!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Чавков: Пратениците утре ќе имаат непречен пристап во Собранието


Скопје, 20 март, 2017 - 17:01 (META) 

Утре пратениците ќе имаат безбеден и непречен пристап во парламентот, вели за „Дојче веле“ директорот на Бирото за јавна безбедност (БЈБ) Митко Чавков.

Утре, во 12 часот, во Собранието треба да се одржи координација на парламентарните политички партии за формирање на Комисијата за избори и за именување, како основа за продолжување на конститутивната седница за избор на претседател на Собранието.

Утре напладне во земјава доаѓаат и еврокомесарот за проширување и за добрососедска политика, Јоханес Хан, и тројцата европратеници Иво Вајгл, Едвард Кукан и Кнут Флекенштајн. По тој повод, членовите на граѓанската иницијатива „За заедничка Македонија“ најавија масовен протест.

– Во МВР функционира штаб кој непрекинато заседава и ги следи сите информации. Полицијата презема оперативни планови во согласност со тие информации и безбедносни проценки. Врз таа основа ги димензионираме персоналните капацитети и материјално-техничките средства – изјавил Чавков.

На прашањето дали полицијата гарантира дека пратениците нема да бидат оневозможени да влезат или да излезат од Собранието, со оглед на разни најави дека учесници во протестот ќе ги блокираат приодите во законодавниот дом, Чавков бил дециден: „Сигурно е дека пратениците ќе имаат безбеден и непречен пристап во парламентот!“

Според „Дојче веле“, средбите на еврокомесарот со лидерите на партиите ќе почнат во 12.40 часот.

Првата средба ќе биде со лидерот на ДПА, потоа со Беса во 13 часот и со Алијанса за Албанците од 13.50 часот. Средбата на Хан со лидерот на ДУИ, Али Ахмети, е планирана за 14.55, со лидерот на СДСМ, Зоран Заев, во 16.10 часот, а со претседателот, Ѓорге Иванов, во 17.45 часот. Потоа е предвидена средба на Хан со претседателот на Собранието, доколку биде избран дотогаш. Последната средба во 20.15 часот ќе биде со лидерот на ВМРО-ДПМНЕ, Никола Груевски, по што во 21.45 часот еврокомесарот ќе даде изјава за медиумите.


Распределбата на судиите е „државен удар на ранетиот ѕвер“, смета Арифи


Скопје, 22 февруари, 2017 - 10:35 (META) 

Најопасна од сите видови власт е власта во заминување, вели Беса Арифи, вонреден професор на Универзитетот на Југоисточна Европа, во колумна со наслов „Државниот удар на ранетиот ѕвер“ за „Нова ТВ“.

За Арифи не постои друг начин на толкување на чистката што в.д. претседателката на Основен суд Скопје 1 ја направи преку последната прераспределба на судиите во овој суд. Таков напад врз најважните органи на правосудството на една земја не е само обичен државен удар ниту, пак, е само обид да се задржи што е можно подолго ослабената власт, туку е негирање на целосното постоење на една земја како демократска држава, смета Арифи.

Според неа, ова е обид да му се затворат сите порти на правдата на Специјалното јавно обвинителство (СЈО) и целосно да се оневозможи кое било негово обвинение или истрага да дочека обелоденување преку фер и непристрасно судење.

– Додека потенцијалните коалициони партнери на идната влада си разменуваат мислења и забелешки околу закон, кој, впрочем, се знае како и каде се подготвува во нормални земји и во нормални демократии, во околината се случуваат загрижувачки работи. Пратеник од новото не докрај конституирано Собрание станува цел на физички напад, блиски роднини на други поранешни пратеници или функционери ненадејно стануваат осомничени за тешки дела, трговците, еснафот и граѓаните на „одметнатите“ градоначалници стануваат таргет на сè поинтензивните претстави на покажување моќ и сила и на праќање пораки да бидат претпазливи со кого „се закачуваат“ и што може да ги снајде – пишува Арифи и заклучува дека „времето чини многу“, а дека секој миг што нè држи далеку од долго очекуваната слобода е директно вложување во понатамошното траење на ропството, кое „не може да се оправда на ниту еден јазик“.


ДИК го објави распоредот на прес-конференциите за изборите


Скопје, 9 декември, 2016 - 10:26 (META) 

Државната изборна комисија (ДИК) го објави распоредот на прес-конференциите што ќе се одржат утре и задутре (10 и 11 декември) во нивните простории.

За утре, 10 декември, ДИК закажа прес-конференција во 12 часот, на која ќе се говори за логистиката на денот на изборите.

За недела, на 11 декември, закажани се прес-конференции во 11, 14 и во 18 часот, на кои ќе се соопштува излезноста на граѓаните. Од 19 часот па натаму ќе бидат соопштувани резултатите од избирачките места во живо.

– Прес-конференциите се отворени за домашните медиуми, домашните и странските акредитирани набљудувачи, странските акредитирани новинари, како и за овластените претставници на подносителите на листи на кандидати – се вели во соопштението на ДИК.


Шилегов го повика Груевски в среда да сведочи пред Анкетната комисија


Скопје, 7 декември, 2015 - 18:57 (META) 

В среда, во 11 часот, членовите на Анкетната комисија за скандалот со прислушувањето како сведок ќе го сослушаат премиерот Никола Груевски, в четврток Мартин Протоѓер и Зоран Ставрески, в петок Сашо Мијалков, на 14 декември ќе биде сослушана Гордана Јанкулоска, а на 15 декември Миле Јанакиески, соопшти денеска претседателот на комисијата, Петре Шилегов.

– Во текот на денешниот ден, како претседател на Анкетната комисија, преку целиот ден се обидував да направам координација со пратеничката група на ВМРО-ДПМНЕ за да можеме да го составиме редоследот на сведоците што треба да се појават од среда, па натаму на сведочење за анкетната комисија. За жал, не успеавме. Сè до давањето на оваа изјава, во архивата на Собранието на Република Македонија ниту еден од прозваните сведоци за сослушување не се произнесе писмено за кога може да присуствува на сослушувањето, т.е. да биде сослушан како сведок пред анкетната комисијата и бидејќи немаме никаква писмена конфирмација, како претседател на комисијата, на јавноста, но и на повиканите лица, во согласност со деловникот за работа, им го соопштувам редоследот на сослушување – изјави Шилегов.

Шилегов рече дека распоредот е јавен повик до лицата во посочените термини да се јават пред анкетната комисија и да дадат сопствена изјава за фактите, околностите и за содржината за објавените прислушкувани разговори.

Од извори од Комисијата дознаваме дека се уште не постои одлука дали сослушувањата ќе бидат тајни или отворени за јавност.

Според деловникот за работа на комисијата, сведоците можат да побараат таа да биде затворена за јавност, но, исто така, тоа можат да го побараат и членовите на комисијата со мнозинство гласови. Сведоците што ќе бидат повикани од Анкетната комисија немаат законска обврска да прифатат да сведочат.