Продолжува комисиската расправа за ребалансот на буџетот


Скопје, 1 ноември, 2018 - 9:36 (META) 

Собраниската Комисија за финансирање и буџет денеска ја продолжува расправата за предлог-измените и дополнувањата на буџетот.

Пратениците на опозицијата поднесоа 180 амандмани и ја критикуваат власта за слабиот економски пораст и нереализирање на капиталните инвестиции.

Со предложениот ребаланс на буџетот од страна на Владата, најголема алокација на средства има за општините за кои се обезбедува финансиска поддршка во висина од 3,020 милијарди денари, со цел намалување на доспеаните, а неплатени обврски.

Денеска е трет ден од расправата во матичната комисија, а законски најмногу се предвидени до 10 дена.


Ребалансот на буџетот опозицијата го оценува за нереален, расправата продолжува и денеска


Скопје, 30 октомври, 2018 - 9:21 (META) 

Расправата по ребалансот на буџетот продолжува и денеска во собраниската Комисија за финансирање и буџет. Опозицијата, која поднесе 180 амандмани, ја критикува власта за економските политики и ребалансот го оцени како нереален.

Во расправата пратениците истакнаа дека нема да се оствари ниту намалената стапка на пораст на економијата од 2,8 проценти, а ги потенцираа и намалените капитални инвестиции за 100 милиони евра. Оттука, тие побараа оставка од министерот за финансии Драган Тевдовски кој го образложи ребалансот.

Пратениците од власта пак, за позитивно го оценија тоа што најголем дел од средствата ќе се реалоцираат кај општините, поради долговите кои, како што рекоа се наследени од претходната власт.

Со ребалансот на буџетот се предвидува ревидирање на проекцијата за раст на домашниот бруто-производ (БДП) на 2,8 проценти, задржување на буџетскиот дефицит на 2,7 отсто и намалување на приходната и расходната страна за 0,5 отсто.

Дополнителни средства се обезбедени и за Фондот за пензиско и инвалидско осигурување, Фондот за здравствено осигурување и Агенцијата за вработување. Најголема алокација во ребалансот, има за општините за кои се обезбедува финансиска поддршка во висина од 3,020 милијарди денари, со цел намалување на доспеаните, а неплатени обврски.

Расправата во Комисијата треба да трае најмногу 10 работни дена.


РТС известува дека пратеници на ВМРО-ДПМНЕ се под притисок, а Заев има мнозинство


Белград, 10 октомври, 2018 - 17:04 (META) 

Во прилог под наслов „Македонија, пратениците на ВМРО-ДПМНЕ под притисок“, Радиотелевизија на Србија (РТС) денеска извести дека пред почетокот на денешната расправа во уставната комисија во македонското Собрание, 11 пратеници на ВМРО-ДПМНЕ се согласиле да ги поддржат уставните измени и така да обезбедат двотретинско мнозинство.

Повикувајќи се на информации на телевизијата „Алсат-М“, РТС потенцираше дека владата на Зоран Заев успеала да обезбеди двотретинска поддршка за уставните измени и да избегне вонредни избори.

Сепак, јавниот радиодифузен сервис на Србија ги пренесе и тврдењата на високите функционери на ВМРО-ДПМНЕ дека тие шпекулации се неточни и дека е „малку веројатно некој од пратениците да гласа спротивно на волјата на граѓаните на Македонија искажана на референдумот“.

Наспроти ваквите тврдења од врвот на најголемата опозициска партија, фактите зборуваат дека на референдумот излегоа 666.344 граѓани, од кои 609.427 граѓани, односно огромно мнозинство од излезените, се определија за прифаќање на на Договорот со Грција, поддржувајќи ја владата. Со други зборови, огромно мнозинство од граѓаните ги поддржаа евроатлантските интеграции. За тоа пишуваше и „Вистиномер“, соочувајќи ги изјавите на претседателот Ѓорге Иванов со реалните бројки.

