!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Еден полицаец е убиен, а друг ранет во престрелка во центарот на Париз


Париз, 20 април, 2017 - 22:23 (META) 

Еден полицаец е убиен, а друг е ранет во вооружен напад што вечерва се случил во центарот на Париз, соопштила француската полиција, пренесува „Би-би-си“.

Според информациите на дел од француските медиуми, напаѓачот кој отворил оган кон полицајците бил застрелан и убиен. Престрелката се случила на авенијата Шанзелизе, која е целосно блокирана и каде во тек е операција на француските безбедносни сили.

В недела во Франција се одржува првиот круг од претседателските избори, а џихадизмот е главната тема на изборите по нападите што беа извршени од Исламска држава.

Причините за нападот засега се непознати, а како што пренесува „Би-би-си“, засега нема индиции ниту дека станува збор за терористички напад.


Насилници кај Сарај раниле еден маж и претепале друг


Сарај, 4 април, 2017 - 16:48 (META) 

Во два напада што се случиле на исто место близу Сарај вчеравечер, и веројатно се предизвикани од исти лица, еден маж е ранет, а друг бил претепан.

Како што извести СВР Скопје, вчера 25 минути пред полноќ Ш.А. пријавил дека на патот од Сарај кон село Љубин, лице од село Грчец заедно со други лица со три патнички возила, пукале кон него и кон К.А., при што К.А. добил со прострелна рана во ногата. Напаѓачите потоа избегале кон Грчец.

Во исто време вчера во полиција Б.Љ. пријавил дека на истата локација физички бил нападнат од страна на неколку непознати лица при што се здобил со видливи повреди и истиот е пренесен во Специјалната хируршка болница „Св.Наум Охридски“. Полицијата вели дека работи на расчистување на случајот.


Српскиот бизнисмен Пецони e ранет во центарот на Белград


Белград, 22 март, 2017 - 22:30 (META) 

Српскиот бизнисмен Предраг Ранковиќ – Пeцони вечерва е ранет во вооружена престрелка во хотелот „Праг“, во центарот на Белград, јавува дописничката на „Мета“ од Белград.

Тој бил префрлен во клинички центар, но не е во животна опасност.

Според неофицијалните информации, Ранковиќ седел во ресторанот на хотелот „Праг“ со група луѓе. Кон нивната маса пришол маж, кој почнал расправија и потоа посегнал по пиштол.

Луѓето кои седеле со Пецони почнале врз него да фрлаат столови, но напаѓачот успеал да го погоди Пецони во нога.

Полицијата работи на расветлување на случајот.

Ранковиќ е познат српски бизнисмен во чијашто сопственост е и телевизијата „Хепи“.


Tинејџер ранет во Брњарци, полицијата вели – од залутан куршум


Скопје, 12 март, 2017 - 13:03 (META) 

Тинејџер ноќеска во селото Брњарци добил куршум во десната натколеница, соопшти СВР Скопје, велејќи дека станува збор за заталкан куршум.

Инцидентот се случил во 1.15 часот, кога 17-годишен малолетник од Стајковци бил во Брњарци, по што бил ранет. Потоа е пренесен во Хируршката болница „Свети Наум Охридски“, каде е утврдена огнострелна рана, односно тешка телесна повреда, и е задржан на лекување.

Полицијата вели дека се работи на расчистување на случајот.


Ранет рускиот амбасадор во Турција


Анкара, 19 декември, 2016 - 17:35 (META) 

Рускиот амбасадор во Турција, Андреи Карлов, е ранет во вооружен напад и е сериозно повреден, јавуваат турските медиуми.

Амбасадорот Карлов бил ранет за време на неговата посета на изложба во уметничка галерија.

При нападот биле повредни и неколку други луѓе.

Нападот се случува по протестите во Турција за руската воена интервенција во Сирија.


Мигрант ранет со огнено оружје во близина на селото Хоргош, на српско-унгарската граница


Белград, 3 декември, 2016 - 13:45 (META) 

Непознато лице на 29 ноември пукало во група мигранти во близина на селото Хоргош, на српско-унгарската граница. Во инцидентот еден од мигрантите биле ранет, потврдиле за телевизијата Н1 од српското министерство за внатрешни работи.

Како што информирале оттаму, мигрантот бил ранет со куршум од мал калибар и кај него лекарите констатирале полесни повреди. Полицијата го истражува случајот, а било известено и надлежното обвинителство.

