Димитров: Стартот на преговори не е исто што и пристапувањето во ЕУ


Брисел, 29 мај, 2018 - 13:15 (META) 

Треба да има јасна дистинкција дека стартот на преговори не е исто што и пристапувањето во ЕУ, изјави министерот за надворешни работи Никола Димитров во тесен круг на експерти и новинари во Брисел.

– Ова треба да биде признаено. Има два до три изборни циклуси помеѓу двата настани, а пристапувањето е алатка што е тука да ги помогне реформите. Ако го барате истото ниво на демократска зрелост како онаа што се бара за влез во ЕУ тогаш процесот нема смисла – рече Димитров.

Според него, има искуства со земји што почнале преговори, а потоа се нашле блокирани.

– Нема автоматизам. Секогаш кога се политизира овој процес тој не успева. Дали е тоа за да се турка земјата напред или да се задржи назад, ова функционира само доколку земјата е оценувана индивидуално и врз основа на заслуга – изјави министерот за надворешни работи на конференција во Брисел организирано од Европскиот центар за политики, на прашање на модераторката околу тоа кои се аргументите на Македонија да ги убеди земјите членки кои се скептични за старт на преговори со земјата.


Претседателот Иванов бара да биде информиран за процесот на преговори за името


Скопје, 29 мај, 2018 - 12:55 (META) 

До претседателот Ѓорге Иванов нема стигнато информација за договорената рамка за надминување на спорот за името, на која вчера се повика министерот за надворешни работи Никола Димитров, соопштуваат од Кабинетот на претседателот на Република Македонија.

„До Кабинетот на Претседателот на Република Македонија нема доставено информација за договорената рамка за можно решение на разликата околу името, ниту информации за последните две средби на министрите за надворешни работи на Република Македонија и Република Грција, одржани во Брисел и во Њујорк. Кабинетот на Претседателот на Република Македонија не е информиран ниту за составот, ниту за работата на правните тимови од двете земји во Атина на текстот на билатералниот договор“, наведуваат од кабинетот на Иванов.

Од таму посочуваат дека до Иванов претходно не бил доставен ниту предложениот пакет за името Република Илинденска Македонија, иако шефот на државата побарал да добие писмен документ за последниот тек на настаните поврзани со спорот за името.

Кабинетот на претседателот, се додава, во неколку наврати претходно побарал до него да бидат доставени документи поврзани со текот на разговорите, вклучително и нацрт-текстот на билатералната спогодба за надминување на разликата околу името, доставен од Министерството за надворешни работи на Република Грција, оценувајќи дека, како што се наведува, се врши селективно информирање на македонскиот претседател.


Џафери: Разговорите во процесот „Жан Моне“ се одвиваат во конструктивна атмосфера


Охрид, 18 мај, 2018 - 13:58 (META) 

Разговорите во рамки на процесот „Жан Моне“ се одвиваат во конструктивна, работна атмосфера, со консензуален став на учесниците за потребата од регулирање, односно дорегулирање на односите во Законодавниот дом, рече претседателот на Собранието Талат Џафери од Охрид, каде во тек се разговорите на претставници на парламентарните партии во македонското Собрание во рамки на процесот „Дијалог Жан Моне“ инициран од европратениците Иво Вајгл, Кнут Флекенштајн и Едуард Кукан.

– Темите на дискусија се најавените – потребата од измени и дополнувања на Деловникот и носењето на етички кодекс, со додадени прашања на она што во други форми веќе е разговарано, а тоа е поголема самостојност и независност на Собранието. Претпладнево имавме плодна дебата за Кодексот и мислам дека таа е завршена по однос текстот изготвен со поддршка на ЕУ и очекувам да резултира со консензуално негово донесување како водилка во однос на однесувањето на пратениците во и надвор од Собранието – рече Џафери нагласувајќи го тоа прашање од особена важност за враќањето на довербата во институцијата пратеник.

Дијалогот во Охрид е предвидено да биде заокружен со заклучоци што ќе бидат презентирани на вечерата на која е најавено присуство и на лидерите на парламентарните политички партии, премиерот и лидер на СДСМ Зоран Заев, лидерот на ВМРО-ДПМНЕ Христијан Мицкоски, лидерот на ДУИ Али Ахмети, на ДПА Мендух Тачи, Зијадин Села од Алијансата на Албанците и од Беса Билал Касами. Пред нив е предвидено да се обрати и Сергеи Станишев, претседател на партијата Европски социјалисти.

