Познати имињата на членовите на групата за реформи во УБК


Скопје, 19 октомври, 2018 - 10:21 (META) 

Министерството за внатрешни работи формиралo работна група за реформите во Управата за безбедност и контраразузнавање, чија цел е да создаде професионални, департизирани, транспарентни агенти кои ќе ги штитат граѓаните и државата. Групата се состои од 32 лица, а во неа се вклучени претставници од државни институции и невладини организации, пишува „Порталб.мк“.

Дел од работната група за спроведување реформи во УБК се и Народниот правобранител, Иџет Мемети; претставникот на Оперативно – техничката агенција (ОТА), Зоран Ангеловски, професор на Правниот факултет „Јустинијан Први“ – Скопје; Гордан Калајџиев од Хелсиншкиот комитет за човекови права во Република Македонија; претставничката на НВО „Аналитика“, Магдалена Лембовска; како и Александар Стојановски од „Еуротинк“.

Од пратениците, ќе учествуваат тројца – Емилија Александрова од  собраниската Комисија за надзор над работењето на Управата за безбедност и контраразузнавање и Агенцијата за разузнавање, Фросина Ташевска – Ременски од собраниската Комисија за одбрана и безбедност, како и Зоран Илиоски од Комисијата за надзор на спроведувањето на посебната истражна мерка за прислушување на комуникациите од страна на МВР, Управата за финансиска полиција, Царинската Управа и Министерството за одбрана.

Од Министерството за внатрешни работи (МВР) ќе бидат вклучени 12 членови:  Силјан Аврамовски, Славјанка Петровска, Сашо Тасевски, Ариф Асани, Даниела Јаковлевски – Ѓоршоска, Сашо Трајковски, Нухи Незири, Весна Доревска, Снежана Петровиќ – Арсовска, Светлана Влаховиќ – Димановска, Тони Станковски и Виолета Влаховиќ.

Претставник на Министерството за одбрана во Работната група за реформите во Управата за безбедност и контраразузнавање е Горан Василевски, а од Министерството за финансии тројца: Благоја Крстевски од Царинската управа, Блажо Трендафилов од Управата за финансиско разузнавање и Јане Шилев од Управата за финансиска полиција.

По еден член имаат Врховниот суд на Република Македонија – Рахилка Стојковска, од Основното јавно обвинителство – Влатко Георгиевски, од Јавното обвинителство за гонење на организиран криминал и корупција – Вилма Рускоска, од Специјалното јавно обвинителство – Атанас Гинев, од Агенцијата за разузнавање – Зоран Иванов, од Управата за безбедност на класифицирани информации – Стојан Славески, од Управата за заштита на лични податоци – Валентин Ветаџокоски и Игор Кузевски, пренесува Порталб.мк.

Овие 32 членови на работната група за спроведување на реформи во УБК имаат обврска најдоцна до 15 ноември до Владата да го достават предлогот на моделот за реформи во системот за безбедност и разузнавање и планот за развој.

„Цел на оваа работна група е преку еден широк процес на консултации да и го предложи на Владата најдобриот и најсоодветниот модел за реформи“, велат од МВР.

Инаку, поради скандалот со незаконските прислушувања, што предизвика политичка криза, во текот на месец октомври до 15 ноември 2018 година, во Македонија ќе се одвива консултативниот процес за избирање на новиот функционален и реформаторски модел на УБК. Оттука, прислушувањето нема да биде под надлежност на УБК, туку истото ќе биде раководено од Оперативно – техничката агенција (ОТА).

Трите модели за кои се дискутира се дел од анализите на проектот ,,Консолидација на безбедносниот систем“, под покровителство на DCAF ( Женевски центар за демократска контрола на вооружените сили).

Целта на оваа Меѓуресорска работна група е преку широк консултативен процес на Владата да и предложи кој е најсоодветниот модел за реформа.

Засега, во опција се три модели:

1. Да остане досегашниот модел, со кој УБК ќе биде дел на МВР.
2. УБК да се одвои од МВР и да биде независен орган и инститиција.
3. Да се поврзе УБК со Агенција за разузнавање и да се формира посебен орган на државната амдинистрација.


Шилегов со работна група ќе бара системско решение за нападите од кучиња


Скопје, 11 декември, 2017 - 16:53 (META) 

Градоначалникот на Град Скопје, Петре Шилегов формирал работна група од пет члена „за изнаоѓање на системско решение“ за спречување на напади на граѓани од кучиња.

