!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шилегов води пред Трајановски во Скопје, ветува победа во вториот круг


Шилегов, 16 октомври, 2017 - 0:18 (META) 

Петре Шилегов, кандидатот на СДСМ за градоначалник на Скопје, прогласи победа во главниот град, која, како што рече, ќе биде потврдена во вториот круг од гласањето за две недели.

Шилегов вечерва на прес-конрефернција изјави дека води пред кандидадот на ВМРО-ДПМНЕ, Коце Трајановски, и дека станува збор за голема победа, без разлика дали таа ќе биде потврдена уште во првиот круг или не.

– Навистина зборот е збор. Ви ветив дека Скопје нема да биде вмровски град. Од вечерва Скопје го враќаме на граѓаните. И другите општини во земјава ги враќаме на граѓаните на Република Македонија. Скопје, градот убав, повторно се враќа на Македонија и тргнува со огрмни чекори наред. Да ја дочекаме победата за две недели. Граѓаните на Скопје и граѓаните на цела Македонија дадоа до знаење дека е доста од владеењето на ВМРО-ДПМНЕ. Ова, во секој случај, е голема победа на Скопје, без разлика дали е дефинитивна победата во првиот круг или не – рече Шилегов.

Тој и шефот на изборниот штаб на СДСМ, Миле Зечевиќ, претходно ги повикаа граѓаните да ја прослават победата на СДСМ на локланите избори пред Владата, каде обраќање ќе има лидерот на партијата и премиер, Зоран Заев.

Зечевиќ изјави дека СДСМ победил во повеќе од 40 општини и дека води во уште десетина.

– Македонија се гордее со овој величествен демократски ден – рече Зечевиќ, додека во седиштето на СДСМ членови на партијата пееја и скандираа „Шутка не ти бега Никола“.


МПЦ-ОА: Договорот со Бугарија може да помогне во решавањето на црковните прашања


Скопје, 25 септември, 2017 - 17:36 (META) 

Договорот за добрососедство меѓу Македонија и Бугарија, покрај регулирањето на општествената сфера, можат да помогнат и во решавањето на отворените црковни прашања, се вели во соопштението на Македонската православна црква – Охридска архиепископија (МПЦ-ОА) по денешната седница на Светиот архиерејски синод.

„Во оваа јубилејна година за МПЦ – ОА, владите на Република Македонија и на Република Бугарија објавија акт за пријателство, добрососедство и за соработка, чин во кој може да се препознае модел за решавање на отворените прашања од минатото за да се гради иднината меѓу братските соседни народи во рамките на евро-интеграциските процеси. Ваквите договори, покрај регулирањето во општествената сфера, можат да помогнат и во решавањето на отворените црковни прашања и да остварат своја конструктивна рефлексија во градењето на релациите меѓу црковните структури во регионот“, стои во соопштенито на МПЦ.

По полувековен опстој на автокефалниот статус на МПЦ-ОА, се додава во соопштението, Синодот ја изразува својата надеж дека „се ближи времето кога Сеправославната црковна полнота ќе ја препознае и прифати македонската црковна реалност, олицетворена во автокефалната МПЦ – ОА“.

Инаку, на 30 септември и на 1 октомври, на денот на празникот Собор на сите македонски светители, во Охрид ќе се одржи централната прослава на 50 години од возобновувањето на автокефалноста на МПЦ – ОА. Синодот, во соопштението, ги повикува народот, свештенството и монаштвото да земат учество во прославата.


Заев: Реални се шансите да добиеме чиста препорака од ЕК


Скопје, 8 септември, 2017 - 15:45 (META) 

„Иднината наша, како граѓани, иднината на Република Македонија, е во ЕУ и во НАТО. Реални се шансите наесен Македонија да добие чиста препорака од ЕК.  Реални се шансите Македонија да стане 30. земја членка на НАТО. Реалност се економските перспективи, спокој во семејствата, децата дома, нови вработувања, успешни претпријатија, европско образование, современо здравство“, порача премиерот и претседател на СДСМ, Зоран Заев, во неговиот говор по повод 8 Септември, Денот на независноста на Република Македонија, на прославата во местото Три Круши во Драчево, што ја организираше неговата партија.

