!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Претставата „Европејци“ премиерно пред тетовската публика на 22 април


Тетово, 17 април, 2017 - 14:59 (META) 

Претставата „Европејци“ од српскиот драмски писател Мирољуб Неделковиќ, премиерно ќе се одржи во Центарот за култура „Ило Антески Смок“ во Тетово на 22 април. Претставата е современа комедија која ги исмејува балканскиот и македонскиот менталитет.

– Во оваа претстава се прикажува кој е поголем Македонец. Публиката ќе излезе насмеана, но и замислена – вели актерот Глигорие Стојановски.

Режисер на „Европејци“ е Мирко Видоески, кој исто така се појавува во улога на американски дипломат.

– Оваа претстава, која e политичка сатира, ќе биде хит. Во неа се говори за поделбата на Македонците – вели Видоески.

Два дена подоцна, на 24 април, комедијата „Европејци“ ќе биде изведена пред скопската публика во Драмски театар.


Трамп ги обвини медиумите дека лажат за бројката на присутни луѓе на инаугурацијата


Вашингтон, 22 јануари, 2017 - 13:18 (META) 

Претседателот на САД, Доналд Трамп, ги обвини медиумите дека се „нечесни“ околу проценките за бројот на луѓе што присуствувале на неговата инаугурација пред Капитол хил, јавува „Би-би-си“.

Новиот претседател на САД реагирал на фотографиите објавени во медиумите, со кои се споредува бројот на граѓани што биле присутни на неговата и на инаугурацијата на претходниот претседател на САД, Барак Обама, во 2009 година.

Трамп тврди дека во петокот, додека го држел инаугуративниот говор пред Капитол, „изгледало како да има“ околу 1,5 милиони луѓе, остро негирајќи ги извештатите на медиумите, според кои, на церемонијата присуствувале најмногу 250.000 луѓе.

Подоцна, како што пренесува британскиот национален сервис, прес-секретарот на Белата куќа, Шон Спајсер, изјавил дека во петокот „имало најмногу публика која досега била видена на една инаугурација, и точка“. Сепак, ниту Трамп, ниту Спајсер не понудиле докази за своите тврдења.

Фотографиите, на кои реагирал Трамп, како што може да се види, покажуваат многу поголем број на граѓани на инаугурацијата на Обама во 2009 година.

За бројот на присутните нема официјален податок, но, според проценките, на инаугурацијата на Обама во 2009 присуствувале околу 1,8 милиони луѓе, а во 2013 околу еден милион.


„Мерцедес“ од 600.000 евра, една од главните маски на Вевчанскиот карневал


Струга, 13 јануари, 2017 - 18:10 (META) 

Главна атракција на Вевчанскиот карневал денеска беше дефилето на маските.

Поворките со повеќе од илјада василичари од вевчанските маала се споија на плоштадот пред зградата на Општина Вевчани.

Политиката и годинава беше во центарот на вниманието. Маските кои продефилираа, меѓу кои „мерцедес“ од 600.000 евра, „Шарената револуција“, нова влада, кражба во вевчанската пошта, споредба на македонските политичари со светските диктатори и слично, до солзи ја засмејуваа публиката.

Вевчанскиот карневал завршува утре, со традиционалното палење на маските.


Шестмина загинати при несреќа на автомобилско рели во Шпанија


Карал, 6 септември, 2015 - 12:32 (META) 

Шест лица, меѓу кои и една бремена жена, загинале кога автомобил излетал од патот и удрил во нив за време на автомобилско рели, кое вчера се одржувало во градот Карал, во северозападниот дел на Шпанија, јавуваат светските агенции.

Во несреќата, како што соопштиле од полицијата, повредени се 16 лица, од кои дел се во критична состојба.

Од видеоснимките од несреќата се гледа како автомобилот со голема брзина излетува од патот и удира во дел од публиката.

Шпанскиот премиер Маријано Рахоја преку својот твитер-профил изразил сочуство до семејствата на загинатите.

Автомобилското рели, во кое учестувале околу 140 лица, веднаш било прекинато.


„Многу врева за ништо“, празник за публиката на „Охридско лето“


Охрид, 23 јули, 2015 - 9:50 (META) 

Актерите од Народниот театар од Сомбор, Србија, на фестивалот „Охридско лето“ направија вистински празник за публиката, која до последно место го исполни гледалиштето во дворот на ОУ „Свети Климент Охридски“ за претставата „Многу врева за ништо“, во режија на младата Ана Ѓорѓевиќ.

Актерот Саша Торлаковиќ спаѓа во редот на петте најдобри актерски имиња во Србија и е носител на повеќе стериини награди. Во претставата „Многу врева за ништо“ го игра ликот на Дрен.

– Шекспир не се работи премногу често на нашите сцени и кога тој ќе се стави на репертоар, тоа значи празник за режисерите и за актерите. Кога ќе почнете да го работите Шекспир, тоа е неисцрпен рудник кој ви отвора многу теми, иако е тешко да се определите која од нив ќе биде доминантна. Во нашата претстава важно место зазема, секако, машко-женскиот однос, тој компликуван однос кој трае од опстанокот на Адам и на Ева до денес, но она што мене ми беше интересно како актер е како една средина, еден естаблишмент, една елита загледана во себе не обраќа внимание каква неправда може да им направи на другите – вели Торлаковиќ.

Вечерва на програмата на фестивалот „Охридско лето“, во црквата „Света Софија“, е концертот на „Киев пијано дуо“ од Украина, со изонредните пијанисти Олександра Зајцева и Дмитро Таванец.

Покрај редовните концертни настапи, ова дуо со години наназад учествува и на некои од најпрестижните натпревари во Европа, освојуваjќи голем број награди.