!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Буџетот за 2018 година денеска на седница на Влада


Скопје, 9 ноември, 2017 - 13:19 (META) 

Владата денеска ќе ја одржи 37. седница, на која ќе го разгледа и ќе донесе одлуки за предлог-буџетот на државата за 2018 година, соопшти владината прес-служба.

На седницата, како што информираат оттаму, Министерството за финансии ќе го достави на разгледување и предлог-законот за извршување на буџетот за 2018 година.

Покрај буџетот, на дневен ред на денешната седница се уште неколку точки од кои една се однесува на кадровски прашања.

Седницата е закажана за доцна попладне, односно во 18 часот.

Инаку, според податоците што министерот за финансии, Драган Тевдовски ги презентираше пред јавноста, граѓанските организации и пред претставниците на стопанските комори, буџетот за 2018 година тежи 3,4 милијарди евра, а буџетскиот дефицит е планиран на 2,7 проценти од домашниот бруто-производ.

Најголеми реакции во јавноста и кај стручната фела предизвика планираното зголемување на акцизата за нафтата за три денари. Тевдовски го бранеше ваквото решение тврдејќи дека зголемувањето на акцизата нема да ја зголеми инфлацијата.


Почна првата седница на новата Влада


Скопје, 5 јуни, 2017 - 15:03 (META) 

Почна првата седница на новата Влада предводена од премиерот Зоран Заев. Половина час пред почетокот на седницата, новинарите имаа можност да го разгледаат ентериерот на зградата на Владата, која првпат беше отворена за јавноста по нејзиното реновирање.

Отворени беа и трите главни влеза од оградата на владината зграда, за која Заев најави дека ќе се бара законско решение и мислења од архитектите и од инжинерите, како таа да биде отстранета или преправена.

Новинарите ја посетија свечената реновирана сала за прием на делегации и за билатерални средби, кабинетот на министерот без ресор Едмонд Адеми, како и кабинетот на новиот премиер, Зоран Заев.

Додека новинарите го фотографираа и го снимаа кабинетот на новиот премиер, Заев беше во просторијата.

Инаку, како што најави Заев, на дневен ред на денешната прва владина седница ќе бидат пакетот економски закони, распределувањето на ресорите и портфолијата на министрите без ресори, поставување на заменици на претседатели на Владата, избор на генерален секретар и шеф на кабинет и формирање на постојните и на адхок комисиите.


Уставните судии ја одложија расправата за прислушувањето преку телеком-операторите


Скопје, 29 март, 2017 - 10:57 (META) 

Уставните судии денеска го одложија за една од наредните две седници разгледувањето на иницијативата за оценување на уставноста и на законитоста на контроверзниот член 175 од Законот за електронски комуникации.

Причина за ваквата одлука, како што беше истакнато на денешната седница, е обемниот материјал доставен во прилог на иницијативата.

Разгледувањето на оваа иницијатива требаше да биде прва точка на дневен ред на денешната седница на Уставниот суд.

Инаку, со членот 175 донесен со измените на Законот за електронски комуникации во 2014 година, на телекомуникациските оператори во земјава им се наложува „да ги обезбедат сите неопходни технички услови за да овозможат следење на комуникациите во нивните мрежи“.

Иницијативата за разгледување на уставноста и на законитоста на овој член е поднесена во 2015 година, односно истата година кога СДСМ почна со објавување на разговори од незаконското следење на комуникациите, т.н. „бомби“.

Во иницијативата, како што се гледа од објавата на Уставниот суд, оспорен е целиот член 175, односно сите 10 става од него.


Собранието ќе биде отворено за посета и в петок


Скопје, 28 ноември, 2016 - 12:10 (META) 

Граѓаните ќе можат да го посетат Собранието и на 2 декември (петок), поради голем интерес.

Како што информираат оттаму, тоа претставува можност посетителите да ја разгледаат внатрешноста на зградата како значајно историско обележје на македонската државност и да добијат одговор на своите прашања.

Од Собранието потсетуваат дека вообичаено оваа институција е отворена за посета секој последен петок во месецот, а заинтересираните граѓани потребно е да се пријават на телефонот 02/3113-683 или на електронска пошта s.stamenkovska@sobranie.mk најдоцна пет работни денови пред посетата.


Собранието утре отворено за граѓаните


Скопје, 24 ноември, 2016 - 15:43 (META) 

Собранието на Република Македонија утре ќе биде отворено за посета од страна на граѓаните. Заинтересираните посетители, информираат од Собранието, ќе имаат можност да ја разгледаат внатрешноста на зградата како значајно историско обележје на македонската државност и доколку имаат некакви прашања, да добијат одговор.

„Собранието на Република Македонија е отворено за посета секој последен петок во месецот, а заинтересираните граѓани потребно е да се пријават на телефонот 02/3113-683 или на е-маил адресата s.stamenkovska@sobranie.mk, најдоцна пет работни дена пред посетета“, стои во соопштението од Собранието на Република Македонија.


