Утре Брисел ќе препорача отворање на преговори со Македонија


Брисел, 16 април, 2018 - 10:08 (META) 

Европската комисија повторно препорачува отворање на пристапните преговори со Македонија, а извештајот за напредокот на земјата е меѓу попозитивните во овој пакет на Брисел, кој, како што стои во извештајот, „јасно ја препознал политичката волја за напредок“, јави Радио Слободна Европа (РСЕ), чии дописници од Брисел имале увид во документот што ќе биде објавен утре во Стразбур.

Во него се предупредува дека „штетата која се правела години наназад, не може да се среди преку ноќ“, но дека земјава ја надминала длабоката политичка криза и дека структурните реформи се долг процес кој може да потрае.

Според РСЕ, во извештаите невралгични точки во сите држави од Западен Балкан остануваат владеењето на правото, организираниот криминал и корупцијата, како синоними за секоја држава во регионот. Исто така, ЕК повторно во повеќе наврати го користи изразот „заробени држави“, со забелешка дека јавната управа во државите од регионот останува слаба, и малку или воопшто нема прогрес на полето на слобода на изразување.

Како и во минатогодишните извештаи, повторно се нагласува дека билатералните спорови и понатаму се главни пречки во процесот на евроинтеграција.

За Македонија во нацрт-извештајот се нагласува дека за понатамошен напредок на државата одлучувачки фактор е задржување и продлабочување на динамиката во процесот на итни реформски приоритети. ЕК изразува подготвеност да го поддржи тој процес со примена на засилен пристап за преговарачките подрачја за судството, основните права и слободи и слободата и безбедноста на државата.


Спасовски: МВР веќе не прислушува нелегално, отворени сме за контрола


Скопје, 1 октомври, 2017 - 13:29 (META) 

„Одговорно тврдам дека веќе не се прислушува нелегално и за тоа може да имаме експертски контроли, собраниски контроли во секое време. Ние стоиме на располагање и сме отворени, врз основа на законските прописи, да се направат такви контроли“, вели вицепремиерот и министер за внатрешни работи, Оливер Спасовски, во неделното интервју на „Радио Слободна Европа“.

Тој, исто така, ги отфрла обвинувањата од ВМРО-ДПМНЕ дека МВР е вклучено и злоупотребено во кампањата на СДСМ, со тоа што се извршени полициски интервенции врз активисти на ВМРО-ДПМНЕ и врз кандидатот за градоначалник во Ново Село.

– Таквите обвинувања ги отфрлам во целост. Луѓето што МВР си го нарекуваа МВРО немаат никаков кредибилитет да зборуваат за тоа дека некој партизира институција на системот или поточно го партизира МВР. За нас врвен приоритет е да имаме фер и демократски избори, затоа се подготвуваме, правиме обука на сите полициски службеници што ќе учествуваат во спроведувањето на изборите, заедно со ОБСЕ – вели министерот за внатрешни работи.

Тој вели и дека МВР не можело да чека да поминат изборите за да се поднесат кривични пријави против градоначалници од ВМРО-ДПМНЕ, од кои дел се повторно кандидати на партијата за тие функции.

– Ако го видите извештајот на Прибе, јасно укажува дека не се преземаат доволно мерки кои би ја задоволиле правдата во Македонија. Од тој аспект, навистина временски детерминиран систем или модел, кога и на кој начин ќе реагира МВР е ирелевантно. Ние мора да ги утврдиме фактите и доказите и без разлика дали е некој на одредена позиција или е обичен граѓанин, доколку постојат аргументи и факти што треба да бидат процесуирани со закон, тоа треба да се направи. Се поставува прашањето зошто тие аргументи и факти биле чувани некаде во фиоки или не биле процесуирани досега и навистина не може и не се согласувам дека Министерството за внатрешни работи не треба да биде активно и дека не треба да ги спроведува своите овластувања кога било, кога се работи за криминал – вели Спасовски.


Суомалаинен: Добри мерки се презедоа за да се осигури веродостојноста на избирачкиот список


Скопје, 9 октомври, 2016 - 11:30 (META) 

„Мислам дека се презедоа добри мерки за да се осигури дека избирачкиот список е веродостоен. Избирачкиот список секогаш треба да ја рефлектира актуелната ситуација, не ситуацијата од пред пет или 10 години, туку кога луѓето навистина живеат. Во многу земји тоа се прави автоматски“, вели шефицата на мисијата на ОБСЕ во Скопје, Нина Суомалаинен, во неделното интервју на „Радио Слободна Европа“.

