!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Могерини ги поканила премиерите на балканските земји на вечера, меѓу нив и Заев


Брисел, 17 мај, 2017 - 19:11 (META) 

Високата претставничка за надворешна политика и за безбедност на Европската Унија, Федерика Могерини, ги поканила премиерите од шест балкански земји на неформална вечера на 24 мај во Брисел, објави порталот „Нова ТВ“.

Могерини го очекувала и лидерот на СДСМ, Зоран Заев, без разлика дали дотогаш ќе било финализирано формирањето на новата влада на Македонија.

Тема на неформалниот состанок ќе биде ситуацијата во регионот во светло на последните настани и да се разговара како понатаму.


Беса: Ќе бидеме дел од разговорите за нова влада


Скопје, 17 мај, 2017 - 16:16 (META) 

Движењето Беса останува посветено во процесот на решавање на кризата и ќе биде дел од разговорите за формирање на новата влада, велат од партијата по повод доделувањето на мандатот за составување нова влада.

„Денеска, кога господинот Иванов го даде мандатот за да почнат разговорите за формирање на новата влада, Движењето Беса констатира дека благодарение и на нејзината посветеност, конечно се создаде можност за решавање на кризата. Денеска дојде до израз волјата на новото мнозинство во Собранието на Република Македонија и политичкиот фактор почна да работи во интерес на граѓаните кои се преморени од оваа политичка криза“, стои во соопштението на партијата.

Од Беса нагласуваат дека тие како партија не дозволиле „да се измислат работи кои не се предвидени со Уставот и со законите на земјата“ и на тој начин спречиле да се создадат преседани кои можеа да остават последици во иднина.

„Затоа, како и досега, Движењето Беса останува посветено во процесот на решавање на кризата, водејќи разговори за да го преземе својот дел од политичката одговорност“, нагласуваат од Беса.


Меркел и Путин се сретнаа во Сочи


Сочи, 2 мај, 2017 - 15:44 (META) 

Германската канцеларка Ангела Меркел допатува во Сочи, на својата прва посета на Русија по две години, за да разговара со рускиот претседател Владимир Путин.

Темите за кои ќе разговараат се претстојниот самит Г20, но и ситуацијата во Украина, Сирија и во Либија, како и билатералните односи.

Портапролот на германската влада, Штефeн Зајберт, претходно изјави дека Меркел и Путин ќе имаат две рунди разговори.

Меркел и Путин последен пат се состанаа во ноември 2016 година во Берлин, кога се разговарало за кризата во Источна Украина.


Иранскиот претседател во посета на Москва


Москва, 28 март, 2017 - 12:43 (META) 

Претседателот на Иран, Хасан Рохани, денеска во Москва ќе се сретне со рускиот претседател Владимир Путин, а глвна тема на разговорите, според најавите, треба да бидат војната во Сирија и економската соработка, јавуваат светските агенции.

Рохани, кој во својата прва посета на Москва пристигна вчеравечер, веќе имаше средба со рускиот премиер, Дмитриј Медведев. По состанокот тој изразил надеж дека неговата посета на Москва ќе биде пресвртница во билатераните односни меѓу двете земји.

Претседателите на Русија и на Иран, кои се главни сојузници на властите во Дамаск, ќе разговраат за регионалните прашања, особено за кризата во Сирија и за можните решенија за нејзино што брзо завршување, изјавил портпаролот на иранското министерство за надворешни работи, Бахрам Гасеми, во пресрет на посетата.

Тој истакнал дека Путин и Рохани ќе разговараат и за борбата против тероризмот и екстремизмот.

Претседателот на Иран, кој во Москва пристигнал со министерот за надворешни работи и министерот за нафта, ќе потпише десетина договори за економска соработка меѓу двете земји.


Што негира Вајгл: Дека Груевски спомнал „затвор“ или дека нему му се испуштило?


Скопје/Брисел, 27 март, 2017 - 11:17 (META) 

Известувачот за Република Македонија во Европскиот парламент, Иво Вајгл, во изјава за државната новинска агенција МИА демантира дека тој за некој медиум изјавил нешто во врска со претседателот на ВМРО-ДПМНЕ, Никола Груевски, и дека пренесувал нешто што Груевски му го кажал нему при нивната последна средба во Скопје.