Работната група е составена од еден советник во Советот на Град Скопје, еден вработен во Секторот за комунални работи и по еден претставник од здружението за заштита на животни „Анима мунди“, граѓанската иницијатива „Кане Корзо“ и од Асоцијацијата на активности за правата на животните.

– Единствениот начин системски да се реши овој проблем е преку обезбедување на контрола на бројот на уличните кучиња по пат на хумано и одговорно времено стационирање и третирање на животните. Истовремено бараме и системско решение за целосно регулирање на одговорностите на сопствениците на домашни миленици за спречување на ваквите инциденти. Работиме на чипирање на сите кучиња во соработка со Агенцијата за храна и ветеринарство. Ова е процес кој одзема релативно долг временски период и заради тоа апелирам за разбирање од страна на граѓаните- изјави Шилегов.

Градоначалникот ги повика несовесните граѓани кои фрлиле отров итно да престанат бидејќи, како што рече, со тоа прават повеќе кривични дела поврзани со насилство врз животните и предизвикување општа опасност.

– Но, мора да прифатиме дека инциденти имало и ќе има. Животните не ни се непријатели. Треба да се гарантира нивната благосостојба, но истовремено и безбедноста на граѓаните и нивната заштита од вакви или слични напади ни е приоритет. Фокусирани сме на овој проблем и се надеваме дека во најкраток можен рок ќе имаме финално решение на проблемот – рече Шилегов.

Шилегов информираше дека препораките од извештајот на работната група заедно со препораките на Агенцијата за храна и ветеринарство, ќе влезат во буџетот на Градот за 2018 година.


Кој е Силјан Аврамовски, шефот на работната група за реформи во системот за прислушување


Скопје, 1 ноември, 2017 - 11:18 (META) 

Директор на Управата за безбедност и контраразузнавање (УБК), министер за внатрешни работи, заменик-директор во УБК, одговорен за соработка со тајните служби на пријателски земји, во времето на Сашо Мијалков. Ова се највпечатливите функции на Силјан Аврамовски, кој како претставник на МВР е назначен за претседател на работната група, составена од 29 членови, за спроведувањето на реформите во системот за следење на комуникациите.

Аврамовски, според биографијата, е професионалец во службата, кој од дипломирањето на Факултетот за безбедност во Скопје целата своја кариера ја поминал во МВР, односно во УБК. Важи за експрет за антитероризам.

Во неговата „биографска лична карта“ на „Википедија“ во графата политичка партија стои – СДСМ.

Силјан Аврамовски е роден на 10 април 1960 година во Скопје.

  • 1983 – дипломира на Факултетот за безбедност во Скопје, по што се вработува во МВР, каде постепено напредува, извршувајќи повеќе функции од приправник, преку инспектор во Карпош, главен инспектор во Втората управа за спротивставување на меѓународен и внатрешен тероризам во Службата за државна безбедност (СДБ), до началник на Управата за контраразузнавање во ДБК,како и помошник-директор за оперативни работи на Управа за безбедност и контраразузнавање.
  • Февруари 2003 – јуни 2004 година Аврамовски е директор на Управата за безабедност и контраразузнавање.
  • 2 јуни 2004 – 17 декември 2004, Аврамовски беше министер за внатрешни работи.
  • 2006 година до денес – Останува на висока позиција во УБК, како заменик-директор во службата, фунцкија што ја извршува и за време на владата на Никола Груевски и директорувањето на Сашо Мијалков со УБК.

Во времето додека Аврамовски е привремен директор на УБК, а министер за внатрешни работи е Љубомир Михајловски  – Џанго, на 31 декемри 2004 година, се случува апсењето на Калид ел Масри, германски државјанин со либанско потекло.

Масри беше уаспен на граничниот премин Табановце под сомение дека е терорист на Ал каеда. По 23 дена испрашување во еден скопски хотел, македонските безбедносни служби го предаваат Масри на ЦИА, чии агенти го носат во Авганистан. Таму бил мачен пет месеци, сè додека агентите на ЦИА не утврдиле дека станува збор за погрешен човек. Масри потоа бил пренесен во Албанија и таму ослободен.

Во октомври 2013 година, Силјан Аврамовски беше лустриран за случајот „Темел“. Станува збор за следење на организаторите на студентските протести и членови на подмладокот на ВМРО-ДПМНЕ во 1997 години, кога Аврамовски бил началник на првата управа во УБК.

Според образложението на Комисијата за лустрација, тој давал или одобрувал дејствувања со кои се кршени основните човекови права и слободи на граѓаните од идеолошко-политички причини.


