!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев и Мицкоски им честитаа на ракометарите за победата над Словенија


Скопје, 14 јануари, 2018 - 11:10 (META) 

Преку своите профили, премиерот Зоран Заев и претседателот на ВМРО-ДПМНЕ, Христијан Мицкоски, вчеравечер им ја честитаа победата на македонските ракометни репрезентативци кои со победа над машката репрезентација над Словенија од 25:24 ги почна настапите на Европското првенство што се одржува во Хрватска.

„Одличен почеток на нашата репрезентација на Европското првенство во ракомет. Вие сте нашата гордост и заедно се радуваме на овој успех. Посакувам среќа и многу голови во следните натпревари со Црна Гора и Германија“, напиша премиерот Заев.

Нови победи на македонските ракометари им посака и претседателот на најголемата опозициска партија, ВМРО-ДПМНЕ.

„Упорноста се исплати, со срце и силна волја се бранат боите на Македонија. Честитки за победата на македонските ракометари. Нека се множат победите јунаци“, напиша на својот ФБ профил лидерот на ВМРО-ДПМНЕ Христијан Мицкоски во честитката до ракометарите.

По нерешените 11:11 на крајот на првото полувреме, „црвено-жолтите“, во второто полувреме од почеток настапија агресивно и со серија од 4-0 за четири минути, а во 35.м инута празен гол за плус 5 од својата половина промаши Дејан Манасков, по што Словенците го постигнаа првиот гол во продолжението. Тука ситуацијата се сврте и следуваше подобра игра на словенечкиот состав и постојана тесна трка на резултатите се до драматичен финиш, во кој поуспешни беа нашите репрезентативци.

Најефикасни во македонската селекција беа Дејан Манасков со осум и Кире Лазаров со седум погодоци.

Следниот натпревар на ЕП во Загреб Македонија ќе го игра в понеделник со Црна Гора, во  2-то коло од Ц-групата.


Навивачите ќе може да се дружат со Лазаров и со другите ракометни репрезентативци


Скопје, 17 јуни, 2017 - 10:20 (META) 

Во пресрет на клучниот натпревар против Чешка од квалификациите за пласман на Европското првенство што ќе се одржи во Хрватска во 2018 г., навивачите денеска ќе имаат можност да се дружат со машката ракометна репрезентација.

Настанот во чии рамки селекторот Раул Гонзалес, капитенот Кире Лазаров и уште неколку репрезентативци ќе бидат на располагање за потпишување дресови, ќе се одржи од 12 до 13 часот на Националната арена „Филип Втори“ во Скопје.

Од РФМ информираат дека билетите за утрешниот натпревар меѓу селекциите на Македонија и на Чешка се целосно распродадени и ги повикаа гледачите кои ќе ја бодрат македонската репрезентација од трибините на арената „Борис Трајковски“ да дојдат минимум половина час пред почетокот на натпреварот.


Червар не е повеќе селектор на македонската ракометна репрезентација – се откажал вчера


Скопје, 12 март, 2017 - 20:02 (META) 

Ракометната федерација на Македонија (РФМ) попладнево преку соопштение го објави крајот на соработката со селекторот на македонската машка ракометна репрезентација, Лино Червар. Федерацијата соопшти дека по истекот на рокот што му го дале, Червар вчера информирал дека сепак ја одбрал понудата да биде селектор на хрватската репрезентација.

Договорот на РФМ со Червар истекуваше за три години.

„По завршувањето на 25. машки ракометен мундијал во Франција, во јавноста почнаа да се изнесуваат информации за евентуален трансфер на селекторот на машките ракометни сениори, Лино Червар, на клупата на хрватската национална селекција. По неодамнешните разговори помеѓу членовите на високото раководство на Ракометната федерација на Македонија и Лино Червар, во поглед на наводите за неговиот трансфер на клупата на хрватската национална селекција, двете страни договорија рок во чии рамки г. Червар требаше да ја извести федерацијата за својата одлука. По завршувањето на тој рок, на 11 март 2017 година, Червар упати писмо до претседателот на РФМ, во кое се заблагодарува на соработката и за третманот што го имал за време на неговиот тренерски мандат“, се вели во соопштението од федерацијата.

