Македонскиот и грчкиот народ ги зближуваат невработеноста и сиромаштијата (инфографик)


Скопје, 30 јануари, 2019 - 12:11 (META) 

Со ратификацијата на Преспанскиот договор во грчкиот парламент се отвора ново поглавје во политичките односи меѓу Македонија и Грција, а уште поважно се создава можност за поголема економска соработка меѓу двете земји која досега беше обременета со несогласувањата околу спорот за името.

Главните економски параметри покажуваат дека нашата држава е економско џуџе во споредба со Грција, но и дека заедничка мака за граѓаните на двете земји се невработеноста и високата стапка на сиромаштија.

Според податоците на Светска банка, бруто домашниот производ по жител во Грција на крајот на 2017 година изнесувал 18.613 американски долари што е три пати повеќе отколку македонскиот кој изнесува 5.414 долари.

Според последните статистички податоци стапката на невработеност во Грција изнесува 18,6 отсто, а во Македонија 20,8 отсто, што ги става двете земји на врвот на листата во Европа по процентот на невработени лица.

Двете држави се уште поблиску по процентот на сиромашни лица, кој во Грција изнесува 20,2, а во Македонија 22,2 отсто од вкупната популација.

Во Грција просечната плата е позиционирана на 1.166 евра, а во Македонија на 399 евра. Сепак, статистичките податоци по сектори откриваат дека поголем број од работниците од двете држави може само да сонуваат за просечна плата. Најголем број од работниците кај нас земаат плата до 350 евра, а во Грција до 800 евра.

Инаку, економските придобивки од затоплувањето на односите меѓу двете земји дојдоа  само неколку дена по ратификацијата на Преспанскиот договор во грчкиот парламент. Каматите на 10-годишните обврзници на Грција се намалија за 1,5 отсто на 4.07 отсто, што е најниско ниво од септември, минатата година. Подобрување имаше и кај македонските обврзници. Приносите на обврзницата која достигнува во 2025 година се намалија на 2,51 отсто, што најниско ниво во изминатава година.

Ваквото движење на меѓународните финансиски пазари значи дека инвеститорите гледаат позитивни сигнали во имплементацијата на Преспанскиот договор што резултира со намалување на трошоците за задолжување на двете земји.


Во собраниска процедура се законските измени за преземање на медицински сестри во ЈЗУ


Скопје, 13 ноември, 2018 - 16:20 (META) 

Министерството за здравство информира дека измените на Законот за здравствена заштита за преземање во јавно здравство, на медицинските сестри кои претходно работеле во приватни здравствени установи, основани под закуп во здравствените домови, заради затворање на приватни здравствени установи ПЗУ и во меѓувреме останале без работа, се во собраниска процедура.

Во измените на Законот e внесена oдредба согласно која медицинските сестри, кои ќе останат без работа може да бидат преземeни во јавни здравствени установи.

„Овие законски измени, кои сега се уште се во собраниска процедура, пред две недели се усвоени од Владата. Таа ги усвои измените на Законот за здравствена заштита, со можност за преземање здравствени работници со високо образование, стоматолози и фармацевти од приватните во јавните здравствени установи без распишување оглас. На овој начин ќе се пополнат празните работни места на здравствените работници, со пократки процедури“ се вели во соопштението на Министерство за здравство.


Градежниците очекуваат пад на бројот на вработени


Скопје, 18 октомври, 2018 - 16:25 (META) 

Намалени порачки, пад на бројот на вработени и влошена економска состојба во градежниот сектор очекуваат раководителите на градежните компании во Македонија, открива најновата анкета на Државниот завод за статистика.

Во наредниот период се очекува продажните цени да се зголемат, a бројната состојба и квалитетот на механизацијата и опремата се над нормалата.

Најголемо влијание врз ограничувањето за подобрување на тековната градежна активност имаат следните фактори: зголемени трошоци за материјали со 22,4 отсто, нема побарувачка со 20,3 отсто, конкуренција во сопствениот сектор со 13,8 отсто и недостиг на обучен кадар со 12,1 отсто.


Во Прилеп има дефицит на бравари, конфекционери, општи работници


Прилеп, 7 септември, 2018 - 15:08 (META) 

Дефицитот на работна сила, сериозниот недостиг на средно-квалификуван кадар од разни области, а најмногу конфекционери, бравари и угостители е проблем на којшто посочуваат прилепските стопанственици.

