!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Маските против загадениот воздух – најбаран новогодишен подарок


Скопје, 27 декември, 2016 - 13:00 (META) 

Загадениот воздух ја зголеми побарувачката на заштитни маски низ аптеките и продавниците кои се специјализирани за нивна продажба. Нивната цена се движи од 200 до 899 денари, а најмногу се бараат тие со јаглен кои го прочистуваат воздхот и ги задржуваат ПМ10-честичките.

– Маските се со јаглен и чинат 899 денари, но во моментов немаме величини М и С, туку само Л. Има голем интерес за нив и затоа бргу се трошат. Досега неколкупати набавуваме, но ги потрошивме. Чекаме следна пратка – велат од една од аптеките на „Зегин“.

Маски со величина М и С нема во ниту една од аптеките на „Зегин“ во Скопје, а големина Л може да се најде само во неколку од нив.

Дека побарувачката за маски е зголемена, ни потврдија и од аптеките на „Еурофарм“, каде што маските чинат 200 денари и се за неколкукратна употреба.

На социјалните мрежи, исто така, можат да се забележат зголемен број огласи на кои се нуди не само продажба на маски туку и прочистувачи на воздухот во просториите, но и боци со кислород.

Граѓаните, освен по аптеките и во специјализираните продавници, маските ги набавуваат и од платформата за интернет-продажба „Али експрес“, каде што чинат 10 долари и се со различни дезени и бои.

Вчера градоначалникот на Град Скопје, Коце Трајановски, одржа состанок со градоначалниците од Скопскиот плански регион на кои беа предложени мерки за да се реши проблемот со загадувањето на воздухот во Скопје.

Граѓаните и еко-активстите утре во 17 часот, во Градски парк, вторпат ќе одржат протест против енормното загадување на воздухот, кое во одредени денови и до 20 пати ги надминува дозволените вредности.


Учениците Македонци од тетовската гимназија почнаа да учат под ведро небо


Тетово, 26 септември, 2016 - 13:11 (META) 

По речиси еден месец бојкот, учениците Македонци од тетовската гимназија почнаа да следат настава. Но, наместо на училишните клупи, тие учеа стоечки, на отворено, на градскиот плоштад во Тетово.

– Свесни дека бојкотот на наставата најмногу им штети на учениците, а немајќи соодветен простор во кој би ја следеле наставата во нормални и достоинствени услови, принудени сме наставата да ја организираме под ведро небо, пред просториите на Секторот за образование на градскиот плоштад. Се надеваме дека надлежните конечно ќе нè видат и ќе нè слушнат и заеднички ќе го решат проблемот – изјави професор Дејан Ѓурчиновски од советот на професори при гимназијата „Кирил Пејчиновиќ“.

Учениците Македонци од тетовската гимназија изминативе неколку години следеа настава во несоодветни услови во зградата на Работничкот универзитет и во основното училиште „Гоце Делчев“ во Тетово.

Револтирани поради ваквата состојба, оваа учебна година тие ја почнаа со протестен марш низ тетовските улици. По протестот беше донесена одлука децата привремено да учат во централниот објект на гимназијата.

Оваа одлука за неколку дена беше промената, со образложение дека е незаконска и дека раководството на гимназијата не може сите ученици да ги распореди да учат во еден објект.

Наставата на градскиот плоштад во Тетово ќе продолжи сè додека, како што велат од советот на професори, не се најде решение за просторниот проблем.


СЈО од денеска ќе работи во новите простории


Скопје, 5 септември, 2016 - 10:42 (META) 

Специјалното јавно обвинителство од денеска и официјално ќе ги продолжи истрагите за случаите поврзани со незаконското прислушување во новите простории на улицата Франклин Рузвелт.

Утрово пред новата зграда на СЈО забележително е засилено полициско обезбедување, што не беше карактеристично за канцелариите на булеварот Митрополит Теодосиј Гологанов.

Во фоајето на објектот забележлива е фрекфенција на луѓе вработени во СЈО, а пред зградата стои паркиран полициски џип „лендровер дифендер“ и неколку полициски службеници.

Полицијата засега дозволува фотографирање само од другата страна на улицата.

Нема информации дали денеска во новите простории ќе дојдат лица повикани од СЈО во врска со случаите што ги води ова обвинителство.


