Заев ги финишира разговорите со Демократската партија на Турците


Скопје, 28 март, 2018 - 15:26 (META) 

За проширувањето на владината коалиција, премиерот Зоран Заев рече дека ги допрецизира договорите со Демократската партија на Турците и се надева дека до идниот вторник, тој процес ќе биде завршен.

На новинарско прашање врзано за овој процес, тој исто така одговори дека пратеникот од Турската демократска партија веќе учествува во поддршката на законските решенија и процедурите во Парламентот.

– Прво треба да ја заокружиме оваа соработка, а после ќе разговараме и со другите партии. Пред сè размислувам за Беса и тоа двете групи. Се надевам дека имаат нешто кое ќе ги спои како една група, а потоа ќе разговараме и со другите опозициони партии и пратеници – рече Заев.

На новинарско прашање за ставот на ДУИ во однос на проширување на коалицијата, Заев рече дека ставот на владејачката коалиција е да ги остави отворени вратите.

– Уште кога го објавивме договорот за коалиција, рековме дека остануваме со отворени врати. И од тој аспект, оставена е можноста на премиерот секогаш да разговара со политичари, пратеници, партии кои се подготвени да ја поддржат програмата на владата, посебно позициите во поглед на актуелните прашања во Македонија. Зборувам за прашањето за проблемот со името, реформите, и за концептот “едно општество за сите“ – додаде Заев.

Тој објасни дека има пратеници и политички партии кои се во опозиција, а не се согласуваат со најголемата опозициска партија.

– Тие негуваат концепт или филозофија кој е близок на владејачкото мнозинство. Тоа го препознавме и од тука се иницијативите и причините да разговараме со сите. Штом ќе ја поминам оваа фаза, од Ахмети и другите коалициони партнери ќе барам согасност за евентуално зголемување на коалицијата и бројот на парламентарното мнозинство – дополни Заев.


Проширувањето на ЕУ, тема на состанок на министрите од Западен Балкан


Сараево, 16 март, 2018 - 15:52 (META) 

Министрите за надворешни работи на земјите од Западен Балкан, меѓу кои и македонскиот министер Никола Димитров, одржуваат состанок во Сараево посветен на Стратегијата на ЕУ за проширување со земјите од Балканот и спроведувањето на заклучоците од Самитот во Трст во 2017 година, составен дел од Берлинскиот процес.

На состанокот учествуваат и заменик-премиерот и министер за надворешни работи на Бугарија, Екатерина Захариева, државниот министер за Европа и Америка на Обединетото Кралство на Велика Британија и Северна Ирска, Сер Алан Данкан, генералниот директор во Европската комисија, Кристијан Даниелсон и генералниот секретар на Регионалниот совет за соработка(РСС), Горан Свилановиќ.

Свилановиќ изјавил дека една од главните активности на Советот во овој период е учество во заедничките подготовки на Дигиталниот самит на шесте земји од регионот што треба да се одржи во Скопје на 18 и 19 април.

„Подготовките на овој амбициозен Самит се во поодмината фаза и на него ќе се разговара за бројни практични и стратешки прашања – од намалување на цените на роамингот, интеграција на Западен Балкан во бројни дигитални иницијативи на ЕУ, до реформите на јавните управи преку дигитализација“, соопшти РСС.

Димитров, како што официјално е соопштено претходно во Скопје, ќе учествува и на министерската конференција за Фондот за Западен Балкан, каде ќе се разгледаат досегашните резултати од работата на оваа организација, како и нејзините идни активности.

За време на престојот во Сараево, Димитров ќе учествува и на конференцијата „Бергедорф раунд тејбл“ (Bergedorf Round Table) која оваа година се организира на тема „Долгиот пат кон Европа: Западниот Балкан меѓу домашните предизвици и геополитиката“, а на која ќе учествуваат високи владини претставници и меѓународни експерти.


Лавров: Проширувањето на НАТО е грешка и кршење на „џентлменскиот договор“ со САД


Москва, 19 февруари, 2018 - 11:51 (META) 

Проширувањето на НАТО е грешка и истовремено претставува кршење на „џентлменскиот договор“ меѓу САД и повеќето европски земји (дека Алијанската нема да се шири кон исток) од 1990-те години, вели шефот на руската дипломатија Сергеј Лавров, во интервју за српската новинска агенција „Бета“, одговарајќи на прашањето – „Дали Москва има намера да се спротивстави на очекуваното пристапување на Македонија во НАТО?“.

