!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Арапите бесни на Трамп, а Палестинците палат негови слики и американски знамиња


Ерусалим, 7 декември, 2017 - 11:16 (META) 

Телевизиската мрежа „Си-ен-ен“ на својот профил на „Твитер“ објави дека илјадници Палестинци во Појасот Газа од синоќа палат американски знамиња и слики од претседателот Доналд Трамп. Арапскиот свет негодува.

Сите светски агенции ја пренесоа веста дека одлуката на Трамп да го признае Ерусалим за главен град на Израел предизвика осуда и жестоки реакции во муслиманските земји на Блискиот Исток.
Претседателот на Индонезија, Јоко Видодо, лидер на најголемата муслиманска земја, ја осуди одлуката на САД да го признаат Ерусалим за престолнина на Израел.

– Индонезија најостро ја осудува одлуката на САД еднострано да го признаат Ерусалим за престолнина на Израел и бара оваа земја да ја преиспита својата одлука. Тој потег може да ја разниша општата безбедност и стабилност – рече Видодо.

Премиерот на Малезија, Наџиб Разак, ги повика муслиманите во светот да се спротивстават на признавањето на Ерусалим за главен град.

– Ги повикувам сите муслимани во светот да се слушне нивниот глас и јасно да стават до знаење дека се против признавање на Ерусалим за престолнина – рече Наџиб.

Портпаролот на владата на Јордан, Мохамед ел Мимани, соопшти дека официјален Амам ја отфрла едностраната одлука на САД, нарекувајќи ја ништовна затоа што ја консолидира окупацијата на Израел во источниот дел на спорниот град.

Јорданскиот крал, Абдула Втори, изразил загриженост во телефонскиот разговор со Трамп, истакнувајќи дека игнорирањето на правата на Палестинците, муслиманите и на христијаните во Ерусалим може да предизвика ширење на екстремизмот.

Турското министерство за надворешни работи го оцени потегот на Трамп за „неодговорен“ и го повика Вашингтон да ја преиспита одлуката.

Истовремено, ирачката влада побара од САД да ја повлече одлуката за признавање на Ерусалим за престолнина на Израел за да се избегне распламтување на тероризмот.

„Предупредуваме на опасните последици од оваа одлука за стабилноста на регионот и на светот. Американската администрација мора да ја повлече одлуката за да се спречи опасната ескалација која би поттикнала екстремизам и би создала поволни услови за тероризам“, порача владата на Ирак.

И Египет ја отфрли одлуката на САД за преместување на амбасадата во Ерусалим, соопшти египетското министерство за надворешни работи и додаде дека одлуката на Трамп да го признае Ерусалим за главен град на Израел не го менува правниот статус на градот.

Министерството за надворешни работи на Иран соопшти дека Техеран сериозно ја осудува одлуката на САД, која, како што се наведува, ја крши меѓународната резолуција.

Саудиска Арабија исто така изрази противење на одлуката на Трамп, притоа истакнувајќи дека тој „ги провоцира чувствата на муслиманите“.

И Катар оцени дека одлуката за преместување на американската амбасада во Ерусалим претставува „опасна ескалација и смртна казна за сите кои сакаат мир“. Либан предупреди дека одлуката на Трамп претставува закана за мировниот процес и за стабилноста во регионот.


Доза ксенофобија и најави за референдуми од општините за стратегијата за бегалци


Скопје, 9 август, 2017 - 16:33 (META) 

Вкупно шест општини во земјава доставиле мислења до Минитерството за труд и социјална политика и до Владата во врска со нацрт-стратегијата за интеграција на бегалци и на странци 2017-2027 и за предложениот акциски план за интеграција на бегалци 2017-2027 година.

Од МТСП за „Мета“ оценуваат дека делови од образложенијата на повеќето од општините се „на линија на ксенофобија“.

Според дописот што „Мета“ го доби од Министерството за труд и социјална политика, во предвидениот рок за реакции и за мислења кој истече вчера, мислења доставиле општините Ново Село, Демир Капија, Крива Паланка, Велес, Гази Баба и Прилеп.

Повеќето од општините имаат идентични, односно негативни ставови околу стратегијата, а како аргументи во мислењата имаат наведено дека Македонија треба да остане транзитна земја за мигранти и дека општините немаат просторни, финансиски и инфрастуктурни услови да одговорат на мерките предвидени со стратегијата.

Така, во мислењето на Општина Ново Село, меѓу другото, се наведува дека со оваа стратегија државата непотребно финансиски ќе се оптовари и трајно би се нарушила демографската слика, имајќи предвид дека „во општина Ново Село живее 99,9 отсто македонско население со православна веросиповед“.

