!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев: Буџетот за 2018 година е првиот чекор за економска стабилизација на земјата


Скопје, 10 ноември, 2017 - 14:25 (META) 

Владата со буџетот за 2018 година го прави првиот чекор за финансиска и економска стабилизација на Македонија, рече премиерот Зоран Заев на денешната прес-конфренција на која го презентираше предлог-буџетот на државата за следната година.

Според премиерот, буџетот за 2018 година може да одговори на поставените цели затоа што е со развојна компонента и ќе насочува повеќе пари кон граѓаните и кон економијата.

– Ова е буџет за граѓаните и за финансиска стабилност на граѓаните. Обезбедува раздвижување на економијата, нови инвестиции и раст на извозот – рече Заев, нагласувајќи дека со него продолжува концептот на Владата и на Министерството за финансии за кратење на непродуктивните трошоци.

Предлог-буџетот следната година изнесува 3,4 милијарди евра, растот на бруто домашниот производ (БДП) е проектиран на 3,2 отсто, а буџетскиот дефицит на 2,7 отсто од БДП.

Заев го нагласи зголемувањето на платите во образовниот и здравствениот сектор за 5 отсто и во одбраната за 10 отсто, подвлекувајќи дека интеграцијата во НАТО е еден од клучните услови за привлекување на нови инвестиции.

Премиерот истакна дека во буџетот е предвидена силна финансиска поддршка за компаниите, односно 1,1 милијарди денари се предвидени за домашните, а 970 милиони денари за продолжување на поддршката на странските компании кои работат во земјава.

Над 2 милијарди денари се предвидени за продолжување на проектот за гасификација, кој Заев го вброи и како дел од мерките за справување со загадувањето на воздухот.

Тој истакна дека буџетските приходи ќе се зголемат со покачувањето на акцизата на нафтата, а парите ќе одат за болници. училишта, градинки и библиотеки.


Самит во организација на „Македонија 2025“ се одржува денеска и утре во Скопје


Скопје, 1 ноември, 2017 - 14:01 (META) 

Шестиот самит во организација на платформата „Македонија 2025“ се одржува денеска во Скопје и на него учествуваат 50 врвни говорници од 25 земји, 400 делегати и 50 акредитирани медиумски претставници.

Коосновачот и член на одборот на директори на „Македонија 2025“, Мајк Зафировски, на отворањето на самитот го истакна значењето на градењето позитивна клима кон инвеститорите, како и стабилност и доверба во системот.

– Земјата мора да остане конкурентна во однос на даноци, трошоци за работна сила и квалитет на образование. Секако, треба да се поттикне и развојот на домашните компании, владеењето на правото, добрата инфраструктура и образованието. Странските инвестиции и инвеститорите од дијаспората носат капитал, трансфер на технологија и најдобри праткики и се клучни за поттикнување на економскиот развој – рече Зафировски.

Денеска се презентираа „Најдобрите практики на успешните малите држави“ од страна на претседателот на одборот за економски развој во Сингапур, Суан Хианг Ли и Пјер Гурџијан, партнер во Руско-ерменска фондација.

Според Суан Хианг Ли, клучни фактори за развојот на земјата се фокусот кон странски инвестиции, трансфер на технологија, инвестирање во човечки капитал, првокласна инфраструктура и влада ориентирана кон напредок на бизнисот.

Сингапур во изминативе 50-ина години го зголеми домашниот бруто-производ по жител повеќе од 50 пати и денес надминува 52.000 долари, со што се трансформираше во светска економска сила.


Заев од Тетово: Иднина има само заедничка, а не „чиста“ Македонија


Тетово, 5 октомври, 2017 - 21:46 (META) 

„’Чиста’ Македонија нема иднина. Иднина има само заедничка Македонија. Тоа е нашето богатство и тоа богатство треба да го искористиме, зашто е наша предност, а не слабост“, порача лидерот на СДСМ и премиер, Зоран Заев, на вечерашниот митинг во Тетово.

