!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Дроновите (не)законски влетаа во политиката


Скопје, 24 април, 2017 - 11:31 (META) 

Дроновите станаа политички алатки пар екселанс во Македонија и на Балканот.

Првиот случај на користење дрон во политички цели беше регистриран на средината на октомвври 2014 година на мечот меѓу репрезентациите на Србија и на Албанија во Белград, кога среде натпревар, на стадинот на ФК „Партизан“, се појави дрон на кој беше закачено знаме со мапа на „голема Албанија“. Настанот тогаш ги зовре емоциите меѓу двете држави и неколку недели беше главна тема во медиумите.

Дрон со ист таков плакат на „голема Албанија“ вчера се појавил на стадионот во Чаир во Скопје, на фудбалскиот натпревар меѓу екипите на „Шкупи“ и „Вардар“, што беше повод ВМРО-ДПМНЕ вината за овој случај да ја префрли на СДСМ, кого го обвини дека е поттикнувач на ваквите случувања.

Во изминатиов период, протестите што се одржуваат во Скопје пред Владата и пред Собранието редовно се снимаат од воздух со беспилотни летала (дронови).

Владата на почетокот на 2015 година донесе Уредба за условите под кои воздухоплов без екипаж може да лета во македонскиот воздушен простор.

Во членот 12, став 5 од уредбата стои дека „воздухоплов без екипаж не може да лета во радиус од 500 метри од објектите на Министерството за одбрана и Армијата на Република Македонија, објектите на Министерството за внатрешни работи, Владата на Република Македонија, Собранието на Република Македонија, резиденцијата на Претседателот на државата, дипломатските претставништва, високо ризични натпревари и голем собир на луѓе (протести)“.

„Операциите на воздухоплов без екипаж од став 5 на овој член може да се реализираат само со претходно одобрение од Агенцијата за цивилно воздухопловство, Министреството за внатрешни работи и Министерство за одбрана“, се наведува во став 6 од членот 12 на истата уредба.

Инаку, протестите се снимаат со дрон за потребите на информативната програма на „Телевизија Нова“. Оттаму за „Мета“ велат дека за користењето на дронот ги имаат обезбедено сите дозволи, а секое летање во близина на државните објекти претходно се пријавува во полиција.

Од Агенцијата за цивилно воздухопловство не сакаа да одговорат на прашањето дали од нив била побарана и дали е издадена дозвола за користење на дроновите на протестите.

Истото прашање го испративме и до МВР, но оттаму нè препратија во Агенцијата за цивилно воздухопловство, бидејќи, како што ни рекоа, таа е надлежна за издавање на одобренијата за летање.

Во уредбата на АЦВ, сепак, не се предвидени казни за тие што ќе ги прекршат условите за користење дронови.

Казни треба да има во правилникот за користење на дроновите кој, како што информираа од Агенцијата за цивилно воздухопловство во ноември минатата година, е веќе готов, но го чека новото Собрание да профункционира за да биде донесен.

Инаку, полицијата во декември 2015 година приведе момче кое со дрон го снимаше студентскиот протест во Скопје. Момчето по „информативниот разговор“ беше пуштено, а снимките и дронот беа задржани од полицијата.


Баша повика на граѓанска непослушност и на блокирање на патишта


Тирана, 24 април, 2017 - 9:54 (META) 

Претседателот на албанската Демократска партија, Љуљзим Баша, вчера повика на засилување на протестите против власта и за денеска најави блокада на главните патишта, притоа критикувајќи ја полицијата што не издала дозвола за протестите. Баша рече дека сите полицајци што ќе се обидат да ги сопрат демонстрантите, ќе бидат снимани и со дронови и од тлото.

Во текот на кампањата во Ѓирокастро, тој порача дека нема да дозволи да се случи „втора 1997“ и ги повика гласачите да избираат „помеѓу Европа и протестни шатори“. Ги отфрли обвинувањата од албанскиот премиер Еди Рама, велејќи дека „опозицијата е решена да ја продолжи битката до самиот крај, без кршење на ниту еден прозорец“.