Сепак, во демантот никаде не се споменува зборот „затвор“. Односно никој, ниту Вајгл, ниту пак ВМРО-ДПМНЕ во својата реакција, не демантираат и не негираат дека бил споменат овој збор, што го наметнува прашањата: Кој рекол затвор, а кој не смеел да каже?. Што демантира и негира Вајгл: Дека тој споменал „затвор“ или дека Груевски така му кажал? Или дека Груевски го спомнал зборот, а на Вајгл му се испуштило да каже?

– Јас како човек никогаш не персонифицирам одговорност и не се плеткам во македонската политика со прозивки на некои имиња и луѓе. Јас не знам да ја редуцирам вината на некое одредено име. Јас зборував за тоа што и претходно го кажав за „НоваТВ“, а се разбира тоа е дека Македонија мора да ја доживее својата катарза на сопствената политика и патот за понатаму е и преку тоа што го прави Специјалното јавно обвинителство. Доколку се утврди низ правосудството дека постои некаква индивидуална одговорност на кој било, тогаш тој, се разбира, ќе мора во правната држава за тоа да сноси консеквенци – вели Вајгл.

На прашањето дали тој лично во некоја изјава или интервју го споменал поранешниот премиер Груевски и нешто што наводно претседателот на ВМРО-ДПМНЕ му го кажал лично, словенечниот европратеник демантира дека зборувал нешто такво.

Медиумите пренесоа изјава од европратеникот Иво Вајгел за турската новинска агенција „Анадолија“, во која европратеникот вели дека Груевски рекол дека ќе инсистира (ќе оди) до крај затоа што не му се оди во затвор.

„Најкарактеристична е, сепак, изјавата што ни ја даде Никола Груевски, претседателот на ВМРО-ДПМНЕ, дека ќе инсистира до крај, дека не му се оди во затвор. Доколку тој е мотивот на сето ова, тогаш тоа значи дека уште долго нема да има компромиси“, ја цитираше „Ал Џезеира“ изјавата на Вајгл дадена за „Анадолија“.

ВМРО-ДПМНЕ демантираше дека лидерот на партијата, Никола Груевски рекол такво нешто пред европратеникот и во партиското соопштение наведуваат дека Иво Вајгл „или нешто не разбрал или свесно се става на страна аболираниот криминалец Зоран Заев и на неговите сценаристи со пласирање лаги и измислици, доколку воопшто дал таква изјава каква што е објавена“.

„Најостро демантираме дека претседателот Никола Груевски дал изјава каква што Иво Вајгл пренесува преку медиумите. Со ваквите малициозни дезинформации, доколку воопшто ги дал Иво Вајгл, тој, служејќи на нечии интереси, само долева масло на огнот во актуелната политичка криза, наместо јавно да ја осуди Тиранската платформа и мешањето на соседни држави во внатрешните работи на Република Македонија“, се вели во реакцијата на ВМРО-ДПМНЕ, од каде побараа Вајгл да се огради од невистините и да ги демантира, доколку не ги кажал, или да се извини за „политичките манипулации“, со кои ја доведува јавноста во заблуда.

Според ВМРО-ДПМНЕ, главниот акцент на разговорите со Вајгл и со другите европретставници бил ставен на неопходноста од нови предвремени парламентарни избори како најдобар начин за излез од актуелната криза.

Вајгл, од друга страна, во интервјуто за порталот „НоваТВ“, хипотетички, но мошне експлицитно ги спомена санкциите доколку „политичарот бега од разговори и компромиси, а кризата ескалира“.

– Ако политичарот бега од разговори и од компромиси, тогаш тој не е одговорен политичар. Тогаш мора да смета дека ќе го осудат не само луеѓо во неговата држава, ако кризата ескалира, за тоа ќе добие и свое место во меѓународната заедница и ќе понесе последици за тоа – рече Вајгл, додавајќи дека деструктивното дејствување се санкционира без разлика дали станува збор за политички партии или поединци.


Ахмети: Треба да донесеме добро решение, наскоро ќе има конкретен резултат


Скопје, 16 февруари, 2017 - 20:36 (META) 

Треба да донесеме добро и здраво решение, а секоја брза реакција може да има фатални последици, изјави денеска лидерот на ДУИ, Али Ахмети по одбележувањето на 16-годишната од конфликтот во 2001 година.

Ахмети рече дека во партијата се прават сите анализи, но дека тие „не резултираат со некакви атомски бомби“, туку дека се работи за конкретни прашања кои се однесуваат на интересите на Албанците и нивниот правен и политички статус.