Повикувајќи се на македонски медиуми, РТС наведува и дека одреден број поранешни функционери на ВМРО-ДПМНЕ се вклучиле во убедување на пратениците на оваа партија да ги поддржат уставните измени.

Претходно, белградска „Политика“, пишуваше дека „новиот претседател на ВМРО-ДПМНЕ, Христијан Мицкоски, во кампањата се однесувал како пантомимичар, за разлика од претседателот Ѓорге Иванов, којшто, „кога остана осамен, не се скри во својата резиденција, туку од говорницата на Генералното Собрание на ОН ги критикуваше САД, ЕУ и НАТО, повикувајќи ги граѓаните да го бојкотираат референдумот“.

Ова е само делумно точно бидејќи Иванов ниту остана осамен, ниту пак, се јави само од говорницата  на ОН. Тој, во неколку наврати се изјаснуваше против референдумот и дека тој нема да излезе да гласа.


Јавната седница во Апелација за „Тенк“ заврши, СЈО очекува брза одлука


Скопје, 5 септември, 2018 - 15:57 (META) 

Заврши јавната седницата на Апелација на која се расправаше по жалбата на првостепената пресуда за Никола Груевски и Ѓоко Поповски за предметот „Тенк“.

По првостепената пресуда за „Тенк“ поднесени се шест жалби, четири од адвокатите на Груевски, една лично од Груевски и една од Ѓоко Поповски.

Во жалбата на Груевски е наведено дека во февруари 2018 година настапила застареност на кривичното дело, поради телефонскиот разговор што го направил Груевски на 26 февруари 2012 година. Во неа се посочува дека пресудата е нејасна и противречна поради што се бара укинување на пресудата од првостепениот суд.

Обвинителот од СЈО, Гаврил Бубевски изрази надеж дека Апелациски одлуката ќе ја донесе брзо, за пет до шест дена. Бубевски на седницата ги оцени како неосновани сите жалбени наоди поднесени од адвокатите на обвинетите во овој случај.

Во контекст на тоа додаде дека, „се неосновани жалбите на адвокатите за ангажираните вештаци за високите трошоци направени за вештачењето.“

– Во моментот кога се носеа наредби за вештачење прво се консултиравме со домашни стручњаци од оваа област. Но, во тоа време немаше вештак што сакаше да работи за СЈО. Се нафати една странска компанија која има своја подружница овде, свои вештаци а цената на тоа не е превисока – рече Бубевски.

Според него, пресудата не се темели само на бомбите, а и самите прислушувани материјали со решение на Апелацискиот суд се прифатени да бидат доказ во постапката.

На Груевски, како што рече Бубевски, не му застарува делото, бидејќи за него се водат четири активни судските постапки во Кривичниот суд во Скопје.


Извештајот за СЈО ќе се разгледува на комисија в среда


Скопје, 23 април, 2018 - 16:22 (META) 

Седницата за собраниската Комисија за политички систем и односи меѓу заедниците беше прекината пред специјалната обвинителка Катица Јанева да го претстави годишниот извештај за работата на Специјалното јавно обвинителство (СЈО).

Седницата беше одложена поради координацијата на политичките партии, по барање на пратениците од ВМРО-ДПМНЕ.  Претседателот на комисијата го закажа продолжението, кога и треба да се расправа за извештајот на СЈО, за среда во 12 часот.

Претходно Комисијата за поитички систем не прифати неколку извештаи на Државни комисии поради отсуство на нивни овластени претставници, кои не го најавиле отсуството.

Зоран Илиоски, пратеник од ВМРО – ДПМНЕ, неколку пати на денешната седница на Комисијата за политички систем повтори дека не треба да се расправа за извештаите на државните комисии чии претставници не ги удостоија пратениците со присуство на денешната седница.


