Владата го разреши директорот на БЈБ, Лазо Велковски


Скопје, 15 август, 2018 - 9:33 (META) 

Владата го разреши директорот на Бирото за јавна безбедност, Лазо Велковски. До именување нов директор со БЈБ ќе раководи досегашниот заменик директор, Бесир Деари.

Министерот за внатрешни работи, Оливер Спасовски, поднесе предлог за разрешување на Велковски откако на Илинден, без решение, со службен џип и обезбедување, ја испратил ќерка си во Грција. Тој сам направил проценка оти безбедноста на ќерка му е загрозена и треба да патува со полициско возило, но за одлуката немал решение.

Велковски работи 27 години во МВР и кариерата ја поминал и во Агенцијата за разузнавање, а по разрешувањето премиерот Зоран Заев рече дека најверојатно ќе остане вработен во МВР.

Велковски го водеше Бирото за јавна безбедност 1 година, и дојде како наследник на Митко Чавков.


Владата денеска ќе одлучува за разрешувањето на Велковски


Скопје, 14 август, 2018 - 9:37 (META) 

На денешната седница Владата треба да решава за предлогот на министерот за внатрешни работи, Оливер Спасовски, за разрешување на Лазо Велковски, директорот на Бирото за јавна безбедност (БЈБ).

Спасовски го поднесе предлогот за разрешување пред една седмица, откако Одделот за внатрешна контрола и професионални стандарди утврдил дека џипот „ренџ ровер дискавери спорт“ со регистарски таблички СК-9559-АЛ бил пратен во Грција со налог потпишан од директорот на јавна безбедност, а со возилото управувал вработен во Одделот за заштита на определени личности и објекти. Џипот, според пишувањата, ги превезувал ќерката на Велковски и нејзини другарки.

Премиерот Заев вчера по одбележувањето на годишнината на Рамковниот договор, потенцираше дека директорот на Бирото за јавна безбедност, Лазо Велковски иако е професионалец, направил грешка и поради тоа треба да поднесен одговорност и потенцираше дека предлогот за неговото разрешување на е внатре партиска пресметка.

– Секако јас верувам дека тој ќе остане и понатаму значаен фактор во МВР заради тоа што е важен со неговото искуство и е од помош на државата – нагласи премиерот.


Заев: Суетата ја ставам на страна, пријателството со Бугарија треба да се негува и доградува


Скопје, 13 август, 2018 - 15:01 (META) 

Правам сè за да изградам пријателство. Гледате дека моите суети ги ставам на страна, сакам искрено да градам пријателство. Бугарија е партнер на Македонија и тоа го покажа неколку пати и не е во ред тоа да го заборавиме, рече премиерот Зоран Заев на новинарско прашање дали изјавата на бугарскиот премиер Бојко Борисов ја гледа како закана за евроатланските аспирации на Македонија.

– Апелирам сите заедно да ги тргнеме политичките интереси, голиот популизам и она што навистина не предизвикува да бидеме недоволно внимателни. Договорот со Бугарија го потврдивме преку нашите потписи но треба тоа да го негуваме и доградуваме и постојано да тежнееме кон градење пријателство кое од обостран интерес на двете земји и двата народи и на генерациите кои што доаѓаат. Треба сите да внимаваме и да придонесуваме во тоа заедничко пријателство – рече Заев кој на прашањето дали двете земји конечно ќе се договорат за Илинденското востание тој одговори дека веќе одбележуваме дел од нашата заедничка историја.

Премиерот Заев потенцираше дека директорот на Бирото за јавна безбедност, Лазе Велковски иако е професионалец, направил грешка и поради тоа треба да поднесен одговорност и потенцираше дека предлогот за неговото разрешување на е внатре партиска пресметка.

– Станува збор за понесување одговорност кое граѓаните го очекуваат од политичарите и носителите за јавните функции. Господинот Велковски е еден од моите први соработници и соработници на министерот Оливер Спасовски, но грешката е направена и одговорноста мора да се понесе. Секако јас верувам дека тој ќе остане и понатаму значаен фактор во МВР заради тоа што е важен со неговото искуство и е од помош на државата. Спасовски даде предлог за разрешување, владата на утрешната седница ќе го разгледа предлогот а потоа ако владата одлучи да постапи по овој предлог ќе разгледуваме и можни решенија. Господинот Велковски е припадник на СДСМ и секогаш важел за сплотувачки фактор во СДСМ. СДСМ е единствен и сплотен посебно пред вакви важни моменти – изјави Заев и додаде дека до сега не размислувале за нови имиња кои би можеле да го заменат Велковски и напомена дека ќе треба време да се најде вистинско решение преку добра анализа.