Од Општина Ново Село нагласуваат дека ќе распишат референдум за изјаснување на граѓаните по ова прашање.

Идентични се ставовите во мислењата на општините Демир Капија, Крива Паланка, Прилеп и Гази Баба, од каде велат дека прифаќањето бегалци и странци во Македонија „ќе ги дестабилизира регионот и државата во целина“.


Кај Царовска стигнале само две забелешки за стратегијата за бегалците


Скопје, 8 август, 2017 - 15:10 (META) 

Само две забелешки стигнале во Министерството за труд и социјална политика денеска, на последниот ден кога организациите или граѓаните може да даваат предлози или забелешки за нацрт-стратегијата за интеграција на бегалци и на странци 2017-2027 година и за предложениот национален акциски план за интеграција на бегалци 2017-2027 година.

До вчера немаше стигнато ниту една реакција, иако уште пред 18 дена, кога Министерството ги објави нацрт-стратегијата и акцискиот нацрт-план, објави и специјален формулар на кој може да се запишат забелешките или предлозите.

Како што информираа за „Мета“ од Министерството, едната реакција е на назначениот формулар, а е со прецизни и конструктивни предлози. Таа е на Центарот за истражување и креираање политики. Втората реакција, пак, била писмо од градоначалникот на општина Гази Баба, во која тој изнел критики за предлог-стратегијата.

Реакцијата е минимална, иако во медиумите и во јавноста, особено на социјалните мрежи интензивно се критикуваа двата документи, како намера земјата „да се наполни со мигранти и да им се обезбедат живеалишта, работни места и државјанства“.

Министерството за труд и социјална политика вчера се огласи со реакција против, како што рекоа, лажните вести и порача дека нема да се градат кампови за бегалци, нема да им се даваат државјанства и дека Македонија е држава која е транзитна станица на бегалците. Нагласи дека документот нема обврзувачко дејство.

Акцискиот план предвидува, почнувајќи од годинава да се зголеми обемот на социјални станови достапни за сместување за бегалците и да се бараат алтернативни модели. Меѓу другото, се предвидува годинава да се идентификуваат и да се обезбедат парцели на државно земјиште на располагање за инвестирање во социјални станови, при што се очекува „барем 100 единици – локации да станат достапни“.

Според нацрт-стратегијата и акцискиот нацрт-план, за бегалците треба да се обезбедат домови, образование, вработување, интеграција и стекнување државјанство.


На ден пред истекот на рокот, никој не реагирал на стратегија за бегалците и за мигрантите


Скопје, 7 август, 2017 - 13:34 (META) 

Министерството за труд и социјална политика до денеска, еден ден пред истекувањето на крајниот рок, сè уште нема добиено ниту еден официјален предлог или реакција за нацрт-стратегијата за интеграција на бегалци и на странци 2017-2027 година и за предложениот национален акциски план за интеграција на бегалци 2017-2027 година, потврдија за „Мета“ од Министерството.

Опозициската ВМРО-ДПМНЕ денеска го повика премиерот Зоран Заев и министерката за труд и социјална политика, Мила Царовска, да присуствуваат на јавната собраниска расправа за стратегија и за националниот план. Од партијата наведуваат дека во јавноста има сериозни дилеми, прашања и незадоволство за стратегијата и за акцискиот план за мигранти, бегалци и за странци и оти тоа ќе придонесе за влошување на и онака лошата состојба со невработеноста.
Сепак, партијата своите забелешки ги нема доставено во писмена форма до МТСП, но според извори од Министерството, се очекува утре, пред истекот на рокот, да бидат доставени предлози и забелешки од организации.

Во Собранието денеска Комисијата за труд и социјална политика повторно ќе расправа за предложената стратегија и за националниот план, откако минатата недела седницата беше прекината по бурната реакција на претставничката на невладината организација „Легис“, Јасмина Голубовска. Таа реагираше на должината на воведното обраќање посветено на стратегијата и на акцискиот план, велејќи дека со тоа се троши времето на учесниците во дискусијата.

Рокот за испраќање предлози е до утре (8 август), а тоа може да се направи преку пополнување посебен формулар објавен на веб-страницата на Министерството.


ВМРО-ДПМНЕ: СЈО и СДСМ прават дефокус од гневот на народот


Скопје, 16 март, 2017 - 15:38 (META) 

Двете реакции на СДСМ и на СЈО на утринското соопштение на ВМРО-ДПМНЕ покажуваат дека авторот што стои зад нив е еден ист, се вели во контрареакцијата на ВМРО-ДПМНЕ.

