!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Што препорачува Прибе за медиумите: Ослободување од ДДВ, намалени даноци…


Скопје, 15 септември, 2017 - 16:40 (META) 

Констатирајќи дека состојбата на медиумите во Македонија е поприлично лоша, вториот извештај на Рајнхард Прибе објавен вчера, дава низа препораки за подобрување на медиумската сфера.

„Спроведувањето на сите препораки, вклучувајќи ги и главните препораки од 2015 година, е неопходно за справување со системските проблеми на медиумите“, се вели во извештајот.

  • Владата мора да стори сè за сите медиумски реформи да се вклопат во сеопфатна стратегија, да бидат добро испланирани и засновани на истражувања, како и на веродостојни, навремени и транспарентни консултации со сите учесници, и од јавниот и од приватниот сектор, без дискриминација и да вложи напор нивните забелешки да бидат сфатени сериозно;
  • Земајќи ги предвид специфичните предизвици со кои се соочени печатените медиуми, треба да се усвојат мерки како ослободување од ДДВ или од други даноци, за да има плурален медиумски склоп;
  • Секој медиум мора да усвои кодекс на однесување и да го објави на својата веб-страница. Треба да се создаде механизам за забелешки за случаите за обвинување за прекршување на кодексот;
  • Мора да се дава приоритет на истрагите на нападите врз кој било новинар и тие да завршуваат бргу;
  • За да се засили улогата на медиумите во барање отчет од власта, треба да се поттикнува истражувачкото новинарство и јавните институции и медиумите треба да ја овозможат неговата работа.

Неколку препораки се дадени и за подобрување на работењето на јавната радиодифузна куќа МРТ:

  • Мора итно да се обезбедат соодветни средства за да се засили нејзината независност и за да се овозможи ефикасно работење и управување. Законските измени или одредбите мора да овозможат МРТ да биде целосно транспарентна и отчетна пред сите засегнати страни, активно да соработува со сите релевантни засегнати страни и да се погрижи сите граѓани, без разлика на политичката ориентираност, пол, возраст, попреченост, итн., да бидат со уверување дека МРТ е нивен радиодифузер, а не инструмент на политичките партии или на други играчи. Менаџментот на МРТ мора активно да соработува со сите засегнати страни. За да се смени јавното мислење за МРТ би помогнало усвојувањето стратегија за комуницирањето и за вклучувањето на различни чинители, која би била создадена заедно со сите засегнати страни;
  • Мора да се разјасни ситуацијата со финансирањето на Агенцијата за аудио и аудио визуелни медиумси услуги и во целост да се гарантира независноста на Агенцијата, вклучувајќи го тука и нејзиниот Совет.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Извештајот на Прибе е реален и ќе го користиме за надградба на планот „3-6-9“, велат од Владата


Скопје, 15 септември, 2017 - 15:12 (META) 

Извештајот на Прибе објавен денеска дава реална слика за системските и долгогодишни предизвици кои оваа Влада ги наследи по преземањето на власта во јуни 2017 година, затекнувајќи заробена држава, се вели во реакцијата на Владата на новиот извештај на експертската група на Европската комисија, предводена од Рајнхард Прибе.

„Токму во првите 100 дена од работењето, новата влада успеа да ги согледа овие проблеми и загрижена за досегашното загубено време и шанси, изработи реформски план „3-6-9“ кој веќе опфаќа дел од проблемите утврдени во новиот Извештај на експертската група на Прибе и отвора пат за нивно решавање. Истакнуваме дека Извештајот на Прибе објавен денеска ќе го искористиме како насока за надградување и за подобрување на планот „3-6-9“, како и за определување на приоритетните мерки за наредниот период. Плановите на Владата ќе се прават врз основа на соодветни анализи и во отворен и инклузивен процес со Собранието, опозицијата и со граѓанското општество“, се вели во соопштението од владината прес-служба.

Од таму нагласуваат дека Владата има сериозен пристап кон суштинските промени кои треба да се направат, не само во плановите и стратегиските документи туку и на дело во практиката, без повторување на грешките од минатото.

Во извештајот на експертската група се вели дека важни сектори, како судството, бараат системски реформи базирани на инклузивен и на транспарентен процес. Од таму препорачуваат дека подготовката треба да почне веднаш, но дека реформите не треба да се брзаат.

