните на Македонија сакаат својата земја да ја видат во друштво на членки на ЕУ и НАТО.

Директорката на Центарот за надворешна политика, Александра Јоксимовиќ, за РТС оцени дека во Македонија претстои борба за спроведување на Договорот од Преспа, додавајќи дека тоа сега е многу потешко и покомплицирано отколку пред референдумот, затоа што владејачката коалиција мора да бара поддршка од опозициската ВМРО-ДПМНЕ. Таа наведе дека е важно потписниците на Договорот од Преспа да останат на договореното и дека е важно Македонија да тргне понатаму на европскиот пат и евроатлантската интеграција затоа што тоа е клучно за нејзината стабилност и стабилноста на регионот.

Провладините медиуми во Србија ги пренесуваат извештаите на агенциите и дописниците со оцена дека поради ниската излезност на референдумот за името тој „пропаднал“ и покрај големите очекувања на владата во Скопје но и на меѓународната заедница. Од друга страна, независните медиуми во прв план истакнуваат дека и покрај малиот одѕив, „за“ гласале повеќе од 91 отсто од граѓаните.


Српските медиуми за референдумот: Одзивот помал од очекуваниот


Белград, 30 септември, 2018 - 20:47 (META) 

Mедиумитe во Србија објавија дека одзивот на граѓаните на референдумот во Македонија бил помал од очекуваниот, јавува дописничката на „Мета“ од Белград.

Радио-телевизија Србија (РТС) објави дека „граѓаните избирале во пакет ново име и шанса за ЕУ и НАТО, но дека референдумот е под знак прашање и дека резултатите нема да бидат валидни поради слабата излезност.“

Во извештајот РТС наведе дека сега „многу сценарија се возможни“, со потсетување дека референдумот е консултативен и дека не е обврзувачки. РТС оценува дека „малиот одзив сепак е силна порака на властите во Македонија и на меѓународната заедница и дека државата ја чека промена на Уставот“.

Регионалната телевизија „Н1“ објави дека „последиците од референдумот се неизвесни“, потсетувајќи дека е прерано да се каже „дали референдумот пропаднал и дали на повидок е нова политичка криза, а како еден од можните исходи се и вонредни парламентарни избори.“

Телевизија „Пинк“ објави дека „извесно е дека референдумот пропаднал“. Поранешниот портпарол на МВР, Иво Котевски, во изјава за „Пинк“ рече дека „македонскиот народ не ја поддржува антидржавната политика на Зоран Заев кој е подготвен да се откаже од националниот идентитет, име, историја и култура“, а аналитичарот Александар Пандов изјави дека „граѓаните не поддржуваат капитулантски договор кој ги брише името, државата и идентитетот на македонскиот народ“.


„Твитер“ за затворската казна на Груевски: Она на М! Марица?


Скопје, 23 мај, 2018 - 15:12 (META) 

Откако во Кривичниот суд беше прочитана пресудата за поранешниот премиер Никола Груевски во случајот „Тенк“ на СЈО и тој беше осуден на две години казна затвор, на социјалните мрежи се масовно коментира настанот.


МВР: На протестот запалени грчкото и албанското знаме и каменуван ЕУ Инфо центар


Скопје, 28 февруари, 2018 - 12:05 (META) 

На синоќешниот протест во Скопје организиран од Светскиот македонски конгрес и македонските заедници во Европа, биле запалени знамињата на Грција и на Албанија, а била каменувана и зградата на ЕУ Инфо центарот, соопшти денеска Министерството за внатрешни работи.

При каменувањето на објектот, од каде започна протестот „за одбрана на името“, со камен бил погоден полициски службеник во левата натколеница.

Како што информираат од МВР, во паркот Жена борец, спроти Собранието, полицијата пронашла пет шишиња со запаллива течност. Во врска со ова бил приведен 24-годишниот К.Г. од Скопје, кој по распитот е задржан во полициска станица.

Инаку, палењето на грчкото знаме на протестот денеска е една од главните теми во грчките медиуми.

