!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Кривични пријави против четворица момчиња за извршени разбојништва во Карпош и Центар


Скопје, 7 јануари, 2018 - 12:27 (META) 

Секторот за внатрешни работи Скопје поднесе кривични пријави против Л.А. (21), Ф.С. (20), Џ.Ќ. (17) и Б.Е. (19), сите од Скопје, поради постоење основи на сомнение за сторени кривични дела, разбојништво.

Пријавените ги извршиле кривичните дела во периодот од 27 до 30 декември 2017 година, на подрачјето на општините Карпош и Центар во вечерните часови, и на тој начин се стекнале со противправна имотна корист од околу 80.500 денари.

На 27 декември 2017 година, околу 20.30 часот во Градски парк во Скопје, кај големото езерце, Л.А., Ф.С. и Џ.Ќ. со закана со нож на оштетениот му го побарале мобилниот телефон и пари, по што го турнале во езерцето. После тоа побегнале од местото на настанот.

На 28 декември 2017 година, околу 20.00 часот на улица Јордан Хаџи Константинов-Џинот, четворицата пријавени пресретнале четири малолетници и со закана со нож и метален боксирач од оштетните одзеле пари и мобилни телефони.

На 29 декември 2017 година околу 22.30 часот на пешачката патека на кејот на реката Вардар, Л.А., Ф.С. и Џ.Ќ., со закана со ножеви, од две лица одзеле паричник и мобилен телефон. Пријавените физички нападнале едно од оштетените лица затоа што им се спротивставил. Откако го извршиле кривичното дело, Л.А. го продал телефонот на лице од село Кондово. Лицето кое го купило мобилниот телефон подоцна заклучило дека телефонот не му припаѓал на продавачот. Настанот го пријавил во полициска станица, а мобилниот телефон го вратил.

По преземени оперативни мерки било утврдено дека можни сторители на кривичните дела се горенаведените лица. Подоцна, во полициска станица, пријавените биле препознаени од оштетените. По извршен разговор со четворицата пријавени, истите ги признале делата.


Уапсен бегалец од „Идризово“ кој за неколку месеци извршил десет кривични дела


Куманово, 9 ноември, 2017 - 14:08 (META) 

Екипи на СВР Куманово во координација со Централните полициски служби на МВР, вчера попладне го уапсиле 39-годишниот О.М. од Куманово, кој се барал со потерница поради бегство од затворот „Идризово“.

Уапсениот О.М., како што соопштија денеска од МВР, подолг период бил во бегство, а претходно издржувал затворска казна од 20 години поради убиство и трговија со дрога.

Според полициските информации, тој во периодот додека бил во бегство на подрачјето на Куманово извршил десет кривични дела, односно шест разбојништва, три тешки кражби и одземање на моторно возило.


Притворен разбојник што ограбил девет аптеки во Скопје


Скопје, 20 јули, 2017 - 12:52 (META) 

Основното јавно обвинителство Скопје отвори истражна постапка против против едно лице кое се товари дека извршило девет разбојништва во исто толку аптеки во Скопје.

Како што соопшти денеска обвинителството, осомничениот, кој е на 44-годишна возраст, разбојништвата ги извршил во периодот од 23 јуни до 18 јули, заканувајќи се со пиштол кон вработените во аптеките, од кои однел извесна сума пари.

Судот на барање на надлежниот обвинител, на осомничениот му одредил 30 дена притвор поради опасност од бегство, можно влијание на сведоци и од повторување на делото.


Во акцијата „Којот“ осомничени и полицајци од СВР Велес


Скопје, 20 јули, 2016 - 16:06 (META) 

Во акцијата „Којот“, што утрово ја спроведоа Обвинителството за гонење организиран криминал и корупција и Одделот за сузбивање организиран и сериозен криминал на МВР, била разбиена криминална група, од која дел биле полицајци вработени во СВР Велес. Членови на групата се товарат за злосторничко здружување, разбојништва, трговија со дрога и за криумчарење мигранти.

Според МВР, во акцијата се осомничени вкупно 24 лица, од кои 14 се уапсени денеска, пет во претходните некoлку дена, додека по три лица сè уште се трага. Едно од нив е надвор од земјава, а еден осомничен е на издржување затвoрска казна.

Како организатори на криминалната група се осомничени тројца велешани, од кои еден бил вработен во Секторот за внатрешни работи Велес.

„Групата почнала да дејствува на почетокот на 2015 година на национално и на меѓународно ниво. Вршеле кривични дела од областа на насилниот криминал, недозволена трговија со дрога, криумчарење мигранти и коруптивни кривични дела. Во вршење на криминалните активности, учествувале и полициски службеници од СВР Велес. Полициските службеници дејствата при вршење на кривичните дела ги извршувале и за време на работа и во врска со својата службена положба, притоа истата ја злоупотребувале за на криминалната група да ѝ овозможат информации и друга помош и логистика за успешно извршување на кривичните дела, меѓу што и обезбедување на полициска униформа за вршење на кривичните дела, а во неколку случаи и активно учествувале во извршувањето на делата“, велат од МВР.

Полицијата извршила претреси на 24 локации во Велес, Неготино, Гевгелија и во Скопје, во кои биле пронајдени автоматски пушки, рачна бомба, пиштол, дробилка за марихуана, муниција за огнено оружје, службена документација – доставници за судски акти за извршување и документација од исплата на пари.

Според МВР, во истрагата било утвредено дека групата организирала транспорт на најмалку 559 мигранти, во што учестувал и затвореник од гевгелискиот затвор, кој ги наоѓал мигрантите и ги правел првичните договори околу шверцот.

„Двајца од вкупно тројцата организатори на криминалната група биле организатори и на разбојништвото што се случи во Велес на 8 февруари годинава, кога од вработени во агенција за обезбедување беа одземени четири касети, сопственост на Стопанска банка, во кои имало 4 милиони денари. Исто така, утврдено е дека првопријавениот 35-годишен велешанец на територијата на Велес и на Штип подолго од една година организирал поголема мрежа на дилери на дрога“, информираат од МВР.


Прилепчанец и велешанец притворени поради серија разбојништва и кражби


Прилеп, 28 мај, 2015 - 12:23 (META) 

Надворешната канцеларија за криминалистички работи при полициската станица во Прилеп, поднела кривична пријава против велешанецот И.А.(18) и прилепчанецот И.И.(23), осомничени дека во изминатите два месеци извршиле шест разбојништва и тешки кражби.

Според полициските информации, осомничените насилно, со туркање и со истргнување, од своите жртви што ги пресретнувале на прилепските улици, одземале златен и сребрен накит, чанти со пари, мобилни телефони и документи.

Судија на претходна постапка на осомничените им одредил мерка притвор од 30 дена, додаваат од полицијата.


Прилепчанец осомничен за седум разбојништва


Прилеп, 13 јануари, 2015 - 12:34 (META) 

Судија на предходна постапка му одредил 30 дена притвор на прилепчанецот А.А. (28), осомничен дека во декември, минатата година, извршил седум разбојништва.

Според полициските информации, притворениот, во периодот од 12 до 24 декември, насилно ограбил седуммина прилепчани, од кои одзел златен накит во вкупна вредност од 58.000 денари.

Против него е поднесена кривична пријава за разбојништво, информираат од МВР.