!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Ахмети: Треба да донесеме добро решение, наскоро ќе има конкретен резултат


Скопје, 16 февруари, 2017 - 20:36 (META) 

Треба да донесеме добро и здраво решение, а секоја брза реакција може да има фатални последици, изјави денеска лидерот на ДУИ, Али Ахмети по одбележувањето на 16-годишната од конфликтот во 2001 година.

Ахмети рече дека во партијата се прават сите анализи, но дека тие „не резултираат со некакви атомски бомби“, туку дека се работи за конкретни прашања кои се однесуваат на интересите на Албанците и нивниот правен и политички статус.

– Мислам дека секоја брза реакција може да има фатални последици. ДУИ никогаш не била субјект кој ги предизвикувал проблемите, туку напротив секогаш ги решавала. Мислам дека наскоро ќе има резултат и конкретен одговор. Треба да донесеме добра и здрава одлука – рече Ахмети.

Портпаролот на СДСМ, Петре Шилегов денеска одговарајќи на новинарско прашање дали СДСМ добиле нацрт-закон за употреба на јазиците од страна на албанските партии рече дека „во оваа фаза зборуваме за мандат за состав на Влада“ и дека ниту се зборува за содржина, ниту за формата и видот на Владата. Тој рече дека кризата што ВМРО-ДПМНЕ сака да ја прикаже дека постои во земјава, е обид на Никола Груевски и на раководството на партијата да се спасат од нормални судења и од затворски казни.


Ахмети – Тимоние: ДУИ е под ирационален медиумски притисок, но не е ничиј сервис


Тетово, 13 февруари, 2017 - 16:27 (META) 

Демократската унија за интеграција (ДУИ) не се брза, туку сака да се осигури дека очекувањата на граѓаните ќе се исполнат, заедно со „разгледувањето и расветлување на оспорените случаи како ‘Монструм’, ‘Сопот’, ‘Куманово’ (Диво насеље) и прислушувањата. Ова го истакнал лидерот на ДУИ, Али Ахмети на денешната средба со Кристијан Тимоние, aмбасадор на Франција.

На средбата, како што соопштуваат од партијата, било разговарано за политичката ситуација во земјава по изборите на 11 декември. Ахмети нагласил дека за ДУИ стабилноста на земјата е „многу важна, наспроти локалните, регионалните но и глобалните предизвици“.

„Претседателот на ДУИ се осврна на преговорите со ВМРО-ДПМНЕ и со СДСМ откривајќи ги нашите приоритети за заокружување на Охридскиот договор, владеење на правото, добрососедски односи, економски развој и евроатланска интеграција“, стои во соопштението од ДУИ за средбата.

Ахмети посочил дека врз ДУИ се врши постојан медиумски притисок, но додал дека партијата работи рационално и фокусирано и дека „не е сервис на било која партија“.

„Ахмети нагласи дека овој медиумски ирационален и преференцијален притисок се обидува да создаде непостоечки теми за органите на партијата за наводно поделби помеѓу различните крила и ова се прави со цел да се ослабне ДУИ. Одлуката на ДУИ треба да создаде стабилност, безбедност, издржливост како и да биде во партнерство со меѓународната заедница бидејќи имаме заеднички интереси и цели, интеграција на земјата во НАТО и ЕУ. “, стои во соопштението.


Груевски: Хан сфати дека влада на широка коалиција е неизводлива идеја


Скопје, 11 февруари, 2017 - 22:04 (META) 

Лидерот на ВМРО-ДПМНЕ, Никола Груевски во интервју за телевизијата „Нова“ изјави дека еврокомесарот за проширување и добрососедска политика Јоханес Хан во земјава дошол со идеја да ги охрабри политичките партии за широка владина коалиција, но по разговорите со партиските лидери дошол до заклучок дека такво нешто не е изводливо.

– Низ разговорите тој сфати дека во Македонија широката коалиција е неуспешен концепт. Сме имале широка коалиција во 2001 година и сега, но и во двете ситуации владата стана нефункционална и тоа се чувстува низ целата држава. Ние во тој разговор (со Хан н.з.) отворивме многу прашања и имавме дебата. На крајот тој кажа дека е очигледно дека по средбите со сите партии, не само со ВМРО-ДПМНЕ, е тешко остварлива идејата за широка коалиција и дека на партиите им е потребно повеќе време да одлучат што понатаму – рече Груевски.