„Протест на националисти во Скопје – го запалија грчкото знаме“, „Радикални Скопјани бараат итен прекин на преговорите во ОН“, „Скопје: Радикализам од националисти, црвени линии од Заев“, се дел од насловите со кои медиумите во Грција  известуваат за протестот во Скопје.

„Голем дел од демонстрантите имаа знамиња со сонцето од Виргина, додека, пак, некои од нив го запалија грчкото знаме. Меѓу учесниците беа и митрополити од расколничката црква на ПЈРМ кои му се обратија на народот“, пишува грчката новинска агенција АНА-МПА.


„Твитер“ за пресудата за Талевска: Република Условна Македонија…


Скопје, 19 февруари, 2018 - 15:53 (META) 

Откако Кривичниот суд денеска и одреди условна казна од две години затвор на новинарката Ивона Талевска, доколку во следните четири години не го повтори или стори друго кривично дело, на социјалните мрежи има многу коментари на негодување за казната која ја доби Талевска за затајување данок во случајот „Тифани“ на СЈО.

Дел од корисниците гневни велат дека нема да плаќаат веќе данок, други сметаат дека таа требала да добие ефективна казна затвор.


Арапите бесни на Трамп, а Палестинците палат негови слики и американски знамиња


Ерусалим, 7 декември, 2017 - 11:16 (META) 

Телевизиската мрежа „Си-ен-ен“ на својот профил на „Твитер“ објави дека илјадници Палестинци во Појасот Газа од синоќа палат американски знамиња и слики од претседателот Доналд Трамп. Арапскиот свет негодува.

Сите светски агенции ја пренесоа веста дека одлуката на Трамп да го признае Ерусалим за главен град на Израел предизвика осуда и жестоки реакции во муслиманските земји на Блискиот Исток.
Претседателот на Индонезија, Јоко Видодо, лидер на најголемата муслиманска земја, ја осуди одлуката на САД да го признаат Ерусалим за престолнина на Израел.

– Индонезија најостро ја осудува одлуката на САД еднострано да го признаат Ерусалим за престолнина на Израел и бара оваа земја да ја преиспита својата одлука. Тој потег може да ја разниша општата безбедност и стабилност – рече Видодо.

Премиерот на Малезија, Наџиб Разак, ги повика муслиманите во светот да се спротивстават на признавањето на Ерусалим за главен град.

– Ги повикувам сите муслимани во светот да се слушне нивниот глас и јасно да стават до знаење дека се против признавање на Ерусалим за престолнина – рече Наџиб.

Портпаролот на владата на Јордан, Мохамед ел Мимани, соопшти дека официјален Амам ја отфрла едностраната одлука на САД, нарекувајќи ја ништовна затоа што ја консолидира окупацијата на Израел во источниот дел на спорниот град.

Јорданскиот крал, Абдула Втори, изразил загриженост во телефонскиот разговор со Трамп, истакнувајќи дека игнорирањето на правата на Палестинците, муслиманите и на христијаните во Ерусалим може да предизвика ширење на екстремизмот.

Турското министерство за надворешни работи го оцени потегот на Трамп за „неодговорен“ и го повика Вашингтон да ја преиспита одлуката.

Истовремено, ирачката влада побара од САД да ја повлече одлуката за признавање на Ерусалим за престолнина на Израел за да се избегне распламтување на тероризмот.

„Предупредуваме на опасните последици од оваа одлука за стабилноста на регионот и на светот. Американската администрација мора да ја повлече одлуката за да се спречи опасната ескалација која би поттикнала екстремизам и би создала поволни услови за тероризам“, порача владата на Ирак.

И Египет ја отфрли одлуката на САД за преместување на амбасадата во Ерусалим, соопшти египетското министерство за надворешни работи и додаде дека одлуката на Трамп да го признае Ерусалим за главен град на Израел не го менува правниот статус на градот.

Министерството за надворешни работи на Иран соопшти дека Техеран сериозно ја осудува одлуката на САД, која, како што се наведува, ја крши меѓународната резолуција.

Саудиска Арабија исто така изрази противење на одлуката на Трамп, притоа истакнувајќи дека тој „ги провоцира чувствата на муслиманите“.