Овој проблем е присутен последниве неколку години, но годинава станува алармантен. Меѓу бројните компании кои што посочуваат на недостигот на работна сила е конфекцијата „Комфи-ангел“, формирана со мешовит македонско-англиски капитал.

– Што се однесува до „Комфи-ангел“, порано за една апликација за вработување се пријавувале по 140, а  сега едвај десетина работници. Една од клучните точки во овие моменти е недостигот на работна сила. Пред извесен период разговаравме за недостиг од едуцирана работна сила, но сега станува збор за недостиг од работна сила, воопшто. Мора да најдеме начин и на локално, национално и регионално ниво како да го амортизираме овој проблем,за да не предизвикаме економски негативни ефекти во стопанството и на капиталот во Прилеп и во државата – вели Ирена Јакимоска, сопственичка на конфекцијата и претседателка на Управниот одбор на регионалната канцеларија на Стопанската комора –Прилеп.

Таа додаде дека менаџерите на секторите за човекови ресурси од повеќе фирми во градот заедно работат на изнаоѓање решенија за регулирање и ублажување на проблемот. Според неа, најдобро е да се подготви Стратегија за да може компаниите да „увезуваат“ работна сила.

– Работнички и може да се најдат, но многу тешко ќе најдете работници во Прилеп. Недостигот на работници,значи и намален број на потрошувачи,а тоа рефлектира со намален приход во државната каса, само по основ на ДДВ – оценува Јакимоска.

Стопанствениците забележуваат дека дел вработени не го почитуваат законот, во случаи кога одлучуваат да го прекинат договорот за работа. Едноставно без најава, заминуваат од една во друга фирма. Бизнисмените бараат рамноправна положба на домашните со странските компании, кои што имаат свои капацитети во ТИР зоните.  Сметаат дека државните субвенции придонесуваат тие компании да им понудат повисоки плати на вработените, а тоа е една од причините за одлив на работната сила од компаниите каде што работеле досега.

– „Витаминка“ поддржува и активно партиципира во насока да се изнајдат начини и мерки за ублажување на проблемот со недостиг на технички кадар на пазарот на трудот, со којшто се соочуваме во последно време. Ни недостигаат пред сè кадри со средно образование. Со цел да ги направиме нашите компании поатрактивни на пазарот на трудот, треба да се преземат мерки домашните компании да бидат поконкурентни во однос на компаниите што работат во индустриските зони, коишто вработуваат многу поголем број работници – вели Орде Ѓорѓиоски, директор на сектор за правни и општи работи во ПИ „Витаминка“.

За овие проблеми стопанствените ќе побараат поддршка и од Стопанската комора во Скопје, и од државата.

Од друга страна пак многу работници порачуваат дека единствено решение за да останат на работа, е зголемување на платите, почитување на законската регулатива за работно време и исплата на сите надоместоци согласно со законот и колективните договори.

– Доколку добиеме плата соодветна на трудот што го вложуваме, сигурно дека нема да заминеме од една во друга фирма. Се разбира дека нам ни е многу подобро да работиме во ‘Гентерм’,отколку во која било конфекција или фирма, каде што за огромен труд, добиваме 100 евра помалку. Прилепчани заминаа во странство, се иселија, нема веќе кој да им работи. Ако сакаат и нас да не задржат, а и новите генерации да останат овде, нека повелат нека ни ја зголемат платата –  коментираат многу работници и на социјалните мрежи.


Препораки од здравствените власти за заштита од топлотните бранови


Скопје, 9 август, 2018 - 10:21 (META) 

Институтот за јавно здравје (ИЈЗ) упати неколку препораки за граѓаните како да се однесуваат на високите температури, односно како да се заштитат при топлотните бранови.

Високите температури ја влошуваат состојбата кај луѓето со кардиоваскуларни болести (разни срцеви тегоби, проблеми со крвниот притисок, тромбози), како и кај оние што имаат проблеми со дишните патишта и кај лицата со ментални заболувања и предизвикуваат зголемена смртност.

Проблеми се можни кај постарите лица, но и кај доенчињата и работниците на отворено.

