!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Димитров: Преговорите со Грција дефинитивно ќе почнат до крајот на годинава


Берлин, 8 септември, 2017 - 18:00 (META) 

Министерот за надворешни работи, Никола Димитров, во интервју за „Дојче веле“ дадено при неговата посета на Германија, изразува силна увереност дека преговорите со Грција за спорот околу името, кои подолго време беа во застој, ќе продолжат до крајот на годинава.

– За време на посетата на грчкиот министер Никос Коѕиас, минатата среда во Скопје, ги дискутиравме мерките за градење доверба. Сè уште не ги почнавме преговорите. Тие ќе почнат дефинитивно пред крајот на годината. Јас го правам она што мислам дека треба да биде работа на дипломатите: решавање на проблеми, отворање врати и создавање пријатели. Можеби не можеме да ја смениме историјата, но сигурно можеме да се обидеме да влијаеме на иднината и да го направиме животот подобар за нашите граѓани денес. Тоа е нашата цел – вели Димитров.

Тој во интервјуто нагласува дека балканската рута на мигрантите мора да остане затворена.

– Мислам дека треба да направиме сè што е потребно за да остане затворенa, бидејќи сите ние, вклучувајќи ги и бегалците, имаме интерес за организирана помош и мораме да се бориме против илегалната миграција. Она што е навистина важно е ЕУ да продолжи да ја поддржува Турција во финансиска смисла, бидејќи имаат милиони бегалци во нивната земја. Еднакво важно е да продолжиме да ѝ помагаме на Грција и тоа на солидарен начин – единствениот начин на кој треба да се решава ова прашање – вели Димитров.

Прашан дали Македонија е подготвена да прими бегалци кои се во ЕУ, тој вели дека тоа би се случило дури откако земјата ќе стане членка на Унијата.

– Пред сè, во интерес на македонските граѓани е Македонија да влезе во ЕУ, а кога еднаш ќе бидеме дел од ЕУ, тогаш дефинитивно ќе бидеме подготвени да го делиме товарот со ЕУ. Но, пред тоа треба да влеземе во ЕУ, за да може да се даде одговор на ова прашање – вели шефот на македонската дипломатија.


Трамп смета дека не е време за разговори со Северна Кореја


Вашингтон, 6 септември, 2017 - 19:47 (META) 

Американскиот претседател Доналд Трамп смета дека не е време за разговори со Северна Кореја и дека сите опции се отворени за одбрана на САД и на нејзините сојузници.

Трамп вчера телефонски разговарал со премиерите на Австралија и на Велика Британија, Малком Трнбул и Тереза Меј, за последната нуклеарна проба на Северна Кореја, соопшти денеска Белата куќа, јавуваат светските агенции.

Претседателот на САД во разговорот со британската премиерка рекол дека сега „не е време за разговори со Северна Кореја“ и јасно ставил до знаење дека сите опции се отворени за одбрана на САД и на нејзините сојузници од агресијата на Северна Кореја.

Меј и Трамп изразиле одлучност за блиска соработка во зајакнувањето на дипломатскиот и на економскиот притисок врз Пјонгјанг.

Во разговорот со премиерот на Австралија, Малком Трнбул, Трамп ја потврдил посветеноста на Вашингтон во одбраната на земјата и на сојузниците, „користејќи ги сите достапни дипломатски и воени капацитети“, се наведува во соопштението на Белата куќа.

Трамп вчера најави дека неговата администрација ќе им дозволи на Јапонија и на Јужна Кореја да набават поголемо количество софистицирано оружје.

Вашингтон и Сеул размислуваат и за разместување на носачи на авиони и на стратешки бомбардери во регионот.

САД на седницата на Советот за безбедност на Обединетите нации побараа заострување на санкциите кон Пјонгјанг, на што се противат Русија и Кина.


САД се подготвени да соработуваат со Русија околу Сирија


Вашингтон, 6 јули, 2017 - 10:29 (META) 

САД се подготвени да соработуваат со Русија за со заеднички сили да ја стабилизираат ситуацијата во Сирија, изјави американскиот државен секретар, Рекс Тилерсон.

Тилерсон изјави дека САД сакаат да разговараат со Русија за прекин на огнот на копно и да го координираат испраќањето помош на Сиријците.

– Доколку нашите две земји работат заедно на воспоставување стабилност на теренот, тоа ќе постави темел за напредок во решавање на политичката иднина на Сирија – рече Тилерсон пред самитот на Г20.

Тој додаде дека Русија има обврска да ја спречи владата на сирискиот претседател Башар ал Асад да користи хемиско оружје.

Претседателите на САД и на Русија, Доналд Трамп и Владимир Путин, ќе се состанат на маргините на самитот на Г20, кој утре почнува во Хамбург и, како што изјави Тилерсон, Сирија ќе биде една од темите за кои ќе се разговара.