„Довербата треба да се обнови. Постои широко распространета перцепција во земјата дека во последните години одлуките беа политизирани, дека партиите ја презедоа сопственоста врз државата, дека носителите на функции имале судир на интереси и дека ја „помешале“ нивната официјална функција со нивната партиска/лична агенда. Скандалот со прислушувањето претставува масовно прекршување на фундаменталните права“, пишува во извештајот.

Според експертската група, од суштинско значење е реформите во безбедносниот сектор, особено во однос на следењето на комуникациите, да се спроведуваат како итни. Тие нагласуваат дека е имплементирана само една од дванаесетте препораки од 2015 година во областа на судството и на обвинителството.


Прибе: Од суштинско значење е да се обезбеди кривична одговорност на сите сторители


Брисел, 15 септември, 2017 - 15:00 (META) 

Поминаа речиси две години откако СЈО почна со работа и никој, всушност, не е осуден, а тоа создава перцепција за неказнивост, се вели во извештајот на експертската група на Рајнхард Прибе, која во јули престојуваше во Македонија.

Постои дупка помеѓу легислативата и нејзината примена. Групата генерално смета дека однесувањето на некои функционери може да биде најголемата пречка за реформите правилно да се применат.

Во извештајот се вели дека важни сектори, како судството, бараат системски реформи базирани на инклузивен и на транспарентен процес. Од таму препорачуваат дека подготовката треба да почне веднаш, но дека реформите не треба да се брзаат.

„Довербата треба да се обнови. Постои широко распространета перцепција во земјата дека во последните години одлуките беа политизирани, дека партиите ја презедоа сопственоста врз државата, дека носителите на функции имале судир на интереси и дека ја „помешале“ нивната официјална функција со нивната партиска/лична агенда. Скандалот со прислушувањето претставува масовно прекршување на фундаменталните права“, пишува во извештајот.

Според експертската група, од суштинско значење е реформите во безбедносниот сектор, особено во однос на следењето на комуникациите, да се спроведуваат како итни. Тие нагласуваат дека е имплементирана само една од дванаесетте препораки од 2015 година во областа на судството и на обвинителството.

„Многу од практиките што беа обелоденети во извештајот за 2015 година продолжија. Контролата и злоупотреба на судскиот систем од мал број судии на моќни позиции за да служат во промовирање на политичките интереси не се намалила значително. Постои опасност дека некои личности во новата влада може да бидат во искушение, под изговор дека дејствуваат против престапниците, да ги заменат судиите кои неправедно постапувале, со други кои се подготвени да постапуваат за нив на сличен, неприфатлив начин. Од суштинско значење е новите власти да отстапат, да ја почитуваат поделбата на власта и да му овозможи на судството да функционира како независна рака“, заклучува експертската група.

И покрај критиките, опструкцијата и некооперативниот став на широк опсег на клучни институции, вклучувајќи го и обидот на претседателот да ги помилува сите, дури и оние кои не се под истрага, Прибе смета дека СЈО покажува посветеност и компетентност.

Експертската група нагласува дека од суштинско значење е да се обезбеди кривична одговорност на сите наводни сторители, без оглед на нивната политичка припадност.


Поповски и Прибе разговарале за владиниот план за реформи во медиумската сфера


Скопје, 20 јули, 2017 - 17:43 (META) 

Министерот без ресор задолжен за комуникација, отчетност и за транспарентност, Роберт Поповски, денеска имал средба со експертската група на Европската Унија предводена од Рајнхард Прибе, на која било разговарано за мерките и за планот на Владата за реформите во медиумската сфера.

Поповски, како што соопштија од Владата, во елаборацијата на чекорите и на мерките што се преземени од периодот од кога почна работата на новата влада, нагласил дека и понатаму е „задржан принципот на отвореност за сите добри идеи, како и за вклучување на сите релевантни организации и медиуми, за да се постигне најдобро можно решение за медиумските реформи“.

Тој ги информирал членовите на работната група на Прибе, дека со ребалансот на буџетот се обезбедени услови за укинување на радиодифузната такса, како прва мерка за поефикасно финансирање на „Македонската радио-телевизија“.

„Додека е во процес усвојувањето на ребалансот на буџетот во Собранието на Република Македонија, во тек е анализата за најдобро решение за утврдување на висината на стапката од буџетот со која ќе се обезбеди функционално работење на МРТ, како и независноста на јавното радиодифузно претпријатие“, рекол Поповски на средбата со Прибе и со неговиот тим.