– Мислам дека секоја брза реакција може да има фатални последици. ДУИ никогаш не била субјект кој ги предизвикувал проблемите, туку напротив секогаш ги решавала. Мислам дека наскоро ќе има резултат и конкретен одговор. Треба да донесеме добра и здрава одлука – рече Ахмети.

Портпаролот на СДСМ, Петре Шилегов денеска одговарајќи на новинарско прашање дали СДСМ добиле нацрт-закон за употреба на јазиците од страна на албанските партии рече дека „во оваа фаза зборуваме за мандат за состав на Влада“ и дека ниту се зборува за содржина, ниту за формата и видот на Владата. Тој рече дека кризата што ВМРО-ДПМНЕ сака да ја прикаже дека постои во земјава, е обид на Никола Груевски и на раководството на партијата да се спасат од нормални судења и од затворски казни.


Ахмети – Тимоние: ДУИ е под ирационален медиумски притисок, но не е ничиј сервис


Тетово, 13 февруари, 2017 - 16:27 (META) 

Демократската унија за интеграција (ДУИ) не се брза, туку сака да се осигури дека очекувањата на граѓаните ќе се исполнат, заедно со „разгледувањето и расветлување на оспорените случаи како ‘Монструм’, ‘Сопот’, ‘Куманово’ (Диво насеље) и прислушувањата. Ова го истакнал лидерот на ДУИ, Али Ахмети на денешната средба со Кристијан Тимоние, aмбасадор на Франција.

На средбата, како што соопштуваат од партијата, било разговарано за политичката ситуација во земјава по изборите на 11 декември. Ахмети нагласил дека за ДУИ стабилноста на земјата е „многу важна, наспроти локалните, регионалните но и глобалните предизвици“.

„Претседателот на ДУИ се осврна на преговорите со ВМРО-ДПМНЕ и со СДСМ откривајќи ги нашите приоритети за заокружување на Охридскиот договор, владеење на правото, добрососедски односи, економски развој и евроатланска интеграција“, стои во соопштението од ДУИ за средбата.

Ахмети посочил дека врз ДУИ се врши постојан медиумски притисок, но додал дека партијата работи рационално и фокусирано и дека „не е сервис на било која партија“.

„Ахмети нагласи дека овој медиумски ирационален и преференцијален притисок се обидува да создаде непостоечки теми за органите на партијата за наводно поделби помеѓу различните крила и ова се прави со цел да се ослабне ДУИ. Одлуката на ДУИ треба да создаде стабилност, безбедност, издржливост како и да биде во партнерство со меѓународната заедница бидејќи имаме заеднички интереси и цели, интеграција на земјата во НАТО и ЕУ. “, стои во соопштението.


Груевски: Хан сфати дека влада на широка коалиција е неизводлива идеја


Скопје, 11 февруари, 2017 - 22:04 (META) 

Лидерот на ВМРО-ДПМНЕ, Никола Груевски во интервју за телевизијата „Нова“ изјави дека еврокомесарот за проширување и добрососедска политика Јоханес Хан во земјава дошол со идеја да ги охрабри политичките партии за широка владина коалиција, но по разговорите со партиските лидери дошол до заклучок дека такво нешто не е изводливо.

– Низ разговорите тој сфати дека во Македонија широката коалиција е неуспешен концепт. Сме имале широка коалиција во 2001 година и сега, но и во двете ситуации владата стана нефункционална и тоа се чувстува низ целата држава. Ние во тој разговор (со Хан н.з.) отворивме многу прашања и имавме дебата. На крајот тој кажа дека е очигледно дека по средбите со сите партии, не само со ВМРО-ДПМНЕ, е тешко остварлива идејата за широка коалиција и дека на партиите им е потребно повеќе време да одлучат што понатаму – рече Груевски.

Тој истакна дека на средбата со Хан го отвориле и прашањето за нови избори.

– Доаѓаат локалните избори и кога веќе ќе имаме локални избори добро е да има и нови парламентарни избори. Се плашам да не помине многу време додека сите не сфатат дека нови избори се неопходни. СДСМ се изјасни и во моментов сè уште се против нови избори, но кај нив мислењето важи од вечер до утре. Нам ни требаат нови избори со јасен победник на кого ќе му биде овозможено да формира влада – рече Груевски.

На прашањето, што ако се формира влада, а ВМРО-ДПМНЕ замине во опозиција Груевски рече дека ќе дејствуваат како опозициска партија и ќе бидат „најискрен и најдобар партнер на граѓаните во остварување на нивните интереси“.