– Мораме да живееме заедно и Тетово е пример за тоа. Ги отворивме сите теми, затоа што ако не ги отвориме, тие ќе бидат злоупотребувани од политичарите. Продолжете да го поддржувате концептот на заедничка Македонија. Да ги заокружиме промените во Македонија и да ги испратиме Груевски и режимот во историјата – рече Заев.

Тој истакна дека СДСМ ќе ѝ ја даде поддршката на актуелната градоначалничка на Тетово и кандидатка за претстојните избори од ДУИ, Теута Арифи, и ја побара поддршката на тетовци за советничката листа на СДСМ.

Заев потсети на мерките што Владата ги реализира изминатите четири месец, истакнувајќи го напредокот и подобрувањето на односите со сите земји соседи на Македонија, кои, како што нагласи, биле нарушени од претходната власт.

– Не можете да бидете скарани со сите пет соседи. За четири месеци ги унапредивме и ги отворивме перспективите со сите соседи. Бугарија е прв сојузник на Македонија која ќе стори сè Maкедoнија да стане дел од НАТО и да ги почне преговорите за членство во Европската Унија, за време на нејзиното претседавање со ЕУ. Со Србија, и покрај сите недоразбирања, отворивме одлична соработка. Градиме пријателство и со Грција. Јас ви ветувам дека ќе најдеме решение за проблемот (со името) и притоа ќе останеме сите горди граѓани на Македонија – рече Заев.

Тој најави повеќе проекти за развој на економијата, инфраструктурата, културата, спортот и на образованието во Тетово, кои, како што истакна, ќе добијат поддршка од централната власт.

– Тетово е една од најголемите општини во Македонија и треба да добие најголема поддршка од централната власт. Ветувам дека Тетово ќе блеска – порача Заев.

Претходно денеска Заев и градоначалничката на Тетово, Теута Арифи, ја посетија гимназијата „Кирил Пејчиновиќ“, од каде најавија доградба на објектот, а ја посетија и Мала Речица, каде е предвидена изградба на ново основно училиште.


Наумов: Туризмот е трета најголема извозна гранка, треба да се искористат потенцијалите


Скопје, 27 септември, 2017 - 14:07 (META) 

Туризмот е третата најголема извозна гранка и Македонија треба да го искористи овој тренд и да најде начини за привлекување на што поголем број туристи, рече денеска заменик-министерот за економија, Кире Наумов, на доделувањето ги традиционалните награди на најдобрите хотелиери, угостители и туристички агенции по повод Светскиот ден на туризмот.

Наумов додаде дека минатата година на светско ниво меѓународните граници ги поминале една милјарда и 200 милиони патици, а очекувањата се дека до 2030 година оваа бројка ќе надмине една милјарда и 800 милиони патници.

– Предизвикот пред нас е да најдеме начин за привлекување на што поголем број туристи да ја посетат нашата држава и да ја искористиме оваа глобална сила во функција на нашиот развој – рече Наумов.


Владата со програма за пораст преку поддршка и на домашните и на странските компании


Скопје, 14 септември, 2017 - 15:13 (META) 

„Новиот план за економски пораст во земјава што го подготви Владата има цел транспаретно да ги стимулира фирмите што бележат пораст и го зголемуваат извозот, но и да ги стимулира компаниите да отвораат добро платени работни места и да отвораат развојни центри. Крајната цел е да се постигне развој од кој корист ќе имаат граѓаните“, рече премиерот Зоран Заев на денешната прес-конференција, на која заедно со вицепремиерот за економски прашања, Кочо Анѓушев, го презентираше планот за кој вели дека ќе стане владина политика по јавните дебати во следниве две-три седмици.

Планот предвидува три групи мерки насочени кон нови инвестиции, поддршка на постојни компании, како и поддршка на компании кои се рестартирани по стечај или ликвидација. Исто така, ќе се поддржува и извозот, а особено забележаниот пораст во извезени стоки, а посебни мерки се предвидени и за поддршка на малите и на средните претпријатија, кои, според премиерот, треба да креираат нови работни места, како чекор кон намалување на невработеноста, и да бидат генератор на домашниот, но и на регионалниот развој. Целта на предвидените мерки, порача тој, е зголемување на домашниот бруто-производ, а ќе се стимулираат и странските и домашните компании под речиси еднакви услови.