Тој истакна дека на средбата со Хан го отвориле и прашањето за нови избори.

– Доаѓаат локалните избори и кога веќе ќе имаме локални избори добро е да има и нови парламентарни избори. Се плашам да не помине многу време додека сите не сфатат дека нови избори се неопходни. СДСМ се изјасни и во моментов сè уште се против нови избори, но кај нив мислењето важи од вечер до утре. Нам ни требаат нови избори со јасен победник на кого ќе му биде овозможено да формира влада – рече Груевски.

На прашањето, што ако се формира влада, а ВМРО-ДПМНЕ замине во опозиција Груевски рече дека ќе дејствуваат како опозициска партија и ќе бидат „најискрен и најдобар партнер на граѓаните во остварување на нивните интереси“.

Во врска со проектот за „десоросоизација“ на Македонија, Груевски рече дека идејата на ВМРО-ДПМНЕ е владата во иднина да издвојува повеќе средства од буџетот за невладините организации, а не тие во најголем број да бидат финансирани и „индоктринирани од Сорос“.

– Главниот проблем е што кај нас немаше други невладини организации и излезе една слика дека 95 отсто од невладините се финансирани од Сорос. Нам она што ни е потребно е да се помогне од страна на владата да се одвојат поголеми средства од буџетот за невладини организации, за тие да не доаѓаат само од Сорос. Наша грешка е тоа што претходно не го направивме тоа и не одвојувавме пари за невладини организации кои ќе бидат независни во своето делување – рече Груевски.


Тачи останува претседател на ДПА до локалните избори


Тетово, 11 февруари, 2017 - 20:08 (META) 

Централното собрание на ДПА одлучи Мендух Тачи и понатаму да ја води партијата. По шестчасовната дискусија денеска највисокото партиско тело со мнозинство гласови, реши вонредниот конгрес на кој ќе се избира идниот претседател и други партиски тела, да се одржи по завршувањето на локалните избори.

Тачи изјави дека партијата сметала дека е неопходно да се донесе ваква одлука, бидејќи „не е паметно“ пред локални избори да се избираат највисоките функционери на ДПА.

– Имам многу волја да се борам со противници, ама не со ДПА кои се моите луѓе. Контекстот временски е таков, што не ми овозможува многу простор, се наоѓаме на праг на локалните избори. Морално не сакам да изиграм како некои други лидери. Ако изберевме друг претседател на ДПА, имавме голема можност да се соочиме со слаб резултат на локалните избори и тоа да се интерпретираше како евтин политички трик од моја страна. Затоа јас прифатив да ја вода партијата на овие локални избори и убеден сум дека ќе имаме многу подобар резултат – изјави Тачи.

Тој додаде дека Централното собрание го овластило да почне разговори со политичките чинители за состав на нова влада.

– Првиот состанок ќе го барам со Иванов и ќе барам од него да ми даде мандат за следна влада. Гледам дека се смеете, но и јас се смеам кога друг некој бара мандат. Иванов 99 отсто нема да ми го даде мандатот, сигурно ќе ми рече да соберам 61 потпис и потоа ќе се обидам да соберам како што другите се обидоа – рече Тачи

Тој, одговарајќи на новинарско прашање рече дека е подготвен да разговара и со лидерот на СДСМ, Зоран Заев за состав на нова влада.

– Кризата е голема и таа се влошува, затоа треба да се седне и со сите да се разговара, бројките не се проблем – додаде Тачи.

Поради лошите изборни резултати, лидерот на ДПА Мендух Тачи си поднесе оставка од функцијата претседател на партијата.


Заев: Ахмети не ми побарал пишан документ, но штом сака, ќе го добие


Скопје, 9 февруари, 2017 - 21:52 (META) 

Ќе им ги дадеме материјалите на ДУИ, правиме сè да се заврши процесот на собирање потписи за да можеме да влеземе во преговори за формирање влада, изјави лидерот на СДСМ, Зоран Заев по средбата со еврокомесарот за проширување и добрососедска политика, Јоханес Хан.

