Законот за пушењето сепак изгласан, Собранието зачади од полемиките


Скопје, 15 март, 2018 - 15:38 (META) 

По обемна дискусија меѓу пратениците од владејачкото мнозинство, во денешното продолжение на 11-та седница Собранието на Република Македонија, иако со значителен број гласови „против“ и во отсуство на пратениците на ВМРО-ДПМНЕ, го донесе Законот за изменување и дополнување на Законот за заштита од пушењето.

Во општатата расправа најзастапен беше Ферид Мухиќ од редот на независните пратеници, кој отвори цела филозофска расправа во обид да докаже дека нема научни докази дека пушењето му штети на здравјето и дека обидот да се ускрати правото на некој да ужива во тутунскиот чад е увод во тоталитарна држава.

Тоа беше проследено со смеење и дофрлање од пратеничките фотелји, но Мухиќ упорно, долго и со уфрлање бројни примери, се обидуваше да докаже дека пушењето не е штетно. Тврдеше и дека е докажано оти никотинот имал над 2.000 полезни својства за човечкиот организам.

На тоа реплицираа Џевад Адеми од ДУИ, Јагода Шахпаска од СДСМ и Реџеп Мемеди, кои излегоа со тврдења дека науката одамна докажала оти пушењето предизвикува болести. Шахпаска во дискусијата јасно најави дека нема да го поддржи законот.

Потоа се вмеша и предлагачот на законот, Томислав Тунтев од СДСМ, кој рече дека дискусијата избегала од темата и дека целта на законот е само да се заштитат непушачите и дека штетите од пушењето се одамна докажани. Тој појасни дека целта е само да се остави поголем простор за угостителските објекти да не бидат казнувани доколку затворат со фолии тераси во кои ќе може да се пушти.

По дискусијата се пристапи кон гласање, но и тогаш имаше проблеми.

На првото гласање, системот покажа дека од 58 присутни во салата, „за“ гласале 42 пратеници, 14 биле против, а еден воздржан. Тогаш претседателот на Собранието, Талат Џафери го поништи гласањето „од причина што системот не покажува и не може да ги регистрира гласовите“. По пауза од две минути, кажа дека системот бил подготвен и ги повика пратениците пак да гласаат.

Овојпат системот покажа дека за гласале 41 пратеник, воздржан бил еден, а против 14. Тогаш Џафери повика службите да пребројат колку пратеници има во салата, па прогласи дека во салата имало 61 пратеник и дека гласањето било полноважно и дека е донесен законот, по што ја прогласи 11-тата седница за завршена и ја прекина работата на Собранието.


Јавна расправа во Собранието за измените на законот за пушењето


Скопје, 14 декември, 2017 - 10:37 (META) 

Од 11 часот во салата „Борис Трајковски“ во Собранието на Република Македонија ќе се одржи јавна расправа за предлог-законот за изменување на Законот за заштита од пушењето, во организација на собраниската комисија за здравство.

Предлог-законот е од неколкумина пратеници од владејачкото мнозинство, кои сметаат дека сегашниот закон е премногу рестриктивен и потребна е дозвола да се пуши во заградените тераси без оглед на климатските услови и сезоната.

Со предлогот повеќе се регулира пушењето во терасите, односно не се предвидува враќање на дозвола за пушење внатре во објектите.


Секој втор во Македонија пуши, најмладите најмногу се опиваат


Скопје, 21 ноември, 2017 - 14:47 (META) 

Речиси секој втор граѓанин на Македонија пуши, а во текот на изминатава година најголемо секојдневно опивање е забележано меѓу младите на возраст од 15 до 24 години, покажува новата студија за употребата на психоактивни супстанци во Република Македонија, која ја изработи Институтот за јавно здравје (ИЈЗ) на Република Македонија.

Презентирајќи ја студијата, директорот на ИЈЗ, Шабан Мемети, нагласи дека загрижува и фактот што дури половината од учениците на возраст од 15 и 16 години барем еднаш или двапати пробале марихуана.

Студијата го опфатила населението на возраст меѓу 15 и 64 години и е утвдено дека 46 отсто од нив се активни пушачи, а потесно, во групата од 15 до 34 години, 40 отсто пушат.