Уставниот суд ја закажа првата седница по одморите: СЈО не е, ама крстот е на дневен ред


Скопје, 16 септември, 2016 - 15:01 (META) 

Уставниот суд денеска го објави дневниот ред за првата седница по двомесечната летна пауза, закажана на 28 септември во 9 часот. На седницата, како точка на дневен ред ја нема иницијативата за оценка на уставноста на Законот за Специјално јавно обвинителство, но ја има иницијативата за поставувањето на крстот во Бутел.

Иницијативата за оценување на уставноста на СЈО беше поднесена во судот пред десет месеци, но досега не се најде на дневен ред на седниците на Уставниот суд. Оваа иницијатива беше едно од клучните барања на „Шарената револуција“ и на опозицијата.

Ова прашање се најде и во договорот од 20 јули меѓу политичките партии, потписнички на Договорот од Пржино. Во него е наведено дека треба да се поддржи Специјалниот обвинител, а во случај Уставниот суд да одлучува за неговата уставност, четирите партии треба да го усогласат законодавството со одлуката на судот во рок од пет дена.

Четирите партии, се додава во договорот, ќе го повикаат Уставниот суд што е можно поскоро да одлучува за Законот за СЈО, односно на следната закажана седница.

„Во случај Уставниот суд да одлучи дека Законот за СЈО или дел од него се неуставни, четирите политички партии се обврзуваат дека ќе го услогласат законот со одлуката на Уставниот суд и повторно ќе го формираат Обвинителството, согласно одлуката, во рок од пет дена. Ефикасноста, целите и опсегот на Специјалното обвинителство мора да бидат одржани“, стои во договорот од 20 јули.

Инцијативата за оценка на уставноста и на законитоста на одлуката за поставување на крстот, како што може да се види во агендата на интернет-страницата на Уставниот суд, е 11. точка на дневен ред.

Иницијативата за оценка на уставноста на одлуката за поставување на 55-метарскиот крст во општина Бутел во март годинава ја поднесе струшкиот градоначалник Зијадин Села бидејќи, според него, одлуката не била во согласност со Бадинтеровиот принцип.

Иако иницијативата се најде на дневниот ред на судот, нејзиното разгледување беше трипати одложувано.

Поставувањето на крстот, кој е донација на Светскиот македонски конгрес (СМК), кон крајот на февруари и на почетокот на март годинава предизвика тензии откако членови на ДУИ и нивни поддржувачи поставија камп и протестираа против изградба, на што со контрапротести одговори СМК, чиј претседател Тодор Петров беше и физички нападнат дента по свеченоста за осветување на камен-темелникот.


Уставниот суд од утре на летна ферија, СЈО и крстот во Бутел ќе чекаат до септември


Скопје, 13 јули, 2016 - 12:42 (META) 

Уставниот суд утре ќе ја одржи последната седница пред летните одмори. Следната седница на Уставниот суд ќе биде по 1 септември, кога судиите се враќаат во полн состав и ќе продолжат со работа, велат за „Мета“ од судот.

На утрешната седница, како што ни рече генералната секретарка на Уставниот суд, Оливера Филиповска, нема да се разгледуваат иницијативи, туку само текстови на нацрт-решенија што ги донел судот.

Ова значи дека иницијативата за оценка на уставноста на Законот за специјално јавно обвинителство евентуално би се нашла на дневен ред на судот наесен.

Инаку, разгледувањето на оваа иницијатива беше едно од клучните барања на „Шарената револуција“ и на опозицијата.

Иницијативата за оценување на уставноста на СЈО беше поднесена во судот пред осум месеци, но досега не се најде на дневен ред на седниците на Уставниот суд.

За одлучување ќе почека и иницијативата за уставноста на одлуката за поставување на 55-метарскиот крст во општина Бутел, која во март оваа година ја поднел струшкиот градоначалник Зијадин Села бидејќи, според него, одлуката не била во согласност со Бадинтеровиот принцип.

Оваа иницијатива, иако се најде на дневен ред на судот, нејзиното разгледување беше трипати одложувано.


Извештајот на Јанева денеска пред собраниска комисија


Скопје, 21 март, 2016 - 10:14 (META) 

Собраниската комисија за политички системи и односи меѓу заедниците денеска во 11 часот ќе го разгледува извештајот за шестмесечната работа на специјалната јавна обвинителка, Катица Јанева.

Не се очекува Јанева да присуствува на седницата.

Специјалната обвинителка не присуствуваше и на седницата на Советот на јавни обвинители за извештајот, во петокот минатата недела, поради што, како што соопшти претседателот на Советот, Петар Аневски, оваа точка не била на дневниот ред и е презакажана за оваа среда.

Аневски ја повика Јанева да дојде в среда, бидејќи, како што рече, тоа е нејзина должност, а и на членовите на Советот им биле нејасни доста наводи во извештајот и сакале да ѝ постават прашања на специјалната обвинителка.

