!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Африканската унија не го признава пучот во Зимбабве


Хараре, 16 ноември, 2017 - 15:00 (META) 

Африканската унија денеска соопшти дена не го признава воениот удар во Зимбабве и повика на почитувањето на уставот.

– Повикуваме на почитување на уставот, враќање на уставниот поредок и никогаш нема да прифатиме воен удар – рече Алфа Конде, претседател на Гвинеја и претседавач на Африканската унија.

Војската вчера презеде контрола над Зимбабве, а претседателот Роберт Мугабе е ставен во домашен притвор.


Уапсени 60 припадници на безбедносните служби во Турција


Анкара, 16 ноември, 2017 - 9:54 (META) 

Турските власти уапсиле 60 поранешни припадници на безбедносните служби, осомничени за поврзаност со неуспешниот воен удар.

Властите издале налог за апсење на 100 поранешни припадници на безбедносните служби во акција, чиј фокус била Анкара, но е спроведена и во други 30 провинции.

Се верува дека осомничените се поврзани со турскиот свештеник Фетулах Ѓулен, кого Анкара го обвинува за неуспешен воен удар во јули 2016 година.

Повеќе од 50.000 лица, вклучувајќи и припадници на безбедносните служби, војска, како и службеници, се приведени по неуспешниот воен удар.


Во Турција почна судењето на новинарите на кои им се заканува доживотна казна


Анкара, 18 септември, 2017 - 20:21 (META) 

Во Турција почна судењето на турските новинари и медиумски работници кои се обвинети дека го поддржуваат Фетулах Ѓулен.

На обвинетите, кои негираат дека се виновни, им се заканува доживотен затвор.

На списокот на обвинети има 31 новинар, односно медиумски работник, а им се суди поради нивната наводна поврзаност со неуспешниот обид за воен пуч во Турција мината година.

Меѓу обвинетите се и новинари и раководството на весникот „Заман“, кој државата ги затвори во јули минатата година.

Тие се осомничени за членство во вооружена терористичка организација и за обид за уривање на владата и на уставниот поредок.


Врховен ја одложи за понеделник седницата за замрзнување на имотот на ВМРО-ДПМНЕ


Скопје, 14 септември, 2017 - 13:53 (META) 

Врховниот суд денеска го разгледа барањето на Специјалното јавно обвинителство за заштита на законитоста за пресудата за шестообвинетиот во случајот „Пуч“, Звонко Костовски, но од технички причини ја одложи за понеделник седницата на која требаше да се расправа за барањето за заштита на законитоста во однос на случајот „Талир“, во кој двапати беше побарано замрзнување на имотот на ВМРО-ДПМНЕ.

Специјалната обвинителка Фатиме Фетаи, која беше придружувана од Ленче Ристовска, по седниците изјави дека во случајот со спогодбата на Звонко Костовски не постои кривично дело шпионажа, за кое тој е осуден. Таа истакна дека не може некој да биде осуден за кражба, а притоа да не се знае што е украдено ниту, пак, кому му припаѓа.

Обвинителките, исто така, соопштија дека СЈО засега нема информации дали некое од 17 поднесени обвиненија е прифатено или не.


Врховен суд на 14 септември ќе одлучува за пресудата на Звонко Костовски


Скопје, 4 септември, 2017 - 20:20 (META) 

Советот на Врховниот суд на 14 септември ќе расправа по барањето за заштита на законитоста поднесено од Специјалното јавно обвинителство во случајот „Пуч“ за пресудата на шестообвинетиот Звонко Костовски, објави „Судство“.

Костовски потпиша спогодба со обвинителството и се согласи на издржување затворска казна од три години. Според СЈО, неопходно е да се направи ревизија на правосилната пресуда и да се утврди одговорноста на сите фактори, но и на фактичката ситуација, за која велат дека е сосема поинаква.

Костовски е единствениот осуден на ефективна затворска казна за кривичните дела неовластено прислушување и шпионажа.

Исто така, тој е единствениот што излезе од притвор благодарение на спорната аболиција на претседателот на државата, Ѓорге Иванов, што тој им ја додели и на 55 други лица. Иако Иванов се откажа од аболицијата, Костовски остана на слобода.


Во Турција продолжена вонредната состојба уште за три месеци


Анкара, 17 јули, 2017 - 19:31 (META) 

Вонредната состојба во Турција е продолжена уште за три месеци, речиси една година откако беше воведена поради обидот за државен удар кој се случи на 15 јули минатата година.

Парламентот го прифати барањето на владата на Турција да се продолжи вонредната состојба воведена по неуспешниот пуч.

Според соопштението на канцеларијата на премиерот Бинали Јилдрим, кабинетот побарал од парламентот да ја продолжи вонредната состојба за наредните три месеци, почнувајќи од среда, 19 јули.

Барањето следи по церемонијата за време на викендот, со која беше обележана годишнината од неуспешниот воен пуч во кој животот го загубија околу 2.500 луѓе.

Откако во Турција беше воведена вонредната состојба на 20 јули минатата година, повеќе од 50.000 луѓе се уапсени, а 150.000 се суспендирани или отпуштени од работа во државната служба, но и во приватниот сектор.