Тој рече дека лидерот на ДУИ, Али Ахмети, досега лично не му побарал никаков пишан документ, но ако решил да го бара тоа, ќе го добие.

– Зборот е збор, било да е усно кажан или на писмено. Но, сакам да потсетам дека кога преговараше со ВМРО-ДПМНЕ, тој на Груевски ништо не му побара на писмено – рече Заев.

Лидерот на СДСМ, по средбата со Хан рече дека еврокомесарот сметал дека треба што побргу да се формира влада. Заев додаде дека е подготвен да разговара со сите партии на Албанците и дека има позитивен став кон нивната платформа. Конечниот став, рече тој, ќе го соопшти откако ќе го добие мандатот за формирање влада.

За собирање на потписите, Заев рече дека нема рок, но нагласи дека има и некои црвени линии до кога може да се чека.

Лидерот на ДУИ, Али Ахмети, по средбата со Хан изјави дека чекаат писмени материјали од СДСM за да свикаат средба на централното претседателство и да одлучат за понатамошните чекори.


Хан утре ќе се сретне со Иванов во вилата на Водно


Скопје, 9 февруари, 2017 - 16:53 (META) 

Претседателот на државата Ѓорге Иванов утре, во 9 часот, ќе се сретне со еврокомесарот за проширување и за добрососедска политика Јоханес Хан, соопштија од кабинетот на Иванов.

Средбата ќе се одржи во претседателската резиденција на Водно.

Еврокомесарот синоќа допатува во Скопје, а денеска учествуваше на шестиот министерски состанок на земјите од Западен Балкан, посветен на регионалната соработка во областа на енергетиката.

Тој пред конференцијата имаше средба со премиерот во оставка, Емил Димитриев, а попладнево ќе се сретне со лидерите на политичките партии кои на изборите на 11 декември добија пратенички мандати во Собранието.

По завршувањето на конференцијата, а во пресрет на средбите со политичките лидери, Хан изјави дека дошол да ги слушне ставовите на лидерите на политички партии, но не и да им дава насоки и препораки што да одлучат, во контекст на актуелните прашања за формирање на новата влада.


Ахмети изјави дека „фрлил бомба“ кај Иванов, Села и Касами тивки


Скопје, 1 февруари, 2017 - 17:05 (META) 

„Каде претседателот ќе го однесе, клучот е кај него. Јас ја имав „бомбата“, да кажам симболично, и ја фрлив кај претседателот. Сега не знам каде ќе ја фрли тој“, одговори на новинарско прашање лидерот на ДУИ, Али Ахмети, по денешната консултација во кабинетот на претседателот на Република Македонија, пренесе „Алсат – М“.

Тој порача дека дека сите треба да придонесат за излез од кризата и за наоѓање одржливо решение за иднината и за стабилноста на државата и нагласи дека сите опции за формирање нова влада се отворени.

– Имавме средба со претседателот на државата Ѓорге Иванов на која бевме информирани за целиот процес на доаѓањето до едно решение на нашите прашања и како да стигнеме до парламентарно мнозинство затоа што одговорност на сите нас е да најдеме прифатливо решение за да имаме стабилни институции и понатаму да менаџираме со државата – изјави Ахмети по средбата со претседателот Иванов.

Пред него на одвоени средби кај Иванов беа и лидерите на Беса и на Алијансата за Албанците, Билал Касами и Зијадин Села. Тие не дадоа изјави за медиумите.


Османи: Мора да донесеме правилна одлука


Тетово, 27 јануари, 2017 - 18:24 (META) 

Се разгледуваат аргументите за и против, но сè уште не е свикано централното претседателство на ДУИ, а разговорите ќе продолжат и утре, изјави партискиот портпарол, Бујар Османи, екипи пред седиштето на партијата во Мала Речица.

