!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Алаѓозовски: Музичките субвенции биле алатка за купување послушност на уметниците


Скопје, 12 јануари, 2018 - 15:30 (META) 

Министерството за култура испратило инспектори во Македонската радио-телевизија (МРТВ) во врска со одлуките за субвенции за поддршка на домашната музичка продукција, кои констатирале дека роковите за носење на овие одлуки биле „длабоко пробиени“ и поради тоа треба да бидат поништени, соопштија од Министерството од каде велат и дека не само што нема да одобрат исплата на парите за избраните композиции, туку дека ќе спроведат истрага и за претходните конкурси.

Како што изјави министерот за култура, Роберт Алаѓозовски во Битола, инспекторите го предупредиле раководството дека се соочува со кривична одговорност поради незконски донесени одлуки, со кои се создава „штета по буџетот и кои претставуваат злоупотреба и несовесно работење во службата“.

Истоа така било констатирано дека во комисиите наместо музички уредници со работно искуство на таа позиција од најмалку пет години, дел од членовите воопшто не го исполнувале тој критериум, односно никогаш не работеле како музички уредници.

Алаѓозовски вели дека на некои автори им било овозможено да добиваат пари и преку категоријата „изведувачи“, а некои други за истата причина биле одбивани од конкурсот, а биле забележани и случаи на судир на интереси каде што сопружници биле членови на комисија, која доделила средства на група во која членувал нивниот син.

– Со оваа настаната ситуација уште еднаш се покажа колку бил штетен овој закон, кој постојано создавал долгови по буџетот на граѓаните, бил спроведуван на несоодветен начин и со неправилности, а воопшто не ги постигна декларираните ефекти, ниту пак придонесе за зголемување на квалитетот, развој на музичката индустрија и поголема присутност на домашните артисти на нашите медиуми, туку се претвори во алатка за клиентелизам и за купување послушност на музичките уметници – изјави Алаѓозовски.


СДСМ: Новото раководство на ВМРО-ДПМНЕ да покаже одговорност и конструктивност


Скопје, 24 декември, 2017 - 13:34 (META) 

Од владејачката СДСМ и порачуваат на ВМРО-ДПМНЕ дека по конгресот и изборот на нов претседател на партијата, граѓаните и целата домашна јавност очекуваат новото раководство на опозициската партија да ги напушти досегашните политики на поделби, деструкции, лажни вести, блокади и сеење омраза и да даде конструктивен придонес во спроведувањето на зацртаните реформи.

„ВМРО-ДПМНЕ треба да покаже одговорност пред граѓаните и интересите на државата и конструктивно да се вклучи во процесите што обезбедуваат економски раст, повисок животен стандард, слобода, демократија, владеење на правото, добрососедски односи и интеграција на Република Македонија во ЕУ и НАТО како врвен државен и национален интерес“, велат од СДСМ.

Од партијата додаваат дека новото време на соработка, пријателство, напредок и заедништво ги отвора перспективите на Македонија како едно демократско општество во кое сите граѓани ќе бидат еднакви спрема правата, обврските и законите.


Прислушувањето се врши легално со наредби од судот, велат од МВР


Скопје, 22 октомври, 2017 - 13:14 (META) 

Следењето на комуникациите во Министерството за внатрешни работи се врши во согласност со законските процедури – со наредба од суд преку Јавното обвинителство, велат од МВР за „Нова ТВ“ во врска со обвинувањата на лидерот на ВМРО-ДПМНЕ, Никола Груевски, изнесени во интервјуто во емисијата „Седмица“ на телевизијата „Алфа“, дека стотина членови на раководството на партијата се прислушувани од МВР.

„Тоа што го прави МВР е легално и со наредба од суд преку Јавното обвинителство, а токму обвинителството е тоа што ги води истрагите. Нелегалното масовно прислушување, главната одлика на владеењето на Никола Груевски, е предмет на истрага на Специјалното јавно обвинителство. Управата за безбедност и контраразузнавање (УБК) и Бирото за јавна безбедност (БЈБ) постапуваат во согласност со своите надлежности и нивните активности во форма на оперативни акции и обработки во борбата против организираниот криминал, тероризмот, насилниот екстремизам и другите облици на противзаконско однесување, се од доверлива природа и не се коментираат јавно. Работата на овие служби е насочена кон штитење на интересите и на безбедноста на граѓаните и не се под контрола на ниту една политичка партија“, велат од МВР.

