!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Велика Британија ќе воведе такса за работниците од ЕУ


Лондон, 11 јануари, 2017 - 17:57 (META) 

Британската влада сака да воведе такса од 1.000 фунти за секој британски работодавец што ќе вработи работник кој потекнува од некоја од земјите членки на Европска Унија.

Британскиот министер за миграција, Роберт Гудвил, пред Горниот дом на британскиот парламент истакнал дека е можно воведување на такса за работниците од ЕУ.

Гудвил истакнал дека ќе има програми кои ќе дозволуваат работниците во земјоделството да добиваат краткорочни, сезонски договори за работа во Велика Британија.

Велика Британија веќе ги зголеми таксите за работниците од земјите кои не се членки на ЕУ и тие ќе стапат на сила во април.

Работниците од 27 земји членки на ЕУ сега имаат право да живеат и да работат во Велика Британија, но тоа ќе се промени кога земјата ќе излезе од Европска Унија.


Македонија во портокалова фаза – бремените и хронично болните да не одат на работа


Скопје, 17 јуни, 2016 - 10:56 (META) 

Министерството за здравство, поради високата температура, излезе со препораки во кои се повикуваат работодавците денеска и утре да ги ослободат од работните обврски бремените жени и хронично болните лица на возраст над 60 години.

Во дописот се повикуваат работодавците да го реорганизираат работното време за да се избегнуваат активности на отворено во периодот од 11 до 17 часот.

Препораките доаѓаат по најавите од Управата за хидрометеоролошки работи дека Македонија во следните денови ќе влезе во портокалова фаза поради големата топлотна маса од југ, која ќе резултира со многу висока температура.

Од министерството, исто така, препорачуваат да не се одржуваат спортски активности на отворено во периодот од 11 до 17 часот, а градинките да не ги изнесуваат децата на отворено и да не практикуваат физичка активност во овој период.

„Потсетуваме дека е потребно граѓаните од целата држава да ги почитуваат општите препораки за заштита од високата температура, како што се: заштита од директна сончева изложеност, избегнување престој на отворено во периодот од 11 до 17 часот, носење светла и лесна облека, консумирање лесна храна и течности, хигиенски начин на подготовка на храната и редовно земање на терапијата кај хронично болните лица“, апелира Министерството.

Во препораките се наведува дека во овој период треба да се консумираат повеќе течности и свежи градинарски производи, а да се избегнува храна која термички не е обработена за да се избегне можната појава на труења со храна и на цревни заразни заболувања.


Стразбур пресече: Работодавците можат да им ги читаат пораките на вработените


Стразбур, 13 јануари, 2016 - 14:31 (META) 

Европскиот суд за човекови права во Стразбур потврди дека работодавците имаат право да ја проверуваат интернет-комуникацијата на своите вработени, односно да ги читаат пораките што тие ги испраќаат преку разни платформи.

Така е окончан случајот со неименуваниот романски инженер, кој е отпуштен во 2007 година и кој верувал дека судот во Стразбур ќе застане на негова страна затоа што работодавците му ја загрозуваат приватноста.

Инженерот своевремено, во работно време користел „јаху месинџер“ за да комуницира со братот и со свршеницата. Челниците на компанија му дале отказ откако дознале за тоа.

„Не било неразумно од работодавецот да провери што прави вработениот за време на работното време, дали ги извршува своите задачи“, стои во пресудата, со напомена дека компанијата им пристапила на пораките надевајќи се дека ќе добие увид во комуникацијата со деловните партнери.

Судиите во Стразбур, исто така, го оправдале и тоа што нивните романски колеги дозволиле спорните пораки, односно транскрипти, да се искористат како докази.

„Тоа е направено само за да се докаже дека вработениот го користел компанискиот компјутер за приватни цели“, стои во судската одлука.

Одлуката треба да ја почитуваат сите држави што ја ратификувале Европската конвенција за човекови права.