Светска банка: Со просечни 2,8 проценти пораст, ќе ви требаат 70 години да ја стигнете ЕУ


Скопје, 29 ноември, 2018 - 14:52 (META) 

Светска банка смета дека Македонија има голем потенцијал за забрзување на економскиот пораст, за намалување на сиромаштијата и за подобрување на животниот стандард, особено за луѓето во најдолниот дел на распределбата на приходите.

Ова денеска беше посочено на презентација на анализата „Постигнување посветла иднина за сите“ во која се разгледува напредокот на Македонија во текот на 27 години по остамостојувањето, а беше презентиран од страна на регионалната директорка на Светска банка за Западен Балкан, Линда Ван Гелдер.

Во анализата се идентификувани три патеки кои меѓусебно се надополнуваат, за земјата да ги искористи новите можности за надминување на предизвиците. Првата е да поттикне подинамичен и поконкурентен приватен сектор, втората е вложување во луѓето за да се изгради конкурентна и приспособлива работна сила и третата се однесува на остварување економска социјална одржливост, како и одржливост на животната средина преку делотворно управување

Македонија е рангирана како земја со средни до високи приходи, но, како што беше посочено, има потенцијал да биде и со високи приходи за што треба да се спроведат одредени реформи.

Претставникот на Светска банка во Македонија, Марко Мантованели потенцира дека Македонија се наоѓа во историски период. Потенцираше дека, државата од 2.000 година има просечна стапка на пораст од 2,8 проценти и со таков пораст за 70 години би постигнала нивото на ЕУ, доколку се зголеми на 5 отсто тогаш целта ќе се оствари за 30 години.

Во однос на најавеното прогресивно оданочување, Мантованели посочи дека Македонија е една од земјите со најмали приходи и оти има простор за прогресивно оданочување, но при тоа да се има предвид да не се поткопа ефикасноста.


Четири проекти од Источна Македонија во програмата за рамномерен регионален развој


Македонска Каменица, 23 ноември, 2018 - 16:19 (META) 

Вкупно четири проекти од општините од Источна Македонија ќе влезат во програмата за финансирање во Програмата за рамномерен регионален развој за 2019 година.

На состанокот на градоначалниците во Македонска Каменица, министерот за локална самоуправа, Сујхел Фазлиу кажа дека со буџетот за наредната година, предвидени се двојно повеќе средства за рамномерен регионален развој и од 4,5 милиони евра и тој износ е зголемен на 7 милиони евра.

– Споредено со 2017 година имаме зголемување на средствата за рамномерен регионален развој за 100 отсто. Со значителното зголемување на средствата за 2019 година, се очекува и зголемување на бројот на проекти за околу 50 отсто, или пак можеби планските региони ќе се определат за помалку проекти со поголема вредност и поголемо влијание на развојниот потенцијал на планскиот регион – рече Фазлиу.

За следната година, со одлука на градоначалниците, од Програмата за рамноправен регионален развој ќе биде финансиран проектот на Општина Берово, за изградба на пешачка патека покрај реката Брегалница, Општината Пробиштип ќе гради регионален туристички Научен музеј за ретки минерали, во Зрновци ќе биде финансираната втората фаза од изградбата на Етно паркот, додека Општина Облешево – Чешино го доби проектот за изградба на фекална канализација.

Во оваа 2018 година, од Програмата за рамномерен регионален развој во осумте плански региони се финансирани 98 проекти, од кои 11 во Источниот плански регион, во вкупна вредност од 34 милиони денари.


Потпишани договори во вредност од 5 милиони евра за прекугранична соработка со Грција


Скопје, 21 септември, 2018 - 16:54 (META) 

Министерот за локална самоуправа Сухејл Фазлиу денеска во Владата изјави дека до 2020 година, за проекти за прекугранична соработка помеѓу Македонија и Грција, од страна на Европската унија се обезбедени вкупно 45,5 милиони евра, од кои 50 отсто за проекти кои што ќе бидат имплементирани во Македонија.

Средствата за национално кофинансирање ги обезбедува Министерството за локална самоуправа од буџетот на државата.

Денеска во Владата, Фазлиу и подносителите на проекти потпишаа договори за кофинансирање. Меѓу носителите на проектите се и јавни здравствени установи, Царинската управа, Центарот за управување со кризи, општини, Центарот за развој на југоисточниот плански регион, граѓански организации. Индиректни корисници се граѓаните од четири плански региони во Македонија и од пет региони од Грција.

– Во овој повик имаме на располагање 15 милиoни евра од Европската унија и 2,4 милиони евра, обезбедени од буџетот на државата, преку Министерството за локална самоуправа, за национално кофинансирање. На овој начин државата им помага и ги охрабрува потенцијалните апликанти: општини, граѓански организации, училишта, детски градинки, универзитети, болници, асоцијации и други непрофитни субјекти, да подготват проекти, да влезат во конкуренција и да обезбедат средства од Европската унија. Сите апликанти што обезбедија средства за финансирање на проектите, си помагаат на себе и на локалната заедница. Во исто време се реализираат приоритетни прашања, без да се трошат средства од општинските буџети – изјави Фазлиу.