Во поглед на алкохолот, дури 76,9 отсто од луѓето на возраст од 25 до 34 години некогаш консумирале алкохол, а во изминатата година и во изминатиот месец највисок е процентот на консумирање алкохол кај младите на возраст од 15 до 24 години, односно 68,5 отсто. Четири или повеќепати седмично алкохол консумира највозрасната група од испитувањето, односно луѓето на возраст од 55 до 64 години, при што бројката на мажи во оваа категорија е четирипати поголема од таа на жените.

Од сите старосни групи, бројката на секојдневно тешко пиење (шест или повеќе чаши алкохолни пијалоци во иста пригода) е најзастапено кај младите на возраст од 15 до 24 години, односно 1,7 отсто од нив се со таква зависност.

Дури 32,5 отсто од испитаниците пријавиле дека во изминатата година земале апчиња за смирување, а тука се „најактивни“ најстарите меѓу испитаниците.

Во поглед на негалните дроги, 8,9 отсто од сите испитаници рекле дека некогаш во животот земале илегални дроги, а тука предничат младите на возраст меѓу 15 и 24 години, со 18,9 отсто.


Македонците пушат по 18-19 цигари дневно, четврти сме во светот


Скопје, 19 април, 2017 - 13:33 (META) 

Македонија е при врвот на листата од 184 земји според потрошувачката на цигари и се наоѓа на високото четврто место. Според табелата на „Википедија“, пред нас се само Црна Гора, Белорусија и Либан.

Според слободна проценка на директорот на пазар за Македонија, Косово и за Албанија на „Империал тобако“, Кирил Величковски, пак, Македонците пушат по 18-19 цигари дневно.

Но, иако нашата држава е високо на листата на држави каде што најмногу се пуши, потрошувачката на цигари во Македонија од 2013 година бележи пад од два до четири отсто годишно.

Според Величковски, тоа се должи на промената на законската регулатива, ценовните политики, здравствениот аспект и на економската моќ на луѓето.

Овој пад е во рамките на европскиот просек, бидејќи во Европа постои пад на консумацијата на тутун во последните 15 години и тоа помеѓу два и шест отсто.

Врз намалување на пушењето, според Величковски, влијание имала и кампањата со фотографии на пакувањата на цигари, кои укажуваат на штетноста од пушењето.

„Имеприал тобако“ во Македонија постои 15 години, има инвестирано околу 33 милиони евра во осовременување на технолошкиот процес и во иновации. Компанијата е најголем производител на пазарот, при што извезува 42,6 проценти од производството и тоа во Русија и на пет пазари во регионот. За оваа година планирано е само извозот на рускиот пазар да достигне 30 отсто од производството.

Во компанијата се произведуваат шест брендови цигари за домашниот пазар со 60-процентен пазарен удел.


ЕУ: Само 11 членки ги усвоија правилата за забрана на пушењето


Брисел, 20 мај, 2016 - 20:20 (META) 

Европската унија соопшти дека само 11 од 28 нејзини членки потполно ги усвоиле мерките за забрана на пушењето, во предвидениот рок од две години кој истекува денеска.

Државите членки имаа обврска, во рок од две години на национално ниво, да усвојат правила кои вклучуваат истакнување на предупредување за штетното влијание на пушењето врз здравјето, што подразбира и истакнување на слики од расипани заби и бели дробови зафатени со рак на пакувањата на цигарите.

Европската комисија нема веднаш да преземе мерки против земји кои се уште не ги имплементирале правилата. Имено, 11 држави во потполност ги исполниле обврските додека други „значително напредувале“.

Останатите 17 држави имаат рок до два месеци, сериозно да пристапат кон тоа прашање.


Измените на Законот за пушење денеска на собраниска седница


Скопје, 26 јануари, 2016 - 10:17 (META) 

Собранието на Република Македонија денеска ќе ја продолжи расправата за предлог-законот за изменување на Законот за заштита од пушењето, во прво читање, предложен од пратеници од опозицијата, во рамки на 85. седница.

На дневен ред се, исто така, дополнувањето на Законот за административните службеници, измените и дополнувањата на Законот за буџетите, измените и дополнувањата на Законот за јавен долг, предлог-законот за материјално обезбедување на невработени лица поради приватизација на претопријатија со општествена и државна сопственост, сите во прво читање и на предлог на опозициски пратеници.

Народните избраници во рамки на седницата треба да се изјаснат и за предлог-законот за дополнување на Законот за одбрана, по скратена постапка, и за предлог-законот за медицински сестри и за акушерки, во прво читање, како и за неколку автентични толкувања.