Нимиц денеска ќе се сретне со Иванов во Вила Водно


Скопје, 2 јули, 2017 - 14:16 (META) 

Претседателот на државата, Ѓорге Иванов, денеска ќе го прими специјалниот пратеник на Обединетите нации во разговорите меѓу Македонија и Грција за спорот за името, Метју Нимиц, кој од денеска до 4 јули ќе престојува во Скопје.

Средбата на Иванов и на Нимиц е закажана по 17 часот во претседателската резиденција на Водно.

Инаку, Нимиц е во посета на земјава на покана на македонската Влада, на разговори за начините за постигнување напредок во разговорите за наоѓање заедничко прифатливо решение за прашањето за името.

Специјалниот пратеник на ОН во интервју за емисијата „360 степени“ на телевизијата „Алсат М“ пред неговото доаѓање, изјави дека овојпат не носи ново предлог-решение за името и дека во земјава доаѓа да ја тестира подготвеноста за сериозен напредок во разговорите меѓу Скопје и Атина за спорот за името.

На покана на Владата на Грција, предвидено е Нимиц да замине за Атина, веднаш по посетата на Скопје.

Специјалниот претставник на ОН во разговорите меѓу Македонија и Грција последен пат ги посети двете земји кон крајот на јули 2014 година.


Нимиц: Не носам нов предлог за името, доаѓам да ја тестирам подготвеноста за напредок


Скопје, 1 јули, 2017 - 18:59 (META) 

Овојпат не носам ново предлог-решение во Скопје, доаѓам да разговараме за напредокот во преговорите со Атина околу спорот за името, вели специјалниот пратеник на Обединетите нации во разговорите меѓу Македонија и Грција во интервју за емисијата „360 степени“ на телевизијата „Алсат М“.

Нимиц, кој од денеска до 4 јули ќе престојува во Скопје, на покана на македонската Влада, вели дека е добро што новиот државен врв покажува волја разговорите да продолжат.

– Во Скопје има нова влада со нови идеи околу ова прашање. Во изминативе неколку години од различни причини времето не беше соодветно за интензивни и сериозни преговори за прашањето за името. Се надевам дека вниманието се враќа кон ова многу важно прашање, одам за да се сретнам со страните и да ја тестирам подготвеноста за сериозен напредок. Овојпат не носам нов предлог – вели Нимиц.

Тој посочува дека во изјавите на новата влада се чувствува клима за подобрување на односите со соседите.

– Ги читам изјавите на премиерот, на министерот за надворешни работи и на другите функционери во новата влада. Има аспекти што даваат надеж, во однос на тоа што тие го велат. Мислам дека отсекогаш беше важно земјата да се согласува со соседите. Соседството е тежок регион, а земјата е нова земја и како што знаете во ОН е под привременото име – Поранешна југолосвенска република Македонија, кое јас како претставник на ОН морам да го користам. Но, тоа име отсекогаш беше планирано да биде привремено, а Привремената спогодба е веќе стара, напишана е во 1995 година. Така што, време е да се решат некои проблеми и ми се допаѓа што луѓето имаат свеж пристап во однос на прашањата со соседните земји – вели специјалниот пратеник на ОН во интервјуто.

На покана на Владата на Грција, предвидено е Нимиц да замине за Атина веднаш по посетата на Скопје.

Специјалниот претставник на ОН во разговорите меѓу Македонија и Грција последен пат ги посети двете земји кон крајот на јули 2014 година.


Нимиц од денеска во Скопје, на разговори со државниот врв за спорот за името


Скопје, 1 јули, 2017 - 10:02 (META) 

Специјалниот пратеник на Обединетите нации во разговорите меѓу Македонија и Грција, Метју Нимиц, од денеска до 4 јули ќе претстојува во Скопје на разговори со државниот врв околу можностите за решавање на спорот за името.

Нимиц, како што соопшти канцеларијата на портпаролот на генералниот секретар на ОН, доаѓа во Скопје на покана на македонската Влада, за да се дискутира за начините за постигнување напредок во разговорите со посредство на ОН за наоѓање заедничко прифатливо решение за прашањето за името.

Во соопштението се додава дека на покана на Владата на Република Грција, предвидено е Нимиц да замине за Атина, веднаш по посетата на Скопје.

Посредникот Нимиц, во интервју за грчкиот весник „Реал њуз“ кон крајот на мај оваа година, изјави дека решавањето на спорот за името треба да биде високо на агендата на новата македонска влада и потенцира дека решавањето на овој проблем може да помогне да се решат и други проблеми во регионот.