Во врска со проектот за „десоросоизација“ на Македонија, Груевски рече дека идејата на ВМРО-ДПМНЕ е владата во иднина да издвојува повеќе средства од буџетот за невладините организации, а не тие во најголем број да бидат финансирани и „индоктринирани од Сорос“.

– Главниот проблем е што кај нас немаше други невладини организации и излезе една слика дека 95 отсто од невладините се финансирани од Сорос. Нам она што ни е потребно е да се помогне од страна на владата да се одвојат поголеми средства од буџетот за невладини организации, за тие да не доаѓаат само од Сорос. Наша грешка е тоа што претходно не го направивме тоа и не одвојувавме пари за невладини организации кои ќе бидат независни во своето делување – рече Груевски.


Тачи останува претседател на ДПА до локалните избори


Тетово, 11 февруари, 2017 - 20:08 (META) 

Централното собрание на ДПА одлучи Мендух Тачи и понатаму да ја води партијата. По шестчасовната дискусија денеска највисокото партиско тело со мнозинство гласови, реши вонредниот конгрес на кој ќе се избира идниот претседател и други партиски тела, да се одржи по завршувањето на локалните избори.

Тачи изјави дека партијата сметала дека е неопходно да се донесе ваква одлука, бидејќи „не е паметно“ пред локални избори да се избираат највисоките функционери на ДПА.

– Имам многу волја да се борам со противници, ама не со ДПА кои се моите луѓе. Контекстот временски е таков, што не ми овозможува многу простор, се наоѓаме на праг на локалните избори. Морално не сакам да изиграм како некои други лидери. Ако изберевме друг претседател на ДПА, имавме голема можност да се соочиме со слаб резултат на локалните избори и тоа да се интерпретираше како евтин политички трик од моја страна. Затоа јас прифатив да ја вода партијата на овие локални избори и убеден сум дека ќе имаме многу подобар резултат – изјави Тачи.

Тој додаде дека Централното собрание го овластило да почне разговори со политичките чинители за состав на нова влада.

– Првиот состанок ќе го барам со Иванов и ќе барам од него да ми даде мандат за следна влада. Гледам дека се смеете, но и јас се смеам кога друг некој бара мандат. Иванов 99 отсто нема да ми го даде мандатот, сигурно ќе ми рече да соберам 61 потпис и потоа ќе се обидам да соберам како што другите се обидоа – рече Тачи

Тој, одговарајќи на новинарско прашање рече дека е подготвен да разговара и со лидерот на СДСМ, Зоран Заев за состав на нова влада.

– Кризата е голема и таа се влошува, затоа треба да се седне и со сите да се разговара, бројките не се проблем – додаде Тачи.

Поради лошите изборни резултати, лидерот на ДПА Мендух Тачи си поднесе оставка од функцијата претседател на партијата.


Заев: Ахмети не ми побарал пишан документ, но штом сака, ќе го добие


Скопје, 9 февруари, 2017 - 21:52 (META) 

Ќе им ги дадеме материјалите на ДУИ, правиме сè да се заврши процесот на собирање потписи за да можеме да влеземе во преговори за формирање влада, изјави лидерот на СДСМ, Зоран Заев по средбата со еврокомесарот за проширување и добрососедска политика, Јоханес Хан.

Тој рече дека лидерот на ДУИ, Али Ахмети, досега лично не му побарал никаков пишан документ, но ако решил да го бара тоа, ќе го добие.

– Зборот е збор, било да е усно кажан или на писмено. Но, сакам да потсетам дека кога преговараше со ВМРО-ДПМНЕ, тој на Груевски ништо не му побара на писмено – рече Заев.

Лидерот на СДСМ, по средбата со Хан рече дека еврокомесарот сметал дека треба што побргу да се формира влада. Заев додаде дека е подготвен да разговара со сите партии на Албанците и дека има позитивен став кон нивната платформа. Конечниот став, рече тој, ќе го соопшти откако ќе го добие мандатот за формирање влада.

За собирање на потписите, Заев рече дека нема рок, но нагласи дека има и некои црвени линии до кога може да се чека.

Лидерот на ДУИ, Али Ахмети, по средбата со Хан изјави дека чекаат писмени материјали од СДСM за да свикаат средба на централното претседателство и да одлучат за понатамошните чекори.