Ветерот го исфрли сметот од Охридско Езеро на кејот


Охрид, 7 март, 2018 - 9:59 (META) 

Силниот јужен ветер го исфрли сметот од Охридско Езеро на кејот и на пристаништето.

Екипи на „Охридски комуналец“ од рано утрово работат на расчистување на отпадот и трската што ги фрлаат езерските бранови.

Од Општина Охрид информираат дека ваквата активност најверојатно ќе се реализира и наредниве денови по најавите на метеролозите дека ќе дува јужен ветер со посилен интензитет.

 


Почна расчистувањето на насипите во Вардар кај галиите


Скопје, 7 февруари, 2018 - 15:31 (META) 

Град Скопје денеска почна со расчистување на насипите и градежниот материјал во коритото на реката Вардар во центарот на Скопје, односно меѓу мостот Гоце Делчев и Камениот мост.

Активностите се со цел да се намали опасноста од излевање на реката Вардар при поголеми врнежи од дожд.

– Насипите и градежниот шут во Вардар ја намалуваат проточноста на водата, а со тоа сериозно се зголемува ризикот од поплави. Од тие причини, овие неколку дена екипи на ЈП „Улици и патишта“ ќе работат на расчистување на теренот, а истовремено му е наложено на градежното претпријатие „Бетон“, како изведувач на објектот „Панорамско тркало“, да го среди своето градилиште и да овозможи максимална проточност на коритото во делот на тој пешачки мост. Дождовите ја открија опасноста по безбедноста на граѓаните, нивните имоти и објектите околу Вардар која е предизвикана од проектот „Скопје 2014“. Акцијата ќе трае се до целосно расчистување на коритото – рече скопскиот градоначалник Петре Шилегов.


Тетовци истурија отпад пред Општината и побараа оставка од Арифи


Тетово, 20 август, 2017 - 16:16 (META) 

Протестот на тетовци за чист воздух помина мирно, а граѓаните побaраа оставка од градоначалничката на Тетово, Теута Арифи. Тие истурија отпад пред зградата на Општината и извикуваа „Сакаме да дишеме“ и „Еве ви го отпадот“.

Граѓаните најпрво се собраа на плоштадот, а од таму се упатија кон зградата на Општината.

Тие денеска се жалеа на неподнослива миризба која се чувствуваше во градот, откако синоќа беше изгаснат пожарот на депонијата.

Генералниот секретар на Владата, Драги Рашковски, најави дека расчистувањето на тетовската депонија ќе почне утре.


Македонските акцијаши и волонтери на собрание и на работа во Охрид


Охрид, 13 мај, 2017 - 14:44 (META) 

Сојузот на акцијаши и на волонтери на Македонија, денеска во Охрид го оддржува првото годишно собрание. Акцијашите и волонтери го  разгледуваат извештајот за едногодишната активност. Ќе се разговара и за подготовките за меѓународен волонтерски камп – „Охрид 2017“.

По состанокот, македонските акцијаши и волонтери, организирани од охридските колеги, ќе изведат акција за расчистување на зелениот простор од Билјанини извори до хотел „Белведере“, во соработка со ЈП „Охридски комуналец“.

– Тоа се истите наши другари и пријатели од целата земја кои, заедно со своите пријатели, возрасни и млади членови од Балканот, први со својата хуманост, солидарност и акција, се вклучија и помогнаа на несреќните од поплавите во Скопје – вели за „Мета“ Зоран Стевоски, од акцијашкиот клуб „Брег на младоста“ од Охрид.


Отстранета импровизираната експлозивна направа од Собранието


Скопје, 3 мај, 2017 - 13:28 (META) 

Одделот за антитероризам при МВР ја подигнал импровизираната експлозивна направа од Собранието за понатамошна постапка, информираат од МВР.

Оттаму додадваат дека се преземаат мерки за целосно расчистување на настанот.

Вчера, во 17.28 часот, во Единицата за информирање и команда (ЕИК) Скопје, началникот на обезбедувањето на Собранието пријавил дека во ходникот на првиот кат е пронајдена импровизирана експлозивна направа, петарда со фитиљ кој бил залепен со леплива лента на плинска боца за полнење запалки.