Тетовските гимназијалци на 1 септември на протестен марш


Тетово, 30 август, 2016 - 16:13 (META) 

Првиот ден од новата учебна година учениците Македонци од тетовската гимназија „Кирил Пејчиновиќ“ ќе го почнат со протестен марш. На протестот кој го организираат учениците заедно со нивните родители и професори, ќе упатат повеќе барања за надминување на просторниот проблем со кој се соочуваат повеќе од една деценија. Ако не се прифатат барањата, учениците најавуваат бојкот на наставата.

„Бараме од надлежните писмена изјава со временска рамка за изградба на ветениот објект за учениците Македонци во рамките на постоечкиот објект на гимназијата „Кирил Пејчиновиќ“. Привремено решение со нормални услови за одвивање на наставата во тетовската гимназија, но никако како алтернатива не ги прифаќаме просториите на Работничкиот универзитет. Ако на овие барања не наидеме на позитивен одговор, најавуваме целосен бојкот на наставата“, стои во заедничкото писмо на родителите и на професорите на учениците.

Ученците од гимназијата „Кирил Пејчиновиќ“ од Тетово кои следат настава на македонски јазик, од декември 2014 година учат во несоодветни услови, во објектите на Работничкиот универзитет и на Основното училиште „Гоце Делчев“. Во овие згради нема кабинет по информатика, нема доволно простор, а инвентарот и тоалетите се во лоша состојба. Учениците учат во овие објекти откако 14 години учеа во познатите стари медицински бараки, каде немаше никакви услови за водење настава, а честопати се случуваа и меѓуетнички инциденти.


Во штабот на ВМРО-ДПМНЕ во Битола може да се влезе само без мобилен телефон


Битола, 16 август, 2016 - 15:13 (META) 

Во новото седиште на ВМРО-ДПМНЕ во Битола не може да се влезе и да се носи мобилен телефон. На влезната врата стои натпис во кој се замолуваат членовите мобилните телефони да ги остават на портирницата.

VMRO-DPMNE vo Bitola

На прашањето дали членовите на партијата се плашат од протекување на снимки, портпаролката на ВМРО-ДПМНЕ во Битола, Валентина Марковска вели дека предупредувањето и натаму ќе стои на вратата и дека „партијата ќе функционира на тој начин“.

Минатиот месец општинскиот комитет на ВМРО-ДПМНЕ во Битола „тајно“ се всели во новите простории во центарот на Битола. Тогаш Марковска на новинарите им вети дека ќе им достави информација за тоа колку владејачката партија потрошила за новото партиско седиште. Сепак до ден денеска нема одговор за сумата која партијата ја платила за новиот комитет.

– Немам се уште информација колку пари чинат новите простории. Не можам ништо да кажам – ни изјави Марковска.


Јанева и нејзиниот тим се сликаа во новите простории


Скопје, 25 ноември, 2015 - 15:34 (META) 

Специјалното јавно обвинителство на својата фејсбук-страница ја објави адресата и  фото-галерија од просториите во кои Катица Јанева и нејзините 12 помошници-обвинители ќе ја водат истрагата за наводите што произлегуваат од содржината на незаконското прислушување.

„Новите простории на Јавното обвинителство за гонење кривични дела поврзани и кои произлегуваат од содржината на незаконското следење на комуникациите се наоѓаат на улица Митрополит Теодосиј Гологанов бр.28/2-3, Скопје“, информираат од Специјалното обвинителство.

 


Откриени две нови простории во гробницата на фараонот Тутанкамон


Каиро, 1 октомври, 2015 - 19:07 (META) 

Kралицата Нефертити можно е да е погребана во една од двете новооткринеи простории во гробницата на фараонот Тутанкамон, смета британскиот археолог Николас Ривс, пренесува „Би-Би-Си“.

Според Ривс, скeнарањата извршени со специјален радар, за чија употреба британскиот археолог добил дозвола од египетските власти, откриле две дополнителни простории, сокриени во ѕидовите на гробницата.

Инаку, Ривс се обидува да ја докаже својата теорија дека сè уште неоткриените посмртни останки на кралицата Нефертити, која владеела во 14 век пред новата ера, се наоѓаат во една од тие простории. Тој верува дека телото на Тутанкамон, кој умрел пред 3.000 години, на возраст од 19 години, било сместено во дел од гробницата оригинално направена за Нефертити.

Посмртните останки на Тутанкамон, за кој се смета дека е син на Нефертити, беа откриени во 1922 година.