Во меѓувреме, продолжија обвинувања од двете страни за наложениот од меѓународната заедница процес на прочистување на правосудството од корупција. Рама повтори дека овој процес е блокиран поради врските на опозицијата со корумпирани судии. Опозицискиот лидер, од друга страна, порача дека законот за прочистување треба да биде спроведен од техничка влада.


Учесниците на протестите „Против диктатурата“ се придружија на Маршот за науката во Белград


Белград, 23 април, 2017 - 10:43 (META) 

Учесниците на протестите „Против диктатурата“, кои неколку седмици се одвиваат во најголемите градови на Србија, вчера се придружија на Маршот за науката во Белград, во рамките на кој масата демонстранти се прошетаа по централните улици на главниот град на Србија до Собранието на Србија.

Научниците од Србија се собраа на марш за науката истовремено со свои колеги во повеќе од 500 градови од целиот свет, а ним им се приклучија и учесниците на протестите против власта. Двете групи се сретнаа пред зградата на Српската академија на науките и уметностите, откаде тргна протестната поворка, упатувајќи се преку неколку улици до седиштето на српскиот парламент.

Учесниците на маршот предупредија дека Србија издвојува најмалку од сите европски земји за науката, како и дека поради забраните за вработување е невозможно да се ангажираат млади истражувачи, кои се присилени да ја напуштаат земјата или да се снаоѓаат за живот на други начини.

Во поворката се носеа транспаренти „Марш за науката, а не марш науко!“, „Со знаење против диктатурата“, „Наука без цензура“, „Не вложувате во образованието за да не ги загубите изборите“, „Против теророт на власта“, „Доведуваат богати Арапи, а јас немам ни за чорапи“.

Учесниците на протестот „Против диктатурата“ ги извикуваа досега познатите пароли „Не ја даваме Србија“ и „Против диктатурата“, а со скандирање „Утре пак во 18“ го најавија денешното продолжение на протестот, што од 3 април се одвива секој ден.


Протести во Келн против конвенцијата на ултрадесничарската АФД


Келн, 22 април, 2017 - 18:11 (META) 

Левичарските демонстранти се судрија со германската полиција во Келн, пред почетокот на партиската конвенција на ултрадесничарската Алтернатива за Германија (АФД), пренесува ХРТ. Во судирите, според телевизијата, повредени се двајца полицајци.

Во текот на денот во Келн се очекува да се соберат околу 50.000 демонстранти, кои ќе протестираат против јанкењето на влијанието на АФД.

Членовите на партијата, на конвенцијата треба да ја донесат програмата за следните парламентарни избори и да изберат ново раководство на партијата.

„Како една од водачите на партијата, уверена сум дека мораме да им покажеме на своите гласачи пред регионалните избори, а особено пред парламентарните, дека нашата партија се држи до реалните политички насоки. Не смееме да оставиме празен политички простор за ‘старите’ партии и за нивните прегласни поддржувачи кои само протестираат по улиците“, порачала Фрауке Петри од АФД.

Претставниците на АФД постојано го привлекуваат вниманието во јавноста со контроверзни изјави поврзни со германското минато, особено со периодот на нацизмот, како и со радикалните ставови поврзани со односот кон исламот и кон мигрантите.

Во Келн се распоредени околу 4.000 полицајци, што е најголема полициска акција во овој град од одржувањето на самитот на Г8 во 1999 година.


Собрание: Пратениците на ВМРО-ДПМНЕ меѓусебно си реплицираа и си контрареплицираа


Скопје, 19 април, 2017 - 20:00 (META) 

Како што почна, така и заврши четиринаесеттото продолжение на конститутивната седница на Собранието, во реплики и во контрареплики на пратениците на ВМРО-ДПМНЕ.

По паузата за ручек во 15 часот, ниту еден од пратениците на СДСМ не се јави за збор.

Пратениците на ВМРО-ДПМНЕ повторно расправаа за тиранската платформа, протестите, државните симболи, а беа спомнати и последиците по економијата од приватизацијата.

Пратеникот на ВМРО-ДПМНЕ, Антонио Милошоски, кажа дека „кога за претседател на најголемата опозициона партија имате човек кој има проблеми со судот, исто како и неговиот брат, тој има желба и лично и политички да се избави од судските проблеми“.