– Крајната цел е пораст на благостостојбата на граѓаните, преку зголемување на платите и на куповната моќ на граѓаните. Притоа, сè ќе зависи од резултатите. Кој колку ќе оствари, толку пари ќе може да земе. Ако има нула пораст, и стимулациите ќе бидат нула – рече Заев.

Како што објаснија и премиерот и вицепремиерот, новите мерки за економски пораст нема да чинат повеќе од 225-те милиони евра што претходната власт ги дала на странските инвеститори, а ќе се спроведуваат транспарентно.

– Целта се нови инвестиции, извоз и конкурентност. Основниот критериум ќе биде транспарентност и со оваа програма е исклучена секаква дискреција, а таа ќе биде ориентирана спрема резултатите. Ќе може да аплицираат сите компании, ако покажат резултат и ако ги задржат работните места. Сите мерки се насочени кон резултатите и ќе ги стимулираме компаниите да ги даваат парите за развој и за плати – рече Анѓушев.

Како што образложи тој, за новите странски инвеститори, но и за постојните, како и за домашните компании ќе се предвидуваат стимулации за новокреирани работни места од најмалку 10 отсто од платата ако таа изнесува барем 50 отсто повеќе од гарантираната минимална плата, но под услов ако најмалку 80 отсто од вработените биле евидентирани како невработени најмалку три месеци или ако тукушто го завршиле образованието. До 20 отсто од исплатената плата ќе им се враќа на странските инвеститори ако таа изнесува двојно повеќе од просечната плата. Околу една петтина од исплатената плата ќе се враќа на инвесторите кои отвориле или преселиле свои развојни центри во земјава, како и 30 отсто од инвестираните пари за тие центри.

– Но, тоа ќе се случува сè додека се постигнуваат очекуваните резултати – појасни Заев.

Премиерот додаде дека мерките ќе траат сè додека се постигнуваат бараните резултати и дека инвеститорите не ќе мора по 5-10 години, кога им истекува поддршката што ја давала претходната власт, да си заминат.

Посебни мерки, како што образложи Анѓушев, се предвидени за инвеститори кои имаат годишен приход кој надминува една милијарда долари.

За малите и за средните претпријатија, особено тие што ќе бележат брз пораст, се предвидени низа мерки за поддршка во различни аспекти, особено во поглед на развојот и на стимулација за давање повисоки плати.
Новите мерки ќе бидат дел од низа јавни дебати во следниве две-три седмици, а се очекува во октомври, откако ќе се чујат мислењата на бизнис-секторот, експертите и на јавноста, тие да бидат соодветно дефинирани и да почне да се применуваат веќе од 2018 година.


Сугарески информираше за деталите за изградбата на железничката мрежа со Бугарија


Скопје, 5 август, 2017 - 12:58 (META) 

Министерот за транспорт и врски, Горан Сугарески, денеска информираше за деталите од меморандумот за разбирање помеѓу Македонија и Бугарија за развој на железничката мрежа.

Тој истакна дека потпишувањето на овој меморандум е услов за одржлив економски пораст и развој во регионот.

– Со меморандумот се обврзуваме во наредниот период да ја доизградиме и да ја модернизираме пругата до границата со Бугарија, а исто така владата на Бугарија се обврза да ја доизгради пругата до нашата граница, со што целосно ќе го заокружиме железничкото поврзување. Вкупната должина што треба да се доизгради до границата со Бугарија е околу 89 километри. Изградбата претходно е поделена на три делници и ние како Влада ќе се движиме во рамките на таквите планови бидејќи постапките за сите три делници се веќе почнати – изјави Сугарески.