„Тоа е уште еден доказ дека помеѓу СЈО и СДСМ има знак на еднаквост. СДСМ тоне и е во паника. Видоа дека нивната антидржавна и антинационална политика не поминува кај народот. Сосема очекувано беше политичкото активирање на СЈО преку неиздржани предмети, за да врши притисок врз медиумите и да направи дефокус од револтот и од гневот на народот кон тиранската платформа, кој секојдневно се слева на улиците. Нема да ви помине“, стои во соопштението на ВМРО-ДПМНЕ.

СЈО, во својата реакција, ги отфрли наводите на ВМРО-ДПМНЕ дека е поврзано со СДСМ, истакнувајќи дека е независна и професионална институција, за чие формирање во Собранието гласаа 111 пратеници, меѓу кои и пратениците од ВМРО-ДПМНЕ.


Јовановски го тргна „воинствениот“ статус со кој го запали „Фејсбук“, но најавува нова акција


Скопје, 16 февруари, 2017 - 17:02 (META) 

Актерот Владо Јовановски го избриша спорниот статус на неговиот „Фејсбук“ профил по бурната реакција и големиот број на коментари на социјалните мрежи – често преполни со говор на омраза, но денеска стави нов и напиша дека не се крие и дека „уште денес ќе го видат, а можеби и утре и задутре“.

Тој вчера на „Фејсбук“ сподели статус во кој меѓу другото напиша дека „ќе има нова војна“:

Фауст од Муртино потпишал. Своерачно го потпишал договорот. Го потпишал со крвта на загинатите бранители, од сегашните и минатите војни. На тој слуга, гласот му го дадоа триста и педесет илјади заблудени граѓани. Има и такви кои велат дека ѓаволот ги измамил, дека биле несвесни. Како и да е, после е..ње нема каење. Само, штетата што ја направи таа црпка е голема. Ќе има војна! Нова војна ќе има! Црпко, никој не сака во твојата кожа да биде.

По големиот број на реакции, особено од негови колеги, тој вчера го избриша статусот, но денеска напиша нов во кој порачува дека не се крие и дека „уште денес ќе го видат, а можеби и утре и задутре“:

Сите куртони кои онанираат на своите профили дека Владо Јовановски исчезнал или се сокрил, да ги утешам дека уште денес ќе ме видат, а можеби и утре и задутре.. Многу куртони ве има, не сакам со секого поединечно да се расправам, имам поважни работи во животот. Особено не со еден икористен презерватив, самозамислен глумец и писател. Не е хигиенски.


Серија деманти и најави за тужби од НВО и од граѓански организации за клеветите на СОС


Скопје, 6 февруари, 2017 - 11:38 (META) 

Реакциите, демантите и најавите за тужби од голем број граѓански здруженија и асоцијации против тврдењата и клеветите на „Стоп операција Сорос“ (СОС) изнесени во саботата, продолжуваат. По реакциите од вчера, денеска со барања за извинување и со деманти се јавија и здружението „Регионален центар за одржлив развој“ од Кратово, Организација на жени од Струмица, Здружението „Факултет за работи што не се учат“ и Центар за современи уметности – Скопје. Обвинуваат дека без основа и спротивно на вистината се оцрнува нивната работа, која е транспарентна и може да се провери.

Од Регионален центар за одржлив развој – Кратово велат дека од формирањето во 2003 година со средства од програмата на Европската агенција за реконструкција, досега реализирале поголем број проекти самостојно и во партнерство со други организации од Македонија и od Европа. За сите активности подетални информации можат да се најдат на www.regionalencentar.org.mk, велат од организацијата и бараат извинување од СОС, најавувајќи дека ако тоа не се случи, ќе поднесат тужби за навреда и за клевета.

Слична реакција стаса и од Здружението „Факултет за работи што не се учат“ (ФРУ). Тие велат дека тврдењата на Цветин Чилиманов на прес-конференцијата во саботата, се „злонамерни клевети, неточни, непрофесионални, нечесни и малициозни лаги, наменети за наштетување на угледот на ФРУ и на соработниците“.

Здружението побара јавно извинување во рок од седум дена, а во спротивно ќе поднесе тужби за навреда и за клевета.

Од Здружението на жени од Струмица исто така порачуваат дека груби клевети и навреди се тврдењата дека на нивната сметка легнувале милионски суми кои биле користени за партиски активности и за цели на СДСМ.