Во однос на одлуката на Червар, од ракометната федерација во своето соопштение пренесуваат и дел од неговиот допис до нив.

„..Дали тоа да биде со репрезентацијата на државата во која сум роден, во која основав семејно гнездо, во која се изградив, развивав и афирмирав како ракометен тренер и ги постигнав најголемите светски успеси и во која кога-тогаш морам да се вратам и вечно да останам или да се одредам за репрезентацијата на една мала, горда држава, мојата втора татковина, која ме дочека и ме прифати како свој тренер на кој му даде сè што може да се даде? Сепак, ја одбрав Хрватска, мојот роден крај, мојата земја…“, напишал Червар во својот  допис упатен до ракометната федерација.

Со ова писмо, како што појаснуваат од ракометната федерација, автоматски се активира и правниот инструмент за едностран раскин на договорот што Червар го има со неа.

Федерацијата вели дека за да се надмине ситуацијата, ќе формира тело за селекција што ќе ги избере кандидатите за наследник на Лино Червар.


Герила-акција на натпреварот Македонија – Чешка


Скопје, 15 јуни, 2016 - 21:29 (META) 

„Шарената револуција“ вечерва изведе нова герила-акција на ракометниот натпревар на репрезентациите на Македонија и на Чешка.

Демонстрантите, за време на натпреварот во салата „Борис Трајковски“, извадија транспарент на кој беше испишана пораката „Шутка не ти гине Никола“.

Вечерва се одигрува реванш-мечот од квалификациите за Светското првенство во ракомет, кое треба да се одржи следната година во Франција.


Македонија изигра нерешено со Норвешка


Варшава, 25 јануари, 2016 - 20:20 (META) 

Македонската ракометна репрезентација изигра нерешено против репрезентацијата на Норвешка. Натпреварот од втората фаза на Европското првенство, кое се игра во Полска, заврши со резултат 31:31.

На полувремето македонските ракометари водеа со четири поени разлика (17:13).

Играч на натпреварот беше Кире Лазаров, кој постигна 11 гола. Пет гола даде Дејан Манасков, а три Филип Миркуловски. Борко Ристовски имаше 11 одбрани. Кај Норвешка, Кристијан Бјорнсен даде шест гола, а Магнус Јондал пет.

По овој бод, Македонија сега ќе треба да се надева Полска да победи во следните два свои натпревари, а Франција да ги победи Норвежаните за официјално да обезбедиме пласман на олимпискиот турнир.

Нашите ракометари утре имаат слободен ден, а в среда го играат последниот меч на овој шампионат против селекцијата на Белорусија.


Македонија загуби од Франција на почетокот на Европското првенство во ракомет


Варшава, 15 јануари, 2016 - 20:21 (META) 

Македонската ракометна репрезентација беше поразена од репрезентацијата на Франција (23-30) на Европското првенство во Полска.

Македонија е во групата А, каде што се и репрезентациите на Полска и на Србија.

Следен противник на нашата репрезентација е домаќинот Полска, а натпреварот треба да се игра на 17 јануари (недела), со почеток во 20.30 часот.


Меморијален ракометен турнир во чест на Тоше Проески во Прилеп


Прилеп, 17 октомври, 2015 - 12:44 (META) 

По повод осумгодишнината од загинувањето на македонската и балканска музичка ѕвезда, Тоше Проески, во Прилеп ќе се одржи меморијален ракометен турнир меѓу екипите на ракометните ветерани на Македонија и од Нова Градишка, Хрватска.

По тој повод, во посета на Македонија и во Прилеп пристигна делегација предводена од заменик-градоначалникот на Нова Градишка, Лилјана Лукачевиќ. Таа се сретна со градоначалникот на Прилеп, Марјан Ристески, и нагласи дека цела Нова Градишка го негува споменот на Тоше, а еден од облиците е меморијалниот ракометен турнир.