„Проблемот почна и проблемот ќе заврши со Зоран Заев, кој создаде ваква комплицирана ситуација која е ризична за Македонија“, истакна Милошоски.

Претседавачот Трајко Вељаноски седницата ја прекина во 18 часот, а следната ја најави за утре во 11 часот.


Вучиќ: Државата ќе реагира ако протестите станат насилни


Белград, 16 април, 2017 - 17:52 (META) 

Српскиот премиер Александар Вучиќ изјави дека граѓаните на Србија можат да протестираат додека сакаат и сè додека не ги загрозуваат правата на другите граѓани. Во спротивно, доколку дојде до насилство, државата ќе интервенира.

Вучиќ по денешната посетата на дежурните сили во системот на противвоздушна одбрана во на војската на Србија во Јаково, рече дека „државата ќе реагира ако некој посегне по насилство“.

– Додека сакаат нека протестираат, си додека е мирно, додека не ги загрозуваат правата на другите граѓани. Кога говорев во (предизборната) кампања дека се подготвува таканаречено македонско сценарио во кои одредени претседателски кандидати, одредени политичари ќе се обидат со насилство да остварат си што не можат преку волјата на народот, тие ми велеа дека не е вистина – рече Вучиќ, додавајќи дека ако сакаат можат да протестираат уште 10 години, но само мирно.

Тој истакна дека ги поддржува протестите сè додека се мирни, наведувајќи дека тоа е демократија.


Се степаа приврзаници и противници на Трамп во Беркли


Беркли, 16 април, 2017 - 12:37 (META) 

Најмалку 20 лица се уапсени откако приврзаници и противници на американскиот претседател Доналд Трамп се степаа на протести во Калифорнија, соопшти денеска полицијата.

Околу 200 луѓе учествуваа во протестот во еден парк во Беркли, кога настана тепачката, а десетиците полицајци, кои ги обезбедуваа демонстрантите, ги уапсија насилниците.

Полицијата претходно се постави импровизирани бариери на пластични столбови и мрежи, за да ги подели двата протести. Сепак бариерите набргу биле уништени, по што избила тепачка.

Демонстрантите потоа, под надзор на полицијата, прошетаа низ главните улици на градот.


Богоевски: Со „Шарена револуција“ засекогаш ја променивме политичката сцена


Скопје, 12 април, 2017 - 12:45 (META) 

Пред една година, на 12 април, илјадници граѓани револтирани од одлуката на претседателот на државата, Ѓорге Иванов, да прогласи широка аболиција и да помилува 56 лица – политичари и нивни соработници, кои се споменуваат во прислушуваните разговори, излегоа на масовен протест пред народната канцеларија на Иванов во центарот на градот.

Таа одлука, донесена пет дена по распуштањето на Собранието, предизвика бура протести низ целата земја и на сите нивоа. Секој ден се бараше повлекување на одлуката и оставка на претседателот, сè додека Иванов целосно не ја повлече одлуката за аболиција. Протестите од Скопје се проширија низ целата земја, а демонстрантите од т.н. „Шарена револуција“ на иновативен начин и со „герила-акции“ го изразуваа револтот.

На годишнината од „Шарената револуција“ потсети и независниот пратеник од коалицијата на СДСМ, Павле Богоевски, кој беше еден од водачите на револуцијата, а по изборите во декември минатата година стана пратеник во законодавниот дом.

Богоевски на собраниската говорница рече дека „Шарена револуција“ е најголемото граѓанско будење и дека граѓаните со протестите минатата година порачале дека е доста страв и молк.

– Денеска е една година од најголемото граѓанско будење за заедничка цел. Благодарение на „Шарена револуција“, Никола Груевски, голем дел од неговата банда и дел од вас, не се аболирани туку осомничени лица. Со „Шарена револуција“ засекогаш ја променивме политичката сцена во Македонија, сакале или не вие да го признаете тоа. Нè нарекувате хулигани и насилници и велевте дека сме ги сквернавеле државни симболи. Ние го обоивме овој дом, но вие го уништивте долго пред да го обоиме. Го сведовте на гласачка машина за ВМРО-ДПМНЕ. Нè правите насилници, но откако го фрливме првиот балон боја имаше само три-четири скршени прозорци. Доста беше! „Шарена револуција“ рече доста. Доста беше страв, доста беше молк. Јас ќе бидам „шарен“ уште долго откако ќе престанам да бидам пратеник. „Шарена револуција“ уште долго ќе го бои овој дом, но сега однатре – рече Богоевски.

