На протестот пред „Дрисла“, екологистите побараа одговори дали се увезува опасен отпад


Скопје, 1 февруари, 2019 - 16:27 (META) 

Организаторите на протестот „Движење за чист воздух“ денеска го блокираа приодот кон депонијата „Дрисла“ како предупредување до надлежните и побараа одговори на прашањата, што се гори во печките, каков отпад се складира и каков е третманот на овој отпад, дали се запазуваат законите и стандардите согласно европските регулативи и дали се увезува отпад од други земји.

Тие побараа смена на Правилникот за извршување инспекциски надзор и негово усогласување со ЕУ-нормативата за емисии на диоксини, формалдехиди и фурани. Беше побарано и да се раскине договорот со италијанската фирма-концесионер „ФЦЛ Амбиенте“, поради неисполнување на договореното за „Дрисла“.

„Најголемиот проблем е што најопасниот отпад од целата држава завршува во оваа депонија. „Дрисла“ нема добиено акредитација од Министерството за животна средина за депонирање на таков отпад“, изјави Тони Никушевски, според кого, депонијата Дрисла е една од најкритични точки во Скопје и Македонија кога станува збор за загадувањето.

Според Никушевски, во светот нема легален увоз на опасен отпад. Поради ова, стоката која тргнува од европски центри, или од големи градови кон трети земји каква што е Македонија, не се декларира според Базелската конвенција дека се работи за отпад туку, нагласува активистот, е декларирана како репроматеријал или суровина.

„На тој начин, се одбегнува регулациската рамка и на тој начин опасната стока стигнува до вакви трети земји. Ние не може да знаеме дали  понатаму во државата ќе се увезува таков тип на отпад, се додека не покаже дека има функционални контролни механизми“, додаде Никушевски.

Директорот на детската амбасада „Меѓаши“, Драги Змијанац побара одговор зошто печките на „Дрисла“ се дупло оптоварени од нивниот капацитет и праша што превземаат државните органи, посебно инспекторите, колку често се контролира работата на Дрисла и на печката за согорување на медицински отпад, дали има ноќни ненајавени смени, и дали филтрите се соодветни за фурани и диоксини?

Ариајнит Џафери од тетовската организација „Еко-герила“ го повика премиерот Зоран Заев и Владата итно да го сменат Законот за увоз на отпад, со образложение дека забраната за отпад значително ќе придонесе во намалување на загадувањето, особено во Скопје.

„Има сериозни сомневања за согорување на отпад во „Дрисла“, без соодветни стандарди што е една од причините за аерозагадувањето. Постои лавиринт на нетранспарентност околу тоа, каков отпад навистина се увезува од странство и се согорува во Македонија. Иако во Скопје беа преземени неколку мерки за загадувањето, очигледно е дека не се намали. Сите мерки ќе бидат козметички, доколку не се забрани овој отпад. Македонија нема капацитет да се справува со сопствената количина на отпад. Увозот на отпадот од држави од ЕУ останува сомнеж за корумпираните врски и импликации на интересите на мафијата. Бараме и од Јавното обвинителство да ја испита оваа активност, без влијание на бизнис интересите и политиката“, рече Џафери.

Организаторите на протестот, „Движење за чист воздух“ најавија дека доколку не се решат овие прашања за 15 дена, ќе организираат помасовен протест, со вклучување и на граѓаните.

„Сакаме да им пратиме јасна порака на политичарите – дека не им веруваме. Се повеќе веруваме дека постои нивна вмешаност во овој бизнис, затоа што загадувањето е бизнис, а се помалку веруваме во нивната неспособност да го решат ова. Господа политичари, исчистете си го вашето ѓубре, затоа што пред избори ќе ве поклопи“, изјави Марјан Ненов, претставник на движењето.

Извршниот директор на „Дрисла“ Горан Ангелов пак, по завршување на протестот изјави дека „Дрисла“ не влијае на загадувањето на Скопје, кое е на 11 километри одовде. Тој, исто така се осврна и на сомнежите дека на депонијата се согорува опасен отпад.

„Нашата мерна станица се наоѓа на 100 метри од депонијата и таа не покажува зголемени вредности“, рече Ангелов и додаде дека на Дрисла се согорува само медицински отпад од Скопје и дел од здравствените установи кои вршат дијализа низ државата, лекови со поминат рок и одреден неопасен отпад како кредитни картички и документи, наркотици и слично.