Формирана работна група за реформските мерки во енергетиката


Скопје, 10 октомври, 2017 - 20:54 (META) 

Владата на Република Македонија ја усвои информацијата за степенот на имплементација на реформските мерки во областа на енергетиката и донесе одлука за формирање работна група за реализација и за следење на активностите.

Работната група, како што соопштија од владата, ќе ја сочинуваат претставници од канцеларијата на претседателот на Владата, кабинетот на заменикот на претседателот на Владата задолжен за економски прашања и за координација со економските ресори, кабинетот на заменикот на претседателот на Владата задолжен за европски прашања, Министерство за економија, Министерство за финансии, Регулаторна комисија за енергетика, АД МЕПСО, АД ЕЛЕМ и од Комисија за заштита на конкуренцијата.


Работна група на Владата ќе го реформира системот за следење на комуникациите


Скопје, 27 септември, 2017 - 14:42 (META) 

Владата ќе формира меѓуресорска работна група која ќе треба да подготви решение за реформа на системот на следење на комуникациите, врз основа на препораките од експертската група на Рајнхард Прибе, кое ќе обезбеди заштита на правата на граѓаните и заштита од злоупотреби на прислушувањето.

Потребата за формирање на работната група била усвоена на вчерашната седница на Владата, а на предлог на Министерството за внатрешни работи.

„На предлог на Министерството за внатрешни работи, Владата на Република Македонија ја разгледа и ја усвои информацијата за потребата од формирање на меѓуресорска работна група за подготвување и за следење на имплементацијата на планот за реализација на препораките на групата високи експерти за системски прашања од владеење на правото во врска со следењето на комуникациите“, велат од Владата.

Според портпаролот на Владата, Миле Бошњаковски, крајната цел е јавно и транспаретно да се избере модел кој ќе биде најсоодветен да ги заштити сите граѓани и да не се дозволи да се повтори злоупотребата на системот за следење на комуникациите.

– Измените на Законот за следење на комуникациите е дел од сеопфатна реформа на законскиот и институционалниот систем за следење на комункациите, предвидена и во планот „3-6-9“ – рече Бошњаковски, на денешната прес-конференција.

Владата донела одлука оваа работна група да биде составена од претставници од овластените органи за следење на комуникациите, односно одделни министерства, Јавното обвинителство, судските органи надлежни за донесување на наредба за следење на комуникациите, претставник од Дирекцијата за заштита на личните податоци и од собраниската Комисија за надзор над спроведувањето на посебната истражна мерка следење на комуникациите, како и од други управи во надлежност на Владата.

Предвидено е во работата да биде вклучена и научната и стручната јавност од областа на кривичната постапка, Народниот правобранител, како и претставници на граѓански организации од оваа и од областа на човековите права.


СЈО да работи во рамки на ОЈО, предвидува стратегијата за реформи во правосудството


Охрид, 11 септември, 2017 - 19:17 (META) 

Работната група за подготвување на стратегијата за реформи на правосудниот сектор во Македонија денеска во Охрид ја презентираше нејзината нацрт-верзија, според која треба да се изработат законски решенија за судовите, јавното обвинителство, јавните обвинители и за судскиот совет.

Стратегијата за реформи во правосудството и акцискиот план предвидуваат подобрување на условите за работа на судиите, јавните обвинители, судската и на јавно-обвинителската служба, распределба на судските предмети (АКМИС) без надворешни влијанија, избор и унапредување на судии и на јавни обвинители според повисоки законски критериуми, донесување на нов кривичен законик, укинување на Вишиот управен суд, поништување на целиот процес на лустрација, како и избор и разрешување на судии и обвинители врз основа на објективни и мерливи критериуми.

Во однос на СЈО, стратегијата предвидува продолжување на работа на оваа институција во рамките на јавното обвинителство на Република Македонија со автономна надлежност проширена и со гонење на кривични дела од висок профил на корупција (white-collar crime).

Министерот за правда, Билен Саљији, рече дека Владата е цврсто одлучена реформите во овој сектор да бидат со цел враќање на довербата на граѓаните во правосудниот систем, подобрување на пристапот до правда за сите граѓани, целосно владеење на правото и инсталирање на меритократијата во правосудниот сектор.