– Ние постојано ги советуваме нашите колеги од НАТО дека оваа линија ( веќе има три бранови на експанзија, а сега се подготвува уште еден) не го поткопува само она што е договорено во 1990-тите (дека никој нема да ја обезбеди нивната безбедност на сметка на безбедноста на други), туку, е сериозен предизвик за заедничката европска стабилност и безбедност. Обидите се континентот да се подели на два дела. Обидите се овие линии на поделба да се преселат на Исток, поблиску до нашите граници – вели Лавров.

Министерот за надворешни работи на Русија нагласува дека ваквата политика предизвикува огромна штета на напорите за обезбедување стабилност и безбедност на европскиот континент.

– Ништо што сега се прави во НАТО, не ја зголемува безбедноста, вклучувајќи ја и безбедноста на балканските држави, кои, впрочем, не ја загрозуваат безбедноста на Русија воопшто. Ништо од она што се случува сега не е чекор кон подобрување на способноста на НАТО да одговори на вистинските, а не на измислените закани. Не гледам како овие три бранови на проширување го направија НАТО поспособен, на пример, во сузбивање на терористичките и заканите од криминалот со дрога, вклучувајќи ги и оние што потекнуваат од Балканот, каде што, по апсолутно неоправданото, нелегитимно, унилатерално прогласување независност на Косово, беше создадена територија како пример за корупција, што се нарекува “црна дупка” – вели Лавров во интервјуто.


Могерини и Захариева оптимисти за датумот за преговори и за решение на спорот за името


Софија, 16 февруари, 2018 - 12:45 (META) 

Високата преставничка на ЕУ за надворешна и безбедносна политика, Федерика Могерини и министерката за надворешни работи на Бугарија, Екатерина Захариева, која е актуелен претседавач со Советот на ЕУ, се оптимисти дека во јуни Македонија и Албанија ќе добијат датум за почетокот на преговорите за членство во Европската Унија.

– Она што е многу важно за Стратегијата на ЕК за Западен Балкан е што дава шанса за сите држави од регионот. Се надевам дека во јуни на Советот ќе биде донесена одлука почеток на преговори со Скопје и Тирана. Сметам дека е голема веројантоста тоа да се случи. Она што го чув на вчерашната дебата меѓу колегите за Страгијата има големи шанси тоа да се случи. Државите треба да работат интензивно за да ги исполнат реформите и ние навистина би сакале тоа да се случи – рече Захариева на денешната прес-конференција по работната сесија на Неформалниот состанок на Министрите за надворешни работи од земјите – кандидати за членство во ЕУ – Гимних (Gymnich), кој оваа година се одржува во Софија, Република Бугарија.

Одговарајќи на идентично прашање, дали може да се очекува датум за преговори за некоја од земјите на Западен Балкан, Могерини изјави дека за време на бугарското претседателство „имаме можност да направиме напредок“ во однос на ова прашање.

– Покрај земјите кои веќе се во фаза на преговори, од сега па до јуни постои можност за отпочнување на преговори со други земји од регионот – рече Могерини.

Во врска со спорот за името, Захариева рече дека на состанокот не било разговарано за ова прашање, но нагласи оти е охрабрена дека е возможно во скора иднина да се најде решение.

– Се радувам што двајцата министри и во Софија ги продолжија неформалните разговори за решавање на спорот. Од искажувањето на двате страни јас сум охрабрена дека е возможно во догледна иднина да се најде решение. Дали сум оптимист? Мислам дека сум поскоро реалист, бидејќи гледам политичка волја од двете страни за изнаоѓање на решение кое ќе помогне за членството во НАТО и за иднината на Скопје во ЕУ – изјави Захариева, одговарајќи на новинарско прашање.

Високата претставничка на ЕУ, истакна дека дијалогот меѓу Скопје и Атина е доста охрабрувачки.

– Ние му посветуваме внимание и го поддржуваме, овој дијалог. Чекорите што се преземаат се многу позитивни за натамошниот развој на настаните. Потребно е политичко лидерство и храброст, но, она што мислам дека е најважно е имањето на јасна визија за тоа што е потребно за сопствените граѓаните – истакна Могерини, додавајќи дека е импресионирана од дијалогот меѓу Македонија и Грција и оти се надева дека наскоро ќе доведе до добри резултати.


Руско МНР за Стратегијата за Западен Балкан: Нашиот став не е „Со нас или против нас“


Москва, 9 февруари, 2018 - 10:42 (META) 

Русија не гледа никакви пречки во развојот на односите со земјите кои сакаат да станат членки на Европската Унија и кон нив не пристапува по принципот „со нас или против нас“, изјави вчера на прес-конференција портпаролката на руското Министерство за надворешни работи, Марија Захарова прашана за коментар на Стратегијата на Европската комисија за проширувањето на ЕУ со земјите од Западен Балкан, меѓу кои е и Македонија.

