Владата потрошила 179.500 евра за прославата за НАТО и ЕУ


Скопје, 16 јули, 2018 - 15:26 (META) 

Владата информираше дека потрошила вкупно 179.500 евра за прославата „Одиме напред – Македонија во НАТО и ЕУ“ за сите градови.

Во оваа сума е вклучена организацијата на целиот настан, односно обезбедувањето на соодветна техника, озвучување, осветлување, бини, редари, технички персонал, сценска опрема, ангажман на 40 изведувачи кои што настапија во 15 градови ширум Македонија, транспорт на опрема и технички персонал, промоција на настаните, графички и визуелни решенија и активности за промоција.

„Трошоците за организацијата на настаните се скромни, по нормални пазарни цени. За промоцијата на настаните не се потрошени средства за реклами во медиумите, ниту пак се потрошени било какви средства за организиран превоз на публика од едни во други градови“, се вели во соопштението на Владата.

За ангажманот на домашните изведувачи во сите 15 града биле потрошени 75.500 евра, а за сценска опрема 49.000 евра.

„Сите останати потреби и услуги за организација на настаните, што подразбира обезбедувањето на соодветна логистика, 150 редари, технички персонал, заштитни огради, 15 шатори, 15 гитарски засилувачи на звук и клавијатури, транспорт на опрема и технички персонал, чини вкупно, за сите 15 настани во градовите 35.000 евра или околу 2.300 евра по град. Ангажман на лица за авторски труд за креативен концепт и реализација на промотивна кампања на социјални мрежи, графички решенија, видео продукција, визуелизации на бините и постпродукција со вкупен износ од 20,000 евра или околу 1.300 евра по град“, се додава во соопштението.

Од Владата додаваат дека прославата ја поддржале и локалните самоуправи, со организациска и логистичка помош.


СДСМ: Граѓаните достојно го прославија историскиот успех


Скопје, 16 јули, 2018 - 11:22 (META) 

На ВМРО-ДПМНЕ не и се битни ниту интересите на граѓаните, ниту иднината на државата, нивната единствена цел е одбрана на криминалот сторен од врвот на партијата, велат од СДСМ како реакција на соопштението на ВМРО-ДПМНЕ.

„ВМРО-ДПМНЕ во очај полни автобуси со граѓани и ги принудува да го бранат криминалот. Залудни се обидите на ВМРО-ДПМНЕ преку условување за амнестија да ја закочи македонската иднина. Македонија оди напред. Граѓаните се цврсто определени за влез во ЕУ и НАТО и затоа достојно го прославија историскиот успех – покана за влез во НАТО и датумот за преговори за членство во ЕУ. Граѓаните велат не за амнестија на криминалот на ВМРО-ДПМНЕ, граѓаните велат да за членство во ЕУ и НАТО, граѓаните велат да за македонската иднина“, се вели во партиското соопштение.


Владата денеска треба да објави колку потроши за прославата


Скопје, 16 јули, 2018 - 10:52 (META) 

Се очекува Владата денеска да го објави деталниот извештај со трошоците направени за големата прослава што се одржа во саботата во 15 градови низ Македонија по повод поканата за преговори за членство во НАТО.

Од Владата велат дека извештајот е во подготовка и се очекува во текот на денот да биде испратен до медиумите.

Пратеникот на ВМРО-ДПМНЕ, Антонио Милошоски, објави дека според негови информации за прославата се потрошиле 400.000 евра буџетски пари. Оваа информација не беше потврдена од Владата.

На прославата настапија околу четириесетина изведувачи. Етно бендот Љубојна и пејачот Влатко Лозаноски – Лозано, ги откажаа во последен момент своите настапи.

Дел од музичарите тврдеа дека не биле конкретно информирани за природата на настанот, но авторски договор објавен преку социјалните мрежи покажува дека авторите знаеле што потпишуваат.


Заев: Прославата чини колку две театарски претстави, опозицијата да не сее омраза


Скопје, 13 јули, 2018 - 13:34 (META) 

Прославата што е најавена за утре во повеќе градови низ Македонија, во врска со врачувањето на поканата на Македонија за почеток на преговори за членство во НАТО, за премиерот Зоран Заев е многу вредна и има за цел „да се одбележи децениската аспирација на Република Македонија“.

Тој појасни дека прославата се организира со одлука на Влада, дека концептот значи децентрализација, различна и квалитетна музика во многу градови, богата културна програма и според него ќе чини колку две театарски претстави што ги финансира државата.

– Трошоците се од буџетот, а вклучуваат ставки за бина, озвучување, осветлување, надомест за музичарите, промоција – рече Заев и додаде дека службите за односи со јавност веднаш ќе ја објават висината на трошоците откако ќе ги имаат целосните информации од сите субјекти кои се вклучени во настанот.

Премиерот апелираше до опозицијата да престане да сее омраза пред демократското мнозинство во Македонија.

– Македонија заслужи да прослави, затоа ја повикувам опозицијата да им честита на граѓаните и да престане да врши притисок врз музичарите кои на најтранспрентен и чесен начин учествуваат во прославата. Опозицијата треба да се одважи да ја поддржи македонската иднина и да се откаже од сеење омраза, затоа што дури и музичарите и групите низ Македонија се граѓани кои ќе го соопштат својот став на самиот референдум – порача премиерот.