Турците вчера пред да телефонираат мораа да го слушаат Ердоган


Анкара, 16 јули, 2017 - 13:55 (META) 

Обидот да се повика мобилен број во Турција вчера доведуваше до неочекуван соговорник – гласот на турскиот претседател Реџеп Таип Ердоган. По вртењето на бројот, пред да почне воспоставувањето на врската, повикувачот првин ја слушаше снимената аудиопорака од претседателот, а дури по нејзиниот крај почнуваше вртењето на бројот, јавуваат турските медиуми.

Во пораката, Ердоган им го честитал на повикувачите „националниот празник на демократијата и на единството“, со кој се одбележа првата годишнина од неуспешниот пуч.

„Како претседател, испраќам честитки за 15 јули – Денот на демократијата и националното единство и посакувам милост за мачениците, а на хероите (кои се бореа против пучистите) здравје и благосостојба“, гласи пораката која траеше 16 секунди.

Дека нарачката за оваа „услуга“ ја направила државата, на својот твитер-профил потврди Омер Фатих Сајан, директор на Комисијата за информации и комуникациски технологии (БТК).

Овој потег предизвика гнев кај многумина корисници, а многумина критикуваа и објавија видеоснимки на кои се гледа како мора да почекаат да заврши пораката пред да може да разговараат.


Повеќе од милион луѓе во Истанбул на годишнината од обидот за пуч


Истанбул, 16 јули, 2017 - 13:18 (META) 

Повеќе од еден милион Турци во Истанбул синоќа беа на гигантскиот собир наречен „Епопеја на победата за демократија“, со кој беше одбележана првата годишнина од обидот за државен удар, што се случи на 15 јули лани.

Мостот над Босфор, наречен Мост на мачениците на 15 јули, кој е долг 1,5 километар, беше исполнет со луѓе, а според некои проценки, имало повеќе од еден еден милион лица. Пред една година мостот беше заземен со тенкови. Притоа  беа убиени повеќе луѓе, но тенковите беа запрени и не им беше дозволено да минат на другиот брег, што беше одлучувачки момент за неуспехот на пучот.

Точно на тоа место беше отворен меморијалот на мачениците од пучот на 15 јули, во кој загинаа 249 лица, а 2.100 беа ранети.

Синоќешниот собир почна со огромна поворка, на чие чело беа претседателот Реџеп Таип Ердоган и неговата сопруга Емине. Фатени за рака, тие минаа пеш од домот до мостот, заедно со голема група луѓе, меѓу кои семејствата и блиските на жртвите на превратот.

– Овој мост пред една година беше сведок на најкрвавиот злосторнички преврат во нашата историја. Но истата таа ноќ, тој стана и сведок на победата. Како и денеска луѓето во рацете имаа единствено знамиња. Но тие имаа посилно оружје. Својата вера – рече Ердоган.

Ердоган од Истанбул замина за Анкара, каде по полноќ учествуваше на седницата на парламентот во спомен на жртвите, која почна во 2.32 минути по локално време, кога парламентот беше подложен на напад од турски „Ф-16“ за време на пучот. Опозициските пратеници го бојкотираа настанот.

Во говорот во Анкара, Ердоган изјави дека ќе го потпише законот за враќање на смртната казна доколку му биде доставен.


ВМРО-ДПМНЕ изразува сочувство за убиените во обидот за државен удар во Турција


Скопје, 16 јули, 2017 - 11:14 (META) 

ВМРО-ДПМНЕ изразува најдлабоко сочуство за сите што ги загубија животите при обидот за државен удар во Република Турција, посочуваат од партијата во соопштение.

„Сликите и снимките од минатогодишниот 15 јули засекогаш ќе останат врежани во сеќавањата не само на турскиот народ, туку и на сите кои имаат посебна почит и симпатии кон Турција. Република Турција и турскиот народ биле и остануваат докажан пријател на Република Македонија. Меѓусебните односи секогаш биле проткаени со заемна почит и пријателство и очекуваме врските со Република Турција да се продлабочуваат и во иднина. Демократските избори се единствениот начин на кој една власт може да ја добие честа да ја управува државата“, се вели во соопштението.


Во Турција се одбележува годишнина од неуспешниот пуч


Анкара, 15 јули, 2017 - 11:29 (META) 

Во Турција денеска се одбележува првата годишнина од неуспешниот обид за државен преврат. Според турските власти, организацијата ФЕТО на муслиманскиот проповедник Фетулах Ѓулен, прогласена од безбедносните структури за терористичка, е одговорна за пучот извршен ноќта на 15 спроти 16 јули минатата година.

Претседателот Реџеп Таип Ердоган објави вчера дека во државата ќе почне „национално демократско бдеење“ и ќе трае до полноќ на 16 јули. Закажана е седница на парламентот со специјална програма. Попладне во Истанбул ќе почне поход на национално единство на Ердоган, ветерани од превратот и роднини на загинатите. Претседателот ќе има говор и ќе биде прикажан документарен филм за 15 јули. Ќе биде отворен и споменик на жртвите од неуспешниот пуч.

Турските власти, инаку, вчера отпуштија повеќе од 7.000 полицајци, војници и јавни службеници. Декретот за отпуштање претставува дел од мерките по обидот за пуч. Турција досега суспендира повеќе од 150.000 официјални лица и уапси околу 50.000 припадници на армијата, полицијата, вработени во судството, академици и луѓе од други сектори. Во најновиот декрет меѓу отпуштените од работа се 2.303 полицајци, како и 302 вработени на универзитети во државата.