Реактор ја промовираше веб-страницата за млади „Млади низ бројки“


Скопје, 26 септември, 2018 - 9:24 (META) 

Невладината Реактор – истражување во акција организираше настан под мотото „Да зборуваме за млади – Што е планот?“ на кој беа присутните беа дел од пет различни дискусии на теми и прашања кои ги засегаат младите, како што се образование, невработеност и социјални политики, граѓанско учество, здравје и релевантни алатки за младинско застапување.

Во рамките на дискусиите, Блажен Малески од Реактор презентираше наоди од истражувањата за состојбите со младите, капацитетите на младинските организации и алатките кои им се на располагање.

Зборувајќи пак, на темата невработеност и социјални политики, Младен Фрчковски од Министерството за труд и социјална политика ја презентираше младинската гаранција и што таа овозможува. За состојбите со младите и образованието зборуваше Мартина Илиевска од Младински Образовен Форум, а пак во име на Национален младински совет на Македонија, Илија Станковски дискутираше за младинските политики и механизмите за граѓанско учество за младите. На крајот, Мери Цветковска од ХЕРА ја нагласи потребата и важноста младите да се информираат и едуцираат за своето здравје.

Воедно, на настанот беше промовиран и новиот ресурсен веб-сајт „Млади низ Бројки“ изработен од тимот на Реактор на кој се прикажуваат сите податоци релевантни за младите во Македонија. Од Реактор велат дека целта е преку обезбедување на лесно достапни, интерактивни и визуелизирани податоци, да се поттикне информирана дискусија за положбата на младите во македонското општество, но и да се развие дебата, активности и иницијативи за младинските теми.


„Марш за женските права“: Преку родовата рамноправност до силна држава


Скопје, 8 март, 2018 - 14:20 (META) 

Околу 1.000 жени, девојки и активисти се собраа денеска на вториот „Марш за правата на жените” кој се одржа по повод Меѓународниот ден на жената. Од маршот, кој почна во Жена парк, преку плоштадот Македонија, Камениот Мост и заврши на плоштадот Филип Втори беше испратена порака дека родовата еднаквост е важен фактор кон постигнување на демократско и еднакво општество.

Целта на маршот, како што посочија организаторите, била да се подигне свеста на јавноста, но и на носителите на одлуки, за нееднаквата положба во која се наоѓаат жените во нашето општество во 2018 година.

– Во 2018 година во Република Македонија имаме највисока доенечка смртност во Европа. Причините за тоа не треба да се бараат кај жените, туку во системот за здравствена заштита и здравствените услуги кои им следуваат, но секоја година се повеќе и повеќе се скратуваат, во тоа што повеќе од 175.000 жени немаат гинеколог во својата општина, и во тоа што на повеќе од 80 отсто од жените Ромки им наплаќаат ехо прегледи кои треба да им бидат бесплатни. Товарот на неплатените домашни обврски сè уште во голема мера паѓа на грбот на жените, и додека во другите европски земји овие разлики во учеството во домашната работа се намалуваат, кај нас огромните разлики остануваат константни – изјави Снешка Илиќ од невладината „Реактор“.

Министерката за труд и социјална политика, Мила Царовска рече дека владата вистински се залага и активно вложува во родовата рамноправност.

– Наместо подароци и прослави денеска сметам дека секоја жена и секој маж треба длабоко да се запраша, што во минатата година направил за родовата рамноправност и што ќе направи во наредната. Само така ќе постигнеме едно еднакво општество кое што ќе биде инклузивно – рече Царовска.

Вицепремиерката и министерка за одбрана Радмила Шекеринска потенцираше пак, дека само со силни жени со права, права што ги штитат жените, ќе има силна правна држава.

– Како нова влада, покажавме дека на прашањата на женската рамноправност водиме различни политики. Денеска во на овие теми разговараме без комплексот дали правата на жените ќе значат намалување на важноста на семејството или на традиционалните вредности. Покажавме дека сметаме на жените и покажавме дека правата на жените се и наши права – рече Шекеринска.

Активистките на денешниот марш го осудија и насилството врз жените, за кое велат дека во нашето општество се толерира, поттикнува и прикрива, а ако излезе на виделина, неадекватно се осудува и казнува.

За крај, тие побараа родово сензитивни политики повикувајќи на солидарност кон сите жени, и потсетувајќи дека родовата еднаквост е важен фактор кон постигнување на демократско и еднакво општество.


Собранието усвојувало „европски“ закони со заобиколување на процедурата


Скопје, 18 мај, 2017 - 15:19 (META) 

Собранието усвојувало повеќе „европски“ закони заобиколувајќи ја целата процедура предвидена за законите со европско знаменце во периодот од 2014 до 2016 година. Во годишниот извештај за работата на Собранието во 2016 година се вели дека Собранието донело вкупно 14 закони што произлегуваат од Национална програма за усвојување на правото на Европската Унија и претставуваат усогласување со правото на ЕУ. Притоа, симптоматично е што 13 закони воопшто не се разгледувани на седница на Комисија за европски прашања, за нив нема европско знаменце, нема изјава за усогласеност ниту коресподентна табела, иако се прикажани како „европски“ закони.