Тој додаде дека делницата Куманово – Бељаковце е во фаза на реализација, а средствата во висина од 46 милиони евра се обезбедени од Европската банка за обнова и развој.

– Пругата требаше да биде готова уште минатата година, но поради одредени проблеми со проектната документација и нерешените имотно-правни односи, градбата е пролонгирана до 2018 година. Во делот од Бељаковце до Крива Паланка во должина од 34 километри, во завршна фаза е постапката за изработка на техничката документација. Постапката за изведувач е почната и се очекува до средината на идната година да имаме избрано градежна фирма што ќе го гради овој дел од пругата. Според планираното, оваа делница ќе биде завршена до 2021 година. И за изградбата на оваа делница, средствата се веќе обезбедени од Европската банка за обнова и развој во висина од 145 милиони евра – додаде Сугарески.

За третата секција од Крива Паланка до границата со Бугарија во должина од 24 километри, во завршна фаза е изработката на проектната документација. Се проценува дека изградбата би чинела помеѓу 350 и 400 милиони евра.

– Бугарија со меморандумот се обврза модернизација на железничката линија од Софија до Ѓуешево да биде завршена до крајот на 2026 година (веќе постои пруга на оваа линија), а делот од Ѓуешево до граница со Македонија да биде завршена до крајот на 2027 година – изјави Сугарески.


Марковиќ – Заев: Се надеваме дека и Македонија ќе стане членка во НАТО


Подгорица, 2 август, 2017 - 16:22 (META) 

Премиерот Зоран Заев одржа средба со премиерот на Црна Гора, Душко Марковиќ, пред почетокот на Самитот на земјите членки на Јадранската повелба, на кој Македонија претседава и е кодомаќин со Црна Гора.

– Успехот на новата влада за напредок на Македонија е мотивација за регионот. Капацитетите на владата да ги сработи потребните реформи се видливи. Се надеваме дека и Македонија ќе стане членка во НАТО – изјавил Марковиќ.

Црногорскиот премиер истакнал дека имало голема промена во интересот на странските инвеститори за вложувања во Црна Гора откако државата стана членка на НАТО.

– Имаме стабилна влада, која ги обединува сите граѓани и етнички заедници во државата. Енергично работиме на потребните промени, вклучувајки ги сите во општеството. Ги развиваме искрено и динамично добрососедските односи. Со ова, веруваме дека ги отвораме европските перспективи и се надеваме дека ќе бидеме следната членка на НАТО – изјавил Заев.

На Самитот предвидена е и работна сесија на која свои излагања, освен Заев, ќе имаат и премиерите на земјите членки на Јадранската повелба: на Албанија, Еди Рама, на Хрватска, Андреј Пленковиќ, на Црна Гора, Душко Марковиќ, на Босна и Херцеговина, Денис Звиздиќ, како и на земјите набљудувачи, на Србија, Ана Брнабиќ, на Словенија, Миро Церар, и на Косово, Хашим Тачи.

На Самитот во македонската делегација се и министерката за одбрана, Радмила Шекеринска-Јанковска, заменик-претседателот задолжен за спроведување на Рамковниот договор и политички систем, Хазби Лика, министерот за надворешни работи, Никола Димитров, и пратеникот Стево Пендаровски.


Денеска почна бизнис-форум во Сараево на тема „Еден регион – една економија“


Сараево, 22 мај, 2017 - 16:25 (META) 

Tрадиционалниот  бизнис-форум во Сараево почна денеска и на него учествуваат преку 1.600 учесници од над 30 земји, меѓу кои и актуелни и поранешни шефови на држави и на влади, претседатели на големи корпорации, на банки и на ЕУ.

Главното мото со кое започна еден од панелите на годинешната средба е „Еден регион, една економија – поврзување и потенцијали“, соопшти Регионалниот совет за соработка (РСС), коорганизатор на средбата.

Јирки Катаинен, потпретседател на Европската комисија (ЕК) рече дека со радост го очекува претстојниот самит на Западен Балкан во Трст, кога лидерите од регионот ќе ја потврдат својата желба да се движат кон единствен регионален економски простор.