Судиите од Кривичен се сретнаа со Прибе, бараат да бидат вклучени во реформите


Скопје, 17 јули, 2017 - 17:48 (META) 

Судиите од Основниот суд Скопје 1 денеска имале средба со Рајнхард Прибе и со неговиот тим на експерти, на која било истакнато дека извештајот и препораките на работната група на Прибе од 2015 година „се основа за реформите во судството“.

Судиите на средбата истакнале дека е „потребно нивно поактивно вклучување во процесот на подготвување решенија за прашањата поврзани со финансирање на судството, условите за избор и напредување во кариерата, следењето на работата и оценувањето на судиите, разрешување на судии и други прашања“.

„Воедно судиите истакнаа и дека ги подржуваат процесите кои водат кон зајакнување на нивната независност и враќање на довербата на граѓаните во судството. Присутните на средбата се согласија дека само независно судство може да биде гарант на слободата и на правата на граѓаните“, стои во соопштението на Основниот суд Скопје.

Прибе и неговиот експертски тим, кој од денеска до 21 јули престојува во земјава, денеска имаше средба и со со претседателот на Врховниот суд, Јово Вангеловски. На средбата Вангеловски им ги презентирал неговите предлог-мерки за спроведување на реформите во судството.

Експертот на ЕУ и неговиот тим се ангажирани од Европската комисија да ѝ помогнат и да ја советуваат Владата во спроведувањето на системските реформи за владеење на правото во земјава.


Вангеловски на Прибе и на тимот им го презентирал својот план за реформи во судството


Скопје, 17 јули, 2017 - 14:56 (META) 

Рајнхард Прибе и неговиот тим експерти од денеска се во посета на земјава, во рамките на нивниот ангажман од страна Европската комисија да ѝ помогнат и да ја советуваат Владата во спроведувањето на системските реформи за владеење на правото.

Експертот на Европската Унија и неговиот тим денеска имале средба со претседателот на Врховниот суд, Јово Вангеловски. На средбата Вангеловски им ги презентирал неговите предлог-мерки за спорведување на реформите во судството.

„На средбата се разговараше за актуелната состојба во судството и за предлог-мерките за спроведување реформи во судството, подготвени од претседателот на Врховниот суд на Република Македонија, за остварување на концептот за независно и непристрасно судство, како гарант на демократијата и на владеењето на правото, во функција на заштита на човековите слободи и права“, стои во соопштението од Врховниот суд.

Прибе претходно ја посети земјава на 27 јуни, кога, исто така, имаше средба со претседателот на Врховниот суд, како и со министри во Владата.

Тој заедно со целиот негов тим, како што најави и еврокомесарот за проширување и добрососедска политика, Јоханес Хан, во земјава ќе престојува до 21 јули.

Прибе со експертскиот тим во 2015 година го подготви извештајот со препораките поврзани со прислушуваните комуникации, а нивната работа придонесе за реформските приоритети што ги состави Европската комисија и кои беа вметнати во Договорот од Пржино.


Вангеловски побарал од Прибе во реформите активно да бидат вклучени и судиите


Скопје, 27 јуни, 2017 - 16:27 (META) 

Актуелната состојба во судството и препораките од извештајот на експертската група на Европската комисија од 2015 година биле во фокусот на средбата меѓу претседателот на Врховниот суд, Јово Вангеловски, и експертот на Европската Унија, Рајнхрад Прибе.

На средбата, како што соопштија од судот, Вангеловски истакнал дека реформите во судскиот систем треба да се спроведат со активно учество на судиите, заради подобрување на состојбите на владеењето на правото во Македонија.

Вангеловски и Прибе на средбата договориле разговорите да продолжат во текот на следниот месец.

Водачот на експертскиот тим на Европската комисија, кој треба да ѝ помогне на Владата во процесот на спроведување на реформските приоритети во текот на неговата еднодневна посета на земјава, денеска имаше средби со министри во Владата (шефот на македонската дипломатија, Никола Димитров, и вицепремиерот за европски прашања, Бујар Османи) и со опозацијата, односно со членот на извршниот комитет на ВМРО-ДПМНЕ, Никола Тодоров.

Прибе на средбата со Димитров и со Османи ја нагласил неопходноста од засилен ангажман и од мобилизација на релевантните институции во земјата за спроведување на препораките од извештајот и на реформските приоритети.

Како што соопштија од Делегацијата на Европската Унија во Скопје, Прибе и неговиот тим експерти повторно ќе бидат во „работна посета“ на Македонија од 17 до 21 јули.