Град Скопје: Утрово фрлени 50 тони сол на улиците и на булеварите


Скопје, 16 јануари, 2017 - 10:06 (META) 

Од почетокот на снежните врнежи утрово, екипите на зимската служба на Град Скопје фрлиле 50 тони сол на градските улици и булевари, соопштија од Град Скопје.

Оттаму велат дека паралално со коловозите, екипи од јавните претпријатија на Градот Скопје работат на расчистување на снегот и на мразот од тротоарите и од јавните површини.

„Во расчистувањето на тротоарите и јавните површини ангажирани се 100 работници и механизација од ЈП „Комунална хигиена“, работници и механизација од ЈП „Паркови и зеленило“, како и работници од ЈП „Водовод и канализација“ кои работат на чистење на сливниците“, стои во соопштението.

Градот Скопје им препорачува на возачите да возат внимателно и да се придржуваат на условите на коловозите.

„Потсетуваме дека во надлежност на Град Скопје се булеварите и одредени градски улици, а преостанатите улици се во надлежност на општините и тие се задолжени за нивно чистење и одржување. Апелираме до граѓаните, куќните совети и до сопствениците на деловните објекти да се придржуваат до законската обврска за чистење на снегот од приодите до нивните објекти. JП „Комунала хигиена“ апелира општините да ја реализираат нивната обврска за чистење на улиците кои се во надлежност на општините и апелира за поголема ажурност во оваа област заради непрекинато собирање на комуналниот смет“, стои во соопштението од Град Скопје.


Битолско Мариово три дена завеано во снег


Битола, 9 јануари, 2017 - 11:47 (META) 

Битолскиот дел на Мариово веќе неколку дена е отсечен од цивилизацијата со наноси од снег и по еден метар. Селото Гермијан, каде има околу стотина жители, веќе трет ден нема комуникација со градот, а иста е состојбата во уште дваесетина села во општина Новаци.

Отсечени се селата Гермијан, Бач, Живојно, Брод, Скочивир, Добровени, и од другата страна Градешница, Старавина и Зовиќ.

– Патот е исчистен само до селото Кременица до фармите на ЗК „Пелагонија“, а сите други села во Мариово се завеани со метар до метар и половина снег. Седиме дома, месиме леб и јадеме тоа што имаме во фрижидерите, чекаме расчистување на патот, бидејќи поради снегот не се знае каде е асфалтот, а каде се ендеците – вели во телефонски разговор жител на селото Гермијан.

И од Општина Новаци потврдуваат дека снегот и мразот направиле проблеми во комуникацијата со битилскиот дел на Мариово.

Градоначалникот на Општина Новаци, Лазе Котевски, вели дека битолскиот дел на Мариово е со големи наноси од снег. Според него, во најголем дел од селата има по пет-шест жители  и дека од утрово е ангажирана механизација за расчистување на патиштата.


Блокирани патишта и отсечени села во источна Македонија поради големи снежни наноси


Штип, 6 јануари, 2017 - 11:38 (META) 

Со интервенција на полицијата повремено се пропуштаат возила од двете страни на патот Штип – Кочани, каде сообраќајот неколку часа беше во целосен прекин поради големите снежни наноси. Силниот ветер што дуваше цела ноќ, а продолжи и утрово, создаде наноси високи и до два метри кај селото Крупиште, поради што привремено беше затворен патот Штип – Кочани.

На барање на Јавното претпријатие „Македонија пат“, полицијата целосно го стопираше сообраќајот кај селото Долни Балван за да може механизацијата да ги расчисти наносите.

– Ќе треба уште минимум еден час за да се расчистат наносите кај Крупиште и целосно да се оспособи делницата. Проблем се и возилата, кои се неподготвени за зимските услови и без зимска опрема дополнително го попречуваат работењето на екипите на „Македонија пат“ – изјави техничкиот директор на подружницата на „Македонија пат“ во Штип, Киро Коцев.

Дополнително отежнување се паркираните шлепери и друг вид на тешки товарни возила поради забраните за нивно движење речиси на сите патишта во источна Македонија. Забраната стапи на сила синоќа во 23 часот, до кога екипите на „Македонија пат“ го одржуваа патот кон границата со Бугарија, со цел да поминат поголемиот дел од тешките возила кои транспортираат стока кон и од Бугарија.

Доцна синоќа извлечен е и автобусот на „Берово транс“, кој беше заглавен кај планинскиот превој Обозна, а патниците апелираа за помош.