Од СЈО, пак, изјавија дека специјалната обвинителка нема законска обврска да учествува на седницата ниту досега било практика раководителите на обвинителствата во Република Македонија да присуствуваат и да реферираат пред Советот за вакви извештаи, како и тоа дека треба да се има предвид автономијата на Специјалното јавно обвинителство.

Собранието в понеделник, на 28 март, ќе го разгледува извештајот на Јанева на пленарна седница.


СЈО: Дали Јанева ќе оди на седница ќе кажеме кога ќе добиеме известување од Советот


Скопје, 18 март, 2016 - 12:47 (META) 

Специјалната јавна обвинителка, Катица Јанева, ќе одлучи и ќе каже дали ќе присуствува на седницата на Светот на јавни обвинители в среда, за кога е презакажно разгледувањето на нејзиниот извештај, откако ќе добие писмена покана од Советот, кој денеска го одложи разгледувањето на документот поради неприсуството на Јанева.

– Првин да добиеме писмено известување од Советот на јавни обвинители за седницата, па ќе се произнесеме во јавноста за нашиот став. Во овој момент не можеме да даваме коментари на изјави изнесени во јавноста – ни изјави портпаролката на СЈО, обвинителката Ленче Ристовска, која ја прашаваме дали Јанева ќе дојде на седницата в среда.

Претседателот на Советот на јавни обвинители, Петар Аневски, по завршување на денешната седница, пред новинарите изјави дека Јанева е должна да дојде на седницата, меѓу другото, и поради бројните нејаснотии и проблематични делови во извештајот за кои членовите на Советот имаат прашања.

– Членовите на Советот на јавни обвинители заеднички заклучија дека е нужно нејзиното присуство поради доста нејаснотии во извештајот. Членовите ги интересираат проблемите што се наведени во тој извештај и од тие причини извештајот ќе биде разгледуван в среда – рече Аневски.

Тој повторно ја повика специјалната обвинителка да дојде в среда на седницата, истакнувајќи дека тоа е нејзина должност, односно дека Советот на јавни обвинители е органи пред кој таа одговара за своето стручно и законито работење.

Од СЈО за „Мета“ утрово, пред почетокот на седницата, изјавија дека специјалната обвинителка нема да присуствува на седницата, бидејќи нема законска обврска да дојде ниту, пак, досега било практика раководителите на обвинителствата во Република Македонија да присуствуваат и да реферираат пред Советот за вакви извештаи, како и тоа дека треба да се има предвид автономијата на Специјалното јавно обвинителство.


Советот на јавни обвинители ќе ја чека Јанева за да го разгледува извештајот


Скопје, 18 март, 2016 - 11:57 (META) 

Советот на јавни обвинители на денешната седница не го разгледа извештајот на специјалната обвинителка, Катица Јанева, поради тоа што таа не беше присутна, а претседателот на Советот, Петар Аневски, тоа го оцени како „непријатна работа“ и „непочитување на институцијата“.

Аневски рече дека Јанева е должна да дојде на седницата меѓу другото и поради бројните нејаснотии и проблематични делови во извештајот за кои членовите на Советот имаат прашања.

– Членовите на Советот на јавни обвинители заеднички заклучија дека е нужно нејзиното присуство поради доста нејаснотии во извештајот. Членовите ги интересираат проблемите што се наведени во тој извештај и од тие причини извештајот ќе биде разгледуван в среда – рече Аневски.

Тој повторно ја повика специјалната обвинителка да дојде в среда на седницата, истакнувајќи дека тоа е нејзина должност, односно дека Советот на јавни обвинители е органи пред кој таа одговара за своето стручно и законито работење.

Аневски не одговори на новинарските прашања какви нејаснотии и проблеми има во извештајот и додаде дека тоа ќе биде изнесено на седницата в среда. Според него, од минатата година сите раководители на вишите и на основните јавни обвинителства се должни да присуствуваат и да реферираат за извештаите. Одговарајќи на новинарско прашање дали републичкиот јавен обвинител, Марко Зврлевски, реферирал за своите извештаи, Аневски изјави дека тој секогаш бил присутен на седниците на Советот на кои ова било точка на дневен ред.

Инаку, Зврлевски денеска не беше присутен на седницата.

Аневски информираше дека на денешната 110. седница на Советот биле избрани седум нови јавни обвинители, со завршена Академија за судии и јавни обвинители. Петмина од обвинителите се избрани во Основното јаво обвинителство – Скопје, еден во ОЈО – Гостивар и еден во ОЈО – Битола.

Денеска, пак, за „Мета“ од Специјалното јавно обвинителство изјавија дека Јанева нема да присуствува на седницата. Оттаму велат дека специјалната обвинителка нема законска обврска да учествува на седницата ниту досега било практика раководителите на обвинителствата во Република Македонија да присуствуваат и да реферираат пред Советот за вакви извештаи, како и тоа дека треба да се има предвид автономијата на Специјалното јавно обвинителство.