Од Министерството додаваат дека УБК во своето работење е фокусирано на лев и на десен екстремизам и радикализам, а тероризмот е посебен глобален феномен за кој и не треба посебно објаснување.

Оттаму потсетуваат дека во Собранието постојат две комисии чија функција е да вршат надзор над работата на УБК и на Агенцијата за разузнавање (АР) и над примената на посебните истражни мерки (ПИМ).

„Тие комисии се добредојдени во секој момент да извршат надзор и контрола над примената на овие мерки“, велат од МВР.

Лидерот на ВМРО-ДПМНЕ, Никола Груевски, вчера, во специјалното издание на магазинот „Седмица“ на „Алфа“, обвини дека членови на партијата се прислушувани во изминатиот период и дека во УБК е отворено досие под името „Македонски екстремизам и тероризам“.

– Такви досиеја се воделе во комунизмот и во 1990-тите против ВМРО-ДПМНЕ, како случаите „Темел“ и „Сина птица“. Така и сега, против ВМРО-ДПМНЕ се водат истраги за да се урниса партијата – рече Груевски.


Беса: Да престане политизацијата на научно-образовните институции


Скопје, 11 август, 2017 - 14:39 (META) 

Движењето Беса денеска ги обвини владините партнери за политизација на научно-образовните институции, повикувајќи се на одлуката Институтот за духовно и културно наследство да го води кадар на Движењето за реформи на ДПА (ДР-ДПА).

Од Беса прашуваат ако на ваков начин се делат научно-образовните институции, на кој разгранок на СДСМ, ДУИ и на ДР-ДПА му паднала ждрепката да раководи со Македонската академија на науките и уметностите, со Универзитетот „Св. Кирил и Методи, со Универзитетот во Тетово, Универзитетот „Мајка Тереза“, со Институтот за македонски јазик, со Институтот за фолклор „Марко Цепенков“, со Институтот за македонска книжевност и со Институтот за социолошки, правни и политички прашања.

„Движењето БЕСА ја осудува оваа екстремна политизација на научно-образовните институции, квалификувајќи ја како реприза на поранешните сцени во Македонија, а, за жал, дел од оваа игра сега е и ДР-ДПА, која до вчера ја обвинуваше ДУИ за политизација на научно-образовните институции. Ние сега се убедивме дека старата изрека „ако сакаш да го спознаеш вистинското лице на некој, дај му власт“, денес најдобро ја отсликува оваа партија, а и воопшто оваа влада“, стои во соопштението на Беса.


Анѓушев уште еднаш ги повика ЕЛЕМ да го сопрат објавувањето јавни повици


Скопје, 19 јуни, 2017 - 16:31 (META) 

Вицепремиерот за економски прашања, Кочо Анѓушев, уште еднаш го повика раководството на АД ЕЛЕМ, веднаш да го запре објавувањето на јавните повици со проценета вредност од 80 милиони евра, за да се избегне штета на државниот и на буџетот на компанијата.

„Наспроти укажувањето од Владата, раководството на ЕЛЕМ, најпрвин во петокот, на 15 јуни, објави јавен повик за набавка на рударска опрема за РЕК Битола во вредност од 34 милиони евра, за денеска да го објави и јавниот повик за изградба на топлификација на Битола, Новаци, Логоварди и на Могила во вредност од 46 милиони евра“, се вели во соопштението од кабинетот на Анѓушев.

Оттаму потсетуваат дека раководството на ЕЛЕМ имало 11 години да ги реализира овие проекти, а особено проектот за топлификација на Битола.

Вицепремиерот нагласи дека одредена штета е веќе направена со објавувањето на јавните повици, но според него, „крајно време е управниот одбор на компанијата да донесе одлука за мораториум на проектите за да не се направи поголема штета и да не се загрози имиџот на Македонија и во меѓународни рамки“.


„Југохром“: Филтер-страницата би била готова за 8 месеци ако Владата ни дозволи да работиме


Тетово, 26 април, 2017 - 16:11 (META) 

Денеска почнаа градежните активности за бетонирање на темелите на системот за отпрашување на комбинатот „Југохром“, чија изградба претставува услов поставен од Владата за овој некогашен гигант да продолжи со работа.

Активностите почнаа во присуство на раководството и на синдикатот на „Југохром“. Оттаму истакнаа дека филтер-станицата со сигурност би ја изградиле во наредните осум месеци, доколку централната власт дозволи во овој период „Југохром“ да работи.