Градоначалникот на Гевгелија, Сашо Поцков, изјави дека Општина Гевгелија досега има реализирано 10 проекти од Програмата за прекугранична соработка со Грција, во вкупна вредност од два милиони евра.

Со реализација на проектите, Царинската управа ќе добие нова опрема, со која ќе ја подобрува функционалноста и ефикасноста на граничните премини, а ќе се обезбеди енергетска ефикасност во училиштето во Валандово, во детската градинка во Радовиш.


Во селските хостели во Гостиварско гостите редовно остануваат подолго од планираното


Гостивар, 29 август, 2018 - 16:33 (META) 

Во селските хостели во Гостиварско, се случува феномен: гостите честопати остануваат подолго од планираниот датум. Ни изгледаше неверојатно, па решивме самите да провериме.
Денот е петок, за некого почеток на викенд, а за некого почеток на најзафатен период од седмицата. Ние одиме воресторанот„Тивко катче“, чија традиција датира повеќе од половина век. Откако ја поминавме реката Вардар, од лева страна на улицата, на нејзиниот десен брег, ја здогледуваме фирмата „Тивко катче“… Десетина метри подолу, ете куќа со сите нишани на традиционалните куќи од овој крај.

Иако горните катови се реновираат, приземјето е веќе ресторан украсен со разни традиционални реликти уникатни за Гостивар. Тука е и оригиналната носија на баба и на Билјана, која го води бизнисот, наследен од татко и, од кого ги учела готварските вештини типични за овој крај. Традиционалните јадења што се служат во „Тивко катче“ не може да остават рамнодушен ниту еден љубител на добрата храна, правејќи им проблем на тие што сакаат да пробат сè.
Билјана не беше сама. Беа дојдени неколкумина нејзини пријатели, сите на некој начин поврзани со угостителскиот и туристичкиот сектор.

Tivko katche Gostivar 3 - Meta

Гоце и Жаклина Матески се професионални пчелари од селото Зубовце, кои во иднина планираат да се вклучат активно во делот на промовирање на туризмот преку пакетот за практично и активно промовирање на процесот на одгледување на пчели за сите заинтересирани. Подготвени се во иднина и да присособат соби за ноќевање на заинтересираните.

На другиот дел од масата, Виктор Лазаревски раскажува за перипетиите што ги има со неговиот „Вертикал хостел“ во мавровското село Никифорово. Со капацитет од 22 лица, обезбедувајќи место за кампирање, тој раскажува дека во неговото сместувалиште уште до 2015 година ниту еден гостин кој резервирал за една ноќ не отишол наредниот ден, туку ја пролонгирал посетата барем и за еден ден.

– Ова се должи на новите пријателства што се создаваат во хостелот, честопати и во големите соби има и по осум гости, коишто не се познавале порано меѓу себе – раскажува Виктор.

Дел од групата на пријатели на Билјана беше и Владимир Ѓорѓиоски којшто го води планинарскиот дом „Царевец“ во Маврово. Почнувајќи од нула, Владимир, како и Виктор, го оставиле градот за да живеат во село и да нудат алтернативен туризам за сите што се изморени од морето. Тој заедно со девојка му посетува курс за интернационален водич за планински туризам, со цел да научи како да нудат што попрофесионална услуга на клиентите.

Билјана на шега дофрлува дека често им пречат на двајцата другари во хостелите во екот на сезоната. Но, тие како од пушка враќаат дека тоа е во нивна корист, оти категоријата туристи што одат кај нив, обожаваат вакви собиранки.

На крај, ни се придружуват и сопствениците на Ски Хут, Димитар и Косима, која што ја има оставено Германија за убавините на Маврово. Тие веќе се целосно навлезени во користење на ИТ технологијата за привлекување на туристите. Сепак, еден од главните проблеми им е како да ги занимават туристите, за нивниот престој да се пролонгира од сегашните во просек два дена, на повеќе денови.

Tn

Затоа и нив ги заинтригира и заинтересира идејата за креирање заеднички продукти на членовите на мрежата во рамките на Проектот за зајакнување на иновативен туризам – СТЕП, кој е финанциран од Европската Унија, а спроведен од Фондацијата за интернет и општество „Метаморфозис“, заедно со Центарот за регионален развој на Полог и Советот на округот Елбасан во Албанија.

Целта на проектот е да се промовира енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на порастот и стимулирање на отворањето нови работни места во прекуграничната туристичка зона помеѓу Македонија и Албанија, во подрачјето на Гостивар и Елбасан.