Информацијата за инцидентот е објавена дури денеска од страна на порталите во Унгарија, кои, како што пренесува балканскиот сервис на „Радио Слободна Европа“, навеле дека српските власти „одредиле ембарго“ за објавување информации за случајот.

Според информациите што ги пренесуваат српските медиуми, непознато лице пукало врз тројца мигранти од Иран додека тие се движеле од бегалскиот камп кон блиската бензинска пумпа. Во инцидентот биле ранет 36-годишен маж, а мигрантите забележале три лица како бегаат од надвозникот во близина.

Унгарската телевизија навела дека не се исклучува можноста нападот да бил извршен од шверцери на мигранти.


МВР информираше за сообраќајката, но не и за пукањето и за бркотниците по Партизанска


Скопје, 15 ноември, 2016 - 14:27 (META) 

Министерството за внатрешни работи попладнево излезе со информација за синоќешниот инцидент на булеварот Партизански одреди, во кој беше ранет скопјанецот Даниел Трајковски, но во неа, освен превртувањето на возилото и тоа дека Трајковски имал тешки повреди од огнено оружје, нема детали за пукањето и за бркотницата со автомобили.

Според МВР, за случајот полицијата била информирана од Ургентниот центар, од каде пријавиле дека кај нив било донесено повредено лицето Д.Т. (45) од Скопје.

„На 15 ноември 2016 година во 00.01 часот во ЕИК Скопје (Единицата за информации и команда н.з.) од Ургентен центар Скопје било пријавено дека кај нив било донесено повредено лицето Д.Т. (45) од Скопје. Истиот на 14 ноември 2016 година во 23.35 часот на крстосноцата од булеварот Партизански одреди, улицата Бледски Договор и улицата Париска, управувајќи патничко моторно возило „фолксваген голф“ со скопски регистарски ознаки, изгубил контрола и удрил во бетонска жардињера на средишниот дел од коловозот од булеварот Партизански одреди, по што возилото се превртело на покривот. Од сообраќајната незгода Д.Т. не се здобил со повреди, но кај истиот биле констатирани тешки телесни повреди од огнено оружје во пределот на стомакот, градниот кош и на раката и е неконтактибилен. Се преземаат мерки за целосно расчистување на настанот“, стои во информацијата за настанот, објавена во дневниот билтен на МВР.

Оттаму нема одговор ниту во врска со шпекулациите во јавноста дека станува збор за пресметка меѓу криминални банди, како и за тоа дека е можно синоќешниот инцидент да има и политичка заднина.

Според информациите во медиумите, Трајковски бил ранет во престрелка на која ѝ претходела бркотница со автомобили, која почнала кај бензинската станица на „Макпетрол“ на булеварот Илинден и продолжила низ булеварот Партизански одреди, каде ранетиот скопјанец изгубил контрола над возилото и се превртел на коловозот. Тој бил извлечен од автомобилот и пренесен во болница, а напаѓачот кој пукал во него е во бегство.

Синоќешниот инцидент неофицијално се поврзува со тепачката од 17 април годинава во угостителски објект во Трговскиот центар „Буњаковец“, во која со остар предмет во главата беше прободен 41-годишниот Т.К., според неофицијални информации, телохранител на поранешниот директор на Управата за безбедност и контраразузнавање (УБК), Сашо Мијалков. Во тепачката наводно учествувал еден од браќата Даниел и Дејан Трајковски, познати како „близнаците од Ѓорче“.

„Дневник“ во август годинава, пак, пишуваше дека Даниел Трајковски преку „Фејсбук“ им се заканувал и барал рекет од 50 милиони евра од бизнисменот и сопстевник на МПМ, Орце Камчев, и од ексдиректорот на УБК, Мијалков.

Трајковски, лани во април во полиција пријавил дека имало обид за негово убиство, а подоцна реагираше и обвини дека МВР не презема ништо во врска со случајот.


Криминално-политичка престрелка и бркотница по Партизанска


Скопје, 15 ноември, 2016 - 10:58 (META) 

Четириесет и шестгодишен скопјанец ноќеска, пред полноќ, е ранет во престрелка на булеварот Партизански одреди. Според првичните информации, станува збор за Даниел Т., кој веднаш по инцидентот е пренесен на Клиниката за анестезиологија, реанимација и интензивно лекување (КАРИЛ), каде бил опериран.

На пукањето му претходела бркотница со автомобили, која започнала од бензинската на „Макпетрол“ на булеварот Илинден и продолжила на булеварот Партизански одреди.