„Организација на жени на општина Струмица не е ниту „дел од партијата СДСМ“ ниту, пак, „партиски клуб на партијата“, како што наведуваат од движењето СОС. Организација на жени на општина Струмица не е наменски основана за нечии цели. Ние сме граѓанска организација основана во 1991 година, со една и единствена цел –  да ги промовира, застапува и да ги штити правата и интересите на граѓаните“, се вели во реакцијата.
Организацијата побара извинување од Цветин Чилиманов и од Никола Србов во рок од седум дена, а во спротивно ќе поднесе тужби за навреда и за клевета.

Со остра реакција се огласи и Центарот за современи уметности – Скопје, негирајќи дека е „дел од организации на чии сметки легнувале милионски суми кои биле користени за партиски активности и за цели на СДСМ“. Велат дека парите што тие ги добиваат од донатори никогаш не биле и нема да бидат користени за целите на која било партија.


По реакциите во Атина, Тајани на грчки преку „Твитер“ рече дека Александар Велики е Грк


Атина, 27 јануари, 2017 - 11:44 (META) 

Грчката политичка и дипломатска јавност се крена на нозе поради стари изјави на новиот претседател на Европарламентот, Антонио Тајани, во кои тој ја именува Македонија под уставното име и вели дека Александар Велики е предок на македонскиот народ. Министерот за надворешни работи на Грција, Никос Коѕиас, го обвини Тајани за извртување на историјата, Грција испрати протестна нота до претседателот на ЕП, а голем број грчки европратеници го критикуваа за непознавање на историјата и за голема грешка.

Тајани на „Твитер“ по грчките реакции напиша дека одлично ја познава историјата и знае дека Александар Велики бил Грк. Реакција дојде и од неговиот кабинет, од каде велат дека претседателот на Европскиот парламент го застапува ставот на ЕП дека единственото име под кое е признаена Македонија е привремената референца БЈРМ.

„Живееме во време кога некои ја пишуваат историјата на свој начин. Од Рама кој го откри Акропол и вели дека Али-паша го направи востанието во 1821 година, до новиот претседател на Европарламентот. Историјата е воено поле и треба да се користи како училиште за да се учи, а не како затвор за да се ограничи умот“, истакна Коѕиас во коментар за изјавата која Тајани ја даде пред една година при посетата на Македонија и пред да биде избран за претседател на Европарламентот.

Европратеникот на СИРИЗА, Димитрис Пападимулис, испрати протестна нота до Тајани, во која бара да се избегнуваат изјави што може да создадат конфликт меѓу двете држави и дека со избегнувањето на такви изјави се придонесува за одржување на добрососедските односи меѓу двете страни. Пападимулис во писмото истакнува дека ЕУ и Обединетите нации ја признаваат Македонија под привремената референца БЈРМ и бара Тајани и сите надлежни да се држат до тоа име.

„Како што знаете, преговорите за спорот за името се одвиваат под капата на Обединетите нации, како единствена прифатлива и договорена меѓународна рамка за оваа процедура. Користењето на кое било друго име нема никаква правна основа и ги става под знак прашалник одлуките на ЕУ и на ОН. Очекуваме од сите, вклучувајќи ве и Вас како претставник на Европскиот парламент, да ги почитувате одлуките на ЕУ и на ОН“, се вели во нотата на Пападимулис.

Тајани остро го критикуваа и ред други грчки европратеници од сите грчки политички партии, оценувајќи го како непознавач на историјата и на географијата и како несериозен. Европратеничката на Нова демократија, Марија Спираки, на „Твитер“ забележа дека е ова голема грешка на Тајани и посочи дека Македонија каде се родени Александар Велики и Филип Втори е дел од Грција.

Поумерена реакција имаше пратеникот и одговорен за надворешна политика на десничарската Нова демократија, Јоргос Кумуцакос, кој забележа дека се работи за постари изјави, пред Тајани да дојде на чело на ЕП.

„Уверен сум дека на својата нова функција Тајани ќе ги почитува целосно официјалните ставови на сите институционални органи на ЕУ, ОН, НАТО и на сите други меѓународни организации кои ја признаваат соседната држава само како Поранешна Југословенска Република Македонија“, истакна Кумуцакос, додавајќи дека се надева дека Тајани разбира дека историјата на народите не се брише и не се пишува од почеток.

Грчките медиуми, освен реакциите за старите изјави на Тајани, овие два дена интензивно ја пренесуваат и веста дека Македонија и Малта воспоставиле дипломатски односи и тоа кусо откако Малта го презеде претседателството со ЕУ. Медиумите посочуваат дека сега Кипар е единствената членка на ЕУ со која Македонија нема дипломатски односи.