Според Ангелов нема преоптоварување на печката, бидејќи нејзиниот капацитет е 1.400 тони.


В петок еко-активисти ќе го блокираат патот за Дрисла, протестираат против загадувањето


Скопје, 30 јануари, 2019 - 15:17 (META) 

Еколошки активисти собрани околу иницијативата „Здружени за чист воздух“ во петок во периодот од 12.05 до 12.20 часот ќе го блокираат пристапниот пат кон скопската депонија Дрисла.

Од „Здружени за чист воздух“ информираат дека блокадата, што ќе се одвива под мотото „15 минути за чист воздух“ е предупредувачки протест со цел да се сврти вниманието на надлежните кон проблемот со енормното загадување на поширокото подрачје на Скопје како и на сомневањата дека на депонијата Дрисла незаконски и на нееколошки начин се согорува отпад што влијае на зголемување на штетни емисии во воздухот, но и дека по него ќе следи и помасовен протест.

– Пораката до надлежните гласи: ги следиме вашите постапки и бараме одговори на прашањето што се случува на Дрисла и зошто не се превземаат мерки против загадувањето што доаѓа од таму – вели Марјан Ненов од „Здружени за чист воздух“.

Предупредувачкиот протест во петок се најавува неколку дена откако преку медиумите и социјалните мрежи беше споделувана снимка на која се гледа густ црн чад кој излегува од оџакот на печката за согорување на медицински отпад што се наоѓа во рамките на депонијата Дрисла, во близина на скопското село Батинци.

Од Државниот инспекторат за животна средина тогаш за „Мета“ информираа дека црниот чад што излегува од оџаците на депонијата Дрисла е поради дефект на филтерот и дека поради тоа таа е исклучена додека не се изврши замена на оштетениот дел.

Инспекторатот тврди дека емисиите од оџакот на медицинската печка во Дрисла, кога таа е во функција, редовно се контролираат и се во рамките на дозволеното. Во дел од јавноста, меѓутоа, веќе подолго време се шпекулира дека согорувањето на медицински и на друг вид на отпад на депонијата Дрисла се одвива надвор од еколошките стандарди и дека на тој начин придонесува за енормните вредности на штетни состојки во воздухот.


Во Солун се делат „некролози“ за Македонија


Солун, 25 јануари, 2019 - 12:35 (META) 

Малубројни противници на Договорот од Преспа денеска во Солун, пред Министерството за Македонија и Тракија, на минувачите им делеа „некролози“ со името „Македонија“, изразувајќи го на тој начин својот протест против, како што велат „предавството кон грчка Македонија“.

„Денеска ја погребуваме Македонија“ стои во текстот, а како потписници се „Мајка Грција, децата Македонки и Македонци“.

Во 14.30 часот денеска грчкиот парламент треба да гласа за ратификација на Договорот од Преспа, со што тој официјално ќе стапи на сила, а Македонија со направените уставни измени ќе добие ново официално име за севкупна употреба – Северна Македонија.

Инаку, исто како и во Солун денеска, и на протестите против ратификцијата на Преспанскиот договор и уставните измени во македонското собрание се делеа „некролози“ за Македонија, во кои се обвинуваа македонските политичари и пратеници дека ја предале Македонија.

Во Македонија и претходно се правеа „некролози“ – по жестокиот говор на тогашниот претседател на ВМРО-ДПМНЕ, Никола Груевски пред Државната изборна комисија (ДИК), кога остро нападна некои амбасадори дека премногу се мешаат во внатрешните работи на Македонија, на интернет се појавија некролози на тогашните два дена откако лидерот на ВМРО-ДПМНЕ, Никола Груевски, одржа говор пред Државната изборна комисија, во кој истакна дека некои амбасадори почнале премногу да се мешаат во внатрешната политика на земјата. На тоа реагираа САД и ЕУ, како и македонските дипломати.


Партиите подалеку од нас, велат организаторите на утрешниот протест против загадувањето


Скопје, 25 јануари, 2019 - 12:17 (META) 

Ние сме загрижени млади луѓе кои ниту се поддржани од партии, ниту имаме намера да стануваме партија туку се обидуваме како граѓани да дадеме свој придонес да се реши проблемот со загадувањето. Досега имавме можност да видиме колку сегашните институции се спремни да ја решаваат алармантната состојба со загадувањето на воздухот и решивме да ги повикаме граѓаните самите да се избориме за почиста и здрава животна средина бидејќи веќе време за губење немаме, вели Кристијан Узунов, еден од организаторите на утрешниот протест пред Собранието против загадувањето.