Во врска со кампањата за референдумот Заев вели дека таа дополнително ќе се засили во јавноста и ги повика граѓаните да го погледнат договорот и да видат дека идентитетот е потврден а дека македонскиот јазик е загарантиран.

– Владата утре на седница ќе дебатира и ќе донесе одлука како да помогне во информативниот дел на кампањата за можат овие 3 проценти кои што го прочитале Договорот да станат 100 проценти – информираше Заев.


Спасовски предложи разрешување на шефот на БЈБ, Велковски, поради скандалот со џипот


Скопје, 7 август, 2018 - 16:38 (META) 

Министерството за внатрешни работи соопшти дека министерот Оливер Спасовски до Владата ќе поднесе предлог за разрешување на директорот на Бирото за јавна безбедност (БЈБ), Лазо Велковски, поради скандалот со службениот џип. Велковски потпишал налог за патување, но немало решение за службено патување, велат од МВР.

Како што велат од МВР, Одделот за внатрешна контрола и професионални стандарди утврдил дека џипот „ренџ ровер дискавери спорт“ со регистарски таблички СК-9559-АЛ бил пратено со налог потпишан од директорот на јавна безбедност, а со возилото управувал вработен во Одделот за заштита на определени личности и објекти.

Во својот исказ, директорот на БЈБ потенцирал дека ангажирањето на службеното возило го направил поради тоа што подолго време имало закани кон него и неговото семејство. Според соопштението, Велковски рекол дека бидејќи бил работно ангажиран во врска со прославата на 2 август и заради нарушувањата на јавниот ред и мир во текот на прославата на Мечкин Камен, проценил дека е небезбедно неговата ќерка да патува сама, па го ангажирал припадникот на неговото обезбедување да го вози џипот.

„Во овој случај целосно не било спроведена процедурата за службено патување и покрај налогот за патување, не е потпишано решение за службено патување. Заради ова, министерот за внатрешни работи  Оливер Спасовски до Владата ќе поднесе предлог за разрешување на директорот на Бирото за јавна безбедност, Лазо Велковски“, соопштија од МВР.


Судии се јавувале кај Караџовски да прашаат дали навистина ќе има масовни разрешувања


Скопје, 15 февруари, 2018 - 13:04 (META) 

Судскиот совет на денешната седница нема да одлучува по барањата за разрешување на судии, туку ќе ја почне постапката со избор на членови на Советот кои ќе ги застапуваат барањата за разрешување и ќе се бираат комисии кои ќе истражуваат дали има основи за разрешување, по што ќе реферираат до Судскиот совет.

Ова денеска го соопшти претседателот на Судскиот совет, Зоран Караџовски, кој ги оцени како „лажни вести“ информациите во медиумите дека Советот ќе расправа за разрешување на над 100 судии и појасни дека станува збор само за пет барања за утврдување на одговорност на судија, односно за разрешување.

Шпекулациите дека Судскиот совет ќе расправа за разрешување над сто судии ги вознемирило судиите и претседателите на судовите, кои, како што рече Караџовски, се јавувале во Советот за да прашаат дали е ова точно.

– Денеска за оние предмети за кои е доставено барање за утврдување на одговорност на судија од веќе укинатиот Совет за утврдување на факти ќе одлучуваме кој член на судскиот совет ќе го застапува соодветното барање бидејќи тој орган не постои. Потоа се формира комисија од три члена по пат на жрепка, која понатаму ќе има обврска да расправа да поканува, да истражува. Кога ќе ја заврши работата ќе треба да достави извештај до сите членови на судскиот совет на седница – изјави Караџовски.

Одговарајќи на новинарско прашање, тој рече дека нема рокови до кога треба комисиите да ја завршат работата, меѓутоа, како што додаде, во измените на Законот за Судскиот совет се предвидени добри механизми, поради што смета дека постапката во комисиите нема да трае долго.