Како вовед во дијалогот синоќа се одржа и вечера за учесниците во разговорите, на која европратеникот Иво Вајгл рече дека средбите се со цел во отворена атмосфера без присуство на јавноста да се разговара за сите проблеми за кои можеби не е постигнат консензус.


Груевски не е во „Процес“, „кафкијанските процеси“ беа симбол на неговото владеење


Скопје, 15 март, 2018 - 11:27 (META) 

Изразот „кафкијански процес“ во текот на изминативе десетина години честопати се користеше како метафора за де се опишат многубројните судски неправди со кои се соочуваа македонските граѓани. Токму оваа фраза стана симбол (или еден од симболите) на владеењето на Никола Груевски и на судството, кое во неговото време наместо правда делеше неправда. За разлика од главниот лик во романот на Кафка – Јозеф.К, кој нема да дознае зошто против него е покренат судки процес и за какво дело е обвинет, а на крајот и погубен, Груевски точно знае за какви дела е обвинет, само сега многу повеќе му одговара да се става во улога на жртва на „апсурден  судски процес“ и да нема верба во истиот суд и судии во чија правичност немаше ниту ронка сомнеж  додека беше премиер, пишува Оливера Војновска воВистиномер“.

Поранешниот премиер Никола Груевски  вчера (13.03.2018) по излегувањето од Кривичниот суд, каде поради болест на еден од обвинетите беше одложена главната расправа за предметот „Насилство во Општина Центар”,  ја  даде следната изјава во која ја изврте вистината:

Спин: Со секое доаѓање овдека во Судот, речиси секојдневно, еве сега од осум дена во шест дена треба да бидам на рочишта за три или четири различни процеси, секој ден се соочуваме со нови неправди  и сѐповеќе се чувствувам како во едно од врвните дела посветени на апсурдот „Процес“ од Кафка

[Извор: А1 ОН ( од 0 до 0, 22 минута од видеото), датум: 13.03.2018]

Kontraspin-foto-Vistinomer-1024x281-e1500652724996

Контраспин: Оваа изјава на експремиерот Никола Груевски кој беше во Судот како обвинет  во случајот  познат во јавноста по шамарите нарачани за поранешниот градоначалник на Општина Центар, Андреј Жерновски,  претставува чист политички спин.

Груевски пред медиумите се пожали дека секој ден се соочува со нови неправди и  сѐ повеќе се чувствува како во едно од врвните дела посветени на апсурдот,  „Процес“ од Кафка“. 

Несомнено дека Груевски не се чувствува пријатно речиси секојдневно да се појавува на рочишта во Кривичниот суд, но споредбата  на неговиот случај со оној од романот на чешкиот писател со еврејско потекло, по кој Орсон Велс во 1962 година го сними истоимениот филм, е несоодветна.

Дејствието во романот на Кафка се  случува на почетокот на 20 век во непознат германски град, а главниот лик Јозеф К е  скромен и совесен банкарски службеник кој никогаш немал проблеми со законот.

Бездруго некој го наклеветил Јозеф К., зашто, без да направи нешто лошо, едно утро го уапсија.

Ова  е првата  реченица од романот „Процес“ која  не воведува во приказната за мирниот дисциплиниран службеник, кој едно утро, на неговиот 30–ти роденден се буди во неговиот изнајмен стан,  во друштво на двајца полициски агенти кои ќе му соопштат дека против него е покрената кривична постапка, но не му кажуваат по која основа е тој обвинет. Единствено му напоменуваат дека ќе си продолжи со вообичаената дневна рутина, сè додека не пристигне ново известување за текот на неговиот процес…

Повеќе прочитајте на „Вистиномер.мк“.


Манчевски: Ќе работиме да создадеме услови за влез на трет мобилен оператор


Скопје, 23 февруари, 2018 - 14:34 (META) 

Државата ќе ги направи неопходните чекори за влез на трет мобилен оператор на пазарот, со цел граѓаните да добијат поквалитетни услуги за пониски цени, најави денеска министерот за информатичко општество и администрација, Дамјан Манчевски.

Тој додаде дека за тоа се потребни законски измени за да се овозможи изнајмување на државната инфраструктура на приватните компании.