Тој, заедно со група млади луѓе кои се претставија како дел од организацијата на протестот се упатија во полициската станица Беко за да го пријават утрешниот протест, за кој нагласија дека ќе биде мирен и дека им е целта да биде масовен „за да ја искажеме нашата загриженост од загаденоста на воздухот“.

– Бараме итна седница на Владата, вклучување на експерти и на граѓански организација во контрола на големите загадувачи, оние кои останаа недопрени до сега. Бараме Владата да престане со таканаречени мерки кои само удираат по џебот на најсиромашните и да продолжи, а не да ги стопира оние краткорочни мерки како што е бесплатниот превоз по само еден ден – вели Узунов.

Тие ги повикаа сите граѓани, еко-активисти, експерти, доктори да дојдат на протестот и самите да ги надополнат барањата до власта, како и да понудат најдобри решенија за загадувањето во Скопје, истовремено апелирајќи до власта и до опозицијата да не се обидуваат да го злоупотребат за свои цел и да го ставаат во друг контекст.

Одговарајќи на барање на новинарите да се претстават, Узунов рече дека единствено искуство како еко-активисти им е организирањето протести против загадувањето предизвикано од скопска Железарница пред четири години.

– Баравме итно ставање филтри на фабриката и на тие протести доаѓаа едвај неколку стотици луѓе. Седум месеци секојдневно блокиравме улици, се обидувавме да допреме до граѓаните преку медиуми, но свеста на граѓаните за жал беше многу ниска и тоа е една од причините што сега сме најзагаден град на земјината топка – додава Узунов.


Повисоки плати ќе побараат синдикатите, на протест во Штип во сабота


Штип, 24 јануари, 2019 - 13:28 (META) 

Десетина гранкови синдикати, членки на Конфедерацијата на самостојни синдикати (КСС) ќе излезат на протест во Штип, во сабота. На прес-конференција во Штип, претседателот на СОНК, Јаким Неделков кажа дека главните барање се зголемување на платите за 25 отсто, но има и повеќе други барања, како што е вклучување на синдикатите во најавените реформи и почеток на  дијалог со владата.

-Нашето барање за зголемувањето на платите да почне од први јануари 2019 година, беше упатено поодамна, а не со септемвриска плата во октомври 2019 и не за пет проценти како што е најавено, туку за многу повисок процент, со кои би се изедначиле со платите на национално ниво. Ако една воспитувачка има 20.000 денари плата, или еден наставник 22.000 плата, ако знаеме дека просечната плата е близу 25.000 денари, тогаш лесно се заклучува дека платите во секторот се под просекот и треба да се зголемат – изјави Неделков.

Главната забелешка на синдикатите е дека реформите се спроведуваат без синдикатите, како што е најавата за трансформација на работен однос од јавен во приватен сектор. СОНК конкретно бара нивни членови да бидат вклучени, пред воведувањето на новите реформи во средното образование, што се најавуват за септември. Синдикатите бараат да бидат информирани и да го кажат својот став.

На јавно искажаните реакции зошто ККС и СОНК не протестирале порано, во време на ВМРО-ДПМНЕ, туку сега, Неделков вели дека синдикалната борба не престанува.

-Неосновани се реакциите, еве, последно искажано незадоволство во време на ВМРО-ДПМНЕ имавме 2015 година, кога штрајкувавме скоро две недели за состојбите во дејностите што ги застапуваме – одговори претседателот на СОНК.

Протестот во Штип во сабота ќе започне во 12 часот, со собир пред Градскиот плоштад, ќе се формира поворка, која ќе помине низ центарот и повторно се враќа на плоштадот, каде претставници на повеќе синдикати ќе се обратат пред присутните. Од ККС очекуваат присуство на вработените во овие сектори и нивни членови, бидејќи протестот е во неработен ден, што значи, како што рекоа од синдикатите, нема изговор за неприсуство. Како што вели Неделков, треба да се мисли на себе и сопственото семејство.