Прибе: Неопходна е мобилизација на институциите за спроведување на реформите


Скопје, 27 јуни, 2017 - 14:17 (META) 

Шефот на македонската дипломатија, Никола Димитров, и заменик-претседателот на Владата за европски прашања, Бујар Османи, денеска имаа работен појадок со експертот од ЕУ за реформските приоритети, Рајнхард Прибе.

Димитров изразил благодарност за ангажманот на експертскиот тим предводен од Прибе, кој со прецизното детектирање на недостатоците во неколку клучни области придонесе во процесите за надминување на политичката криза.

– Отсуството на независни институции имаше последици по демократските процеси во Р. Македонија. Приоритет на новата реформска влада ќе биде нивна професионализација за доследно спроведување на законите – заклучи министерот Димитров.

Вицепремиерот Османи посочи дека е потребна директна и отворена комуникација во однос на сите прашања што треба да се решат.

– Свесни сме дека периодот на политичка криза, кој е веќе зад нас, влијаеше на темпото на реформите и на спроведувањето на препораките од извештајот на групата експерти од 2015 година. Во овој процес на исполнување на преземените обврски, од исклучителна важност за нас е Вашето вклучување во овој процес, преку Вашите совети, надзор и забелешки, имајќи предвид дека Вашето име во моментов претставува и синоним за реформи во земјава – рече Османи.

Димитров и Османи ја истакнале цврстата заложба на Владата да ги спроведе реформските приоритети за Европската комисија да ја отстрани условеноста на препораката за почеток на пристапните преговори. Македонските министри, исто така, го информирале Прибе за активностите на Владата за подобрување на односите со соседите.

Прибе на средбата ја нагласил неопходноста од засилен ангажман и мобилизација на релевантните институции во земјата за спроведување на препораките од извештајот и на реформските приоритети. Тој ја повторил подготвеноста на експертскиот тим да ѝ помогне на Македонија за надминување на посочените недостатоци во неколку важни области, кои се однесуваат на владеењето на правото, слободата на медиумите и на независноста на регулаторните тела.


Прибе на работен појадок со Димитров и со Османи во МНР


Скопје, 27 јуни, 2017 - 9:40 (META) 

Министерот за надворешни работи, Никола Димитров, и вицепремиерот за европски прашања, Бујар Османи, денеска во просториите на Министерството за надворешни работи ќе одржат работен појадок со германскиот експерт Рајнхард Прибе, соопшти МНР.

Прибе, како што претходно најави еврокомесарот за проширување и за добрососедска политика, Јоханес Хан, доаѓа во Македонија за да ѝ помогне на Владата во спроведувањето на реформските приоритети.

Вчера Хан беше во посета на земјава и имаше средби со премиерот Зоран Заев, министри во Владата и со лидерите на парламентарните политички партии. Тој порача дека за спроведувањето на реформите за напредок на земјата кон Европската Унија е потребен национален консензус и дека политичкиот дијалог и дебатата по овие прашања треба да се водат во Собранието.

Премиерот Заев по средбата со Прибе соопшти дека Владата работи на акциски план наречен „Патоказ“, што треба да се финализира до 1 јули, а во кој се опфатени сите предвидени реформи во клучните области, како владеењето на правото, професионални државни институции, независни регулаторни тела и слободни медиуми.


Прибе утре на работен појадок со Димитров и со Османи во МНР


Скопје, 26 јуни, 2017 - 22:16 (META) 

Министерот за надворешни работи, Никола Димитров, и вицепремиерот за европски прашања, Бујар Османи, утре во просториите на Министерството за надворешни работи ќе одржат работен пoјадок со германскиот експерт Рајнхард Прибе, соопшти МНР.

Прибе, како што претходно најави еврокомесарот за проширување и за добрососедска политика, Јоханес Хан, доаѓа во Македонија за да ѝ помогне на Владата во спроведувањето на реформските приоритети.

Инаку, Хан кој денеска беше во посета на земјава и имаше средби со премиерот Зоран Заев, министри во Владата и со лидерите на парламентарните политички партии, порача дека за спроведувањето на реформите за напредок на земјата кон Европската Унија е потребен национален консензус и дека политичкиот дијалог и дебатата по овие прашања треба да се водат во Собранието.

Премиерот Заев по средбата со Прибе соопшти дека Владата работи на акциски план наречен „Патоказ“, што треба да се финализира до 1 јули, а во кој се опфатени сите предвидени реформи во клучните области, како владеењето на правото, професионални државни институции, независни регулаторни тела и слободни медиуми.