„Државата не знае што има и потребно е да видиме со каква инфраструктура располагаме за да ја понудиме на потенцијалните инвеститори. Сега постојат законски ограничувања во можноста државната инфраструктура да им се нуди на приватни компании. Исто така има и инфраструктура изградена од приватни компании, која што може да се издава. Целта е, на потенцијалните инвеститори да им претставиме дека, состојбата во државата не е таква каква што е прикажана во законите, туку дека има одредена веќе постоечка инфраструктура која може да се користи. Вака како што е поставено законски, не сме атрактивни за нив бидејќи треба да вложат милионски суми, а повратот може да го направат за 12 години“, објасни Манчевски.

Со потенцијалните инвеститори, нашата делегација ќе се сретне на Светскиот саем на мобилна технологија во Барселона, следната недела.

Манчевски вели дека што и да се прави, ќе се има предвид и позицијата на двата мобилни оператори во државата. Не очекува дека за следните две години може да се сменат условите.

Македонија е единствената држава во Европа која има само два мобилни оператори.


Градоначалниците на Скопје и Атина повикуваат на остварливо решение за името


Скопје/Атина, 7 февруари, 2018 - 21:49 (META) 

Kако градоначалници на главните градови на двете земји, ги здружуваме нашите гласови и го поддржуваме процесот (за решавање на спорот за името) што мора да води кон остварливо решение, а не кон ново разочарување, наведуваат градоначалниците на Скопје и на Атина, Петре Шилегов и Јоргос Каминис во заедничка колумна во пресрет на нивната официјална средба закажана за в петок во Атина.

Колумната е објавена во утрешните изданија на македонскиот дневен весник „Слободен печат“ и во грчкиот дневен весник „Та Неа“.

„Во текот на изминатите неколку недели беа направени важни чекори и беше направен моментум за решавање на спорот кој ги дели нашите држави со децении. Ова кулминираше со неодамнешниот конструктивен состанок помеѓу двајцата премиери во Давос, што доведе до изрази на надеж и охрабрување кај нашите народи дека оваа историска можност нема да се пропушти повторно. Ние, како градоначалници на главните градови на двете земји, ги здружуваме нашите гласови и го поддржуваме процесот што мора да води кон остварливо решение, а не кон ново разочарување“, велат Шилегов и Каминис во колумната.

Двајцата градоначалници во колумната го изнесуваат своето разбирање дека активирањето на преговорите создава стравови и несигурност кај голем дел од населението во двете земји, и дека таквите негативни чувства и грижи треба да се почитуваат, внимателно да се решаваат и да не се игнорираат.

„Не смееме да дозволиме националистичките гласови во двете земји да ги искористат овие чувства во обидот да го загрозат конечниот договор и повторно да ја утврдат нашата судбина и нашата заедничка иднина, не само како соседи туку и како европски граѓани“, нагласуваат Шилегов и Каминис.

Тие истакнуваат оти се решени да изградат повеќе мостови на соработка и да бидат движечка сила за приближување на двете соседни земји. Велат оти е непобитен фактот дека бизнисите во Скопје и во Атина сé повеќе се поврзуваат, дека постои културна размена, младите студираат на исти универзитети, а нивните сограѓани посетуваат исти туристички дестинации во двете земји и развиваат меѓусебно пријателство.

На крајот од колумната Шилегов и Каминис додаваат дека како градоначалници на главните градови, се решени да го отворат патот кон поблиска соработка и дека силно ги охрабруваат владите на двете земји да го вложат тој дополнителен напор потребен за да не се пропушти новата можност и да се постигне договор кој им служи на основните интереси на двете земји и гарантира подобра иднина за сите нивни сограѓани.


Ахмети: Евентуален референдум за името може да го комплицира процесот


Скопје, 2 февруари, 2018 - 13:47 (META) 

Евентуалниот референдум во Македонија за ново име на државата што би го договориле Македонија и Грција може да го комплицира процесот, рекол лидерот на ДУИ, Али Ахмети на средбата со европратениците од групата на Прогресивната алијанса на социјалистите и демократите, Виктор Боштинару, Тања Фајон и Тонино Пицула.

Ахмети на средбата истакнал дека компромис за решавање на спорот за името треба да се постигне сега „почитувајќи ги карактеристиките на страните и размислувајќи за заедничката иднина во евроатланското семејство“.