Кај општата популација, може да се јават акутни проблеми од изложеноста на високи температури како сончаница, топлотен удар, топлотни грчеви, функционални
нарушувања на централниот нервен систем и други.

Треба да се преземат одредени мерки за да се спречат проблеми, препорачуваат од ИЈЗ.
Се препорачува за време на најтоплиот период во денот (од 10 до 17 часот) да се избегнува напорна физичка активност, вклучувајќи и спорт и рекреативни активности, а и во поглед на некои други активности, препорачливо е да се завршуваат до 10 часот или по 17 часот.

Носете светла и лесна облека, зашто светлите бои ја рефлектираат светлината), а при директна изложеност на сонце, ставете заштитни очила и капа.

Останете во затворени климатизирани простори, на температура од 23 до 25 Целзиусови степени. Затворете ги прозорците и ролетните во текот на денот, а отворете ги навечер, кога температурата е пониска.

Внесувајте големо количество течност, почнувајќи од обична вода, преку минерални води. Одбегнувајте алкохолни пијалоци и пијалоци кои содржат кофеин, како и екстремно ладни пијалоци.

Внесувајте помало количество храна. Избегнувајте мрсна и високо–калорична храна, како и храна која содржи поголемо количество шеќер.

При неопходен престој на отворен простор најдете можност за почести одмори под сенка и избегнувајте директен престој на сонце.

Кога сте во возило, отворете прозорци за да овозможите циркулација на воздухот. Целосно затворените возила стануваат многу жешки, па не оставајте никого да чека во возилото!

Хронично болните, посебно тие со срцеви, невролошки и белодробни болести потребно е да бидат посебно дисциплинирани во однос на овие препораки и редовно да ја земаат својата терапија. За сите промени во здравствената состојба задолжително да го
консултираат својот матичен лекар.

Ако чуствувате зашеметеност, слабост, вознемиреност или имате интензивна жед и главоболка, побарајте помош, преместете се на постудено место колку што е можно побрзo измерете ја својата телесна температура. Веднаш напиjте се вода за да се рехидрирате.

Ако имате болен мускулен грч најчесто во нозете, рацете и стомакот, што побрзо одморете се на студено местои напијтесе течност која содржи електролити. Лекарска помош е потребна ако топлотните грчеви траат подолго од еден час.

Консултирате се со свјот доктор, доколку почуствувате невообичаени симптоми или ако симптомите траат подолго време!

Ако некој член на Вaшето семејество или лице на кое помагате има топла и сува кожа или е во бессознание, веднаш повикајте 194! Додека се чека итната медицинска помош префлете го на студено место и ставете го во хоризонтална положба, подигнете ги нозете и колковите; отстранете ја гардеробата, воспоставете надворешно ладење како студени облоги на вратот, пазувите и слабините, постојано ладете го и прскајте ја кожата со вода. Мерете ја телесната температура. Не давајте терапија. Ако лицето е во бессознание (несвест), не треба да лежи на грб, свртете го на страна.

Други можни ризици по здравјето при високи температури се труење со храна и цревни заразни заболувања! Пред употреба задолжително е миење на свежиот зеленчук и овошје. Храната што се готви еднаш консумирајте ја, или ако тоа не го направите, оставате ја во фрижидер на  4 Целзиусови степени, а потоа пред јадење, загрејте ја до повеќе од 100 Целзиусови степени.

Избегнувајте производи кои термички не се обработени, и бидете внимателни со консумација на сладолед и разни кремови, велат препораките од Институтот за јавно здравје.


Повредени 20 работници во сообраќајка кај Мамутчево


Велес, 23 јули, 2018 - 15:47 (META) 

Дваесет работници се повредени во сообраќајката што се случи попладнево околу 13:20 часот на излезот од велешкото село Мамутчево. Се судриле камион и автобус кој превезувал работници од Велес.

Како што информира за МИА Весна Лазаровска од ЈЗО Општа болница Велес со возила на итна медицинска помош од Велес во болницата итно биле донесени 20 повредени работници.

– Сите беа прегледани и им беше укажана медицинска помош од тимот на Општа болница Велес предводени од хирургот д-р Филип Тодоровски. Од нив кај осуммина беа утврдени полесни телесни повреди и истите се хоспитализирани во болницата, а останатите 20-ина по укажаната медицинска помош во амбулантата на болницата испратени се на домашно лекување – информира Лазаровска.