– По завршувањето на работата на комисијата, рокот во којшто треба да достави извештај до Судскиот совет е 15 дена. Јас, како претседател на Судскиот совет ќе инсистирам, не да се мешам во работата на таа комисија што ќе ја избереме денеска, меѓутоа во најкраток можен рок да си ја заврши својата работа, за сите предмети – појасни претседателот на Судскиот совет.

Инаку, како што појасни Караџовски до овој момент до Судскиот совет има вкупно 217 претставки и поплаки доставени од граѓани и правни лица за работата на судии или претседатели на судови, а во оваа бројка се и незавршените и незапочнати поплаки и претставки од веќе укинатиот Совет за утврдување на факти.

Тој појасни дека претставки и поплаки се една работа, а барања за утврдување на одговорност на судија, односно разрешување е друга работа.

Просекот на разрешени судии во изминатите 4-5 години, изјави Караџовски, бил еден до еден ипол судија, за разлика од, како што додаде, претходниот период пред десеттина година, кога имало „поголем број на такви разрешувања“.


Судскиот совет треба да одлучува по 110 барања за разрешување на судии


Скопје, 13 февруари, 2018 - 12:52 (META) 

Судскиот совет на седници во наредниот период, од кои првата е закажана во четврток, траба да расправа за 110 барања за поведување на постапка за утврдување на одговорност, односно за разрешување на судии, пренесува „Телма“.

Најмногу иницијативи за разрешување на судии се поднесени од Советот за утврдување на факти и за поведување постапка за утврдување одговорност на судија, но и од други подносители.

Како што пренесува телевизијата, три претставки од Специјалното јавно обвинителство и уште неколку од адвокати и други странки во постапките има против судијката Моника Бахчовановска.

Судскиот совет треба да расправа и по иницијативите за утврдување на одговорност и разрешување на членовите на петчлениот Кривичен совет на Врховниот суд – Јово Вангеловски, Рахилка Стојковска, Ристо Катавеновски, Фаик Аслани и Џемали Саити.

Според најавата за седницата в четврток на веб-страницата на Судскиот совет, расправата по барање за поведување на постапка за утврдување на одговорност за судија и донесување одлука е шеста точка на дневниот ред на седницата.

Расправата по оваа точка, како што стои во соопштението, ќе се води зад затврени врати, односно нема да биде дозволено присуство на медиумите.


Отказ за судијата кој не носи тога, предвидуваат новите законски решенија


Скопје, 31 јануари, 2018 - 10:38 (META) 

Судија освен за партиска и политичка активност ќе може да биде разрешен од функцијата и за неноносење судска тога, како „потешка дисциплинска повреда“. Ова го предвидуваат новите измени на Законот за судовите, објавени на Единствениот национален електронски регистар на прописи (ЕНЕР), како дел од реформите во правосудството од планот „3-6-9“ на Владата.

Судиите и досега, со актуелното законско решение, ризикуваа да добијат дисциплинска мерка за неносење судска тога, но, санкцијата за тоа беше писмена опомена, јавен укор и намалување на платата за 15 до 30 отсто во период од еден до шест месеци.

„Примање подароци и други користи во врска со судиската работа“ и со новите измени останува да се санкционира со дисциплинска мерка – опомена, укор, намалување на платата и „упатување на дополнителни часови за стручна обука во Академијата за судии и јавни обвинители“, која е нова одредба.

Со измените се менуваат и условите за судиите-поротници. Поротник ќе може да се стане и со средно образование, наместо со високо, како што е сега. Останува обврската за обука на поротниците во Академијата за судии и јавни обвинители, но, со измените нема да мора да полагаат завршен испит, туку ќе им се издава сертификат за завршена обука.

„Досегашното решение со кое се бараше високо образование за судија поротник како и полагањето на дополнителни испити се покажа како неефикасно и доведе до недостаток од судии-поротници во сите судови во државата“, стои во образложението на предлог-измените.

Измени има и во возрасната граница – поротник може да биде лице кое не е постаро од 60 години, наместо 64 како што е во актуелниот закон.

Со новите предлог-решенија, Министерството за правда ќе врши надзор над спроведувањето на Судскиот деловник, конкретно на функционирањето на Автоматизираниот компјутерски систем за управување со судските предмети (АКМИС).

Надзорот ќе го врши постојана комисија, што ќе работи по годишен план. Во комисијата ќе бидат двајца „дипломирани правници со најмалку 10 години стаж на правни работи по полагање на правосуден испит и двајца информатичари обучени за работа на АКМИС.