– Чекорот кон слободата и кон шансите го направивме заедно. Исто како што на 8 септември пред 26 години граѓаните масовно, самостојно излегоа на референдумот и избраа независна Република Македонија, и ние во големо мнозинство, сплотени во различностите, со силна верба во вистината и во правдата, избравме слобода. Затоа што, ако нешто е темел на социјалдемокртаската идеја, тоа е нашето чувство за солидарност и за слобода. И бидете горди и на тоа. Оваа шанса да бидеме подобри е нашата иднина. Затоа подаваме рака на сите. Затоа се отворивме за сите. Затоа работиме со сите – рече, меѓу другото, Заев.

Тој на сопартијците им порача дека треба да се подготвени за различностите по која било основа и за критичката мисла.

Премиерот Заев пред прославата во Три Круши, на градските гробишта Бутел во Скопје оддаде почит и положи венци со свежо цвеќе на вечните почивалишта на претседателите на Република Македонија, Киро Глигоров и Борис Трајковски.


Македонија одбележува 26 години независност


Скопје, 8 септември, 2017 - 11:35 (META) 

Република Македонија денеска одбележува 26 години од референдумот на кој македонските граѓани се изјаснија за самостојна и суверена држава. Убедливо мнозинство, повеќе од 95 отсто од граѓаните што излегоа на референдумот на 8 Септември 1991 година позитивно одговорија на референдумското прашање „Дали сте за самостојна Македонија со право да стапи во иден сојуз на суверени држави на Југославија“.

На референдумот му претходеше Декларација за независност што првиот повеќепартиски македонски парламент ја усвои на 25 јануари 1991 година.  Државноста на Македонија прва ја призна Република Бугарија, по што следуваа признавања и од Турција, Словенија, Хрватска, Русија, Босна и Херцеговина…

Државата се осамостои монетарно со воведување на денарот на 26 април 1992 година, а потоа доби и своја Армија која роденденот го слави на 18 август.

На 8 април 1993 година со акламација во Генералното собрание на Обединетите нации, Македонија беше примена за 181. полноправна членка на светската организација, но поради противењето на Грција зачленувањето во ОН беше под привремената референца Поранешна југословенска Република Македонија.

По повод Денот на независноста, делегација предводена од претседателот на Владата, Зоран Заев, положи цвеќе на гробот на поранешните претседатели на државата, Киро Глигоров и Борис Трајковски, а делегација предводена од министерката за труд и социјална политика, Мила Царовска, пред споменикот „Ослободители на Скопје“.

Под мотото „Заедно кон врвот“, денеска во Крушево, во организација на Министерството за одбрана и Канцеларијата за врски на НАТО, се организира искачување на Бушева Планина. Најавено е присуство на министерката за одбрана Радмила Шекеринска, шефот на канцеларијата за врски на НАТО, морнаричкиот капетан Горазд Бартол, како и на амбасадорите на Обединетото Кралство и ЕУ, одбранбени аташеи во Република Македонија, припадници на МО и на АРМ и претставници на граѓански здруженија.

Во Свечената сала на Собранието, Одборот за доделување на државната награда „8 Септември“ ќе врачи една награда за животно дело и четири награди за остварување во областа на спортот во 2017 година, кои се доделуваат на спортисти, тренери и на спортски работници. Годинава добитник на наградата „8 Септември“ за животно дело е Иван Кочовски, поранешен шаховски селектор и актуелен стручен соработник на Шаховската федерација на Македонија. Други добитници на наградата се каратистот Петар Белистојановски, пливачот Александар Коцевски – Џајо, ракометарот Ристо Магдинчев и кајакарот Ѓокица Николовски.

Централната прослава по повод Денот на независноста се одржа вчера пред платото на Владата на Република Македонија под слоганот „Македонија слободна, слободно живее“. Домаќин на прославата беше Владата, а на присутните им се обрати премиерот Зоран Заев.