Одложена расправата за „Титаник“, адвокатите бараат време за увид во доказите


Скопје, 2 април, 2018 - 12:16 (META) 

По речиси два часа изнесување на приговори од адвокатите на обвинитетите, пред почетокот на главната расправа за случајот „Титаник“, судијата Осман Шабани го одложи рочиштето за 12 април, за да им даде на бранителите дополнтелно време за увид во доказниот материјал од Специјалното јавно обвинителство (СЈО).

Четворица од адвокатите приговорија на листите на доказите доставени со цедињата заедно со обвинителниот акт. Тие приговараа дека во тие цедиња имало нови докази или пак недостасувале докази кои им биле приложени во текот на истражната постапка.

На таквите наводи реагираше обвинителката Лиле Стефанова од СЈО која кажа дека поголем дел од адвокатите веќе ги добиле уредно доказите и дека новите приговори се неосновани.

Дополнително, Боро Тасевски, адвокат на дел од обвинитите, меѓу кои и на градоначалникот на Пустец, Едмонд Темелко, побара јавно објавените прислушувани разговори да бидат изземени од доказите, а во прилог на тоа го наведе решението на Кривичниот совет за оценка на обвинителен акт при Основен суд Скопје 1, од ноември 2015 година.

Тој рече дека неговиот клиент Темелко кој за судењата патува од домашен притвор во Ресен, не може да издржи долго време да седи во судницата, поради неговата здравствена состојба.

Судијата Осман Шабани рече дека Судскиот совет тоа го има предвид, и дека секогаш кога на обвинетиот ќе му биде лошо, соодветно ќе реагира.


Јавна расправа утре за Законот за аудио и аудиовизуелни медиумски услуги


Скопје, 26 март, 2018 - 13:47 (META) 

Комисијата за европски прашања на Собранието на Република Македонија утре ќе одржи јавна расправа за предлог-законот за изменување и дополнување на Законот за аудио и аудиовизуелни медиумски услуги.

На дебатата ќе учествуваат членови на Владата на Република Македонија, медиуми, портали, новинарски здруженија, како и претставници на разни институции и невладини организации.

Во јавната расправа, ќе учествуваат и пратениците, кои се  членови на Комисијата за надворешна политика, Комисијата за транспорт, врски и екологија, Мешовитиот парламентарен комитет-Република Македонија и Европска унија и Националниот совет за евроинтеграции.

Постапката за донесување на новите законски измени почна на 14 јули минатата година, со првата јавна дебата, а оттогаш се одржа уште една дебата и низа консултации. Владата на 20 февруари годинава ја усвои конечната верзија, која потоа ја испрати до Собранието.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Ристоска до Груевски: На човек на сила можеш да му земеш, не и да му дадеш


Скопје, 16 февруари, 2018 - 13:40 (META) 

Обвинителката на СЈО, Ленче Ристоска му се обрати на поранешниот премиер, Никола Груевски со народната поговорка „На човек на сила можеше да му земеш, но не и да му дадеш“, на денешното рочиште за случајот „Тенк“, откако адвокатите на одбраната се обидоа да ја прекинат и одложат расправата, бидејќи немале време да го разгледаат цд-то со записникот од претходното рочиште.

Во „Тенк“ покрај Груевски, за набавката на блиндираниот „мерцедес“ од 600 илјади евра обвинети се и поранешната министерката за внатрешни работи Гордана Јанкулоска и поранешниот помошник-министер во МВР, Ѓоко Поповски.

По приговорите на адвокатите дека немале време да го разгледаат записникот, судијката Добрила Кацарска рече оти може да им понуди половина час пауза, како добра волја, а потоа да продолжи рочиштето со воведните говори.

Кацарска посочи дека записниците биле изготвени на 13 февруари, во законски рок, но никој од адвокатите не дошол да ги земе.

– Одбраната беше должна да ги земе записниците. Тие не дојдоа да ги подигнат во рок, па судот вчера телефонски ги извести, а дури денеска пред судење адвокатот Димитар Дангов ги подигна. Затоа нема причина за пауза, но во интерес на одбраната ќе се видиме по пауза од половина час – рече Кацарска.