– Нè зближи трагичниот настан, загинувањето на Тоше Проески кај Нова Градишка. Доаѓаме првпат по осум години за да покажеме дека го почитуваме она што Тоше го работеше, не само како пејач, туку и како исклучителна личност, како мисионер на верата, љубовта и на надежта. Со години Нова Градишка е домаќин на ракометните ветерани и на маратонците. Така беше и годинава со маратонците. Ја прифативме поканата на ракометните ветерани да дојдеме во Македонија – изјави Лукачевиќ.

Градоначалникот Ристески истакна дека загинувањето на Тоше Проески го погоди целиот Балкан, а посетата на делегацијата од Нова Градишка е потврда дека заедно го чуваме споменот за него и за тоа што тој создаваше и работеше.

Според Среќко Георгиевски од Здружението на ракометните ветерани, турнирот ќе се одржи утре од 11.30 часот, во салата на прилепското средно училиште „Ристе Ристески Ричко“.

Делегацијата од Нова Градишка го посети вечното почивалиште на Тоше Проески на Гумење во Крушево.


Познати противниците на ЖРК Вардар во Лига на шампиони


Скопје, 26 јуни, 2015 - 20:17 (META) 

Ракометарките на Вардар ќе играат во Ц-групата во Лигата на шампионите против дански Митјиланд, со Хипо од Австрија и, веројатно, со унгарски Ѓер. Македонскиот ракометен шампион го избегна европскиот шампион Будуќност во групната фаза од Лигата на Шампиони.

Тимот на Вардар две сезони по ред го освојува третото место.

Пласман во втората фаза ќе изборат најдобрите три тима од секоја група.

Фазата по групи во Лигата на шампионките ќе почне на 16 октомври, додека втората фаза ќе почне на 8 јануари 2016 година. Четвртфиналето е од 1 април, а натпреварите на финалната четворка се на 7 и на 8 мај во Будимпешта.


Ивица Обрван останува селектор на ракометната репрезентација


Скопје, 17 јуни, 2015 - 13:03 (META) 

Ивица Обрван останува селектор на ракометната репрезентација на Македонија и ќе продолжи да го води нашиот национален тим и на ЕП 2016 во Полска, пренесе „Макракомет“.

На вчерашниот состанок со претседателот на РФМ, Живко Мукаетов, и со генералниот секретар Филип Милошевски, беше договорено неговиот ангажман да добие ново продолжение со траење до јуни 2016 година, меѓутоа со можност за продолжување.

– Задоволни сме со работата на селекторот и на заемно задоволство решивме да ја продолжиме соработката. Се надевам дека ќе донесе нови големи резултати за македонската репрезентација – изјави Филип Милошевски.


ЕП Полска: Македонија во третиот шешир


Варшава, 15 јуни, 2015 - 16:36 (META) 

Македонија го продолжи трендот со настапи на големите натпреварување обезбедувајќи пласман на Европското првенство во Полска, а првите луѓе на ЕХФ не чекаа долго за да го објават изгледот на шеширите и распоредот според освоеното место во квалификациската група, пренесе „Дерби“.

Првите два шешира ги сочинуваат селекции што завршија први во групата и плус домаќинот Полска, додека Македонија се најде во третиот барабан во друштво на Русија, Германија и на Белорусија.

Според правилата на ЕХФ, домаќинот имаше право да избере кои репрезентации ќе ја имаат улогта на фаворити во групите, па, така, Полска ќе биде дел од групата А, Хрватска од групата Б, Германија од групата Ц и Данска од групата Д.

ШЕШИР 1: Франција, Данска, Шпанија, Хрватска

ШЕШИР 2: Исланд, Полска, Шведска, Унгарија

ШЕШИР 3: Русија, Македонија, Германија, Белорусија

ШЕШИР 4: Србија, Норвешка, Словенија, Црна Гора