„Тоа ќе даде резултати поврзано со мотото „Едно место за инвестиции, еден регион, една економија““,  рече потпретседателот Катаинен.

Поранешниот хрватски претседател Стипе Месиќ изјави дека малите регионални економии можат да сторат многу, но не можат да ја променат големината на пазарот.

Тој додаде дека Југоисточна Европа (ЈИЕ) не може пасивно да се однесува кон меѓународните економски промени и дека мора да ја засили својата конкурентност преку подобрувањето на логистиката и на инфраструктурата.

Поранешниот претседател на Словенија, Данило Турк се заложи за пошироко вмрежување, без да се ограничуваат земјите од регионот само на концептот на поврзување во ЈИЕ, туку и на соседните региони.

„Економската интеграција на ЈИЕ е сигурен пат кон ЕУ. Економската соработка на стопанствата во ЈИЕ е императив за зголемување на инвестициите и конкурентноста на регионот“, изјави Драгана Ѓурица, експерт за конкурентност на Регионалниот совет за соработка, организатор на панелот.

Бизнис-форумот во Сараево кој се одржува осма година по ред, го следат и околу 350 домашни и странски новинари. Тоа е регионална инвестициска конференција, чија главна цел е да ги привлече странските инвеститори преку покажување на потенцијалите во Југоисточна Европа.


ССК го предлага Александар Зарков за вицепремиер за економски прашања


Скопје, 22 мај, 2017 - 15:24 (META) 

Извршниот директор на Сојузот на стопански комори (ССК), Александар Зарков е предлогот од оваа комора за вицепремиер за економски прашања.

Во нивното соопштение се вели дека на седницата на комората биле истакнати повеќе кандидати, а како најдобар кандидат бил посочен Александар Зарков.

„Александар Зарков во моментов е носител на функцијата извршен директор на ССК и ги исполнува сите истакнати критериуми за застапување на приватниот сектор како вицепремиер за економски прашања со повеќе годишно искуство во сите сектори. Вицепремиерот предложен од бизнис заедницата ќе претставува клучна алка помеѓу приватниот сектор и институциите, ќе обезбедува дополнителна стабилност и ќе спроведува мерки за подобрување на условите за раст и развој на приватниот сектор“ велат од ССК.

Свој кандидат за вицепремиер за економски прашања предложи и Стопанска комора на Северозападна Македонија, а тоа е претседателот на комората Неби Хоџа.

Се чека со свој предлог да излезе и Стопанската комора на Македонија. Се спомнува името на бизнисменот Кочо Анѓушев, но нема официјална потврда.


Промовирана првата мапа на планинарски патеки на Шар Планина


Тетово, 20 април, 2017 - 16:14 (META) 

Во Тетово денеска беше промовирана мапа на 54 планинарски патеки на Шар Планина, прва од ваков вид во Македонија. Преку мапата туристите ќе добијат информации за должината на патеката, висинската разлика, инфраструктурните објекти долж патеката и слично.

– Се работи за планинарски патеки кои и досега биле користени. Мапата треба да биде мотив плус за сите планинарски друштва што работат во регионот, да ги зачуваат планинарските патеки, да ги обновуваат, одржуваат и во иднина да се почне со истражување на нови патеки по европски стандарди – вели претседателот на планинарскиот клуб „Љуботен“, Јован Божиновски.

Мапата на планинарски патеки треба да придонесе за развојот на туризмот во овој регион.

– Мапираните патеки ќе бидат дел од туристичката понуда на Шар Планина и ќе будат мотивација да дојдат повеќе планинари на овој масив. Не им е сеедно на туристите дали ќе биде некоја патека мапирана или не и дали ќе биде средена или запустена – изјави Констатин Циривири, претседател на Асоцијацијата на професионални планинарски водичи.

Мапата на планинарски патеки на Шар Планина наскоро ќе биде достапна во сите планинарски друштва и туристички инфраструктурни објекти на шарпланинскиот масив.