И Катар оцени дека одлуката за преместување на американската амбасада во Ерусалим претставува „опасна ескалација и смртна казна за сите кои сакаат мир“. Либан предупреди дека одлуката на Трамп претставува закана за мировниот процес и за стабилноста во регионот.


Доза ксенофобија и најави за референдуми од општините за стратегијата за бегалци


Скопје, 9 август, 2017 - 16:33 (META) 

Вкупно шест општини во земјава доставиле мислења до Минитерството за труд и социјална политика и до Владата во врска со нацрт-стратегијата за интеграција на бегалци и на странци 2017-2027 и за предложениот акциски план за интеграција на бегалци 2017-2027 година.

Од МТСП за „Мета“ оценуваат дека делови од образложенијата на повеќето од општините се „на линија на ксенофобија“.

Според дописот што „Мета“ го доби од Министерството за труд и социјална политика, во предвидениот рок за реакции и за мислења кој истече вчера, мислења доставиле општините Ново Село, Демир Капија, Крива Паланка, Велес, Гази Баба и Прилеп.

Повеќето од општините имаат идентични, односно негативни ставови околу стратегијата, а како аргументи во мислењата имаат наведено дека Македонија треба да остане транзитна земја за мигранти и дека општините немаат просторни, финансиски и инфрастуктурни услови да одговорат на мерките предвидени со стратегијата.

Така, во мислењето на Општина Ново Село, меѓу другото, се наведува дека со оваа стратегија државата непотребно финансиски ќе се оптовари и трајно би се нарушила демографската слика, имајќи предвид дека „во општина Ново Село живее 99,9 отсто македонско население со православна веросиповед“.

Од Општина Ново Село нагласуваат дека ќе распишат референдум за изјаснување на граѓаните по ова прашање.

Идентични се ставовите во мислењата на општините Демир Капија, Крива Паланка, Прилеп и Гази Баба, од каде велат дека прифаќањето бегалци и странци во Македонија „ќе ги дестабилизира регионот и државата во целина“.


Кај Царовска стигнале само две забелешки за стратегијата за бегалците


Скопје, 8 август, 2017 - 15:10 (META) 

Само две забелешки стигнале во Министерството за труд и социјална политика денеска, на последниот ден кога организациите или граѓаните може да даваат предлози или забелешки за нацрт-стратегијата за интеграција на бегалци и на странци 2017-2027 година и за предложениот национален акциски план за интеграција на бегалци 2017-2027 година.

До вчера немаше стигнато ниту една реакција, иако уште пред 18 дена, кога Министерството ги објави нацрт-стратегијата и акцискиот нацрт-план, објави и специјален формулар на кој може да се запишат забелешките или предлозите.

Како што информираа за „Мета“ од Министерството, едната реакција е на назначениот формулар, а е со прецизни и конструктивни предлози. Таа е на Центарот за истражување и креираање политики. Втората реакција, пак, била писмо од градоначалникот на општина Гази Баба, во која тој изнел критики за предлог-стратегијата.

Реакцијата е минимална, иако во медиумите и во јавноста, особено на социјалните мрежи интензивно се критикуваа двата документи, како намера земјата „да се наполни со мигранти и да им се обезбедат живеалишта, работни места и државјанства“.

Министерството за труд и социјална политика вчера се огласи со реакција против, како што рекоа, лажните вести и порача дека нема да се градат кампови за бегалци, нема да им се даваат државјанства и дека Македонија е држава која е транзитна станица на бегалците. Нагласи дека документот нема обврзувачко дејство.

Акцискиот план предвидува, почнувајќи од годинава да се зголеми обемот на социјални станови достапни за сместување за бегалците и да се бараат алтернативни модели. Меѓу другото, се предвидува годинава да се идентификуваат и да се обезбедат парцели на државно земјиште на располагање за инвестирање во социјални станови, при што се очекува „барем 100 единици – локации да станат достапни“.

Според нацрт-стратегијата и акцискиот нацрт-план, за бегалците треба да се обезбедат домови, образование, вработување, интеграција и стекнување државјанство.