!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

8,8 милиони евра се предвидени за задржување на младите во државата


Скопје, 19 јули, 2017 - 14:46 (META) 

Нова владина мерка, наречена младинска гаранција, најави денеска премиерот Зоран Заев на деловниот појадок со Сојузот на стопанските комори. Целта на оваа мерка, за која до крајот на годината се предвидени 8,8 милиони евра, е младите да останат во државата и да работат тука.

– Младинската гаранција значи во одреден период државата да финансира директно пари за бруто-плати на млади луѓе кои завршиле образование и се подготвени да се обучуваат или трајно да се вработат. За бизнис-заедницата тоа ќе значи бесплатно подготвување кадар, обучување на претходно теоретски подготвените млади луѓе, со намера, ако навистина вредат, да добијат трајно вработување и да биде искористен нивниот потенцијал – изјави Заев.

Тој побара помош од компаниите да обезбедат работни места за младите луѓе. Дел од средствата од оваа мерка ќе бидат пренасочени за универзитетите, за доедукација на младите, а најголемиот дел од нив се за бизнис-заедницата.

Премиерот истакна дека заминувањето на секој млад човек, Македонија ја чини околу 100.000 долари.


ВМРО-ДПМНЕ обвинува за партизација на МВР, СДСМ вели дека се гради професионализам


Скопје, 16 јули, 2017 - 17:48 (META) 

Потпретседателот на СДС, Оливер Спасовски, сега како министер за внатрешни работи, без никаков аргумент почна со партиски чистки и со поставување партиски послушници на сите раководни позиции во Министерството за внатрешни работи, обвини на партиска прес-конференција денеска Саше Павловски од ВМРО-ДПМНЕ. Тој рече дека истото Спасовски го правел и кога беше министер за внатрешни работи во техничката влада.

– За сметка на сменетите професионалци, позициите ги пополнуваше со партиски послушници, унапредувајќи ги и по седум скалила, спротивно на системот на кариера. Сега повторно сме сведоци на исто вакво однесување. Потпретседателот на СДС, Оливер Спасовски, и неговите партиски послушници секојдневно се јавуваат на вработени во МВР кои низ долгите години во службата, постепено ја граделе кариерата и стигнале до одредена позиција за да им нудат одредени пониски позиции. Понудата од СДС е земи или остави. Им нудат пониски места на кои би биле распоредени по сопствено барање. Во спротивно, следат закани дека ќе бидат деградирани и девалвирани и дека нема да може ниту судот да им помогне. Таргет се сите професионалци кои не постапуваат по партиските наредби на Оливер Спасовски – рече Павловски, порачувајќи дека „тоа што го прави Оливер Спасовски е целосно незаконски и спротивно на колективниот договор и на Законот за внатрешни работи“.

На прес-конференцијата реагираше СДСМ, од каде посочуваат дека вистинска партизираност на МВР имало во времето на Јанкулоска.

„Партизацијата на државните институции и совпаѓањето на државата со партијата беше заштитен знак за 11-годишното владеење на ВМРО-ДПМНЕ. Еден од најочигледните примери за масовна партизација беше Министерството за внатрешни работи кое според признанието на тогашната министерка Гордана Јанкуловска, ВМРО-ДПМНЕ го претвори во МВРО-ВМРО“, се вели во реакцијата на СДСМ.

Владејачката партија вели дека новата влада ќе се води со таа неправилност и ќе создаде услови за вистинска професионализација.

„Владата предводена од СДСМ почна со процес на ослободување на заробените институции од страна на ВМРО-ДПМНЕ. Во рамки на владиниот реформски план „3-6-9“ почнуваат сериозни реформи во судството, медиумите, безбедносните служби, борбата против корупцијата, во јавната администрација и изборното законодавство, согласно препораките на ОБСЕ, ОДИХР и на други релевантни меѓународни институции. Ќе има целосна професионализација на државните институции кои ќе работат единствено во интерес на граѓаните и никогаш повеќе ниту едно министерство, ниту една институција нема да функционира како нечиј партиски штаб како што тоа го правеше ВМРО-ДПМНЕ“, стои во соопштението.


Отворена фабриката „Адиент“ во ТИРЗ – Струмица


Струмица, 15 јуни, 2017 - 16:39 (META) 

Премиерот Зоран Заев, американскиот амбасадор Џес Бејли,  директорот на Дирекцијата за технолошко-индустриски развојни зони, Виктор Мизо, и Владимир Теплик од компанијата „Адиент“ денеска ја отворија оваа фабрика во технолошко-индустриската развојна зона во Струмица. Инвестицијата изнесува 20 милиони американски долари и ќе вработи повеќе од 1.300 лица.

Заев истакна дека отворањето на американската фабрика „Адиент“ значи отворање на нови работни места и поради тоа е од огромно значење за граѓаните.