Екипа на СВР Велес е на терен и прави увид за утврдување на причината за сообраќајната несреќа.


Синдикатот на Југохром бара итна средба со премиерот, во спротивно ќе протестираат


Тетово, 7 мај, 2018 - 11:57 (META) 

Синдикатот на Југохром Алзар на 17 април доставил допис до владата за одржување на неодложна средба, поврзана со статусот на Југохром Јегуновце, информираат од таму.

Но, како што се додава во соопштението, средба немало.

„Затоа со овој допис повторно ви се обраќаме со барање за одржување на итна неодложна средба. Доколку до крајот на неделава не се одржи средбата, ние како Синдикат ќе бидеме принудени, поради огромниот притисок од напуштените работници, да организираме синдикални протести пред Владата“, се додава во соопштението.


Бошњаковски: Сите вработени во „Еурокомпозит“ в понеделник ќе добијат плата


Скопје, 3 мај, 2018 - 12:34 (META) 

Доцна синоќа владата постигна договор со вработените од Еурокомпозит, при што е договорено во понеделник линеарно на сите вработени да им се исплати платата, информира денеска владиниот портпарол Миле Бошњаковски.

– Вработените презедоа обврска да ја завршат работата, а постигнат е и договор да се смени менаџерскиот тим. Вработените на „Еурокомпозит“, кои вчера протестираа пред владата и во Прилеп – од денеска веќе се наоѓаат на своите работни места – рече Бошњаковски.


МТСП: Владата усвои законски измени за да се опфатат дополнителни 1.900 стечајци


Скопје, 27 февруари, 2018 - 15:12 (META) 

На денешната 56. седница, Владата ги усвои најавените измени на Законот за материјално обезбедување на невработените лица, поради приватизацијата на претпријатијата со доминантна сопственост на државата, предложени од страна на Министерството за труд и социјална политика.

Од МТСП информираат дека, со законот кој што беше донесен во септември 2017 година, досега се издадени решенија на 2.732 стечајни работници. Со овие измени ќе бидат опфатени дополнителни 1.900 лица.

„Со усвоените измени и дополнувања на законот се олеснуваат потребните услови утврдени со постојниот закон, кои се однесуваат на стекнување на правото на материјално обезбедување доколку престанокот на работниот однос настанал во моментот кога претпријатието со доминантна сопственост на државата се приватизирало, под услов единствениот матичен број на субјектот да не е променет од моментот на засновањето на работниот однос во тоа претпријатие, до неговиот престанок. Истовремено, поголема флексибилност е дадена со условот за потребната возраст која треба да ја има невработеното лице (најмалку 52 години за жени, односно 55 години за мажи), со тоа што истата сега се исполнува не од моментот на стапување во сила на постојниот закон, туку во моментот на поднесување на барањето за остварување на правото за материјално обезбедување“, информираат од МТСП.


Од Стопанска комора бараат законски измени за вработувања во комуналните претпријатија


Скопје, 22 јануари, 2018 - 14:46 (META) 

Здружението на комуналните дејности при Стопанската комора бара измени на законските прописи кои го регулираат вработувањето работници во комуналните претпријатија на локално и на државно ниво.

– Постојните закони го отежнуваат вработувањето во еден дел, пред се при ангажирање сезонски работници, но и во други услови кога е потребно да се направат одредени поместувања поради работните активности на одредени работни позиции во компаниите – информираше претседателот на Здружението, Звонко Јованоски.

Од таму исто така ќе бараат интервенција во Законот за јавни набавки и активно вклучување во изработка на новиот закон за управување со отпад.

– Здружението ќе се вклучи во активностите околу донесувањето на новиот закон за управување со отпад кој е во почетна фаза и согласно укажувањата на Министерството за животна средина треба да се донесе до октомври годинава. Здружението има забелешки и на постојниот Закон за јавни набавки, согласно кој голем дел од тековните работи на комуналните претпријатија се отежнуваат. Проблемот е во понудената најниска цена која не соодветствува со квалитетот, како и во лимитот од 500 евра согласно кој може да се вршат интервентни набавки, што е многу мал износ – додаде Јованоски.