На ова приговараше Груевски, кој рече дека записници од 17 страни за половина час не може да се прочитаат, на што судијката рече дека била јасна, а Груевски и возврати „не, не бевте“.

Обвинителката од СЈО, Ленче Ристоска кажа оти одбраната знаела дека записниците се изготвени и требало да ги земат.

– Се противам на барањето за пауза и сметам дека тоа го прават се со цел да се одложи главната расправа. Со сила на човек можеш само да му земеш, а не можеш ништо да дадеш – рече Ристовска.

Судењето продолжува по паузата од половина час.


Шилегов ја повлече одлуката за поскапа вода, одлуката на РКЕ била „политикантска“


Скопје, 31 јануари, 2018 - 12:37 (META) 

Градоначалникот на Скопје, Петре Шилегов, на денешната петта седница на Советот на Град Скопје, ги повлече од дневен ред предлог-одлуките со кои беше предвидена промена на цената на водата во Скопје, информираат од таму.

– По извршената длабинска анализа за финансиската состојба и работењето на ЈП „Водовод и канализација“, имајќи предвид дека се политикантски мотивите на Регулаторната комисија, имајќи предвид дека Регулаторната комисија за енергетика (РКЕ) не ја заснова својата одлука на фактите и реалните потреби на граѓаните, предлагам точките 25, 26 и 27 да се симнат од дневниот ред. Додека јас сум градоначалник на Скопје, граѓаните на Град Скопје поради политикантски одлуки на партизирани органи од минатото, нема потреба да плаќаат поскапа вода. Водата ќе остане со истата цена, а ние со домаќинско работење ќе ги сервисираме сите потреби на јавното претпријатие – рекол Шилегов на седницата на Советот.

Инаку, вчера и Владата исто така и препорача на РКЕ да не ја поскапе водата за корисниците на Јавното претпријатија за водоснабдување „Студенчица“ од Кичево.

На денешната прес-конференција во Влада пак, на новинарско прашање дали не сметаат дека препораката до РКЕ е мешање во работата на ова тело, кое треба да биде независно, портпаролот Миле Бошњаковски појасни дека „токму и затоа избираат внимателни зборови, односно не бараат туку само препорачуваат да не се поскапи водата“.


Пратениците попладнево релаксирани, Џафери им се заблагодари за трпението – и спасението


Скопје, 30 јануари, 2018 - 19:46 (META) 

Со зборовите „За продолжението дополнително ќе бидете известени, благодарам за трпението – и спасението“, претседателот на Собранието на Република Македонија вечерва ја заврши 32-та седница, на која поради немање кворум во попладневното продолжение само еден закон со гласање беше пратен на комисиска расправа. Во салата не беа пратениците од ВМРО-ДПМНЕ и коалицијата.

Сите други предлог-закони и одлуки поминаа без расправа, оти речиси никој не се пријавуваше за збор. Во салата имаше многу малку пратеници, па немаше услови да се врши гласање.

Поради тоа Џафери рече дека гласање за точките ќе има на продолжението на седницата, за која првично зборуваше дека ќе се одржи в четврток, за потоа на самиот крај да се поправи и да каже дека поради други обврски на пратениците в четврток, накнадно ќе го закаже продолжението на 32-та седница.

Расправа од говорницата имаше само Томислав Тунтев, координатор на пратеничката група на СДСМ, кој зборуваше за предлог-законите за намалување на парите што ќе се исплаќаат за патни трошоци на пратениците, односно предлог законите за измена на Законот за плати  и други надоместоци на избрани и именувани лица во Република Македонија и на Законот за пратеници. Притоа, Тунтев и Џафери навлегоа во долга расправа  за издржаноста на некои решенија и за надлежностите на собранискиот спикер.