– Ако Владата дозволи „Југохром“ да работи во наредниот период, ние со остварениот профит од работењето би ја граделе интензивно филтер-станицата, која би била целосно завршена до октомври. Наредниот месец веќе очекуваме да се градат и челичните столбови. Во овој временски период би работеле со 50 отсто од производствениот капацитет на комбинатот и би се работело во период кога воздухот не е толку загаден, со што не би влијаеле на загадувањето на животната средина. Оттука упатуваме апел до Владата, да дозволи комбинатот да работи. Со работата на „Југохром“ би се решиле социјалните и економските проблеми. Вработените би се вратиле на работа, а парите од работењето на фабриката би се инвестирале во филтер-станицата – изјави Васко Скендеровски директор на „Југохром фероалојс“.

Поради неработењето на „Југохром“, 600 поранешни вработени во комбинатот се на улица. До 1 март тие се водеа како да се на принуден одмор, но сега се без никави примања.

– Ние, како синдикат, имавме две барање. Првото беше да се продолжи со изградба на филтер-станицата. Тоа барање од раководството на „Југохром“, како што гледате, денеска се исполнува. Второто барање беше упатено до Владата, да донесе одлука фабриката да работи додека се гради филтер-станицата. Но, на второто барање не наидовме на позитивен одговор. Сè уште очекуваме разбирање од Владата, да дозволи да работи фабриката, која е сериозна во намерата за изградба на филтер станицата – изјави Бајрам Амити, претседател на синдикатот на „Југохром“.

Комбинатот престана со работа на 31 октомври минатата година, откако Инспекторатот за животна средина донесе одлука да се запре производствениот процес на фабриката, поради непочитувањето на рокот за изградба на филтер-станицата. Од раководството на „Југохром“, велат дека не успеале невреме да ја изградат станицата поради одолжување на постапката за добивање градежна дозвола.

Инаку, системот за отпрашување е наменет за речиси целосно прочистување на издувните гасови на фабриката, доколку би работела со 50 отсто од производствениот капацитет. Вкупната инвестиција за изградба на филтер-станицата изнесува 12 милиони евра.


Штрајкот на новинарите во МПМ ќе се зголеми на осум часа


Скопје, 13 март, 2017 - 10:48 (META) 

Штрајкувачките одбори на „Дневник“, „Утрински весник“ и на „Вест“ донесоа одлука за зголемување на времетраењето на штрајкот на 8 часа, почнувајќи од денеска, информира Самостојниот синдикат на новинари и медиумски работници (ССНМ).

„Ова е од причини што и по усните ветувања од раководството дека се прават напори за да се исплати јануарската плата, платата не е исплатена и нема никаквов прецизен рок кога тоа ќе се случи, а нема ниту прецизна информација што ќе се случува со компанијата во наредниот период“, велат од ССНМ.

Од Синдикатот информираа дека револтот кај вработените е веќе преголем поради влошената економско-социјална положба и игнорантскиот однос на менаџментот.


Ахмети: Немам одговор со кого ќе бидеме во коалиција, ги анализираме сите опции


Тетово, 28 јануари, 2017 - 22:04 (META) 

Немам одговор со кого ќе бидеме во коалиција, ги анализираме сите опции за да ја донесеме најдобрата одлука во корист на Албанците и за сите граѓани на Македонија без разлика дали се Албанци или Македонци, Срби или Роми, изјави лидерот на ДУИ, Али Ахмети по завршувањето на средбата на членовите на партијата во седиштето во Мала Речица.

Конечна одлука за коалицирање со ВМРО-ДПМНЕ сè уште не е донесена, централното претседателство на ДУИ ќе заседава и в недела, информираше портпаролот на ДУИ, Бујар Османи.

Османи истакна дека дебатата била конструктивна и членовите на партијата почнале да расправаат по конкретни предлози.

Тој додаде дека тројцата потпретседатели на ДУИ, Теута Арифи, Невзат Бејта и Изет Меџити, претходно не ја напуштиле седницата, туку порано заминале од средбата заради одмор и консултации.

Османи потврди дека возилото на Бејта било забележано пред седиштето на СДСМ во Скопје, додавајќи дека ДУИ е отворена за консултации и за преговори со сите партии за понатамошните политички случувања.

Рокот за состав на нова влада истекува утре (29 јануари), кога мандатарот, лидерот на ВМРО-ДПМНЕ, Никола Груевски, треба да соопшти дали и со која партија ќе формира коалиција.


Спасовски: Со МВР раководам јас, а директорите на БЈБ и на УБК „можеби малку опструираат“


Скопје, 26 октомври, 2016 - 11:33 (META) 

Министерот за внатрешни работи, Оливер Спасовски, тврди дека со МВР раководи тој и дека во министерството нема двовластие, туку само фракции, кои постоеле отсекогаш.