– Ахмети продолжува со консултациите. Немаме конкретни одлуки, ги анализираме сите опции за и против, оти знаеме за важноста на оваа одлука. Ситуацијата е деликатна, роковите се кратки, ќе продолжиме и во текот на утрешниот ден со овие консултации. За секоја од опциите има аргументи кои се ставени на маса и во текот на овие денови сме ги образложиле. Ќе се анализираат последиците од тие опции, но најважен е, пред сè, интересот на граѓаните – рече Османи, појаснувајќи дека вечерва во Мала Речица се водат разговори на претседателот на ДУИ со потпретседателите.

Тој појасни дека централното претседателство на партијата ќе биде свикано тогаш кога ќе има предлози кои би донеле до конечни одлуки.

– Ние сме свесни за роковите, за целата ситуација, и посакуваме да се најде решение за да постигнеме политичка стабилност, но првично и важно е одлуката да биде добра, наместо навремена – рече портпаролот на ДУИ, додавајќи дека знаат дека е кус рокот, но ги разгледуваат сите аргументи за да донесат правилна одлука за иднината на земјата.

Инаку, партијата треба да донесе одлука дали ќе влезе во коалиција со ВМРО-ДПМНЕ и ќе ја формираат новата влада. Рокот на Никола Груевски што го доби со мандатот да формира влада истекува задутре.


Заев: Груевски не може да формира влада, но ќе чекам самиот да го признае тоа


Куманово, 20 јануари, 2017 - 16:17 (META) 

Лидерот на СДСМ, Зоран Заев, е убеден дека Никола Груевски нема да успее да формира влада, но вели дека ќе го чека крајниот рок и лидерот на ВМРО-ДПМНЕ самиот да го признае тоа.

– Јас сум убеден дека Никола Груевски не може да формира влада. Режимот дојде на крај и ВМРО со Груевски треба да оди во опозиција. Тоа им е јасно и покрај мандатот што го има Груевски. Ние ќе го почитуваме рокот до 29 јануари, кога самиот Груевски треба да каже дека не е во можност да формира влада – изјавил денеска Зоран Заев во Куманово, пренесува „Канал 77“.

Прашан за вчерашната средба со лидерот на ДУИ, Али Ахмети, Заев изјавил дека начелно било разговарано за позииците на СДСМ и на ДУИ, но ништо конкретно.

– Најавени се нови средби и тогаш ќе има и прецизирање на ставовите – рекол Заев.

Инаку, Заев денеска е во Куманово поради рочиштето од судскиот процес што се води против него и против претседателот на општинската организација на СДСМ, Мартин Костовски, а по приватна тужба од генералниот секретар на ГРОМ, Виктор Цветковски, поради објавување прислушувани разговори меѓу него и поранешната министерка за внатрешни работи, Гордана Јанкулоска, снимени меѓу двата круга на локалните избори во 2013 година.


Заев и Ахмети разговарале за „позициите на партиите“, без навлегување во детали


Скопје, 19 јануари, 2017 - 18:10 (META) 

Лидерите на СДСМ и на ДУИ, Зоран Заев и Али Ахмети, денеска имале средба на која, како што, соопштуваат од СДСМ, било разговарано за позициите на двете партии во постизборниот период, „без навлегување во детали или разговори за конкретни прашања“.

„Ова е прва средба на лидерско ниво помеѓу претседателот на СДСМ, Заев, и претседателот на ДУИ, Ахмети, по предвремените парламентарни избори на 11 декември 2016 година. На средбата начелно се разговараше за позициите на двете страни кои ги застапуваат во овој период, без навлегување во детали или разговори за одделни конкретни прашања“, стои во соопштението од СДСМ.

Од партијата велат дека во периодот што следи можно е да има нови средби меѓу двете страни, за што јавноста ќе биде навремено информирана.

Средбата меѓу Заев и Ахмети доаѓа еден ден по разговорите што лидерот на ДУИ ги имаше со претседателот на ВМРО-ДПМНЕ, Никола Груевски, при што, како што информираат од двете партии, акцентот бил ставен на две точки, односно на „анализа на резултатите од изборите одржани на 11 декември, кои беа оценети како слободни, фер и демократски, како и анализа на актуелната политичка состојба“.