!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ракометарите на „Вардар“ пристигнаа на плоштадот Македонија, славењето почна


Скопје, 6 јуни, 2017 - 14:54 (META) 

Десетици илјади граѓани денеска се собраа на плоштадот Македонија во Скопје, каде ги пречекаа европските шампиони во ракомет, ракометарите на „Вардар“.

Час и половина ечеа навивачки и патриотски песни, а се вееја знамињата на ракометниот клуб „Вардар“, на Македонија и со сонцето на Вергина.

Ракометарите пристигнаа во 13.45 часот со двокатен автобус во боите на клубот. Тие беа придружувани од полиција, а кога пристигнаа, добија громогласен аплауз од граѓаните.

На почетокот на манифестацијата, химната на Македонија ја отпеја пејачката Викторија Лоба, а потоа водителите, по претставувањето на кратката историја за клубот, почнаа да ги прозиваат ракометарите на сцената.

Сите истакнаа дека ова е заслужена победа за Македонија и дека сè уште не можат да поверуваат дека успеале да се искачат на ракометниот врв на Европа.

Тренерот на женскиот тим на РК „Вардар“, Гордана Нацева, рече дека не треба да чекаме уште 15 години за да имаме вакви прослави. Таа истакна дека тоа што тимот на „Вардар“ е со меѓународен состав, покажал дека како народ, нација и држава заслужуваме ваква победа. На крајот од својот говор, Нацева ја повика „Пивара Скопје“ да ја смени својата реклама, во која се вели дека некои се радуваат и на четврто место, бидејќи Македонците знаат да се радуваат и на прво место.

Сопственикот на клубот, Сергеј Самсоненко, рече дека пред да заминат да ги одиграат последните натпревари, се договориле да се претставуваат како туристи, кои дошле да се прошетат, за на крај да им покажат дека се дојдени да бидат шампиони.

По говорот на Самсоненко, ракометарите, заедно со насобраните граѓани, заедно запеаја „Ој Вардаре, македонски, ти ја красиш Македонија“.


На плоштадот Македонија се подготвува пречек на ракометарите на „Вардар“


Скопје, 6 јуни, 2017 - 10:13 (META) 

На плоштадот Македонија се подготвува пречекот на ракометарите на РК „Вардар“, кои таму треба да пристигнат во 13 часот. Сцената, на која ќе се одвива предвидената програма, е поставена во близина на Камени мост.

Ракометарите на „Вардар“, кои ја освоија европската шампионска титула, се очекува да слетаат на аеродромот „Александар Велики“ во 11.15 часот, од каде ќе се упатат кон плоштадот Македонија, преку булеварите Александар Македонски, Гоце Делчев, Крсте Мисирков и Кочо Рацин.

Ракометарите на плоштадот Македонија ќе пристигнат преку Порта „Македонија“.


Иванов се сретна со македонските ракометари во Катар


Доха, 15 јануари, 2015 - 15:40 (META) 

Претседатело на државата, Ѓорге Иванов, кој е во дводневна посета на Катар, денеска се сретна со членовите на македонската ракоментна репрезентација, во пресрет на почетокот на Светското првенство во ракомет.

Македонските ракометари првиот дуел ќе го имаат со репрезентацијата на Тунис утре, во 15 часот по македонско време.


Ракометарите од Барса на оригинален начин честитаа празници


Барселона, 26 декември, 2014 - 12:28 (META) 

На оригинален и несекојдневен начин, ракометниот клуб Барселона им ги честита новогодишните и божикните празници на сите обожаватели.

Поради тоа што ракометарите во овој клуб доаѓаат од повеќе земји во светот, секој од нив упати честитка до обожавателите на својот мајчин јазик.


Ракометарите на Металург ќе патуваат во Шпанија


Скопје, 12 ноември, 2014 - 10:24 (META) 

Ракометарите и управата на Металург се договориле тимот во полн состав да патува за Шпанија на дуелот со Ла Риоха во 5. коло од Лигата на шампиони.

По синоќешниот состанок, не било најдено решение, но на средбата помеѓу сопственикот Минчо Јорданов и ракометарите, бил постигнат договор.

Со ракометарите ќе патува и тренерот Лино Червар, зад кого застана Јорданов, според кој, тренерот е еден од најзаслужните за успехот на клубот во изминатите сезони.