На „Твитер“ за прославата: Ало Влада, истресете го ВМРО од себе!


Скопје, 12 јули, 2018 - 13:13 (META) 

Голем број на граѓани на социјалните мрежи реагираа на најавената „граѓанска прослава“ на Владата по повод поканата за почеток на пристапните преговори за членство во НАТО. Прославата ќе се одржи во сабота во 15 градови, а ќе настапуваат 40 музичари меѓу кои Кирил Џајковски, Дуке Бојаџиев, Фолтин, Архангел, Љубојна, Нокаут, Ферус Мустафов, Владо Јаневски, Ареа и други.

Граѓани револтирано прашуваат колку чини прославата и кој ќе го плати хонорарот на учесниците, а дел од нив владеењето на СДСМ и организацијата на прослави го споредија со владеењето на ВМРО-ДПМНЕ.


Владата организира прослава во 15 градови за поканата за членство во НАТО


Скопје, 12 јули, 2018 - 10:50 (META) 

Владата организира „голема граѓанска прослава“ за поканата за членство во НАТО, во 15 градови ширум земјата заедно со преку 40 домашни артисти и музичари в сабота, 14 јули.

„Македонија започнува нова приказна – добивме покана за членство во НАТО и датум за преговори со ЕУ.  Застануваме рамо до рамо со најсилните земји од Европа и светот. Македонија зачекорува во ново време. Време на надеж, на победи, на гордост. Време на сигурност и безбедност. Доаѓа време на подобар живот за сите граѓани тука во нашата земја. Се изборивме за сигурна иднина“, се вели во поканата до граѓаните на фејсбук-настанот на Влада.


Заев: Искрено се надеваме дека МПЦ-ОА ќе стане дел од православната заедница


Охрид, 28 мај, 2018 - 11:44 (META) 

Премиерот Зоран Заев, кој со претседателот Ѓорге Иванов, претставници на државниот врв, на Синодот и свештенството на МПЦ предводени од архиепископот охридски и македонски, г.г. Стефан, присуствуваше на свечената академија по повод 1.000 години од Охридската архиепископија, рече дека и тогаш и денеска, Охридската архиепископија беше една важна одредница во историјата на црквата, во историјата на христијанството на овие простори.

– Охридската архиепископија претставувала духовно средиште на христијаните и народите што ја прифатиле оваа верска припадност на целата територија на географска Македонија, и била обединувачки, над-етнички фактор -, рече Заев и додаде дека постои десет векови поврзаност и континуитет, со колевката, од која произлезе духовната сувереност на народот кој се збра околу идејата за своја држава и се избори за неа.

Премиерот во своето обраќање подвлече дека „Охридската архиепископија го поврза своето постоење со Македонската православна црква, која иако се соочува со бројни искушенија, никогаш не посегнала по ништо што е туѓо, а на својата автокефалност се повикува како што на неа се повикуваат сите помесни православни цркви денеска.“

– Искрено се надеваме дека многу скоро, ќе преовлада христијанската љубов и добрата волја и дека и МПЦ-ОА ќе стане дел од единството на православната заедница. Повторно ќе се повикаме на вредностите на древната Охридската архиепископија која била духовната обединителка на православните народи, и уверени сме дека нејзиниот дух возобновен во Македонската православна црква може да прерасне во алка на помирување и обединување околу изворните принципи на заедништво на православната црква – додаде Заев.

Архиепископот г.г Стефан рече дека Охридска архиепископија е сведок дека вистината секогаш е посилна од невистината, правдата од неправдата и љубовта од омразата.

-Што се не доживеа оваа наша древна Црква од падот на царството и државата, од освојувањата и владеењата и од истоверни и од друговерни, од уривањата и грабежите, од палењата и пустошењата…Но духот на оваа наша славна Архиепископија беше тоа што му даваше утеха на нашиот народ и го крепеше да опстои. Под нејзина закрила ги зачувавме и душата и верата, и од неа црпевме морални и духовни сили. Таа ни беше единствената поткрепа и надеж во ропствата, единствен излез од беспаќата и патоказ кон вечноста – рече г.г Стефан.

Претседателот Ѓорге Иванов, кој е и покровител на манифестацијата за одбележување на илјадагодишнината од формирањето на Охридската архипепископија, рече дека од денот на независноста, Македонската православа црква го преживува сето она низ што минувала и низ што се уште минува Македонија.

– Години исполнети со блокади, изолации и непризнавње кои создаваат кризи, кризи што предизвикуваат поделби наместо сплотеност, цинизам наместо добронамерност, сеирџиство наместо солидарност и омраза наместо љубов, губење на умереноста, трпеливоста, чесноста, добрината, човечноста. Во вакви сложени услови Македонската православна црква се соочува со двоен предизвик, првиот да остане верна на изворната христова порака и вториот да биде општествено релевантна – рече Иванов.