– Инвеститорот ќе остварува приход и профит, граѓани на Македонија ќе бидат вработени, а државата ќе наплаќа данок. Сето тоа е добро и корисно за сите и тука сум да испратам порака дека ние, како сериозна и одговорна влада, го поддржуваме овој значаен проект. Инвестициите ѝ се потребни на Македонија и поради тоа ќе посветиме големо внимание на развивањето поволна деловна клима во државата – изјави Заев.

Тој додаде дека со исполнувањето на условите за ЕУ и за НАТО, тоа ќе биде охрабрување за странските инвеститори, но и за домашните фирми.

– Конкуренцијата помеѓу фирмите ќе стимулира квалитет во работењето, ќе поттикнува конструктивна конкуренција во обезбедувањето подобри услови за работа во Македонија, поголема грижа за работниците, повисоки плати. На овој начин ќе обезбедиме поволна деловна клима во целата држава – додаде Заев.


СДСМ: Невработеноста ќе се намалува реално, а не декларативно


Скопје, 10 јуни, 2017 - 17:46 (META) 

„Невработеноста ќе се намалува реално и тоа ќе го чувствуваат сите граѓани, а не декларативно како што досега правеше ВМРО-ДПМНЕ, преку нарачани бројки од контролирани институции, бришење од евиденција на невработените лица и иселувањето на младото работоспособно население надвор од државата“, се вели во реакцијата на СДСМ на прес-конференцијата на членот на ИК на ВМРО-ДПМНЕ, Христијан Мицкоски.

Во соопштението се додава дека „нелогично е да се намалува стапката на невработеност во услови кога економијата стагнираше заради блокадите и опструкциите на ВМРО-ДПМНЕ на демократските процеси за формирање на новата влада.“

„Потребен е економски пораст што ќе ги апсорбира новотворените работни места“, се додава во соопштението.


Министерски состанок за „Агрокор“ утре во Белград


Белград, 18 април, 2017 - 15:14 (META) 

Во Белград за утре е закажан состанок на министрите за трговија и за економија на Србија, Словенија, Босна и Херцеговина и на Црна Гора, на кој ќе се разговара за случајот со хрватскиот концерн „Агрокор“.

На состанокот, на кој не се поканети претставници од Хрватска, се очекува да се стане збор за тоа како да се задржат работните места во фирмите што се во состав на „Агрокор“, да се заштитат интересите на набавувачите и како да се спречи одлив на пари од фирмите на „Агрокор“ во регионот во матичната компанија.

Во состав на „Агрокор“, чие седиште е во Загреб, има повеќе од 60 фирми од земјите од регионот, кои вработуваат околу 60.000 луѓе.

„Агрокор“ во Србија е сопственик на фирмите „Меркатор С“, „Дијамант“, „Фриком“, „МГ Мивела“, „Кикиндски млин“ и „Нова слога“, кои вработуваат околу 11.000 работници.

Хрватскиот гигант „Агрокор“, кон крајот на минатиот месец потпиша предстечаен договор со банките и со другите кредитори, на кои им должи околу 10 милијарди евра, за да се направи напор да се задржи ликвидноста на компанијата. Сметките на „Агрокор“ се блокирани поради долг за даноци од околу 10 милиони евра.


СДСМ ќе потроши милиони евра, но за нови работни места, порача Заев од Делчево


Делчево, 29 ноември, 2016 - 23:29 (META) 

„Ако Груевски потроши 700 милиони евра за споменици и за фонтани, и јас ќе потрошам 700 милиони евра, но за нови работни места“, порача лидерот на СДСМ и носител на кандидатската листа на партијата во изборната единица 4, Зоран Заев, на митингот кој Коалицијата за живот во Македонија вечерва го одржа во Делчево.

Тој истакна дека Делчево ќе го оправда аманетот на Гоце Делчев, револуционерот по кого градот го носи своето име, дека ослободувањето на еден народ е пред сè негово сопствено дело.

– Ах, да стане Делчев и да види какви неранимајковци го носат светото име ВМРО и да види на какво дереџе ја донесоа Македонија… Денеска знаеме сè, вистината е обелоденета до крај, никој не може однадвор да дојде и да ни ја спаси Македонија. Затоа Делчев зборуваше дека ослободувањето на еден народ е пред сè негово сопствено дело. Во наши раце е пенкалото, да се ослободиме од крпениот живот и да обезбедиме живот како во модерните Италија, Хрватска, Словенија – рече Заев.

Тој истакна дека сите ресурси на државата ќе бидат насочени кон отворање нови работни места, просечната плата ќе биде 30.000 денари, а минималната, која ќе изнесува до 16.000 денари, ќе биде еднаква за сите работници независно од кој сектор доаѓаат.

Лидерот на СДСМ рече дека нема да дозволи промена на Уставот, кој, како што истакна, напротив, ќе се почитува и ќе се спроведува.

– Се збунил Груевски, вели ќе има федерализаицја и кантонизација, но не, ќе има конфискација, фамилијата на власт ќе врати сè што им одзеде на стотици фамилии – рече Заев.