Општината Гостивар ќе обезбеди информации, експертиза и искуство, како и ќе ги поттикне малите и средни претпријатија и сите заинтересирани страни активно да дадат придонес кон реализирање на целите на проектот.

Проектот е финансиран од Програмата за меѓугранична соработка на Европската Унија (ИПА 2).


Фирмите ќе можат да користат 100 милиони евра од ЕИБ на есен


Скопје, 31 јули, 2018 - 9:36 (META) 

100 милиони евра евтини кредити од Европската инвестициска банка ќе им станат достапни на малите и средни претпријатија, на есен информираат од Министерство за финансии. Од таму додаваат дека министерството изготвило Закон за гаранција, кој ќе се најде денес на владина седница, по што ќе биде доставен до Собранието.

„Откако Собранието ќе го усвои законот, ќе се потпише договор помеѓу Европската инвестициска банка и Македонската банка за поддршка на развојот, како и Министерството за финансии во својство на гарант на заемот. Со потпишување на договорот 100 милиони евра ќе станат достапни за малите и средни претпријатија. Македонската банка за поддршка на развојот ќе ја пласира оваа кредитна линија преку деловните банки, како посредници до крајните корисници. Со ова ќе се обезбеди свеж капитал за малите и средни претпријатија, ќе се поддржат нови проекти, нови вработувања, ќе се зголеми ликвидноста во стопанството и ќе се зголеми извозот“, се вели во соопштението на Министерство за финансии.


Потпишани договори од 4,5 милиони евра за 98 проекти за развој на руралните средини


Скопје, 9 јули, 2018 - 16:32 (META) 

Денеска, во Владата беа потпишани договори за имплементација на 98 нови проекти за развој на планските региони, на селата и на подрачјата со специфични развојни потреби, информираа од таму.

Проектите се финансирани од буџетот на државата, конкретно од Програмите за рамномерен регионален развој на Министерството за локална самоуправа и на Бирото за регионален развој, во вкупна вредност од 280 милиони денари (4,5 милиони евра). Корисници на средствата и имплементатори на проектите се општините и Центрите за развој на планските региони.

„Владата за оваа година, средствата за рамномерен регионален развој ги зголеми за над 50 отсто. 4,5 милиони евра оваа година ќе бидат вложени во проекти кои што ги предложија општините и планските региони врз основа на нивните приоритети. Главно станува збор за инфраструктурни проекти или проектна документација за поголеми проекти, со цел да можат да се обезбедат дополнителни средства и од донаторски извори или од ИПА-програмата на Европската унија“, рече министерот за локална самоуправа, Сухејл Фазлиу.

Од вкупните средства, за проекти за развој на планските региони се издвоени 196 милиони денари. Проектите за развој на подрачјата со специфични развојни потреби се финансирани со 56 милиони денари, а проектите за развој на селата со 28 милиони денари.

Заменик-министерот Дејан Павлески ги повика градоначалниците на поефикасно искористување на средствата, на транспарентен начин. Тој истакна дека во иднина ќе се работи не само на зголемување на ресурсите за рамномерен регионален развој, туку и на решавање на прашањата преку иновативни проекти.


Поддршка од ЕК за реформите во јавните финансии


Скопје, 31 мај, 2018 - 13:52 (META) 

Постои силна политичка волја за подобрување на управувањето со јавните финансии, беше истакнато денеска од страна на Европската комисија, на настанот за спроведување на Програмата за реформи во јавните финансии (ПФМ) во Министерство за финансии.

Пред претставници на Комисијата, вклучително и амбасадорот на ЕУ во Македонија, Самуел Жбогар, се обрати министерот за финансии Драган Тевдовски, кој ја поздрави заложбата на институциите во изработка и спроведување на реформите, кои како што истакна се работат со засилено темпо.

„Согласно Програмата предвидено е во текот на годината да се направат крупни реформи во фискалниот сектор. Во рамки на тие реформи се воведувањето на среднорочно буџетирање, новиот закон за јавни набавки, даночни реформи, закон за јавна внатрешна финансиска контрола и континуирано унапредување на фискалната транспарентност“, информираат од Министерство за финансии.

Реформите во Програмата се структуирани во рамки на седум приоритети чија цел е подобрување на ефикасноста и ефективноста на јавните трошења преку фискална дисциплина, одржливост на долгот и ефикасно, транспарентно и современо управување со јавните финансии, одржлив развој и благосостојба на граѓаните.


Азески: Потребно е итно зајакнување на индустријата за одржлив економски раст


Сарево, 18 мај, 2018 - 9:42 (META) 

Македонија треба итно да ја зајакне основата на својата индустрија со цел да се овозможи одржлив раст на вкупната економија, рече претседателот на Стопанска комора на Македонија, Бранко Азески на 13. Меѓународен симпозиум за корпоративно управување на тема: „Дигитална економија – двигател на економскиот раст“, во Босна и Херцеговина.