Во однос на прашањето за тоа дали се создадени сите услови за изборите да бидат регуларни, таа додава дека во моментов ситуацијата изгледа многу добро и се надева дека ќе продолжат потребните чекори и спроведувањето на Договорот.

За евентуалната одлука на Уставниот суд за прогласување на Специјалното јавно обвинителство за неуставно, која би можела да биде пречка за одржување на изборите, Суомалаинен вели дека доколку Уставниот суд донесе некоја одлука за ова прашање, тогаш политичките партии се обврзани да направат измени на законот ако е потребно.

– Верувам дека таа обврска ќе биде спроведена. Не би сакала да одам во веројатности на некои прашања и се разбира фокусот треба да биде на спроведувањето на Договорот од Пржино и вториот дел од овој договор потпишан летово поврзан со сите овие аспекти – додава Суомалаинен.

 


ЗНМ: Спикерот на Собранието сака да го контролира протeкот на информации


Скопје, 23 септември, 2016 - 17:01 (META) 

Со забраната на телевизиите да вршат директен пренос од седниците и од комисиите на Собранието, се контролира протекот на информации и тие селективно се пренесуваат до јавноста, велат од Здружението на новинари на Македонија (ЗНМ).

– Сметаме дека намерата на спикерот на Собранието е да го контролира протекот на информациите и селективно да ги пренесува до јавноста. Расправите што ѝ одговараат на власта ќе се пренесуваат во живо, а другите ќе се емитуваат во доцните вечерни часови. Собранието како претставничко тело на граѓаните треба да биде пример за транспарентност. Ако седниците на Собранието и на комисиите се јавни, тогаш нема никаква причина тие да не можат да се пренесуваат во живо. Ако може Собранискиот канал во живо да ги пренесува седниците, тогаш зошто не би можеле и другите медиуми. Правото за примање и за пренесување на информации може да се ограничи само ако со тоа за заштитуваат легитимни интереси. Нејасно е какви интереси штитеше Собранието кога одлучи да не им дозволи пренос во живо на колегите од „Нова ТВ“ – велат од ЗНМ.

Од здружението потсетуваат и на случајот на 24 декември 2012 година, кога новинарите беа насила избркани од собраниската галерија, а собранискиот канал ги исклучи камерите.

– Нема унифицирана практика во европските земји за начинот на пренесување на седниците на Собранието и на работните тела. Кај нас во ниту еден закон или деловник стриктно не се забранува стримингот од седниците на Собранието и на комисиите, а во такви ситуации, сè што не е забрането со Устав и со закон е дозволено. Власта сака да има монопол на вистина и да одлучува кои расправи од Собрание јавноста ќе може да ги следи во живо, а кои не – велат од ЗНМ.

Изминатава недела на „Нова ТВ“ и на радио „Слободна Европа“ не им беше дозволено да вршат пренос во живо од седницата на собраниската Комисија за политички систем и односи меѓу заедниците.


Гошев: Треба да се истражи каде завршуваат парите кои нелегално се одлеваат од државата


Скопје, 17 април, 2016 - 12:21 (META) 

„Има индиции што говорат дека огромни износи пари незаконски се одлеваат надвор од Македонија. Во годишниот извештај на „Глобал фајненшал интегрити“ имаше процена дека од 2004 до 2013 година се одлеале повеќе од 5 милијарди долари или годишно, во просек, се одлевале 516 милиони долари незаконски средства од Македонија“, вели поранешниот гувернер Петар Гошев, во неделното интервју за „Радио Слободна Европа“.

Според Гошев, треба да се истражи каде тие големи износи се одлеваат, затоа што, според него, вкупниот правно-економски систем е нефункционален, коруптивен, затајуваат контролните механизми речиси на сите нивоа.

Во однос на последните политички случувања и одлуката на претседателот Ѓорге Иванов за аболиција на политичари, Гошев смета дека ова што се случува „заслужува експлозија од незадоволство што ќе ја збрише оваа власт од нејзините запоседнати места.“