Мета: Македонското национално малцинство е богатство за Албанија


Тирана, 5 јануари, 2018 - 21:26 (META) 

Албанскиот претседател Илир Мета, кој денеска престојуваше меѓу Македонците во општина Пустец порача дека македонското малцинство е богатство за Албанија, јави „Илинден“.

Претседателот на државата Беше пречекан од заменик-градоначалник Андон Јани, членовите на Советот на општината Пустец и претставници на МАЕИ, предводени од генералниот секретар Васил Стерјовски.

– Многу е значајно да го негувате вашиот идентитет. Јас сум посветен и понатаму да го промовирам македонското малциство, кое има прекрасни вредности и традиции. Македонското малцинство ќе биде постојано во моето внимание – изјави Мета по средбата.

Според него, поради потешкотиите со кои се соочуваат жителите на оваа општина, посебно невработеноста на младите, треба заедничка ангажираност бидејќи општината е една од оние која располага со најмногу природни богатства и убавини, извести „Илинден“.


Заев и Рама од Пустец: Ги унапредуваме односите и низ грижа за малцинските права


Пустец, 16 декември, 2017 - 17:14 (META) 

Премиерот Зоран Заев и неговиот албански колега, Еди Рама денеска ги посетија Македонците од општината Пустец, а имаа и заедничка средба со заменик-градоначалникот и советниците на општината.

Претставниците од Општина Пустец на двајцата премиери им ги соопштиле приоритетите за кои очекуваат поддршка, меѓу кои е и реновирањето на училиштето. Премиерот Рама се обврзал дека школото ќе биде реновирано и оти општината ќе добие поддршка во комуналните проекти и проектите за локален развој што беа посочени на средбата.

Премиерот Заев му се заблагодарил на Рама, за грижата што ја покажува за граѓаните во Албанија со македонско етничко потекло.

– Ова е начин да ги отвораме и да ги решаваме прашањата. Присуството на двајцата први луѓе на извршната власт во Македонија и во Албанија, тука во Пустец е голема симболика за унапредувањето на односите меѓу двете земји, бидејки малцинските заедници се мостот на таа соработка, и грижата за нив е од големо значење – рече Заев, додавајќи дека двете држави се европски ориентирани и подготвени да ги негуваат малцинските права.

Заев на состанокот со локалните власти во Пустец, најавил дека и Владата на Република Македонија ќе помогне во решавањето на прашањата што се од важност за жителите со македонско етничко потекло во Албанија.


Заев и Рама ќе ги посетат Пустец и Мала Преспа


Подградец, 16 декември, 2017 - 9:49 (META) 

Премиерот Зоран Заев и неговиот домаќин, албанскиот премиер Еди Рама денеска ќе ги посетат Македонците кои живеат во Мала Преспа и Пустец, а ќе имаат средба претставниците на локалната самоуправа и ќе донираат опрема за учениците.

Владите на Република Македонија и на Република Албанија вчера во албанскиот град Поградец ја одржаа својата прва заедничка седница, на која се расправаше за унапредување на билатералната соработка.

Двајцата премиери, на заедничката прес-конференција порачаа дека очекуваат Македонија и Албанија во 2018 година да ги почнат преговорите за членство во Европската Унија, односно да го искористат моментот на позитивна клима во регионот за унапредување на процесот.

Следната меѓувладина седница ќе се одржи следната година во Охрид и во Струга.


Едмонд Темелко доби уште 30 дена притвор


Скопје, 27 октомври, 2017 - 17:34 (META) 

Основниот Суд Скопје 1 го продолжи притворот за уште 30 дена на градоначалникот на Пустец, Едмонд Темелко, кој беше уапсен кон крајот на минатиот месец.

Темелко, обвинет за изборни малверзации во случајот „Титаник“ на СЈО, и понатаму  ќе остане во Истражниот затвор „Скопје“.

Тој е во притвор од 26 септември, а во „Титаник“, освен него, обвинети се и Никола Груевски, Гордана Јанкулоска и Миле Јанакиески.


Македонска алијанса бара безусловно ослободување на Темелко


Тирана, 27 септември, 2017 - 10:37 (META) 

Македонската партија во Албанија – Македонска алијанса за европска интеграција (МАЕИ) порача дека најостро го осудува притворањето на Едмонд Темелко, градоначалник на општина Пустец, под обвинение за изборни нерегуларности за локалните избори во Република Македонија во 2013 година.

Од партијата велат дека Темелко не се криел од никого и редовно се јавувал во суд, според тоа што му било наложено. Велат дека немало забрана тој да ја напушта Македонија.