Заев: Постојат реални можности да добиеме препорака, а потоа и датум за преговори со ЕУ


Скопје, 7 септември, 2017 - 20:42 (META) 

Премиерот Зоран Заев, во обраќањето пред зградата на Владата по повод прославата на 8 Септември – Денот на независноста, рече дека во Македонија има одговорни политичари кои знаат што им е потребно на граѓаните, но има и свесни граѓани кои знаат што ѝ е потребно на државата.

Тој додаде дека од земја „генератор на криза“, Македонија е претворена во „мотор на развој на регионот“.

– Постојат реални можности Македонија да добие чиста препорака, а потоа и датум за преговори со Европската Унија. Реални се надежите и дека Република Македонија може да биде 30. членка на НАТО – рече Заев.

Тој додаде дека клучен тест се локалните избори, а Владата е определена да организира и да спроведе фер, демократски и регуларни избори, со нула толеранција за евентуални злоупотреби.

Според премиерот, друг тест се и реформите, за да се овозможи независно судство, објективни медиуми, независни институции, како и развој на добрососедски односи и регионална соработка.

Освен пред зградата на Владата, прослава по повод 8 Септември имаше и во Собранието, каде што претседателот на законодавниот дом, Талат Џафери, во обраќањето пред премиерот и пратениците рече дека пред 26 години биле поставени стратешките цели на државата, како на внатрешен така и на надворешен план.

– На внатрешен план, Македонија беше дефинирана како граѓанска држава која се темели врз индивидуалните и колективните човекови права и слободи, врз принципите на парламентарната демократија и владеењето на правото, почитувањето на приватната сопственост и пазарните законитости. Притоа, општество беше дефинирано како мултиетничко, мултикултурно и мултиконфесионално. На надворешен план, како приоритетна стратешката цел беше поставена целосната интеграција во евроатлантските структури – рече Џафери.

По повод стоте дена од конституирањето на Собранието, тој додаде дека ова парламентарно мнозинство „има храброст, волја, знаење и капацитет да направи значајни чекори напред во остварувањето на тие стратешки цели“.

– Секако дека во овие процеси очекувам свој придонес да даде и опозицијата, со аргументирана критика, меѓутоа и со конструктивни предлози. А мнозинството е должно да создаде услови за опозицијата да може сето ова да го артикулира преку институциите на транспарентен начин пред јавноста – додаде Џафери.


Распоред на настани, свечености и прослави за Денот на независноста


Скопје, 7 септември, 2017 - 11:04 (META) 

Денеска и утре во Скопје ќе се одржат централните свечености по повод прославата на 8 Септември – Денот на незавиноста, кој годинава се одбележува под мотото „Македонија слободна, слободно живее“.

Денеска:

  • 13 часот:  Свечено менувањето на државното знаме пред кабинетот на претседателот на државата во Вила Водно;
  •  17.30 часот:  Централната прослава почнува пред Владата, со изложби, театарски претстави и со настапи на гудачкиот квартет „Вива стринг“, хорот при Македонската опера и балет и на повеќе изведувачи од македонската забавна сцена;
  • 18 часот: Во касарната „Илинден“ ќе биде извршена почесна артилериска стрелба со испукување на 10 плотуни од страна на артилерискиот баталјон на Армијата на Република Македонија;
  • 18 часот: Претседателот на Собранието, Талат Џафери, ќе приреди прием во Кристалната сала во Собранието на Република Македонија;
  • 18 часот: Градскиот дувачки оркестар ќе одржи променаден концерт со познатите „Чекорници“ од Музејот на град Скопје до плоштадот Македонија;
  • 19.30 часот: Обраќање на премиерот Зоран Заев.