Повикот за протест против загадениот воздух во сабота е анонимен, без познат организатор


Скопје, 24 јануари, 2019 - 10:22 (META) 

Повикот за протест против загадениот воздух пред Собранието во сабота е анонимен, односно не е познато кој стои позади неговата организација. За овој настан, граѓаните најпрво се информираа во приватни пораки на Фејсбук, а потоа беше креиран настан „Канцерогено Општество Сабота 13:00 Пред Собрание“.

Настанот до денеска не е пријавен ниту во МВР, информираа од таму за „Мета“. Иако од МВР велат дека тие законски не се обврзани да го пријават протестот, според искуството до сега и организаторите на масовниот протест пред три години, тоа е пожелно пред се од безбедносни причини.

Во повикот за протест на „Фејсбук“, меѓудругото главно барање е „владата и институциите да престанат со така наречени решенија кои дирекно удираат по џебот на најсиромашните, а крупните капиталисти и најголемите загадувачи остануваат недопрени“.

Еко-активистката Ели Пешева смета дека лошо организиран протест прави многу голема штета на целиот активизам, на сите граѓански напори за подобрување на работите.

„Немам никаква дилема дека состојбата ни е за еден сериозен, масовен, па и радикализиран протест. Но, по стоти пат ќе кажам, дека сомнително непотпишан повик од типот „ако не го пуштиш на 20 луѓе во следните 5 минути…” или лошо организиран протест прави многу голема штета на целиот активизам, на сите граѓански напори за подобрување на работите. Повикот на протест мора да има јасно потпишани иницијатори како и прецизни причини/барања. Се друго е обид за манипулирање на граѓаните кои загадувањето ги доведе до раб на нерви и евентуални бонуси за одреден мал број луѓе кои имаат одредена агенда. Значи или е многу дилетантски и несериозно подготвено или има за цел, вакво неорганизирано и хаотично, да ги демотивира граѓаните од секое идно сериозно собирање и протестирање“, вели Пешева.


Иницијативата „Да ја спасиме Попова Шапка“ повикува на протест в сабота


Тетово, 10 јануари, 2019 - 10:57 (META) 

Граѓанската иницијативата „Да ја спасиме Попова Шапка“ повикува на протест, за како што велат, да се стопира уништувањето на овој туристички центар.

„Во сабота, 12 јануари со почеток во 11 часот, ве покануваме да протестираме сите заедно кај Жичарата Тетово – Попова Шапка против уништувањето на овој туристички центар.Туризмот што го имаат Струга и Охрид за три месеци, Тетово требаше да го има за дванаесет месеци. Да се мобилизираме што повеќе, за да ја изразиме нашата подготвеност да побараме одговорност од Владата, за да ги преземе потребните чекори кон трајното решавање на проблемите на Попова Шапка“, се вели во апелот.

Тие го повикаа и премиерот Зоран Заев да дојде на Попова Шапка за лично, како граѓанин, да се запознае со проблемите кои ги има овој ски-центар.


Во 13 часот продолжува седницата за уставните измени, најавен нов протест пред Собрание


Скопје, 10 јануари, 2019 - 10:10 (META) 

Седницата за уставните измени продолжува денеска во 13 часот откако вчера претседателот на Собранието Талат Џафери ја прекина седницата по говорот на премиерот Зоран Заев и нејзино продолжение закажа за денеска.

Заев во експозето пред пратениците порача дека договорот за името содржи јасни обележја за македонската посебност, при што јазикот и идентитетот се македонски, а земјата ќе носи име признаено од целиот свет. Тој повика да се остават настрана партиските интереси, да се обединат сите и да ја препознаат историската одлука која треба да се донесе.

– Изборот не може да биде појасен. Успехот не може да биде поизвесен. Големината на оваа историска одлука треба да ја препознаеме сите. Вашиот глас е глас за полноправно членство во НАТО за помалку од една година. Вашиот глас за не става во европското семејство на ЕУ. Секој глас против е глас за изолација, несигурност, сиромаштија, за нови политички кризи и поголема неизвесност дури од оние кризи од нашето минато – рече Заев.