Даниел Т. кој, според неофицијални информации, бил ранет со неколку куршуми во престрелката, изгубил контрола и се превртел со своето возило „голф 5“ на булеварот Партизански одреди. Тој бил извлечен од возилото и веднаш префрлен во болница, а напаѓачот е во бегство.

Од МВР засега нема официјални информации за инцидентот. Во јавноста се појавија шпекулации дека станува збор за пресметка меѓу криминални банди, но и наводи кои не ја исклучуваат можноста дека синоќешниот инцидент има и политичка заднина.

„Дојче веле“ на македонски јазик пишува оти постојат сомнежи за поврзаност на синоќешниот инцидент со друг настан од 17 април годинава, односно со тепачка во угостителски објект во Трговскиот центар „Буњаковец“, во која учествувале три идентификувани и неколку непознати лица од кои едно, со остар предмет, било прободено во главата. Според неофицијални информации, повредениот Г.К. (41) е главниот телохранител на поранешниот директор на Управата за безбедност и контраразузнавање (УБК), Сашо Мијалков, а во тепачката наводно бил инволвиран некој од браќата Даниел и Дејан Т., познати како „близнаците од Ѓорче“ (општината Ѓорче Петров н.з.).

Инаку, „Дневник“ на 5 август годинава на насловната страница објави текст „Криминално-политичкото подземје не мирува“ во кој, меѓу другото, се вели:

„Скопјанецот Даниел Трајковски, брат близнак на Дејан Трајковски кој е во бегство поради осомниченост за убиство во обид, од профилот со име Перла Трајковска, упати сериозни закани и најави за рекет од 50 милиони евра до бизнисменот и сопственик на МПМ, Орце Камчев, како и до екс директорот на УБК, Сашо Мијалков.
„Еден метак кошта два евра, а за тоа немаш одбрана со кум ти… Така да на крај ќе биде 2 евра работата на Камчев у глава и две евра за Мијалков у глава, четири евра ќе кошта услугата, без работна рака… Гратис работна рака… Или ќе платиш 50 милиони евра или таксиметарот ти чука… Орце Камчев запамти во Дебар од кај што потекнуваме нема место за два лава. Даниел близнак! Да живее Зоран Заев идниот премиер на Македонија! Со вас претседателе до смрт!“, наведува Трајковски во пораката, во која на почетокот, покрај Камчев и Мијалков, го
споменува и Никола Груевски“.


Двајца полицајци нападнати со мачета во Белгија


Шарлероа, 6 август, 2016 - 17:59 (META) 

Двајца полициски службеници биле повредени откако напаѓач се нафрлил врз нив со мачета во белгискиот град Шарлероа, јавува „Би-би-си“.

Напаѓачот бил застрелан и ранет од полицијата, објави полицијата во Шарлероа на „Твитер“.

Тој, според информациите, извикувал „Алаху Акбар“ (Господ е голем, на Арапски) за време на нападот кој се случил пред главната полициска станица во градот.

Областа околу местото на нападот веднаш била запечатена од полицијата.


Петковски бил погоден од заскитан, а не од „наменет“ куршум


Битола, 16 мај, 2016 - 13:07 (META) 

Функционерот на СДСМ од Битола, Борче Петковски, не бил цел на планиран вооружен напад со политичка заднина, туку бил погоден во ногата од заскитан куршум. Ова го наговестуваат резулатите од вештачењето на проектилот што пред Велигден го погоди во нога поранешниот пратеник на СДСМ и актуелен партиски функционер во Битола, дознава „Мета“.

Според наши извори од полицијата, вештачење било извршено и во Битола и во Скопје и покажало дека куршумот бил испукан на воздушна далечина од 1,2 километри. Зрното кое било извадено од ногата на Петковски било со калибар од 9 милиетри, популарно наречено „долга деветка“.

Зрното било со слаба ударна моќ и не успеало да направи излез на другата страна од коленото, поради што морало да биде хируршки извадено.

Нашите извори велат дека сите овие наоди укажуваат на тоа дека се работи за несреќен случај предизвикан од заскитан куршум, со што се демантираат сите гласини дека случајот има политичка заднина.

Портпаролот на СВР Битола, Сања Стаматова, официјално вели дека вештачењето не е завршено, а кога случајот ќе биде комплетиран, ќе излезат со информации во јавноста.

Настанот се случи на 27 април во населбата Карпош во Битола, во моментот кога Петковски стоел на тротоар заедно со поранешниот началник на Управата за безбедност и контраразузнавање (УБК) за Битола, Љупчо Чкљамовски, и со поранешниот градоначалник на Битола, Златко Вршковски.