Утре:

  • 10 часот: Положување свежо цвеќе на вечните почивалишта на претседателите Киро Глигоров и Борис Трајковски и пред споменикот „Ослободители на Скопје“ пред Владата, од страна на делегации на Владата, предводени од премиерот Зоран Заев;
  • 11 часот: Во Свечената сала на Собранието, Одборот за доделување на државната награда „8 Септември“ ќе врачи една награда за животно дело и четири награди за остварување во областа на спортот во 2017 година, кои се доделуваат на спортисти, тренери и на спортски работници. Годинава добитник на наградата „8 Септември“ за животно дело е Иван Кочовски, поранешен шаховски селектор и актуелен стручен соработник на Шаховската федерација на Македонија. Други добитници на наградата се каратистот Петар Белистојановски, пливачот Александар Коцевски – Џајо, ракометарот Ристо Магдинчев и кајакарот Ѓокица Николовски.

Денот на независноста ќе се одбележува под мотото „Македонија слободна, слободно живее“


Скопје, 3 септември, 2017 - 14:59 (META) 

Денот на независноста, 8 Септември, годинава ќе се одвива под мотото „Македонија слободна, слободно живее“, а централното одбележување ќе се одржи пред и во Владата на Република Македонија на 7 септември, во попладневните и во вечерните часови, соопшти денеска на прес-конференција портпаролот на Владата, Миле Бошњаковски.

– Ги повикуваме сите граѓани на Република Македонија да бидат гости на Владата на Република Македонија. Владата ќе биде отворена за сите – рече Бошњаковски.

Активностите по повод на Денот на независноста ќе се одвиваат на 6, 7 и на 8 септември, а премиерот Зоран Заев обраќање ќе има на централното одбележување.

На 7 септември, министрите Горан Сугарески, Роберт Алаѓозовски и заменик-министерот Дејан Павлески ќе ја посетат реставрираната спомен-куќа на Блаже Конески во село Небрегово.

На 8 Септември, на Денот на независноста, делегација предводена од премиерот Заев на гробиштата во Бутел ќе положи цвеќе на вечните почивалишта на Киро Глигоров и на Борис Трајковски.

Одговарајќи на новинарско прашање за изминувањето на стоте дена од формирањето на владата, кои се совпаѓаат со претстојниот празник, портпаролот Бошњаковски рече дека во следниот период Владата ќе ги соопшти резултатите од досегашната работа.


Иванов побара повеќе пари за АРМ, Шекеринска повика на брзо зачленување во НАТО


Скопје, 18 август, 2017 - 22:04 (META) 

На воениот стадион во Градскиот парк во Скопје вечерва се одржа централната свеченост за одбележување на 25-годишнината од формирањето на Армијата на Република Македонија.

На свеченоста, која почна со плотуни од артилерско оружје, се обратија претседателот Ѓорге Иванов и министерката за одбрана Радмила Шекеринска. Шефот на државата во своето обраќање забележа дека армијата се ангажирала нез негов одлука, а Шекеринска побара ангажман за остварување на визијата за зачленување во НАТО.

– Во недостиг на ресурси и време, се почесто се случува армијата без одлука на Врховниот командат и без исполнети услови за прогласување на кризна состојба да се ангажира за задачи кои се во надлежност на други институции. Повторувам, армијата се ангажира без моја одлука и без исполнети услови за прогласување на кризна состојба. Тоа е сериозна повреда на законот што нема да ја толерирам. АРМ троши свои ресурси за туѓи задачи кои се во надлежност на други институции. Мора да се затвори кругот на одговорност за тоа кој е надлежен за што, кога и како –  рече Иванов.

Тој забележувајќи што не е вклучен во донесувањето одлуки, напомена дека се потребни повеќе пари за армијата.

– Како држава постојано ја нагласуваме нашата посветеност и подготвеност да бидеме дел од НАТО. Но, ако сакаме да ги користиме привилегиите, мора да ги поднесеме и одговорностите. Членството на Македонија во НАТО подразбира и буџет на Армијата соодветен на НАТО. А тоа е минимум два отсто од буџетот на државата – рече претседателот Иванов.

Според македонскиот претседател, во наредниот период АРМ треба да се посвети на четири клучни сектори,  односно помош во кризниот менаџмент, поддршка на Министерството за внатрешни работи во борбата против евентуален урбан тероризам, борбата против илегалната миграција и тероризмот, како и сајбер одбраната.