500 граѓани се пријавиле во советувалиштата за откажување од пушење


Скопје, 25 јули, 2015 - 10:41 (META) 

Од јуни 2014 до јуни 2015 година, во Центрите за јавно здравје, 500 лица се пријавиле во советувалиштата за откажување од пушење. Половина од пријавените, кои ги посетувале едукативните предавања, биле здравствени работници.

Советувалиштата се достапни  за сите заинтересирани граѓани кои ќе се обратат во Центрите за јавно здравје и во нив работи стручен и обучен кадар од доктор – специјалист и медицинска сестра, а по потреба и други соработници (социјален работник, психолог и др.), кои одржуваат едукативни предавања со фокус на презентирање на штетните ефекти од пушењето врз здравјето на пушачите, како и на штетните влијанија од тутунскиот чад за околината.


Денеска е светски ден против пушењето


Скопје, 31 мај, 2015 - 13:52 (META) 

Светската здравствена организација (СЗО) и партнерите секоја година на 31 мај го одбележуваат Светскиот ден за борба против пушење, истакнувајќи ги здравствените ризици поврзани со употребата на тутунот и промовирајќи ефективни политики за намалување на употребата на тутунот.

Статистичките податоци покажуваат дека една испушена цигара го скратува животот за 12 минути.

Според податоците од СЗО, во светот пушат 1,1 милијарда луѓе, од кои 200 милиони се жени. Шест милиони луѓе годишно умираат од пушење, а меѓу нив 600. 000 се пасивни пушачи.

Во Република Македонија се регистрираат близу 700.000 пушачи, трошејќи годишно 11 тони цигари или 5,5 килограми тутун по жител.

Негативното влијание на цигарите и на чадот од цигарите е директно поврзано со многу сериозни заболувања. Негативните ефекти по здравјето се должат на околу 2.500 токсини содржани во тутунот и на околу 4.000 суптанци содржани во чадот од цигарите. Најмалку 250 од овие хемикалии се токсични, а повеќе од 60 од нив се познати како канцерогени.

Последиците од употребата на тутунот се рак на белите дробови, рак на грлото и на устата, срцевите болести и болести на крвните садови и на мозокот, хроничен бронхит, хронични неинфективни заболувања и многу други. Пасивното пушење (вдишување чад од оние кои пушат) го зголемува ризикот на непушачите од рак на белите дробови и ризикот од синдромот на ненадејна смрт кај бебињата.

Годинашното мото на Светскиот ден за борба против пушење е „Стоп за недозволената трговија со тутински поизводи“. По повод Светскиот ден за борба против пушењето во 2015 година, се повикуваат земјите да работат заедно за да престане недозволената трговија со тутунските производи. Недозволената трговија е глобален проблем, од аспект на здравство, легислатива, економија и водењето на политика и корупција.

Според информации добиени од меѓународните царински служби, 1 од 10 потрошени цигари е набавена на илегален начин.

Европската комисија оценува дека недозволената трговија со цигари ги чини Европската унија и нејзините членки повеќе од 10 милјарди евра годишно загуба на такси и на царински приходи.

За справување со овој проблем, во ноември 2012 година, меѓународната заедница го прифатила Протоколот за елиминирање на недозволената трговија со тутунски производи, како прв протокол на СЗО во рамките на Рамковната конвенција за контрола на тутунот (WHO FCTC).

Светски ден за борба против пушење се одбележува уште од 1987 година.


Од следната година ќе поскапат цигарите


Скопје, 21 декември, 2014 - 10:47 (META) 

Цигарите од 1 јули следната година ќе поскапат за 0,15 денари по парче или за околу три денари за една кутија. Во согласност со календарот за зголемување на акзицата за цигарите, по три денари за една кутија ќе се зголемува цената на цигарите до 1 јули 2016 година, а во наредните седум години цигарите ќе поскапуваат за околу четири денари за една кутија секоја година.
Кутија цигари која денес чини 60 денари, следната година ќе чини 63 денари, а во 2023 година ќе чини 94 денари.


Кина забрани пушење на јавни места


Пекинг, 29 ноември, 2014 - 11:17 (META) 

Властите во Пекинг, Народна Реоублика Кина, забранија пушење на сите затворени јавни места. Забраната ќе важи и за работните места и за јавниот превоз.

Овој закон ќе стапи на сила на 1 јуни, а казни од 200 јуани (32 американски долари) се предвидени за тие што ќе ја прекршат.

Во Кина 300 милиони луѓе пушат, а 700 милиони се изложени на чадот од цигарите.