„Ахмети ја поздрави подгорвеноста на европратениците и рече дека периодот што претстои пред нас е одлучувачки, не само за Македонија, туку и за регионот. Тој ги увери гостите дека храброста во нас нема да недостига и повтори дека решението побрзо се постигнува со ратификација на договорот за името во парламентот, додека евентуалниот референдум може да го комплицира процесот“, стои во соопштението на ДУИ за средбата.

Лидерот на ДУИ нагласил дека спроведувањето на системските реформи во земјата нема да запре и изразил уверување дека опозицијата ќе учествува во овој процес за доброто на граѓаните.

Претставиците на групата на Прогресивната алијанса на социјалистите и демократите во Европскиот Парламент истакнале оти даваат целосна поддршка на агендата на парламентарното мнозинство и на влада ставајќи се на располагање за да ѝ помогнат на Македонија и на регионот.


Нимиц: Секогаш добивам добри совети од лидерот на ДУИ


Скопје, 1 февруари, 2018 - 18:27 (META) 

Медијаторот на Обединетите нации во спорот за името, Метју Нимиц ја оцени како конструктивна средбата со лидерот на ДУИ, Али Ахмети, од кого, како што рече секогаш добивал добри совети.

– Го известив за моите активности во Атина и претходно денеска во Скопје во Владата , како и за напорите што ги правам во рамките на ОН за решавање на спорот за името. Се разбира тој добро го познава ова прашање и состојбата со разговорите. Тој ми го презентираше неговиот став, ставот на неговата партија и ставовите на албанската заедница. Разговаравме како би можело да се постигне решение. Ги почитувам неговите гледишта, и како и во минатото, од него секогаш добивам добар совет. Ме увери дека ќе биде конструктивна сила во поддршката на фер и разумно решение – изјави Нимиц по средбата со Ахмети.

Лидерот на ДУИ по средбата изјави дека очекува прашањето за името да добие епилог што е можно поскоро, „затоа што има големо влијание за нашата иднина, но и за мирот, стабилноста и сигурноста“.

Тој рече дека истакнал неколку мислења на средбата и дека очекува компромис што бил бил прифатлив и за македонската и за грчката страна.

– Истакнав неколку од моите мислења, нашите, но и на Албанците во однос на идеите. Ние му даваме целосна поддршка на господинот Нимиц во оваа многу значајна мисија што ја има. Се надеваме, што е можно поскоро, ова прашање да добие епилог, затоа што има големо влијание за нашата иднина, но и за мирот, стабилноста и сигурноста, така што ќе бидеме во постојано поддршка на овој процес – изјави Ахмети по средбата.


Почнува судењето на напаѓачите на Зијадин Села во Собранието


Скопје, 26 јануари, 2018 - 10:03 (META) 

Во Основен суд Скопје 1 денеска ќе почна судскиот процес против десеттемина обвинети за убиство во обид на пратеникот Зијадин Села при упадот и насилствата во Собранието на 27 април лани.

На обвинителната клупа треба да седнат обвинетите Оливер Ошавковски, Сашо Сенков, Николче Димитриевски, Александар Јаневски-Тошта, Андреј Мицов, Никола Војминовски, Коста Делов, Стојан Павлески – Кобра, како и Кире Ѓоргиевски и неговиот татко.

Последните двајца беа уапсени во мај лани, како осомничени за физички напад и влечење на Села кој потоа во критична состојба заврши во болница.


Заев – Бјорнстад: Преземенo e сè за да се спречат изборни нерегуларности


Скопје, 5 октомври, 2017 - 13:56 (META) 

Премиерот Зоран Заев се сретна со амбасадорот на Кралството Норвешка во Македонија, Арне Санес Бјорнстад, информираат од владината прес-служба.

Заев го информирал Бјорнстад дека се преземени сите неопходни активности за да се спречат изборни нерегуларности или манипулации.

Премиерот нагласил дека се осудуваат и ќе бидат осудени сите форми на насилство во изборниот процес и дека се повикани сите политички субјекти, учесници во спроведувањето на изборите, да се воздржат од каква било активност која може да нанесе дамка на изборите.

– Владата и надлежните институции нема да толерираат евентуални обиди за прекршувања во изборниот процес и никој не треба ниту да помисли да си поигрува со волјата на гласачите – изјавил Заев на средбата со норвешкиот амбасадор.

Владата, како што нагласил Заев, создала услови за слободни и демократски избори, во кои граѓаните слободно и без притисок, ќе ги исполнат своето избирачко право.