– Мандатот кој го имам за решавање на спорот за името е клучот кој ќе ја отвори вратата за да се решат и други спорни проблеми во регионот. Спорот може да се реши ако и двете земји и нивните лидери добијат поддршка од нивните народи, ако разгледаат нешто што е логично, што ќе го задржува достоинството на двете земји, идентитетот на двете земји, историската смисла на двете земји. Мислам дека постојат решенија – рече Нимиц.

Специјалниот претставник на ОН во разговорите меѓу Македонија и Грција последен пат ги посети двете земји кон крајот на јули 2014 година.


Хан пред посетата на Скопје: И Владата и опозицијата да се фокусираат на реформите


Брисел, 23 јуни, 2017 - 17:17 (META) 

Новата Влада и опозицијата треба да се фокусираат на имплементацијата и на реформските приоритети и на Договорот од Пржино за да ја вратат Македонија на патот кон Европската Унија, се вели во денешното соопштение на еврокомесарот за проширување и за соседска политика, Јоханес Хан, во пресрет на неговата посета на земјава, закажана за понеделник.

„Земјата, со континуирана помош од Европската Унија, конечно ја надмина политичката криза преку добро спроведени избори и со формирањето ја новата Влада. Сега новата Влада, заедно со опозицијата, треба да се фокусира на имплементацијата на реформските приоритети и на Договорот од Пржино за да се врати земјата на нејзиниот пат кон ЕУ-интеграцијата. Реформите мора да бидат спроведени за да се подобри животoт на луѓето, да се работи на стабилноста, напредокот и правдата. Затоа ѝ дадов задача на групата на независни правни експерти, предводена од Рајнхард Прибе, да ѝ помогне и да ја советува новата влада за прашањата за системското владеење на правото“, напиша Хан.

Еврокомесарот в понеделник доаѓа во земјава на разговори за владините реформски планови и за да ја повтори поддршката на ЕУ во процесот на спроведување на потребните реформи за членство на земјава во Европската Унија.

Хан во Скопје, како што стои во соопштението, предвидено е да има средби со премиерот Зоран Заев, со новата влада и со политичките лидери во земјава.


Харадинај: Преговорите за Косово мора да бидат само за негово признавање


Приштина, 13 јуни, 2017 - 14:29 (META) 

Кандидатот за премиер на Косово, Рамуш Харадинај, вели дека досегашната рамка за разговорите меѓу Косово и Србија била погрешна и дека дијалогот мора да продолжи само за една точка – признавање на Косово.

Според него, погрешна била одлуката на косовските институции  со Белград да се разговара за внатрешните прашања на Косово.

– Дијалогот со Србија е поставен на погрешни рамки, бидејќи се разговара за внатрешни прашања на Косово. Јас сум заинтересиран за дијалог, но со меѓусебно признавање. Не прифаќаме да разговараме за внатрешните прашања на Косово – изјави Харадинај за албанската телевизија „Топ чанел“.

Харадинај беше кандидат за премиер на ДПК, Алијансата за иднина на Косово и на Иницијативата за Косово, кои освоија најмногу гласови на последните парламентарни избори, иако немаат потребно мнозинство за самостојно формирање влада.


Бејли: Добро е што Македонија има разговори со Грција


Скопје, 7 јуни, 2017 - 14:04 (META) 

САД поддржуваат заеднички прифатливо решение меѓу Македонија и Грција за спорот за името, изјави американскиот амбасадор во Македонија, Џес Бејли, и додаде дека е добро што се одвиваат преговори меѓу двете земји.

– Добро е што Македонија има разговори со Грција и со другите земји во соседството. САД отсекогаш ја поддржувале и ќе продолжат да ја поддржуваат Македонија на нејзиниот пат кон НАТО и кон ЕУ – рече Бејли, одговарајќи на новинарски прашања на конференцијата „Актуелни предизвици на бизнис-заедницата од областа на законската регулатива“, организирана од неколку стопански комори.

Амбасадорот на САД нагласи дека во реформите што претстојат треба да се вклучат не само власта, туку и целата држава.

– Допрва треба да зборуваме со новата влада, како и со членовите на целото општество и со опозицијата за чекорите што ќе ги преземеме. Овој процес го вклучува целото општество и целата држава и тоа е нешто за кое целата земја ќе треба да се обедини за да го постигне – изјави Бејли.


Могерини ги поканила премиерите на балканските земји на вечера, меѓу нив и Заев


Брисел, 17 мај, 2017 - 19:11 (META) 

Високата претставничка за надворешна политика и за безбедност на Европската Унија, Федерика Могерини, ги поканила премиерите од шест балкански земји на неформална вечера на 24 мај во Брисел, објави порталот „Нова ТВ“.

Могерини го очекувала и лидерот на СДСМ, Зоран Заев, без разлика дали дотогаш ќе било финализирано формирањето на новата влада на Македонија.

Тема на неформалниот состанок ќе биде ситуацијата во регионот во светло на последните настани и да се разговара како понатаму.