На ова му одговори претседавачот со Собранието, Трајко Вељаноски, кој истакна дека „Шарена револуција“ двапати го оштетила законодавниот дом.

– „Шарена револуција“ двапати го оштети овој дом, за 600.000 денари и за 1.200.000 денари, кои ги платија граѓаните за Вие да си седите во овие клупи и да си земете плата од овој дом што го боевте – рече Вељаноски.


Вучиќ: Со протестите се спроведува „македонско сценарио“


Белград, 11 април, 2017 - 11:27 (META) 

Студентите кои веќе осум дена, незадоволни од резултатите на претседателските избори во Србија, организираат протести во Белград и во другите градови во земјата, соопштија дека бараат комплетна смена на политичката елита на чело со Александар Вучиќ, фер и слободни избори, како и укинување на диктатурата.

Вучиќ, пак, како одговор на нивните барања, вели дека тие спроведуваат „македонско сценарио“.

Барањата, за кои како што се тврди, се усогласени преку „Фејсбук“, испратени се до медиумите од Студентското движење на Нови Сад и од белградското движење „Протест против диктатурата“.

Во реакцијта на Вучиќ се вели дека учесниците на протестот се изманипулирани и ги обвини политичките противници, пред сè, противкандидатот на изборите, Саша Јанковиќ, дека сакаат да ја воведат земјата во нестабилност, но дека тој нема да го дозволи тоа.

– Реков претходно, пред изборите, дека се обидуваат да спроведат „мкедонско сценарио“ и чекав до тоа да дојде – рече Вучиќ синоќа за телевизија „Хепи“.

Тој додаде дека очекува да се обидат да предизвикаат уривање на парламентот поради што, како што додаде, не може во целост да се исклучи можноста да дојде до вонредни избори „затоа што во хаос нема да може да се работи“.

Осмиот „Протест против диктатурата“ во Белград траеше околу три часа и помина без инциденти, а за денеска е најавено ново собирање.


Арифи: Нови избори не се решение за кризата, туку избор на нов спикер и на влада


Тетово, 10 април, 2017 - 16:07 (META) 

Градоначалничката на општина Тетово и потпретседателка на ДУИ, Теута Арифи, и денеска го повтори ставот на нејзината партија дека е потребно што поскоро парламентарното мнозинство да формира влада. Нови избори, според неа, не се решение на кризата, туку треба да се изберe претседател на Собрание и државата да почне да функционира нормално.

Таа додаде дека секој има право да протестира и посочи дека ДУИ како партијата протестирала во 2006 година поради прекршуавње на принципот победник со победник, но не ги блокирала институциите.

– Принципите на демократијата се тие – мнозинството да формира влада, да избере претседател на Собрание и државата да профункционира како што треба, додека секој, нормално во рамките на своите активности, има право да ги врши своите политички активности. Да потсетам само на моментот од 2006 година бидејќи гледам дека често се споменува како модел. Тогаш ДУИ 18 до 19 месеци протестираше поради тогашната политичка одлука, но институциите беа формирани, како и сè друго, а ние подоцна го искористивме нашето демократско право да го реализираме како што сметавме ние – изјави Арифи.

Таа рече дека поминати се сите рокови да се организираат локалните избори во мај.

– Мај е веќе надминат како можност кога може да се организираат локални избори. Нормално дека е потребно во Собранието да се реши како ќе се продолжи понатаму, но, најпрвин токму Собранието треба да се формира и треба да се прекине тенденцијата за навлегување уште подлабоко во оваа криза – изјави Арифи.

Арифи изјавата за политичката состојба во Македонија ја даде на пуштањето во употреба на реконструираниот парк во близина на автобуската станица во Тетово.