– Ова се едноставни принципи, но нивната имплементација е бескрајно компликувана. Оваа реформа е еден од клучните делови на планот „3-6- 9“ на Владата и донесувањето на оваа стратегија и нејзината имплементација ќе значат огромен чекор напред во приближувањето на владеењето на правото во Република Македонија со развиените западни демократии, па со тоа ќе биде совладана уште една препрека на патот кон евро-атлантските интеграции на Република Македонија – рече Саљији, кој ја повика опозицијата да даде поддршка во подготовката и во носењето на сите идни законски проекти кои произлегуваат од стратегијата.

Претседателката на работната група, Ана Павловска-Данева, ја повика јавноста да ја прегледа, прочита и да ја анализира стратегијата и порача дека во наредниот период работната група ќе биде на располагање да ги слушне сите сугестии и каде што е соодветно – да ги имплементира.


Детали и куриозитети од извештајот за пропустите на МВР од 27 април


Скопје, 8 јуни, 2017 - 16:41 (META) 

Извештајот на работната група на Министерството за внатрешни работи детектира серија сериозни пропусти на оперативниот штаб и на полицијата при најзината (не)интервенција за време на насилствата во Собранието на Република Македонија од 27 април, кога беа нападнати и повредени пратеници, новинари и граѓани во законодавниот дом.

Работната група на МВР, меѓу другото, констатирала:

  • Штабот на Чавков бил целосно во аут

Оперативниот штаб на Министерството за внатрешни работи немал јасно и прецизно дефинирани надлежности, а членовите на штабот и тимот немале утврдени конкретни задачи. Процесот на информирање и на давање задачи во рамки на Оперативниот штаб, не е јасно дефиниран и недостига јасна постапка за донесување одлуки во различни ситуации.

  • УБК не доставила безбедносна проценка

Управата за безбедност и контраразузнавање до Оперативниот штаб на Министерството за внатрешни работи не доставила проценка за безбедносната состојба во Македонија, обврска која произлегува од одржаниот состанок со министерот за внатрешни работи.

  • Немало никва координација

На 27 април 2017 година, Оперативниот штаб не направил соодветна проценка на состојбата и координација со организациските единици вклучени во Оперативната акција.

  • Камерите на „Безбеден град“ не биле вклучени

На 27 април 2017 година од страна на СВР Скопје не е користен видеонадзорот на „Безбеден град“, која обврска произлегува од одржаниот состанок со министерот за внатрешни работи.

  • Вратата била отворена однатре

Насилното влегување на граѓаните во Собранието е резултат на отварањето на главниот влез од внатрешна страна, што довело до загрозување на безбедноста во Собранието. Полициски службеник од внатрешното обезбедување во обид да ги обезбеди вратите, бил спречен во преземањето дејство од страна на пратеници.

  • Полицајците кои биле внатре седеле со скрстени раце

Дел од полициските службеници од Одделот за заштита на определени личности и објекти, кои биле присутни во Собранието при отварање на влезните врати, не презеле дејства за спречување на истото.

  • Членовите на штабот на Чавков не биле во штабот

Членовите на Оперативниот штаб и на Оперативниот тим од Одделот за специјални полициски операции, не биле присутни во штабот, а навремено биле известени за текот на настаните и за целокупната состојба во Собранието.

  • Иако било побарано, штабот на Чавков известил дека нема засилување

Одговорните за внатрешното и за надворешното обезбедување на Собранието навремено укажале на потребата од дополнителни сили, но од Оперативниот штаб на Министерството за внатрешни работи и од Помошниот штаб на Секторот за внатрешни работи Скопје, биле информирани дека нема дополнителни сили кои би се упатиле за обезбедување на Собранието на Македонија. На 27 април 2017 година, за обезбедување на Собранието, Бирото за јавна безбедност (БЈБ) немало планирано полициски службеници во резерва.

  • Чавков и помошниците не ги повикале специјалците

Раководителот на Оперативниот штаб и раководителите на надлежните организациски единици во БЈБ, иако биле исполнети условите, не издале навремено наредба за повикување на припадниците на Одделот за специјални полициски операции.

  • Чавков, иако му барале, не дал наредба за евакуација на пратениците

Оперативниот штаб на Министерството за внатрешни работи, и покрај неколкуте навремени барања за евакуација на пратениците од внатрешното обезбедување, до 20.30 часот не издал наредба за евакуација на пратениците, иако за тоа биле исполнети условите.

  • Исчезнале двата хард дискови со видеоматеријал

Од извршениот увид во просторијата за надзор на безбедносните камери на Собранието, утврдено е дека недостигаат два хард дискови со видеоматеријал од безбедносните камери.