„МАЕИ потврдува дека Едмонд Темелко секојдневно ги извршуваше работните обврски градоначалник на општина Пустец во Република Албанија чиешто државјанство и пасош, исто така, ги поседува, но никогаш не се криел, ниту се дал во бегство, туку редовно се јавувал секоја среда, прво во Основниот суд Скопје 1, а потоа во Основниот суд Ресен, во согласност со претходно утврдените мерки на претпазливост при што му беше одземен само македонскиот пасош. МАЕИ укажува дека иако Специјалното јавно обвинителство и Основниот суд Скопје 1 знаеја дека Едмонд Темелко е државјанин и на Република Албанија, никогаш не му беше изречена мерка на претпазливост со којашто му се забранува да ја напушта територијата на Република Македонија!“, се вели во партиското соопштение.

МАЕИ смета дека приведувањето на Едмонд Темелко претставува навреда за сите Македонци во Република Албанија и „е дел од оркестрираната асимилација од албанската држава и бугарската пропаганда!“.

Партијата бара претседателот на Република Македонија веднаш да го помилува Едмонд Темелко, имајќи ја предвид и неговата нарушена здравствена состојба.


Едмонд Темелко е во полициска станица во Скопје


Скопје, 26 септември, 2017 - 18:23 (META) 

Градоначалникот на Пустец, Едмонд Темелко, обвинет во случајот „Титаник“ за изборни нерегуларности во 2013 година, е во полициска станица, велат од МВР, не појаснувајќи дали сам се пријавил или бил приведен од полицијата.

По распитот во полициска станица, Темелко, според решението на судот, треба да биде спроведен во 30-дневен притвор во истражниот затвор во Шутка. Мерката притвор беше определена откако СЈО утврдило дека обвинетиот Темелко не ги почитувал мерките за редовно јавување во судот, па била побарана построга мерка.

Според некои информации во медиумите, Темелко, иако бил под забрана да излегува од Македонија, неколкупати ја минал границата со албанска лична карта.


Македонците од Албанија го славеа делото на светите браќа Кирил и Методиј


Пустец, 26 мај, 2017 - 12:27 (META) 

Денот на сесловенските просветители, светите браќа Кирил и Методиј, со повеќе манифестации, повеќе денови и во неколку населени места, го одбележаа и етничките Македонци во Албанија.

Во општина Пустец, единствената како таква што преживеа со новата територијална кројка во Албанија, во селото Долна Горица, настанот беше одбележан како Ден на писменоста и просветата.

Од овој крај, потекнува учителот Никола Беровски, авторот на првиот буквар на македонски јазик во Албанија.

Пред младите беше одржан историски час и беа рецитирани ученички песнички за светите солунски браќа, рамноапостолите Кирил и Методиј.

Присутните ги поздрави градоначалникот на општина Пустец, Едмонд Темелко, а за ликот и делото на македонските и сесловенските просветители светите солунски браќа Кирил и Методиј Македонците, зборуваше писателот Спасе Мазенковски.

Песни за Светите Кирил и Методиј, рецитираа ученици од основните училишта во седумте села на општината, како и од гимназијата во Пустец.


Пустец ги отфрли амандманите за постоење Бугари во Албанија


Пустец, 28 февруари, 2017 - 21:12 (META) 

Советот на општина Пустец, во Мала Преспа, Република Албанија, на денешната седница едногласно донесе одлука за отфрлање на делот од извештајот напредокот за интеграција на Албанија во Европска Унија.

Во извештајот се споменува и се бара признавање на „бугарско“ малцинство и во региони во кои живеат етнички Македонци во Албанија.

Меѓу другото, во одлуката од Советот на општина Пустец, се укажува и на резултатите на последниот попис од 2011 година одржан во Албанија, каде во општина Пустец се декларирале околу 3.500 резидентни жители како Македонци и ниту еден како Бугарин.


ДИК ќе проверува колку лица од Албанија склучиле брак во Македонија


Скопје, 4 мај, 2016 - 10:05 (META) 

Државната изборна комисија (ДИК) синоќа едногласно го усвои заклучокот да се задолжат Управата за водење матична евиденција и МВР да утврдат колку лица од Албанија имаат склучено брак во Македонија и на која основа стекнале државјанство.

Проверките ќе се вршат таму каде што е утврдено дека на иста адреса живеалиште пријавиле повеќе од 10 лица од Албанија.

Според последниот извештај од МВР, регистрирани се 9.395 лица од Албанија со македонско државјанство, 3.743 се со статус дијаспора, а 341 лице се иселени.


Денеска јавна седница на ДИК за конечните бројки


Скопје, 15 април, 2016 - 10:47 (META) 

Државната изборна комисија (ДИК) денеска на јавна седница треба да ги гласа извештаите за конечните бројки на спорни гласачи од теренската и од административната проверка.

Денеска се очекува надлежните органи, односно Министерството за внатрешни работи (МВР) и Управата за евиденција на матични книги (УЕМК), да ги достават сите информации што се бараат со дополнителните проверки.

Во нив спаѓаат информациите за повеќе од 107.000 гласачи за кои се претпоставува дека се иселени или се на привремена работа во странство, 40.000 гласачи кои не биле пронајдени дома при теренската проверка и за гласачите од Пустец.