Обилните врнежи од снег создадоа проблеми и во Овчеполието. Силниот ветер создаде наноси кај Сарамзалино, каде утринава екипите на „Македонија пат“ го разчистувале овој дел од патот. На патот Велес – Штип се вози забавено, со повремени, мали застои и во зимски услови.

Селата што гравитираат кон Врсаково и Долани се целосно отсечени. Општина Штип соопшти дека четири екипи работат на деблокирање на селата.

Во Кочани се расчистени улиците, но останува да се пробие патот кон Пониква, кој од синоќа е целосно затворен за сообраќај и се очекува да биде расчистен во текот на денот.

Од „Македонија пат“ соопштуваат дека е клучно денеска да бидат расчистени патините правци, бидејќи ако се остварат најавите на метереолозите за температури и до минус 20 Целзиусови степени, ќе има проблеми во расчистувањето, бидејќи солта не дејствува на температури под минус 7 Целзиусови степени.


„Македонијапат“: Работиме на оспособување на сите проблематични делници


Скопје, 8 август, 2016 - 21:09 (META) 

Поради обилните врнежи од дожд и надојдената вода, во прекин е сообраќајот по обиколница Скопје, од клучка Хиподром до клучка Сарај. Прекинот ќе трае до завршување на активностите околу расчистувањето и оспособувањето на патниот правец за нормално одвивање на сообраќајот, соопшти јавното претпријатие „Македонијапат“.

Од таму наведуваат дека нивните екипи се постојано на терен со комплетна механизација (возила и градежни машини) и работат на оспособување на сите проблематични делници, а во некои случаи даваат помош и на некои локални самоуправи каде што имаат потреба од механизација, како што е патниот правец Шипковица – Бродец.

– „Македонијапат“ ја следи состојбата будно, реагира експресно на сите поставени задачи, а граѓаните можат да се обратат кај нас за подетални информации на нашиот дежурен тел. број 02/ 25 61 502 или да ја посетат нашата веб-страница која се ажурира на секои два часа – велат од претпријатието.

Претпријатието апелира на внимателно управување со возилата, почитување на поставената сообраќајна сигнализација, како и прилагодување на брзината кон условите на патот.


Пустош во Ченто по невремето: Скокале од балкони за да се спасат од поплавите


Скопје, 7 август, 2016 - 15:55 (META) 

Возило на Итната медицинска помош само што изнесе средовечна жена од нејзиниот дом во населбата Ченто, која, како што раскажуваат членови на нејзиното семејството, во обид да ја избегне поплавата во куќата, од синоќешното невреме, морала да скокне од балконот на првиот кат.

Соседите велат дека состојбата на улицата Алија Авдовиќ била најстрашна. Поплавени се сите дворови и подруми, а водата однела и дел од бетонските огради на куќите. Речиси од секој објект во населбата може да се видат граѓани како со кофи и пумпи ја испумпуваат водата од своите домови.

Главната улица е едвај проодна. Наноси од кал, искршен цемент и бетон има на сите страни. Возилата кои што вчера во екот на невремето биле паркирани по улиците завршиле една врз друга, на крајот на една од споредните улички.

Граѓаните чии што куќи се оштетени и поплавени велат дека досега никој од државните и локаните власти не ги посетил ниту пак понудил некаква помош во расчистувањето на улиците.

На неколку места во населбата има цистерни на комунална хигиена од каде граѓаните полнат чиста вода и се мијат. На почетокот на населбата, во училиштето „25 Мај“ е направен пункт за флаширана вода за пиење.

Одговорните на пунктот велат дека граѓаните доаѓаат да си земат вода, а на оние кои се заглаевни во своите домови или во непроодните подрачја им се носи со комбиња. Во училиштето се собрани екипи на Црвениот крст и на АРМ кои чекаат насоки за натамошно расчистување на теренот и помош за настраданите граѓани.

На секој чекор во населбата можат да се видат полициски и воени возила, како и возила на Итната медицинска помош, багери и трактори кои помагаат во расчистување на теренот.

Во невремето кое вчера го погоди Скопје и околината животите ги загубија 20 лица, а десетици повредени побараа лекарска помош во скопските клиники.

Најмногу погодени се жителите на Стајковци, Ченто, Смилковци и Арачиново, каде се пронајдени телата на загинатите, а пријавени се и големи штети.