Предвидена е и можност министерот за правда, кога ќе оцени дека е потребно, да формира комисија од надворешни експерти за проверка на функционалноста на АКМИС.

Изманите предвидуваат и Министерството за правда да биде корисник на статистичките податоци од базите на податоци од информатичките системи во правосудството, „согласно неговата надлежност за подготвување на закони од областа на правосудството, прибирање на статистички податоци за работата на правосудните институции, надзор над ажурното вршење на работите во судот и спроведувањето на судскиот деловник“.

Инаку, законот е уште во фаза на подготовка, кој заврши на 30 јануари 2018 година и допрва треба да биде утврден од Владата и усвоен од Собранието.


Раскол во Беса: Два централни одбора, две најави за конгрес, нејасно е кој ја води партијата


Скопје, 6 јануари, 2018 - 19:35 (META) 

Опозициската партија Беса е во длабок раскол по двата паралелни собири на највисокиот партиски орган, Централниот совет – еден во Скопје и друг во Тетово – на кои беа донесени дијаметрално спротивни одлуки. На собирот во Скопје од лидерската позиција е сменет Билал Касами, заради „политичкиот пад на партијата“ и е најавен конгрес на 21 февруари, а во Тетово е донесена одлука за свикување конгрес три дена подоцна до кој со партијата и натаму ќе раководи актуелниот лидер.

Паралелните собири следат откако  оставка на потпретседателската функција во партијата поднесе експратеникот Зеќирија Ибрахими.

На седницата на Централниот совет оддржана во Скопје, на која присуствувале 64 од вкупно 106 членови на овој највисок партиски орган, за привремен претседател на партијата е назначен најстариот партиски функционер,пратеникот Неџбедин Каремани. Од собирот во Скопје за 21 февруари е закажан и конгрес на партијата, на кој ќе треба да се избере новото раководство.
Во Тетово, присутните донеле одлука конгресот да се оддржи на 24 февруари, а дотогаш со партијата и натаму да раководи актуелниот претседател Билал Касами.

На парламентарните избори во декември 2016 година Беса освои пет пратенички места. Пред локалните избори, со најавите на своите градоначалнички кандидатури, Касами и Ибрахими поднесоа оставки на своите дотогашни пратенички функции.


Лилјана Спасоска избрана за в.д. државен јавен обвинител


Скопје, 29 август, 2017 - 13:31 (META) 

На денешната седница Советот на јавни обвинители за вршител на должноста државен јавен обвинител ја избрал Лилјана Спасоска, која ќе го менува разрешениот Марко Зврлевски до изборот на нов јавен обвинител на Република Македонија.

Спасоска и според годишниот распоред на Јавното обвинителство, беше назначена за заменичка на Зврлевски.

Собранието на Република Македонија на 17 август го разреши Зврлевски. На 22 август Владата ја почна постапката за избор на нов државен јавен обвинител, односно му предложи на Собранието да распише оглас за именување нов јавен обвинител.

Предлогот на Владата е ставен на дневен ред на првата наредна седница на Собранието, закажана за 4 септември.


Изборот на заменик на Зврлевски одложен, Аневски не обезбеди кворум


Скопје, 24 август, 2017 - 12:28 (META) 

Советот на јавни обвинители поради немање кворум ја одложи денешната седница за избор на заменик на разрешениот државен јавен обвинител Марко Зврлевски, кој ќе треба да ја врши оваа функција до изборот на нов Јавен обвинител.

Седницата, како што соопшти претседателот на Советот на јавни обвинители, Петар Аневски е презакажана за 29 август.

Аневски изјави дека привремениот шеф на државното јавно обвинителство ќе биде избран од редот на постојните јавни обвинители во државното јавно обвинителство и дека обвинителката од скопското јавно обвинителство, Гордана Гешковска, не влегува во изборот на заменик на Зврлевски до именување на нов Јавен обвинител во Собранието на Република Македонија.

Собранието во четвртокот, минатата недела го разреши Марко Зврлевски од функцијата државен јавен обвинител, а во вторникот оваа недела, Владата ја почна постапката за избор на нов шеф на Јавното обвинителство. Сега на потег е Собранието кое, на предлогот на Владата, треба да распише оглас за именување на државен јавен обвинител.