Спасовски, во интервју во емисијата „10 Минути“ на „ТВ21“, вели дека во моментов во МВР се работело попрофесионално и постабилно од времето кога со министерството раководеле министри од ВМРО-ДПМНЕ.

„Ниту во моментов, ниту во кое било време не може да постои двовластие. Со МВР раководи министерот за внатрешни работи и никој друг. Фракции постоеле отсекогаш, имате фракции кои се блиски до министерот, до некој од директорите и кога раководи една политичка партија. Меѓутоа, најважно од сè е што во иднина ова министерството мораме да го професионализираме, да го ослободиме од партиските притисоци, ако сакаме да ги остварува интересите на граѓаните. Така што, верувајте, во овој момент далеку е постабилно и попрофесионално министерството отколку во периодот кога самите го нарекуваа место МВР, МВРО“, вели Спасовски.

Според министерот за внатрешни работи, фракциите во МВР, кои не му се блиски нему, не ја опструирале во голема мера истрагата на Специјалното јавно обвинителство, а специјалната јавна обвинителка Катица Јанева и нејзиниот тим во ниту еден момент не биле оневозможени да си ја вршат својата работа.

„Овие денови немаше рефлексија на ниту една фракција. СЈО имаше две наредби, влегоа во УБК, врз основа на наредбите се постапуваше до ниво до кое можеше да биде постапувано, веднаш по пристигнувањето на експертот ќе се заврши целата наредба. Можеби некој од партиски причини, некакви насоки што ги добил, пред сè мислам на директорите на Бирото за јавна безбедност и на Управата за безбедност и контраразузнавање, го одолжуваат процесот, зборувам за час-два, меѓутоа во ниту еден момент СЈО не е оневозможено туку, напротив, две третини од работата е завршена и мора да се заврши и делот од наредбата што преостанува“, тврди Спасовски.

Специјалната јавна обвинителка и неколку обвинители и истражители во средата минатата недела влегоа во УБК да одземат документи и електорнски податоци од системот за следење на комуникации. По неколку часа, Јанева излезе од УБК и изјави дека соработката со раководството на УБК оди многу тешко и дека има обиди за опструкции врз истрагата. Ситуацијата кулминираше во петокот кога од УБК беше избркан истражител на СЈО, кој бил оставен да дежура додека да пристигне надворешниот експерт на шведската компанија „Ериксон“, кој треба да помогне во извлекувањето на другите податоци што ги бара СЈО.


ВМРО-ДПМНЕ: СЈО денеска даде најдобар пример за двојните аршини по кои работи


Скопје, 15 септември, 2016 - 14:58 (META) 

Oбвинителката Фатиме Фетаи тргна отворено против сите граѓани што одлучија да излезат на протест против спречување на изградба на црквата во Општина Центар, откако и претставници на Македонската православна црква и здружението на граѓани „Веритас“ се спротивставија на намерите на Андреј Жерновски и на советниците на СДСМ да не дозволат да се гради црквата „Св. Константин и Елена“, се вели во соопштението на ВМРО-ДПМНЕ  по повод денешните обвиненија на Специјалното јавно обвинителство.

Во него се додава дека обвинителката Фатиме Фетаи решила да тргне против верниците кои имаат уставно загарантирано право на протест и имаат право да го изразат сопственото негодување со политиките на Жерновски и на СДСМ, само поради тоа што предизвикале материјална штета од 20 евра.

„Фатиме Фетаи и Катица Јанева ги игнорираат штетите од милиони евра предизвикани од вандалите на платеничката револуција. Фатиме Фетаи и Катица Јанева ги игнорираат повиците на аболираниот криминалец Зоран Заев и на Радмила Шекеринска и нивната поддршка во палењето, демолирањето, ограбувањето и во уништувањето на институции и на културно-историски споменици при вандалското однесување на членовите на платеничката револуција“, се додава во соопштението.

Според ВМРО-ДПМНЕ, Фатиме Фетаи и Катица Јанева имаат само една цел, а тоа е неосновано да го оцрнуваат раководството на ВМРО-ДПМНЕ само поради тоа што било и ќе биде на страна на народот.

„Фатиме Фетаи и Катица Јанева не ја познаваат ВМРО. ВМРО издржала многу покритични напади од нивните. ВМРО ќе ги издржи и овие нарачани политички случаи и ќе остане со народот“, се додава во соопштението.