Почна одбележувањето на јубилејот 25 години на Фондацијата Отворено општество – Македонија


Скопје, 4 мај, 2018 - 13:50 (META) 

Во Музејот на современата уметност во Скопје вчеравечер беше свечено отворена прославата на 25-годишнината од постоењето на Фондацијата Отворено општество – Македонија (ФООМ).

Пред бројни гости, одбележувањето на големиот јубилеј почна со промоција на документарен филм и изложба „25 години посветени на градењето отворено општество во Македонија“, преку кои присутните се запознаа со работата на Фондацијата во изминатите години, како и проектите и програмите кои се реализирале со нејзина помош.

За почетоците на ФООМ во Македонија, но и за нејзиното значење низ годините синоќа зборуваа заменик-претседателот на фондациите Отворено општество, Леонард Бенардо и регионалниот директор на фондациите Отворено општество за Европа и кодиректор на Европската иницијатива за отворено општество Жорди Вакер.

На работењето на Фондацијата и многубројните предизвици со кои таа успешно се справува во изминатите 25 години синоќа се осврнаа и Владимир Милчин, поранешен извршен директор на ФООМ, Маја Бојаџиевска, претседателка на управниот одбор на ФООМ и Фани Каранфилова-Пановска, извршна директорка на ФООМ.

– Фондацијата била и ќе биде меѓу првите за да ги брани правата и слободите на граѓаните, особено на маргинализирани заедници и на нашите сограѓани од помалите етнички заедници. Граѓанското општество и неговиот развој сме го поддржувале, го правиме тоа и денес и ќе прододолжиме понатаму на истиот начин, за да биде рамноправен партнер на институциите во реформите и креирањето на политиките, но и за да може независно да ја надгледува работата на властите, критички да ја анализира и да се застапува за промени – истакна Каранфилова-Пановска.

Серијата настани посветени на значајниот јубилеј продолжуваат денеска со регионалната конференција „Зошто Европа, зошто сега?“ која ја отворија Фани Каранфилова-Пановска, Жорди Вакер и Лукаш Холуб, раководител на Одделот за политички прашања, правда и внатрешни работи при Делегацијата на Европската Унија.

На конференцијата, аналитичари, новинари, членови на граѓански организации од Македонија и регионот ја разгледуваат перспективата на земјите од регионот за интегрирање во Европската Унија.


Приврзаници на чешкиот претседател Земан ги нападнаа новинарите по изборната победа


Прага, 28 јануари, 2018 - 14:46 (META) 

Чешката полиција поведе истрага откако редарите и симпатизерите на чешкиот претседател Милош Земан ги нападнаа новинарите во неговиот изборниот штаб по победата во вториот круг од претседателските избори во земјата.

Редарите и симпатизерите синоќа со тупаници ги напaднаа акредитираните новинари, турнаа и скршија камера на чешката приватна телевизија „ТВ Нова“ и ги навредуваа медиумските работници.

Нападот се случи во хотелот ТОП во Прага, каде што во изборниот штаб се славеше победата на претседателот Земан.

Инцидентот се случи кога новинарите сакаа да го снимаат доаѓањето на итната помош поради еден гостин на Земан, кој видно алкохолизиран падна со шишето пиво в рака.

Поради тоа реагираа од изборниот штаб, почнаа да ги туркаат новинарите за да ја затворат салата и да ги спречат да снимаат.

Еден од редарите ја фрли камерата на земја на приватната телевизија, а во тепањето се приклучи и еден од гостите на претседателот со иста жолта новинарска пропусница кој со тупаници нападна еден од новинарите, а од насилство неа беа поштедени ниту новинарките.

Од кабинетот на претседателот се правдаат дека напаѓачите не се од државното обезбедување на претседателот и ги повикаа новинарите на кафе како гест на извинување.

Инцидентот го осудија и „Репортери без граници“ од каде истакнаа дека тоа е срам за европската демократија и дека нападите врз новинарите мора да престанат.


Православните христијани денеска го слават Божиќ


Скопје, 7 јануари, 2018 - 10:30 (META) 

Православните христијани во Македонија денеска го слават Рождеството Христово-Божиќ. Во сите храмови на Македонската православна црква изутринава се одржуваат божиќни литургии, a централното одбележување е во Соборниот храм „Св. Климент Охридски“ во Скопје, каде што архиепископот охридски и македонски г.г. Стефан ќе богослужи литургија на Св.Василиј Велики.

Во неговата порака која што ја упати по пово Божик, тој рече дека „новородениот Богомладенец постојано не повикува преку верата и добрите дела да се спасуваме од суетите и минливоста, не повикува да не ги заборавиме оние коишто страдаат и имаат потреба од помош, од подадена рака и утеха.“

„Претстојното лето Господово нека биде исполнето со надеж дека и во Македонија, и помеѓу иселените нашинци и насекаде по светот ќе завладеат мирот и добрата волја. Ние како народ – тоа најдобро ќе го постигнеме ако живееме според верата и преданието на светата Црква. Треба да опстоиме во борбата за нашето право, достоинство и наследство, мудро чувајќи ја и вреднувајќи ја жртвата на нашите доблесни предци“, се вели во пораката на г.г Стефан.