  • Не се снимале разговорите преку радио-станиците

Системот за снимање на аудиозаписите од тетра-системот на МВР не функционирал во целост.

  • Нухиу му пратил СМС на Чавков дека состојбата во Собранието може да ескалира. Чавков, исто преку СМС, одговорил дека „состојбата е под контрола“.

Извештајот, како што информираше денеска на прес-конференција министерот за внатрешни работи, Оливер Спасовски, ќе биде доставен до Јавното обвинителство.


Спасовски: Извештајот за пропустите на МВР на 27 април е готов, на ред е Обвинителството


Скопје, 8 јуни, 2017 - 14:38 (META) 

Министерот за внатрешни работи, Оливер Спасовски, денеска на прес-конференција соопшти дека извештајот на работната група на МВР за насилствата од 27 април во Собранието на Република Македонија е готов и дека во него се утврдени правните пропусти и системските недоследности во Министерството.

Спасовски истакна дека МВР како државен орган „падна на испитот“ на 27 април, поради партизираноста на раководните структури.

– Ова Министерство мора да се департизира за да работи и за да функционира нормално. На граѓаните им должиме да го исчистиме срамот што се случи на 27 април – рече Спасовски.

Извештајот, како што наведе министерот, „филигрански“ прецизно ги детектира одговорностите за тоа што се случи во Собранието. Спасовски, сепак, не соопшти имиња бидејќи, како што рече, извештајот бил класифициран документ.

Тој ќе биде доставен до Јавното обвинителство, кое треба да ја утврди одговорноста на сите што ги пречекориле законските надлежности и околностите за упадот во законодавниот дом.

Спасовски рече дека работната група работела повеќе од еден месец и во овој период извршила увид во обемната службена документација, разговарала со голем број припадници на МВР и бил прегледан службен видеоматеријал и видеоматеријал од телевизиите.

Како што рече министерот, веднаш по настаните од 27 април, дел од структурите на МВР добиле задача за еден ден да направат извештај кој би ја оправдал работата на полицијата. Сепак, тој не откри по чија директива требало да се изработи овој извештај.

Досега, во врска со настаните во Собранието, од Сектрот за внатрешна контрола во МВР, како што рече Спасовски, сослушани биле 180 лица, суспендирани се 23, а биле поведени постапки за 45 лица. Разрешени полициски службеници засега нема.


Консултативна средба за нацрт-законот за заштита на малцинствата во Албанија


Тирана, 20 јануари, 2017 - 10:48 (META) 

Министерството за надворешни работи на Албанија организираше консултативна средба, посветена на нацрт-законот за заштита на националните малцинства во Република Албанија.

Покрај градоначалници на општини, на средбата присуствуваа и членовите на работната група која работи на нацрт-законот, претставници на канцеларијата на Советот на Европа во Тирана, на делегацијата на Европската Унија и на ОБСЕ.

Етничките Македонци во Албанија ги претставуваше Нико Китани, преставник на македонското малцинство во Државниот комитет за малцинства.

– На консултативен разговор, МНР ги повика градоначалниците, префектите, како и претставниците на малцинствата. Тема беше нацрт-законот, а се дискутираше околу тоа дали и колку досега општините се грижат за малцинствата, особено од аспект на културата и на културниот идентитет. Заклучено е општините да испратат предлози, но и забелешки, сè со цел законот да биде подобар и да ги задоволи очекувањата на граѓаните – вели Китани за „Мета“.

Македонците од Албанија, преку нивните асоцијации, бараат со новиот закон, во остварувањето на националните права, да бидат изедначени на целата територија во земјата, а не само во општина Пустец.


Албанија подготвува нормативна рамка за јазичните права на малцинствата во земјата


Охрид, 23 март, 2016 - 17:09 (META) 

Работна група од експерти, формирана од Министерството за образование и спорт на Албанија, работи на извештајот за нормативна рамка за јазичните права на малцинствата во Албанија,  во соработка со Советот на Европа.

Групата денеска имаше средба со членовите на државниот Комитет за малцинства на Албанија, во кој претставник на етничките Македонци е Нико Китани, по потекло од Мала Преспа, пишува електронскиот весник „Илинден“ од Тирана.

На средбата претставниците на малцинствата во Комитетот ја запознаа работната група со проблемите во образованието, а ги изнесоа и своите препораки за подобрување на ова значително прашање.

Во извештајот посебно поглавје ќе има за јазикот на малцинствата.

Работната група ја сочинуваат тројца универзитески професори и еден преставник од Министерството за образование.