!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Вирусот „вонакрај“ можеби е дело на Северна Кореја


Маунтин Вју, 16 мај, 2017 - 11:08 (META) 

Компании за компјутерска безбедност велат оти постојат знаци дека Северна Кореја може да е поврзана со глобалниот кибер-напад преку вирусот „вонакрај“ (WannaCry), кој зарази неколку стотици илјади компјутери во повеќе од 150 земји.

Според првичните заклучоци за изворот на масовниот хакерски напад со вирусот што ги заклучува документите и бара да се плати откуп за да ги отклучи, има многу сличности меѓу него и хакерската акција од 2014 година, што многумина ја припишаа на Северна Кореја.

Тоа го тврди Ник Мехта од „Гугл“, а други експерти бргу го прифатија ова толкување. Истражувачи од безбедносната компанија „Касперски“ велат дека тоа е досега најважната трага за потеклото на вирусот, која, како што велат, може да биде клуч за решавање на мистеријата. Тие објаснуваат дека има делови во кодот што укажуваат на хакерската група „Лазарус“ за која се верува дека стои зад хакерскиот напад на „Сони пикчерс“ во 2014 година, за кој беше обвинета Северна Кореја.


Вирусот „вонакрај“ заразил повеќе од 200.000 компјутери во 150 земји


Лондон, 14 мај, 2017 - 17:27 (META) 

Масовниот кибер-напад во петокот со компјутерскиот вирус „wannacry“ (вонакрај) погодил 200.000 жртви во 150 земји, вели шефот на Еуропол, Рон Вејнрајт за „Би-би-си“. Тој вели дека нападот бил многу голем, како и дека утре наутро може да има и нови напади.

Вирусот е од категоријата „рансомвер“, што значи дека ги заклучува сите документи на заразените компјутери и ако корисникот сака да бидат отклучени за да може да ги користи, треба да плати одредена сума пари.

Меѓу најпогодените земји се Русија и Обединетото Кралство.

Според Вејнрајт, иако претходно привремено решение го спречи ширењето на вирусот, авторите на „вонакрај“ направиле понова верзија.


Сопрен вирусот што вчера погоди десетици илјади компјутери во светот


Лондон, 13 мај, 2017 - 8:50 (META) 

Ширењето на компјутерскиот малвер „wannacry“ е сопрено од еден компјутерски експерт, кој го пронашол „прекинувачот за исклучување“ во вирусот. Тој регистрирал веб-страница за неколку долари, со чија помош се активира „прекинувачот“ што го создале авторите на злонамерната програма, за случај да сакаат да ја стопираат.

Станува збор за експерт за компјутерска безбедност од Велика Британија, кој открил дека „прекинувачот“ се активира од еден домен, односно веб-адреса. Авторите на малверот предвиделе домен со бесмислено име, кон кој вирусот испраќа барања за посета. Сè додека добива одговор дека не постои таков домен, вирусот е активен. Но, првиот пат откако ќе добие одговор дека има таква бев-страница – благодарение на експертот од Велика Британија, кој го регистрирал доменот, малверот „wannacry“ се деактивира, односно престанува да се шири и да заразува други компјутери.

Сепак, веќе заразените компјутери нема да имаат полза од ова, туку ќе мора да се „чистат“ со веќе постоечки методи или програми.

Од овој малвер беа погодени Националниот здравствен систем НХС на Велика Британија, а напади се пријавени и во Шпанија, Италија, Кина, Русија, Украина, Виетнам и во Тајван, меѓу другите.

Истражувачот на малвер за антивирусната компанија „Аваст“, Јакуб Кроустек, на „Твитер“ објави дека се детектирани 36.000 напади и дека најтешко се погодени Русија, Украина и Тајван.

Напади се детектирани во дури 74 земји во светот.