Николиќ во Белград го прими Крајишник, остри реакции од српските НВО


Белград, 11 јануари, 2017 - 16:43 (META) 

Претседателот на Србија, Томислав Николиќ, денеска во Белград го прими Момчило Крајишник, еден од воените лидери на босанските Срби и осуденик на Хашкиот суд за воени злосторства, јавува дописникот на „Мета“ од Белград. За време на средбата, Крајишник му ја додели на Николиќ плакетата „Октомвриска споменица на Република Српска 1991 година“, што предизвика остри реакции кај српските невладини организации.

Како што соопштија од прес-службата на претседателот на Србија, Крајишник, кој сега е претседател на асоцијацијата „Создавачи на Република Српска“, и Николиќ разговарале за унапредување на културните врски на српскиот народ на просторите на поранешна Југославија, а особено за заштитата на правата на Србите во земјите од регионот, како и за заштитата на кирилското писмо и на српскиот јазик.

Николиќ предложи во соработка со Српската академија на науките и уметностите (САНУ) да биде одржан научен собир за српскиот јазик и писмо. Српскиот претседател се понуди да биде и покровител на научниот собир.

Граѓанската организација „Иницијатива на младите за човекови права“, по повод средбата на Николиќ со Крајишник, ја повика владата на Србија јасно да се огради од политиката на војни, злосторства и од идејата за голема Србија чии симболи се Николиќ и Крајишник.

Фондот за хуманитарно право ја осуди одлуката на Николиќ да се сретне со Крајишник и ја оцени како „недозволиво подбивање со жртвите од војните и директна спротивност со прокламираната намера на Србија да работи на помирување во регионот“.


Грчки медиуми: Црвен картон од Србија за Скопје!


Атина, 5 јануари, 2017 - 13:07 (META) 

Голем број грчки медиуми ги пренесоа изјавите на српскиот министер за надворешни работи, Ивица Дачиќ, дека Србија не требало да ја признае Македонија под уставното име.

„Српско МНР: Направивме грешка што БЈРМ ја признавме под уставното име“, „Изјава на српскиот премиер за шамарот кон Грците – Не требаше да ја признаеме БЈРМ под уставното име“, „Дачиќ: Грешка што го признавме Скопје под уставното име“, „Србија зажали што го призна Скопје како Македонија и ги навреди Грците“, се само дел од насловите на текстовите кои, главно, само општо ја пренесуваат изјавата на Дачиќ.

„Црвен картон од Србија за Скопје“ е насловот на коментарот на весникот „Етнос“, кој ја пренесува изјавата на Дачиќ. Весникот прво прашува која е причината Дачиќ сега да говори за српски грешки, да се правда кон Грција и да го менува ставот кон Македонија, а потоа го пренесува делот од интервјуто на српскиот министер за агенцијата БЕТА, додавајќи дека Дачиќ смета дека признавањето е грешка и е лут поради македонскиот став кон Косово.

„Дали да очекуваме и други иницијативи од Србија?“, прашува „Етнос“.

Порталот „Њуз 247“ коментира дека српскиот министер за надворешни работи признал, иако со задоцнување, дека е грешка тоа што Србија ја признала Македонија под уставното име и на тој начин ѝ плеснала шлаканица на Грција. Порталот „Њузбомб“ пишува дека Дачиќ покажал каење за признавањето на Македонија, забележувајќи дека таквиот чекор бил навреда за Грците, додека грчкиот „Трибјун“ забележува дека Србија зажалила што ја признала Македонија и ги повредила Грците со кои има добри односи.

Од грчкото министерство за надворешни работи не стигна официјална реакција за изјавите на Дачиќ.

Грчкиот премиер Алексис Ципрас, според грчките медиуми, планира на 30 и на 31 јануари да ја посети Србија. Оваа посета, според оценката на „Катимерини“, симболично ќе го означи почетокот на нова поактивна грчка политика и отворање кон Балканот, иако со задоцнување од две години. Таа има цел да ја засили грчко-српската дипломатска соработка во моменти кога има отворени прашања меѓу Грција, Македонија и Албанија.

Во однос на Косово, Грција отворено изразува поддршка за европската перспектива на Косово, но поради добрите врски со Србија сè уште нема пристапено кон признавање на државата. Грчките и косовските власти, по низа средби, договорија отворање на канцеларија за економски врски на Косово во Атина, но целиот процес сè уште е само на ниво на разговори.