Тој додаде дека иднината треба да се гради врз ефикасноста на технолошката опременост, за што, главен предуслов се инвестициите.

„Во Македонија постојат повеќе иницијативи кои во моментов се реализираат и кои имаат за цел да ги поддржат бизнисите во остварувањето на забрзан технолошки развој и воведување иновации, каде целта на ваквата поддршка е создавање нови работни места, економски раст и развој, како и подобрување на бизнис-климата преку развој на конкурентските способности на компаниите“, изјави Азески.


Отворен повик за 21 милиони евра за развој на туризмот преку инфраструктурни инвестиции


Скопје, 16 март, 2018 - 12:57 (META) 

Владата во соработка со Европската унија и Светска банка денеска објавија втор повик за искористување на 21 милиони евра во рамките на Проектот за локална и регионална конкурентност.

18 милиони евра се обезбедени од ИПА-програмата на Европска комисија, а три милиони евра се од буџетот, повикот е администриран од Светска банка.

Преку овој проект ќе се овозможи општините, асоцијациите и приватните компании да аплицираат за средства со кои ќе се поддржат клучни инвестиции и во инфраструктурни и неинфраструктурни проектни активности, а кои ќе придонесат за поконкурентен и одржлив локален и национален туристички развој.

Вицепремиерот, Кочо Анѓушев рече дека најголем интерес очекува од општините, за да си ја подобрат инфраструктурата од која најголем интерес имаат сите граѓани.

„Се сретнав со речиси сите градоначалници на кои им укажав дека кога ќе излезе овој повик треба да излезат со готови проекти, а не сега да ги изготвуваат. Добар дел од нив, веќе ме информираа дека се подготвени. За општините кои немаат капацитети, има пари за техничка помош за да направат проекти“, рече Анѓушев.

Раководителот на секторот за соработка на Делегацијата на Европска унија, Никола Бертолини рече дека државата е преубава, но има многу ѓубре.

„Во еден преубав предел од државата се изгубив. Немаше патокази, но имаше многу ѓубре. Наидов на диви депонии. Но тоа треба да се спречи. Овие граѓани заслужуваат подобро опкружување. Очекувам следните 18 месеци општините да работат дење и ноќе за да се постигнат резултати и да имаат готови проекти за да аплицираат“, рече Бертолини.

Директорот на канцеларијата на Светска банка, Марко Мантованели рече дека туризмот е значајна гранка за развој на економијата и тој учествува со 10 проценти во светскиот БДП.

„Преку конкурентноста го гледаме развојот на туризмот. Земјата има голем потенцијал и заслужува туристички да биде препознаена во светот. Студијата на Светска банка објавена лани покажува дека ефектите од туризмот се поддршка на економскиот развој, вработувања, заштита на околината, вкрстување на културните вредности. Но, туризмот треба да биде одржлив за да ги даде потребните резултати. Како несакани последици може да биде лошата употреба на природните ресурси“, рече Мантованели.

Со овие финансиски средства предвидено е подобрување на квалитетот на услуги, јакнење на капацитетите за водење и вештини на лиценцирани туристички водичи, собирање на отпад и култура на управување со отпад, сигнализации и попатни информации на патиштата, попатна инфраструктура за посетители.

За општините се предвидени еден, односно три милиони евра грант доколку имаат регионален пристап, за малите и средни претпријатија, доколку има здружување предвидени се 300.000 евра.


Швајцарската влада ќе помогне со 5,4 милиони франци за регионален развој


Скопје, 26 февруари, 2018 - 16:35 (META) 

Министерот за локална самоуправа, Сухејл Фазлиу и амбасадорката на Швајцарија во Македонија, Сибил Сутер Тејада го претставија новиот проект „Оддржлив и инклузивен рамномерен регионален развој“, финансиски поддржан од швајцарската Влада.

Фазлиу нагласи дека вкупната вредност на проектот е 5,4 милиони швајцарски франци, а ќе го имплементираат Министерството за локална самоуправа и канцеларијата на вицепремиерот за економски прашања.

Проектот во првата компонента ќе помогне за подобрување на нормативната рамка и подготовка на нов стратешки документ 2020-2029, во втората компонента ќе биде поттикнато граѓанското учество за утврдување на регионалните приоритети и во третата компонента ќе бидат финансирани инфраструктурни проекти кои што како приоритет ќе бидат избрани во консултација со граѓаните. Проектот ќе се имплементира до крајот на 2020 година.

– Политиката на рамномерен регионален развој се спроведува заради постоење на реален проблем, односно постоење на големи разлики во развојот на регионите и последиците врз квалитетот на живеење на граѓаните, особено на тие од помалку развиените плански региони – рече Фазлиу.