Захарова не сакаше да ја коментира Стратегијата, посочувајќи дека првин „треба да ја проучат“, а потоа ќе ги „споделат проценките“.

– Што се однесува до нашите односи и со земјите од Западен Балкан и со земјите од Европската Унија тие имаат суштинска вредност за нас. Ние ги развиваме односите со овие држави, како и со интегративните асоцијации во кои тие припаѓаат – рече Захарова, одговарајќи на прашањето како руското МНР ја оценува Стратегијата на Европската комисија и какво влијание ќе има таа на односите на Москва со земјите од овој регион и со Европската Унија.

Таа истакна дека позицијата на Русија секогаш била јасна по ова прашање.

– Ние, се разбира, тргнуваме од членството во ЕУ и соодветните обврски на земјите од Унијата, и се залагаме за хармоничен развој во неколку правци, како во билатералниот формат, така и во формат на Унијата. Што се однесува до оние змеји кои не се членки на ЕУ и го разгледуваат нивното членство или поблиска интеракција со Европската Унија, не гледаме никакви пречки во развојот на односите со нив и никогаш не го поставивме прашањето „со нас или против нас“. Ние секогаш сме за усогласување на овие односи. Ние веруваме дека практиката и искуството покажуваат дека таквиот пат е можен – изјави Захарова.


„Фајненшл тајмс“: ЕУ ќе прими шест држави од Балканот, меѓу нив и Македонија


Лондон, 2 февруари, 2018 - 18:19 (META) 

Планот на ЕУ е во своето членство да прими шест држави: Албанија, Србија, Црна Гора, Босна и Херцеговина и Македонија, но и Косово, пишува „Фајненшл тајмс“.

Според весникот, главната причина за таквиот потег на Брисел е што Балканот служи како главен „терен“ преку кој илјадници емигранти стигнуваат до тлото на Европската Унија. Меѓутоа, „Фајненшл тајмс“ тврди и дека стратезите на ЕУ стравуваат дека Русија опасно ја шири својата зона на влијание, токму во регионот каде што традиционално веќе има сојузници.

Новиот план на Брисел ќе ѝ биде претставен на Европската комисија на 6 февруари, кога ЕУ треба да го претстави својот план за Западниот Балкан. Се очекува новиот план да биде усвоен, пишува ФТ.

Рокот за „големото проширување на ЕУ“ е датумот кој веќе беше спомнуван во српската јавност како рамка до која Србија треба да биде примена во ЕУ, а тоа е 2025 година.

„Фајненшл тајмс“ истакнува дека шесте држави сепак ќе мораат, пред конечниот прием во ЕУ, дефинитивно да ги решат отворените прашања, како и проблемот со корупцијата. Во таа смисла најблиску до достигнувањето на целта се Србија и Црна Гора.

Се истакнува и дека Бугарија, која во моментов претседава со Унијата, но и Австрија, која е следна, како свои приоритети го одредија токму проширувањето на ЕУ на Западниот Балкан.


Критериумите за земјите од Западен Балкан се построги од претходно, призна Даниелсон


Брисел, 5 декември, 2017 - 15:22 (META) 

Кристијан Даниелсон, директор на Комесаријатот за проширување на ЕУ, денеска изјави дека земјите од Западен Балкан минуваат низ многу потешки реформски процеси при пристапувањето во ЕУ во споредба со државите што се приклучиле на Унијата во претходната декада.

– Постои силен политички ангажман. Причината е прилично јасна: реформите на Западен Балкан се бараат затоа што сметаме дека на Западен Балкан има повеќе луѓе кои не сакаат да ги видат реформите и кои би биле задоволни со ситуацијата каква што е денес. Затоа политичките барања се поголеми – изјави Даниелсон.

Во својот говор на конференција „Западен Балкан на раскрсница“, која ја организираше бриселската организација „Пријатели на Европа“, Даниелсон на западнобалканските земји им порача да се фокусираат на регионалната соработка и на заедничкиот пазар затоа што тоа е паралела на заедничката царина, од која сите земји ќе бидат дел кога ќе станат дел од Унијата.

– Генерално, кога станува збор за трговија, мој цврст совет е да се фокусирате на регионалната трговија, а не на трговијата со ЕУ, затоа што таму се вистинските потенцијали за економски пораст – порача Даниелсон.


Фабриката „Тритекс“ отвори нов погон во индустриската зона во Прилеп


Прилеп, 20 август, 2017 - 11:13 (META) 

Текстилната компанија „Тритекс“ го прошири својот производствен капацитет со изградба на нов погон во Прилеп. Фабриката се наоѓа во индустриската зона „Прилеп 1“ и се протега на површина од 4.000 метри квадратни. Во неа, како што посочија сопствениците, ќе има околу 300 нови вработувања.