Ова се дел од клучните наоди на истражувачите на Институтот за демократија „Социетас цивилис“ (ИДСЦС), објавени во краткиот документ за јавни политики „Ефективен собраниски надзор: Отсликување на реалноста во процесот на правна хармонизација со ЕУ“, изработен заеднички од организациите „Евротинк“, „Еко-свест“, „Реактор“ и „Зенит“.

„Загрижувачки е податокот дека Комисијата за европски прашања се заобиколува и притоа се оневозможува да ја извршува својата примарна надзорна и контролна функција, имено, следење на процесот на усогласување на националното со законодавството на ЕУ“, порачува ИДСЦС.

Исто така, според ИДСЦС, загрижувачки е фактот што ниедна од политичките партии присутни во Собранието, не ја забележала оваа практика и не интервенирала со препорака таа да се напушти.


Годишна средба на граѓанските организации корисници на ИПА2


Охрид, 16 мај, 2017 - 11:57 (META) 

Центарот за европски стратегии „Евротинк“, Центарот за истражување и информирање за животната средина „Еко-свест“, „Реактор – истражување во акција“ и Асоцијација за развојни иницијативи „Зенит“, денеска и утре, во Охрид, ја одржуваат годишната средба на корисниците на механизмот за граѓански организации ИПА2.

Овие и други поканети граѓански организации и асоцијации, во хотелот „Метропол“ во Охрид, дебатираат и бараат решенија за секторските предизвици и идеи за секторска комуникација и за вмрежување.

Исто така, ќе бидат презентирани досега спроведените активности на механизмот ИПА2, како и активностите планирани за иднина.


„Реактор“: СДСМ и ДУИ со поголема вклученост на жените отколку ВМРО-ДПМНЕ


Скопје, 6 декември, 2016 - 15:46 (META) 

СДСМ и ДУИ во споредба со другите партии во поголема мера го вклучиле родовиот аспект во своите програми, се вели во родовата анализа на „Реактор истражување во акција“ на изборните програми на политичките партии.

– Програмите на овие две партии предлагаат мерки за економско зајакнување на жените, справување со насилството врз жените и за поголема вклученост на жените во носење на одлуки, но имаат и различни аспекти кои се опфатени во програмите. ВМРО-ДПМНЕ во помала мера го вклучува родовиот концепт во предлог-мерките. Од вкупно 17 области, само во четири се споменуваат жените – се вели во анализата на „Реактор истражување во акција“.

Истражувањето, исто така, покажува дека кај помалите политички партии, Левица најмногу се осврнува на правата на жените работнички, Либерална партија ги идентификува жените како еднакви чинители во општеството и се осврнува на нивните сексуални и репродуктивни права, додека Демократски сојуз во својата програма се осврнува само на учеството на жените во процесите на одлучување.

– Од вкупно 58 поднесени кандидатски листи, само на четири листи се носителки жени. Од поднесените листи може да се заклучи дека голем број жени кои биле дел од проекти и од обуки за зајакнување на капацитетите на жените политичарки, овојпат не се ставени на кандидатските листи. Носителките на кандидатските листи се од СДСМ, Либералната партија, Левица и од Демократски Сојуз – се додава во истражувањето.


Северна Кореја го рестартираше плутониумскиот реактор


Вашингтон, 9 февруари, 2016 - 20:18 (META) 

Северна Кореја го рестартирала реакторот со плутониум кој може да обезбеди гориво за нуклеарно оружје, соопшти директорот на американската национална разузнавачка служба, Џејмс Клапер.

Тој додаде дека Пјонгјанг презел чекори за создавање интерконтинентален балистички ракетен систем.

Веста доаѓа неколку дена откако Северна Кореја лансираше ракета со долг дострел.

Северна Кореја во минатото изведе неколку нуклеарни тестови.

– Мораме да кажеме дека Северна Кореја доволно долго управува со реакторот, па во следните неколку недели или месеци може да почне да зема плутониум од потрошеното гориво на реакторот – рече Клапер.


Поради пожар, исклучен нуклеарен реактор во Белгија


Брисел, 19 декември, 2015 - 17:24 (META) 

Белгиски нуклеарен реактор во електрана на истокот од земјата, е исклучен откако избил пожар во дел од електраната, соопшти енергетската компанија „Електрабел“.

Компанијата наведе дека реакторот „тианж 1“, автоматски е исклучен синоќа откако избил пожарот во областа над нуклеарната зона, во погонот за снабдување на фабриката со електрична енергија.

Затворањето на реакторот, како што информираше компанијата, е дел од нормалната процедура во такви ситуации.

Тим стручњаци веќе работат на утврдување на причините за пожарот, а реакторот најверојатно ќе почне со работа во вторник.

„Тианж 1“ е најстар од трите реактори во таа фабрика. Отворен е во 1975 година и требало да биде затворен годинава, но белгиската влада во 2012 година одлучила да биде активен до 2025 година.