Пред делчевци вечерва се обрати и носителот на кандидатската листа на СДСМ во третата изборна единица, Љупчо Николовски, кој меѓу другото порача дека ќе има праведна распределба на државното земјиште.

– Земјата ќе биде во рацете на вистинските земјоделци. Тие ќе имаат поевтина нафта, поевтини трошоци, бенефициран стаж и сигурен откуп на земјоделските производи – рече Николовски.

Денеска СДСМ имаше и митинг во Македонска Каменица, каде лидерот на опозициската партија истакна дека СДСМ ќе го врати стариот закон за пензионирање на рударите.

– Не може бенефициран стаж да има секој, а рударите да се мачат – истакна Заев.


СДСМ: 10.000 затворени домашни фирми, секоја трета со блокирана сметка


Скопје, 28 ноември, 2016 - 10:21 (META) 

„10.000 затворени домашни фирми се резултатот на Никола Груевски во економијта. Секоја трета фирма е со блокирана сметкa. Малите и средни претпријатија со години беа потценувани со државна помош од само две евра годишно по фирма“, се вели во соопштението на СДСМ.

Во него се додава дека 10.000 семејства кои егизистираа од тие фирми останаа на улица без работа и основна егзисетнција.

Од СДСМ велат дека планираат 140 милиони евра директна поддршка за домашните фирми, за да се развиваат и да отвораат нови работни места.

 


Судирите на Блискиот Исток ја уништуваат економијата, смета Лагард


Њујорк, 16 септември, 2016 - 18:15 (META) 

Економијата на Блискиот Исток се уништува со воените судири и бегалската криза, оцени денеска првиот човек на Меѓународниот монетарен фонд, Кристин Лагард.

– Во тој регион повеќе од 30 милиони луѓе станаа бегалци или се привремено раселени. Основните средства за производство во воените зони се уништени. Загубите, кога станува збор за богатство и приходи, се огромни има недостаток на образован човечки капитал како и работни места – изјави Лагард.

ММФ денеска објави извештај за последиците од судирите на Блискиот Исток и ефектите врз економијата.

Лагард наведува дека и повеќе од 11 милијарди долари помош ветени за Сирија и тој регион до 2020 година нема да бидат доволни имајќи ја предвид големината на кризата.


Виси на конец судбината на повеќе од 1.800 вработени во грчките телевизии


Атина, 4 септември, 2016 - 12:30 (META) 

Повеќе од 1.800 новинари, техничари и вработени во грчките телевизии може да останат на улица поради новите измени во грчкиот телевизиски простор. Судбината на телевизиите што не успеаја да обезбедат национални телевизиски концесии, виси во воздух и илјадници новинари не знаат што ќе се случува со нив откако ќе поминат трите месеци неопходни за да се спроведат промените по завршувањето на владината аукција за концесии.

По жестоки реакции од новинарите за индиферентноста на грчкото Здружение за новинари кон целиот процес, од Здружението вчера најавија потенцијални 24-часовни штрајкови и прекини на работата на медиумите во знак на протест против владината одлука за ваков тип регулација на медиумскиот простор и принудно затворање телевизии.

Оттаму предупредуваат дека неизвесна е и иднината на новинарите во телевизиите кои обезбедија концесија, бидејќи поради високите суми платени за концесијата, можно е да дојде до нови отпуштања или намалување на платите.

Здружението на новинари бара од владата да не се дозволи да се затворат телевизиите без концесии и да се загарантираат работните места на новинарите и на другите вработени, како и да се гарантира слободата на размена на идеи и слободното медиумско информирање на граѓаните.

За потсетување, грчката влада на аукција додели само четири концесии, и тоа две на постоечки телевизиски куќи, „Скај“ и „Антена“, и две на нови медиумски куќи кои ќе се формираат и ќе почнат да работат во следните три месеци. Другите телевизии, како „Мега“, „Алфа“, „Стар“ и „Епсилон“, не успеаја да обезбедат концесија и, според најавите, по три месеци ќе треба да го згаснат својот сигнал. Во државната каса од аукцијата за ТВ-концесии влегоа дополнителни 246 милиони евра, пари кои грчкиот премиер Алексис Ципрас најави дека ќе се искористат за помош за ранливите групи во државата.


6.687 слободни работни места во вториот квартал од годината


Скопје, 2 септември, 2016 - 15:09 (META) 

Во вториот квартал годинава во Македонија се регистрирани 6.687 слободни работни места, објави Државниот завод за статистика. Најголем број слободни работни места, односно 2.398, има за работници во услужни дејности и во продажба.

Најмала е стапката на слободни работни места во секторот снабдување со електрична енергија, гас, пареа и климатизација, каде што изнесува 0,1 отсто.

Деловните субјекти кои имаат од 10 до 49 вработени имаат највисока стапка на слободни работни места, 1,88 отсто.

Со највисока стапка на слободни работни места, 2,3 проценти, е Југоисточниот Регион.