„По повеќегодишна работа отворивме современ објект кој ќе започне да работи од понеделник“, посочи сопственикот на „Тритекс“, Дејан Наумоски.

„Тритекс“ е македонски бренд кој на пазарот опстојува 20 години. Компанијата е позната по производство на долна облека, изработена од памук.


ЕУ ги прошири санкциите кон Северна Кореја


Брисел, 10 август, 2017 - 20:17 (META) 

Европската Унија денеска ги прошири сакнциите кон Северна Кореја, додавјќи на црната листа неколкумина севернокорејски функционери и фирми, јавуваат светските агенции. Ваквата одлука на ЕУ следи по заострувањето на реториката меѓу Северна Кореја и САД поради нуклеарните проби и тестирањата на балистички ракети што ги врши Пјонгјанг.

На списокот, како што пренесуваат агенциите, се додадени девет лица и четири фирми. Со ова, на црната листа на ЕУ сега се наоѓаат 103 лица и 57 фирми.

Северна Кореја вчера предупреди дека би можела да истрела ракета во правец на американскиот остров Гуам во Пацификот, на што претседателот на САД, Доналд Трамп, им порача на властите во Пјонгјанг дека ќе се соочат со „оган и гнев“.

Советот за безбедност на Обединетите нации на 5 август донесе резолуција која предвидува воведување нови, поостри санкции кон Северна Кореја, откако во јули властите во Пјонгјанг тестираа нова интерконтинентална балистичка ракета, која, како што изјави севернокорејскиот лидер, Ким Џонг-ун, може да го погоди копното на САД.


Бибер: Владата во Македонија може да го разбие циклусот на цинизам за проширувањето на ЕУ


Трст, 21 јули, 2017 - 16:51 (META) 

Новата влада во Македонија може да биде импулс за разбивање на циклусот на цинизам што владее во Европската Унија и во земјите од Западен Балкан, во однос на проширувањето на Унијата, вели Флоријан Бибер, професор на Универзитетот во Грац и член на советодавната група за политиките за внесување на Балканот во Европа, во интервју за „Јуропиан Вестерн Балканс“.

Бибер го дефинира ваквиот став одговарајќи на прашањето за тоа која, според него, е најважната причина за забавувањето на процесот на европската интеграција на земјите од Западен Балкан, односно дали е тоа „заморот од проширување“ кај ЕУ или, пак, недостигот од волја за реформи во регионот.

Според него, станува збор за ситуација што наликува на прашањето за јајцето и за кокошката, односно дека двете работи не може да се раздвојат.

– Недостигот од волја за реформи се темели на фактот дека земјите од Западен Балкан не ги гледаат наградите во однос на членството во ЕУ. Дури и заморот е одвраќање, а политичките лидери на ЕУ чувствуваат дека не можат да го промовираат проширувањето бидејќи нивните граѓани не го сакаат тоа, што не е сосема искрено. Да, повеќето граѓани на ЕУ се скептични за проширувањето, но, од друга страна, проширувањето не е прашање со висок приоритет. Проширувањето не им се допаѓа многу, но истовремено не се ниту особено против. Ако владите на ЕУ направеа повеќе во ситуацијата, можеа да го протуркаат проширувањето. Но, владите се дефокусирани од сите други кризи и не сакаат да вложат енергија во тоа. Недостигот од реформи во регионот и недостигот од посветеност во ЕУ се во симбиоза. Мора да се скрши циклусот – вели Бибер.

Во тој контекст, тој нагласува дека одговорот можеби е во нова влада и како пример ја наведува Македонија.

– Новата влада е очигледно многу посветена на реформите и на желбата за враќање на патот кон ЕУ и тоа може да помогне во ставање крај на статус кво шемата. Во моментов, државите од Западен Балкан се цинични околу тоа дека ЕУ навистина не ги сака, а ЕУ е цинична дека регионот не е подготвен да ѝ се приклучи. Граѓаните се цинични во однос на нивните влади и во однос на ЕУ. Тие мора да го разбијат овој циклус на цинизам и да кажат: „Ако имаме заедничка цел и сме посветени на пристапувањето во ЕУ, можеме да направиме нешто“. Можеби новата влада во Македонија ќе биде импулс за промена на овој вид на динамика – заклучува Бибер.

Интервјуто со Бибер е направено за време на Форумот за граѓанско општество што се одржа во Трст на 11 и 12 јуни оваа година.