Министерката Радмила Шекеринска истакна дека патот кон формирањето армија во изминатите 25 години бил исполнет со бројни предизвици за кои, како што рече, најголемиот дел од припадниците на АРМ го знаат многу подобро и од неа и од многу претходни и идни министри.

– Денеска АРМ рамноправно учествува во меѓународни мировни мисии и добива највисоки оценки за подготвеност. Армијата на своите плеќи ја носи одговорноста за нашата безбедност, а ризиците и на светската и домашната сцена драстично се менуваат – рече министерката за одбрана.

На 18 август 1943 година на Славеј Планина, во областа Дебарца, е формиран баталјонот „Мирче Ацев”, кој се смета за првата организирана воена формација на НОВ на Македонија. Денот на формирањето на баталјонот се смета за роденден на АРМ.


Заев и Борисов на 2 Август ќе се поклонат на гробот на Гоце Делчев


Софија, 27 јули, 2017 - 14:21 (META) 

Владиниот организационен одбор за прослава на 2 Август, во координација со Собранието на Република Македонија и со претседателот на Република Македонија, организира голем број свечености, чествувања и обраќања, кои почнуваат во 8 часот со посета на црквата „Свети Спас“ во Скопје и на гробот на македонскиот револуционер Гоце Делчев.

Македонскиот премиер Зоран Заев и неговиот бугарски колега, Бојко Борисов, ќе положат цвеќе на гробот на Гоце Дечев, по што свое обраќање ќе има претседателот на Владата.

Во рамки на прославата по повод 114-годишнината од Илинденското востание и по повод 73-годишнината од Првото заседание на АСНОМ, претседателот Ѓорге Иванов ќе положи свежо цвеќе пред спомениците на АСНОМ и на Никола Карев, а ќе се поклони и пред споменикот на првиот претседател на Президиумот на АСНОМ, Методиј Андонов – Ченто, каде ќе има свое обраќање.

Свечености по повод Првото заседание на АСНОМ ќе се одржуваат во Меморијалниот центар АСНОМ, во Пелинце, каде ќе се обрати вицепремиерот за економски прашања, Кочо Анѓушев.

Централната прослава на 2 Август ќе биде на Мечкин камен во Крушево, а пред тоа во храмот „Свети Никола“ ќе биде одржана панихида.

Свечената програма на народниот собир на Мечкин камен ќе почне со пристигнувањето и со поздравот на коњицата, по што ќе следува церемонијата на положување свежо цвеќе на Споменикот на бранителите на Крушевската Република и со интонирање на химната на Република Македонија. На народниот собир пред присутните гости ќе се обрати претседателот на Собранието, Талат Џафери, по што е предвидена пригодна културно-уметничка програма.


ФРОДЕМ: Роденденската забава на ВМРО-ДПМНЕ, скапа парада на лажна сигурност


Скопје, 18 јуни, 2017 - 12:39 (META) 

„Вчера, на фамилијарна роденденска забава, по којзнае кој пат се изнаслушавме лажни зборови, измислици и самофалби. По кознае кој пат слушнавме за внатрешни и за надворешни непријатели, како и инфантилни пораки и блефови. Тоа беше скапа парада на лажна сигурност. Видовме, како купче персони, кои ја украдоа Македонија и ја приватизираа ВМРО-ДПМНЕ непречено продаваат магла, па дури и се закануваат“, порачува ФРОДЕМ во реакција на вчерашната прослава на 27. роденден на ВМРО-ДПМНЕ.

„Од друга страна, десетици илјадници луѓе по најразлични основи, од неразјаснети случаи, преку тешки монтирани прогонства, па сè до брутални бизнис-преземања, рекетирања, малтретирања и бркања од работа, секојдневно очекуваат да се почне со реална примена на Кривичниот закон. Затоа, ФРОДЕМ ја повикува новата власт без никакви задкулисни калкулации веднаш да пристапи кон враќање на поредокот и на правдата и кон конечното декриминализирање на Македонија“, стои во соопштението.