Пред почетокот на вчерашната седницата за уставните амандмани, претседателот на ВМРО-ДПМНЕ, Христијан Мицкоски пред Собранието потврди дека пратениците од неговата партија нема да учествуваат на седницата бидејќи не сакаат да му дадат легитимитет на процесот на менување на Уставот, по што заедно со дел од пратениците на ВМРО-ДПМНЕ и други сопартијци се придружи на протестот пред Собранието организиран од „Македонија блокира”.

Вчерашниот протест, според првичните најави, требаше да трае до полноќ, но заврши веднаш откако спикерот Џафери ја прекина седницата и ја закажа за денеска. По ова и организаторите закажаа нов протест за денеска во 12 часот.

За прогласување на амандманите е потребно двотретинско мнозинство, односно за нив да гласаат 80 од вкупно 120 пратеници во Законодавниот дом. По прогласувањето на амандманите пратениците треба да го изгласаат и уставниот закон за нивно спроведување.


Членови на „Македонија блокира“ бараат средба со пратениците и обраќање во Собранието


Скопје, 9 јануари, 2019 - 15:37 (META) 

Членови на граѓанското здружение „Македонија блокира”, протестираат пред македонското Собрание против уставните измени. Претседателот на „Единствена Македонија” Јанко Бачев изјави дека нивни член е на разговор со претседателот Иванов во неговиот кабинет. Протестот, како што велат организаторите, ќе трае се додека не заврши пленарната седница, ќе вршат притисок и нема да дозволат да бидат усвоени уставните измени.

Насобраните граѓани го повикаа претседателот, Ѓорге Иванов, да им се придружи.

-Ќе и порачам на полицијата дека ни ја делат улицата. Оваа е наша улица. Не треба да ги брани тие 120 предавници. Го повикуваме и Иванов да протестира со нас. Да ги предупреди и да не го продаваат македонското – рече Драган Угриновски од „Македонија блокира“.

Лидерот на ВМРО-ДПМНЕ, Христијан Мицкоски, повика на достоинствени протести и апелираше до граѓаните да не подлегнуваат на провокации.

Тој повтори дека пратеничката група на ВМРО-ДПМНЕ нема да учествува во собраниската расправа за прифаќање на уставните измени, бидејќи договорот од Преспа е штетен, а двотретинската поддршка е обезбедена благодарејќи на Основното и на Специјалното обвинителство, кои со своите случаи ги принудија пратениците од опозицијата да гласаат „за“.

Од движењето „Македонија блокира” побараа нивни претставници да влезат во парламентот за да разговараат со пратениците, како би им ги изложиле своите ставови против промена на уставното име, но и нивни претставник да се обрати пред пратениците на денешната седница во Собрание.

 


ВМРО-ДПМНЕ ќе протестира и нема да учествува во расправата за уставни измени


Скопје, 9 јануари, 2019 - 14:49 (META) 

Лидерот на ВМРО-ДПМНЕ, Христијан Мицкоски, пред Собранието на Република Македонија каде што денеска во 16 часот се очекува да продолжи финалната фаза од уставните измени повика на мирни протести против, како што рече, насилно менување на уставното име на државата.

– Денес е финалниот акт на еден срамен процес во кој Република Македонија е втурната од страна на премиерот Зоран Заев и владејачкото мнозинство. До промената на Уставот со цел промена на уставното име се доаѓа не по демократски пат, туку преку акт на насилство врз процедурите, уцени и закани врз пратениците и нивни блиски. ВМРО-ДПМНЕ и Коалицијата „За Подобра Македонија” нема да учествува во тој процес, и на денешната седница, нема да дадеме како политичка партија легитимитет за промената на Уставот затоа што таквите измени немаат легитимитет од граѓаните. Цврсто сме убедени дека тие се штетни и оставаат траен белег врз македонското национално достоинство и го менуваат идентитетот, пред се институционалниот – рече Мицкоски.

Тој рече дека негова татковина останува Република Македонија, кој и да е исходот од собраниската расправа. Според Мицкоски со уставните измени се нанесува тешка неправда и голема штета.

– Отпорот е она што ни преостанува. Имам да им порачам на граѓаните, јас како еден од вас ќе го користам демократското право мирно и достоинствено да протестирам и пркосам за она што се случува денес и ќе се случува следните денови, тоа ни преостанува. Ве молам од дно на душа да не подлегнувате на провокации и измислени конструкции од полициски структури. Да ни се придружите и да останеме достоинствени, честити иако државата е окупирана од нечестита власт – рече тој.